حين يزهر الحجر

١٠

مساء العافية
حين يزهر الحجر
الجزء العاشر

ابو فؤاد اني طالب منك مهرة وزهرة خلها تتوكل هي اختي وبت عمي...
ابن عمي مانرد طلبك انشالله بس الواجب نسأل البنية...
وسيد ابو حسين حاجتكم مقضية والبنية الكم...
ماشاء الله..خير الاعمال الصلاة على الشفيع واله....
اللهم صل على محمد وال محمد...
بصوت عالي ضجت بالبيت ..
زهرة حضنتنا اني وامي وبجت..
باركتلها امي وتدعيلها..
ورا شوية اجه عاطف..
كال حضرو المستمسكات حتى يعقدون فد مرة..
بقيت اركض واحضر ولبسنا زهرة فستاني مالت طلعة ابيض..
الكدرنا عليه كمراسيم ليوم العقد سوينا ع السرعة...
تم عقد زهرة والفرحة ماسايعتني ..
بس طلب براق خوفني ولو اعرف اخوي مينطي اكيد..
اذا اكوله اني مموافقة عاطف ميجبرني...

عاطف اشترط يكون مقدم زهرة ٢٥والمؤخر٥٠ مليون..
توقع حينسحبون بس قبلو..
وكلوله النسب الزين يستحق ملايين وكريمتكم تستاهل تنصاغ ذهب لان سمعتها ذهب..
تقريبا تفشل عاطف..
بالليل صاحلي وحاجاني..
ترى براق خطبج من عندي شنو رأيج انت؟
خوفي من عاطف اخاف يشك بشي واحترامي وحبي اله مثل ابوي..
خلاني مااكدر احجي بس افرك بيدي..
باوعلي باستفهام..؟
مهرة مراح اعترض ع قرارج سواء قابلة او لا..
لان حياتج وانت حرة..
وانت عاقلة وراشدة وتعرفين مصلحتج وين...
تشجعت وحجيت..
ابو فؤاد قرارك مابعده قرار..
بس هو ضربني بالشارع وسواها كعدة وشهر بيه والغريب وكفلي..
صح هالشي نسيتو ورجعتو تحاجيتو..
بس اني مانسى الصار وشلون كعد وبنص الزلم قبل يجيبون اسمي..
واصلا هو خطب زهرة قبل ..
يعني لان رفضته اجه عليه..
لو فعلاً رايدني جان خطبني من الاول..
مو هسه بعد ماتزوج وماتت زوجته وعنده طفل..
يريدني اربي اله يعني مو حباً بيه...

مثل متردين اني هم ماعاجبتني هالقسمة..
صح ابن عمنا بس بعد الصار ماشوفه ترهم..
راح اردله مموافقين والله يسهله...
بعد ماراح رجعت للغرفة..
زهرة تسولف بالفون..
ورا مدخلت راحت طلعت هي..
اجيت لكيت شجاع مخابر..
فكرت احجيله لو لا؟وهو ينتظر ع نار يريد يعرف شخبار زهرة..
خابرته وبسرعة جاوب..
وينج يمعودة بطيتي قلبي ..
مو مافرغت جان عاطف يحاجيني..
خير انشالله خو ماكو شي..طمنيني اخبار زهرة؟
وافقو واخيراً...
اووف اووف ريحتيني..
يعني شغلتنا تسهلت ..شتكولين؟
صاير شي اشو لا حماس لا نشاط وينها مهرتي ليش كانشة؟؟

ماعرف شحجي بس خلينا ننتظر مو هسه..
خلي زهرة تكمل امورها واحنا يصير خير..
مهرة؟؟احجي دخلي بالمفيد ترى حرگتي اعصابي...
شنو ننتظر بعد المن الانتظار؟؟؟
شجاع اسمعني..اليوم بالكعدة براق ابن عمي..
انعل اصله نعال لتجيبين اسمه ع لسانج بلة...
هسه افهمني بالاول..
اسمعج..
هو خطبني من اخ...قاطعني بعيطة..
لا يا سكط يانثية..
ماكفاه الضرب الاكله؟؟يريد اسويله عاهة مستديمة هالخنيث ...
لتتعصب ع كيفك..
اصلا سالني اخوي ورفضت وهو رفضه..
بس موضوعنا اني وياك ميصير نفتحه هسه ..
ليش يبا ؟شمنتظرة بعد؟
شجاع بس خليني اكمل فدوة لعمرك لخاطري...
تنهد حيل وكال احجي احجي..

شوف هو اني رفضت واخوي ايدني..
بس اذا تجي تخطبني هسه اكيد اخوي يشك اني رفضت بسببك..
يعني خلي تمر فترة بس..
حتى يصير الموضوع طبيعي وتتسهل الامور..
اني متاكدة بالوقت الحالي يرفض..
اصلا زهرة ووافق غصباً عنه لان حصرو بزاوية مابيها منفذ..
وبنص الكعدة يسال براق اذا رايدها لو تتوكل!!
يعني هم الناس امبينين عقال وخيرين تدري لو غيرهم جان طلعو من الكعدة وكالو طز بهجيج خطبة..
المهر شرط عليهم كومة وغير البز بالكلام..
بس هي قسمة وربي سهلها..
زين وقسمتنا ليش مقتنعة متتسهل ؟؟
لان هذا الوقت حساس..
ولو رفضك عاطف اول قرار يكلي بطلي..
تتحمل ابطل ومتشوفني؟؟
استغفر الله اللهم طولج ياروح هو اني شمصبرني غير شوفتج ووجودج يمي..
لعد نصبر والله كريم...
كوة كوة اقتنع وفك شوية...

مر اسبوع وصارت حفلة زهرة..
وشجاع يوصي تلبسين كامل وميطلع منج شي وحلفني مالبس شي قصير لو يبين جسمي..
وماقتنع لحد ماشافني لابسة فستان طويل وكامل بس شعري رتبته ومكيجت خفيف..
تمت الحفلة ع خير وفرحنا بس هم ماركصت لان حلفني وماقبل ..
واني اصلا مفتخرة بغيرته وخوفه عليه ومارفضتله شي..
صح ابينله ماقابله بس بداخلي فرحانة..
طبعا عاطف منع حسين يوصل للبيت لو يطلعون ابد ممنوع..
لهذا حسين قرر يتزوجون بسرعة..
وقررو خلال هالشهر يكملون امورهم..

شجاع شوي فك من شاف موعد زواجهم قرب ..
وبقى يخطط ويحضر..
سافر وجابلي جنطة ملابس تشكيلة مالت بيت ومالت نوم سيتات اشكال..
والجنطة الثانية عبايات ومكياج نوعيات فخمة..
فاتحلي فديو ويراويني..
احسه فرحان حيل ومتحظر ..
كال اريد اشتري الغرفة حتى ملابسج اخليها بالكنتور..
اي اشتري وغير هالغرفة مالت انتقام كل مااشوفك بيها اتضايق..
هههه ولج مو مالتها هي بدلتها ..
يا صدك؟
اي ذيج تفلشت وراحت كل مااتعصب اكسرلي شي..
الله يستر اخاف تالي تتعصب وتطلع حركتك بيه...
لتبقين يمي من اتعصب مهرتي ..
تعرفيني عميرچي مخبل دمي فاير دوم..
اوي شورطني وي اهل العمارة وعشقهم..
عشقهم شنو ولج خلي حجيج بي مووونة كولي عشگ..عشگ گ ..
جسر حسرة طويلة وكال ..
اخ اذا اكضج هسه اشوفج العشك شلونه...
جريت نفس ..انشالله ننجمع حبيبي ..
والنعم بالله..
ثنينا بصوتنا حسرة...

استمريت بالدوام بس ابد مااوصل لمكتب شجاع..
وهو متفهمني ويكول اصبر ميخالف..
عاطف رجع خبر لبراق اني مموافقة..
هو سكت كله مااضغط عليها..
بس بلش يتقرب من عاطف من جديد..
بقى يتردد ع بيتنا..
بس ولا مرة خليته يلمحني..
لان لو عرف شجاع بجيته لبيتنا الدنيا يكلبها ع راسي..
زهرة خلال هالايام جهزت كلشي..
واتفقو بعد عشر ايام يصير زواجهم..

جنت اسولف وي شجاع عن زواج زهرة..
كال ورا زواجها اجي اخطبج شتكولين؟
حبيبي اصبر شوية بس تنسي سالفة ابن عمي..
هسه غير مرضتني بهالنثية..ترى حاطلته قيمة وتحجين بي؟؟
خليني اجي واحاجي اخوج ..
اذا ع المذهب انحلت خلاص وانطو لسيد بعد شنو ..
اكو فرق ياشجاع لان انت مطلق وهم اكبر مني..
ليش تكفرييييني..عاط صوت خرعني ..
يعني اذا مطلگ شلوون ابتليت ؟؟؟واكبر منج قابل عمري ستين سنة؟؟؟
ابهاتنا وامهاتنا الفرق بينهم سنين وتزوجو وخلفو وهالعاشو..
بعد كل ماحجيتي وكلتي مطلك وجبير ..
كولي ماريدك كولي ماعاجبني بعد كولي...
اني صوجي ذليت نفسي الج وصغرتها..
رجال شيبي تارس راسي رحت اتوسل بيج واركض وراج ..
من شارع لشارع ومن مكتب لمكتب ..
لشوكت مثل المراهق اتباوع بالخلسة لو كلش كلش حصلتلي حظن؟؟
البكدي ابنه بطوله واني باقي انتظرج تقتنعين واخوج يقتنع بيه ليش لان مطلك وجبير وشيعي وعمارة..
طز بيج وباهلج وخرب اهلي اذا جبت سيرة زواج بعد...
سد الفون بوجهي وراح...

انصدمت من انفعاله وعصبيته..
انوب خفت حتى جواب ماعرفت شلون انطق واجاوب...
حجيت لزهرة كالت حقه..
يعني هو رجال ويفتح وياج موضوع زواج وتتهربين وتكليله مطلق وعمارة يعني ذني كلهن مو اسباب..
العمارة ناس ونعم من اصلهم والشيعة اخوتنا واذا ع العمر مو كلش فرق والطلاك شي مو بيده..
يعني مارتاح وي مرته شيسوي قابل طلك لو كفر...
زادتها عليه بلومها وانقهرت..
بس اني شذنبي غير ابينله وجهة نظر اهلي حتى من يخطب مينصدم..
بس هو اعصابه فد نوب...

تركته يهدا كلت تهدا اعصابه وبعدين احاجي لا تتطور المشكلة اكثر...
بقيت الليل كله افكر ومقهورة..
الصبح رحت كلت احاجي واشرحله هو فهمني غلط....
ماشفته من دخلت يم الريسبشن..
اشتغلت شوية للتسعة ونص ..
حسن طلع يخابر..
انتظرت شوية واخذتلي ملف ورحت...
سالت وسام كال جوا موجود...
دكيت الباب كال فوت..
جان يستغل بالحاسبة دخلت وكفت قريب ع المكتب وسكتت...
هو استمر يشتغل ولا اهتملي..
ها ابقى واكفة لو اكعد؟
ماجاوب مستمر يشتغل..
شجااع شسالفة ترى ماسويت غلط انت تعصبت واني مو قصدي شي...
مو احجي وياك شسالفة اشو محتقرني كلش!
بلا ميرفع راسه..كال
فضة اذا خلصتي تفضلي برا...

انقهرت من تصرفه كلش..اصلا هو تحسس من الموضوع رغم يعرف احبه وماقاصده..
بس يطلع ضوجته بيه....
تركته وطلعت رحت للحمام..غسلت وهدأت شوية وطلعت...
رجعت للغرفة وماكلف نفسه يراسل لو يخابر بسيطة..
كملت شغلي اجاني حيدر..
بس دخلت للسيارة غلقت الفون...
رجعت للبيت مالي خلك نفسي..
توني نازلة بالباب وكفت السيارة كدامي..
نزل منها براق...

للحكاية بقية
بقلم شقراء(قمر كانون)
*****************
تنويه وياريت بلا تعليقات جارحة وتدخل ماله داعي..
سبق واتفقنا يكون بارت بين يوم ويوم..بس التعليقات هواي تغث ويكولون تتعززون واشتهترو وتدورون تعليقات كله بروسنا..
طبعا فئة كالت هيج اما البقية لا عسل ع قلبي هم وتعليقاتهم وتحشيشهم وتحليلاتهم..
المهم حيكون النشر يومي بس البارت بكد هذا او اكثر شوي ..
مراح انزل طويل..
يعني رضيت الطرفين..