حين يزهر الحجر

الجزء الاول

مساء الخير حبايبي..مشتااقتلكم هواي..مثل ماتفقنا اليومنبلش بقصتنا وياريت تراعون الابطال بتعليقاتكم وانتقدو بلطف لتتجاوزوم عليهم عيب..
طبعا اقدم شكري ل@marwa.m لتصميمها صورة الغلاف عاشت ايدج يامبدعة...
.مطالعة ممتعة😍

حين يزهر الحجر
الحزء الاول

يوم الخميس الساعة بالوحدة الظهر والجو باااارد ...
كاعدين بالغرفة اني وموظف وياي اسمه حسن..
كمت اصب جاي من الغلاية ..
سالت حسن ..
تريد جاي؟
ايي ياريت خوية راسي مصدع من الشغل..
تدلل بعيني...
صبيت كوبين الي واله وانطيته..
كعدت ورفعت الكوب اريد اشرب دك الفون..
عفت الكوب ع جهة وجاوبت...
جان المدير طالبني اروحله حالاً وضروري...
اخذت شربتين من الكوب وكمت واني استغفر..
هالانسان مينبلع ابد عبالك يطلبني ثار...
اكيد هسه الكاه عاقد حواجبه مو حواجب تكول كومة نسوان رايحات لفاتحة ..مكومات وسوود..
عابت لذاك الوجه الصومالي..
امشي واحش بي واضحك ع نفسي...
وصلت دكيت الباب واخذت الاذن ودخلت...

نعم استاذ كالو تريدني؟
واكفة ومااباوعله واحجي بحدة..
شفته اجه وبيده اضبارة ورافع حاجبه ومتعالي كأنه كدامه حشرة...
آنسة مهرة هاي الاضبارة مالتج صح؟؟
رفعها بوجهي بس بأستهزاء وحيل ..
بحركة عشوائية منه ضرب الفايل خدي وطرفه حاد حسيت خدي انشخط..
بلا وعي كتله..اووي اذيتني..
جر نفس قوي كال بصوت همس بس فهمته..
من اكول جايبلي كاولية ممكذب!
اني سمعته صعد الدم لراسي بس شحجي اقلل من قدر نفسي لو كتله سمعتك...
كال..فهميني انت مزورة الاوراق لو شنو اشو هنا اسم فضة؟
وانت اسمج مهرة والوثيقة ماكو يعني شنو ؟؟
داخله باضبارة وهمية واحتيال؟؟
خليته يكمل كلامه..
حاجيته بهدوء واني اسحب الاضبارة من ايده..
استاذ ممحتاجة اكذب واحتال وازور..
ترى شركتكم مو البنتاغون وهيج احتال حتى اشتغل بيها..
هذا اسمي الكامل..
فضة ابراهيم نجم ..وهاي صورة جنسيتي جوا مكبوسة ..
بس اني يسموني مهرة ومحد يعرفني بأسم فضة..
وتكدر تتأكد من استاذ ارفد بهالشي...
عن اذنك...
ذبيت الاضبارة ع القنفة وطلعت بس مقهورة هواي...

اكثرمن مرة يقلل مني ويتهمني بقلة الادب ..
لو بيدي ابطل وارتاح بس ع كولة القيصر..اااه "ضعف الحال..فقر الحال..عسر الحال ..مأساتي..."
رجعت لغرفتي واني مكتأبة..
طبيعتي بسرعة احتر ومن انقهر احتر اكثر...
شفت حسن امبين يراسل وملتهي..
طلعت من الغرفة بعد ماصبيتلي جاي...
المكتب صاير كدامه مثل بلكونة واسعة مفتوحة ع شارع...
فتحت الشباك وضربني الهوا البارد..
بقيت صافنة ع الناس كدامنا مكاتب هواي وع جهة بيوت...
اشرب الجاي وغركانة بهمي...
احس خدي يحركني ..تلمسته خشن ..
فتحت الكاميرا بالفون شفته مخرمش..
هه..هالشخص فض الى درجة..
ماعرف شلون اهله متحملي بالبيت ولو الله يساعدهم..
هذا اكيد مشوفهم المر..
حقها مرته تطلكه هو منو يصبر وياه ..
اخلاقه سودا مثل جهرته..
سمعت صوت المحاسب محمد...
ست مهرة دزيتلج ايميل بس جيكي ..
اني راح اطلع ..ودربالج لتمرضين يمعودة ...
انداريت ابتسمت..
صار استاذ هسه اشوفه..يلا لعد مع السلامة خيتي...

رجعت للمكتب وشفت الايميل بي عقد راجعته وكملته ورسلته..
الساعة بثنتين الا ثلث..
حسن كام كال ..
مهرة اني خلصت شغلي اذا سالو عني ولو ميسالون بس الاحتياط واجب..
تحتاجين شي خوية..
لا تسلم خوية ..ماشي مع السلامة ...
طلع حسن واني كملت شغلي..
احنا ينتهي دوامنا ساعة ب٣ الظهر..
اني مأجرة خط ابن جيرانة ولد شاب اصغر مني وخدوم كلش مؤدب..
اكله تعالي بثلاثة ماطلع قبل الموعد..
الولد يطلعون عادي..
بس اني ماريد علي نقطة..
لان المدير كلش ضايج مني...
بقيت بالغرفة لوحدي ..
خليت هيدفون باذني وكعدت اسمع شعر..
احسه غذاء قلبي وصديق مشاعري..
كلش احب الشعر والشعراء الكبار..
غمضت عيني ورجعت راسي ع كرسي..
جانت قصيدة لايهاب المالكي..اسمها ماردت احبك حاولت..
من لفظة اسمك حاذرت..كلمة وشلتها من السمع ومن اللسان اخفيتها..
كلش احب هالقصيدة...
وصلت لمقطع..."تذكر من اجيك بلهفتي؟مشتاك حتى تشوفني..
وتلكاني روحي مشككة ولمسات ايديك تروفني..
تتركني هسه قررت؟؟تتركني هيج بلا ذنب!
بررلي حتى لو كذب..
مليت !گلي كمت امل..
ماينحمل بعدك ترى وكذبت كتلك ينحمل...
نزلت دموعي وي هالمقطع وزادت شهكاتي..
كانت نفسيتي تعبانة واريدلي حجة ابجي..
وهالمقطع رجعني لقبل سنتين ..
للجرح الي جرحنياه ابن عمي الي المفروض يكون سندي واني عرضه..
حضنت نفسي واني اتذكر ايامي ذيج ..
**************************************

كنت كاعدة بالطارمة واندك الباب...
غلست مابيه اكوم افتحه واني كاعدة اقرا...
رجع اندك ..
كمت كلت منو...
اجاني الصوت اني براق ابن حجي منير..
عرفته ابن عمي..
احنا ممنوع نسلم ع اقاربنا سواء ابناء عمام او خوال..
اخوي ابد ميقبل نطلع ونشوفهم ..
حتى جياتهم النا قليلة لان اخوي كلش ملتزم من هالناحية ومعقد الامور..
رحت فتت كلت لامي..
ابن عمو منير بالباب ..تطلعين؟
كالت لا هو عاطف ينتظره اصلا يريد ياخذه يشوفله سيارة..
روحي دكي الباب ع عاطف كليله..
رحت لغرفة عاطف دكيت الباب ..
طلع وكتله وفتت لغرفتنا..
اختي زهرة كاعدة تقرا هي طالبة ترجمة مرحلة ثانية..
كعدت يمها وبقينا نحجي بالكلية..
بعدها كمنا ورا ماصلينا صلاة المغرب...
بلشنا بالعشا اني وياها..
لان تماضر مرت اخوي متقبل تسوي تتنسى..
سويت معكرونية وثرمنا الزلاطة وسوينا الجاي وانتظرنا عاطف يجي ونتعشى..
كعدنا نباوع للتلفزيون وشوي وسمعنا عاطف دخل..
كال سوو طريق..براق ابن عمي اجه وياي وحضرو العشا ..
اني جبت وياي كباب رتبو صينية وصيحو علينا...
كملنا العشا ورتبناه واخذه ..
حضرتلهم صينية جاي واجه اخذها عاطف وسال عن تماضر..
كتله نايمة بعدها..
تنهد وباسني براسي وراح...
عاطف اخونا الوحيد..
اختي ورد الكبيرة...وبعدها عاطف..واني والصغيرة زهرة..
من بعد وفاة بابا بسبب ازمة سكر خسر حياته..
عاطف تكفل بعيشتنا بالاضافة الى تقاعد بابا..
لما توغى بابا كنت عمري خمس سنوات وعاطف كان نعم الاب النا...
بس بعد ماتزوج تماضر هواي صارت مشاكل ..
بس امي متقبل نحجي واحنا هم لخاطره نسكت رغم هي كلش مؤذية وتختلق المشاكل ..
وهالشي صنع بداية فجوة بينا وبين اخونا ..
بس مانطينا هالشي مجال...

بقيت كاعدة بالمطبخ انتظره يجيبلي الصينية اغسلها..
سمعت عيطة قوية ..
صوت امي هذا !؟
ركضت جوا شفت عاطف وابن عمي ركضو كدامي للسطح..
بدون وعي ركضت وراهم..
وصلنا فوك لكينا امي زهرة بحضن امي وتفرك بيدها وتعيط ..
ركضت برعب واني اباوع لزهرة ..
وصلت يمها وفقدت الوعي..
بعدها كعدت ع كفخة ماي بوجهي..
فتحت عيوني صار كدامي براق..
اول مرة اشوفه من كبرنا..
اسمر عيونه وساع وشعره عالي وكثيف بتسريحة مرتبة..
وامي خطية وزهرة خايفات ويحاجوني..
كعدت كلتلهم مابيه شي..
اباوع لزهرة ع راسها دشداشة لافه نفسها ..
واني ذابين ع راسي تشيرت شكلنا مسخرة ليكول متنكرين..
ضل عاطف يضحك..كال
سويتنا مثل الدومنة تطيح وحدة وتطيح الوراها..
خضيتنا يمعودات..
سالتهم هو شصار..كالت امي..
زهرة جاي تلم الملابس من الحبل..واكو واير ناتلها ..
وبراق كال يلا عدت سلامات الحمدلله قدر ولطف..
بس نظراته عليه وكانه اول مرة يشوف بنية كدامه..
اني خجلت من تصرفه وغلست ..
بس بقى ببالي شكد صاير وسيم ومملوح ..
قبل جان جنه نقار الخشب هسه لا صاير وسيم..
مرت كم يوم وهو ببالي..
اتذكر من واكف كدامي ونظراته..
كلساع اعيدها بمخيلتي..
اول مرة اباوع لولد ويلفت نظري..
حجيت لزهرة اني وهي سرنا واحد..وحتى احساسنا نحجي لبعض..
ضحكت كالت..
ياريت يصير نصيبج عاد ترتاحين..
بيت عمي وضعهم مرتاح ومن نوع يدللون نسوانهم كلش..
يلا اذا رايدج اكيد حيتصرف...

وراها بيومين جنت كاعده يم التماثيل انتظر زهرة لان ثنينا نفس الخط..
سمعت صوت واحد يسلم..
عبالي مو عليه غلست..بس من سمعت اسمي التفتت شفته براق..
عركت وخجلت وبقيت امتمت ماعرف حتى ارد السلام..
جان كاشخ كلش والعطر يفوح لهسه اتذكره عطره افشان ..
رديت السلام عليه كال ..
مريت لصديقي هنا يمكم امشي اوصلج واتصلي بزهرة خل تجي..
لا مشكور الخط فد شوي ويجي لتعب نفسك..حجيتها واني اباوع كبل ...
طبعي حتى لو استحي ماادنك راسي لا اباوع بغير اتجاه..
هو ضحك كال..
عيب ابن عمج وعضيد اخوج موجود وترحين وي الغريب؟ميصير ابد..
طلع جهازه وخابر من سمعت اسم عاطف التفتت عليه ..
بعدها سده كال...
استأذنت من عاطف ورح اوصلكم بعد ماكو حجة..
اوكي مثل متريد بس لحظة اتصل بزهرة...
دكيت ع زهرة كالت مخلصين بس ماعبالي انت مخلصة دومج متاخرة..
هسه رح اجي..
سديته وبقيت واكفة انتظرها..
هو رفع نظارته خلاها بنص شعره...كال..
مهرة تدرين شكد متمني اشوفج؟من كنا صغار واني اكول لعمتي ام عاطف لتزوجيها هي الي..
باوعت عليه بنظرات مصدومة!!هذا صمت دهراً ونطق كفراً..
يعني صارلك شكد من كنا صغار ممتشاوفين ومن شفتك تكلي هيج..بداخي كلت شكد جسر هذا..
سكتت مجاوبته ع كلامه..
رجع كال..
اسف اذا خجلتج بس ساليها لعمتي دوم اكلها هيجي ..
بس تعرفين تخبلين من تخجلين تفاح لبناني يصير خدج..
باوعتله واني اخزربي..
اريد ارزله اشو رايح زايد ؟؟
اشو هذا طكها ضحكة..وفرك وجهه ..وكال..
لتتعصبيت ترى اتشاقى وياج بت عمي ..
رجاءاً عاطف ميقبل نختلط وانت تعرف هالشي..
ياريت الامانة الي امنها يمك تكون كدها ..
عفته ومشيت هو اجه يمشي وراي ويعتذر ويضحك..
غثتني سفاهته..
شفت زهرة وصلت النا هو سكت..

صعدنا بالسيارة وهي تباوعلي وتبسبس مستغربة لان شكلي ضايج..
اشرتلها بعيوني فهمتني وسكتت...
بقينا ساكتين الى ان وصلنا..
تشكرنا من عنده وهو نزل ويانا..
سلم ع اهلي وراح..
بعدها صليت واكلت ورحت تمددت غفيت ..
ورا فترة حسيت ع صوت عاطف يحجي وي زهرة..
خابرني براق الفون مالتج ناسيته بالسيرة وهسه يجيبه..
لكيت الدنيا مغرب كمت حاجيت زهرة..
طلعتت ناسية فونها بالسيارة..
كلت هذا بقى يدور حجج اشو حسيته مو راحة..
لا بس حلو ههه...
اجه جاب الفون بس مشفته بعد..
لليل اجاني مسج..
بت عمي التفاحة ممكن اسلم عليج....

للحكاية بقية
بقلم شقراء(قمر كانون)