نوارس مهاجره

نوارس مهاجره ٣١

#نوارس_مهاجره31
#زينب_الموسوي
الجزء الثاني

السلام عليكم ... غوالي
نواصل رحلتنا  مع النوارس 🦋🦋🦋🦋🦋🦋🦋🦋🦋🦋🦋

ايه

يمكن هو غفى بليلتها ... لكن اني بقيت ... لجانبه صح بس فكري  بغير  عالم ... وصوته وكلامه بقى يراويني صور ...
مخنوگه روحي  .. وعيوني محمله  روج دموع ..لو نزلت
تغرگ  دنياي ...
اباوعله واتحسر  عليه ... الله اكبر  على ألمك  ... شلون تحملت  وانت المدلل ... النازك
الطيب ...الحنون
ربي يعينك ... وينطيني القوه اساعدك

انتبهت ايده لازمه ثوبي ونايم
مثل طفل  لازم امه ... يخاف لاتعوفه من ينام
منظره خلاني افهم السبب الرباني الي خلانا نلتقي من جديد

طلال محتاجني ... محتاج شخص من ماضيه ... يوگف وياه
هو مامحتاج زوجه تطبخ وتتظف اله ... محتاج  انسان  ينتشله  من السجن الجواه
ومدام يحبني ... هذا دوري
وكل الي احتاجه الصبر

....
صحى ب ١١ الصبح 
واني احضر الاكل ... حس بوجودي.. وتحاشى ينظرني
والحزن بعده منشور على  وجهها ..، وحركاته

كعد على الكرسي ... مدد رجليه بكسل
وبلا ميغسل وجهه طلب اكل

: جوعان ايوته

:حاضر من عيوني ... بس غسل وجهك  تلگه الاكل حاضر

راح يغسل  ... وتاخر بالحمام
خفت  ليكون مسوي بنفسه شي
رحت وراه ..، وهو ديحاول يفك
الشاش حول ايده
: ليش مگتلي اساعدك 
مد ايده اليه .. فتحت الشاش القطع لسه  احمر .. وارم
هو هم شافه
عقمت الجرح  .. وخليت شاش جديد

وگعدنا. ناكل ... هوه عينه ميرفعها
واني ابحث عن شي يطلعنا  من الگابه الي احنا بيها
وبصراحه اني بعد الي سمعته البارحه منه ... تعبانه  .. واريد ترفيه عن نفسي
قرب يخلص ماعونه .. شلت من ماعوني خليته امامه
وشفتها فرصه احجي بدل هالصمت

: ترى محتاجين مسواك للبيت

رد ( ان شاء الله )
واني كملت 
: شنو رائيك تعزمني على غدى  اليوم ... وارتاح من الطبخ 

رفع عينه يتاكد داحجي صدك لو اصنف
رفع ايده من الاكل وهو يگلي

: ايه لاتتصرفين وكانما  كلشي طبيعي ..
گوليلي شنو قرارج
بلا  تردد  جاوبت
: قراري انت ..   مااگدر  بلياك
سكت ورجع لنفس الوجوم

: اشو سكتت .،
: شتريدني اگول 

: گول  عازمج على غدى
ضحك بالم وهو يهز راسه
ويه حجاية
:والله ياالله
: دضحك ياعيني .. 
وخلينا اليوم نطلع ونتونس
ونفتر بسيارتك الحلوه 
قابل نگضيها  قهر .. وافرض نقهرنا  .. بشنو راح يفيد

ابتسم وحسيت يريد يگول شي
گام للثلاجه. جاب علبة العصير
وصب بگلاص اليه واله خلاه گدامي وسالني

: تحبين الدراجات  ... الجو حلو اليوم
واني عندي دراجه. بالكراج
اذا تحبين اخذج بيها ونطلع

بالبدايه خفت وهو شجعني

: ها شگلتي ..  ونصور  ونزل الفديو

: لا حبيبي بلا تصوير ... تروح ماما تشوفه  ... تلعب بيه لعب

ضحك وهو متعجب
:شگد وتخافين من امج
اني هم ضحكت  ..
راح هوه يبدل  ... واني لبست
جينز وتشيرت اسود وجاكيت جلد اسود
وطلعنا  من الشقه ،،،
حضر الدراجه ... هو اول صعد ولبس الخوذه ... وانطاني وحده اليه
جلست  خلفه ... وحايطته باديه
شغلها صوتها خوفني
: ها خفتي .. هوه صوتها بالبدايه
يخوف ...
راح اطلع ... امسكي بيه قوي
لاتعوفيني

كلمته يمكن خلتني احس قصده
مااعوفه ابد  ... لذلك رديت

: مااعوفك ابد ...

انطلق بالدراجه . بسرعه معتدله
واحنا نجوب الشوارع ...
والهوى المنعش ... يلتقي بوجهنا ...  ويبعث مسحه راحه
ولو مؤقته من  حزن عاصرنا

زاد سرعته من دخلنا  منحدر
وهو يوصيني وبصوت عالي حتى اسمع

كمشيني زين ... ترى الجاي اصعب
كامشه حبيبي ... بس شويه خفف

اندارينا. بالمنحدر  مره ... وطلعنا على الشارع العام
ورجعنا للمنحدر
الهوى وگع دموعي ... واني اضحك وهو يضحك
ساعه ونص نفتر بالدراجه
بيه حسيت بدگات گلبه واني ماسكه بيه باديه
دگاته تتسارع ... وتنبض جوى ايدي ... وتنطيني امل ..
راح  ندوس على اي مستحيل
ونبقى سوى للابد
طلال وايه
رجعنا للشقه ...اني تعبانه ونعسانه
وهو  مصر ابدل ونطلع  نتغدى برى
انصاعيت ل اوامره

مرت تلث ايام .. حلوه ...
نطلع ونصور وننشر ... نسهر نشوف افلام  ... ونغفى وين مچان
اليوم الرابع. اتصل بيه
منظم المباريات جاوبه
: باجر 
ها يعني لازم اليوم اسافر
اكيد  جاي

وسدت التلفون .. اني يمه
ودنتفرج  اغاني قديمه

سحب نفسه. .. وراح للمخزن
يطلع الجنطه

ودخل للغرفه يبدل ..
واني تفكيري تلخص بقضيه
وحده ... المصارعه لازم يتركها
طلع مبدل ... التفت عليه وهو يقترب من الباب الخارجي

: عندي لعبه .. لازم اسافر
وارجع بعد يومين

ركضت على الباب قفلته.. وخليت المفتاح بايدي ... وگفته
امامه ... خايفه ... لكن المواجهة لابد منها

:طلال  لازم تترك هال اطار الوحشي الي خلوك بيه الحيوانات بالسجن
اترك المصارعه ... انت مو مستر تي ... انت طلال
اقترب عليه عيونه تفور ...
وجهها الغضب بيه بلا حد

: وخري عن  طريقي ... وانطيني المفتاح 
خايفه  ...ومرعوبه بس ماوخرت

لزم ايدي وهو يصرخ
انطيني المفتاح  احسن الج

واني صرخت

:مانطيه  ... شمتسووي سوي
اضربني... اقتلني ..مثل ماقتلت طلال ... خلي مستر تي يقتلني

لزم ايدي الي بيها المفتاح ضربها  بقفل المفتاح الحديد
المره الاولى صرخت وتحملت
الثانيه ذبيت المفتاح من ايدي
وهو مستمر يضرب بايدي
ويگلي

: جذابه  تريدين عذر حتى اتركيني
: ايدي طلال كسرتها والله
توقف ... يلهث ويباوعني
حسيت نار  بايدي ... وگلبي شبت

ابتعدت عنه للزاويه وابجي
وهو على وشك يطلع
صحت عليه

: طلال اختار ... لو اني ... لو المصارعه

رجع وباوعني  وگلي

: المصارعه
دنگ .للگاع وجهه 

: مخادعه انتي ... والمصارعه عذر حتى تنهزمين
سكت ثانيه  وبعدها سمعت
:الله وياج 

: طلال هذا  اخر  قرار  عندك

: انتي الي قررتي ... بس اجلتي القرار  كم يوم. لحد تلگين  الوقت المناسب

رفعت ايدي لصدري من الالم
واستوقفت مره اخيره

: والله   دتظلمني ... كل الي اريده اساعدك ... طلال المصارعه منو الي اختارها انت لو همه .. ليش لحد الان تمشي على تعليماتهم ... ليش ترضى تنضرب ..وتنهان .. وتتعرى
وين كرامتك .. گلهم لا  ...
گلهم لا  مثل ماگلتها بالسجن
اطلع من قيدك .. ومن سجنك

رد عليه

اطلعي انتي .. اني ماافيدج
لاتضحكين على نفسج
انتي مو گد كلمتج

: وانت  مو  گد التحدي .. مستسلم  الهم 
حسافه ياطلال .. ماعرفت تاخذ حقك منهم  وظليت خاضع الهم

بعد هذي الكلمات ... وبخطوات سريعه ... جرني من ملابسي
ودفعني للحايط  وعلى وشك يوجهلي لكمه .. غمضت عيوني
وبجيت من الخوف
جرني مره ثانيه ودفعني  للحايط

وتركني... طلع من الشقه
نزلت للارض ابجي... من الخوف والم ايدي  ...الي احسها صارت اكبر من  حجمها
خليتها جوى الماي البارد بالسنك
بقيت نهار. كامل .. اتالم  من ايدي
ومنتظره اتصال منه ...
نمت وعندي امل يتصل الصبح ...
وتأملت يتصل العصر

او يمكن بعد المباراه ...
يمكن من يجي يقرر يترك المصارعه ..
بهال افكار
اتصلت بيه  ... ١١ مره مجاوب

خيبة الامل خلتني  احزم  اغراضي
مره لاخ ... واسحب نفس الجنطه
وقبل مااترك الشقه  عفتله مسج

( اعرف متريد تجاوب .. بس حبيت اگلك اني حاولت ...
لخاطرك ... صار دورك انت تحاول )
سديت  باب الشقه .. ومع خطواتي   ارتل دعاء 
(يارب اهديه )

رجعت بنفس الطريق ... الي كل مره ارجع بيه بدمعه واه

وصلت لديربون
وقبل لا اوصل بيت  اهلي

اتصلت بملاك من السياره

: هلووو ملاك وين انتي

: بالشغل بديربون ليش تسالين

: اني بديربون ... وزعلانه ويه طلال .. ومااعرف شكول ل ماما من تحقق ويايه

:ولج اليوم  تطردنا بالشارع   اني صار اسبوعين مرايحه يم واثق
وروان مريضه ..، وانتي زعلانه

: اوووف ياملاك  والله مااريد ازعل منه .. بس هوه ابد ميسمع الكلمه

: وانتي شلون تعوفينه وهو مريض
: سافر للمصارعه  وحتى ايدها بعدها  مطابت
ملاك خايفه ليعوفني 

: لعد مجان بقيتي بالشقه لحد يرجع ويصالحج

انهاريت بالدموع والبجي اريد اگلها... واخاف اشكي

انهيت المكالمه ... وطلعت لمحل سمك ..، طلبت سمكتين مشويه
حتى ماما  تلتهي بالسمك ومتسالني شي

دخلت للبيت واني اصطنع السعاده .. وريحة السمك  تخللت لملابسي
ماما تحفزت للسوال واني بلا مقدمات سلمت وضحكت

: هلوووو ماما شلونج
جبتلج شلون  سمك مشوي
رفعت حاجبها الايمن
وباوعتني

: شتسووين اهنا ... ورجلج. وين
وايدج شبيها

خليت الاكل على الميز
وبكامل قدرتي على المناوره جاوبت

: رجلي عنده مباراه ... وايدي انطبگ عليها الباب ... فرجلي انطاني اجازه لحد مااتطيب ايدي

عديت  من استجاوب ماما على خير
————————
:
ملاك :
صار ٢١ يوم  ماواصله المزرعه ..

واتحجج بروان تعبانه.. وماما مريضه مااگدر اتركهم
واثق يعرف السبب الحقيقي... او يتصور يعرفه
وساكت... يجي عليه كل جمعه العصر  ...اقترح عليه نطلع   ونفتر... ندخل مطاعم.. وسينما

وغيرها من المكانات
بهدف  يحب المدينه ويتعلق بيها
وايضا اخليه يبات يمنا حتى يعرف فرق الحياة ابيتنا عن بيته 
وكل  مره  يرجع  لبيته.  لوحده
وماما  وايه  يستلمني  ملامه ونصائح 
ويخوفني بكلمة ( راح يعوفج
هسه يطلكج وياخذ غيرج )
هاي  الجمعه وبعد الحاحه ...ونفاذ صبره...  قررت اني اروح عليه

بالصاله  ماما .. وايه  مشغولات
بتصفيه البريد  ..، ويتناقشن بالقوائم ... روان لازمه  التلفون الي ميفارك ايدها صار
تمنيت ابقى وياهم .. بس نظرات ماما  خلتني  اسحب امنيتي

: ماما اني رايحه وارجع الاحد

. شعندج راجعه ابقي يم رجلج  مراهقه انتي وكل شويه گامزه بمكان

. يعني بس المراهقه من حقها تختار المكان الي تحبه وتعيش بيه

: يمه المراه وطنها بيت رجلها

؛ ادري والله ادري واثق حباب ويستحق يستقر بحياته
موبيدي شسوي

؛ خوش ظلي اهنا مثل اخواتج. ايه مهزومه صار  تسع ايام
وحتى تلفون مااتتصل برجلها
وروان ؛ رجلها بكندا وعليه القاءالقبض
وانتي تاركته بالمزرعه
ليش تزوجتن لعد ماضليتن مگابلاتني

اشرتلي ايه بايدها بمعنى روحي

: ملاك لخاطر ربج متروحين وتفضينا لا ماما تطردنا بالشارع

: رايحه رايحه

طلعت واني اسوق... واتخيل  براسي صوت الكلب  راح يستقبلني ينبح
حتى  الريحه  بديت  اشمها
شراح  يخلصها

وصلت اهناك. واثق واگف على الطريق  بدايه  البوابه للمزرعه

ابتسم من شافني ...
بركت سيارتي... ونزلت
استقبلني بالاحضان ...

: اشوو واگف اهنا
: ممصدك تجين

تعالي شوفي محظرلج مفاجاءه

اخذني من ايدي..  لحد لافته خشبيه..، كبيره... مكتوبه بيها مزرعة. واثق.. وملاك 
و كاتب. اسمي. بورد احمر

: الله شگد حلو. هاي انت سويته

: بلي... اني..  عجبج

: كلك  ذوق  عجبني

اخذ  اللافته  ثبتها بالارض وطلب  مني اساعده  وهو يستخدم المطرقه ساعدته واني اصطنع الفرح.
اللافته  حسستني هذي راح تكون شاهد على قبري اهنا
انتهى من تثبيتها 
؛ بعد في مفاجاءه تعالي

اخذ ايدي ونركض واحنا نشق طريقنا بين بعض الاشجار الي مقاومه الثلج والبرد
لحد وصلنا لمشتل الورد
مخلي  ميز  زغير  عليه  طباق  اكل وكرسيين النا

؛  وهذي شنو  مسويلي عشى

؛ بلي اني سويته.. ولاتخافين ولا شي استخدمته من المزرعه ...جبته من ديربون والبيت كله مليته اغراض من اسواق ديربون

: ههههه فكره حلوه  شكرا لان متحملني

؛ لاتشكريني  واتحملي  حياتي شويه  وخلينا  نجمع  الي تحبيه والي احبه ونعيش سوا
لانفرط بعض بسبب اشياء بسيطه

: انشالله حبيبي
واثق : تعنين الكلمه من تگوليها

: انت شتشوف لو مااحبك المن رجعت اهنا

: يارب تكونين مقتنعه بالرجعه وتحبيني مثل مااحبج

مرات يتملكني احساس ان هالزواج  تم بسرعه لدرجة ان كلمة احبك ...واحبج..
اثنينا من نگولها تكون باهته ..ومدفوعه من لسان.. مو گلب
بعد مخلصنا الاكل افترينا بالمزرعه
وكلي خلي نكتب اسمائنا على الاشجار
مثل طلاب المدارس من يكتبون ذكرى ...وگلب.. وسهم
وبقينا ننحت بالشجره.. ونضحك على السهم

: اهم شي السهم  لاتنساه

: سهم واحد. نخلي اثنين على اساس  فيكه  احنا  اخترعناها
: ههههه  فد مره زيد نقط الدم الي نازله من الگلب مدام سهمين

؛ ولايهمج اسويها بركه مال دم

وقت مرح مر علينا وجمعنا اغصان اشجار متساقطه ومتكسره من المطر حتى نستخدمها للدفايه
وتساقطت كم قطرة مطر 

؛ انتي فوتي جوى  واني اغطي النباتات واجي

ملاك : لاتتاخر ها

ركضت ..حتى ادخل للبيت
ركض الكلب  ورايه
مااعرف  شلون  خلصت منه
البيت  نظيف وكانما  ماتركته

افتريت بالمطبخ نظيف والثلاجه. نظيفه
دورت بالبيت  كله
ابحث  بين  الغرف  عن  اي شي اي  عذر  يخليني  اجد لنفسي العذر  حتى  اكره  هالمكان
صعدت الدرج...  في صوره قرانيه ل ايه الكرسي... قريتها
ودخلت  لغرفتي  رميت الاغصان بالنار...  واتفرج كيف تحولت رماد
هيج  عمري  راح يتحول رماد بهالمكان  الي عبالك منفى
مع  دفء  النار  نحلت  وجبرت نفسي  ادخل  الحمام
بدلت  وجهزت ليلة نهايه اسبوع
واني اصبغ  اظافري  اخذت الصبغ واشتم بيه مثل المدمنه
دخل واثق

: شبيج ملاك الصبغ دمر وجهج

: عزا اني شبيه  اصلا ريحة الصبغ مااطيقها  : اخاف ريحة المزرعه اثرت عليج
هسه ارش عطر

: لا عفيه مااريد عطر.
راسي دايخ  ..وعبالك راح اتقيء

: من المطر. اكيد
تعالي ادفي بسرير

تذكرت شي سامعته  من ماما

: اني سامعه الحوامل يحبون ريحة اشياء غريبه
سمع جملتي كان يستعد يدخل للسرير
ترك الغطى واجى عليه مستبشر

؛ يعني انت حامل

: احتمال  مو  اكيد

اخذني  باحضانه  واديه تمسح على اجتافي

: هوايه هذي السعاده عليه  بعدين  مااتحمل

:  لازم تتحمل  لعد اني والطفل منو النا.

: واني مالي غيرج حبيبتي
ملاكي

فز  گلبي من سمعت الكلمه

: اول  مره  تكول  هالكلمه ملاكي

:اذا متحبيها بعد مااگولها
اگول ملوكه

؛ لا حلوه  ملاكي  كولها

طول مااحنا سوى.. يردد الكلمه
وجدد عندي ذكريات...  وسرحت بفكري عنه... وجسمي الي بقى وياه... حتى هو انتبه

؛ ويايه   انتي  ملاكي

: وياك حبيبي  والكلمه  الي تكولها  كولش حلوه  بحيث سرحت بيها

: قصدج ملاكي 
هزيت  راسي اي  خايفه احجي وتنزل  دموعي

: انتي ملاك للجمال.. والعذوبه. احيتيني  بسحرج ..وجمالج
وكثير  من  الكلمات  رددها مابقت
ابالي غير  كلمه ( ملاكي )

. قضينا ليلة  تخللتها  ضحكاتي الزائفه...  بعد مااكتشفت سبب انزعاجي من هالزواج
المشكله مو الريف المشكله حب قديم. بعده. عايش. ويايه
رغم كان وهم

والرجال الي باحضانه
تزوجته حتى الهي نفسي عن مشاعر عذبني وجودها داخلي

واثق اعرف    مهما تكون بينا خلافات مستعد دائما ينسى ويكون اليه وحدي  زوج محب ودود  ... بس المشكله جوايه

خلص  ادعاء السعاده
وهو
محوطني  باديه ويحلم  بالطفل الجاي

: اذا بنيه اريدها تشبهج

: اوكف  اوگف مااريد بنيه اريد ولد اني ساعدت ماما بتربية اخواتي  اريد اشوف تربية الولد اريد سند اليه بالهدنيا

:  مو شرط الولد مرات يصير نقمه على اهله

: بابا الله يرحمه كان يكول هيج
بس اني اريد ولد

: انشاالله  ولد وبعده بنت وبعده ولد وبعده بنت

: شگد ذولي صاروا

؛ اربعه بس لعد هاي الارض والزرع المن  منو يعيش بيه

؛ يعني احنا نبقى طول العمر اهنا وجهالي يعيشون اهنا

:اكيد. لعد المن اني اسست وبنيت وزرعت   غير  ل ابنائي واحفادي

: متفكر ننتقل للمدينه ونعيش اهناك بدل هالعزله

: انتي العازله  نفسج  ملاكي
حاولي  تنشغلي  ويايه  بامور المزرعه  هسه  تحبيها

: اني ريحتها مااطيقها. واخاف من الحيوانات

: بمرور الايام تتعودين باجر الصبح  اخذج للمنحل شوفيه

: انوب نحل. عزا جسمي كام يگرصني من هسه

: هههههه شگد  رافضه الفكره لعد
نامي ملاكي ارتاحي

حاولت  انام  ..واستمتع  بنوم هانيء... باحضان زوجي.. وبغرفه دافيه
في  امريين حرموني النوم واحد منها ... كلمة  رجعتني  لجرح  قديم
والثاني
نباح الكلب

كل مااغفى ...
ينبح ..عبالك متقصدني
اريد انام تعبت  خليت   وساده فوگ راسي  ..مفاد
طلعت من الحمام قطن.. اسد بيه اذاني مفاد
طلع الفجر بدت العصافير  تغرد وبعدها  الديك
صعدت  عندي الطناگير كلش
فزيت  من مكاني
فز  واثق  ورايه
لبست  روبي  وركضت على الدرج. ..اخذت من المطبخ كيس بطاطا ..وفتحت الباب  معدتي  تفور.. وعيوني  تحرگني من النعاس
فتحت الباب  وطلعت  مقابيل الكلب
وبديت اشمر على الكلب  بطاطا
وهو ينبح  واني اصيح عليه

؛ اريد انام  اسكت  الله  ياخذك  خبلتني
وشمرت على الديك
:وانت هم اسكت 

وانتوا  طيروا  على غير شجره
موتوني
وظليت اضرب لحد الكلب  بدا ينبح عليه..  ويتقدم
واثق ورايه. صاح
ملاك شبيج  ملاك

: شبيه  اسال الجلب الي ماسكت طول الليل شوفه شبيه
خبلتوني

تقدم عليه الجلب وينبح  ضربته

و ركضت ..وهو ورايه.. وگعت بالطين 
والكلب  مگابلني وينبح
واثق اجى عليه  گومني

: واثق بعد  مااگدر  فدوه لاتزعل. تخبلت نوم  ماانام
فدوه  اروحلك  وصلني للبيت

و : هسه تروحين خليها الصبح

: هو  شبقى للصبح  الله  يخليك
فدوه  يمكن  بالسياره  انام

: دتعالي فوتي جوى وغسلي وبعدين نروح

رفعني من الطين  ودخلت  للحمام الاسفل
بالحمام كعدت ابجي لحد نسيت نفسي واعرف واثق ديسمعني
طلعت  مابيه  حيل اتحرك رحت للقنفه . القيت نفسي
وهو غطاني ... ونمت

العصر  گعدت   البيت هدوء  دورت  على واثق
باوعت  من الباب مشغول بالزرع
لميت  اغراضي  وجنطي
وطلعت
شافني  داطلع
عيونه من كثر الحزن  مااگدر  يباوعني

: انتظري  اني  اوصلج

: لا اني اروح  انت مشغول

صعدت سيارتي  منعني اصعد
حتى يحجي ويايه

؛ مشگلتج  مو  المكان المشكله ممقتنعه  بالرجال  الاخذتيه
وكلمة  حبيبي  الي  تردديها مجرد  كلمه  متعني شي الج

: والله غلطان

: لاتحلفين  ملاك ترى انتي مو من  مواليد  باريس ومتتحملين نباح  كلب  وصوت عصافير
ترى  شوارع  بغداد  مليان  كلاب وحدايقنا  مغطيتها العصافير
راجعي نفسج والي ابالج طلعيه
وخليني.  اني  ابالج  واعرفي زين هذا  حلمي  وهاي ارضي مااتخلى عنها

:  شتقصد  منو ابالي

: ماحبيت اذكر  هالشي  لان اتصورته  اعجاب فقط  لكن الظاهر  شعورج  كان اكبر

معقوله يعرف برعد .. منو گله ظليت صافنه وهو يردد كلمه

: خلي ابالج الي گلته  مستحيل اتخلى عن ارضي

:ماگتلك  اتخلى  عنها  احنا اتفقنا  نص الاسبوع  اهنا والباقي بديربون

؛ ملاك انتي صار  ٢١  بديربون واني الي اروح واجي عليج
انتي فاهمه  المفروض من وافقتي  على  الزواج  تعرفين ظروفه  وتكيفين  نفسج  عليه

: مااگدر  هذي  مو  حياتي
مااحب  الريف  ولا الزراعه

درت وجهي وصعدت السياره
وهو يباوعني واني ابتعد

كلامه جعلني بوقفة صراحه مع نفسي
ليكون  بعدني احب رعد
واخذت  واثق مجرد اطفي غيرتي  من روان اختي الي تزوجت  قبلي
او ايه  الي  اخذت  الي تحبه
كلمة  ملاكي  البارحه  منه ذكرتني  برعد  وكرهت نفسي لان  اتذكرته

واثق  يمكن حس عليه

العصر.بيت اهلي ازدادت عندي الدوخه واعراض ثانيه

اخذتني ايه للتحليل وعرفت حامل

: لازم تتصلين برجلج وتگلليه حامل

. دزيتله رساله ومجاوب
خليه على راحته

واستمعت  مجبره  لمحاظره من ايه
: ملاك انتي مو زغيره  هالتصرفات للاطفال 
تفاهمي ويه زوجج  افضل

: هو مصر على رائيه واني على رائي

———————————
طلال
عرفت البيه ...وسمعت .. وتألمت .. بس  ماافتهمت 

ماحست  ... تتصور  المصارعه اختياري ... تتصور  سعيد  بمجرى حياتي  ...
لو  تدري  كلشي بيه يغلي ... يحرگ ... والمصارعه  من اضرب بيها  شخص اي شخص لمجرد يحجي انگليزي ... احس انتقمت   لطلال السجين  المسكين ...
تطفى ناري يومين  تلاثه .. وتشب من جديد  ... من  تراودني  صور  ايام  .. وليالي
انتهكت بيها  ... بكلشي حي بيه

ياريتها  تفهم  وتتقبل. الواقع
صار  اسبوعين  من  تركتني ..

تركتني سجين... ومنتظر رنة هاتف  منها
اراقب حسابها مفتوح. .،.واتردد  اتصل بيها
واسالها . طلعتيني من حساباتج  وارتضيتي البعاد ...
حرام عليج  لاتزيدين عمري طعنات
وبنوبه من نوبات يأسي فكرت ...اشوف دكتور
وصلت لمجمع عيادات... دخلت  للاستعلامات  في بنات اثنين  وحده  عربيه...  والثانيه امريكيه
تقدمت  للشباك  وطلبت  موعد مستعجل من البنت  العربيه
دققت  المواعيد  بالكمبيوتر. وجاوبتني

: في موعد اليوم العصر مع دكتور  يتحدث  الانگليزيه

: العصر  اي  ساعه

؛ اربعه  العصر   لو  يناسبك  اخذ  الاوراق  امليه
وانطيني  كارد  التامين  لو سمحت

اخذت  الاوراق  الي  هيه  الاسم العمر  الامراض  المزمنه  ان وجدت
مليتها  وانطيتها  التامين
وطلعت
توجهت  لمعرض  جديد ...
وبسيارتي ... تفرجت على السيارات  الموجوده  ...
منزلت ... وماحسيت عندي رغبه  ل امتلاك  سياره جديده

رحت  لمعرض ثاني  ...اهناك افتريت وسط السيارات  ..والديلر   اجهد نفسه في  اظهار  مهاراته  وقدرته  على اقناعي بالشراء
وجهده ذهب سدى
حتى السيارات ماعادت تستهويني ...
بعدها  رحت  لمطعم  عربي وطلبت  اصناف الاكل
وعند  اول طبق قارنت الطعم بطبخ ايه  والمقارنه  كانت لصالحها
اكلت حاجه بدون استمتاع ...
امر  مهلك لمن يصبح شخص معين اهم مافي حياتك وكل الطرق توديك لنتيجه وحده هيه التفكير بيه
رجعت للبيت ...وحاولت انظفه مثل مكانت ايه تحرص على نظافته
رفعت ملابسي عن الارض 
اصابني الملل وقررت اترك دور ابو البيت المدبر
فتحت التلفزيون 
مصارعه اهوووو هم مصارعه
خلي اسمع اغاني هب هاب
لا شنو هب هاب ايه تضوج منه
اغير القناه
اي (باك ستريت بويز) اغانيهم شاعريه
عدت الساعات بين ضجر... وملل
لحد موعد الدكتور... الي گعدت گباله  وماخذ قرار مسبق... بعدم تصديق الي يگوله

طلب مني ابدي الحديث

: مشكلتي مريت بتجارب  سيئه شگد متتصور. ...وهذي انعكست على علاقتي مع زوجتي

: تجارب  من اي  نوع

: تجارب  جسديه. ...مااحب اوضح اكثر 

بدت عليه الحيره  امام الغموض  الي داحجي  بيه  .. وبدا  يسألني

: وزوجتك  تعرف بهذا الشي

: عرفت ..وتركتني اريدها ترجع
وحتى اختصر عليك اني احب زوجتي وهيه تحبني

: تركتك  بسبب تجاربك ام سبب ثاني

سكتت  وهو الي بدا يشرحلي

: لو تركتك  بسبب تجاربك .. فاحتمال  كبير  ان ماعدها القدره للتقبل  ...
قاطعته واني احجي بسرعه

: طلبت اترك عملي  كمصارع
وصرت عنيف معاها.  ... وخيرتني  اما هيه ... او المصارعه

: وانت اختاريت  المصارعه صح

: صح

: اذا  انت الي تركتها ... مو هيه

ضايقتني اجابته. .. وصار حديثي وياه بعصبيه

: دكتور  اني احيانا  اريدها تبتعد عني. واحيانا  اريدها تبقى .. خايف عليها عمرها يضيع بلا زواج ... وبنفس الوقت  مااريدها  تتركني
افهمني انت وانطيني. الحل
مااگدر  اقترب من زوجتي بسبب التجارب المرت عليه

صفن  ... وبطل يكتب بالاوراق الي امامه ..وكمل  حديثه

: المعلومات الي تحدثت بيها قليله مااكدر انصحك
غير حاول تغيير هذي التجارب ...بتجارب اجمل
انطيك مثال..

لو شخص ذهب.للصيد. وهوه مولع  بالصيد. ويحبه

وكانت  اول تجربه سيئه..  بكل المقايس  ..يعني الصناره انكسرت  ومصادت ..
والسمك هرب...  ومطرت  وهوه  بلا مظله .. والي حواليه سخروا  منه

شراح يسووي... هل يترك الصيد للابد... ام يحاول  مره  ثانيه بظروف افضل .. مع شخص مقرب اله ... ويختار مكان افضل ...ادوات  اجود
ويحاول  مره  واثنين  من اجل حبه  للصيد

وانت تگول زوجتك تحبك احجي وياها ...
فهمها ان زوجها انسان عادي ...
وديمر بظرف صعب
عليها مساعدتك .. ولاتتوقع النجاح  من اول مره .. ولا بسهوله
باختصار لازم  زوجتك  تكون شريكه  بالحل ... وانت  لازم  تاخذ  قرارك  وتنقذ  حياتك  الزوجيه ..، الي يبدو  مهمه  عندك

حجى اكثر من اللازم. ومااقتنعت  بجمله  گالها

مشكلتنا  ان  نعتقد  الدكتور النفس  يملك  الحل الذهبي لكل مشاكلنا
اني اشوف الدكتور النفسي مجرد واعض لااكثر ولااقل
ومشكلتي متحتاج دكتور  تحتاج
قرار ينبع  من داخلي

—————————

رعد :

روان  فاتت  بالشهر  السادس

ازداد. عندي القلق عليها ...
واليوم الصبح  اتصلت  بيها
وهيه  خايفه  من الفحص الدوري
طمنتها   بكلمات  .. حتى  متقلق  ..
مع اني نفسي خايف
بقيت  انتظر   مكالمتها. حتى اعرف النتيجه ... والشغل  مرحت  ... اتصلت  بيها  تلفونها
مغلق
اتصلت باختها  ايه
خبرتني بصوت باين عليه البجي 

:  التحليل بين
التصاق خلايا  وهيه العلامه الاولى للسرطان

الكلمات  دخلت  اذني. وصفعت گلبي ... ضاع الحجي ... والنفس ضاگ
مارديت لحد  ايه صاحت

: الوووو تسمعني

:  اسمع  ومااعرف  شگول والحل شنو ايه الله يخليج
گوليلي لازم في حل

: ياريت اكو حل. هذي حامل
لايگدرون  ينطوها  علاج ولايگدرون  يجهضوها

جرت حسره وهيه توصفلي حالهم

:لو تشوف حالنا اليوم گلبنا المستشفى صريخ  وعياط

: يعني هيه عرفت ؟

: عرفت وگالت لاتخبرون رعد
يترك  كلشي  ويجي

؛ هو شنو الكلشي  هسه  راح اطلع

: رعد مناقصين مصايب فدوه

؛ يعني روان دتموت واني ابقى مهزوم
لا والله لواعرف انحكم اعدام ميهمني

الحت عليه ان ماادخل امريكا
مفاد الحاحها
ومع علمي ان اي اتصال بالشرطه من اي شخص ممكن يدخلني السجن
تجاهلت اي خوف  واي عقوبه

و طلعت من البيت الساعه عشره بالليل
ساعه عشره وعشرين دقيقه...
وكفت بسيارتي على الجسر  منتظر التدقيق...
انطيت للضابط الجواز...  لحسن الحظ   باوع  عليه فقط  ..مادققه بالحاسبه... رجعه عليه...  واشرلي
حتى افوت
نظرت للضابط... مامصدگ الامر
ومسحت جبيني من العرگ

عبرت ودخلت امريكا... الحدود تبعد عن ديربون  عشر  دقايق

حرصت السرعه. تكون معتدله حتى  مافي شرطي يوگفني
وطبيت الشوارع. الفرعيه

وصلت للبيت... دگيت  الباب ... طلعت ملاك
صاحت بوجهي

: رعد شجابك ؟

: اجيت اشوف روان

بقت. واكفه بالباب وبلا  متخليني  ادخل ومستمره بالتحقيق

: وشلون عبرت الحدود

تماسكت صبري وياها

: ملاك الله يخليج بعدين حققي اريد اشوف مرتي

: هيه نايمه ومريضه خطيه تگعدها

: اهوووو.

وخري دافوت

وخرتها... ودخلت
وهيه تصيح وراي

: بياحق تدخل للبيت  بهذي الطريقه  هسه  اخبر  عليك

: روحي خبري
فتت للصاله. وناديت

(روان ...روان  )

طلعت ام ملاك من  الغرفه ومن شافتني. استغربت  وجودي

: شكو شصاير

: روان وين؟ مرتي وين ؟

: نايمه اهنا
فتحت باب الغرفه واشرتلي
:  فوت شوفها
وبنفس الوقت  بدت  المناقشات  بين ملاك  وامها

: دخل عبالك بيت الخلفه

؛ كافي انتي اسكتي وسدي الباب
الخارجي

دخلت الغرفتها... نايمه... ومتدري باي شي حواليها
منظرها  وهيه  نايمه..  وجسمها الهزيل... ونفسها  اليصعد  وينزل  بصعوبه 
خلاني متسمر بمكاني...  ودموعي تنزل بحركه
وهيه تگلي انت السبب

اقتربت منها... وحضنتها. وبستها بخدها ...
گعدت  وشافتني ...  عيونها الي باقيه فقط  اثر  وسط  محجر  غائر  انملت  دمع

: رعد صدوك انت والله  هسه جنت احلم  بيك

: بيبي. روان  هاي  اني  يمج وبعد مااعوفج 

: همزين اجيت  حتى  اشوفك قبل ل اموت

: شنو  هالحجي  متموتين 
باجر  اروح  للدكتور واحجي وياه نجهض  الطفل  وتتعالجين كيمياوي

قربت من سريرها  ..، وگعدت وخليت ايدها  بايدي
صوتها  يادوب  اسمعه  وهيه  تحجي

: ايه اقترحت  الاجهاض  على الدكتوره  جاوبتها   بالشهر السادس  خطر

: اكيد في حل
نامي  هسه  وباجر  يصير  خير

: لاتروح  وتتركني  من  انام خليك  يمي

: يمج بيبي

بقيت  بالغرفه  على كرسي قريب منها. وامسح على شعرها

واسمع  صوت  ملاك وهيه تحرض امها عليه

وتگلها  خليه يطلع... شنو يبات عدنا

تجاهلتها لحد الصبح

گعدت  روان
انطيتها. فلوس ..ودعتها

: يعني بعد متجي لهنا

؛ احاول  ارجع  العصر  بس ماابقى  اخاف  تصير مشاكل بينكم

: قصدك ملاك 
اني  احجي  وياها

: بيبي لاتدوخين نفسج انتي ارتاحي
واني  اشوف دكتوره وبعدين نتصرف

طلعت من يمها
ملاك  وايه وامهم يتريگون
صبحت  عليهن

: صباح الخير
حجيه  اني اسف  ليلة البارحه اجيت  بوقت  متاخر  من سمعت روان صحتها  تعبانه ماتحملت ابقى. بعيد  عنها

حجت  بثگل  وبلا  متباوع  عليه
ومستمرات. ياكلن 

: مصار  شي 
المهم  تنتبه  على نفسك اخاف احد يخبر  عليك

ردت ملاك  وكوب  الجاي  بايدها

؛ اي عايزه  الشرطه تداهم البيت

: انشالله  اسافر  لكليفورنيا واتفاهم  مع طليقتي  وكلشي ينتهي
اندارت عليه. وهيه. تحاول تفتعل مشكله ويايه

: وزواجك من قاصر  شلون تحله

: زواجي من روان تم بموافقة امها الي هيه ولي امرها

: موافقة  ماما  جتي بعد ماحرضتها. على الانهزام
ترى الشرطه حققت ويانا ويه تحسين  ومروه. واكيد البيت مراقب

تفاجات من الكلمه واندارت على امها
ماخلصني من  لسانها  الا امها وهيه تگليد
 
:روح ابني. شوف حل الك ولمرتك

تركتهم ...واعرف معارك طاحنه راح تبدي بينهم  ...بمجرد اسد الباب واغادر

بالشوارع  الفرعيه  ..افتر ...اخذني  الطريق للاعداديه 
باوعت البوابه ...
وتخيلتها واگفه... مثل اول مره شفتها...  كانت طفله.. خايفه. من كلشي.. الا اني  حست ويايه بالامان.. وحسيت وياها بالحياة تسري  بعروقي
الطلاب  يفوتون  للمدرسه
المفروض  هيه  وياهم ...المفروض  اكبر همها الامتحانات والواجبات ...
مو  راقده  بسريري ...وتعد ايام لموتها
قبضت  بايدي  المقود  وصرخت ( روان)
  بكل قهري ...وندمي 
ياريت  ترجع  الايام. واجنبج  كل المعانات ...والالم الشفتيه
ياريتني تركتج زهره  نابته بارضها   وماكطعتج 
ياريت ...
تركت طريق المدرسه
صادفني  اشخاص  اعرفهم
وحاولت  ماانتبه  عليهم
اخاف يخبرون

اخذت شوارع بعيده  عن العرب
لحد
وصلت لعيادة الدكتوره الي تشرف على حالة روان

انتظرت اسمي ينادونه..
الدقايق  مرت  تعادل  عمر   اكثر المراجعات نساء  ..واعمارهن  كبيره
ظليت  واگف بالممر. ..مااريد اگعد

لحد نادوا اسمي

شفت الدكتوره ..وگعدت تشرحلي. حالتها

  :بصراحه  البارحه  ماگدرت  افهم  اختها  ايه  بسبب البكاء

: دكتوره يعني الامر مقلق

: في عدة علامات  ان الخلايا السرطانيه  بدت  تهاجم جهاز المناعه عدها  وخوفنا ان تنتقل للجهاز اللمفاوي

خلال هذا الشهر نراقب الحاله
ومن تدخل السابع نولدها عمليه قيصيريه
وبعدها تخضع للعلاج الكيميائي

: طيب بهذا الشهر. شنو نگدر نسويه حتى نمنع يتطور المرض

: في علاج وفي نظام غذائي  والامل دائما موجود
والبارحه. راسلت مراكز  سرطانيه  بولايات ثانيه   على امل يجدون الها مكان. والتامين يوافق

: حتى لو التامين ميوافق  الفلوس  ادبرها

: عزيزي. هذي مراكز  مكلفه. يعني مو الف. واثنين. ولاعشره

: في امكانيه نعالجها كيميائي الان

؛ ياثر على نمو الطفل
ويمكن ينولد معاق

: نعمل عمليه هسه ونسقط  الطفل

: متاخرين جدا هيه بشهر السادس

واخذت وقت تشرحلي وتفرجني فحوصات ...واشعه  ...
واضافت

: تريد تعرف جنس الجنين

: اريد اعرف ممكن

: بنت  شوف هذي صورتها البارحه  صورناها  لكن نشغلوا بالبجي 

: دكتوره  انطيني  امل  حتى لو واحد  بالميه  ان زوجتي تعيش

؛ الامل موجود.
وانت  عليك  تساندها  وتطلعها من حاله الياس الي بيها لان هذا ياثر على مقاومتها  للمرض

بعد نقاش  وحديث طويل  شكرت الدكتوره
وغادرت العياده  مااعرف وين اروح   وشاسوي
وصلت لقناعه اخذها لولايه ثانيه. والفلوس  اخذها من اخواني  ... بعد مااحل مشكلتي مع بام

اتصلت  باخويه  فاضل حجيتله وضع  روان بتوسل ودموع

: فاضل  الله يخليك. ساعدني
تذكر  الي سويته  علمودكم
وارتباطي. بوحده متشرف حتى انتم تنجمعون بعوائلكم  وتوصلون  للعز

بدل. ميوگف ويايه سالني
:  انت شلون  تدخل امريكا. باوراق مزوره  انتبه على نفسك  انت عليك القاء قبض

: كل الي اريده رقم  بام  رقمها القديم  مقطوع
والمحاميه حاولت توصللها ماگدرت

: بام  كانت في مصحه وطلعت. وحاليا. مع  شاب
امريكي هو الي يدير اعمالها
وهو  الي يريد  يخلص  منك ويجردك  من  كلشي

:  موافق. مااريد اي شي بس تلغي القضيه فاضل  حاول توصللهم  موافقتي  اريد رقمها اليوم الله يخليك

: ليش متجي لكليفورنيا  بسياره واحد من اصدقائها  وتتفاهم وياها  وتوقع الاوراق التنازل وتخلص

: صعب اسافر  اخاف يلقون القبض عليه وروان بحاجتي هسه مريضه ومااگدر اتركها على اخواتها 

: هسه اروح على الشركه يمكن اگدر اقنعها

: انتظر  اتصالك الله يخليك

بعدها  اتصلت بروان اطمئن عليها ... لان مااكدر اروح البيت ..وملاك تسمم بدني بكلماتها

جاوبتني ام ملاك

: روان نايمه.

: ها شوكت تگعد 

: قبل شويه گانت گاعده اكلت وغسلت وبدلت ونامت

: گوليلي  حجيه  الله يخليج تحتاج شي اجيبه الها

: كلشي لاتجيب. وتعال  يمها من  تظل تفتر  بالمدينه خطر عليك  وبعدين هيه من تشوفك تصير احسن

: ودي اجي واخاف ملاك تتضايق مني

؛  انت نسيبنا  وهذا البيت بيتنا كلنا مرتك الها حصه بيه
وكلنا  لو متصرفين صح من البدايه ماتمرضت روان وماتبهذلت انت

: واني هم هواها  خلاني اتصرف بعجله لو منتظرها
ما خسرت صحتها.

: الله يعينكم اثنينكم 
تعال   يمها    يمه  هيه محتاجتك ترى

: جاي

بالبيت لمن وصلت خبرت روان ...وايه ...وامهم
ان الجنين بنت
فرحوا.. وبدوا يرفعون من معنوياتها.. وهيه شفت فرحه الامومه بوجهها
وبدت  تتخيل شكلها

ر : انشاالله تطلع تشبه ماما لان حلوه احلى منا كلنا

: انشاالله تطلع على خالتها اني هم حلوه وهم دمي خفيف

: هسه تنصدموا كلكم وتطلع عليه على ابوها

: يا صدوك شلون اذا طلعت تشبه ابوها
ولج  روان غير المستشفى يطردوج

ضحكت روان من كلام. ايه
:  ترى دتتشاقى مو تزعل

؛ ادري  تتشاقى  وانتي  تعرفيني ماازعل هذا اختصاصج انتي

طلعت  امها وايه بحجة يكملون الغدى

تركتنا لوحدنا  حتى اسولف وياها وخفف عنها

اول مطلعت روان سالتني

: وبعد شنو گالت الدكتوره عني

: گالت مرتك تدلل عليك وكلشي  مابيها  مجرد  كم خليه ملتصقات  من تولد  بالسلامه نعالجها  وترجع  مثل  الاول واحسن

: تعال يمي تعال

: هياني يمج

: اقترب مني وخلي عينك بعيني وگلي  هذا  الي  گالته  الدكتوره

اقتربت  منها  ومااگدرت اعيد الحجي عيوني متعرف تكذب عليها
: بيبي صدگيني الي ماذيج  هو الخوف  بس  انتي  هوايه تفكرين  بالموت

: رعد لو متت
: اششش ترى والله اطلع

روان : رعد لو متت بنتي تربيها ماما وايه متاخذها منهم اوعدني  ادري هيه بنتك بس ماما وايه حريصين عليها ويربوها وانت راح تاخذك الدنيا وتنشغل عنها اوعدني متنسى بنتي حتى لو نسيتني

صوتي ضاع لا اگدر اجاوبها ولا اگدر اسكت بجيت بحضنها مثل
الطفل وهيه تربت على ضهري وتگلي

: لاتبجي الله يخليك مااريد اشوف حزنك  انت علمتني الفرح  واخذتني للسعاده  تتصور ندمانه  وغلاك مندمانه صدگني  اني  من عمر  تسع سنين اعرف  اموت  وبابا  بكل احلامي  يراويني  مكاني  وياه مستعده للموت  بس افرگكم صعب  وبنتي اريد اشوفها  تكبر هذا الي باقي  بنفسي
رفعت  راسي اشوفها 
شبه الورده  الذابله... شابحه نظرها لغيمه.. تترجى مطر
مسحت دموعها 

: شنو  رائيج  تبدلين واخذج تشوفين  صديقتج  مروه  اكيد مشتاقتلها

: ياريت والله ساعدني ابدل

بدلت ملابسها. واخذتها لصديقتها  مروه
وصلنا يم البيت 
مروه تنتظرها
ركضت مروه عليها ...حضنتها واشرتلي بايدها
دخلوا للبيت حركت سيارتي.
ورجعت للبيت ( روح )
ملاك كانت راجعه من العمل وتعبانه  سلمت عليها واني داخل

: السلام عليكم

: وعليكم السلام. انت راح تبقى اهنا  والناس شتكول

امها سمعتها. ورادت. تسكتها

:  ملاك رعد نسيبنا  حاله حال طلال  و واثق

: الناس متدري بيه متزوج روان.
يشوفله  فندق ويگعد بيه

: حاضر  بس ترجع روان للبيت اروح للفندق

: وطلعات ويه روان وهيه مريضه مالها داعي

اهنا ماگدرت. اسكت

: روان مرتي  تطلع  ويايه براحتها. واحنا  نقرر شنو اله داعي او لا

تحاول بكل وسيله تخلق خلاف ويايه وحتى نظرتها اليه تخليني احس اني اكبر مجرم عرفته الخليقه

روان
(هذي اخر ايامي  واخر سطور اكتبها 
ومااعرف اكتب جمله وحده تعبر عني
المرض مو هين ... خلاني اكبر قبل اواني  ...وافقدني شبابي
بنهايتي ...اريدكم كلكم يمي ...كافي عتب ...وزعل  ...
رعد مغلطان  من حبني وتزوجني  لاتحملونه المسؤوليه
واني  مغلطانه استعجلت بزواجي منه  لان اعرف راح اموت  اختاريت اعيش وياه
ايه وملاك  وماما
انتم  تجاوزتو  فقد  بابا  ومضيتوا بحياتكم اما اني ظل عايش  ويايه
واشوفه واحجي وياه يوميه
اني هم راح ابقى عايشه وياكم واشوفكم  لاتظلمون بنتي  وتحملوها ذنب الزعل الي صار بينا  بنتي امانه عدكم اي تقصير وياها اني وبابا راح ندري بيه
رعد  روحي واغلى ماعرفت بدنياي  اذا تعرض ل اي مسووليه  اوكفوا وياه وساندوه
وبالنهايه هذي رسالتي الكم كلكم  احبكم كلكم  وسامحوني
خاصة رعد سامحني عن اي حزن راح تشوفه  واذا تحبني  )

ختمت  قصتي ومذكراتي بهذي الجمل. وسلمتها. لمروه
خايفه  طرف من الاطراف يلگاها
ويضمها عن الاخرين

: مروه هذي الرساله وياها دفتر بيه مذكراتي تنطيها  ل اخواتي بالوقت المناسب

: يعني يمته الوقت المناسب 

: انتي راح تعرفيه  واذا شفتي تحسين  گوليله روان  تسلم عليك  وتگلك  اشكرك  واعتذري من  والده
وهذي اقراص عليها اغاني بصوتي لبنتي 

؛ اشو مثل الي تريدين تروحين وبعد مترجعين

: اي بعد ماارجع  مهاجره ...
مثل النورس
اخر هجره واخر سفر

: وين يعني

: راح تعرفين 
يله اني اروح. لاتنسيني. وسلميلي على كل صديقاتنا

رعد

  اتصلت روان  حتى ارجعها للبيت
وهيه تمشي... حسيتها تعبانه
نزلت عليها... اخذتها من ايدها وصعدتها بالسياره

: تحبين نروح ل مكان  ناكل

: في مكان اريد اروح عليه

: وين گولي

: في محل لملابس حديثي الولاده اريد اشتري لبنتي اول قطعه تلبسها

؛ حاضر هسه اوديج

اخذت  العنوان  منها وصلتها اهناك
واني  وياها  افترت  بين ملابس الاطفال  وهيه  تتفحص  الثياب
والملاحف  مثل  اي  ام متحمسه  للامومه

اختارت تشيرت صغير  لونه وردي
وملحف  ابيض 

سالتها كيف تعرف قياس التشيرت

: مكتوب حسب الوزن من تلاثه باوند واعلى
او مكتوب حديث الولاده

: وانتي شمدريج بهذي المعلومات

: شفت على اليوتوب

وگفت امام بدلات اطفال بعمر سنه
اخذت وحده بيضه واندارت عليه

: هذي  هديتي  الها  من يصير عمرها  سنه(   گولولها  من امج )

ماگدرت ارد  انهزمت بنظري عنها
اخذت الملابس ودفعت فلوسها هيه

: ليش انتي تدفعين

: هذي فلوس الحكومه الها لازم اصرفها عليها

رجعتها للبيت
نزلت  هيه ..نزلت وياها
ايه  تنظف سرير  روان  بس شافتها اجتي  اخذت ايدها

: تعالي حبيبتي ارتاحي. غيرت الفراش هذا مريح اكثر

: متقصرين ايه
تعالي اگلج

اجتي يمها انطتها الكيس الي بيه الثياب

: هذي لبنتي. تلبسيها انتي وتگلليلها من ماما 

: اووووف يابنات محمد شگد تحبن الكابه. يمعوده  ... انتي دتعالجين وتصيرين زينه و  يطلعون البيبي  منج . وخلص مراح تروحين تحاربين
بطلي هالدراما

: ها سمعتي  كلام ايه والله بس انتي تعرفين شلون تسكتيها من هالحجي

واستمر ايه تخفف حزنها بالنكات

: لاتهتم. لحجيها. تحجي بصوت ناصي ..ودموع  عبالك فلم  ابيض واسود

ايوته دمج عسل انتي الوحيده بينا  دمج خفيف

تركتهن سوا وداطلع من الباب الرئيسي

لگيت سيارتين شرطه بالباب

الشرطي : ارفع ايدك لاتتحرك

: مااتحرك 

اقترب واحد مني... والثاني موجهه المسدس عليه
طلعوا  كل الي بالبيت والجوارين ...
وهم يلبسوني القيود
جتي  عيني  على  روان لازمتها ايه ...وملاك
وام ملاك تبجي
دخلت السياره وعيني على روان

———————————
البارت ٥١٠٠ كلمه
لان اريد اخلص من القصه سببتلي كأبه .. وحزن وخاصة بارت البارحه.
وفي اسئله عن منو نقل القصه
اعيد واكرر. ايه فقط
نقلت القصه وطلبت اكتب قصتها فقط
وبعدين قررنا نكتب قصه الاخوات تلاثتهن
واي شخص مذكوره بالقصه  ميعرف في قصه انكتبت
او تنشر  او ديتابعوها ماعدا ايه
رعد  انطاني معلومات  بصفتي دكتوره  واحب اعرف عن زواج القاصرات
وملاك  نقلت ايه المعلومات عنها
وطلال ابد نهائيا  مامتصله بيه
ولا مكلمته
للتوضيح فقط