النظرة الاولى

ج2..ب 19

#النظرة_الاولى2
#طيبة_الربيعي
**الجزء الثاني .. البارت التاسع عشر**

>>>>>>>>>>>>>>
جزء ثاني (19)

(بوية عنچ من المسلسلات التركية وعيشي الواقع، هذا التفيك لا تمشي براسي مايمشي والخلقچ)
(واني ماريد اروح للعمارة هسه اسبوع كامل هنا بعدها سوي اليحلالك)
(يومين هنا وعگبهة نمشي غادي، سلامي للأهل)
(مو بكيييفك)

مرد بعد.. ولا عبرني لا اني ولا رأييييي.. بسيطة تريد تتغدة بية قبل لا اتعشة بيك مو.. بعدك متعرفني زين..'طيبة_الربيعي'

گاعدين كلنة بالاستقبال بيبي وعائلتنة وخوالي وعوائلهم.. واحد يحچي بحلگ الثاني متعرف منو يحاچي منو..

دگ فون بابا ترخص من خوالي وطلع يحچي برة.. ماما راحت وراه بيبي گلتلهة شوفي خاف يحتاج شي خاف اكو شي..

عمو وخالة عفاف ابيت عمو ابو حيدر يباتون والبقية عمامي يحضرون بس العرس يجون بعدين.. حرامات بنات عمامي ميگدرون يحضرون حنتي كلش ضجت بس شيسوون خطية ممتعودين عالطريق مثلنة ومو دائما ينزلون لبغداد نادراً ما عمامي يجيبوهم لهنا..

وهم يخافون يگولون الوضع مو امان.. بس احنة دائما نجي وماكو شي الوضع طبيعي.. بس همة متخوفين من الاخبار والإشاعات.. حقهم اليشوف الأخبار ميتمنة يطلع يبقة لازم البيت وگاعد..

احنة نطلع عادي مطمنين مدام وية بابا قابل شيريد يصير الاعمار بيد الله كل انسان ويومة وساعتة محد يموت ناقص عمر..'طيبة_الربيعي'

اهلة موجودين ابغداد ابيت بيبيتة الله يرحمهة وشاهيناز ذو الفقار ذبهة يمنة وراح..

عمو ابو حيدر مخابر بابا گلة اريد بسمة تنزف من بيتي وحلف مية يمين الة من بيتة.. لان بالعادة البنت تنزف من بيت ابوهة واذا مو ابوهة عمهة.. يعني اخر حل يكون بيت اهل الأم..

بابا موافق ميريد يخرب علاقتة بعمو علمود حيدر رغم احسة ضايج ومقهور على مريم بدة يحس چان اكو بيناتهم حب طاهر يربطهم.. بس مع الأسف معرفو يحافضون عليه..

مريم من عرفت محچت شي ولا اعترضت.. اصلاً مهتهمت.. هذا الظاهر طبعاً بس اكيد بداخلهة صراع قوي..

تحضيرات الحنة متخلص كلسع ناسين شغلة.. بيومهة رحنة گوشة بنات لمركز ......... بس بيبي بقت ههههههه رغم لحينة عليهة تجي مقبلت تگول المن متزوگة (معدلة نفسي) والرجال يم ربة..

البدلة اجرتهة لون بصلي ودلعة الصدر قلب الحب.. بيهة شغل مرتب وبسيط بس تجنن الوحيدة العجبتني بالمحل كلة.. من اربيل حجزتهة..

بعد ماخلصت تنضيف وترتيب بلشولي بالميكاب وبنفس الوقت عاملتين وحدة تسوي اضافر رجلية واللخ ايدية.. وتلاثتهن يسولفن فوگ راسي دخت وحرت على منو ارد..'طيبة_الربيعي'

منا التوتر ديزيد عندي احس كل هذا الديصير غلط بغلط.. بس مابين المجبورة والمتحمسة لحياتي الجديدة

شاهيناز: منو هاية معقولة بسووم
جيلان: كل هاي التحضيرات علمود الحب

وتغمزلي وشاهيناز تضحك.. شوف ذني

بسمة: الية هاي التحضيرات مو لأحد

ودرت وجهي

مريم: ممممم متأكد بسوووم
باوعتلهة: جلدچ حاكچ انتي مثلهن موو
ضحكت: شبيچ انتلتي
بسمة: شنو ماعندتچن غيري روحن مني

خلن حتة بنات الصالون يضحكن علية.. التمن كلهن فوگ راسي من خلصولي كلشي..

منطني مجال اشوف نفسي بالمراية.. لحد ما عطت بيهن.. يا يوووم فديتني اجنننن.. لاگين بهذا الجمال همة؟ مستحيل..

اجوي علينة ولد خوالي رجعنة للبيت.. بيبي شافتني هلهلت وگامت تهوس هههههههه.. خربتني ضحك..'طيبة_الربيعي'

وذني خبصني ام بولة راح تزوج.. فضحني.. اذا وصل هل لقب لرزاق ياكلني ويشربني ويصير يعيرني..

لبست البدلة يلة كملت السبحة

ام شاهيناز: اميرة بنيتي فدوة اروحلچ ماماتي
بستهة: حبيبتي ماما
ام شاهيناز: الله يسعدچ وينور طريقچ يارب

خلتني ادمع

جيلان: ديلة عيني اليوم يمچ هية خلي هذا الكلام لباچر

شبگنة بعض خمستنة.. الله يحفظلي عائلتي ويطول بأعمارهم واحد واحد.. شسوي بدون امي وخواتي اني.. الله يديم بابا خيمة فوگ روسنة..

الشباب كلهم طلعو تركو البيت النة.. نص برة ونص بالحوش ونص مموجودين اصلاً بس البعض بقو علمود اهلة لرزاق من يجون اكيد وياهم ابو اخوتة..

التمينة بالاستقبال والبنات شغلو الديجي ساعة دبكة ساعة چوبي ساعة رگص عراقي مأصل..'طيبة_الربيعي'

بعد ساعتين تقريباً ماما گالت ابوچ خابر يگول خمس دقايق ويوصلون.. البنات گامو يركضون منا ومنا هاي ادور شالهة وهاي ادور على ابنهة لو بنتهة..

شاهنياز گالت بس هو يفوت يحنيچ يلبسچ الذهب وماعرف ايش ويطلع.. يعني ماكو داعي اتستر على گولتهم..

صار عندي مغص ابطني وتوترت كلش

شاهيناز لزمت ايدي: لتخافين حبيبتي وسمي بسم الله يخفف التوتر مالتچ
بسمة: خايفة
شاهيناز: من شنو عمري ترة مياخذوچ اليوم بعدچ ابيت اهلچ اطمأني، وحتة من تجين لهناك راح تشوفيهم شگد حبابين حتة لو بعضهم مزعجين بس هذا من غيضهم خليهة ابالچ ومراح يأثرون على حياتچ اذا منطيتيهم مجال

كلهن يمي يهونن علية عبالك حدخل معركة.. احساسي بالأول غير عن احساسي هسه.. ماعرف شلون اوصفة بس خايفة ومتوترة احس ورطت حالي.. وهسه اختلف الوضع داحس نفسي صرت ضعيفة وماگدر اردة..

شاهيناز اتصل بيهة ذو الفقار گاللهة جينة.. واسمع اصواتهم برة يتسالمون بيناتهم..

هنا فقدت السيطرة على هدوئي واحتلني كلي التوتر..

گالتلهم جيلان البسو حيدخل العريس.. دخل لابس قاط ازرگ وقميص ابيض بدون رباط فاتح الياخة وشوية باين من صدرة العالي.. اني شفتة هيچ ارتبكت..'طيبة_الربيعي'

هو فات مدنگ مستحي يمكن.. من وصل العندي وعيونة التقت بعيوني من ارتباكي مباوعتلة بعد دنگت وصرت العب ابدلتي من التوتر..

ممنتبهة منو دخل وياه بس سمعت عمتة تگولة بوسهة براسهة عمة وهو مطفي يمكن مرتبك مثلي..

يمة من خلة ايدة على زندي وباسني براسي حسيت نفسي راح اخرب.. لو ما العيب من الناس الموجودة چان غمضت عيني علمود ماعيش اللحظة زيادة عن اللزوم وافقد السيطرة على نفسي..

گعدت وهو گعد بصفي.. شعور يقتل القوة.. صارت هوسة بس فكري كلة بشغلتين.. شلون باسني براسي.. اذكرت بوستة بالغرفة بس هاية چانت اكثر حرورة ماعرف ليش حسيتهة هيچ..

والشغلة الثانية قربة مني هسه.. گاعد لزگ بية.. جابو صينية الحنة وماما گالتلة يحنيني واني احني.. بالعادة غير لازم اني احني بأصبعة

رزاق: شني بوية مرة انة وتحطولي حنة

اني بقيت صافنة عليه

ام شاهيناز: غير هاية عاداتنة حبيبي هية تحنيك بأصبعك وانتة تحنيهة بأيدهة
رزاق: عادتيش هاي عمة گولي غيرهة
ام امل: ولك عمة لازم چا شلون تطلع منا لا محنة لا شي
شاهيناز: ميخالف رزاق هسه حنو بعض عيب منا العالم

بس وين هو ياخذ كلام احد.. قفل وضاج'طيبة_الربيعي'

رزاق: وخريهة ماريد انة احنيهة مو شرط تحنيني

امة زاحت شاهيناز وگالت: عوفو مو شرط تحني، حنيهة ماما وهذا هو لتحط اذا متريد
رزاق: جيبي ايدچ

هاية شبيهة.. شاهيناز بقت صافنة عليهة واني فرت بنفسي اگوم انتفهة بس عيب ومو من اخلاقي ممتربية على هيچ اني..

گلي: مدي ايدچ خل احنيچ
ضجت: ماريد

ودرت وجهي.. البنات لاحظو وبيبي همينة

بيبي عصبت: مدي ايدچ بيبي مو وكت اعنااد هسه خزيتونة

مديت ايدي وامري لله.. هو يباوعلي اني ماباوع بعيونة حقدت عليه بالزايد.. يعني شنو الحنة يجي يباوع علية ويروح غير يحنيني واحني..

هو اني ليش مهتمة كل هذا صار بالاجبار يطبة طوب هو وامة السعلوة..

بعدها وكلني كيك اني موكلتة عاندت بس شربنة بعض عصير.. كرهي كثر وحقدي عليه زاد.. يتعمد يسوي هيچ ماشي اني همينة مراح اتعامل بألتي هي احسن.. مو من عيني تدلل..

اخذولنة صور ووراهة امة شاورتة هو هز براسة.. من راحت تقرب وشاورني

رزاق: رايح انة
بسمة: واني شعلية
رزاق: سهلة'طيبة_الربيعي'

وگام ترخص وراح.. البنات نزعو واخذو راحتهم.. شوية ورجع المود مالتي تمام.. طز بي هو وامة شنو همة ويعكرون مزاجي بحنتي..

لليل هلكنة هلكنة اني تعبت انتهت طاقتي صعدنة اني ومريم بدلت وهية هم ساعدتني وبدلت.. بعدها التمينة ندردش ونضحك ونحچي عالعرس..

امي ضايجة من امة حچت البيبيتي بيبي گالت معليچ بيهة خلي بنتچ تتزوج وتنسعد لتخلين تصرفات امة تكون عائق بين العائلتين..'طيبة_الربيعي'

بيبي هدتهة وخلتهة تنسة السالفة.. رحت للغرفة طلعت فوني لگيتة دازلي مسج

(بالعرس ماريد اغاني اليوم عديتهة چي الحفلة تخصچ بس باچر اذا سمعت واحد مشغل اغنية الف الكاسيت علة رگبتة)

همزين دزيت الله جابك

(ها المحروسة والدتك الأمرت بهذا الشي لو شنو)
(مالچ شغل بأمي لسانچ ينگص اذا جبتي طاريهة بالموزين)
(ليش مو هية الفشت لأبوك عليك وفضحتنة وورطتني وياك)
(وياهو الگالچ اذا دخلتي لغرفة عزابي اطلعين منهة سالمة)
(واللهي بس اذا العزابي نفسيتة ضعيفة وميخاف الله)
(اعلمچ الخوف من الله شلون يصير)
(لتعلمني ولا اعلمك واغاني افتح هذا عرسي ومن حقي)
(انتي مرة فتحي اغاني حتة اشوفچ الامهات شتخلف)

مرديت عليه بعد مثل ما اجاهلني ذيچ المرة اني همينة اجاهلة..

ثاني يوم العرس رحنة لنفس المركز.. اضافري نفسهن مغيرت بس الميكاب ردتة ابسط من البارحة لان المكياج الخفيف يلوگلي.. الطوخ يضم ملامحي واني ملامحي ناعسة عيوني ناعسة ميلوگلي اللبخ الاوفر..

خواتي طلعن احلة مني خاصة مريوم.. راح يزفوني من بيت عمو ابو حيدر وكلش قلقانة شلون اذا مريم التقت بي.. اكيد راح ترجع تنكسر احنة مصدگنة رجعت مريم البشوشة..

رغم الجرح بالگلب بس يگدر يطيب اذا ابتعدت عنة وملتقت بي نهائيا..

ورة مخلصنة لبست البدلة اهل الصالون عدلوني و رتبولي البرگع وهل سوالف.. اختاريت تاج كرستا صغير ناعم متناسق وية بدلتي الشغل البيهة كرستال..'طيبة_الربيعي'

واكيد مخلصت من الميدح كلش خجلوني.. اليوم شعوري اسوء من شعوري البارحة.. بعد هذا هو ماكو خط رجعة بسمة انتي الدستي برجليچ على بساط التمساح.. تحملي نتيجة الغلط القترفتي..

الصدمة من طلعنة شفنة حيدر منتظر يم سيارتة.. عساس عثمان يجي بسيارتة علية وذو الفقار ياخذ نص وبسيارة بابا ميسر ياخذ النص الثاني..

مريم.. حاولت اتناساه بهاي الفترة لان استسلمت للأمر الواقع.. والتهيت او بالاحرى حاولت الهي نفسي علمود ماكتم على روحي بالغرفة واخلص يومي بالبچي والحزن..

اهلي كلهم ساندوني بالأخص خواتي كلهن لعبن دور بسعادتي.. خلني احس بقيمة نفسي.. غلطت واعتذرت لحيدر مليون مرة.. بس هو مسامحني وهذا الشي راجعلة بعد..

بس كسرني مرتين.. وهل مرة ماسامحة ابقة طول عمري منتظرة حوبتي تطلع بي.. وماتمنالة السعادة وية خطيبتة..

مو بيوم وليلة يحصل على تعبك واحد مسعى بگدك.. ومو من المنصف اسامح ولا كأنما انكسرت مرتين..

اني انكسرت وگلبي مستحيل يرجع يتصلح مرة لخ.. بس اگدر اتعايش وية هل انكسار مدام عندي عائلة اساسهة قوي ومساندتني بكل خطوة اخطيهة..

كل كلام گلتة علمود اقوي نفسي بي وكل تحفيز اجة من اهلي وبيبيتي واقاربي اتبخر من طلعت وية البنات وشفتة..'طيبة_الربيعي'

لابس قميص ازرگ فاتح الياخة وكاف الردانات ولابس بنطرون اسود مال قاط.. بس سترة القاط ماكو..

چان ذو الفقار واگف مقابيلة مبين يسولفون..

انفك جرحي وكل خيط ذرفتة في سبيل اخيطة انگص بمگص نظراتة بأتجاهي..

نسيت اني برة ونسيت اليوم عرس اختي.. من شفتة دموعي انحبسن بعيوني وحيلي كلة باد

شاهيناز لزمتني: مريم اذكري كلامي لتضعفين گدامة
باوعتلهة: ماضعف، ميستاهل اضعف علمودة
شاهيناز: عفية هاي اختي الاعرفهة، امشي وياية نصعد بسيارة ذو الفقار لتنطي مجال
مريم: تمام

بعد ولا باوعتلة ولا عبرتة.. بسمة باوعتلي اشرتلهة وهزيت براسي بأبتسامة حتة تطمن انو مابية شي..

بلحظتهة لبست لباس القوة بس داخلي متحطم.. لو مجاي احسن.. چنت مفكرة مراح تكون الة عين يلتقي بينة بعد السواه.. بس طلعت صلف يا حيدر.. كلش صلف..

صعدت وية شاهيناز وذو الفقار وويانة جيلان الي قلقت علية وطول الطريق تلطف الجو علمودي..'طيبة_الربيعي'

وصلنة لبيت عمو.. بدون اغاني احتراماً للحجية.. بابا حذرنة وبيبي همينة..

التمينة كلنة ابيت عمو حيدر صار ازدحام زين اذا الواحد يلگالة مجال يوگف..

شفت خطيبتة.. كاشخة ومعدلة اليشوفهة يگول عرس اختهة.. وبعدني شعندهة جاية محد عازمهة.. ههه هو اكيد..

لابسة موديل يختلف عن البقية.. الكل فساتين وتنانير وماعرف ايش الة اني فضلت اغير شوية.. تلبيسة يعني بنطرون كيلوت طبگ وية البدي.. وردي وصخ فاااتح وفوگاه سترة ردانهة قصيرة يعني فوگ من الكف..
وبالردانات فتحة قصيرة..

كلش حلو الوصف يظلم جمالة بس بالواقع يجنن.. وبي شغل بسيط.. وشعري مسويتة كيرلي وملمعتة.. صبغتة جوزي يلوگلي هل لون وهم حبيت اغير شوية مليت من الأسود..

طبيعة شعري كللللش ناعم وثخين.. بالگوة صار كيرلي..

ومكياجي مطوختة وخالة رموش.. يعني صدگ شادة حيلي للعرس ههههه.. ماريد اشوف احد اني ضعيفة.. صح تأذيت ابعدك يا حيدر بس متت هياتني عايشة.. مريم حيةٌ تُرزق اما انتة صرت حقير بعيون الكل حتى بعيون اهلك..'طيبة_الربيعي'

خالة ام حيدر اكلتني بالسلام اعرفهة مقهورة علية بس اني مبينت بالعكس بينتلهة فرحانة ومهامني السواه بية ابنهة..

ماكو وحدة غريبة بيناتنة كلهم گرايب معزمنة غربة لان گرايب كووومة وهم يالله يكفي المكان.. صايرين واحد فوگ اللاخ..

گبل يزفوهم للفندق العرس مو شي مثل مگلت احتراماً للعزاء الي همة بي..

امي گالتلي روحي اتصلي ابيبيتچ گوليلهم وين صارو وشوفي ابوچ همينة شالقصة..

تأخرو عساس بابا هو وبيبي يجون سوية.. حتة خوالي بعدهم يعني رياجيلنة بعدهم مجايين..

اتصلت بس هوسة وكلشي ماسمع.. طلعت برة ميسر مقبل

ميسر: يمعودة الزلم طابين طالعين صعدي فوگ احچي ماكو احد فوگ

هم صحيح منتبهت اني شعرفني.. صعدت فوگ بالمجاز واتصلت ابيبي ماكو.. ابابا ماكو.. اتصلت بخالي الصغير گال هسه طالعين وابوچ ملتهي وبيبيتچ اكيد ذابة فونهة شوف وين كالعادة..

من خلصت سديتة وانداريت اريد انزل صار بوجهي حيدر هستوة صاعد..

بلعت ريگي من التقن عيوني بعيونة.. انتبهت على نفسي.. ليش بعدني اضيع بعيونك رغم اذيتي كلهة منك..'طيبة_الربيعي'

غيرت للصفحة اللخ علمود انزل بس لسوء حظي هو همينة تصرف مثلي لا اردياً.. اني اوخر منا هو يجي هو يروح مناك اني اروح..

اخر شي وگفت

مريم: ممكن اعدي بلا زحمة

وگف على صفحة

جر نفس: فوتي

تعديتة ونزلت.. بس گلبي الة شوية ويوگع بيدي.. ركضت لجوة رحت لماما گتلهة جايين..

بسمة... توتري كل ما جالة يزيد ولا كلام خواتي فاد ولا كلام ماما.. اريد انهي كل هل خرابيط السويتهة.. ورطت حالي اني..

مغص ابنطي موتني..

الكل اجة ومن ضمنهم بابا.. شبگني وگلي تحترمين زوجچ واطيعي ماريد احد يشمت بية ويگلي معرفت تربي..'طيبة_الربيعي'

كلام بابا هو المعذبني.. ماعرف شلون راح اصرف بعد تيهت طريقي وكل فكرة اجتي ابالي تبخرت وصارت هباءاً منثوراً..

لا اغاني ولا شي بابا ميقبل واني مو بحال يسمحلي اعاند..

الوقت مشة سريع بغمضة عين صارو هنا.. وماحس بس اصوات الهلاهل علت وگالو اجة العريس والجهال يگمزون ويصفگون..

المفروض اني الافرح هيچ بس گلبي ناغزني..

دخل لابس قاط اسود وهل مرة لابس رباط.. مزين شعرة ومعدل لحيتة طالع ارتب من البارحة..

دخل والابتسامة باينة بوجهة.. ووراه عمتة تهوس وتهلهل.. هذا الحچي بابا برة محد من الرياجيل هنا بس نساء..

وبس هو وحدة دخل.. گوموني هو تقرب باسني براسي ووگف بصفي.. وهوسة هوسة ارتبكت صار كلشي يربكني..

لبسني الذهب واني مثل اللعابة امي وجيلان يتحكمن بية

شاهيناز: شبيچ انتبهي

ممنتبهة يريد يلبسني الگلادة.. من لبسنياهة صار كلش قريب والحظ الأغبر عوج وياية الزنجيل ميريد ينسد.. وهو احس ايديه ترجف..

اخر شي عمتة وخرتة هية سدت الزنجيل..'طيبة_الربيعي'

وية كل لمسة احس راح اتخربط مابيهة مجال.. ليش ديصير هيچ وياية ياربي قويني..

واخيراً انتهينة من تلبيس الذهب.. بدلنة الحلقات من اليمنة لليسرة.. وهنا علت اصوات الهلاهل والتصفيق عبالك مسوين انجاز عظيم..

بعدها اشرلهم

رزاق: الهذا الغطة وين
شاهيناز: اطمن موجود
رزاق: لبسيهة خوية لخاطر نطلع
شاهيناز: من عيني

اني لساني انوكل ماگدر الاسن.. لبسوني هذا البرگع الچبير غطوني كلي

شاورني: من اليوم ماكو تفرعن بعد

حچاهة بخبث.. لو ما عيب اضربة بخشمة اكسرلهيا.. بسيطة..

لزمني بأيدي.. جريتهة

شاهيناز بعصبية: بسمة هاي شدتسوين، عزة بعينچ لچ عيب
بسمة: ماااريد مليزمني
جيلان: لچ استحي على نفسچ منا العالم لتخزينة

شاهيناز: يلة حبيبي اخذ مرتك خلي نطلع متنة حر

ميشبعون من الهوسات ورغم دخت منهن بس تمنيتهم يطولون للأبد ولا اروح للفندق وابقة لوحدي وية هذا المتوحش..'طيبة_الربيعي'

طلعنة هو يگودني والبنات يعدلن ابدلتي ويشيلنهة علمود لتتوصخ بالگاع.. بس الأخ حتى بهاية يدقق

رزاق: شتسوين ياخوي لاترفعينهة
شاهيناز: غير علمود لتتوصخ
رزاق: وخل تتوصخ چا اطلعين رجلينهة، ستري علينة خوية گليلهن يوخرن لاوحدة اجر ووحدة ترفع خبلتني

عصب من طريقة كلامة.. ابتسمت محد يشوفني لان متغطاية.. شنو يغار علية لو هو لان عيب عندهم البنت يطلع منهة شي هيچ ديسوي..

صعدوني ليورة بالسيارة.. وصعد هو بصفي.. ذو الفقار يسوق وبصفة مؤيد ابن عمة.. والي ورة بس اني وهذا المزعج..

عملاق ياربي ماخذ كل المكان حاصرني.. اووووف..

وبدت الزفة تمشي.. صوت الهوسات عالي.. ماكو اغاني بس الهوسات تسوة ابو الاغاني لعبو علب اصدقائة..

وعلى نص الطريق توقفو ونزلن يضربون طلق..

واني بالسيارة انحمست حمس رغم التبريد مشتغل اختنگت..

صوت الطلق رعبني اكثر من ما اني مرعوبة..'طيبة_الربيعي'

وگف گلبي من فجاة اگلب صوت الطلق لصياح وواحد يصيح

لحددددد يرررررميييي ووولكم ........ تصوووووبببب

متت رعب منو تصووووب.. من العياط الصار مسمعت الأسم لمنو.. صرت ارجف ومأجة ابالي غير رزاااق....

يتبع...🔥🔥🔥🔥🔥