مساء النور حبايبي🌹🌹
حين يزهر الحجر
الجزء الرابع
عمي كال ندزلهم كوامة ..
واني اعترضت لان رح تنجاب سيرتج...
وهيج تصيرين سبب مشكلة وفصول واسمج ينجاب بالديوان وعيب ..
بس عمي مصر الا كعدة ..وحتى بلاغ ماقدم كال نريد ناخذ حقنا بيدنا...
زين شراح تسوي ابو فؤاد؟
شنسوي مادري محتار..من باب هذا ابن عمي وتعدى عليج ومن باب غريب دافع عنج وحماج..
هسه خل تصير الكعدة ونشوف..
هو اليوم يطلع براق من المستشفى ..
الله كريم ..
عاطف متضايق وحقه موقف كلش صعب...
يعني ابن عمه شلون يصير ضده وي الغريب..
واخته شلون يصير ضدها...
بيومها المغرب خابرت رحاب افتهم منها...
كالت ..
محولين عليهم وماخذين منهم عطوة ..
وشجاع اصلا كال لعمي اني كتلته ومحضر فصله مقدماً ..
يااا ههه ..
اي ولج وعمي كله ابن الناس زين مامات بيدك ...
لشوكت ياابني هيج عدواني واليطيح بيدك مترحمه..
يعني شنو عنده سوابق؟ماعرف الفهمته هو عدواني..
ومن سالت ارفد مقبل يحجي..
بس سألت ميسون مرت ساجد اخوهم..
كالت جان من يلزم طليقته تكولين طالعة من مصارعة..
يشوهها من الضرب..
يبوو عزا ولج هو امبين شرس...
لو تشوفين شلون يضرب براق..
هيج بابتسامة تحسي شرير شلون تشاكي اللعبة...
هههههههههه لو يسمعج يكصبج...
لا لا دخيلج...
بس هو ليش ناشب وياي ..
سالي ارفد ميحجي كدامه شي يعني..
لو هو وي كل الموظفات هيج؟
بسيطة اني اسحب كلام من ارفد واجيبلج الخبر..
ههه اوك حروح اني باجر مجازة همزين..
الفلاونزا موتتني ..
عندج العافية مهورة باي...
بعد السمعته من رحاب خفت منه..
ماانكر شغل تفكيري وعندي شعور محير ..
بس هذا انسان قلبه ميت وشرس ماعرف الكى كلمة تناسبه...
زين اني ليش مهتمة بي لهالدرجة؟
استغفر الله خل اشيله من بالي...
مر اليوم ويوم ثاني عاطف كال..
حتصير الكعدة عگب باجر..
بس متلاغي وي عمي وطلب يحلوها بصورة ودية واعتذار..
بداخلي اكول شكد ع نياتك منو يعتذر..
هو تشاكي بس يريدله واحد يفترسه وين يعرف الاعتذار...
صار يوم ثاني رحت للدوام بس خجلانة منه وبصراحة خايفة...
بس لازم اشكره لدفاعه عني..
شفته كاعد يم الريسبشن ..
رحت يم السكرتير..
اجه مباشرة فات للغرفة..
بقيت مترددة ادخل لو لا؟كلت خل ادخل قبل لينشغل..
دكيت الباب ماكو رد..رجعت دكيته ماكو رد..
اخر شي توني ادكه فتحه بس عيونه براسه وينفخ يبووو هو اني ناقصة..
مكنف ردانه ووجهه وبيده خاولي..
عزاا بس لا جان بالحمام واني لطشت ادك بالباب ..
جني الجهال بالكركيعان مينطون مجال..
كال تفضلي وراح كعد ورا المكتب وينشف بيديه..
استحيت شلون افتح الموضوع وبقيت واكفة..
وهي بي طبع ميكول استريحي لو اخذي راحتج..
دوم يحاجيني واني واكفة ماعنده اسلوب...
جمعت الكلام وكتله..
استاذ اجيت اشكركع موقفك وياي..
واني اسفة ع الصار بسببي...
واخوي كال اشكري نيابة عني ..
اا وهو مو قابل ع تصرف بيت عمي وخجلان منكم...
طبعا الكلمة كوة تطلع مني ..
واني احجي هو يتحرك بالكرسي وصافن علي..
من سكتت جر الخاولي ويلعب بي..
وبدا يحجي ..
ماكو داعي تتاسفين..ومشكلتج وياه حليها احسن ما يعترض طريقج فد يوم ومحد يساعدج..
لان هذا امبين ثور كلش..
تنهد وكال..اخذي راحتج ست ..
تفشلت حسيت اني واكفة ع اعصابه..
استأذنت وطلعت...
صارت الكعدة وراح عاطف واني ع نار..
اخاف تصير عركة بسببي لو براق يذبله حجاية..
بقيت اتكلى ع نار وامي وزهرة وياي..
ثريا بت عاطف بحضن امي نامت..
كلتلي اخذيها لامها ..
شلتها واريد ادك الباب...
اسمعها تحش بيه وتكول ..خية شبيج تلكينه مديرها شابع بيها*****
ماتشوفي محروك دمه وكاتله ..
عزا بعينج شكد حقيرة..بلا مادك الباب دفعته وفتت..
هي نزت بقت صافنه علي تريد تعرف سمعت لو لا...
خليت ثريا بجربايتها ..
باوعت عليها كتلها..
امبين شابعين بيج **** وهيج تحجين هه...
عفتها وطلعت ..صح كل مرة اسكت واكول تولي وقليلة عقل..
بس هالمرة حجايتها زفرة مثل اخلاقها ماسكتلها...
لحد ورا المغرب اجه عاطف مدخن..
اني وزهرة شردنا للغرفة..
امي كالت روحو واني اشوف اخباره..
كعدنا ننتظر شوية واجت امي...
كمزنا عليها اني وزهرة وكعدناها ..
ولجن يمه صبرن موتني...
شصار يمه فدوة قلبي برجليه صاير من الخوف..
اوف هذا ابن عمج صدك ناقص ناموس..
اخوج ميت قهر يكول متقبل تصعد وياي لان كتلها اوصلج والدنيا مطر..
يكلهم جذابه تتبلى لا ضربتها ولا حاسبتها..
بس هي الظاهر متواعده وي المدير وصايرلج هو عاطف امالخ..
ياااحقير زين ماحجاها كدام الزلم..
عاطف مطيح حظه وكايله بعد لا اعرفك ولا تعرفني..
وعشيرة المدير طلعت ...وجايتلج شيوخ مخورستهم..
مخلين عشيرتنا وعمامج هم اليتعذرون من ابنهم ..
لان هو كايللهم عار ع اليشوف زلمة ياذي مرة بالشارع ويسكت..
شبالك يطلع مأذي بت عمه وبحسبة اخته..
مو زلمة ولا على وجهي شارب اذا ماادممه واحط راسه بالطين..
اذا حاجي شي غلط كلولي..
والتفت عليهم ..
يابه تقبلوها مرة تنهان وتنضرب بشارع وبمنطقة غريبة مو يم اهلها حتى تستنجد...
والمطر يمطر وهي شاردة منه وتركض واخذها راشديات للسيارة...
كايم ابن الشيخ بايس المدير براسه ..
كايله والنعم منك ومن اصلك واحنا العايلين ونغطي وجوهنا منكم...
شيخنا مرزل عمامج لان وصلو المشكلة لهيج وضع..
كايللهم فضحتونا هسه يكولون علينا ماعدنا غيرة..
نضرب نسوانه والغريب يحميها..
وبراق يكلج مافاتح حلكه وحاجي..
ع كولة عاطف مخلوس من استاذ شجاع حتى مارفع راسه...
والمدير كايللهم هذا مليون مال سلامته ..
ماقابلين ياخذوها بس هو كايللهم اعتبرو واجب ولا تردون الواجب...
من بعد مسمعت كلام امي بصراحة خفت من شجاع اكثر...
مينغلب وذكي وبنفس الوقت شرس ومجنون ..
احس بي خلل ماعرف غامض بكلشي...
بقيت اداوم وماشية الامور..
بس الظاهر ممكتوبلي ارتاح شوي..
المهندس يوسف ماخلاني بحالي..
بقى يتردد يمنا هواي..
واكثر من مرة الاحظه يحاول يحتك بيه بس اني اسوي نفسي ابد مو يمه..
طبعا ملابسي القديمة كلها عفتها بقيت مالبس منها واشتريتلي كم قطعة ..
لان كلهم احس جسمي يبرز بيهم..
رغم ضعفت هواي بس اني طبيعتي هيج جسمي مربرب ..
وبيوم جنت لابسة فستان شتائي مقفل رصاصي وماروني ..
بس هو الفستان طبيعته يبرز الجسم خصوصا للطويلة..
كنت بالحمام ورجعت للمكتب جان يوسف جاي والتقينا..
ابتسم كال..ست مهرة طالبين مودل ليش مترحين؟
اني عبالي صدك يحجي لان ممتعودك اتشاقه ويا...
كتله..لا ميناسبني هيج شغل ووصلت يم المكتب هو ضحك ..
مااحس الا شجاع بصفنا وهم يباوع من ورا خشمه ..
يعني كأنه ميطيقني هالشخص..
كال..شوفو شغلكم لتسختون..
ودك ع كتف يوسف وكال هم ايدك ورانا شغل..
بس حيل كلت الولد انخسف ظهره..
يوسف جان ابيض وطويل وابيض بس ضعيف ...
بحيث من دك ع كتفه مال ع جهة الثانية ههه...
اني فتت للمكتب وحسن كال تعالي ساعديني محتاج اضبارة من الدولاب وانت تندلين احسن مني...
طلعتها اله والتهيت بالشغل..
بس حجاية شجاع ضوجتني ولو هو ميسوي شي ميضوج..
جاي احس بي وي نفسي وراسلتني رحاب..
كالت حجيج اليوم..
ايي هلا بيج وبجيتج مشتاقتلج كلش..
حضريلي عرنوص مشتهيته كلش..
ها عيني اشو تتشهين..
هههه اي اي يمكن..
ها يعني متحملتو مو كلتي سنة نتونس..
ههههههه هو السبب الونسة خلتني اضيع وانسى الوعد...
هههههههههههههههه عابت ..
يلا حرجع للبيت تعالي من وكت..
تدللي بااي...
راسلت زهرة حتى تسلك عرنوص واخذت اغراضي وطلعت..
سيارة شجاع واكفه بس مانتبهت اذا موجود بيها لو لا..
طلعنا واني صافنة ع الجامة ..
الجو حلو والبرودة تفتح الانفاس..
فتحت الجامة واني استنسق الهوا..
انتبهت لسيارة شجاع نفس طريقنا؟
خيالي يكلي جاي لخاطرج..والواقع يكول بطلي احلام ..
اكيد عنده شغله والشارع مو شارع اهلج حتى ميمر بي..
غلست وبقيت اباوع من الجامة لحد موصلنا..
تغديت ورتبت غرفتنا لان رحاب تكعد يمنا..
زهرة كاعدة تقرا كتلها كومي حضري كاكاو وكليجة بقت لو اكلتها النسرة؟
طبعا بيتنا ميخلى من الكليجة بس تماضر متخليها تاكل ..
احنا نضمها منها بقوطية معجون...
وامي تضحك علي ..
راحت زهرة واني تمددت ارتاح دقايق واجت رحاب..
حضنتها ..لج صايرة بقلاوة شنو الفلم..
هههه ارفد ذب عليه جمال..
اي كلش ارفد عيونه بنفسجية وشعره برتقالي من الجمال...
اشو هو واخو شاردين من الصومال جايين وي الموز تهريب بالشاحنات..
خرب يومج سكتي بطني مغصتني من الضحك ..
صدك ع سيرة بطنج تاكدتي؟؟
لا بعدني برجعتنا اخذلي اختبار واشوف..
انشالله خير يارب فرحتيني هواي..
فديتج يوم الالج..
اي منين اجيبه من الحايط مو يجي الاب بالاول..
يجي يجي بس انت وافقي ولتطفشيهم..
اجت زهرة جابت الصينية وكعدت يمنا وحاطه راسها بالنص تتشاقى..
شنو كنتو تحجون شنو ضميتو علي ..
كلتلها رحاب بعدنا مابلشنا بالنشرة الاخبارية..
تعالي كتيلي جبتلج اخبار عن الصومالي احجي كلي اذان وخشوم وعيون صاغية..
ولزمنا اذانا اني وزهره بيدينا عود نتسمع وهي تضحك..
كالت هو ارفد محجه هواي اشياء ..
بس اني اسحب كلام من ميسون ومن عمتي..
وحسب العرفته مرته مطلعه روحه ومكرهته بالحياة..
شلون؟؟
سنتين هم سوا وهي عدها مشاكل بالمبايض وجانت تعالج ع الخلفة..
وهو يريد اطفال وكل مياخذها للدكتور تعاركه ومتقبل ..
وتتخبل من تشوفه يطلع لو يكشخ تكله مصاحب علي..
تدور مشاكل وثالث يوم عرسهم تكول ميسون كتلها كتلة موت..
شاك خدها بالمحبس من ضاربها...
صخام هذا ليش هيج ؟؟
مادري من اسال ارفد يكلي هو طبعه عصبي..
ميقبل احجي بي لان ارفد يعتبره ابوه كد ميحبه ويحترمه..
زين ليش طلك؟
حاجز لتركيا واصفيله طبيب انابيب مضبوط ..
ومتفق وي المستشفى ودافع تكاليف اولية..
كومي يا مرتة يوم سفركم الصبح سافري لبيت اختج بالعمارة وموعد طيارتهم المغرب..
هي رافضة الفكرة وماقابلة..
وعود من سافرت خلته كدام الامر الواقع..
راح عليهم الحجز والتكاليف وهو متخبل ..
منتظرها ترجع للبيت ابد لا معاتبها ولا حاجي عليها..
من راجعة كاتلها بالحديقة بصوندة من ذني الخضر..
بعد ميسون من سولفت بقت ترجف..
تكلي يابة الموقف مرعب من طلعنا شفنا كاتلها بوكسات وبعدين بالصوندة ..
لحد مافاقدة بيده وميقبل يودوها للمستشفى ..
لحد مابالكوة مدخلي للبيت وموديها للمستشفى ورايح هاد ع بيت اهلها..
وين يلا فضت وتطلكو بحيث هي تنازلت كد مامخوفها..
يبوو قلبي وجعني هذا ميتعاشر ابد ..
كالت زهرة..حقه زين يسوي بيها بعد فوكها؟يعني صابر عليها وماخذها يعالجها تدك بي هيج دكة..
لو اني اموتها..
اني عفتهم يحجون وطكيتلي صفنة..
هذا يخوف كلش ماعنده قلب..
زين اني شعليه ليش افكر؟؟
ههه مخبلة هو بحالي هسه بعدين بعد السمعته لو يكتل نفسه عليه هم ماريده...
مرت الايام واني اداوم بس يوسف ومضايقاته متخلص..
وشجاع زاد بضغطه علي..
حسن اخذ اجازة عشر ايام سافر بيها..
ارتاحيت الغرفة وحدي بس الضايقني جيات يوسف..
صار كل يوم يصعد بحجة شكل..
الباب جنا نسده قبل هسه بقيت اخلي مفتوح ..
اخاف يجي يوسف ويتونس لان مسدود وياخذ راحته..
اني كاعدة ودخل..
مرحبا ست مهرة..
اهلا تفضل محتاج شي استاذ؟هو تفشل من شاف اسلوبي رد..
جبتلج رقم هذا العقد اريد تطلعي وتنسخي الي ع ورقة محتاجه هسه..
اوك تكدر تاخذ راحتك وترجع عليه..
لا معندي شي كاعد انتظرج..
جر الكرسي الكدام مكتبي وكعد..
اخذت الورقة الي خلاها ع الميز وكعدت ادور ..
لكيته وطبعته وخلصت ..
تفضل استاذ هذا جاهز..
عاشت ايدج كالو عنج شاطرة بس متوقعت هيج ..
طلعتي كلش شاطرة ..
شكرا...
مديتله الورقة اخذها ولزم ايدي..نترت ايده حيل وخزرته..
هو ابتسم كال ع كيفج هي لمسة..!
طلعتله من ورا المكتب ووكفت بالباب..
خفت ماعرف شلون اتصرف..
حجيت واني اشدد ع الكلمات ومقهورة..
تفضل اطلع برا واذا تكرر هالشي حوصلها لاهلي ومتصير الامور طيبة..
حافظ ع شرف غيرك حتى ينحفظ شرف اخواتك..
من كتله هيج عقد حوابه ومثل ممتوقع اجابتي هيج لو
اجيب سيرة اخواته...
طلع من الغرفة وسديت الباب ورا واني صايرة نار متت حر..
انوب فستاني حار يكتل هسه متوازية البسه..
ولو هو قماشه زين بس اني من احتر ماشوف طريقي بعد تطبك الوايرات...
بس شكد انقهرت من تصرفه ليش هيج..
بلة جنت اكول ملابسي ضيقة بس هسه عاديات ..
واسلوبي وياهم حد بحد ومانطي مجال حتى ضحك ماضحك وياهم..
بس هو حظي اكشر ...
رجعت وحجيت لزهرة..كالت لو حاول يتصرف تصرف ثاني فضحي وعيطي عليه ورزلي..
حتى اخاف يبث حجاية عليج بين الموظفين ميكدر..
لان شافو بعينهم تحرشه بيج..
وفعلا قررت اسوي هيجي...
بقينا نسولف لحد ماغفيت. كعدت الغروب وي الاذان..
صليت ورحنا نسوي عشا ..
الفون يمي بالمطبخ فاتحته ع سيف الحلفي يشعر..
انكطع الشعر ودك الفون..
اباوع رقم غريب مجاوبت..
رد دك مرتين والثالثة اجه مسج...
سديت القصيدة وفتحت الواتساب..
لكيت شعر لنزار قباني ..
طبعا اني حافظه شعره اغلبه كد مااحبه..
قريت بداية المسج انصدمت!منو يتجرأ يدزلي هالقصيدة؟
**اجمل مافيك هو الجنون..اجمل مافيك اذا سمحتِ خروج......!!!!
الى نهاية القصيدة..
بقيت اقرا وابلع ريك وعركت اصلا من الخجل والخوف..
اجت زهرة مدت راسها وتقرا وتباوعلي وتضحك..
معجب سري ونزاريات..
العب العب انت بتزاكري من ورانا..
دفعتها واني ارتجي ع الكاونتر..
دوخري انت الثانية..اني صار بيه سكر من الهبطة وانت تصنفين..
صوجج ليش مجاوبتي جان عرفتي...
منو يكون معقولة يوسف؟؟
اممم مدام لزم ايدج هذا جسر يسويها اتوقع..
بس اشو عجبني رومانسي ..
بس هذا يعرفني احب الشعراكيد..
اي اكيد بس خوش مختارلج قصيدة دسمة وغنية بالفيتامينات والكالسيوم..
ههههههه دنجبي بلة...
بقيت لنهاية اليوم افكر..منو هذا انوب..
براق؟؟ممكن هو!بس براق ماعنده هيج طلعات مال طول خلك..
براق قليل ذوق وادب...
مر اليوم واني مسطورة بهالعلة الجديدة...
يوم ثاني داومت ..بعدني توة كاعدة مصارلي هواس اجاني اتصال من السكرتير ..
المدير طالبج..
هنا خليت ايدي ع قلبي الله يستر..
رحت وسلمت..كالعادة واكفه قصاص..
بس ناقص يكلي روحي يم سلة المهملات ورفعي تك رجل
سالفة المعلمات قبل بالابتدائية...
سكتت مسألته ليش طلبتني..
بس الفاجئني طلع من ورا المكتب واجه صار كدامي..
شميت العطر نفسه اويلي..
غمضت عيني وفتحتها واستنشقته بلهفة ..
حسيت نظراته بيها نوع من التفاجئ يعني حس بيه عزا..
رفعت ايدي خليتها ع حلكي بحركة لا ارادية..
كتف ايديه ووكف صافن عليه...
بقيت اخلط الوان ماعرف احجي اركض اوكف ..
كال..
ست مهرة صارو كم واحد؟؟
منو هم !
فرسانج...
للحكاية بقية
بقلم شقراء(قمر كانون)