حين يزهر الحجر

١١

مساء السعادة
حين يزهر الحجر
الجزء الحادي عشر

صار براق بوجهي..مشيت حيل وفتت للبيت..
صاح علي ..مهرة انتظري مهرة لحظة..
ابد ولا اهتميت...
فتت امي بالمطبخ سلمت عليها وكبل للغرفة..
منا طالعة روحي ومنا براق طلعلي..
ابد مالي خلك...
زهرة لكيتها ترتب بجنطتها مالت الملابس..
ضجت بالزايد لان مابقى شي وتروح...
حاجتني مجاوبت جنت مخنوكة كلش...
عافت الملابس من ايدها وكامت...
شبيج مهرة؟؟
مجاوبتها ذبيت ملابسي وبدلت وهي تحجي مستغربة تصرفي...
تسال وبصوتها خوف مهررة شبيج ولج خية شبيييج جاوبيني...
عطت بيها حيل..
كاااااافي ...
جفلت وصفنت بوجهي ..
بس باوعت بوجهها انفجرت بالبجي...
استغربت وحضنتني ..
بقيت اشكيلها من شجاع ومن حيرتي ويا وقهري ع فراكها..
هي تسمع ومخلية راسي ع صدرها وتبجي بهدوء...

دخلت امي هبطت من شافتنا..
مسحت دموعي وابتسمت كذب..
هي اجت ..شبيجن يما ياستار ؟؟
لا يما افكر بزهرة حتفاركني من شفتها ترتب بجنطها متحملت..
شبكتنا امي وبقت تبجي..
انوب انقهرت بزايد لان قهرت امي...
مسحنا دموعها وبوسناها...
كافي حجية اشو عجبتج السالفة..
كلنا حنتزوج وحتى انت ندورلج رجال..
ضحكت وكفختني..
انجبي ولج برعة ههه...
ضحكت وياهم بس قلبي موجوع ومقهورة..
افكر شحيصير بوضعي المخربط...

وراها كالت امي تعالو اكلو كافي نكد...
اكلت لكمتين نفسي مسدودة كلش..
جنت اكل كومة ..هسه بس انغث وي شجاع تنسد نفسي عن كلشي...
اسمع صوت براق يحجي ودي ادخل املخه كد مكارهته وصار عقبة بطريقي..
رجعت للغرفة غطيت وجهي ونمت لان زهرة فاتحة الضوة ترتب جنطتها...
فزيت البيت هدوء وسنطة..
الغرفة ضواها قليل مااميز الساعة شكد..
فوني مغلق جريته من جوا المخدة وفتحته...
اف ساعة ب٣ ونص ..
اجت المسجات تهلهل والمكالمات..
١١٣ مكالمة !من شجاع
ومسجات لا تعد ولا تحصى..
فتحتهم واشوف الكلام والتهديد وبس صبريلي واني الج وبسيطة ويصير خير..
ضحكني مسجاته مالت واحد مفحمة اعصابه...

واني اقرا خابر..
كلت مااجاوبه واغثه مثل ماغثني مساع...
خمس مكالمات مجاوبت..
دز مسج ..
فضة جاوبي لا اجي لبيتكم هسه ترى اعصابي تلفت بسببج وصبري وصل حده..
يبوو مدام صرت فضة معناها مطنكر خل اجاوب...
خابر وجاوبت..
بس من فتحت الخط مثل اليفكك قنبلة اخاف اسمع صوته...
فتحت الخط واجاني صوته..
اني شمحذرج؟؟؟
طبعا هو محذرني مااغلق الفون ابد واذا صار ظرف اراسله من زهرة...
بس عناد بي غلقته لان قهرني..
سكتت مجاوبته..
واحس صرخته شكت اذني..
ولج هيييييييييي اني شكاااايل؟؟؟؟
بقيت ابلع ريك وانكت من الخوف..
بس ماردته يحس بخوفي..

حجيت بثقة..انت ضجت من غلقت الفون لعد اني من تلبسني مااضوج؟؟؟
ولج ياموبايل يا زفتتت ؟؟
اني مو كايلج متحاجين الخنيث هذا ابن عمج ؟؟
يوومه قلبي طاح بالارض..
معناها لاحكني بالسيارة وشاف براق يمنا...
جاوبته..
ماحاجيته ولا الي علاقة...
هو جاي لبيت اهلي ..قابل بيتي لوحدي واطرده؟؟
شو لسانج شطوله؟تعاي اخذيلج راجدي بعد ...
شجاع انت اجاوبك تكول لساني طويل من اسكت تكلي احجي...
ترى حيرتني واحتار شلون اتعامل وياك...
اي مو طفل عندج اني وتحتارين..
لا حشاك رجل شكبرك ..
اي اي كولي شايب كولي جبيرمعندج غيرها ..
بوية لو الزمج الا اشرك حلكج واشوفج الجبير شيسوي...
شبيك تتحسس ؟؟احجيها وخايفة..
بس عود اني صايرة شخصية ومااخاف...

يعني شجاع هسه انت مخابر ونص الليل حتى ترزلني؟؟
ممرزلج بس انت عوجة وتتصرفين عكس ..
وابن عمج اذا اجه لبيتكم صوتج ماريده يطلع واذا لمح طيفج ماابريج ذمة...
اريد اعرف اخوج شكد مكرن ويدخله لبيتكم ..
ميفكر بالبيت نسوان؟؟
من حجه ع عاطف انقهرت حجيت بنتر..
لتحجي ع اخوووي ..لهنا وخلص مرة تسب باهلي مرة تسب اخوي..
شنو فصلية ماخذني؟؟؟
ولج عليمن هالصياح؟!
اجي افرك حلكج هسه كلش ماخذه راحتج ترى؟
كافي شجاع كافي مللتني مو حالة هاي..

انت شكاك ..
ها جديدة مالت شكاك انوب؟
لا مو جديدة بس اني كافي تحملت..
منعتني من البرامج وكلت مسحيها وطعتك..
لبسي غصبتني ومحجيت شي...
احجي كلمة تفسرها بمزاجك وتفهمها مثل متريد..
هذا كله وبعدك مخاطبني..
لعد من اصير بعصمتك شتسوي؟؟؟؟
انفعلت واني احجي وعليت صوتي حتى زهرة كعدت واشرتلي لا احد يسمعني..
هو سمعني للاخير..
من خلصت كال..
غيرتي عليج وحبي صار شك ؟ومن احرص عليج اصير خانكج؟؟
بسيطة مدام اني مقيدج ..
روحي ..انت حرة..

سد الفون قبل لا احجي...اجت زهرة يمي تسال شصاير..
بقيت صافنة..
اني شبية عليت صوتي عليه وغثيته ..
وفوك هذا زهرة وياه صارت ضدي..
تكلي سيد حسين اضرب منها بمرات واني اصلا متونسة..
لان لو ميحبج مافكر بكلشي وتدخل بكل خطوة تخطيها..
اكو رياجيل ميدرون بنسوانهم اذا يلبسن عباية لو سافرات كد ماهامليهن..
خليج لحد ماتطفشي من ايدج عود وكتها خل تفيدج شخصيتج وصياحج..
انوب حتى هي زعلت خرب بالحظ...
بس اني مغلطانة هو متعب ويفسر كلشي بحسب ميعجبه..
بقيت فكرة تجيبني فكرة توديني..
لحد مصار وقت الدوام وطلعت...

ماشفته يم الريسبشن وطول اليوم مالمحته..
توقعته ممداوم..
راسلت رحاب كالت سافر..
انقهرت اكثر اخاف هناك تعجبه وحدة وشلون بيه..
بقيت ميتة قهر بس مااتنازل واحاجي..
يتعلم حتى لو غلطان اني اصالحة ويضيع حقي...
بس بسيطة اني اله بس خل يرجع الا احرك اعصابه...
طول بسفرته اسبوع طبعا كل يوم يصبح علي..
احنا متعودين حتى لو متزاعلين نصبح ع بعض المهم نطمن ع بعض خبال يعني...
قررت احرك اعصابه..
وصيت رحاب من يجي تكلي حتى ابلش بخطتي...
راسلتني المغرب كالت اجه..
اني جنت بيومها حافة وشعري صبغته كرزي لان عكب باجر
حنة زهرة...
كلت اجت عدلة..

يوم ثاني لبست تنورة مقلمة..
من فوك ضيقة ومن جوا عريضة..
وجسمي بعد ماضعفت صار احلى بعد وابرز ..
بسييييطة شجاع افندي يصير خير..
ولبست قميص اسود حصر وشال احمر وحذاء كعب عالي كلش احمر ..
مكياج طوخت كحلتي كلش وخليت شادو اسود
وخليت حمرة حمرة..
التفت منا ومنا اخاف امي تفز وتشوفني معناها اتصخم..
عاطف همزين يطلع قبلي بهواي..
رشيت عطر من زهرة مالت عرسها قوي كلش ويثبت ..
طلعت للسيارة..
حيدر طبعا ميحط عينه بعيني لو يبارع طبعه كلش حلو..

وصلت للدوام..الاستعلامات وجوههم فلتت ههه...
هم مستغربين لان اصلا اني الفترة الفاتت التزمت بالعباية ومكياج خفيف..
دخلت جوا لكيته يم الريسبشن...
سلمت بس مطيت بصوتي هو رفع راسه رأساً  راد ينزل صفن...
احس حواجبه تربعت بكصته وعيونه صارن حمر..
اف شكد مشتاقتله بس من شفت ردة فعله خفت..
مشيت خطوتين كال..ست فضة لحظة..
شغل الاسبوع الفات اريده كله يمي ..
رجاءاً بسرعة  بلا تاخير ..
يبووو ركضت للغرفة حسن ماكو جان دزيته بمكاني..
عزا العزاني شلون بيه..
بقيت كاعده واتنفس حيل وقلقة..
دك الفون كمزت يوومة شلوون اكيد هو..
جاوبت وسام كال الاستاذ ينتظر...
احتاريت شسوي هسه وين اروح...
ارجع للبيت؟ اي ارجع لان شجاع اذا لزمني ميرحمني..
لبسي فاضح ومكياجي عزا شبيه وكحة وماخاف...

كمت اخذت جنطتي ورحت لوسام..
فتت واني افكر بالكذبة..
شافني هو حسيت استغراب بوجهه..
خجلت من نفسي اه منك شجاع خليتني اتخبل والبس هيج..
حجيت وي وسام..
وسام اعذرني خابرتني اختي العروسة..
ضروري محتاجتني بالصالون ولازم هسه اطلع...
ولان هو يعرف حتتزوج هالايام ..
تمسكنت حتى يصدك ..
فدوة وسام ماكدر اساعد الاستاذ هسه خليها باجر اجي من وكت وابلش..
بس اريدك تكول لاستاذ شجاع لان مستعجلة عفية..
اباوع لوسام مو ع بعضه..
اخر شي كال اني استأذن!!!!

اني جمدت بمكاني عرفت شجاع وراي واكف..
طلع وسام ..
انعتت ايدي درت وجهي بخوف شجاع..
وسحبني للغرفة فتح الباب ودفعني وكعت بالارض..
قفل الباب وتقرب مني واني بالارض...
وجهه مو غاضب بي شبه ابتسامة استهزاء...
تقرب مني وضربني كف..
احس خدي افتر كله وانصلخ...
وكعت ع الجهة اليمنى..
لان هو يسراوي..
وضربة الايد اليسرى تصير اقسى..
هالحجي كله مانطقت بس ارجف...
جر اذني حيل وحط وجهه بوجهي...

شنو هاللبس مال بنات الشوارع هاا؟؟؟
يحجي ويجر باذني اكثر روحي شاغت ودموعي نزلت...
تبجين؟؟من شنو بالضبط؟؟؟
من خجلج لو خوفج؟؟؟
تمشين وجسمج كله يهتز والزلم تباوع عاجبج؟؟؟؟
هزيت راسي لا بس اريد يترك اذني الخوف كتلني..
اتذكر ضرباته لبراق وقساوته..
لو اتخيل ضربه لمرته حسب ميسولفون...
ترك اذني بدفعة وكام..
راح للبلكونة خابر ورجع واني حاضنة نفسي وارجف ودموعي تصب...
رجع وصاح كوومي...
فزيت وكمت بسرعة...
صار كدامي وهو يباوع من فوك ليجوا...
ماستحيتي من طلعتي بالتعري؟؟؟
ماخجلتي وجسمج كله يهتز ؟؟يحجي بغضب بس مكتوم خبلني اكثر..
وخفت منه اكثر...
لو يعيط وهم يضرب ولا هالاسلوب الغامض الي احس ضاملي ورا شي مو بالحسبان...

مسحت دموعي وجاوبته..وهو كدامي وايديه بجيوبه..
شجاع احنا مو افترقنا ليش تحاسبني بعد..
كوة نطقت هالكلمات بصوت يرجف...
وهيج منتظرة نفترق حتى تتعرين؟؟؟صيح بصوت شبه عالي..
ولج كاتله نفسج بس تردين تطلعين بجسمج..
شنو كلتي هذا تركني اروح ادور غيره؟؟؟؟
اتعرى وامشي راهز بجسمي اليكعد حتى الميت بعد منو ميركض وراي؟؟
مدام خلصت من الحقتة وقيوده ادورلي واحد مكرن يقبلها امشي بلبس عريااان؟؟؟
ولج انت حرمتي ولج اريدج بحلال الله..
احاجيج تشنفرين عليه..احرص عليج تكولين يشك..
زاد عياطه اكثر ودمارات ركبته اباوعلها حتنفكر...
ولج ترستي خيال الزلم بهذا جسمج..
اااااخ ولج مو شجاع الحرمته الزلم تتخيلها لو خلت بروحها..

لزمني من ذراعاتي ويعيط...
تدرين الشافوج اليوم شيسووون؟؟؟؟
تدرين الرجال ويشوف هيج جسم وخصوص المحروم شيسووووي؟؟؟؟؟؟
ولج ساعة الشيطان من تجي يجيبج بباله ويتخيل هيج وهيج يسوي وياج...
اكطعح هسه وصله وصلة ومارتاح..
ترك ذراعاتي بعصبية وراح ..
فات للحمام غسل وجهه وكنف رداناته..
المحبس والساعة نزعهم وطلعله جكارة وكف يدخن يم البالكونة..
اني ع كعدتي وافكر شحجي بس اريد الكى جملة انطقها ماكو ..
لساني وانربط....

اباوعله خلص الجكارة. واخذ ثانية...
كمت تقربت يمه وهو صافن ويدخن...
حجيت بصوت ناصي..
شجاع..
ماجاوب...
حبيبي..بس اسمعني ليش تتعصب قبل لا تسمع..
طفى الجكارة وفات..
كال كعدي هنا والراح اطلبه تنفذي بالحرف الواحد..
اني كعدت ع القنفة وهو واكف كدامي..
كال...اذا رفضتي او سمعت منج كلمة لا..
حتكون كسرتج بهذا مكانج ولا يكضني حرام ولا عيب...
اني صوفرت والدم يبس بعروقي...
شراح يسوي هذا!!!!
اندك الباب كال تفضل...
اباوع فات رجال اكبر من شجاع شكله بشوي..
وياه ارفد ووسام بيده ملف انطاه لشجاع...
سلمو وكعدو واني اباوع بالوجوه..
كال شجاع يلا شباب نبلش لان ورانا شغل...

للحكاية بقية
بقلم شقراء(قمر كانون)