حين يزهر الحجر

٧

مساء الخير
حين يزهر الحجر
الجزء السابع

من تلامست شفايفنا جسمي رجف ..انرعبت ..
صح مرات كنت اتمنى هالشي..
بس هسه من صار واقع احس روحي مسوية جريمة وخايفة ...
بس لحظة اني تخبلت ..
ماجاي اركز هاي حلوسة ..حلم ..
لو صدك!!
من فتح الطباقات ايده انمدت ع صدري فز قلبي وعقلي وكلشي بية..
حاولت ادفعه وعني..
لزم ايدي من المعصم بقووة...
باوع بوجهي وكال...ليش تدفعيني!!
مو ذابحة نفسج علي وتحلمين بيه؟؟
حجيت بثمالة كوة انطق..وخرر عني لتلمسني...

كعدني عدل وراح للثلاجة..
رجعت راسي ليورا بس اريد استعيد قوتي..
فززني برودة الماي طشه ع صدري..
لزمت عبايتي حيل ولميتها ..باوعتله واريد اكوم..
انطاني بطل الماي كال شربي...
اخذته من ايده وشربت وغسلت وجهي..
راح ورجعلي ..فتحي ايدج..
رفعت راسي وباوعتله بيده عطر...
رشلي وكال استنشقي..هسه تروح الدوخة ويرجعلج الوعي...
ترسلي ايدي عطر...
اني دايخة وشبه واعية وكل تركيز ماعندي...
بس ردت اركز باسم العطر مكدرت..
حفظت شكله ..زجاجة زيتونية..
وتصير من فوك طويلة بيها مثل الرقبة..

شميته واخاف اني بس دايخة جنت ..
العطر زاد الاحساسيس وقلب كلشي مخبىء بداخلي..
بقيت اشم بيدي..
هو واكف وايديه بجيوبة...
بس تقريبا استعاديت وعيي ..كمت واستندت ع القنفة ..
وهو واكف يترقب تصرفاتي...
رفع حاجبه...شلون تشربيها ماخفتي تختنكين؟؟؟
حاجيته واني افرك بكصتي..
مالي كلام وياك..ليش تلمسني!!
ضحك مستهزأ..
منو باسج!!!!اني؟؟
اي لعد منو..
لا غلطانة..انت ذبيتي نفسج بحضني..
كلت فرصة واجتلي..
رجال مطلق ومحروم وصحتلي فرصة قابل اردها؟؟؟

احتقرت نفسي وكرهت تصرفاتي وثولي..
يعني ماكان قصدي شي بس اجرب الاركيلة وطعمها..
متوقعت هيج تبعاتها...
بقت دموعي تكت واحس العبرة كسرت صدري..
شنو فرصة !!شفتني رخيصة كدامك؟؟
شنو كفرت جربت شي ممجربته..
قابل كنت متقصده اغريك؟؟
اجيت ومالكيتك كلت اجربها..
اعرف تصرف غلط وارعن..بس ماوراه القصد الي انت فاهمة..
بقيت امسح بدموعي والصداع موتني...
ستدت نفسي عدل وشفت روحي اكدر اطلع..

لا تبجين يبا قابل ظالمج اني..
شفت نفسي عاجبج ومن اعبر تشمشمين بريحتي ..
كلت اريح قلبج ليش تبقين بالحسرة..
صارت عيوني براسي هذا شكد حقير ومستصغرني!!!
رفعت اصبعي واشرت عليه من جوا لفوك واني امشي..
مابقى عليه بس الشياب المعقدين بعد هه...
وهذا اخر يوم الي اداوم بعد متشوف خلقتي...
وصلت للباب كلش كلت احجي واشرد المهم ابرد قلبي..
باوعت بعيونه وصارلي فترة ممباوعة بيها...
نظراته جانت حلوة وتتاملني ابد ماكو غضب اصلا بعيونه ضحكة...
ركزت بي وايدي ع الباب..
اني يعجبني الزلمة الرزن مو اليطلع مراجله بالضرب..

خفت اباوع لردة فعله شردت بسرعة...
قررت ابطل ومابقى بعد...
ليش هيج يعاملني ولو حقه..
اني خفيفة واباوعله واشمشم بعطره..
ورحت شربت اركيلته ودخت يمه وماريده يحجي..
بس خلا ص ابطل وارتاح شيريد يصير يصير تعبت..
شكد كرهت تصرفه بس قلبي واجعني افاركه ماريييد...
قررت بس هاليوم وبعد مااجي..
بقيت كاعده بس الدوخة تدك براسي..
كملت الدوام ع اعصابي وادعي كون مااشوف شجاع كدامي..
خلص الدوام ورجعت ..

امي انتبهتلي كتلها مصدعة كلش ودايخة..
سوتلي جاي لومي ودلكتلي راسي هديت صدك..
زهرة راجعة من وكت ونايمة..
خطية تفكر بهذا المجهول السمعنه ..
واني حاطه ايدي ع قلبي اخاف يطلع براق..
تمددت بفراشي ومخليه ايدي ع خشمي..
استنشق الريحة ومغمضة..
نزلت دموعي ع هالحب البائس..
توني بديت اغفى وسمعت صوت تماضر تحجي وي عاطف صوتهم طالع..
فزيت مرعوبة اسمعها تصيح سوق ع كيفك لتروح تدعم وتيتمنا..
كمت وكوة متوازنة..

طلعت وملحكت ع عاطف طلع بسرعة..
حاجيته بخوف..شبييي عاطف شصاير؟؟؟
خابره ابن عمج صباح يكول ..
البارحة براق ابن عمج منير هو وعائلته ببغداد وصاير انفجار..
ياساتر؟؟شنو متاذين خو محد مات..!
مادري ماكال بس طلع يركض..
انشالله ماكو شي خطية بعدهم شباب..

رجعت للغرفة بقيت ادعيلهم خطية شما سوا بس شاب وابنه صغير كون مابيهم شي...
بقيت لازمة جهازي ومصفنة..
راسلت رحاب حجيتلها كالت الله يعديها ع خير ..
سمعنا بي بالاخبار كلش قوي وهواي ضحايا..
محجيتلها عن الصار وياي اي شي لان مالي خلك كلش...
اجاني مسج من رقم غريب..
باجر تداومين وشغلة الاستقالة انسيها..
فتحت الصورة مالت الاسم صورة شجاع..
لابس رسمي وكاعد صفح وحاط رجل ع رجل وبيده جكارة..
بقيت صافنة بالصورة بعدين تذكرت المسج..

احتاريت بشنو اجاوبه تالي كلت ارده ومااغير قراري..
كتبتله..
شيطلع بيدك سوي ودوام مااداوم بعد...
اتصل كمت قفلت الباب وحضرتله رزالة عدلة..
فتحت خط ورجف قلبي..
ست فضة باجر تداومين..حجه بثقة وهدوء..
واني محضرتله عركة بس مشفتها تناسب الجو..
تنفست وكتله ..
ماريد اداوم عد شخص معتبرني فريسة سهلة..
الحمدلله ممحتاجة حتى اذل نفسي هالكد..

همم ..ماشي ست لعد العشرة مليون تتسلم بوقت الي تتركين الشغل..
شنو بوقتها غير اكو مدة محددة؟؟
انت ليش هيج شاد وياي فد مرة؟
متوهمة ماشاد هذا الشرط وانت وقعتي بيدج محد جبرج..
واذا مادفعته يعني طلبت مدة لحد ميدبر المبلغ؟
تنسجنين اوووو...
شنو او؟
ينسجن اخوج...
عزااا شنو؟؟
هه غريبة..اكلج انت تنسجنين ماحركتي ساكن..
كتلج اخوج طفرتي..!
ماريد اخوي يتحمل نتيجة حماقاتي هذا بمثابة ابوي...
بعد فكري بيها عدل وكيفج ..
حتى اذا قررتي مترجعين للدوام..
اخلي المحامي باجر يبلش بالاجراءات...
حقييييير...همست واني امسح دموعي..
صارن هواي ست فضة يصير خير...

سدة بوجهي واني صافنة وعيوني تصب..
اباوع لزهرة صافنة علي ووجهه مرعوب..
اجتلي وهي تهز براسها شكو!!!
حجيتلها بقت صافنة..
لتصفنين كليلي شسوي؟؟
لتسوين شي رجعي داومي..هذا الظاهر مابقلبه رحمة..
زين هو ليش يكلي داومي بعد الصار..
مو اذا ضايج مني يطردني؟
طمع بيج ميطردج بعد..
بس انت وكفي عد حده ولتخلي يتجرأ وياج..
صفنت افكر ماكو غير هالحل..
لان ماعدنا هيج مبلغ مستحيييل...

تالي كلت لزهرة  ع براق وطلعنا يم امي نسولف..
تأخر عاطف مامنه خبر..
اخر شي خابرته تماضر وجاوب..
لان شكد خابرنا قبلها ميجاوب..
اراحت تحاجي بعيد عنا شوي وسمعناها كالت يااا الله يرحمها وهو وابنه؟؟
خطية الله يشافيهم ..
بقينا صافين بوجه بعض ..
الموت شي صعب ويخوف واحد ميتمناه لاحد..
اجت كالت براق كتفه وايديه متصوبات..
وابنه اصابته قليله لان حاضنة..
بس مرته ماتت...
لان جانت اقرب منهم للانفجار هم بعيدين..
خطية بعدها شابه وابنها تيتم ..

كامت امي لبست اسود وراحت  لبيت عمي..
بقيت مقهورة عليهم هواي..
نمت من وكت لان تعبانة وكآبة..
كعدت الصبح لكيت مكالمة ومسج..
نفسه قباني هذا منو !!
مو شجاع اكيد لان عرفت رقمه..واصلا شجاع وحش عصابجي مو مال هيجي..
بس بعذ السمعه ليش يدز!!
استبعدت شجاع واستبعدت براق طبعا..
بقى بس يوسف شاكة بي اما غيره ماعرف..
فتحت القصيده وهالمرة جانت ابيات..

*تلك الدموع الهاميات احبها..واحب خلف سقوطها تشرينا...
بعض النساء وجوههن جميلة..ويصبحن اجمل عندما يبكينا*

باوعت للمسج هذا شعنده شاد كاميرا شنو ..
اشو مواكب الاحداث فد مرة!
حذفت المسج وكمت غسلت بدلت..
قررت من هاليوم البس عباية خليجية ..
عسى ولعل يبطلون يشوفوني جلي ع كولة مدير المحترم...
شجعتني زهرة ع لبسي ورفعت معنوياتي ..
ولو معنوياتي لو يجبولها جك مايرفعها...
معنوياتي متمددة بالارض ومسحولة هم ..

رحت للدوام دخلت ماشفته يم الريسبشن..
سلمت ع حسن وكعدت وبلشنا شغل بس متكاسلة ومالي خلك ابد...
كمل الدوام وهو لا شفته ولا اتصل..
بس اكيد شافني لان كاميرات الشركة يمه ..
واعرف متفوته شاردة لو واردة بالشركة...

مر اسبوع كامل مشايفته بي..
والمجهول لا زال يراسلني ويتصل..
الاسبوع الوراه سافر وبقى عشر ايام..
صح احن اله كلش واشتاقله مو بيدي...
بس اني تماديت ورحت زايد..
هو وين واني وين..
اكيد يريد وحدة من مستواه وتناسبه..

بهاي الايام براق تحسن وابنه زين..
وعاطف ماتركهم يوميه يمهم ..
وامي هم تروحلهم وتزورهم وتماضر..
اما احنا البنات مندخل ولا نطلع...

بيوم رحت للدوام وتوني داخله سلمت ع ريسبشن جان رجال واكف يمهم يحجي..
اني سلمت وتعديت ومانتبهتله اصلا ..
بس لمحاته جبير يجي عمره خمسين..
كعدت اشتغل ورا شوي خابرني وسام..
دخلت اني وسالته شرايد مني؟؟
كال استاذ شجاع رايدج بس عنده ضيف..
اوكي انتظره لو مطول؟
لا مخلص ميطول...

كعدت واسولف وي وسام عن الشغل..
صدك شوي وطلع استاذ عدنان...
الرجال الجبير الي شفته مساع..
عرفه بيه وسام وكله موظفه عدنا وهو سلم عليه بحرارة ونظرات لوتية..
العرفته يصير خال شجاع..ووسام ابن زوج خالة شجاع..
يعني شي تعرف شي...
راح واني دكيت الباب ودخلت..
لكيته كاعد ع القنفة ويمه اوراق..
اول ماشفته قلبي فز خرب قلبي هم..
هو رفع راسه ونظراته حلوة للحظات نسيت شنو احنا..
نظراتنا تشابكت وتعاتبت يمكن..

كال تفضلي ست فضة..
من بعد الموقف الصار بقى يصيحلي فضة..
كرهت هالاسم بسببه لان يحجي وهو ضايج مني...
وكفت كال استريحي..
كعدت بس خفت اخاف يستغلها فرصة ويتحارش...
كال اريد هالاوراق ترتبيها حسبب التسلسل مالت الايام..
واخذيها وخليها باضبارة يمكم..
وجيبيلي اضبارة مالت كيطان..
اني ضحكت تذكرت هالاسم الغريب ..
تالي تذكرت الصار بيىومها وقلبي وجعني....

كملت فرز هو حضرته مسوي تشريبة اوراق ..
خابط شي فوك شي...
رتبتها بلا مارفع راسي ابدد بس نفسي قوي..
وقوى اكثر واني اشم ريحة الجكا انخلطت بعطره...
ماريده ينتبهلي هالمرة ..
بسرعة لميت الاوراق رتبتها ووكفت...
اباوعله يسحب بالجكارة وصافن علي..
ارتبكت من نظراته..
اخذت الاوراق كتله..
استاذ هسه اجيب الاضبارة..
باوعلي وهو مخلي ملف بحضنه ويدكدك ع الاوراق بيد والثانية يدخن بيها ..
استعجلي لان تعبان ..

طلعت بسرعة واني نظراته براسي..
يدخن ونظراته تقصدني وصافن بية ..
استغفر الله اني مو كلت مافكر بيه..
ماعرف شبيه هيج ضعيفة يمه...
رتبت الاوراق بالدولاب وطلعتله الملف واخذته...
رحت ووسام مموجود..
وكفت اريد ادخل مترددة..
جريت نفس واني احاول اخلي نفسي طبيعية....

دكيت الباب مرة .. مرة الثانية اجاني الصوت بعيد..
تفضلي...
فتت اباوع هذا وينه..
البلكونه مسدودة وهو مو بكرسيه..
سمعت صوت بالحمام ياعزا..
هذا بالحمام واني اجيت شكد عيب..
مااحس الا مد راسه من باب الحمام كمزت كمزة ليكول طافرة بوجهي بزونة...
كال..ست فضة الجاي انجب على قميصي ..
تعبان ومستعجل كلش اريد اطلع...
ع ماانظف القميص اقريلي الملف البيدج ع سريع..
رفعت راسي بثول كتله ها !
حجه بقلة صبر يلا بلشي رجاءاً ..
هو امبين صدك تعبان لان شكله يبين..
عيونه فاترة واحسه كوة واكف شكله منايم ابد...
من السفر جاي للشغل...

وكفت قريب ع الباب وانطيته ظهري لان جاي يفرك قميصه عيب اخاف يفتحه...
بلشت اقرا وهو يسال هذا شنو وهذا شكد ..
وهو بالاول متواصل بس بعدين ضليت اقرا لوحدي ..
كلت بس لا نام بالحمام هذا لان صار هدوء ههه..
سكتت عاط خرعني..
دكملي يمعودة فضيها اريد اطلع للبيت...
كتله عبالي متسمع...
جاوبني واحسه غضبان يبوو شورطني هسه اني...
لااا اسسسمع كملي...
رجعت قريت شوي احسه وياي يعني ..
بعدها سكت حسيته وراي طفرت بسرعة..

باوعلي ووجهه تعبان خطية قهرني..
عاشت ايدج هذا هو بس اريده تدزي لحاسبتي..
يحجي وينشف بوجهه بالخاولي ..
كلت هذا طافي شكله حينام هنا ههه ..
زين تطلب شي ثاني استاذ لو اروح؟
اخذي راحتج مهرة ..

للحكاية بقية
بقلم شقراء(قمر كانون)