دخلنا لواحد la chambre كبيرة فيها طفل صغير شباب بزاف (الله يبارك) رجلو و يدو مكسرة غزر فينا بدا يتبسم وشبيهم الناس هبلو كامل يضحكو بلا سبة
د.عبد الوهاب : صباح الخير ... راك مليح ؟
الطفل : لاباس حمد لله
د.عبد الوهاب : وين راهي ماماك؟
الطفل : راحت جيبلي حوايج psq لبارح كي تكسرت...جابتني قبالة لهنا ما كانش علابالنا حا تشدوني علابيها ..
د.عبد الوهاب : اه اوكي...معليه تقولي كيفاه تكسرت؟
الطفل : كنت نلعب ماتش مع صحابي ما فقتش طحت حسبتلي حاجة خفيفة حتى شفت رجلي و يدي مكسرين و بدا السطر....
د.عبد الوهاب : حاب يقول ما طحتش فور؟
الطفل: ايه....ههههه يعيطولي الڨوفريطة بسكو تكسرت واحد ال 2 مرات فهذ العام برك ....
(منال { في عقلها } : 2 خطرات فالعام!! ...علابيها شدوه فالسبيطار...)
د.عبد الوهاب : ممممم .. ومن قبل عندك سطر ولا والو؟
طفل : سي عندي يوجعوني يديا ورجليا و ظهري ساعات ...مي بلاك كي جاي ضعيف ...
د.عبد الوهاب : *يتبسم* ماتخافش مدام راك هنا حاتبرا ان شاء الله ...
خرجنا من تما فالكولوار حبس ودار لينا
د.عبد الوهاب : الاء ! واش تقولي فحالتو؟
الاء ،: اممم....تبانلي عندو هشاشة عظام c sur بسكو طاح حاجة خفيفة تكسر c pas normal !!
د.عبد الوهاب : ونتا واش تقتارحلو يوسف ؟؟
يوسف : نقدرو نمدواو دواء "كالسيتيك" و اكتونيل" باش يبرا ويولي يشرب الكالسيوم باش يولي عظمو صحيح ..
د.عبد الوهاب : منال ؟
منال : نقتارحلو تصوير بالرنين المغناطيسي !
حلوا بين ثلاثة عينهم مالشوك ...و قالي يوسف بون ايدي هكا نكونو سوور بلي ماعندوش مشاكل وحدوخرين
الاء : مي معلابالكمش بلي ماشي بالساهل باش ديروه حسبتلكم ارواح ودير ...لازم تمدي للمستشفى سبب قوي لي يخليك ديريه كاين بزاف مرضى يسحقو يديروه اذا درتيه في باطل حا ضيعي بلاصة واحد بلاك يسحقو كثر
د.عبد الوهاب سكت وما قال والو
انا تان مالقيت ما نقول
زدنا رحنا لشومبرا وحدوخرا هذ المرة لقينا عجوزة كانت مكسلة باينة مصفااارة بزاف وضعيفة ...بدا يسقسي فيها د.عبد الوهاب واشبيها...
العجوزة : ياوليدي عندي واحد الشهر نقصت فالميزان ووليت نعيا بزاف ماشي كيما كنت علابالي كبرت...بصح بزاف وليت الوقفة بسيف
ومانيش براسي راني نربي فاليتامى
ربي رزقني طفل واحد زوجتو وجابلي 3 دراري راح حضر عرس مع مرتو فالطريق دارو اكسيدون و دايم ربي ....وقبل مايروحو شغول حسو يمشو و يوصوني يايما ولادي امانة وحتى شيخي مات بكري...
يسما لازم نربيهم و مانخليهمش يحسو بالفراغ بلا والديهم...
(تغيض مسكينة ربي يقدرها )
د.عبد الوهاب : ماتخافيش يا يما يكون شوية تعب برك بصح خلينا نتاكدو برك ...
غزر فيا قالي مادموزال عبد الكريم افحصيها !
دنيت ليها و بديت نشوف النبض و التنفس قلبها شوية عيان بصح اذا صح بيها التعب سي نورمال ما هدرت والو قستلها لاطونسيون كانت حابطة شوية قلت سايي سوور لاطونسيون مع التعب هذاك هو...كي رحت نحي لاپاراي من يدها روماركيت بلي عندها طاشات حمورة
منال : خالتي هذ الطاشات منين جاوك؟
العجوزة : يا بنتي تالمون دار نجري ما شفيتش بلاك خبطت يدي ولا...
منال : بصح راهم فكل بلاص !!
زدت قلبتها بيان عندها منهم فلحمها يبانو ضربات ....
جا الدكتور عبد الوهاب وقف قدامي و بدا هو يشوف اپري بدا يتاكد من رقبتها انا تما فهمت بلي شك فواش راه فبالي ....
هذ العجوزة مسكينة واقيل عندها "اللوكيميا" وهو كونسار تاع الدم يعيطولو تان ابيضاض الدم بسكو نخاع العظام يولي يخرج كريات دم بيضاء شاذة تخرج لمجرى الدم و تأثر على الكريات الدم السليمة ....واعر ربي يعافينا
كي قلّبها هو غزر فيا و شرلي باه نسكت
قاللها :يما دوك نبعثلك فارملية ديرلك لي زاناليز و ان شاء الله ما يكون غير الخير تحبي تعيطي لكاش واحد يشدلك الدراري حتى تكملي الفحوصات؟
العجوزة : ربي يجازيك يا وليدي ...بصح ماكلاه راهم عند وليد خويا و ديجا هو لي جابني لهنا ....
د.عبد الوهاب : ايا مزية ريحي شوية دوك هكا شوية جيك الفرملية تقولك واش ديري ...
العجوزة : صحيت ربي ينورك
د.عبد الوهاب *يتبسم*: امين
خرجنا من تم وكي بعدنا شوية قالي : ايه واش رايك؟
منال: مانيش متاكدة مي تبانلي عندها لوكيميا
الاء و يوسف تشوكاو
د.عبد الوهاب : ممممم..حتى انا تبانلي هكاك دوك بلي زاناليز يبان كلش !
يوسف : مسكينة تغيض
الاء : ان شاء الله ماعندها والو
د.عبد الوهاب : انا و يوسف حا نشرفو على هذ الحالة ...و منال و الاء حاتكملو مع هذاك الطفل !
حنا : اوكي
(علاه مابين كامل الناس الاء علااه!!!!!! دوك تصرعني وزيد تكلوفي بزاف ....دارهالي سكارة واقيل وزيد كنت حابة نشوف كيفاه يكون التعامل مع واحد مريض اللوكيميا)
راح هو مع يوسف و بقيت انا مع الاء
الاء : بون نمدلو دوا ونشوفو !
هاي بدات تكلوفي
منال: دبري راسك ...
انا لي تنفحلي نديرها بلا مانكثر الهدرة
ولينا لشمبرا تاع الطفل بدات الاء تصرع فيه بالهدرة كي العادة
الاء : انا وسمني الطبيبة الاء ونتايا ؟
شحال تزوخ مزال ماولاتش طبيبة 3:
الطفل : وسمني هيثم *يتبسم*
الاء : الله يبارك اسمك شبااب ! واش من سنة تقرا؟
هيثم : نقرا فالسيام سنة الثالثة
الاء : مممم وتقرا مليح ؟
هيثم: هههه عندي مستوى متوسط
الاء : ههههه متوسط اه !!
هيثم : نتوما الطبا لي حاتشدوني؟
منال : ايه حنا حانشدوك
هيثم : *يتبسم* : ونتيا وسمك؟
راه معايا !! مالڨري ما ڨسرتش معاه كامل مسكين...
منال : اسمي منال !
هيثم : هههه اسمك بزاف شباب يفكرني فواحد الطفلة فالپريمار كانت بزاف عاقلة و حنينة ...ان شاء الله تكوني كيما هي !
الاء : ممممم كنت تحبها ؟؟
(تحبك حبة اذا هذ الهدرة تقوليها لطفل صغير)
هيثم : ههههههه لالا !! بصح كي كنت صغير كنت نطيح بزاف و كانو يعايروني صحابي بصح هي كانت جي تمدلي مشوارتها تاع فلة باه نمسح بيها حوايجي ...ههه
الاء : ممممم مالا هي تحبك ههههه
منال : خلي الطفل راه مكسر من كل جيهة ونتي تهدريلو على الحب ...
الاء : مافيها والو ڨسرة برك!
قاطعتنا يمات الطفل مع باباه دخلو بالماكلة والحوايج .... هدرت معاهم على حالتو و علاه لازم نشدوه و خرجنا باه يريحو براحتهم ...
جات لينا فرملية قاتلنا بلي يخصو شوية اطباء فقسم الاستعجالات روحو تعاونو و تنظمو الحالة حا تخرج عالسيطرة...
جريت مع الاء لتما لقيت غاشي كحل و كامل مقلقين و يحوسو طبيب المشكل مكاش النظام كامل اول حاجة لازم نشوف كل واحد على حساب خطورتو نمدلو وكتاه يجوز ....
غير رفدت لي بون...زدمو عليا كامل يعيطولي باه نجوزهم...
طبعتهم و مشيت....لازم نشد روحي... لقيت مرا كرشها توجع قاتلي كلات شيكولا قديمة مديتلها جيطو مستعجل و زدت مشيت لقيت وحد الراجل محروق ساح عليه الماء سخون مديتلو تان جيطو مستعجل ...
جا ليا شيخ يدو مفعوصة مديتلو جيطو تاع حالة عادية ...
وهي رايحة... بقيت نظّم فيهم هكا
و الاء تان كانت تعاون فيا ...
ولاخطرش هي حابسة كثرت الهدرة مع واحد ال jeune ضربها بدبزة لوجه حتى طاحت فالارض و ماكان حتى واحد من la sécurité تما ....وشفتو زاد راح باه يكمل عليها تما جريت ليه
وقتلو : حبس وشبيك مهبول وقيل؟
قالي: ايه عندي كارطة نوريهالك ؟
كي غزر فيا روماركيت عينيه حمورة وجهو مصفار وضعيف شوية ....زعمة هذ البنادم يتعاطى المخدرات !!
قالي : قتلها دخلي صاحبي قاستو طونوبيل راهي تقولي مزال ..سبيطار تاع باباها؟ ولا دخلو معارفكم برك؟
شفت صاحبو مقيوس شوية من رجلو ماشي حاجة دونجي كاين عباد راهم كثر منو ..
منال : عندها الحق! مزال رميتلو جيطو تاع حالة عادية فوجهو وقتلو اسنا دالتك خرمن تروح تشوف وين داوي صاحبك !
بدا يخسر فالهدرة jeune : @#€@#€@##@€@€€@#€@
رميتو فالثقيل وروحت باه نرفد الاء حتى تلاح عليا طبعني طحت على واحد الطابلة جرحت جبهتي...نضت نجري و عطيتو بدبزة فور للكرش خرج الرغاوي ...
حكمني من يدي فور حاب يضربني رفدتو وخبطتو على الارض ...
كتفتوا على الارض و طلعتلو اليد تاع التريكو صبتو معمر جرحات تاع التشكك (حقن)
دخلو رجال تاع la sécurité شدوه
حتى نشوف د.عبد الوهاب و يوسف جاو يجرو تان ....
د.عبد الوهاب : منال ! الاء!! واش كاين ؟
منال : شوفو الاء اذا راهي مليحة بسكو ضربها هذ الراجل للوجه بدبزة ...
راحو يجرو عندها بداو يديرولها فالثلج خرجونا من تما و كملو فبلاصتنا واحد الطبا...
حكمت دكتور عبد الوهاب قتلو: دكتور !
د.عبد الوهاب : وي؟
منال : هذاك الراجل لي ضرب الاء ...مدمن مخدرات شفت التشكك لي عندو فيديه ...
د.عبد الوهاب : اه علابيها ...اوكي مالا دوك نجي
...
خرج... وبقيت مع الاء لي كانت دايرة الثلج على وجهها باش ما يتنفخش و يوسف مريح معاها ...
شفت الساعة لقيتها 12:00 هذاك هو نروح نفطر و نريح شوية راني ديخانة شوية كي لبارح ما تعشيتش...
روحت شريت واش ناكل وطلعت للسطح .....
يتبع ...
في خاطر لي فوت نحطلكم بارت هذا ان شاء الله يعجبكم خلولي رايكم فكومنت ❤❤❤❤