حين يزهر الحجر

٢

مرحبا حبايب..رغم التعليقات هواي بيها تجاوز علي والخاص كذلك مااهتميت وكتبنلكم بارت طويل لعيونكم..

حين يزهر الحجر
الجزء الثاني

قريت مسج براق ماتفاجأت لان هالشخص احسه جريء زيادة..
وماستغرب فتح فون زهرة الي لكاها فرصة حتى ياخذ الرقم...
حاجيت زهرة كالت جاوبي ليش خايفة..
تشجعت وجاوبته..
اهلا بيك وصل سلامك...
بس قرا المسج اتصل..
بقيت محتارة اجاوب لو لا ..
خايفة وممتعودة نسوي هيج شي..
زهرة شجعتني وكامت قفلت الباب وتاشرلي ردي..:
فتحت الخط وسكتت..
كال ...شلونها التفاحة..
ضحكت بصوت ناصي كتله..ترى عندي بدل الاسم ثنين ليش بعد تصيحلي تفاحة..
بس اشوف خدج اتذكر التفاح اكلج شتاكلين وهيج خدودج؟..
ههه هسه انت متصل علي حتى تسال عن خدودي ..
انتبهت لنفسي شحجيت بقيت اضرب ع حلكي بيدي..
شكد ثولة هسه شيكول كاتلة روحها وتريد تسولف..
جاوبني ع سؤالي...

لا بصراحة خابرتج حتى احاجيج بموضوع..
هنا صخنت وبقيت اهفي بالمخدة وزهرة لطشت اذنها ع الفون حتى تعرف شنو صار..
استجمعت قوتي وجاوبته ..تفضل اسمعك..
ااحم ..شوفي بت عمي بصراحة اني من كنتي صغيرة تعجبيني ورايدج..
ىبعد ماشفتج من كبرتي اندهشت بيج..
شنو من طول وجسم ووجه تفاحي..
لوالشخصية والاسلوب خبلتيني..
صارلي شهرين من شفتج بس ماحسها شهرين عبالك سنتين ..
اني ممنون من زهرة ونتلتها خلتني اشوفج..
ا..براق انت هواي جريء!؟
اوف هذا اسمي هيج حلو اول مرة ادري..
لتدور الموضوع احسك متمادي هوايه وياي ..
متوهمة مو جرأة هاي..بس ميانة بحكم انت بت عمي وامون عليج..
بس اكول مهرة خلي زهرة تشيل راسها من السماعة..
لان مجاي افهم من انفاسها شي!!!
صخاام هذا شمدري!!كمزت زهرة لنهاية الغرفة وهي سادة حلكها بيدها..
وميته ضحك ..
اني بقيت امتمت..شنو زهرة ترى مجاي تتصنت..
هههه لعد منو يتصنت ابوي ولج غير انت تحجين وصوت تنفس وياج ..
هسه عوفينا وجاوبيني..
ع شنو اجاوب..
مهرة شنو تحسين تجاهي؟
ماعرف يعني بصراحة ماكدر احكم هسه لان بعدنا توة تعرفنا..
انت توج تعرفتي ..
بس اني اعرفج واريدج من زماااان...
ههه ماشي احتاج وقت اني..
كل الوقت الج بس خلينا نتىاصل ..
اوكي بس ماكدر نتخابر هواي تعرف اخاف..
واني هم اخاف عليج طبعا ماريدلج المشاكل..
اوكي هسه اروح انام تعبانة..
اوكي نتواصل وسلمي ع زهرة...
ههه باي...
سديته منه واني اضحك شلون لوتي عرف زهرة تتصنت..
حسيته مو سهل وامبين مارة عليه هالكلاوات كلها يعني ملعب..

ضل يتواصل وياي كل يوم وشوي شوي اخذت ميانة وهو طبعه فكاهي وكشكولي..
اعترفنا لبعض بحبنا وتقربنا اكثر..
من وصلت مرحلة ثالثة تقربنا كلش...
وبقينا الليل نصه نسهره نسولف بالتانغو..
بدا يتجرء بطلباته بس اني ارفض ..وكل مرة يطلب مني صورة بلبس خفيف لو يطلب البس بالاتصال ملابس تبرز جسمي ..
اجاوبه بالرفض والعركة..
ماريد هالشي بيناتنا احسه عيب وهو ابن عمي غير يخاف علي..
شلون يطلب مني هجي شي..
جانت زهرة تكلي شدي وارخي ويا..
لتمنعي بس هم لتحرمي..
مثل مااني هسه اكسر واجبر وي حسين..
زهرة حبها ابن اخت صديقتها جان سيد ويداوم بكلية القانون..
وتعرفو ع بعض وحبها..
بس اكثر من مرة نصحتها لتتورط لان اهلي ميببلون نتزوج من غير طائفة..
احنا سنة بس نزور ونحب اهل البيت عليهم السلام لان هم اهل نبينا واكيد نحبهم..
بس اهلي بيهم طبع مينطون شيعة ولا ياخذون منهم...
اكثر من مرة يخطبونا شيعة بس الرفض قطعي..
عاطف متعصب من هالناحية كلللش...
لهذا حذرت زهرة بس هي تكلي اليحب من صدك لوزفة لو تابوت ..
ومن تكلي هيج قلبي يوجعني عليها..
ومع هذا استمرت وي سيد حسين الي كلش يحبني ويحترمني ..
اسلوبه رزن وشخصيته رزنة وثكيل حتى كعدت وحجيت ويا..
بوقتها دك صدره وكال كدامج زلمة واخو اخته..
لو طلعت مني الشينة ماعلى وجهي شارب ..واهلج اقنعهم واخذها مدام بالحلال رب الحلال هو اليسهل..
واني مستعد اخطبها هسه ..
بس هي تكلي اصير مرحلة رابعة يلا تجي تخطب ..

وفعلا شفته خوش انسان ومن دزيت صديقتي رحاب..
رحاب جانت علاقتي بيها بسيطة..
بس بمرور الوقت عرفتها حبابة خوش بنية..و
قوت علاقتي بيها بمرحلة ثالثة وكتلها تسال عن حسين..
الكل يمدح بي وماكو منه سيد حسين وحتى لصديقها كالت وسأل عنه..
وكلها اعرفه طالب بكليتنا و خوش ولد وكلش شريف..
تطمنت عليها وعرفت هي خوش اختارت..
بس اني بدت علاقتي تسوء وي براق..
بقينا كل اتصال نختمه بعركة..
طبعا رحاب بالاول تسالني عن سبب العركة..بس اني ماكلها الحقيقة..
الى ان فد يوم اجه براق وراد يكعد وياي..
هو جان يجي يشوفني من بعيد..
بس هالمرة كال اريد نتفاهم ع كلشي..
كعدنا اني ورحاب انتظره يجي..
المفروض بالتسعة بس اجاني بالعشرة الا ربع..
اجه كعد بس وجهه مكلوب كلت امبين هالنقاش حييدي بعركة..
جان بيده بطل ماي فتحه وشرب وبعدها فتح الموضوع..
واني حبيبح ومن حقي اتونس وياج واذا مو حبيبتي تريحني وين اروح وهم محسوب ع ناس عندي حبيبة !
ممحسوب عندك حبيبة؟؟؟يعني لان رفضت اتعرى الك صرت ممحسوبة ؟؟
انت شلون ابن عمي؟؟اشو متغار علي؟
انجبي وسدي حلكج ادبسيز..
ترى صبرت عليج هواي..
براق لتغلط مو انت التحجي عن ادبي..
ولو فعلا ادبسيز جان دزيتلك صور عريانة ومثل متريد حضرتك..
بس اني صوجي الظاهر رخصت نفسي من حبيتك..
دكافي اش رخصت نفسها..
اصلا شكلج وشطلب منج عيب وحرام..تكول حابلي شيخ جامع..
اني مستغربة من هالاسلوب هذا اول مرة تحاجيني هيج؟؟احسك مكلوب واحد غيرك ..
لتتحججين بلة وتفرين الموضوع عليه...حجاها بنترة وواحد مطايق نفسه..
ماتحملت بعد..
كمت وعفته كاعد صاح علي ماجاوبت..

تمشيت لرحاب كتلها كومي بسرعة..
اخذتها واني امشي ١٨٠ لو اعثر بحصوة تكلبني..
اول مفتنا لقاعة جان بيها واحد وكبلته من دخلنا طلعو بسرعة..
اني ذبيت نفسي ع الستيج حيل وغطيت وجهي بيدي..
بقيت ابجي حيل رحاب تنزل بايدي من وجهي وتسالني..شبيج فهميني شصاار..
بقيت ابجي واحجيلها طلعت كلينكس وتمسح بوجهي وشبعته مسبة..
كالت يولي يروحلج فدوة هذا بطران ..ولتجاوبي بعد شلي حاله وكليله اذا تريد طيحان حظ تعال اخطبني...
بقت تعدي بيه وشوي هدئت وسكتت ..
بيومها مدخلت ولا محاضرة..
انتظرت نهاية الدوام وارجع وانام مالي خلك لا احجي ولا اكول..
رحت كعدت انتظر زهرة ورحاب مقبلت تعوفني..
يومية هي تطلع قبلي لان حبيبها ارفد هو ماخذها خط هي وبنات وياها...
ارفد جان طالب مرحلة رابعة قانون...
وعلاقتي بي كلش حلوة ونعم الاخ ويانا اني وزهرة وعرض علينا يوصلنا وي رحاب..
بس كتله اخوي ميقبل سيارة حديثة نأجرها ..
المهم بيومها رحاب بقت يمي الى ان اجت زهرة وترخصت رحاب وراحت..
طبعا زهرة تعرفني من وجهي بسرعة سالتني واحنا نمشي للسيارة..
كتلها من نوصل احجيلج لان دايخة ومتضايقة كلش..
كالت..واني هم لازم احاجيج..مجاوبتها..
وصانا للسيارة وسكت الى ان وصلنا للبيت...

بدخلتنا واسمع تماضر تتلاغى وي امي..
لان امي تريد تروح لفاتحة اخت مرت عمي وكايلتلها اكو ملابس بالغسالة طلعيها ..
ومادة اللسان شطولة...
دخلنا كتلها ماما توكلي واحنا نطلعهم ومرة ثانية خابرينا ونرجع ع وكت ولتطلبين من الغريب..
لا حاجينا تماضر ولا عاركناها لان نداري خاطر عاطف...
رغم جنت روحي بخشمي ودي الزمها اكطعها..
بس بدلنا بلشنا اني واية بالملابس وحجيتلها ..كالت..
اليوم اصلا اجه لكليتنا وسلم علي بس مدري شبي نظراته مدري شلونها وتالي كلي ..
تنورتج جنها حصر شوي لو انت سمنانة ..
بلة ذي اختج مربربة ولايكلها بس انت يلوكلج الرشاقة..
جاوبته..ابن عمي غض البصر ترى النظرة سهم من سهام الشيطان..من رخصتك عندي محاضرة...
عفته ورحت...
هه لج هذا ماعرف شنو وضعه ماافهمه جسر مدري جريء مدري جفاص...
هو لسانه طويل وشوي عنده قلة احترام بس ميمنع يحبج ومن يتصل تفاهمو لتطنكرين..
كتلها يصير خير وبقيت افكر بكلامة وي زهرة..

خلصت شغل رحت نمت كعدت العصر ع عياط عاطف..
طلعت النعوسة بعيني بس مرعوبة شنو صار خفت...
لكيته يتلاغى وي زهرة شلون متعاركات وي تماضر...
شافني فتح الباب كال..
مهرة لسانج كصري واحترام تماضر من احترامي...مو اخليها يمكم الكاها مذلولة ..
منا وهيج تماضر متشيل قشة بهذا البيت ..كافي عليها بتها وهي منا حامل..
اني ربيتكم واريد حگ ارباي وتعبي!!هلا هلا بمرتي..
عافنا ودخل بقينا صافنات بوجه بعض!!شبي عاطف ليش هيج يعيرنا بتربيته النا..
صفنت ع زهرة..اكلج اليوم برجي وين داخل؟
يمكن مضيع الدرب برجج اليوم ..
لا خية شوفة العين داخل بزحل وميندل دربه يرجع..
اكلج احنا مو سفيهات توة مترزلات ونضحك..
هه يمكن من الصدمة يا خيتي اذا عاطف هيج يحجي ع الدنيا العفا بعد...

مرت يومين وعاطف وجهه ثكيل علينا ويحجي من ورا خشمه..
امي كالت اعتذرو منه هذا مثل ابوكم وفعلا اعتذرنا منه..
ومقبل نعتذر كال ماريدكم تعتذرون انتو بناتي وتصير الاشكالات...
بيوم الثالث براق خابرني العصر..
شجعتني زهرة اجاوبه ونتفاهم..
جاوبته بالاول اعتذر..تالي كتله براق احنا طريقنا مسدود ..
التطلبه مني ماريد اسوي واذا تريد تعال اخطبني وبالحلال احسن ..
انت ممحتاج وتكدر تخطبني ليش متاخر بعد؟؟؟

بعد وكت ع الزواج مهرة نتفاهم احسن متشوفين يومية نتعارك!!
بعد وكت ع زواج ليش؟؟من الاخير براق وبلا مانتعب نفسنا ثنينا..
قصتنا انتهت وانت الاختاريت هالشي..
اكلي تبن ومو كيفج لتقررين شي لوحدج..
مو عبالج شفتيلج شوفة ترى حلكج اشكه وغصبا عليج تبقين وياي..
اني اريد اخطبج وتدرين احبج بس اريد اتاكد منج تحبيني..
ومااتاكد الا تسوين الاريده..
هه لعد انتظر ع الفارغ استاذ براق...مع السلامة..
سديته بوجهه وشكد دز مسجات وغلط وفشر ولا اهتميت...
وزهرة ايدتني كالت يولي ميحترم وهذا يلعب ماعنده قرار...
بقى الايام البعدها يتصل ويتقرب واني مغلسه عليه..
تالي نصحتني رحاب وزهرة انطي فرصة..
انطيته بس كان الكلام كله بلا نفس ويا ماعرف ولا كاني احبه..
حقدت عليه وضجت منه...

اتذكر فد يوم طلب نلتقي وكتله ماكدر بس بعد الحاح قبلت...
التقينا وكعدنا بالسيارة بالكراج حتى لحد يشوفنا...
الكراج تصير قريب ع الباب مالت الجامعة...
كعدنا سولفنا وهو شابك ايدي طول الوقت ..
تالي شاف المكان هدوء كلش وظهر صيف..
اني دنكت فتحت الجنطة شفت الوقت بالفون ..بس رفعت راسي اجه وجهي بوجهه..ولزم راسي راد يبوسني ..دفعته من صدر بلا وعي فتحت الباب..
نزلت وركضت خايفة ومتوترة ومرعوبة من تصرفه..
مشيت سريع وهو يصيح وراي ماهتميت ..سمعت هورن كلت اكيد هو ماريد اصعد ويا..
خفت يجرني للسيارة مرة ثانية لو يسوي بيه شي...
بقيت امشي واتعثر وقلبي يريد يطلع من صدري كد مينبض...
نزلت دموعي ع موقفي شكد احتقرت نفسي...
بقيت امشي والهورن يدك حسيت تقربت السيارة مني رجليه بادت ...
سمعت صوت ارفد صاح...
مهرة خيتي مهرة اوكفي ...
وكفت واني اخذ زفير قوي..الحمدلله لكيت ارفد يعني ميكدر يسويلي شي براق...
مسحت وجهي والتفتت عليه..نازل من السيارة وصل يمي..
امشي نوصلج ويانا مهرة...بس ماسألني شنو اسوي هنا وليش لوحدي...
بالاول مقبلت اصعد تالي كلت بلا متصيرلي بلوة عاد براق خوش انسان..
فتحت الباب وصعدت ..تبسمرت بمكاني واني اشوف واحد كاعد بالصدر..
باوعت بوجه ارفد بنظرات يائسة اريد اعرف منو هذا..
كال ارفد مهرة اعرفج ع شجاع اخوي ..شجاع هاي مهرة صديقة رحاب..
باوع بالمراية وكال اهلا ومن ورا خشمه حجاها ..
شبيك يحظي هسه من حورك بكد جدي ..
لا لا هو صح بكد جدي بس حلوو..
اسمر وشعره خشن اسود ويبين جسمه مرتب لان كعدته هيبه..
ملامحه حلوة عيونه وحواجبه تخبل مرفعات ...شكله حيل جذاب بس مستوي زيادة ناسي بالفرن..
وفوكها يتكلب علي ديلا هسه ضلت عليك...

وصلنا وتشكرت منه ونزلت ..
لكيت زهرة تنتظرني..حجيتلها الصار وبقت تلوم بيه..
كالت كطعي علاقتج بي هذا ماوراه كل فايدة...
وفعلا قررت اقطع علاقتي بي ...
من هاليوم شكد اتصل شكد راد مجاوبته...
بفترة الامتحانات جان يخابر زهرة..
كل يوم يدك اول شي رزلته ع الصار بينا وكلتله تحبها اخطبها واني مااتوسطلك لتحاول..
وانطته حضر ..
بس خلصت الامتحانات واخذنا النتائج اني صرت رابعة وزهرة ثالثة...
اجت مرت عمي وجايبه وياها حلويات وباركتلنا ..
طبعا ولا مرة مسوينها بحيث استغربنا..
بس الطلب الطلبته بيومها مو بالحسبان..
كالت اني جاية اخطب زهرة لبراق...
جنا كاعدين ثنينا بقينا وحدة فاهية بوجه الثانية...
صدك صدمة ممتوقعة يسويها براق معقولة هالشي...
راحت امه وزهرة خطية تعتذر مني وتملي يمكن امه غلطانه وهو دازها عليج...
بس بعد مااجه عاطف وامي حجتله..
كال حاجاني براق واشوفها خوش قسمة...
حجه وي زهرة بس زهرة كلتله عاطف عندي وياك موضوع بس حساس..
اني كلت زهرة لكفت حتكت الاول والتالي...
عاد كعدو يمي بالغرفة..
كلتله شوف خوية..انت مربينا ع الصراحة واني اريد اكلك ترى ماقابلة ببراق..
تعرف ليش؟جاوبها باستغراب ليش؟
لان براق عنده علاقة باخت صديقتي المقربة..
ماكالت صديقتي لان عاطف حيتعصب ويكلها شلون تماشين وحدة هيج..
لذلك كلتله اخت صديقتي..واابنية شريفة وبت ناس وواعدها بزواج...
بس قبل كم يوم رايد يعتدي ع شرفها وشردت منه الكلية واحنا شفناه ..
تقبل ياخوي تنطيني لهيج شخص؟؟
لا طبعا يروحلج فدوة..
يولي انسي الموضوع وهو اعرف شلون اصرفه...
ومن راح اية تسولف وياي وتحاول تنسيني...
بس اني بعدني ممتقبلة الخبر مدري مصدومة مدري ممهتمة ...

وصله خبر الرفض وبعد مااتصل لا بيه ولا بزهرة..
ورا اسبوعين عزمونا ع خطوبته..
خطب بت واحد من معارف عمي ...
من يومها حسيت اني اغبى وحدة بهالدنيا..
خلصها لعب علي وتالي خطب اختي ومن رفضته تزوج وبكل صلافة...
مرت الاشهر واجه الدوام..
بس احس ماشتهي حتى اداوم..
لان بالعطلة خلصتها كآبة وبس انام لو من اكعد احوك...
اول ايام اداوم يوم ويوم اغيب..
الى ان شدو علي رحاب وزهرة..
ورجعت اداوم عدل...
وجانت مرحلة رابعة مواد قليله..
عدنا ريستات نفتر ويجي ارفد يونسنا ويسولف شلون اخو شاوي ع اذنه بصل بالشغل..
اخوه شجاع الي شفته بالسيارة..
عنده شركة مال معدات وهو يشتغل يمه لان تخرج هالسنة...
ومن يحجينا ع خبالات اخوه صدك نتونس..
طبعا كل ميشوفني ضايجة يكلي لتضوجين ..
تخرجي واخذج اشتغلي يم شجاع وهناك عرفي الضوجة شلونها...
صدك يضحكني...
ومرت هالسنة بسرعة وخلصت واجه التخرج..
بيومها اجو بيت عمي منير ابو براق ومرته ومرت براق وياهم تباركولي لان تخرجت..
مرت براق جانت حامل وهو كاعد يمها طول الوقت عينه عليه..
بكل وقاحة يباوع ولا كانه مسوي شي...
ماكول كدرت اتحاشا لان بعدني احن اله مو سهله الصار وياي ومو بيدي احن ...
قبل ليطلعون سلمو علينا اني جاوبتهم ولبسته ..
امه كلتلي يوم النشوفج عروس مهرة تستاهلين احسن واحد جمال وكمال..
طبعا هي ماعندي شي وياها بس هم تحنص جنتها لان مو متفقات وهواي مشاكل ..
ابتسمتلها كتلها اول المعازيم عمة انت تزفيني بعد هههه..
هو يخزر وعيونه تكلبت عباله مسؤول عني قليل الوجولة..
عاد لزم مرته من ظهرها وطلعو...
بهالفترة ارفد خطب رحاب وتزوجو بمدة قليلة...
وقوت علاقتي اكثر بارفد حتى كم مرة يوصل رحاب ويشوف عاطف ويسلم عليه...
وهواي يمدح بي عاطف...

مشت الايام نفسها متشابهة...
بس بقت كعدة البيت والكآبة والضوجة..
وجان الوضع بالعراق مو زين سنة ٢٠١٤ ودخول داعش..
والوظايف خصوصا بالبصرة معدومة نتخرج ونسفط ونكعد..
بس وعد ارفد مانساه..
بيوم خابرتني رحاب كالت ارفد يكول تردين شغل؟
ايي لج ياريت حتى لو جايجي عادي الشغل الحلال حلو..
ولج شفتيني فيفي عبده اشو تشمرين...
هههه دولي يلا صدك يريدني..
ايي انطي اهلج خبر لو قبلو روحي الاحد حتى تباشرين..
لان اخو مموجود وهو نائب عنه يعني متحتاجين مقابلة ودوخة..
ايي ياريت ..بس اكول لعاطف وبلكي يقبل...
اجه عاطف وحاجيته وقبل..
يوم الاحد اخذني وشاف ارفد ووصاه علي..
بعدها اخذتي ارفد لمكتب بي ولد اسمه حسن..
شافني كله واخيرا جبتو واحد يساعدني باوعلي كلي رح ترحميني...
جاوبه مهرة شاطرة وسبعه ولا يهمك اكيد حتشيل الشغل كله...
بعدها بلشت وساعدني حسن بشنو مطلوب مني عرفت نمط الشغل...
خلصت ورجعت للبيت وي حيرانه ...
كلفه عاطف يلتزمني خط وخوش ولد حباب...
يوم ثاني قررت اكشخ وبلش اخذ راحتي لان مو مثل جامعة وزي يقيد هنا تنويع لبس...
لبست تنورة رصاصي مالت الكلية..
اشتريتها اخر شي..
بس اشو كوة انسد السحاب للنص هذا كله من كعدة البيت والاكل ..
وزني صاير ٦٥ دبدبت لازم اقلل اكل..
لبست سترة اسود وجواها قميص ابيض ورصاصي وشال احمر ..
خليت شوي كحل وحمرة ومورد خد ..
باوعت لنفسي بالمراية ..
جني مو راحة لبسي يخزي!!لا لا اني متوهمة شبي لبسي حلو عادي..
طلعت ووصلت ..سلمت ع الامنية بالباب واباوعلهم عيونهم تلوب علي..
استحيت بس اكابر مدري اقنع نفسي...
وصلت واجه حسن بعدها واشتغلنا شوي..
خابرني ارفد يريدني بغرفة المدير..
لان اليوم اجه ويريد يشوفني..
بداخلي كلت لا هلا رحت واني ادعي وخايفة ماعرف من شنو رغم ممسوية شي..
بس مجرد اسم مدير اله هيبة ويخوف..
فتت وهو وارفد مدنكين ع لابتوب كدامهم..
رفع راسه وحاجبه ويا مرفوع ويباوع بقرف..
سلمت وردو علي..
دخلت وحاجاني عبالك عنده طالب ويامر بي ..
ميريد تاخير ويريد جدية بالشغل ..
شافني كاعده اعزف عود يمكن هه...
بعدها كال وقعي ع العقد ..
اخذت الورقة وقعت واستأذنت...
سديت الباب وراي اسمعه يكول لارفد..
منين جايبها هاي صدك جذب..
جنها راقصة تمشي وتهز وتمط بحجيها ..اي خلل يصير بسببها انت المسؤول....

للحكاية بقية
بقلم شقراء(قمر كانون)