مساء الخير
حين يزهر الحجر
الجزء السادس
يوومه سمعت كلامه بطني مغصتني من جديد..
ماعرف اسوي نفسي مسمعت ..
لو اجاوبه بس شجاوب..
اريد اختفي اريد اذوب هيج كون ثلجاية واذوب واختفي..
بعد ماباوع بوجهه ابد ابد..
بقيت متحنطة ولازمة بطني ع اساس من صوت السيارات ماسمعت..
ولو هو يدري سمعت بس ثنينا نكذب ع بعض...
وصلنا للسيارة ..
ارفد فدوة رجعني للشركة وهسه اخابر حيدر يجيلي..
صدك تحجين مهرة شلون ارجعج غير ترحين للبيت ترتاحين..
اي بس ماكدر افوت وياكم للمنطقة..
اني بنية واجي وي شباب ثنين..
الناس عليها بالظاهر..
هذا هو براحتج خوية ..
وصلنا للشركة وكعدت بالمكتب انتظر حيدر لان بس دزيتله مسج رجعلي كال جاي...
ورا شوية اجه ..طلعت بعد ماسلمعت ع ارفد كل يوم قبل لا اطلع اسلم عليه ..
كال زين اجيتي اني جايج عود..
اخذي هذا الاسبوع اجازة ارتاحي بي..
لا بس اسبوع هواي..
مو هواي ارتاحي شعدنا حسن جاي من امس بس بقى يرتاح واليوم يجي ..
يعني لتفكرين بالشغل..
الا اذا ميهونلج تفاركينا ..كالها وضحك..
ههه لا خو هي حجاية وتنكال شبيك صدكت..
اني رايحة ههه...سلم ع رحوب..
بأمان الله خوية ..يوصل...
طلعت وسالني حيدر كتله مسممة ..
بقى يسولف وياي يونسني بالطريق..
حباب وسوالفه حلوة..
وكفنا بالتقاطع وانتبهت للجكسارة بصفنا!
بس ما التفتت لو حسسته اني شفته..
استمريت اسولف وي حيدر..
بس شعور حلو من تحس واحد مترقبك ههه...
وصلنا وسولفت لامي وورد ..
زهرة جانت بالدوام..
خطية امي بس تمدح بيهم وتكول هذا مديرج ينحط ع الراس..
اباوعلها واكلها وينحط بالقلب بعد..
بدلت وتمددت وسوتلي مطارة ماي حار..
تدثرت واخذت العلاج ..
بقينا نسولف الا ان اجت زهرة وحجيتلها ..
كالت ولج جنه مهتملج هذا بصراحة احس تصرفاته مو خالية..
غمضت عيوني مبتسمة..
اي فدوة شجعيني احلم صار كومة ماحلمانة..
ضربتني ع راسي وكامت تصب غدا...
بيومها نمت كووومة..كعدت بالتسعة بالليل..
لكيت مكالمات ومسجات من رحاب..
وداكة ع زهرة متطمنة عليه...
كايلتلها نايمة..
خابرتها وبسرعة جاوبت..اووي شنو هالازعاج متكولون ناس تعبانة ونايمة..
هممممم صرنا ازعاج ولج دبة ..لعد اسده واروح عود كلت اسولفلج...
كمزت كعدت ع حيلي ولا جني موجوعة..
اني بشاربج احجي..
شارب بعينج مو صوجج..شلون صرتي ..حجالي ارفد..
مدري اضحك مدري انقهر ع موقفج..
انفضحتي ها..
لج بعد استحي اباوع بوجوههم ثنينهم..
اي حقج تستحين تباعين بوجه شجاع..
افف لج راحت الهيبة استحييت..
دسمعي لعد حتى تستحين بعد..
هي كالت هيج..احس شي تحرك ببطني وقلبي رجف...
شكو ولج..
ارفد يكول شجاع مهتم بمهرة هواي..
اول مرة اشوفه هيجي..
عزاا بداعة ارفد هيجي كال..
اي لج وافجرلج قنبلة بس مو تموتين..
دفجري وفنه اليموت غير اني فاندام ذيل الاسد مدري قلب الاسد...
هههه ام لسان..
يكول ارفد هو حاجيلة يريد يشغلج يمهم من قبل لنتخرج..
منتخرجنا ..شجاع مذكره..
كايله مو كلت عندك وحدة تشتغل محتاجين..
اي بس ميعرف بيه اني..
بعد هالسالفة ماعرفها..
لان جاي اسحب كلام ماريد الفت نظر ارفد..
وع مود لبسج يكول شجاع لازك وي البنية شتلبس يحجي عليها...
كتله مهرة لبسها عادي لعد هنادي محجيت ع لبسها ..
مو هم موظفة عندكولبسها رايحة بي زايد..
يكله هي هنادي جنها صخرية شيبين منها ..
هذا بيوم جنتي لابسة ابو الموزة خرب يومج كنالج لتلبسي بس انت خبلة..
من شايف يوسف يباوعلج يكول ضل يصيح..
شنو فاتح بشركتي عرض ازياء ..
هالحجي بس كدام ارفد يكول تعصب ..
يكول هذا اخوها الاعوج ميشوفها تهتز كلها جنها جلي..
عزاا بعينه الحقير مو هيج اني سمينة...
مو سمينة بس تهتزين ههههههه..
دولي يلا انت وياهم بعد مامنج فايدة...
اصلا شلته من بالي كلش هالمعقد الخبل..
نشوووف...
بقيت احجي وياها الى ان اجه ارفد وراحت...
بس عزا هذا شلون يكول عني جلي..
عابت الصومالي ابو اربع حواجب ..
اصابعه ضارب عليهم بارود ومعطبات...
خلصتي اجازتي واني مرتاحة..
بسالي ماريحني ..
كل يوم وبالذات ورا الساعةب١٢..
اتصال ومن اجاوب محد يحجي..
اسده تجي رسالة وبيها شعر لنزار قباني..
كل يوميه هيج ...
حاولت اعرف الرقم معرفت ومعنده غير برنامج واتساب..
بعد ماخلصت اجازتي داومت..
من شافوني الموظفين سالو عن صحتي وسلمو علي..
بلشت اشتغل بس احوص كل شوي اريد اشوفه..
اخر شي طلعتلي حجه اروح لارفد اسئله عن رحاب وحملها ..
كمت رحت للحمام ومريت لارفد سلمت عليه وسالته عن رحاب ..
بقينا نسولف شوي..
كلت بلكي يجيب سيرة شجاع ماكو..
ترخصت منه ورجعت لمكتبي ..
لحد نهاية الدوام ماشفته ..
سلمت ع ارفد من ردت اطلع كتله..
جيبلي رحاب مشتاقتلها ..يصير اتمرض ومتجي تشوفني..
تدللين هي هم اكلت راسي بس تدردم تريد تجي..
بس هالكم يوم مافارغ ..
شجاع مسافر وتشوفيني لوحدي..
ييي هسه عرفت مختفي ليش معناهاً مسافر نياله شكد يسافر...
اذا هيج الله يساعدك ...
سلمت عليه وطلعت ..
ومر اليوم عادي كالعادة..
لحد الساعة عشرة ونص اجاني اتصال..
طبعا ضليت افتح خط واسكت..حتى الو مااكول..
بس هيج اريد اخلص رصيد هالمجهول هذا..
جنت بفراشي اريد انام لان دوام ومااطول ..
زهرة جانت تخابر حسين ..
طبعا هي كل يوم تخابره يمي بس مرات تنحرج مني ..
تروح للحمام من كلها تنام بالبيت..
واحنا اصلا بيتنا هادئ..
امي مرة جبيرة وتنام ع وكت..
وخو تماضر تطلع تاكل وترجع ..واذا طلعت وطولت شوي تعارك وبس...
اطفالها قلبل تخليهم يمنا ع طول يمها بالغرفة..
يعني البيت يبقى هدوء محد يحس...
زهرة كامت للحمام واني بفراشي اراسل رحاب..
دك الفون وفتحت خط ومندمجة اواسلها..
لان اعرفه كل يوم شوي يمل ويكطعه...
جانت تحجيلي عن مرت شجاع...كتبتلي ..
سحبت كلاممن ميسون عن انسام طليقة شجاع..
جانت كلشي يصير بينهم تسولفه لنسوان اخوانه ..
وهن يحجن كدام ساجد ومؤيد اخوانه ومرت مؤيد ثرثارة ومسمومة..
وتالف من يمها..
ويسمع شجاع ويتخبل يلزمها يكطعها واليجي يفكها منه يكتله وياها..
اكلج هذا عطشان كتل شبي مسعور..
لا بهذا حقه..يعني اني ارفد من تزوجنا كلي اذا سمتج مطلعه حرف يم اخواتي لو الجنانين اصير وياج واحد ثاني..
وتحملي اليجيج..
تخيلي شكد طالعه روحهم منها ..
هسه مو احجيلج ويعرف بيه..لان يعرف انت اختي ..
بس هي كدام الجنانين تحجي شيصير بغرفة النوم..
وهاجرها خمس اشهر تكول ميسون حتى توب ومتعيدها..
تتعارك ويا تكله مصاحب عليه لو متزوج اكيد عندك غيري..
يكلها مااطخج لحد ماتتأدبين..
تحجي كدام الجناين يابه ميوصلي ..
كومي مرت مؤيد وذبيلج حجاية..
انسام تكول شجاع ميطخني يمكن مريض ..
حاجيه كدام رجلها ورايح محاجي شجاع..
عباله صدك مريض ويحاجي حتى يتعالج...
هو سامع هيج وداخل عليها وهي تغسل ملابس وكاتلها بالماسحة...
ميسون تكول لكينا الماسحة صايرة عيدان صغار كد الضرب...
صخام!!هذا كله وماتابت..
اكيد حرمت تحجي...
لج يا حرمت تكلهم كتلني لان ماكدر يقربلي..
يبووووووو شنو من مرة هاي هههه ..
يمكن صار خبل بسببها..
حقها يابة اني منه اشنقها ...
اني مستمرة اراسلها وفاتت زهرة ..
ها خاتون مشبعتي من السيد كلساع مخابرة..
ضحكت ..لج هو وين ينشبع منه عمرها خسارة الي متحب سيد..
عشتو كون يسمعج عاطف ويكصبج ههه..
ههه وجعه شمكعدج توقعتج نمتي..
لو تعودتي ع السهر يومية للوحدة..هسه اذا تاخرتي شيكعدج الصبح وتاكليلج رزالة من شجاع..
تنهدت وضحكت..
هو شمسهرني غيره..
كاعده اتراسل وي رحاب وتحجيلي عن انسام..
ولج ياانسام كولي انتقام ..
الله يساعده عليها..
هه ع اساس مقصر وياها مسكطها دك..
هويمكن امه جابته وهي تتعارك لو وهي تضرب احد...
خرب يومج المرة ميتة الله يرحمها..وهو مجلوب بلادي اصلا..
يابة كون يسمعج تكولين مجلوب...
هههه عزاا حواجبه تتقوس وعيونه تصير قوس قزح ويكنف ردانه ..
ويضرب ع صدره بيديه ثنينهم مثل الغوريلا بكنك كونك...
ههههههههههههههه لج مهرة مزقتي الرجال هاي عود ذابحة نفسج وتزحفين من جوا لجوا..
وهيج تصنفين عليه...
دنجبي مازحف اصلا معليه بي بس بعطره..
ولج مخدرررررات عطره يخدر...
سالي رحاب تشوفلج اسمه ..
صفنت عليها وحجيت بشوق..
لج هو حلو لان منه مخلوط بعطر جسمه..
ومن يمتزج بالجكاير لو الاركيلة اذوب..
ماكدر اوكف من اشمه ودي اتمدد..
ها مهرة صار بيها تمدد اخاف انوب ...
ههههه عابتلج انجبي خلي انام ...
عدلت نومتي والفون بيدي اريد احطه بصفي...
اباوع هذا الاتصال بعده!!!!!!!!!
صخام الصخمني هذا اليدك سمع كلشي..
كطعتي وصحت ..
ولج زهيرة مصكوعة ولج تخزينا...
نطت من فراشها..شبييييج شنوو؟!!
ولج هذا قباني سمع صخامنا كله...
لطمت خدها عزاا..ليش فتحتي خط الله ياخذج..
ولج شدراني كل يوم يكطعه بسرعه..
واليوم التهيت اراسل رحاب ومانتبهت بعده ع خط...
عزا العزا انوب رصيده ماخلص ولج شلون ولج...
شدراني هو ايا كان الاحتمال احنا انعلسنا..
اذا يوسف حيلكاله لزمة عليه واذا براق حيصخمنا ثنينا..
واذا الابالي فتصخمت وانفضحت كدامه شكد خزي...
بقينا نتناقش والنومة من عيني طارت...
وهي مكابلتني وكلساع نطلع احتمال دخنا اني وياها...
صارت بالثنتين واحنا نفس الكعدة...
اخر شي كتلها خل ننام وطز شيريد يصير بعد ..
بعد ماخلصت العركة اجه السبع يتحزم..
بعد هي صارت هسه صرنا حذرات امدانا...
راحت لفراشها وتتكلب وبليلتها كوة نمنا...
نمت بالكوة وقبل ليدك المنبه كعدت..
كد التفكير عيني متكدر تغفى براحة نومتي قلقة..
كمنا اني وياها ونحجي ساعة نضحك ساعة خايفات...
بيومها مالي خلك لا ابدل ولا شي..
لبست بنطرون وبدي كيمونه ..
وفوكهم عباية خليجية سودة تتطبق من الامام وفصالها مثل البدلة مخصرة ومن البطن اكو خيط ينسحب..
حذاء فلات لبست والشال الاسود وعيوني توجعني مشبعانة نوم..
شافتني زهرة كالت..
ها شكد عليج خية...
دولي يمعودة اني بيا حال...
هههه دشوفي حالج حفايتج وعبايتج شعرضها ولازمة ظهرج..
اي غير هالمرة المحروسة لعبت بحالي لعب موجوعة لهسه..
خليني اروح يلا..
محروسة...
طلعت للشغل وبالي يودي ويجيب..
وصلت شجاع يم الريسبشن يبووو ناقصني ضيم..
استحي احجي ويا بعد فضيحتي بالمستشفى..
يلا صار وقت هواي اكيد نسى..
اني شبيه مستحية اصلا شي علمي هذا لا حياء بالعلم.
لا عيب ولا عار شي طبيعي..
احنا مسوينا شي مخجل وعيب..
اشجع بنفسي وارفع معنوياتي...
وقعت ودخلت وهو عبالك مموجود مدنك بالفون راسه حاطه...
رحت لغرفتي وسلمت ع حسن وبلشنا شغل..
ساعة تسعة ونص خابرني السكرتير ..
لان جان شجاع عنده اجتماع وخلص..
كال دزيتلج ملفات اليوم اريدج تشوفين اسم المدير مالت الشركة..
شنو جان اسم ابوه..
لان حاليا المدير الجديد ابنه ..
والعقد السابق باسم الاب ..
طلعت الاسم مالت الاب كيطان..
دخيلك ربي هذا لا هو سمج كطان..
ولا هو قيطان اسمه مريب ومجعمر...
انوب حصرتني الضحكة شلون الفظه...
رحت لوسام كال ها حصلتي..
اي هههه ضحكت ولزمت شفتي ..
هو صفن كال امبين اسمه مودرن...
هههه كلش ...
اسمه كيطان...
هههه لا ينلفظ كيطان بفتح الكاف مو كسرها..
اها شدراني مسامعته قبل..
حقج هههه ..زين جبتي العقد..
لا وين مجبته..
راح اكلفج بس سحبي وجيبي بلا زحمة..
اوكي بسيطة...
رحت سحبته واجيت..لاكاني بالطريق كال هسه اجي..
ودي لاستاذ شجاع ينتظره بالغرفة...
يبووووو راح ادخل للمقصلة...
يلا ادخل بس ماباوع بعينه...
دكيت الباب مرة ومرتين وثلاثة وعشرة ماكو..
دخل وسام..
ها ليش واكفه..
مو جاي ادك ومحد هنا..
اي فوتي انتظري قابل غريبة انت يامهرة..
اكيد نزل جوا هسه يجي لان جان محتاج المحاسب هم...
دخلي انتظري وشوفي شريد حتى تكملي بعد ليش رايحة راجعة...
هم صحيح...
فتحت الباب ودخلت ...ماكو احد الشاشة مفتوحة ع فلم اجنبي وصوت عالي..
والبلكونة مفتوحة وبيها اركيلة..
يبووووووووو شوف الريحة اناناس اخ قلبي...
تقربت اشمشم مثل البزونة..
كل مااتقرب اشم حيل واجر النفس...
باوعت للصوندة ليش مااخذلي سحبه منها...
تقربت لزمتها ومترددة..
حطيتها بحلكي حارة..جريت نفس..
ياااي ..جريت الثاني غمضت...بديت شوي شوي ادوخ...
صرت مثل المكبسلين اليسولفون عليهم ...
عزااا اريد امشي ماكدر..
ارتجيت ع الحايط وعيوني تغوش ...شفت شجاع بوجهي...
تقرب مني طحت بحضنه ...
حاوطني بيده ورفعني اله..
صار وجهي ووجهه متقاربات....
بس اني عيوني مغوشة وماكو كل حيل بية..
تقرب لوجهي اكثر غمضت كلش من تلامست شفته بشفتي..
جر العباية انفتحت الطباقات ..
للحكاية بقية
بقلم شقراء(قمر كانون)