مساء العسل
حين يزهر الحجر
الجزء الثامن
اخذت الملف وطلعت واني فرحانة لان كلي مهرة هم وبدون ست..
معناها عجبه شغلي..
مدري لان تعبان ودايخ ..
احاجي نفسيوشفت اجه..
ها مهرة خلصتو شغل..
اي كملنا الحمدلله ..مشايف الاوراق جانت مجزرة يمه..
هههه لعد ليش دز عليج لان يعرفج شاطرة وبسرعة تخلصين..
هسه طلع لو بعده؟
لا كال حطلع ..
ماشي لعد...
رجعت للمكتب ودزيتله الطلبه مني وكملت شغلي كله ..
ورا دقايق دخل وسام...
بشرى سارة...
باوعنا اني وحسن بلهفة..شنو شنو !!
حسن كال شنو حتغدينا ع حسابك..
اني كتله..لا يا اكل ..
كون هسه يكول باجر عطلة لتجون...
ضحك وسام كال..هو صح عطلة بس مو باجر...
استاذ شجاع طلع للبيت..
كال اذا خلصتو الشغل البيدكم طلعو ..
لان ماعدنا شي اليوم...
الله يبشرك بالجنة يااخي..
بقى يضحك وراح...
خابرت حيدر ..كال ربع ساعة ويمج...
اف شكد حلو حرجع انااام..
كعدة الصبح مزعجة وكلش مشتهية انام...
رتبت اغراضي وحضرت جنطتي..
دك حيدر وطلعت...
بالطريق كتله..
فدوة حيدر اريد حلويات من ابو مهند...
تدللين بسيطة...
وكفني ونزل جاب وكوة قبل ياخذ فلوس...
عزلتله من كلشي شوية وقبل لا انزل انطيته وتشكرته...
دخلت قبل الاذان بشوية..
امي لكيتها تقرا قرآن ..دخلت مبتسمة حتى لتنهبط من تشوفني راجعه من وكت...
كتلها الله يساعدج يما ..اليوم معدنا شي ورجعنا من وكت...
سدت القرآن وكالت..
ويساعدج حبيبة اي ارتاحيلج شوية ييما...
بستها براسها ورحت ابدل..
كالت ارتاحي ع متجي اختج ونتغدا...
رحت بدلت وشوي اذن وصليت...
واني اصلي دك الفون...
خلصت شفتها رحاب متصلة مرتين...
دكيت ع تانكو وجاوبت..
بركاتك يشيخة..لان جاوبتها باحرام الصلاة..
الله يهديج بنتي ..حجيتها بهدوء واني مبتسمة..
هاديني بس طلعي منها..شوكت تحوكين لرزان منامة؟
يبووو اني كلت هالمكالمة العاجلة وراها مصلحة...
هسه بعدها طرزان بكد الحمصة..
وتدوريلها ملابس خل تكبر يجوز يطلع موكلي مو طرزان...
هم ميخالف انومه بيها حتى لو سويتيها وردي..
لو اكلج سوي وردي وسوي ازرق...
اييي وبعد مدام..متردين احوك الج لزوجج للصومالي كولي بالخدمة...
هههه ع سيرته اليوم راجع مفرفش ويسولف..
اهي..ع كولة المصريات...
لج مساع كوة ينطق اني كلت رح ينام بالحمام وينسو ويطلعون..
ياحمام ولج...
لج غير انجب الجاي عليه وراح يغسل..
وصلبني بالباب اقراله بالملف..
وسطرني كل ماقراله كلمة انكليزيه كال تهجي..
قطعيلي الحروف من قطعو حواجبه كون...خبصني تعبان ونعسان واريد ارجع..
لج مهور تحجين صدك!تقربت من الشاشة وتحجي بصوت ناصي...
اي صدك قابل اكذب..
طلع حيال انوب وكاعد ماتعبان..
سمعت صوت ارفد ..الحيال ياكل معسل بالمطبخ اصيلحه تردين..!
وضحك...
عزاا بس لا سمعنييي..
لا لج جان بالحمام هسه طلع..
يلا لعد اروح ..بااي...
بقيت افكر بهذا الخبيث وكفني وخلاني اقراله اكيد يريد يذلني...
انوب مسوي نفسه تعبان ويتشرط ويتأمر..
عابت ابو حواجب...
بقيت متمددة ع مااجت زهرة ..
بس وجهها مخطوف ومتحجي..
كلت ورا الغدا افهم منها اخاف امي تنتبه...
تغدينا ونظفنا المطبخ ...
اخذت الجاي ورحت يمها...
لكيتها متمددة وايدها ع عيونها..
سديت الباب ودغيتها من بطنها فزت ...
شبي الحلو مغيم منو مزعله...
غمضت عيونها وفركت كصتها...
مهرة حسين يريد يجي يخطبني..
استغفر الله ..تنهدت واني احاجيها..
خلي يجي واملج بربنا كبير..
قابل تبقون طول عمركم معلكين...
كعدت ولازمة ايدي بتوسل..
مهرة شلون بعاطف كليلي...
الخطابة التجي يشردها من الباب لو شافهم شيعة...
شلون ...
حسين يحبج وخوش انسان وشريف ..
واذا فعلا رايدج ينتظرج ويصبر حتى لو رفضوه..
اصلا اني متفائلة بموضوعكم..
لان اعرف حسين زلمة معدل..والمفروض انت واثقة اكثر مني..
لان معاشرته وتعرفي..
شتكولين يقبل!
انشالله يقبل ..بس شنو حتكولين لامي؟
اي اكلها طبعا..
الله يسهل ويقدم البي خير وصالح..
طلعتها شوي من جو الخوف وطمنتها ..
بس اني خايفة اكثر منها..
لان عاطف واعرفه..
هالموضوع ميتناقش بي...
الله يستر بس..
راحت حاجت امي وكلتلها العصر يجون ..
امي كلتلها شنو فجاة غير ينطون خبر..
كلتلها كلتلي من امس بس استحيت اكلج..
بس الصدك هي وحسين متعاركين لان يكلها مليت الانتظار...
رحت اني سويت كيكة وكليجة عدنا بالثلاجة..
حضرت صينية واشياء الضيافة..
زهرة راحت سبحت وشسورت شعرها وهي شعرها طويل كلش واسود..
عكسي اني مااخلي يطول دوم اكص بي بس هم مو قصير يعني لنهاية ظهري..
بس قياسا بشعر زهرة قصير...
كعدنا نسولف وامي يمنا..
عاطف اجه ودخل لغرفته..
لا شفنا ولا شافنه...
ورا شوية اجو واستقبلتهم امي...
طلعت زهرة بس خايفة وترجف..
هي راحت واني كعدت اصليلها استخارة وادعي...
ورا ماراحو اجت وجهه مستبشر..
كلش عاجبه امه وخالته واخته الي جايين ...
تكول اسلوبهم حلو كلش ورزنين ..
بقت بس امي تحجي لعاطف ..
وامي كلش مدحت بيهم وكالت امهم امبينة مرة خيرة...
وخوش قسمة الولد محامي واله مشتمل يم اهله ..
وهو عاجبته ورايدها..
حسيت امي فهمت زهرة تحبه..
والاكدلها حماس زهرة من حجت وكالت..
الولد شايفته ومؤدب وكلها الكلية تمدح بي...
امي قررت تحجي وي عاطف بالليل...
وكالت هالمرة مااخلي يرفض بعد رح تتخرج البنية المن مكعدها...
بالليل حاجت امي عاطف ..
كلها سدي الموضوع من يمج..
اني شيعي عادي مانطيت مو انطي سيد ..مستحيل..
بالساعتين وامي تحاجي وتقنعه وتحجيله زينات الولد وهو ابد مقتنع قناعة تامة...
مااناسب شيعي ولا شيعي يناسبني..
احنا اخوة واسلام بس سالفة زواج من شيعة الغيها..
مااضمن مايجبرها تصير من مذهبه ..
ولا اضمن ماياذيها ويشدون اهله وياها..
ماخلت امي شي ماحجته..
وهو ابد كتلج خابريهم كليلهم ماكو نصيب....
كابلتني زهرة وكعدت تبجي..واني اصبرها واهدي بيها..
صفنت بيها وتخيلت نفسي بموقفها شكد صعب...
تذكرت اني حبيت شجاع ومااكذب تمنيت اصير حلاله...
هه وواثقة انه اهلي يوافقون بعد ...
شكد عقلي تافه وصغير..
احس هالمشكلة فتحت عيوني ع هالشي..
او تقريبا كف صفعني رجعني للواقع الاني بي....
وهو اصلا شجاع مو بحالي ولا شايفني...
احلام اليقظة اشيلها من راسي واعقل احسن...
قهرني حال زهرة وهي تلوب وتخابره وهو يصبر بيها ويكلها بعدنا اول محاولة..
اني رايدج بالحلال ورب الحلال ينطيج الي...
اني صافنة عليها هدت شوي وبقت تضحك ارتاحيت لان خايفة عليها...
بهالاثناء دك قباني ..ماجاوبت لان زهرة جاي تحجي اخاف يسمعها..
فصلت الخط...
ورا شوي اجاني مسج...
*مجنونة ..من مر عهد شبابها ولم تلثم..*
لا صدك!شبي هذا اليوم يحجي باللثم هه...
مسحت المسج واني اضحك عليه شكد فارغ عايش دور الفارس الغامض ابو لثمة...
وقتت الفون ونمت..
كعدت بدلت ورحت..
كالعادة شجاع يم الريسبشن..
بس هالمرة ماباوعت وقررت من هاليم اتجاهله تماماً...
بلشت بالشغل والتهيت..
وزين مادز عليه شجاع حتى لا التقي بي...
بس ورا الاذان مالت الظهر..
جابلنا وسام اني وحسن كل واحد حافظة اكل...
كال استاذ شجاع مسوي ثواب لامه...
لان هو امه ميته ومرت ابوه مربيتهم...
جانت الحافظة بيها قطعة بيتزا وكباب وصاجتين وفطيرتين وياها بيبسي ومقبلات...
جنت حيل جوعانة اكتسحت الاكل كله...وقريتلها الفاتحة...
رحت غسلت وبطلعتي من الحمام لاكيته...
دنكت ومشيت ..
حسسته اني ممهتمة بس اخدع نفسي اذا كلت ممهتمة...
لان العطر دخل بانفاسي...
غمضت واني استنشقه ومشيت...
واستمريت بهالتجاهل قدر الامكان..
مرتين خابرني وسام يريدني شجاع بشغل اكول لحسن روح انت واسوي نفسي اخابر بمكالمة ضرورية...
وحسن حسيته فهم الشغلة وفهم رفضي..
والحمدلله انقذني بروحته...
خلال هالايام امي ماردت خبر لاهل حسين..
كالت ارجع احاجي عاطف ..
رحعت حاجته واكثر من مرة رفض قطعياً...
امي رجعتلهم خبر..
هنا زهرة انهارت وامي عرفت بيها...
بس استغربت موقف امي ماصارت ضدها ..
صارت وياها وكلتلها مدام رايدج صدك يصبر...
واني هالمرة اوكف بوجه اخوج...
هي خافت اهله ميقبلون بعد يخطبها مدام تفشلو ورفضو...
بس امه خابرتها وكلتلها...
احنا متفهمين اخوج واكيد رح يغير نظرته ويقتنع..
لتخافين حسين يحبج واني لعيون ابني اجي واخطب لحد مايقتنع اخوج...
والسيد كال اخذلهم مشية وناس واصلة واجي حتى نقنعهم...
زهرة اقتنعت وارتاحت..
لان دائما ينخاف من ام الولد اذا انرفض ابنها تصير حزازية تحاه البنت واهلها...
بس العلوية ثبتت العكس...
الحمدلله زهرة تطمنت...
اليوم كعدت مكسرة وظهري يوجعني..
لعبان نفس قوي والم ببطني..
عرفت موعد الشهرية..
صفنت وتذكرت الصار المرة الفاتت..
كلت مااداوم...
دزيت لارفد رسالة..كال يراحتج تردين يوم واحد لو اكثر..
هنا ماعرف ليش اخذت ع روحي حسيته بسمار هههه ..
كتله لا يوم واحد بس لان تعب قليل..
تشكرت منه وسديت الفون ورجعت نمت...
احلام مخربطة ودوخة..
كعدت مصخنة وتعبانة...
اجابتلي امي علاج شربت ورجعت نمت..
للعصر يلا كعدت..
جابتلي زهرة سوب لحم وخبز وتمر ..
اكلت وكعدنا نسولف...
ورا شوي سمعنا صوت امي ترحب وتهلي..
بقينا نتصنت..
شوية واجت امي...
حاجتني..كالت هاي مرت خال تماضر جاية تخطبج..
تثاوبت واني احاجيها..
يمه هي تماضر ورح تسوي بيه جلطة..
لعد العريس الجاي من طرفها اكيد هذا يجيبلي الكفن..
ضحكت كالت كومي طلعي عيب..
طلعت بس لبست عبايتي الخليجية وياها شال..
اني منا مصخنة ووجهي مطفي...
هم شافوني تفاجئو توقعو اطلع بترتيب وشعر..
كعدت يمهم كوة..
سالت امه شبيج خالة مريضة..
نطت تماضر..
لا مابيها شي عدها الشهرية وتعرفين دلع البنات...
اني منا الوجع ذابحني والصخونة والنفسية الدايس عليها قطار...
باوعت للمرة..
خالة اني عندي التهاب ومن تجي الشهرية مثل الجايبة اصير...
اباوع لامي حصرتها الضحكة..
تماضر والنسوان اقاربها مثل وكفت عليهن اللقطة..
كالت المرة يا بس مو زينة التهابات لو تعالجين...
كلتلها امي اي جاي تعالج...
هم هنا قلبو الموجة شوي وراحو...
من طلعو تماضر سالتني صدك عندج التهاب؟
اي متشوفيني ميته وجع دكتورة كالت عندج كيس والتهابات...
هي طفرت حتى ماحجت..
يمكن راحت تخبر الناس يبطلون...
رجعت تمددت واجت امي ميتة ضحك...
ولج مهرة منين طلعتي بسالفة الالتهابات..
هههه يما اريد اشردهم واعرف النسوان يخافن من الالتهاب عبالهن مااخلف..
متشوفيهن شردو...
غير الصدك بنيتي زين سويتي..
لا نريد جرفة تماضر ولا نريد احد من طرفها....
راحت امي واجت زهرة جايبتلي كوب دارسين..
كعدت يمي...
اكول مهرة رفضتي لان قريب تماضر لو لنفس السبب الابالي...
عوفيني ناسية الابالج ومقتنعة..
ترى هذا مرض مابي اجر ولا عوض...
تنهدت زهرة ومسحت ع شعري وباستني...
ربي يعوضج باحسن واحد يروح اختج...
بقت متمددة يمي..
تلعب بكصيبتي وتسولف وياي ...
نمت كلش من وكت يمكن المغرب..
ماحسيت الا الفجر بالخمسة...
كعدت شبعانة نوم بس جسمي واجعني..
كمت سبحت حتى تروح التكسيرة والصخونة...
حسيت نفسي تنشطت..
سويتلي ريوك وتريكت..
تالي كعدت زهرة وتريكت واني يمها بالمطبخ..
كالت فونج سويته صامت ترى اخاف يدك حيدر ومتسمعي..
ها ليش اكيد دك قباني..
اي دك بس مو مثل يومية ..
فتحت خط كطعه وكل ماافتح خط يكطعه ويتصل من جديد...
اخر شي كتله دكااافي نريد ننام الله ياخذك...
صدك بعدها مادك...
عزا العزاج هههههه طفرتي الرجال صرختي بوجهه..
اي غير يفك لا هو كاشف عن نفسه وعارفي لا هو عاتقج مرمرني...
كمت جبت فوني وشفت كومة مكالمات ضحكت عليه هذا شنو وضعه ماعرف...
اخذت علاج ورحت بدلت..
شفتلي عباية شوي ميبين بيها جسمي..
هيج ايام انفخ شوي..
صارت كدامي العباية ام الطباقات..
ضحكت واخذتها لبستها ولبست حفاية بيضة ..
وشال ابيض وبي ورق شجر ناعم بلون بنفسجي ومتباعده نقشته..
رحت للدوام ..
شجاع ماكو يم الريسبشن..
رحت للمكتب حسن موجود كال سلامات..
كتله لا شوي تعب بسيط..
كال عندج العافية وصبلي جاي ويا لان جان يشرب...
كعدت اشرب جاي وحسن يشتغل..
ورا شوية اجه المحاسب وراد من عدنا ملفات واخذها وراح..
حسن طلع من الغرفة واني اشتغل...
للعشرة خابرني وسام...
مهرة استاذ شجاع محتاجح تعالي وجيبي وياج ملف كذا شركة...
تنهدت واني اتشرد منه وهو يدز عليه شلون بي..
حسن ماعرف وين اختفى جان دزيته..
استسلمت وطلعت..
سلمت ع وسام ورحت دكيت الباب..
دخلت وهو جان كاعد مكتبه وكدامه اوراق مسوي الميز معرض مال اوراق...
جان مرتجي ع الكرسي ويدخن..
وكفت اني طبعا ماكال كعدي ولا اني كعدت...
يدخن ويحجي بتمعن..
سلامات ست مهرة خو مابعدج تعبانة؟
لا تمام ..
اذا بعدج اخذي الاسبوع كله...
حجاها وعيونه تتفحص ردة فعلي...
درت وجهي ع غير جهة بس احس وجهي احتر ومتت خجل ..
عابت الا يلمحلي هو عرف...
بقيت واكفة وهو خلص جكارته..
كال يلا نبلش تفضلي ..اشرلي ع القنفة..
اني كعدت ..
اجه كعد كدامي ..اذا تسمحين الملف الي بيدج..
مد نفسه واخذه..
ااااف العطر مخلوط بالجكاير ..
زلزل كياني ونساني وعودي بنسيانه ونساني حتى اني وين...
كال ركزي وياي ست وخلي الورقة والقلم والحاسبة يمج...
اي كلشي حاضر استاذ...
بلش يشتغل واني ويا..
شوية واندك الباب ..جابو جاي لومي عزاا ليش وصى على هذا بالضبط..
احنا صح موجود بالشركة بس ليش طلبه هو بالذات..
ماعرف اني نفسية واتحسس لو هو حقير...
كال تفضلي شربي..قبل ليبرد..
شربت شوية مكدرت اكمل توترت..
هو شرب وبقى الكوب ع الطبلة..
كملنا شغلنا بعدها اني كمت ..
تحتاج شي استاذ؟
هو كاعد والملف بحضنه..
كال وهو يباوع لوجهي يصعد لعيوني وينزل لشفايفي..
يهمج شنو احتاج؟؟؟
اني عبالي سمعت غلط بقيت مصفنة...
كوة جمعت الكلمات وكتله..ها!
سمعتي شنو كلت ...
من كال ها سمع..
عن اذنك استاذ...
اجيت اريد اعبر وكف كدامي..
غمضت ماريد عطره ياثر بيه لو وكفته كدامي وهو يذوب الحجر بوسامته..
ليش غمضتي؟؟متردين تشوفيني؟؟
فتحت عيوني كتله..
مو هيج بس خليني اروح احسن...
صايرة قاسية ما جنتي هيج؟؟
غثني كلامه ومتحملت..
باوعتله ..انت شتريد مني؟؟؟؟
اني ماريدك ابعد عن طريقي ..مستحيل اباوع لشخص مثلك ..
مغرور ومتملك وتباوع للناس مثل العبيد...
اذا حسيت اني انعجبت بيك او حبيتك انت غلطان..
مااحب شخص قلبه حجر...
يضرب ويدمي بدم بااارد..
ولا كانه عنده احساس وقلب...
تقرب مني وبقى يحجي بوجهي ببرود...
ليش مستغربة؟؟اني شايل بصدري حجارة وعمر الحجارة متلين ..
سامعتلج بحجارة خضرت؟؟
ابتسمت بطرف شفتي واني مركزة بي..
اي ممكن الحجارة تخضر وتلين وتثمر هم..
بس تحتاج موجة ماي تتغلغل باعماقها..
وتصير العملية بسيطة..
تعرف ليش؟؟
مشيت للباب اريد افتحه وقبل لا اطلع ..
ركزت بعيونه اكثر..
لان اصل هالحجارة من تراااب ..
من طيييييين ..
مهما علت وانصاغت ذهب تبقى ترااب...
ردت اطلع ...
عت ايدي حيل ودفعني ع القنفة....
بقلم شقراء(قمر كانون)