#النظرة_الاولى2
#طيبة_الربيعي
**الجزء الثاني .. البارت الثامن عشر**
>>>>>>>>>>>>>>
جزء ثاني (18)
حاولت مابين خوفي حتة ليفكر نفسة ربحان بس اني گاعدة مابين خوفي وتوتري وعزيمتي بالانتقام.. ااااهاااا معناتهة انتة همينة محمل علية.. هسه راح تصير اللعبة حلوة لان لعب بدون منافس مثل الدنيا بدون الآخرة
بسمة: لعد شنو وافقت علمود سواد عيونك، انجبرت
رزاق: هه انتي تنجبرين؟ والله ماصدگ
بسمة: علمود بابا ميوصلة الحچي وتصير مشاكل بين العائلتين، ماريد اخرب حياة اختي وية زوجهة
رزاق: والله عمي شريفة
وحچاهة بأستهزاء.. صدگ نرفزني
بسمة: شتقصد
رزاق: اگصد الگاصدة مالچ شغل انتي، ومن اليوم هذا اللبس يتبدل لو طالعة گدام عمامي واخوتي هيچ چا عرفت شغلي وياچ
بسمة: بلا تهديد رجاءاً انتة ابيتي على فكرة
رزاق: سهلة بوية تجين لبيتي لو لا
بسمة: اجي ليش لا
رزاق: انشاءالله خير'طيبة_الربيعي'
بسمة: هه عود يخوفني
رزاق: صدگ ماتخافين؟
بسمة: على شنو اخاف يمة بعبع حضرتك لو شنو
ضحك باستهزاء: راح تدعين ربچ انة بعبع مو رزاق، بعدچ ماتعرفيني زين بنيتي، امشيچ علة تك رجل وانتي الممنونة
بسمة: تعجبني جرائتك وثقتك بنفسك ولو واااضح راح يودوك للتهلكة
رزاق: مايعجبني بيچ غير لسانچ، يرعد يرعد وتالي ينگص بالسيف
بسمة: صاحب السيف يكون مجنون اذا يحاول يسحب سيفة على لساني
رزاق: مسودن وداعتچ، وتشوفين المسودن شيسوي
بسمة: شتسوي يعني تخنگني واني نايمة؟
رزاق: لا بوية هاي راح تتمنينهة اصلاً
بسمة: هههههه شنو هل ثقة
رزاق: بعدين تعرفين هاي الثقة مصدرهة منين
درت وجهي بغرور: نشوف
رزاق: اخذيلي طريق
گمت وتعمدت اوخر الشال.. بس مشيت گدامة صاح وراية
رزاق: تعااي جاااي
درت عليه مستغربة: خير
گام وتقرب: شو دوري
بسمة: ليش
رزاق: دوري لا تناقشين
تخوصرت: وليش ادور عيني شتريد
خنزر بعيوني.. مد ايدة على چتفي ودارني
عصبني: هااي شسوووي'طيبة_الربيعي'
وبعدتة ورجعت باوعتلة
رزاق: ظهرچ هذا ينشطب اذا طلع گدام زلمة غيري، تفتهمين ما تفتهمين شي راجعلچ اوامري اذا ماتنفذت اقري علة روحچ الفاتحة لا ابوچ يكضني ولا اكبر مخلووق
بسمة: لتهدد واني مو غبية اطلع گدام رجال غريب هيچ، واني ابيتي مو بررة
رزاق: شو وخري
وبعدني بدفعة على صفحة وفتح الباب.. عملاااق عملااااق مو بشررر
رزاق: خوية شاهيناز اخذيلي طريق
شاهيناز: اي عيوني تدلل، تعال ماكو احد اصلاً كلهم گاعدين جوة
دار خزرني وطلع.. مخبببببللللل
شاهيناز: هاا شحچيييتووو اشو كلشي مسممعت
ابتسمت: كلشي محچينة
شاهيناز: لا مبين، بس لا باسچ ولچ
بسمة: شوف هاية يا بوس انتي، تريدين بوس روحي ذاكة زوجچ لتحرفيني
شاهيناز: ممم باع البرائة
بسمة: هو الباسني على فكرة مو اني
شاهيناز: مرة لخ؟؟؟
بسمة: لااا، شحدة غير اگص شواربة والله
ضحكت: ايييي تحدي تحدي، وبعدين من تموعين بين ايديه ماوصيچ ابقي احچي بالتحدي
بسمة: هاي شبيچ شاهي شهل حچي، ميتة عليه اني، هو الرادني مجبرتة يخطبني'طيبة_الربيعي'
شاهيناز: رزاق درة داري وحافظي عليه لتخلين طيشچ يخرب كلشي
بسمة: اني الدرة ولازم هذا الكلام يتوجه الة هو الي لازم يحافظ علية
شاهيناز: هههههه خبلة صايرة انتي مينگدرلچ، تعالي يلة
رجعنة يمهم وام رزاق نظراتهة معجبتني ومبين معاجبهة الوضع.. شبيهة هاي المرة شلون بالأول چانت طيبة وكريمة تحير شتسويلنة من انروحلهم..
حتة الفراش الجديد طلعتة النة من رحنالهم اول مرة.. بس فعلاً كلام ماما صحيح بعد وفاة بيبيتهة صارت تتجنبنة.. بس ليييش احنة بالذات اشو طبيعية وية الآخرين وويانة مادة البوز ومعبسة..
بين السوالف ماما گالت لشاهيناز خابري رجلچ وشوفي اذا خلصو علمود نصب الغدة اكيد الجماعة جوعانين..
شاهيناز... ذو الفقار ميحاچيني.. اتصلت بيه علمود رزاق گتلة خلي يطلع علمود يگعدون يحچون هو وبسمة.. طلعلي هو بالأول يشوفني شلابسة.. اطمن لابسة مستور محچة شي دخل جاب رزاق ورجع.. ولا گلي كلمة..
متت قهر هسه اني انحرم من اهلي بسبب عمتي الشادة وية حتى رجلي الهوة ابنهة.. شلون وياهة شسويهة حتة ترضة علينة..
خلي ارجع للبيت والله كريم احاول اكسبهة بأي طريقة بس كون ميساء متدخل وتحركهة علية.. والمشكلة امل لعابة ميساء تمشي بأوامرهة.. وثنينهن وكحات وين اگدرلهن اني.. هنة بس نظراتهن تقتل الواحد بمكانة..
اتصلت بي لان ماما گالت علمود الغدة
رد: ها
شاهيناز: ممكن تطلع اريد احچي وياك
ذو الفقار: ليش'طيبة_الربيعي'
شاهيناز: تعال اطلع وانتة تعرف
ذو الفقار: احچي هسه شكو
شاهيناز: ماگدر لازم اشوفك
ذو الفقار: اصبري
وسدة.. يعني راح يطلع.. انتظرتة اباب الاستقبال.. شوية وطلع
ذو الفقار: شرايدة
شاهيناز: ماما تسأل اذا خلصتو علمود الغدة
ذو الفقار: راح السيد هسه اشوفهم
شاهيناز: تمام، حبيبي لتضوج مني بعد مابات واتركك وعد
ذو الفقار: مو وكتة هل حچي، رايدة شي بعد؟
لزمت ايدة: ذو الفقار لتعاملني هيچ والله البيتة طلعت سم علية، انتة هم فكر بية شوية انحرم من اهلي يعني شلون
جر ايدة: من عندچ رجال تفكرين بي گبل لا تفكرين بالبقية، وترجعين وياي بيتة ماكو بعد اريد مرة تگلي ابات
شاهيناز: مو گتلك هذا هو بعد مابات، بس لتسوي هيچ
عگد حاجبة ونصة صوتة يحچي بعصبية: شمسووي هاا شمسووي؟؟!! صارلي اسبوع مدري شگد اهدومي اطلع بيهن وصخات محد هااامة امريي، لا مرتي لا كععبة لا اميييي
خليت ايدي على صدرة: اهدأ حبيبي لتعصب حقك ماتركك ولا لحظة بعد، مچنت اعرف محد راح ياخذ شغلي بغيابي معبالي امك شادة ويانة لهل درجة
ذو الفقار: ********* انتي وامي
ودفع ايدي ورجع دخل يمهم.. هاي شگد معصبي لعد الله لينطيهم.. رجعت يمهم ضايجة وعمتي على نفس المود مغيرتة مگالت عيب اني ابيتهم وبنتهن اللخ راح تصير چنتي..'طيبة_الربيعي'
ولو هية متحلفة حتة لبسمة وهية الحاولت تحرض عمي بس صار العكس وانستر الموضوع ابدال مينفضح..
{وَيَمْكُرُونَ وَيَمْكُرُ اللَّهُ ۖ وَاللَّهُ خَيْرُ الْمَاكِرِينَ } صدق الله العظيم
من بديت اقرة قرءان واواضب على الصلاة تحسنت هواية.. صرت صبورة وكتومة واتغاضى عن هواية اشياء.. ومن ضمنهن الديسوو وياية عمتي والبنات..
كلة بفضل الله وذو الفقار.. لو ما هو اني ماتعمق بالدين هيچ واحس بقيمة نفسي قبل لا احس براحة نفسية
ام شاهيناز: ها ماما شبيچ
شاهيناز: مابية شي يوم
ام شاهيناز: معاجبني وضعچ انتي خل نفرغ من اختچ ونحچي
شاهيناز: الله كريم
ام شاهيناز: يتغدون لو لا
شاهيناز: هسه ذو الفقار يدزلي مسج
دزلي گال اي صبو.. صبينة للزلم تغدو بالاستبقال واحنة بالمطبخ.. بيبي مگدرت تجي وهم ضاجت لان مريضة والطريق متعب متتحمل..
علمود لتزعل گنالهة الحنة والعرس ابغداد علمودكم.. لان همة هواية وصعبة كلهم يجون..'طيبة_الربيعي'
مالي نفس اكل اكلت لگمتين وبقيت انگنگ علمود لحد يلح علية مابية حيل اناقش..
لليل اني مشايفتة لذو الفقار.. من اجة وقت النوم اجة هو وعبد الرحمن اخذو الفراشات وفرشو بالاستقبال.. اريد اصالحة شلون مادري.. گلت الماما اريد الغرفة مالتي علمود اني وذو الفقار انام سوية گالت اي عادي قابل راح ينامون بكل الغرف..
دزيتلة رسالة
(حبيبي اني وياك انام بغرفتي لتفرش يمهم تعال هنا)
تأخر بالرد.. رحت للغرفة مرتبة بس يحتاج افرش بالگاع لان السرير ميكفينة ثنينة.. من فرشت اجاني الرد
(هنا انام فرشت بعد)
(اي مو مشكلة اتركة وتعال هنا)
(انام هنا گتلچ لاتلحين)
صدگ انقهرت.. واني فرشت النة ثنينة وخبصتهم غرفتي النة اني وذو الفقار تالي متالي فشلني.. گعدت عالسرير وبيدي الفون اعيد قرائة رسالتة.. دخلت جيلان
جيلان: ها وينة ذو الفقار
شاهيناز: تعالي انتي والجهال نامو هنا
جيلان: شنو انام بنصكم تريدينة اني وجهالي عيب
شاهيناز: ميجي حينام هناكة'طيبة_الربيعي'
جيلان: ليش
شاهيناز: ضايج مني
گعدت بصفي: ياا علويش شكو
شاهيناز: سالفة ادوخچ لتهتمين جيلان
جيلان: شلون ماهتم وانتي من اجيتي لليوم مو على بعضچ، احچيلي حبيبتي شنو الصاير بينكم
شاهيناز: جيبي الجهال هسه ومن نريد انام احچيلچ لان سالفة طويلة
جيلان: تمام
بعد ما اطمنة محد محتاج شي وكلمن صار بمكانة اخذنة جهالهة ودخلنة للغرفة.. تنوم بيهم واني اسولفلهة.. حچيتلهة عن عمتي وميساء وامل.. كلشي حچيت
جيلان: هذني شجاهن، هاي عمتچ من كل عقلهة
شاهيناز: اكيد حاچيات براسهة المرة چانت حبابة وكلش طيوبة والله
جيلان: وهية طفلة تمشي بكلامهن، هاية ميساء مدام قريبة خطيبتة السابقة مراح اتركچ بحالچ خلي ذو الفقار يشوفلة صرفة وياهة
شاهيناز: ماريد اسوي مشاكل احنة دندور على بيت قريب عليهم يعني مگاعدين يمهم للأبد، لازم اكو شي يخرب الفرحة كلهة
جيلان: شي طبيعي شعبالچ لعد انتي تعيشين مرتاحة بيناتهم، همة وين واحنة وين
شاهيناز: لا جيلان ماكو فرق بيناتنة ناس مثقفين بس ميساء مندسة بيناتهم وتأثر على اختة لذو الفقار بشكل مو طبيعي، يعني مو معقولة هية همينة صافة وية خطيبتة السابقة
جيلان: خلي يولن لدوخين راسچ بيهن، وذو الفقار شدعواه واذا غبتي كم يوم راح ياكلة البعبع'طيبة_الربيعي'
ضحكت: غير امة شادة وياه، تصوري ملابسة ميغسلنهة الحقيرات
جيلان: يعني ولا وحدة خيرة بيهن واداري حماهة، شكو بيهة
شاهيناز: بلي بيداء خطية متركتة بس هو ضاج من امة ويستحي يطلب من وحدة من نسوان اخوتة
جيلان: حقة
خلصنة سوالف ونمنة.. الصبح تريگنة وبعدها گالو نروح علمود نوصل من وكت.. حضرت غراضي ماما خلتلنة اكل للطريق وحبت تلطف وية عمتي
ام شاهيناز: ام كاظم هذا الاكل الكم للطريق خاف اجوعون
ام ذو الفقار: منريد خلي الكم نگدر نسد جوعنة
كلنة واگفين شگد عيب فشلت امي.. ام امل عرفت جو عمتي مو تمام.. ماما بقت صافنة
ام امل: عاشت ايدچ اوخيتي هسه اخلي الولد يحطو بالسيارة
ام امل اخذتة من امي.. امي محچت خطية سكتت.. عمتة اخذت الاكل وگالت يلة نروح اذا خلصتن..
لفيت شالي واخذت جنطتي.. طلعنة للحوش ودعنة اهلي ماما ضايجة ومعبسة.. ودعت خواتي وبابا بوستة برة.. ذو الفقار منتظرني.. داريد اصعد بسيارتة بالصدر
فمشيت باتجاهة چان تسبقني امل وتزيحني..
فتحت الباب وصعدت.. باوعت لذو الفقار.. اشرلي براسة يعني ميخالف.. شنو هل مصخرة هاية.. شدتسوي هاية.. ليش هو ميگدر يوگفهة عند حدهة ترة طلعت روووحي بتصرفااتهة مال مزعطةةة..
رزاق گلي تعاي بهاي السيارة'طيبة_الربيعي'
ذو الفقار: لا خوية اصعد انتة
باوعلي: صعدي ورة
صعدت ورة ماريد مشاكل.. بس صرت اغلي غلي.. الطريق متعب لعبت نفسي لان نفسيتي تعبت من ذني..
وصلنة للبيت گبل صعدت لغرفتي.. فرغت جنطتي وبدلت وهو ماكو.. اسمع صوتة جوة.. بس شوية وصعد اني چنت بالحمام..
دخلت للغرفة لگيتة يبدل
ذو الفقار: حضريلي هدوم اريد اسبح
شاهيناز: ماشي
حضرتلة هدومة هو دخل يسبح.. دگيت عليه الباب انطيتهن الة ورجعت للغرفة.. تعباااانة ومابية حيل اسوي شي..
طفيت الضوة وشغلا السبلت ونمت..
بسمة... محچينة بعد اني ورزاق.. مصارت فرصة.. بس من راحو بابا اجاني
ابو شاهيناز: بابا هذا رقم رزاق واني انطيتة رقمچ علمود تتحاچون وتتعرفون علة بعضكم اكثر
بسمة: ماشي بابا
كلش استحيت.. انطاني الرقم رحت لغرفتي.. ماتصل بي لو يموت ولا ادزلة شي..'طيبة_الربيعي'
شاهيناز... صحيت مرعوبة حلمت بكابوس گانو مرة تريد مگبعة اسود بأسود وتريد تخنگني.. من خوفي گعدت اصيييح
ذو الفقار: اسمم الله اسم الله، شاهينااز
شاهيناز: وخرررييي، ماااماااا
لزمني يهدي بية: ماكو شي هاي انة ذو الفقار لاتخافين شاهيناز انة يممچ
اتنفس بسرعة وعيوني يجرن.. متت خوف حضنتة وابچي
ذو الفقار: لاتخافين انة موجود هذا كابوس گولي يا الله'طيبة_الربيعي'
وقرة علية المعوذات.. حسيت براحة لان هو يمي
شاهيناز: هاي ثاني مرة اشوفهة تريد تخنگني
ذو الفقار: منية
شاهيناز: ماعرف، مرة وجههة ممبين ولابسة اسود
حضني حيل وخلة راسي على صدرة: كابوس رويحتي لاتخافين
بيومهة گوة نمت وهو خطية سهران وياية.. جريناهة نومة لثاني يوم الصبح.. سويتلة ريوگ يخبل وصالحتة.. ورة الريوگ طلع للشغل..
ساعدت البنات بشغل البيت وسوالف ومر اليوم بشكل طبيعي الحمدلله بدون مشاكل..
اسبوع على نفس الحالة عمتي متحچي وياية وتشوف الشيطان ومتشوفني.. وميساء وامل نفس الشي.. بس ميساء شدت وية جهال بيداء والبنية متوصل الرجلهة متريد مشاكل بين الأخوة مثلي..
اني انطيتهن الاذان الطرشة من يسمعني حچي مارد ولا اسوي نفسي سمعت وهل شي يخليهن يفورن بالزايد..
عمتي شدت وياية وكثرت الشغل علية.. تصخرني حتة غرفتهة انضفهة.. ارجع للغرفة هلكانة وحتة مابية حيل اعدل نفسي لذو الفقار..
هو لاحظ هل شي گلي دادور بيت بس ماكو قريب علينة شسوي.. گال صبري مبقة شي..
بسمة... مرن اسبوعين لا اني الدزيتلة ولا هو.. ماما تسألني اگوللهة بلي نحچي بس مو دائما لان مشغول بالشغل.. وهو چذب لا حچينة ولا شي..
الاسبوع الثالث اجتني رسالة منة
(مساء الخير)'طيبة_الربيعي'
سويت نفسي عود ماعرفة منو
(منو؟)
(انة رزاق)
(اهاا خطيبي)
(لا اخوچ)
(مضحك)
(وانة گايلچ ضحكي؟)
(تفضل شرايد)
(العرس الاسبوع الجاي والوالد اليوم يتصل بوالدچ لخاطر ينطي علم)
شنووووووو
(انتة اكيد تشاقة)
(مشاقي وياچ گبل؟)
(شنو الاسبوع الجاي مستحيل)
(ليش بوية ماعاجبچ)
(شنو الاسبوع الجاي وين الحگ اخلص كلشي بأسبوع واحد)
(هذا الموجود اطيتچ خبر لخاطر الوالد من يفاتحچ بالموضوع مايشك بينة مانحچي)
(واني ماريدة الاسبوع الجاي بعد وكت)
(ماطلبت رايچ، اودعناكم)
شگد حقيييير.. رحت لماما گتلهة گالت احسن الخطوبة اذا اطول موزين تصير مشاكل.. هية ماما انكسر واهسهة من ورة امة لرزاق صارت متهتم..
شلون بلة.. ياهوة الي اگلة يگلي عادي حتة شاهيناز تگول احسن حتة تجين يمي وخاف سالفتكم توصل لبابا لو الماما لان ذني خبيثات وميضمن شي..
غمضت عين فتحت عين لگيت الكل ملتهي بتحضيرات العرس.. حتة بابا عادي عندة ويگول افضل هيچ.. ونعرفهم بعد علويش نطولهة وهية قصيرة..'طيبة_الربيعي'
أسبوع كامل اني اركض ركض.. وعلساس مخلصين الغرفة وعود مؤقتة ذو الفقار محاچيهم ومقنع اهلي انو نسكن وياهم من يخلص البيت..
لاگين بيت صغير بس يكفي النة والهم.. شاهيناز فرحانة حتطلع.. تگول بس يحتاجلة ترتيبات لان قديم والچانو ساكنين بي مُخربين ويحتاجلة ترميم وماعرف ايش..
قبل الحنة بيومين نزلنة لبغداد.. علمود الحنة والعرس.. دزلي رسالة قبل الحنة بيوم
(اول ليلتين ابغداد وعگبهة نرد للعمارة)
(انتة شنو بس تنطيني اوامر ليش متاخذ رأيي بشي؟؟)
(وليش اخذ رأيچ بوية ماخذچ علة حب لو شنو)'طيبة_الربيعي'
(كون جنتل مان شوية احترام المراة يرفعك ميقلل من شأنك يكون بعلمك)
يتبع...
كتبتة شلون ماكان تعبانة ومنايمة زين
الاسبوع الجاي عندي عطلة اسبوع كامل
اعوضكم والنبي حقكم علية هواية قصرت بهاية الأيام
ووحدي ضايجة لان مداالگة الوقت للكتابة
احبكم❤️