حين يزهر الحجر

٥

مساء العسل🌹
حين يزهر الحجر
الجزء الخامس

اي ست مهرة صارو كم واحد؟؟
منو هم!
فرسانج..كالها وهو يباوع بنظرات مترقبة ردة فعلي..
كتله واني احجي بهدوء وماريد ابينله هو مستضعفني..
مفهمت قصدك استاذ؟
ارتجى ع المكتب الورا وحط ايديه بجيوبه..
شنو بينج وبين يوسف؟؟
ماكو شي بس قلل ادبه وياي ورديته..
بس اني سمعت منه غير كلام!يبوو اني هنا حيلي باد كلت اكيد متبلي عليه بشي..
السمعته حضرتك يخصك ..واني يخصني تصرفه وياي..
!!!ليش موافقتي ع خطبته؟؟
ماخطبني حتى اوافق..وهم اذا اجه وخطبني...
بعد تصرفه وياي مراح اقبل...

تحرك وايديه بعدهم بجيوبه..اني واكفه بالنص وهو افتر حولي..
اجتني نسمة العطر ممزوجة بريحة اركيلة..
نسيت حتى الموضوع الجنا نحجي..
سحبت نفس مثل اليشهك ويتنهد..
صار كدامي ووجهه عليه علامة دهشة..
عزا العزاني اذا اول مرة مشافني هسه اكيد شافني...
حجه باستفهام حاد :.شبيج؟؟
رفعت عيوني عليه ..تذكرت من ضرب براق..
ووحشيته وي مرته..
هيج اريد شي يقطع امالي ويرجعني لوعيي..كتله..
لا بس اكدر اروح ..
بقى صافن ..اي اي روحي ..

طلعت ركض للحمام..احس متت حر غسلت ورتبت نفسي..
شبيه ليش هيج اني ضعيفة..
نسيت شسوا بي براق!
نسيت خيانته وكسرتي..
عود ذاك من دمي ولحمي وهيجي..
شنو اتأمل بهالمعقد اليعارك ذبان وجهه..؟
اوف لو مالعقد ..ابطل واخلص المهم ابتعد عنه..
الله يهلك هالمعاشر مثل الوسواس من تشوفه تضل تزن...
معقولة حبيته؟موعدني بشي ولا اصلا يطيق شوفتي..
ليش هيج اتأمل مثلاً ..
شبيه جني مراهقة اتخبط منا ومنا..
لازم اتحاشاه شكد مااكدر..
انوب هذا الارهن يوسف يكول خاطبها..
كون خبطتك خباطة اسمنت وصبو بيك طسة بالزبير وصعدت فوكك تريلة وكسرتها..
ناقصني عاهات اني بلة..

قررت من باجر اتجاهله ولا مااعتبره موجود..
بس تفاجأت من من بعد يومين اجه مهندس جديد اسمه فرزدق ..
بدال يوسف الي كالو هو تارك الشغل!!!
ضبطت اعصابي وكلت يمكن صح هو ترك لان خاف احجي واكول تحرش بيه..
ولو ماكو غير هالتفسير..
لان اذا اشتكيت حتتشوه سمعته ومحد يشغله لان الخبر السيء سريع المدى...
يلا المهم راح..

من رجعت للبيت بيومها تماضر عد اهلها افك فكة..
لكيت امي بالمطبخ تسوي تمن بحت لان اختي ورد حتجي ومشتهيته..
اختي ورد الكبيرة عدها ولد وحامل هسه..
بس حالة زوجها المادية بسيطة لان هو سايق تكسي..
بس خوش انسان وكلش متفاهمين بيناتهم رغم اهله ماذيها..
بس هي تكول لو اهله يذبحوني مااتركه لان مالكى رجال مثله يحبني..
فهو خطية يحاول يوفرلها هالموجود..
وامي تكلها من تشتهين شي كولي واحنا نجيبلج الرجال يركض ع عيشته الله يعينه..
وامي دائما تروحلها وتتسوك بسكوت عن عيالها وتنطيها..
وعاطف من يستلم راتب يذكرها لو بلبسة لو باكلة..
ومن جابت بقت عدنا واحلى اكل وعناية اعتنينا بيها...

اجت العصر اني جنت نايمة..
كعدت المغرب ..
بس جسمي مكسر تكسير وظهري حيل يصل علي..
طلعت وامي وزهرة ورد كاعدين يصلون..
عيسى يفتر بينهم ويصعد ظهرهم..
عيسى عمره ثلث سنوات..
شلته وبوسته اموت عليه عبارة عن مخدة ديباج مرصرص يشجع ع البوس والكرص..
اخذته توضيت واجيت خليته يمنا صليت المغرب وهم خلصو..
خلصت وسلمت ع ورد حيال مشتاقتلها ومتجي هواي..
بسبب تماضرلان من تجي فواد وعيسى يتمالخون وفد مرة تعارك وياها تماضر..
هي سكتت وماوصلتها لعاطف ..بس بقت متجي من تماضر موكودة..

تجمعنا سوا شكد مشتاقة لكعدتنا...
سوينا اكلات هواي وشامية وامي جابت حب شمسي..
بيومها سرهنا لساعة ثلاثة ..
دك المنبه الصبح غلست عليه غفوة غفوة غفوة..
لحد مااباوع ساعة ٨ الا ربع ..
وحيدر يجيني بثمانية عزااا..
انوب جسمي متشنج مابية اتحرك استغفر الله يارب..
ماعرف شلون ركضت لبست التنورة السودة والسترة فوك البدي مالت النوم ...
الشال لفيته واني اركض ..
صعدت وحيدر يحاجيني عيوني كوة فاتحتها ..
كتله حيدر فدوة وين المضلة مالت الجام..
اريد ارتب حجابي مالحكت..
نزل ركبها ع الجامة ورجع..
طلعت المراية ودنكت ورتبت وجهي ترتيبة سريعة..
وحجابي عدلته ورشيت عطر..

وصلت بثمانية وربع بس امشي كوة احس متشنجة..
وادعي كون مااترزل..
همزين شجاع مو يم الريسبشن بس دخلت للحمام كبل..
البدي ممرتب طالع وفوكها حصر بالنسبة للظاهر منه من السترة ودلعته جبيرة..
نزعت السترة علكتها ..
طبعا الحمامات كلش نظيفات وكلشي بيها يعني دوش ومفصول ببردة اذا واحد يريد يسبح..
اعتقد لان البنغاليين يباتون هنا يعني الحمام والمطبخ كاملات..
رغم اكو كافتريا بس هواي نعتمد ع المطبخ اذا نريد نسوي شي...
جريت البدي وعدلته المشكلة اجره ليجوا يطلع صدري..
ارفعه ليفوك تطلع بطني ..
نزلته ليجوا ومن فوك شالي ثبته بدنبوس ..
طلعت واني لازمه السترة واجرها عدل..
فتحت الباب واني واكفة كوة الم ظهري موتني..
دخلت للمكتب لكيت شجاع كاعد عزااا...

صباح الخير استاذ..
وعليكم السلام بيش الساعة؟
أ..ثمانية ونص وخمسة..حجيتها واني مرتبكة..
اعتقد بثمانية دوامنا ..
صح استاذ بس شوي طولت بالنومة لان تعبانة..
ميطول بالنومة بس اليسهر للصبح..حجاها ووكف متكتف..
رجعيلي ع تاريخ ١/٧..
تأكدي موجودة الاوراق مالت الشحنات مالت تركيا..
اوكي استاذ..
كعدت ع الكرسي احس ظهري يابس ..
بطني مغصتني مدري من هالوحش اليمي مدري هي لوحدها...
كعدت ابحث تقرب وصار وراي يباوع بالحاسبة..
اوييلي العطر ممزوج بجكاير..
فهيت اشم بي وضاغطه ع زر الباك محسيت الا نتر..
وين رحتي يمعودة بعدج نايمة شنو ..
عبرت الملفات بلا مااباوعلها...
وجوده وراي اربكني وهيج احاسيس اني بغنى عنها..
شافني ثبتت ع التاريخ طلع من وراي وكال..
دزيلياه ع حاسبتي ..
وطلعيلي الاضبارة مالته وجيبيها للمكتب ...

طلع واني دزيتله الملفات ..
كمت دورتله الاضبارة وظهري كوة واكفة..
طلعتها الفايل مالتها شكله تعبان..
اخذت فايل من الجرار وحطيتها ..
فتحت الغلاية وحطيت جاي بلكي يسكن الم بطني موتتني...
اخذت الفايل ورحتله..
تفضل استاذ تحتاج شي بعد..
باوعلي بتساؤل لان امبين عليه تعبانه ومو مثل كل مرة نشيطة...
لا اخذي راحتج ..
رجعت وصبيتلي كوب جاي مر وكعدت..
اباوع هذا فايل اسود!!كبل ربطت ضربت ع راسي...
فتحته والكاها الملفات الرادها..
صخام اختلطت وي الفايل اليمي..
حطيت الكوب ع الميز اريد اكوم ومااحس الا دخل علي ...

يعني انت بكلشي متعبة ومافالحة!كتلج اريد ملف وانطيتج تاريخه..
تجيبلي ملف مالت البارحة شبيج؟؟؟
شاربة لو شامة..
اني تفاجأت من كلامه ويحجي بحيل صدر وفشلني...
احس بطني زاد وجعها قهر وخوف..
ا ا اسفة استاذ اختلطت الفايلات ماعرف..
ليش انت شوكت تعرفين؟؟؟؟؟
كليلي شوكت فتحتي مخج؟؟نتر بية وجر الفايل الجان بيدي..
فتحه حتى يتاكد ..
رفع راسه علي ..
اذا مريضة نامي ببيتكم لتجين هنا وتحركين اعصابي ..
دنك نظراته كلت ميريد يباوع بوجهي بعد مازعجته..
اني واكفة مثل الصنم..
هو غمض عيونه واستغفر وراح..

كعدت ع مكتبي وطاكة روحي ..
باوعت لشالي دنبوس طافر وصدري نصه امبين يلا بلة..
خاف هي ناقصة التمت..
المواقف البايخة دوم تصير ويا معرف ليش..
شوكت ترجع ياحسن حيصير اسبوعين واني مبتلية..
استغفر الله..
حطيت راسي ع المكتب والم بطني اشتد كلش ...
صار الوجع مينحمل ..
لزمتها وبقيت ابجي ..
معناها حتجي الشهرية ..اني طبيعتي من تجي اصخن ويصير عندي الم قوي كلش..
ابقى نايمة بالفراش يومين وعلاج يلا ثالث يوم اكوم...
وهالمرة الشهر الفات ماجت خربطت ..
عزاا هسه وكتها هذا ..
رحت للحمام همزين ماخذه احتياطي دائماً..
رجعت صبيتلي جاي مر واشرب اريد الالم يهدا ماكو ..
زاد اكثر واكثر سحلني متت..
اخر شي نمت ع المكتب وبقيت ابجي بحركة...
شكو شي يضوج تذكرته...
بس اريدلي سبب حتى ابجي..
والالم يعصرني عصر كطعني...

الباب جان مسدود حتى لا احد يشوفني..
اندك الباب وانفتح بسرعة..
رفعت راسي شجاع دخل بس مصدوم من منظري..
كمت وكفت واخذت كفشة كلينكس مسحت وجهي..
اجه يمي كال سلامات؟
هذا البجي كله لان رزلتج..
عذريني جنت معصب شوي ..بسبب الشغل..
سكتت محجيت كلت خل يحس بالذنب..
كافي لتبجين اذا تعبانة رجعي شكلج تعبان..
لا استاذ ماكو شي جنت ضايجة هذا هو لتقلق...
حجيتها واني اريد يكف اسئلته لان مابيه احجي..
ماشي مسحي دموعج وهدئي كافي...

طلع بقيت صافنة..شكله مهتم لدموعي!وحسيته فزمن شاف منظري..
اويلي لو يصير صدك وتخاف علي واصير اهمك اووف...
رجعت نمت ع الميز واعصر ببطني..
ساعة والالم صار يكطع...
اني كل مرة اخذلي حباية وامي تسويلي مطارة..
بس يسكن الالم شوي ومو بهالقوة..
اليشوفني عباله اريد اجيب من الوجع...
فقدت بقيت ابجي بصوت ..
صح مو عالي بس نحيب..
اندك الباب هملته ولا جاوبت منو..
بس الظاهر صوت البجي يبين من ورا الباب..
انفتح ودخلو ارفد والسكرتير وسام..

اني امسح عيوني الي كمت ماشوف بيها وانفخت لو الزم بطني..
منظري خزي..
فتحو عيونهم بخوف شكلي مال وحدة مغتصبيها ..
عصرة بطني وملابسي الحجاب طافر واجر بي..
والبدي اجره حتى لتطلع بطني...
ثنينهم نفس الصوت..منو وياج؟؟؟
كوة حجيت كتلهم..
تعبانة مريضة..فدوة اريد اروح لبيتنا..
دخل شجاع وي حجايتي..

شكو شبيج ؟؟شصاير بحالج؟
مابية شي بس موجوعة اريد ارجع للبيت ..احجيها واني امسح بدموعي...
وعاصرة بطني حيل بيدي..
هذا شكلج مال ترجعين للبيت يمعودة..
امشي ارفد ناخذها للمستشفى...
لاا ماريد ببيتنا اصير زينة فدوة خل اروح..
احجيها وبلا وعي ..سكاكين وتكص ببطني...
وسام احنا طالعين مااوصيك..
امشي ارفد جيب السيارة بسرعة...
طلعو هم وهو تقرب مني..
كافي بجي هسه ينطوج مسكن يجوز متسممة..
كوة لازمة نفسي ماصرخت يمه بس ماريد اروح انفضح غير..
ماابية شي رجعني لبيتنا واتحسسن..
حجيتها بشديد هو عباله معاندة..

طلعنا وارفد يسوق كتله فدوة ارفد لبيتنا اخذي ...
شجاع كله معليك بيها ..
اني عليت صوتي ..مستشفى مااااروح رجعوني..
ارفد اندار كال..مهرة ع كيفج قابل احنا غربة لتخافين..
هسه نوصل وتصيرين زينة...
حجيت ولحيت وعليت صوتي وذولة عبالهم مستحية منهم ..
وصلنا ودخلوني جوا..
كلت للدكتورة حالتي كالت اي تصير هواي مثل حالتج كلش..
من تتزوجين تتعدل ويخف الالم بعد متحسين بي..
لان فتحة غشاء البكارة تكون صغيرة كلش ..
نزول الدوم منها ميكون سلس ومنتظم يكون بصعوبة..
ولان تنزل قوية والمكان ممتناسب مع كميتها تسبب هالالم...
كتبتبلي علاجات وانطتني مهدء لان رحت اطلك..
كتلها فدوة من يسالوج الولد كليلهم مغص عادي..
لتكولين السبب استحي منهم ..ضحكت هي وراحت..
ورا شوي محسيت بنفسي غفيت ..

كعدت الصالة فارغة بس اني نايمة ع سرير..
المغذي بيدي بس مسدود..
صحت دكتورة ..مرتين..
اجتلي ممرضة شابة..سالتني شلون صرت كتله افضل..
احس متت وعشت..
شالتلي المغذي ..رتبت ملابسي وطلعت..
تمشيت بالممر جانت الساعة ١٢ ونص ..
شفت ارفد و شجاع كاعدين..
من شافوني كامو..
بس نظرات شجاع احس بيها شي مو قانوني...
تحمدولي السلامة..
وسالوني كتلهم تحسنت..
ماسالو اكيد الدكتورة كلتلهم مغص وراح..
راح ارفد يجيب السيارة وشجاع وياي يتمشى ..
كال ..صريخ وبجي وطيحتي قلوبنا ..
بسبب شهرية لعد لو عرستي لو ولدتي شلون...

للحكاية بقية
بقلم شقراء(قمر كانون)
بارت مفاجئة حتى لتزعلون ولتكولون ممدللتنا🌹