#حب_عاثر
بقلم نورا ناصر
الجزء الاول.
عصريه والجو شويه حار نهاية شهر التاسع.
بالعاده احب انام الظهر.
كعدت من النوم حسيت بالحر والكهرباء الوطني طافيه باوعت اختي نايمه ولا يمها.
واحجي وياها شنو من عديمة احساس ماتحسين بالحر.
تقلبت ع الجهه الثانيه ولا حست.
تسللت من السرير بملل تمطيت ،تثائبت وطلعت من الغرفه
نزلت جوه طليت على المطبخ امي جاي تشتغل مدري شعدها.
رحت غسلت اخذت تليفوني جان ع الشحن جوه
ورجعت صعدت فوك تمددت ع الفراش اباوع للسكف البنكه تذب هوا بي حراره.
فتحت التليفون وظليت العب لعبه.
بعد دقايق دخلت امي. ..
امي. ... شسالفه ماشبعن نوم ؟؟
.. هاا ماما اني كاعده محتاجه شي ؟؟
.. كعدي اختج وتعالن ساعدني بعد شويه راح يجون عمج وعائلته ويبقون على العشا يمنه.
... ياعم منهم ؟؟
.. عمج ابو ايهاب
.. هممم
مااشي اكعدها واجي يمج.
.. لاتتأخرين انتظرج يله عندي هوايه شغل والمواعين ملت المطبخ.
... صار ماما دقايق.
طبكت ماما الباب ونزلت.
كمت من مكاني رحت كعدت على سرير اختي واكعد بيهاا.
.. ياااسه كومي كومي ولج ماتحسين بجهنم الحمرا هنا.
.. يسرى بملل وهي تتثائب .. امم شكو ولج شصاير مداهمه ؟؟
... امي محتاجتنه بالمطبخ
.. ليش شكوو حتى مصار مغرب ونكوم نسوي عشا ؟
.. لا مو بيت عمي راح يجون ويبقون ع العشا
.. اوو اكو واحد يجي بهالحررر
.. عراقيين وين يهمهم الحر اشو الظهر والدنيا تشوي يشربون جان سنگين اتوب الوادم خو مااتوب دكوووومي نازله اني.
كمت من يمها وصلت لباب الغرفه اريد اطلع اللتفتت عليها شفتها تغطت بالشرشف ورجعت نامت.
نامت عليج بلووكه مو طابوگه.
ونزلت جوه للمطبخ دخلت شفت امي استوه كعدت تلف الكبه.
شافتني اشرتلي
روحي للمواعين اضوج اشوفهن مكومات هيجي خلصي وساعديني بلف الكبه .
.. صار ماما
بلشت اغسل المواعين.
.. اختج ماصحت ؟؟
... رجعت نامت
... بهالحر ولاتحسس.
... هههه ماادري شون تنام بالحر اني بس طفت الوطني صحييت.
يسرى ... جاي تحجون عليه.
مسره ... اللتفتت عليها مخليه الخاولي على كتفها وبيدها الملابس.
مسره .. شنو مراح تجيين اساعدينه
يسرى .. اسبح واجي
ماما .. اي مثل كل مره عود شردي من الشغل.
يسرى ... رايحه اسبح واجي عود افكر اساعدكم.
مسره ..
راحت يسرى للحمام واني كملت غسل مواعين وبلشت اساعد امي بلف الكبه.
خلصنه واخيرا ويسرى لسه ماكو حلفت اله اخلي الگلي عليهاا كله تتشرد من الشغل.
الام .. روحي ماما رتبي نفسج ليجون بيت عمج.
مسره .. اي هو رايحه.
صعدت فوك يسرى جاي اصبغ اضافرها
.. هاا ولج خو شردتي من هسه اكلج عليج تكلين الكبه.
مدت لسانهااا
... عود خوش.
اخذتلي تراك وخاولي ونزلت سبحت وطلعت
رجعت صعدت فوك
يسرى ماكو يمكن الله هداها ونزلت تساعد امي
نشفت شعري.
وشلته ليفوك.
سمعت صوت الجرس.
معناهه اجوو.
طلعت من الغرفه صار بوجهي اخويه ضياء
كتله هاا اجو
.. منو هما ؟؟
.. عمي سعد
.. شمدريني جنت نايم بالاستقبال اجت امي طردتني كالت اجو خطار مدري ماافتهمت عليها
.. هههه روح كمل نومتك احسن نازله اسلم عليهم
عفته راح لغرفته ونزلت جوه.
دخلت للاستقبال الكل كاعدين
سلمت على عمي وبعدها رحت بوست عمتي ونرجس بنت عمي وصلت لايهاب ابن عمي باوعلي بنفس نظراته.
.. شونك ايهاب
... الحمدلله وبهمس كال شنو واني متبوسيني هه ؟؟
ابتسمت بخجل ووياهه عوجت شفافي ونزلت راسي رحت كعدت يم نرجس.
باوعت لامي عرفت نظراتها روحي جيبي مي.
رحت جبت مي وقدمته الهم ورجعت كعدت.
ظل يباوعلي ايهاب.
ايهاب .. اي مسره شنو اخبار الدوام.
مسره .. زين الحمدلله.
ايهاب ... شنو دخلتي علمي لو ادبي ؟؟
مسره .. علمي
ايهاب .. صدك ههههههههههههههه شون راح تدبرينها هي.
مسره .صدمني بضحكته الاستفزازيه
. ليش ماادبرهااا ؟؟!!
ايهاب .. لو رايحه ادبي احسلج يادوب تنجحين منه.
نرجس .. اي صدوك اني شكد تعبت يادوب كدرت اطلع معدل 70 انت شراح طلعين 60 هم ماتكدرين.
مسره .. قهروني بحجيهم وهبطوني دنكت راسي ومجاوبتهم واسمع صوت بابا رفعت راسي باوعتله شفت نظراته الي كلهاا حنيه.
ابو مسره .. بكل حنيه. ..
لا اني واثق من بنتي مسره ذكيه وراح تبذل كل جهدها حتى ترفع راسنه وراسهه وتوصل للي تريده.
ضحكتله من بعيد حبيبي بابا.
طلعت من الصاله مزعوجه رغم كلام بابا الي نطاني جرعة امل.
بس ايهاب خبيث.
يحب يضوجني وهالمره كلش متعمد وانطانياهه بالصميم
لان قبله سنه گلي احبج وفشلته كتله بعدنا زغار مو مال حب ويمكن نكبر وكل شي يتغير.
وشايف نفسه بس هو وبس لان هالسنه انقبل طبيه
عباله بس هو وبس.
وكفت اباب المطبخ ياسه جاي تحضر شغلات للعشا لان صار مغرب وخاف منلحك.
على حالتي ووگفتي هي ومبين على ملامحي الانزعاج.
طلع اخويه علاء من الاستقبال جان يمهم وسمع الحديث.
علاء ... شبيج ضجتي من حجي ايهاب ؟
مسره .. مااشوفه شون ضوجني يعني ميعرف يكول كلمة.تشجيع على الاقل.
علاء /... هههههه ماعليج بي شبيهن الخمسينات اشو عيشتنه عليهن سطريهن خمسينات شبيج.
مسره /... اووو خوب انت مايهمك شي بس كذلتك
عفته صعد وفتت جوه بالمطبخ ..
ياسسه/ .. ليش تهتمين لكلام ايهاب تدرين بي يحب يضوجج لأن رفضتي.
مسره /... اي بس مو هيجي يفشلني كدام اهله وهي اخته عبالها مثلها اني تواطنه.
ياسه /... هههههه يعني سووج نصبه كدام الكل ؟؟
مسره/...اوو شبيكم عليه كلكم اليوم ؟؟
يسرى/....لتهتمين خبله هذول شايفين روحهم لان ابنهم طلع طبيه.
اشش اسكتي اجت نرجس.
نرجس/.. هاا بنات اساعدكم بشي ؟؟
ياسه /.. لاخيه مخلصين روحي ارتاحي.
همست لمسره
روحي كعدي يم اهلج خلينا نحش بيكم براحتنه.
كملنه العشا وصبينا وكعدنا كلنا سوى
طول مااني اكل ايهاب عيونه عليه ويحشش شون طبيت علمي يكول مراح تنجحين وهي ايدي اكصها.
اباوع بالوجوه واضحك على ضحكهم بس بداخلي مقهوره ومعنوياتي هابطه واكول صدك شورطني.
كملنا عشا وراحوا بيت عمو وبقينه نكفكف ونعزل المطبخ.
بعد ماخلصنه صعدت فوك
يسرى نايمه ...
اخذتلي كتاب وكعدت على جربايتي ايد اقلب بصفحات الكتاب والايد الخ مخليتهه على خدي وافكر وبأذني صوت ايهاب وهو يحشش عليه.
شون هسه اروح احول ادبي باجر
صدك خاف ماادبرهااا.
واني على هالحال اندكت الباب.
فزيت من صفنتي وصحت تفضل
دخل بابا
ابتسمتله اجه كعد يمي
الاب .. ها بابا جاي تقرين ؟
مسره .. لا هيج بصراحه جاي اقلب بصفحات الكتاب شويه صعب.
الاب .. اي صعب وانت كدها بنتي شوفي اني ماريدج تنسين كلام ايهاب اليوم خلي حلقه باذنج
وذكري بي من تنجحين وتطلعين معدل يرفع الراس،
تدرين ليش لان اني واثق بيج ثقه عمياء انت بنتي الذكيه وبلا شك راح تنجحين وترفعين راسنه وشتحتاجين احنه بجانبج حتى اذا احتاجيتي مدرسين
هذا مستقبلج بابا ليش تخلينهم يأثرون عليج .
مسره .. حبيبي بابا ان شاءالله.
كمت بسته على راسه
ورجعت كعدت
باوع ليسرى طالعه گبل بالنوم وغاطه بسابع نومه
الاب .. ماعدهه قرايه اختج
مسره .. هاا بابا مادري يمكن قرت
الاب .. يلا اتركج تقرين شدي حيلج بنيتي.
مسره ... ماشي بابا تصبح على خير
وانت بخير بنتي
وطلع
بقيت اني احس نفسي جاحده بالتعبير و عن الشكر لبابا
الاب الحنون الي خلاني اتراجع عن قراري وفعلا انزرعت بذرة الامل بداخلي.
قريت وسهرت وتعبت ونجحت من الخامس العلمي بأعلى الدرجات جنت فرحان كلش هوايه
ماما سمعتني كلمه جنت ناسيه موقف ايهاب من حشش عليه واستهزأ
الام .. اي عفيه بنيتي كسرتي شوكة عينهم ونجحتي.
فرحت كلش بقى السادس.
وهم بذلت جهد كبير وقوف ماما و بابا بجانبي حفزني اقرا واتعب نفسي اكثر واكثر ..
امتحنت الوزاري وخلصنا وكعدت بالبيت انتظر النتيجة على نار
مثل الاكل الينطبخ على نار هادئه.
صراع وحاله نفسيه متنوصف حله بكوم وتحشيش ايهاب بكوم كلما يشوفني هاا وجهج اصفر اكيد ممجاوبه.
اضحك بوجهه واسكت.
بعد فترة نزلوا النتائج على الانترنيت.
خابرني ايهاب بالليل وگلي هو يطلعلي النتيجه
كعدت انتظره تأخر
نعست ونمت
كعدت ع صوتي موبايلي يرن سحبته باوعت بشاشته شفت ايهاب يتصل
جاوبته بملل واني نعسانه
... الوو
.. اكو وحده تنام ومتعرف شنو نتيجتها ؟؟
.. اووو حتى نسيت بشر شنو النتيجة ؟؟
... العصر اجي واكولج شنو
.. كمت من السرير بنشااط
لااا شنو العصر وين اصبر كول يلا حباب يلا ايهاب عفيه
.. اي توسلي بعد توسلي
.. وعليمن اتوسل هسه اخابر صديقتي وهي تنطيني النتيجة تعرف تطلعهاا
.. لعد ليش مكتيلهه من البدايه
.. غير اعتمدت عليك
... مبروك ناجحه ومعدلج 87
.. احلللف
.. ومبرووك ثانيه لان انت اول بنيه بالعائله تطلع هيج معدل.
.. يااااااي والله مصدگه اروح افرح بابا وماما يلا بااي
.. شنو ماكتيلي شراح تنطيني مكان البشاره
.. هااا عود بعدين مو هسه
.. عابتلج شكد جاحده حتى شكرا ماكو
.. الف شكر. بااااي
شمرت التليفون وظليت اكمز ع السرير على صوتي كعدت يسرى شكوو مداهمه شنوو الصار
نزلت من السرير بگمزه وصلت لسريرها گرصتها من خدودهااا وللللج ناجحه معدلي 87
كامت تگمزز ويايه فرحانه
يسري .. ولج منو گلج
.. ايهاب خابرني هسه
.. عليج النبي ماوجهتيله صفعه بالكلام ماذكرتي بالحجي الگاله عنج قبل سنتين من گلج مادبريهااا
.. لج لااا يولي اني فرحانه بالنجااح هسه ياحجي باابطيخ
طالعه ابشر ماما اني.
جانت الفرحه متنوصف نجحت بجهودي وذراعي مع وقفة ابويه وامي بجانبي رغم صعوبة الاسئله والاوضاع الصعبه.
ورغم حجي الكل الي حاولوا يهبطون من معنوياتي وكلولي مدبريهه مو بس ايهاب گلي هواي من اقاربنه.
ماما وبابا فرحتهم جانت متنوصف
وكفت بالهول
واخوتي علاء وضياء يضحكون ويحششون
وامي وابويه طايرين من الفرح
بعد فتره صار لازم اقدم على الجامعه
وايهاب هو الي كال يمليلي استمارة القبول
وعلى كولتها ليسرى هم حط روحه ايهاب !!!خابرني قبلها بيوم گال باجر جايب الانسيابيه و جاي حتى امليهاا الج
گتله ماشي.
صار يوم ثاني وأجه
كعدنا بالصاله
كعدت يمه ع القنفه
وظل يملي الانسيابيه
اباوعله يمليهه انتبهت عليه ملاها كلها كليات عاليه تقنيات
گتله
...ايهاب هي شنو خاف مايقبلوني
وكف عن الحركه ورفع راسه يباوعلي
...شنو يعني اني ماافتهم
...موو هيج بس خايفه لا ماانقبل
...دروحي انت متعرفين خليها عليه الي كدامج مو حيا الله شي والي مطلع طبيه مو ميفتهم
خوش !!!
اكرمينه بسكوتج وخليني اشوف شغلي.
عدلت كعدتي همست مغرور
باوعلي
... ايي والغرور لايگلي
ورجع يكمل كتابه
اووي عبالك بس هو راح يصير طبيب.
كملها وراح.
وبقيت انتظر القبول يطلع.
مرت فترة كلما اخابره شخبار القبول ماطلع
يتهرب.
اخر شي لحيت عليه عصب كاال اوووو قبولج طلع بتكريت كلية علوم جامعة تكريت ارتاحييتي.
انصدمت .... شنووووو ووووين بتكريت شجاي تحجي انت ايهاب شيوديني لتكريت بهالزلك صدك تحجي لو تشاقه. ؟؟!!
... اكلج شنو اشاقه قبولج طلع هناك.
... صدمتني ايهاب انت مو كلت تعرف ليش هيج يعني اني راح انشمر هالشمره ليش مو هنانه بالحله
هسه مو رواء صديقتي معدلها اقل مني انقبلت هندسه وبنفس محافظتنا.
... اكولج قابل اني الي قبلتج هناك
... لا بس انت سويت الي الانسيابيه وكتلي اعرف
....عندي اقتراح الج شنو رأيج ؟؟
... شنو ؟
... اني مبقالي بس سنتين واتخرج
بعدها مفكر اطلع خارج العراق هم اكمل دراسه وهم اطلب لجوء وبعد ماارجع.
..اي واني شكو ؟
.. اسمعي مسره شبيج خلي اكمل
... كمل
.. انت لتداومين هالسنه اكعدي وبعد تخرجي نتزوج واخذج للخارج هناك تكملين دراسه شتگوولين ؟؟
... يعني انت تعمدت تسوي كل هذا حتى تحصل عليه ... لج اسمعيني يابنت عمي اسمعيني يابنت الحلال انييي اريدج.
اشو سكتي شنو ردج تقبلين لو لا ؟؟؟
...
يتبع.
تفاعلوا انزل بعد
بس لا نايمين 🙄
#حب_عاثر
الجزء الثاني
نورا ناصر.
ايهاب .... هاا مسره شگلتي ؟؟
مسره .. هسه لازم اسده ايهاب من رخصتك
... ليش شبيج ضجتي
.. اي ضجت واريد ابقى لوحدي
... فكري بالموضوع ماشي
... الله وياك ايهاب
سديته منه وكعدت مصدومه تحسرت يعني بعد التعب والسهر والقرايه انشمر بتكريت بعيد عن اهلي
بعد ما الفرحه غمرت كل شي بيه هسه احس انسلبت مني بلحظه !!!!
حقدت على ايهاب وظليت افكر اكيد هو متعمد يسوي هيج والله حرام يربي.
طلعت من الغرفه ونزلت جوه
اهلي متجمعين بالاستقبال
عصريه وصابين جاي ويا كيك ودياكلون
دخلت عليهم بوجه حزين وكل امالي متحطمه.
الاب .. تعالي بابا ليش كاعده وحدج تعالي گعدي يمنه
تمشيت بخطوات يائسه مابيها امل والتفكير ماخذ مني جزء كبير.
كعدت بصف بابا وصبت امي الي جاي
يسرى . . شبيج شكو شكلج موطبيعيه.
بسؤال يسرى الكل انتبه عليه ضايجه ومقهوره
الاب .. شبيج بابا بيج شي
باوعت لابويه وانقهرت عليه كلش
شكد جان واكف ويايه ويتأمل بيه
هسه شون راح اكوله خطيه خاف ينقهر مايهون عليه اقهره.
غمضت عيوني تنهدت خلي اكوللهم يشاركوني ضوجتي شسوي !!
اقلها احس اني مو وحدي .
.. بابا خابر ايهاب وكال القبول مالتي طلع كلية علوم جامعة تكريت.
يسرى .. عزاا هذا شكد اثووول ايهابوو هو ميعرف خرب عليج الانسيابيه
مسره .. اي والله ظلمني بالقبول هسه شسوي.
الاب يصوب نظره باتجاه يسرى الي معجبه كلامها
عيب يابنتي ابن عمج اكبر منج ميصير هذا الكلام.
يسرى ... العفو منك بابا.
الاب .. مسره ليش ضايجه انت؟ بابا هذا مستقبلج واذا طلعلج بتكريت يعني قابل وين 5 ساعات مسافة الطريق مجرد اتصال واحنه يمج لتضوجين.
الام .. يمه بنتيتي تروح لتكريت هنا هنا تكريت انت شتكول ياابو علاء الوضع مو امان قابل مثل زمن صدام ياعيني وخاصة اذا عرفوا هسه هي من الجنوب خاف يضايقونها ؟؟
الاب .. قابل مكتوب على گصتها هي من الجنوب ياعيني ميصير شي ان شاءالله كله اربع سنوات وتتخرج وترجع هنا ناهيج عن العطل والجمع وياكثرهن.
الام .. والطريق خطر وناس متنحزر ياعيني خليها هنا احسن.
الاب .. لا هذا تعبها خليها تروح ماعليهه شي وهي وين قابل هناك اكو اقسام داخليه وان شاءالله امان وماكو شي.
علاء. ... بابا شتحجي انت هي بنيه وتروح وحدهه هناك ميصير وعمامي اكيد مراح يوافقونك الرأي والقرار
الاب .. مسره بنتي واني واثق منها ومراح اخلي تعبها يروح ع الخالي بلاش راح تروح تدرس هناك واني اتخذت قراري.
مسره .. تزاحمت الافكار براسي.
كلام ماما صحيح شون اروح وحدي وبعيدة عن اهلي ومعندي احد اعرفه هناك واني اصلا مو اجتماعيه والاوضاع مو كلش تمام !!!.
بهاللحظه وبين توهاني بالتفكير اجاني صوت من بابا وكانه قرأ افكاري
رفعت راسب و بعيوني حيره يقراها كل الي يباوعلي
الاب .. لتهتمين بنتي وزيحي اي فكره سيئه من بالج
وفكري بمستقبلج فقط.
بعدها ابدو بيت عمي معارضتهم وخاصة ايهاب بذل جهد كبير حتى يمنعني من الدوام وجاب عمامي واجه للبيت حاجو ابويه انت شون تخليهه تروح هناك والوضع مو زين وهي بنيه.
هو كللهم بانه مستفسر من اصدقائه وكايليله الوضع زين واكو طلاب وطالبات من الجنوب هناك يدرسون عادي ماكو شي.
الحجي ميخلص شون بنيه وتروح تدرس هناك وخاصة ايهاب ومن يومها ماظليت اجاوب على اتصالاته ضجت منه حييل.
بيوم الي لازم اروح لتكريت حتى نسجل
حضرت كل شي من اوراق رسميه
من الليل ونمت على وكت ورانه كعده من الصبح
قبل لاانام ظل ايهاب يتصل ويتصل
بزعت منه جاوبته
.. الو هاا ايهاب
.. شنو هاا ايهاب اشو شايله خشمج عليه درووحي مية الف وحده تتمناني افتهمتي
.. ايي متروح للمية الف وحده جاي عليه شكو
.. هاا هيج صارت موو بسيطه ؟؟
.. هسه شتريد ايهاب
.. يعني مصممه ترحين والكتلج عليه مموافقه هااه ؟؟
... ايهاب والله انت مثل اخوي
سداه بوجهي
خفه وراحه هفف نمت
كعدت ساعه 4الفجر
نزلت جوه بابا كاعد خطيه قبلي.
مسره .. صباح الخير
الاب والام .. صباح النور
الام .. وهي تمسح دمعه لمعت بعيونها وبصوت يخنگه العبره
يلا بنتي تعالي اكلي
مسره .. تقربت منها
ماما شبيج ليش صوتج مخنوگ صاير شي
الام .. بنتي الطريق خطر وخايفه عليكم
الاب .. شبيج يامره ليش تخوفين البنيه اكثر مما هي خايفه ماكو شي قل لن يصيبنا الا ماكتبه الله لنا
خليهه تروح تدرس هذا مستقبلها وثمرة تعبها.
الام ..وهي تمسح الدمع المتجمع بعيونها قبل ليوصل لوجناتها
قالت ببحة ...قلب والده شسوي بنيتي الجبيره واول فرحتي مااريدها تبتعد عني ومكان خطر وبعيد.
مسره .. اثاريج خايفه عليه حبيبتي لتخافين اروح وارجع ويايه الشهاده ومرفوعة الراس ان شاءالله
بوستها وكعدت تريكت وياهم
ماما تسويلي لگم مثل الطفله واحنا نضحك اني وبابا عليهه
خلصت وصعدت بدلت ملابسي ونزلت. شفت بابا
الاب .. يلا بابا اذا خلصتي روحي صعدي بالسياره
2
- اي بابا خلصت ماعندي شي بعد.
- ماناسيه شي
- لا ماناسيه
اللتفتت الماما بوستها على راسها وخدودها وطلعت قبل بابا صعدت بالسياره
اجه وصعد شغل السياره وتحركنه
اللتفت اباوع لـأمي تشمر الماي ورانه.
لوحت الها بيدي الى ان اختفت عن انظاري بسبب ابتعاد السياره عن البيت.
ظل يسوق بابا ونعبر محافظات حتى نوصل لتكريت
طلعت الشمس قويه واحنه ماواصلين
سمعت صوت تليفوني
طلعته من الجنطه
شفته ايهاب يتصل ردت مااجاوبه
بس ابويه سأل منو ديتصل اكيد امج دتطمن علينه
- لابابا هذا ايهاب
- جاوبي شوفي شنو يريد
- صار بابا جاوبته
الو هلو ايهاب
- ها خاتونه مسره طلعتوا مصممه ترحين هناك
انطيني عمي
تحسرت شبي هذا شكد نحس مفروض يلوم روحه خربلي الانسيابيه مو يحاسبني لان راح اداوم
انطيت التليفون لابويه
الاب .. هاا هوبي اي ان شاءالله ابني مشكور الله وياك
مسره .. واني اخذ التليفون من ايد بابا گتله شنو يريد
الاب .. يكول طلبوا نقل لمحافظتنا بلكي يقبلون.
مسره .. يعني يقبلون ؟
الاب .. نجرب والله كريم ان شاءالله يقبلون.
بعد طول طريق وصلنه لجامعة تكريت ساعه 9
قسم التسجيل بوكتها جان هوسه كلش.
طلبنه عدم ممانعة نقل وكعدنه ننتظر
باوعت مقابيلي بنات اثنين ديتعاركن بيناتهن
الي فهمته من حجيهن يردن نقل وممحصلاته
كعدت يم وحده منهم تعرفت عليها اسمها سمر ولخ رواء
اثنينهم من بغداد.
رواء تباوعلي صفح وتدور بحلگها معاجبها
ماادري شبيهه.
3
بعدها صاح عليه بابا ودخلنه نسجل
من عرفوا احنه من الحله دارونه هوايه
قدمولنه عصير وساعدونه حتى مشونه قبل اهل تكريت.
خلصنا تسجيل ورحنه سجلنه بالقسم الداخلي ورجعنه للبيت ميتين تعب وصلنه الساعه ب5العصر.
دخلنه للبيت شفت امي حجيتلها كل شي مااعرف بلا مااحجيلهه.
حجيت كل شي الها وصعدت فوك
فتحت باب الغرفه يسرى نايمه
عيطت ... ولللج رحت لتكريت ورجعت وانت لساج نايمه ناس تفرفر بالمحافظات وناس يسوقون مخدات يابخت المرتاحين اي والله.
يسرى بتملل ... اممم هي شبيج دگي الخشب
ولج كعدت تريكت وساعدت ماما بكم شغله وتغدينه ورجعت نمت.
..اي احجيلي عن الرحله شصار ماصار ؟
.. حجيت كل شي لأمي روحي اسولفلج اني تعبانه واريد اسبح وانام الطريق كلشش طويل وصد برد يعني ماارتاحينه رأسا رجعنه كلش تعبت.
... اووو اني ولااخلي ايهابو يسوي الانسيابيه لو ينطط لاهو ولااي غبي من بيت عمي يسويها.
... دنجحي من الرابع هسه انت كاضيتها نوم ويلا رايحه اسبح
... اني رايحه انزل جوه اسلم على بابا.
مشت الايام وبدأ الدوام وبديت احزم جنطي حتى نسافر قبلها حضرتلي ماما كلشي من ملابس من اكل وقلقه شلون راح اداوم واني مو اجتماعيه اصلا وفوكاهه بغير محافظه والوضع مو امان
كلما اخلي راسي ع المخده يزيد التفكير واغمض واگول الله كريم.
قبلها بليله جنت بغرفتي وامي يمي ويسرى وجاي احضر الاغراض وعيوني حمر دم بس ابجي شون راح افارگ اهلي.
طب ضياء .. هاا محزمين ان شاءالله باجر خاف تطلعين من الفجر واني نايم ماشوفج عود سلميني على روحج.
مسره .. اني بيا حال وانت جاي تحشش
امي زادت بالبجي
الام .. باجر اروح وياكم اني مافاركج
مسره .. ماما حبيبي خاف اتعبين الطريق طويل
يسرى .. خليهه تروح تطمن عليج.
ثاني يوم الصبح الساعه 5الفجر طلعنه من الحله اخذوني اهلي ورحنه بسيارة ابويه.
طول الطريق لازمه ايد امي وافكر واباوع للطريق
اكول شون راح اعيش بعيد عن اهلي شون راح يمضي الوقت.
4سنوات مو قليله شون راح تمر وشون راح اعيش هناك اسئله محتاجه اجابه والايام كفيله بالاجابه عنهااا
بعد طول الطريق وصلنه لجامعة تكريت وللاقسام الداخليه.
دخلنه للاداره واكو مشرفات اخذنه اني وماما ويفرون بينه بالغرف واني كوه حابسه دموعي
واباوع للمكان وانتبهت للغرف
اكو غرف مونظيفه
واشكال البنات
لحد ما وصلنه لغرفه
كالت المشرفه انت هنا حيكون مكانج ويا هذول البنات.
دخلنه اني وماما وسلمنه على البنات ورحبوا بينه جان عددهن ثلاثه بنات واني صرت الرابعه
بعد ماكعدنا وياهن تعرفنا عليهم اثنين من ديالى ووحده من الحله
وامي ارتاحت لان اكو وحده ويايه من الحله
وبقت توصي بيهم عليه.
مر الوقت بسرعه وحان الوقت لحتى اودع امي
حضنتها وبجيت وعدتها ارجع واني رافعه راسي وراسهم
طلعت سلمت على ابويه وودعتهم بالدموع وراحوا ورجعت اني للغرفه.
امشي وامسح دموعي
بقت ابالي امي ودموعها اول مره ابتعد عنها
دعيت الله تخلص السنوات الاربعه على خير.
دخلت للغرفه جانت جبيره وبيها اسره على عددنا وميز طعام. كعدت ويا البنات انطني لوكر ورتبن غراضي وياي وكعدنه تغدينه وراهه نمت لان الطريق متعب
كعدت من النوم رحت اريد اغسل شفت سره على الحمامات ضجت كلش شون وضعيه هذه.
لحد ما وصلي السره غسلت ورجعت للغرفه.
بيومهااا تعرفت على وحده اسمهاا نور نفس قسمي بس مرحله ثانيه.
كالت باجر امشي ويايه لان انت جديده اكيد راح تحتاجيني.
كتلهه اي والله جنت محتاره شلون راح اروح وحدي
كالت معليج باجر بدلي ونطلع سوه.
4
اول مادخلنه للكليه طلاب هواي وهوسه واني مامتعوده وماعندي صديقه ولااعرف احد بقيت مثل التايهه واحس بغربه فضيعه
امشي وباوع بالوجوه
وصلنه لحد قاعة المرحله الاولى
نور عرفتني ع بنيه من سامراء من نفس قسمي
ماتعمقت هوايه وياها بالكلام.
لان شفتها انفه شويه اللتزمت الصمت.
دخلت القاعه كعدت اول ستول
وكان الدكتور يشرح
خلصت المحاضره
اجه واحد كالي لاتكعدين هين هذا مكاني
اني بقيت هنانه صافنه مدري اضحك مدري ابجي شنو هذوله وشلون راح اعيش احنه وين بمدرسه وكل واحد رحلته
ماجاوبته
رحت سجلت مباشره وطلعت.
جاي امشي شفت سمر ورواء الي تعرفت عليهم من جيت اسجل
تقربت منهم وسلمت عليهم
كوه سلمن ما اعرف ليش جانت البنات كلهه مستوحشه مشيت وياهن كمت اروح وارجع وياهن وهن نفس القسم وياي اني جنت غرفه 8 وهن 11 شوي علاقتي قوت بيهه ونقره ونكعد نسولف سوه بس بعدني ابجي ع اهلي وعلى امي.
وهي همات تبجي عليه كلما نتخابر.
رجعت للقسم الداخلي
البنات الي وياي بالغرفه ما ارتاحيت وياهن علاقات وولد وحتى وهنه على الاكل يخابرن وحجي موحلو انام وهن يبقن للصبح كل وحده تخابر بجهه ومرات يسون سهره ويجيبن بنات من غير غرفه يحجن ع الولد الي وياهن لويركصن ويغنن ومااكدر لاانام ولااقرا
متت خوف كمت حتى اخاف انام خاف يصورني لان عدهن موبايلات كاميرا فبقيت ممرتاحه والدمع مافارگ عيني واني من نوع وهواسيه وبس افكر وعلى اي يصيبني القلق.
بالكليه جانو دائما يجون طلاب من الحله يسالون عليه اذا محتاجه شي ويكولولي احنه هنا اي شي تحتاجي بس گولي.
ومن ضمنهم طالب اسمه رائد من غير كليه اجاني فد يوم
كال عدنه خط ننزل بي للحله اذا تحبين تروحين ويانه
.. لا شكرا بابا يجيني
...اوك براحتج زين انت ويامن كاعده ؟؟
... وي رنا ووداد
...بس والي اعرفه عنهم موخوش بنات حاولي تغيرين غرفتج
.... ماشي راح احاول شكرا الك مقصرت.
عفته ورجعت كملت محاضرات واني افكر بكلامه وصدك اني ممرتاحه وياهم ابد
ومن رجعت طلبت من المشرفات اغير مكاني واختاريت اكعد ويا سمر ورواء. واكو وياي اثنين من ديالى و من بلد وارتاحيت وياهم وكلنه نفس القسم ويصحولنه الغرفه المثاليه من النظافه والاخلاق والجمال.
5
جانت ويايه بنيه اسمهه رونق مرحله ثانيه هندسه بس تجي تكعد يمي هي وبنات غرفتهه ويسولفن وياي وتقريبا صرنه صديقات
فد يوم اجوي يمنه للغرفه وكعدن يسولفن ويا رواء وسمر
رونق ... تدرن اليوم منو زحفلي ؟؟
البنات ... منو ولج
رونق .. سامر
زمن ... ايييع هو هذا شكول يزحف وجهه جنه راس كرك
زمن .. لعد منو تريدي يزحف خما انمار يزحف يحضي
رونق .. ولج هذا غزال ومايصيدونه
رواء ... منو هو انمار هذا ؟؟
رونق ... ولد ويانه شلون حلو وشخصيه ورزن.
مسره .. جنت اسمعهم يحجون عنه بس مخليت ابالي وياهن هيج مجرد كلام عابر ودخل اذني.
فمره كاعده اني ورواء وسمر جنت مدنگه اكتب
سمعت صوت جهوري مميز فز گلبي من مكانه لنبرته ولهجته سمعته يگول
... يوولي عمر اذا بدت المحاضره خبرني
ظليت اردد كلماته بلساني اول مره اسمع هيج لهجه غريبه عليه.
وكع القلم من ايدي وظليت اتلفت وادور صاحب هذا الصوت ......
يتبع.
اختصرت هواي حتى اظهر الكم البطل وتبدون الزحف عدل 😍😂
نورا ناصر
#حب عاثر
رفعت راسي شفت واحد سبحان الله مو بس جمال وانما هيبه ووقار وطول
مخلي ايدي بجيبه ولابس قميص ابيض وبنطرون اسود وتقريبا البنات كلهه تباوعله ومهتمتله.
صدك جذاب
شفته لمحني بنظرات عيونه العسليه خجلت حيل ودنگت ع القلم اتناوشه اخفي خجلي وحيائي .
بهاي الاثناء اجتي رونق وزمن
رونق وبصوت ناصي ... هذا هو انمار الي كتلكم عليه
رواء ...عمي يخبل ماتنلامون بي
رونق .. كلش غامض يداوم 3 ايام بلاسبوع وهو طالب ماستر مرحله اولى
رواء تخبلت عليه وبقت تباوعله.
الى ان اختفى هو واصدقائه.
من هاللحظه الي شفته بيها بقت ابالي صورته مجنت اهتم لم جانت تحجي عنه رونق بس هسه لا الوضع اختلف بعد ماشفته وصدك شكله يسحر
مشيته طوله رزانته وثقله وكلشي بي.
كملنه محاضرات ورجعنه للقسم
تغدينه وارتاحينه ونمت
العصر جتي يمنه رونق وزمن وكعدنه نكرز حب.
ونسولف ودائما الحديث يتخلله كلام عن انمار.
مر اسبوعين على الدوام
حضرت اغراضي وكعدت انتظر بابا يجي عليه.
خابرني گلي وصلت.
اخذت جنطي ودعت البنات ونزلت.
وصلت لبابا شكد فرحت بشوفته بوسته باسني على راسي.
مسره .. شلونك بابا مشتاقتلك
الاب ... هلا غزالتي هي شون صايره تخبلين
مسره .. ههههه يعني على فراككم اصير اخبل معقووله
الاب .. انت دائما حلوه وتخبلين ويلا صعدي بالسياره خلي نروح امج كل شوي تتصل.
مسره ...
وصلت للبيت الظهر اول مادخلت رحت حضنت ماما وبوستها ويسرى
هاا شعجب مانايمه
يسرى .. ولج دنتظرج مشتاقين حيل
ضياء ... هاا وصلت غزالة البابا
ولج خبلونه بيج اليوم راح يسوولج حفله
علاء .. اي لدرجة عازمين حتى هووبي اليوم ع العشا
مسره .. لااصدك والله عازمينه ليش يابه.
الام .. هم عزموا روحهم ويردون يجون
روحي ارتاحي ماما حتى اصبلج اكل تاكلين
مسره .. ماما شكد مشتهيه كبة البرغل مالتج اويييلي
الام .. سويتلج كوومه حتى تاخذيها وياج من ترحين
يسرى .. اي ولج طااح حظي واني اللفها ويا امي
ضياء .. اي حل بيج 24ساعه نايمه لاشغله ولامشغله
يسرى .. بابا شوفه هو البدا تره
مسره .. ههههههههههههههه شكد مشتاقه لمناكركم.
صعدت فوك بدلت ونمت
كعدت على حس يسرى تگعدني
يسرى .. ولج گومي اجو عيالج وتصفك بيديهه
كمت وبعيوني مغوشه لهسه تعبانه ومشبعانه نوم
مسره. . منووو ؟؟
يسرى .. عمتج ورجلج وواأا حماج.
مسره .. عزا العزاج شوكت صاروا عيالي يخسووون
وبعدين تعاي اگوولج شو من گلتي حماج مدري شونها لو كايله اسمه جان شون لفظتيها بلله
يسرى ... شتقصدين مجاي افهم ؟
مسره .. تره اعرف من النظرات الي بينج وبين اياد
يسرى .. عدلت كعدتها توردت ولمعت بعيونها نظرة قهر وتقربت من مسره
مسره اكولج شي
مسره .. كولي
يسرى ... باعي اياد قبل فتره خابرني اياد وظلينه نحجي
مسره .. ولج دائما يخابرج وتحجون
يسرى .. اي دائما بس اخر فتره كطعت منه
مسره ... ليش شنو الي تغير
يسرى ... اياد يگول ايهاب كايل اله اذا مسره متقبل بيه انسى تتزوج يسرى !!
مسره ... اووو ويا هالايهاب شون بالله
حبيبتي ياسه بعدج زغيره وانت تدرين بابا مايزوجنه اله نتخرج يلا منا لذاك الوقت الله كريم.
يسرى .. اي واني ماريد ابني سعادتي على حساب سعادتج وادري بي ايهاب اذاج وانت ماتحبي لذلك خصمتها ويا وتركته حتى يراسل ماجاوبه.
ويلا خلص الحكيي هههه اجو خلي انزل اساعد امي.
نزلت يسره وبقيت دقايق بالفراش افكر هذا مراح يفك مني ايهاب.
هناك ويجي على بالي انمار والزم گلبي معقوله حبيته مديروح من بالي.
نزلت من فوك ورحت اغسل
توجهت للمغسله فتحت الحنفيه ودااغسل وجهي
حسيت نضربت بكتفي واجاني صووت
.. هااا ولج اشو مانزلتي تسلمين شنو صرنا كخه لو رحتي لتكريت وتكبرتي
.. دخيلك ايهاب وين رايحه اني قابل لمدريد هياتهه تكريت
.. سلمي قبل لاتمدين لسانج شطوله
.. شلونك ايهاب شخبارك هو انت اطيتني فرصه اسلم
.. انت شونج شخبار الدراسه هناك مرتاحه
... الحمدلله. ..
خلصت تغسيل وايهاب طب جوه اريد اروح للاستقبال اسلم ع الباقيين شفت يسرى واياد واكفين يم الدرج والحجي بينهم همس والنظرات تحجي حب دفين تذكرت الي كالته الي قبل شويه انقهرت كلش دخلت للاستقبال صار مقابيلي ايهاب تحسرت بقهر
ورحت سلمت.
خلص اليوم عادي.
وخلصت الاجازه ورحت لتكريت مره ثانيه
يوم ثاني داومت وجنه كاعدين بالكليه اني وسمر وورواء.
اجت بنيه اسمها ياسمين كالت ممكن شويه
مسره .. تفضلي
ياسمين.. اذا ممكن على انفراد
مسره .. باوعت للبنات وهنه همات باوعلي باستغراب ورحت وياهه.
وصلنه لمكان قريب من مكان صديقاتي.
ياسمين .. اكولج مسره وليد معجب بيج وحاب يتواصل وياج اذا ممكن رقمج
مسره. . وليد منو
اشرت عليه واكف بمكان قريب علينه
باوعتله عرفته ولد بالمرحله الثالثه نفس قسمنا دائما اشوفه يباوعلي ومرات يتبعني.
اني مو من طبعي ارزل او اهين احد جدا هادئه كتلها اسفه اني مو مال هيج سوالف
.
عفتها ورجعت لصديقاتي وحجيت الهم االي راده مني وليد.
بعد رفضي اله ظل يباوعلي بنظرات ناريه يريد يفترسني واكثر الاوقات يجي يشمر بالحجي ويستفزني ويحجي على اهل الجنوب وكلامه طائفي بغيض يغث
رديته وسكت ...
رجعت للاقسام بعد يوم حافل
بالليل اتصل بيه ايهاب من فتره منقطع ميخابر اشو هم رجع يتصل حاجيته على كد الكلام وسديته منه هو مل وسداه لان الحديث جان ممل.
يوم ثاني كعدنه الصبح
وكالعاده سره ع الحمامات والطباخات لحد منخلص
تريكنه وغسلت ورحت بدلت لبست تنوره سوده وقميص اوف وايت وشال اسود بي ورد احمر
خطيت عيوني بالكحل وهنه ملونه مائله للون الاخضر والكحل برزهن اكثر
طلعت للدوام وهمات شفت وليد ونظراته تخوف وبيهه نوع من التوعد خوفني كلش
لدرجة ابتعدت عنه لان توترت من نظراته
ظلينه ندور على مكان لان
وين مااروح هوسه وضجه
ابتعدنا عن الهوسه اني وسمر ورواء
حسيت سمر ضربتني بخاصرتي بيدهه
سمر .. لج باعي هذا منو
رواء ... كازنوفا زمانه جاي لكليتنه ياا شعجب.!!
مسره ..
باوعتله شفته واكف ولابس تيشيرت نيلي وبنطرون نيلي ولازم سويج مال سياره
اللتقت نظراتي وي نظرات عيونه الحاده وضوه الشمس يطخ بعيونه برز لونهن العسلي وظليت اباوعله من بعيد اقترب واني مصوبه عيوني نحوه اكو اثر يم عينه فد شي مميز معرفته شنو بقيت اترقب ملامحه حنطاوي البشره وشعره عالي طويل وجسمه متناسق وي طوله
اقترب اكثر من عدنه وظل يباوعلي خجلت من نظراته كلش دنكت واحس اكو شي جواي يريده
مردت اللحظات هذه تنتهي ابد اريد ابقى اباوع على هيج لوحه حلوه بس تاخرنا وصار لازم اروح
بعدها الدنيا غيمت شتا والسما من الغيم عبالك ليل
ظلينه نمشي ونسولف بانمار اني اسولف وقلبي يريدني ارجع اباوعله.
وبينما احنا على هالحال وكفلنه وليد بنص الشارع وظل يباوعلي وكال بتهديد
..شوفي اذا ماتجين بارادتج اجيبج غصبا عنج افتهمتي
اني بوقتها خفت كلش اريد اختل ورا سمر ورواء
سمر .. شبيك انت ماتستحي شرايد من البنيه.
وليد .. انت معليج اسكتي الكلام موجه الج انا كتلج اذا ماتجين بارادتج ماتعرفين شسوي.
وراح وبقيت خايفه وظليت ابجي بالشارع وارجف
رواء .. لج سكتي يولي بس حجي كل شي مايسوي
مسره .. خايفه اريد اروح عفيه خلينه نسرع
سمر .. يلا امشي.
رجعت للقسم وبس افكر وخايفه كعدت ع السرير والبنات يمي
.. هذا شون ويا بس گليلي شرايد مني ساعه يحجي حجي طائفي وساعه يريد علاقه مااجاي يستوعب عقلي.
سمر .. تردين نشتكي عليه ؟؟
مسره ..لا لا اني هنا غريبه خايفه منه كللش،
رواء .. اذا ظلين خايفه راح يتمادى خلي نشتكي عليه مسره .. لا مااريد اني رايحه اخابر امي احجي وياها
سمر .. لاتخوفيها عليج حبيبتي
مسره .. لا بس اسمع صوتها احس بالامان
خابرت امي حاجيتها بس ماكتلهه لايظل بالها رغم ممرتاحه واني متعوده احجيلها كل شي
يوم ثاني ماداومت ورراها جمعه وسبت
والاحد داومت بس مشفت وليد بالبدايه علما خلصت محاضرات ورجعنه للاقسام
العصر طلعنا اني وسمر من الاقسام حتى نسوك من محل خارج الجامعه بس قريب عليهااا
ع الشارع دائما نروحله
رحنه اني وسمر
و الوضع مو كلش تمام
سيارات الجيش وسوات منتشره على طول الطريق.
واني الخوف دائما متملكني كلما تفوت سياره گلبي ينقبض.
- يلا سمر عجلي شوي
- لج عليمن مستعجله دشوفي الجو شون حلو احسن من خنگة الاقسام خلينا نتمشى نشم هوا لاحكين ع الحبس.
- مدتشوفين الوضع شلون مينحزر
- اووو شكد جبانه وخوافه انت.
بينما دنمشي ونحجي وكفت سياره بصفي خلتني اتراجع خطوتين للخلف وكفت اباوع شبي هذا خبل ميوكف اله بهالمكان من زين مادعمني
وبهاللحظه الي جنت دافكر بيها نزل منهاا وليد
كال
- اكلج شنو اني مضحكه تواعديني وتبيعين ثگل
-مسره ... بصدمه ،،، عزا العزاك شوكت واعدتك شنو من لزگه انت
- اصعدين لا والخلقج ماتلومين اله روحج.
- بالله شسوي ؟؟!!جاي اكولك فككك عني موعييب علييك
سمر .. وليد شبيك تخبلت انت صدك ماعندك احساس دعوفهه للبنت ماتريد لزگه خو مو لزكه
وليد ...متجاهلا كلام سمر تقرب خطوات وكف گبالي كال
- اتصعدين هسه لو اهد عليج الولد واخليهم ينهشون لحمج نهش وانت غريبه وتدرين بروحج مالج احد هنا - اسمع اذا ماتعوفني بحالي والله اشتكي عليك.
سمر .. شنو هي هيته تهد عليهاا دمشي مسره امشي هذا فد واحد زعطوط.
وليد .. انت اسكتي لايلوحج طشار.
واحنه دنحجي وكفت سياره مال جيش ونزل منها واحد
كال الوليد... شكووو واكفين بنص الشارع
رفعت راسي عليه وانصدمت شفته هو نفسه انمار اجت عيني بعينه
باوعت لملابسه ملابس عسكريه ونجماته مال نقيب
جاوبه وليد باستهزاء .. هي حبيبتي زعلانه وجاي اريد اراضيهه واوصلهه
ويضحك !!
اني هنا دم مبقه بيه كلش خجلت تمنيت الكاع تنشگ وتبلعني وطكيت بجي حطيت عيني بعينه وظليت احجي وابجي واشر عليه بيدي
كلتله والله جذااااب اني ماعندي شي ويا هو يوميه ديهددني ويتعرضلي.
اللتفت أنمار لوليد گاله
- ولك ماتستحي غيره سززز ماعندك خوات ماعندك عرض تخاف عليه جاي تتحرش ببنات العالم
امشي منا لااخليهم يسحلوك ويدوسون ببطنك وعلى راسك يلا ولي منا واخلي اهلك يحتارون وين يلكوك اله اخليك تخيس بسجون.
وليد الجبان رأسا صعد بالسياره حركها وراح
بقيت اني امسح بدموعي
اللتفت عليه انمار يباوعلي عاگد حواجبه
گال ... عيب وگفتج هنا انت بنيه.
يتبع.
نورا ناصر
اني اعرف الحله من الوسط لكن بالبدايه ماحبت صاحبة القصه نفصح عن محافظتها لكن بدون قصد مني كتبت الحله
#حب_عاثر
بارت 4
نورا ناصر
كمل كلامه ..
يعني لو مااني اجيت جان نهشوو لحمج وتاكدي اني مو دائما منقذ الج
اني متت بقهري وظليت ادعي على وليد بقلبي
الله لايوفقك ياوليد الكلب.
وهذا مدري شبي انهد عليه
مكدرت اسكت بعد ان احرجني جاوبته ..
واني امسح دموعي بقهر
علئ كيفك سوبرمان اني انقذ نفسي بنفسي ممحتاجه مساعدتك واني مجنت ناطيته مجال وهي داجاوبه ومساكتتله وجودي هنا لان اني بحاجه لهالشي وميحتاج ابررلك شداسوي هنا.
جاوبني بتحدي .. نشوف سوبرمان شيسوي ومن كم موقف ينقذج ؟؟
دخل السياره وراح وهو مزعوج ..
يمكن لان رديته مااعرف الكلمات شلون طلعت مني بس حسيت نفسي بموقف لااحسد عليه موقف يمس سمعتي واخلاقي.
بعد كلام وليد عني بقيت اغلي وأكل بروحي
سمر.. اكولج شو سوبرمان هذا مايطير ؟
... لا يطير بس نااصي ديله هسه وكتج امشي بسرعه لج كلبي حيوكف من الخوف خلينا نخلص مسواك ونرجع بسرعه .
... لج شنو بسرعه موتخبليني خليني على راحتي
.. ولج مشفتي الي صار هسه وكبال عينج ليروح يجي هذا القرد مره ثانيه.
.. بعد مو طرده النقيب بعد ميجي.
استمرينه نمشي وصلنه
للمحل وفتنه جوه وبدينا نتسوك.
خلصنا ورجعنا.
بقيت كاعده ع السرير ومجان اكو احد بالغرفه بس سمر وجاي ترتب المسواك
اما اني كاعده واتأمل احس انمار مقابيلي لسه صورته بخيالي وكلماته تعبث بمشاعري حتى وان لم تكن غزل
وصياحه ورزالته لوليد طبعت بمسامعي واسمعها تتكرر كل شويه
واضحك ...
اللتفتت سمر عليه
سمر .. شبيج تضحكين لوحدج تخبلتي ؟
مسره ... لا بس الموقف ضحكني مال اليوم
سمر .. لعد شبيج ذاك اليوم جنتي ترجفين من الخوف بذاك الموقف وهذا تضحكين لو لان النقيب تدخل ونقذج.
مسره .. هه لا لج مو هيج
سمر ... هاا علينه لج انت عاشگه
وظلت تغنيلي
حايره والشوگ بين عيونج
خاايفه تحبين ويلومونج.
دخلت رواء ... شكو شو تغنين
سمر .. لج اسكتي شون موقف فاتج
رواء. ..تحجين لو شون.
سمر .. اليوم النقيب نقذ مسره من فد موقف
رواء .. النقيب منو
مسره .. فزيت من الصفنه الطاكتهه وتحركت ليكدام اكولج صدك شون نقيب شون طالب ماستر
سمر .. خاف يشتغل جاسوس بالكليه مثل فلم الباشا تلميذ
مسره .. هههه
رواء ... ماتحجون شبيكم
سمر .. انمار طالب الماستر بكلية الهندسه .. وحجينالهه الموقف
مسره .. اكلج هو شون شافنه مو جانت سيارة الجيش الصاعد بيها جاي تمشي بالشارع يعني ليش نزل من شافنه
رواء .. عادي يمكن انتبه على وليد جاي يهدد ونزل
مسره .. وين سمعه وهو بالسياره
سمر .. لا هو من شاف مسره وكف لان اني شايفته اكثر من مره عينه عليها
مسره ..
كلمات سمر داعبت روحي وبقيت متسائله معقوله يباوع الي من دون البنات.
رواء .. بعصبيه ..وانتن ليش ماكلتن طالعات للمحل
سمر .. هذا ضجتي لان فاتج الموقف
رواء .. لاع جنت محتاجه شغلات وانتن حتى ماتحجن من تطلعن.
سمر .. انت ماادري وين رحتي تسكعين خليناج ورحنه.
بعدها رواء سوت الها زعله وظلت تباوعلي بطرف عينها حسيت بغيرتها.
بقلبي اكول تهي بهي شكد زعطوطه هي هو شنو صار بينه حتى تغار.
بعدها اتصلت بامي وكتلها علي صار ماكدر اخبي اكثر يصير مايصير هي عدها علم
امي حذرتني وكالت احذري بنتي ولاتحجين ويا اي واحد بعد ابتعدي عن الكل واهتمي بس بدراستج
واصبري بس هالسنه والسنه الجايه انقلج.
سديته منها وكعدت وحدي ضايجه وافكر بانمار هسه شكال عني معقوله اخذ نظره سيئه عليه بعد كلام وليد الي كاله اليوم ؟!!
دمعت عيوني وبجيت واحس خايفه ومااكدر اكمل بس شسوي كله من ايهاب الخربطلي كل شي.
لحظات وياخذني الشوق لأهلي ولصديقاتي بالحله واستمر بالبجي رغم قبل شويه جنت اضحك
وظليت افكر بالايام الجايه وخايفه من ردة فعل وليد بعد هاليوم خاف هم يتعرض الي او يأذيني.
اريد اطلع اغسل ملابس شفت نعالي ماكو هذا نعالي الكل يلبسه ويفتر بين الغرف مبقت وحده ماللبسته ماادري شنو عاجبهم منه لا ويلبسنه ويوكعن ويرجعن يلبسنه مايتوبن.
غسلت ملابس وخلصت رحت اشرهم سمر جانت كاعده ع الدرج دتقرا.
شافتني اجت يمي
بعدها مواصله الي جان تكولي اكولج مسره اشوو رواء ...
هي كالت هيج وجان تزحلك وتوكع وكعه من هي التمام جيت اكومها شفتها لابسه نعالي اليزلك خربت ضحك عليها
سمر .. ابدال لاتضحكين تعالي كوميني.
رحت اكومها واني اضحك
سمر .. هي رواء شورت بيه
مسره .. لج جم مره وكعتي بهذا النعال وترجعين تلبسينه
سمر .. ولج مريح كلش ولااتوب منه
مسره .. كومتها .. اي شنو ردتي تكولين عن رواء؟ ؟
سمر .. اشو شايله خشمها وتباوع صفح
مسره .. خاف زعلت خلي اروح اراضيهه
سمر .. لا هي ترضا وحدها
مسره ..
بعدها دخلنه للغرفه وجتي يمنه رونق وزمن ورواء خلينه دبس وراشي وكعدنه ناكل ونحش بفلان وعلان وفلانه وعلانه
وحجينه عن انمار والموقف الصار بينه
رواء شويه فكت طنكورتها ورجعت طبيعيه.
مرت الايام
وانمار نادرا اشوفه واكثر الاوقات اشوفه بكليتنه ونتواصل بالنظرات يباوعلي واباوعله
رواء جانت تتخبل من تشوفه يباوعلي
وتتعارك وياي على اتفه الاسباب.
مرت الايام البعدها ماشفته وظلت روحي تدور علي بكليتنه.
وبينما كاعدين وحدنه اني وسمر وتذكرت انمار ظلت عيوني تدور عليه صار فتره ماشفته
مسره .. سمر ماكو انمار هالايام ؟؟!!
سمر .. مو رونق كالت هو يداوم بالجيش يعني وهنا 3ايام بالاسبوع بس
مسره .. اجت رواء لاتسمعنه نحجي عنه نوب تسويلهه عركه مالي خلكها
سمر .. شعليج منها
مسره .. اششش
رواء .. هاا من اجيت سكتوا
سمر .. ماكو شي خلصنه كلامنه شنو قابل نعيده.
رواء .. هممم اكولكم اشو النقيب انمار ماكو
سمر .. اوو هسه جنه بسيرته
رواء وهي تنقل نظراتها بين سمر ومسره ... لعد اشو ماحجيتوا كدامي.
سمر .. مو گنالج خلصنا كلامنا
رواء .. لاانتم ماتريدوني احجي وياكم لذلك اترخص
كامت رواء وبقينه احنه
مسره .. هسه اله تحجين
سمر .. ختولي هسه ليش مهتمه زايد انت.
مشت الايام بسرعه وقليل اشوف انمار.
اجت نصف السنه وامتحنت ونزلت لأهلي
اسبوعين وخلصت العطله
ورجعت داومت ...
ومرت فترة وماشفت انمار
مره گاعدين بالكليه اني وسمر و رواء وصديقتنه عبير
سمر .. مااعدنه محاضرات شنو رأيكم نروح لرونق بكلية الهندسه
كلنا كلنه يلا
مشينه وجانت هوسه
بينما دانمشي دك تليفوني داطلعه من الجنطه
سبقوني البنات وصارن كدامي واني وراهن
طلعته من الجنطه شفت امي تتصل
اريد اجاوب واني مخبوصه ويا التليفون و مامنتبهه ماحسيت غير بضربه قويه بولد وكع موبايلي من ايدي وكتبي البيدي
شلت راسي انصدمت انمار!!!
شنوهاي الصدفه
حجيت بقلبي المواقف الغبيه ماتجي غير وياك
بتوتر كتله اسفه
بحديه كال انتبهي على طريقج
وحتى ماكلف نفسه وشال التليفون وراح
ظليت اباوع لخطواته وهو يبتعد شكد مغرور ندري بيك نقيب بس موهيج تتكبر تذكرت اخر موقف بينه كلت يمكن ماخذ عليه نظره موزينه ضجت كللش
شفته اللتفت الي
دنكت الم كتبي الوكعت وتليفوني
طفا فكرت بامي هسه تقلق عليه
كرفصت بالكاع افتح التليفون وبيدي كتبي
رفعت راسي وعيوني تدوره لگيته واكف مكان قريب يباوعلي ويمه ولد نفسه رائد الي من الحله دائما يسأل عني.
رجعت لتليفوني
دكيت رقم امي خابرتها حجيت وياها
.. ليش انطفا تليفونج خو مااكو شي يمه مسره بيج شي
.. لا ماما ماكو شي بس وكع من ايدي التليفون
وبينما دااحجي ويا ماما جتي سمر
.. هي انت هنا واحنه ندور عليج
اشرتلها داحجي ويا ماما
بقت واكفه يمي
ختمتها ويا امي
سمر .. تعالي البنات هناك كاعدين بس انت شبيج مخبوصه هيجي
مسره .. شون موقف غبي تعرضتله
سمر غمزتلي اكيد الموقف بي انمار
مسره .. ولج اي هذا هو مقابيلي ديباوع ولج مااريد اشوفه خلينه نروح
سمر .. معقوله ماتردين تشوفي ؟؟؟!!
مسره .. بعد هالموقف اييي.
ابتعدنا ورحنه يم رونق.
ومن رجعنا للقسم سولفت لسمر
سمر .. ههههه يگولج انتبهي لطريقج يقصد انت ثوله
مسره .. صدك والله هيج يقصد ؟؟
سمر .. ماكو غيرها
مسره .. اوووف شهالمواقف الي تجيبه بطريقي
سمر .. انه القدر يااختاه.
مرت الايام عاديه ومرات اشوف انمار بكليتنه وعينه عليه.
بيوم جان عدنه امتحان وجنت كاعده وحدي انتظر سمر شفت انمار من بعيد وديمشي دنكت
رفعت راسي استرق النظر اله شفته اجه باتجاهي كلبي صارت دكاته الف وكلما اشوفه يقترب مني اتوتر بالزايد ياااا هذا اجه يمي حاولت احافظ على اتزاني
بس گلبي يرجف.
اجه يمي اني بقيت كاعده هو استقر واكف
سلم گال ممكن دقيقتين من وقتج ؟؟
اني بقيت محتاره ساعه ادنك ساعه ارفع راسي اباوعله.
بتوتر گتله اي تفضل !!
وهو واكف منتجي واني بقيت كاعده احاول احافظ على ماتبقى من اتزاني وقوتي.
انمار .. اني مااحب اللف وادور اريد احجي بصراحه وياج انت معجب بيج من اول ماشفتج وبعدها صار موقف الولد الي اسمه وليد و سألت عليج هوايه والكل يشهد باخلاقج
من الاخير اكولج انت عجبتيني واريد اتقدملج توافقين ؟؟ !!!
مسره ..
صدمني بكلامه وبجرئته اكثر انصدمت احتاريت شنو اجاوب عركت توترت احس كلبي يريد يطلع من صدري واحتاريت شنو اجاوبه
بتلعثم كتله اني مااعرف يمكن اهلي ماينطون محافظات
ابتسم كال يعني انت موافقة ؟!!!
يتبع
وينهم جماعة ماما غطيني ودزيلي صورتج وانطيني رقمج وفيسج 😅خلي يتعلمون من ابن الفلوجه لالف ولادوران راسا يريد يتقدم ❤
وطبعا اسفه ع التاخير النت ضعيف وبنتي خبلتني بس تبجي والبارت قصير انتوا مشوها 😅
بالنسبه للحله اني اعرف هي من الوسط واعرف موقعها بالخارطه قريبه على كربلاء وبغداد وزايرتها همات
بس بالبدايه اتفقنه اني ومسره ان مانكول من الحله بس من الجنوب بس بعدين بالغلط انكتبت الحله وخليناهه على ماهي عليه لذا اقتضى التنويه 😘
#حب_عاثر
بارت 5
نورا ناصر ...
انضربت ع راسي هذا الطول والهيبه يتقدملي ولساني اخرس ماعرفت شحجي وشگوله اخر شي نطقت ..اهلي يمكن ميقبلون ..
راد يحجي اني انحرجت بما فيه الكفايه ومااكدر ابقى كدامه اكثر .. بسرعه انهزمت واريد اندل درب القسم وين ماادري وكلبي يدك سريع
ومية شغله طرأت على بالي واني امشي افكر شون نتزوج وبسرعه تخيلت جاي يلبسني حلقه وجتي على بالي يسرى وشون اذا صرت سبب بانفصالهم هي واياد وفكرت باهلي وعمامي يوافقون عليه او لا ؟؟ بالي صار خلاط وكلشي بيهاا وصلت للقسم متوتره
امتحنت وخلص اليوم ورجعنا للقسم.
واني بالي يمه ويم كلامه الي ..
دخلنا للغرفه بدلنه ملابسنه
جانن البنات كلهن موجودات
كتلهم اكلكم شي
البنات .. كولي
مسره ... انمار صارحني اليوم
سمر .. احلفي ؟؟
مسره .. اي والله ..
رواء بقت واكفه بمكانها متسمره ..
سمر .. شنو گال
مسره .. كال مااريد الف وادور اريد اتقدملج
سمر .. ياعيني ابن اصول هذا
رواء .بعصبيه.. يلا بنات مانتغدا متنه من الجووع ..
تغدينه وخلصنه .. طول اليوم رواء نظرتها الي نظرة خبث وحقد ..
رواء شخصيتها مغروره ومتعجرفه . دائما تغثني واسكت عنها مو طبعي اتعارك ويا احد ..
بنفس اليوم الي صارحني بي انمار تخربطت
عندي داء الشقيقه .. وبذاك اليوم بالذات هاجت عندي وظليت اون من الالم .. ووكعت وماادري بنفسي
فتحت عيني يمي المشرفه ورونق وسمر ورواء
المشرفه .. حالتهه ماتتحمل خلي ناخذهه للمستشفى.
بس خلي ناخذ موافقة مدير الاقسام ..
سمر .. رونق متخابرين على رائد يجينه للمستشفى خاف نحتاج شي
رونق .. اوكي راح اخابره ..
سمر .. مسره تحملي حبيبتي هسه شويه ونروح للمستشفى ..
رونق .. خابرت رائد يكول حضر تجوال شون راح تطلعون هو راح يدبر النه سياره ..
بعد معاناة يلا انطونه موافقه من مدير الاقسام
لبست جبه على تراكي وشال شون ماجان
اجتنه سياره للباب وطلعنه .. اني كوه امشي من الالم
صعدت بالسياره جانت حديثه وراقيه وخليت راسي على كتف سمر
سمعت صوت رائد يكول
انمار اني راح ارجع
من سمعت باسمه .. فتحت عيوني كوه وظليت ادوره
شفت رواء تعدل بروحها والمشرفه كاعده كدام وسمر ورونق يمي.
باوعت شفت انمار لابس تيشيرت بيجي وساعه ذهبيه بايده وهادئ كلش حتى المشرفه كل شوي تباوعله
اول مافات للسياره اتنفست عطره عيني اجت بعينه بالمرايه ..يباوعلي .احساسي. بين السعاده والالم رجعت راسي على كتف سمر وغمضت .. وصلنا للمستشفى ..
شدولي كانيولا وضربوني ابره .وانمار مافارگني. بعدها طلعنا ..المشرفه تمشي ليكدام
سمر حست انمار يريد يحاجيني
غمزتلي واخذت رواء تلهيهه عنا
ظلينه نمشي على كيف تقرب يمي وهو يمشي همسلي شون صرتي هسه
...زينه حمدلله ..رفعت راسي باوعتله طويل واني اوصل لكتفه
... عدلي شالج وضمي شعرج ..
كال هيجي دنكت اني بيا حال متكولي مديت ايدي لراسي وضميت شعري .. باوعلي ابتسم وفات يمشي كدامنه سريع اشوف رواء تريد تاكله بنظراتها وهو مامعبرها .. كل شوي يلتفت الي ..
رجعنه للقسم .. ارتاحيت شويه ..
يوم ثاني ماداومت تعبانه كللش
اجو البنات من الكليه .. وكعدنا على الغدا ..
رواء .. انمار شكد يباوع اليوم ماشال عينه من عليه
سمر .. يگولون تشبهين مسره يمكن يدورها بيج
رواء ... وشجابها عليه اني بنت بغداد محد يشبهني ..
مسره .. غثتني حييل حاولت اردها لان هواي تتمادى وتتجاوز .. كتلها وشبيهم المحافضات الباقيه
رواء .. شبيهم يعني شروگيه وماعدهم ثقافه ..
سمر .. عيب هذا الحجي رواء ماكو فرق بينه ..
مسره .. اوكفي اوكفي على كيفج انت مفتهمه غلط تره الشروك معناهه الشعب الجاي من الشرق وهم السومريين ليش نسيتي انجازاتهم الي خدموا بيها البشريه كلها ولليوم اشو انت ماتعرفين تحجين ..
رواء .. وليش مااعرف احجي لاعبالج انمار كبر راسج لان صارحج تره هو شايف نفسه هوايه ومبقت وحده ممباوعلها مو بس انت !!
مسره .. كمت من الاكل حتى ماكملت اكلي وطلعت بره ابجي لسانها طويل ولا اكدر اردها ابد ..
هسه شدخل انمار بالنص .. بس تحب تأذيني بالكلام
وراهه بشكم يوم اجت رواء تركض وتضحك كالت احزرو الخبر يخبل
كنالهه شكو
كالت انمار مصارح زينب صديقة رونق
وتباوعلي وتضحك گالت هاا مسره وينه مو ع اساس يتقدملج هههههاي
بلحظتهه فرت فور كلش اذتني بكلامها
اما انمار هواي حقدت عليه
ليش جذب عليه معقوله راد يستغلني
همزين ماسويت ويا علاقه ...
بذاك اليوم كلش تعبت وبقيت افكر
ورواء كل شويه تغثني بحجايه
يوم ثاني داومت مشفته
وراها شفته يريد يتقرب يحاجيني صديته وظليت اتهرب منه . ..
خلصت المرحله الاولى وهو من ذاك اليوم بعد ماشفته بس بقى اكو حنين جوايه اله وقلب يفز من يسمع اسمه وروح تعاتبه لييشش ؟؟
بالعطله گضيتها بالبيت مره وحده اخذونا اهلي الكربلا زرنه ورجعنا ..
ورحت زياره لبيت عمتي كلش 2
احبها اسمها وفاء .اني وياها صديقات خاصة وهي ممتزوجه وكنا كثير قريبين لبعض. بقيت يمها كم يوم سولفت الها عن انمار .. كالت لان رفضتي راح خطب ..
كتلهه لعد ونظراته وكلامه .. معقوله حاط الف وحده اباله ..
مو هيج بس انت فكري بالبعيده يعني معقوله عمامج ينطوج لغريب وولدهم موجودين يمكن بيها خير الج الله بعده عنج حتى لاتتعذبين بحبه ..
كلام عمه وفاء طمني شويه ..
كلت يمكن الله بعده عني حتى لااتعذب بحبه وهو شون ينحب فدوه لروحه ..
خلينا بعاد عن بعض افضل
صراع بين عقلي وقلبي ..
احس نفسي اصارع روحي .. وممقتنعه بكلام عقلي دائما القلب يتغلب على العقل وهيج اني حالي
اكذب اذا اكول ماافكرت بي طول العطله لدرجة تجيني نسمات هوا اشم بيها عطره يلفح انفاسي او عيوني تشوف طوله واناقته وهيبته لو اذني الظلت تترد المسامعها صوته الجهوري المميز .. لو لساني اليردد كلماته وخاصة بلهجته الي ماعرفت شنو اصلها لحد الان ..
وصار انمار حلم بعيد المنال بالنسبه الي وشلت فكرة الارتباط بي من بالي .. رغم مرات من اكعد وحدي اشوف نفسي ويا ولابسه الفستان الابيض ..
خلصت العطله برمشة عين رغم جانت ممله لكن هيج الوقت بسرعه يمر وكله من عمرنا ..
داومت مرحله ثانيه ..
بداية المرحله الثانيه جان الوضع متأزم بتكريت ودائما نسمع انفجارات مره كاعدين بالمحاظره وجان نسمع صوت رمي قريب وانفجارات متت اني مامتعوده واخاف ظليت ارجف وانهاريت
الدكتور طلع يشوف شكو ومن رجع وكال هاي مواجهه قريبه على الجامعه.
وكل مجموعه من البنات تروح وي بنات تكريت نخاف على اقسام البنات ..
وصدك رحنه نمشي مشي وي بنيه احنه تقريبا جنه 10 بنات والخوف موتنه واني اخابر باهلي وهم يبجون واني ابجي حتى عبرنه سياج لان الطرق مسدده مأساة وظيم على ماوصلنه اني روحي واصله للسما كل شوي يصورلي راح يصير شي واني حييل خوافه
ثاني يوم الوضع هادئ ..
بعدهه نزلت لأهلي وبقيت شهر اهلي مايقبلون ارجع للكليه
اما اني بقيت مخروعه وكلما انام افز مرعوبه شلون بيه شراح يخلصهه بعد 3 سنوات..
طلبت نقل ماصارلي
والوضع تأززم اكثر واكثر ..
رجعت داومت بعد معاناة كثيره ..
فمره قررنه ننزل لاهلنه
اني بلمرحله الثانيه انزل بخط وصادفت زيارة الاربعين وجانت هسه باديه المظاهرات مال الغربيه وصدك نزلنه وصلنه حدود بلد كالو الطريق مسدود ارجعو
يربي شلون ظليت افكر وميته خوف
الخط ولد وبنات انزل لبغداد ومناك اهلي يجوني واروح للحله ..
3
ردنه نرجع للاقسام كالو دخول تكريت هم انسد
زاد قلقي وخوفي كعدت اقره ايات واني بالسياره وكل شويه اخابر اهلي امي ويسرى ويبجون واني ابجي وبابا ماسد التليفون ابد كلش قلق عليه كل شويه يگولي
... راح اجيج بابا مااتحمل
.. بابا وين تجي الطرق كلها مسدده واني اخاف عليك وهسه لازم اسده توترت اكثر راح نبقى بالسياره فد شويه واخابرك ..
سمعت السايق كال افوتكم على الفلوجه ومناك على العامريه واوصلكم...
اني سمعت الفلوجه متت خوف
شلون وهي خطره كمت ابجي واني الشيعيه الوحيده ابينهم ...
حركت السياره بينه واني قلبي سعفه ويرجف من الخوف كل الي ابالي فكرة الطائفيه
كاعده وادعي
وصلنه للسيطره و الطريق مسدود ماقبلوا يفوتونه ..
بقو الولد حايرين والبنات همات
واحد من الولد كال راح اخابر انمار يشوفلنه حل جان يعرف انمار
بعد ما خابره وسداه منه
كال انمار راح يجي لاهله ويشوفلنه حل
اني استغربت انمار من الفلوجه ؟؟!!!!
وفوكاهه يتقدملي
من سابع المستحيلات اهلي يوافقون عليه
وبقيت افكر صار فتره مشايفته ..
نص ساعه بقينه واجه انمار بسيارته حديثه ولونهه اسود.
اني جنت بداخل السياره منهاره كلش
باوعلي بنظرات من سلم ع الولد من الباب مال سيارة الخط ..
واني احس عيوني ذابله من البجي وفوني بيدي
ومتواصله ويااهلي ...
سلم ع الولد وراح للسيطره المنتسبين الي بالسيطره اخذوله تحيه وكالوله سيدي راح نفوتهم بس سيطرة دخول بغداد مسدوده صاير انفجار
هنا افترت الدنيا بيه واشوفها سوده بعيني وماحسيت غير البنات يصحن بيه كمت ابجي اختنگت نزلوني من السياره ..
كعدت اشم هوا ..
ظليت اشهك وابجي واكول اريد اهلي متت خوف مااريد اطب للفلوجه ..
وانمار مقابيلي ويباوع الي .. دزالي بطل مي من سيارته بيد وحده من البنات غسلت وجهي وكل شويه يباوعلي بخوف اظن عرف سبب قلقي وخوفي اني من دون البنات ..
الطلاب اتفقوا ويا انمار ياخذنه لبيتهم لباجر ونشوف شلون منا لباجر هوعنده معارف يكدر يطلعنه اني هنا متت بجي شلون اروح للفلوجه وصارت فكرة الطائفيه ابالي خاف يدرون بيه شيعيه ويكتلوني
هيج فكرت ..
ظليت اهذي مثل الطفله الصغيره
ماما وينج اريد امي ...
والبنات يهدن بيه .. رجعت صعدوني بالخط واني منهاره .. وانمار يتلفتلي .. احس نظراته تحسسني بالامان .. ويكولي لاتخافين اني وياج مراح اخلي سوء يصيبج .. هيج قلبي حسسني ..
صعد بسيارته حركها ومشى كدامنه واحنه بسيارة الخط وراه .. فكيت شويه ارتاحيت .. وتنفست يمكن نظراته طمنتني مراح يصيرلي شي بوجوده ..
طبينه مركز الفلوجه واني اباوع من الجامه منطقتهم مبينه راقيه بيوت كبيره اشبه بقصور المسلسلات الي نشوفها بالتلفزيون .. مبينين عايشين بنعيم
وصلنه لبيت جبير كلش عالي وبي كاميرات وحديقه كلش جبيره .. نزلنه بالشارع
شفت بنات زغار طلعن من البيت يركضن بأتجاه انمار
ويصيحن اله خالو خالو
هو حضنهن وبوسهن بحنيه
البنات ماشاء الله يخبلن ..
الولد استحو كالو والله فشله من انمار جايين لبيتهم احنه
رائد صديقه ومقرب اله كالهم بالعكس خوش ناس واني اكثر من مره جايهم
طبينه تلكتنه مره حجيه شفتهه شلون حضنته وبوسته من كل مكان بوجهه
هو صار احمر من الخجل
كللهه حجيه عيب ويايه خطار
ضحكت واجت صوبنه ..
رحبت بينه
ودخلتنه للبيت
ماشاء الله صدك قليل الوصف بي قصر ما اعرف منين نطب ومنين نطلع
احنه 3 بنات و8 ولد البنات وياي رونق وزمن ..
كعدونه بالاستقبال الاثاث فخم حييل ..
كل شويه تجي وحده تسلم علينه ولكينه يمهم. خطار البيت مليان ناس
الحجيه كعدت يمنه ..
صاحت لرنا ام ماهر
تعالي لضيوف انمار
اجت مره متوسطه بالعمر بس مبينه من العز والرفاهيه عبالك بنت العشرين
سلمت علينه حلوه كلش ومرحه
كالت لاتخافون ولاتستحون اخليكم بوسط عيني
باوعتني شافتني عيوني مورمه تقربت مني كرصتني من خدي كالت لايحلوه ليش تبجين احسبيهه سفره
باوعتلها وابتسمت ..
طلعت تليفوني امي تتصل ..
جاوبتها ..
ماما احنه بالفلوجه
الام .. بصدمه وبكاء ..يا عزا ولج شوداكم للفلوجه ؟
ماما الضابط اخذنه لبيتهم الطرق كلها مسدده ..
.. لج خاف مو امان عليج خلي ادز ابوج عليج ياخذج
.. لاتخافين ماما خوش ناس لايظل بالج ..
.. ولج خاف يدرون بيج شيعيه ويقتلوج ديري بالج لاصلين كدامهم ولاتكولين اني شيعيه
.. ماما لاتخافين فدوه اروحلج ماعليه شي والله اطمئني ..
الحجيه عرفت الحاح ماما وخوفها عليه طلبت مني انطيهه التليفون تحاجيهه ..
كلتلهه هاي خطارنه واحنه شيوخ امني لو نعرف نموت ومنخلي شي يمسهه
اطمئنت امي لكلام الحجيه .. واني اطمئنيت اكثر .. 4
بعدها الحجيه صاحت
ريما بيبي تعالي اخذي البنات يغسلن و يرتاحن ..
اخذتنه ريما اخت انمار.
كمنه غسلنه وبدلنه لبست تراك سمائي وبي رصاصي باطرافه ولبست شالي ورجعت كعدت يم الحجيه
الحجيه ... بيبي احنه شيوخ اني بيبية نمر (يصيحون لأنمار نمر)
وأشرت هاي رنا ام ماهر ام نمر
وجده الشيخ ومن بعده ابو ماهر تقصد ابو انمار
وظلت تأشر ع البنات هذني اخواته خير من الله سالتهه رونق بس انمار عدكم ؟؟
كالتلهه لا ماهر الجبير مسافر يدرس بالسعوديه علوم اسلاميه
ومهيمن الزغير صف ثالث متوسط
وعنده 8 خوات
ويمهم خطار بيت خالته هم عدهم بنات ...
دنحجي ودخل انمار سلم وصعد ليفوك ورا شوي نزل لابس دشداشه نيلي طالع يخبل اجت عيني بعينه اني كلش استحيت لان لابسه تراك.
راح..
اجن خوات انمار رونق وزمن انطلقن وياهن ومعبالك غريبات وهم اصلا اهله ينحبون كلش
كالن خلي نسوي كيك وكالن تعالن ويانه بالمطبخ اني ردت اكوم لزمتني الحجيه كالت تعالي يمي انت ارتاحي وجهج اصفر ..
رحت كعدت يمهه بقت مركزه بوجهي بعدين
كالت انتي تحبين نمر
اني كلش استحيت كتلهه بتلعثم مابيناتنه شي
كالت تعالي احجيلج
ابني عنده 3 ولد بس اعتماده كله على انمار لان ماهر بالسعوديه و جده شيخ والشيخه لابو انمار ومايحضر جده كعده اذا ماياخذ انمار ويا
من هو وصغير حامل مسؤلية العائله واخواته.
جانو كاعدين ببغداد وانخطف انمار بالسقوط والعشيره دخلت انذار وشهرين يله طلعو حته تعذيب معذبي ومغتصبين بنات كدامه لذلك تشوفي هادئ وقاسي نوعا ما بس كلبه طيب وشوفي كل عمامه عدهم بلاقل 4 بنات وخواله وخالاته وكلهن عينهن علي حتى شكد خيرو وماقبل ماندري شلون حب ومن اجه وكالنه عليج بلاول عارضنه لان من الحله ..
بس دزينه من ازلامنه وسالو عليج وع اهلج وكالو خوش ناس وخوش بنيه
مسره ... اني كل هذا الحجي مدنكه وكلش خجلانه كملت كلامها
... يابيبي هذا نمري هذا عزيز جده يحرك العشيره ولا يزعله اذا ماتحبي لا تعلقي من هسه رفضي ترى الي ياذي مايرحمه
بقيت ساكته وماحجيت
كالت شو باوعيلي ما رفعت راسي رفعته بايدهه وباستني كالت ياملعون يا نمر شلون مختار هالغزاله
بس اني حرف ماحجيت كاعده يمهه
وظهري للباب
سمعته كال بيبي
كالتله هلا بالطول تروحلك فدوه بيبيتك
تقدم باسهه من راسهه
اني ردت اكوم باوعلي اجت عيني بعينه ..
انمار .. لاتكومين شبيج تنهزمين مني هيج اخوف اني؟؟
مسره .. سكتت مانطقت بحرف رجعت كعدت مدنگه وميته من الخجل ..
الحجيه ...لا موتخاف ماتكدر تقاومك
رفعت راسي شفته ابتسم
انمار .. حجيتيلهه ؟؟
الحجيه .. بس عوفلي امك وما اطلع بيبيتك اذا ما اخليهه بحضنك
مسره ...اني بسرعه انهزمت كلش استحيت وسمعت الضحكه مالته واني بالممر بطريقي للمطبخ اروح وره البنات حتى تهت ..خرب يضحك عليه.
. دخلت بالمطبخ يم البنات هن يحجن واني بالي مو يمهم يم كلام الحجيه
معقوله انمار دز ناس تسأل عليه يعني متمسك بيه لعد ليش صارح زينب ؟؟هوايه اسئله ..،؟؟!!
بعدهه خلوا العشا وتعشينه
جان اكلي كلش قليل لان جنت ضايجه ..
انتبهت خواته وامه اكلني بالنظرات وكل شويه ..
يباوعلي ويحجن بيناتهن .. 5
بعد العشا رجعنا گعدنا يم الحجيه .. وبينما اني گاعده اجت ريما صاحتني تعالي يمي شويه. ..
كمت رحت يمها كالت امشي فوك ..
صعدتني دخلنه غرفه بيهه سريرين وكنتور مرتبه والاثاث مبين عليه الفخامه
كالت هاي غرفتي اني و ناديا والباقيات بغرفة
واخواتي 3 الكبار مزوجات
اني قليلة الكلام بس اهز براسي ... واباوع للغرفه حسيت اكو شي ..
كعدت كبالي
كالت احنه نعرف انمار يحبج
اني فزيت كتلهه لا ماكو شي بيناتنه
.. اي نعرف انمار من النوع الي مايسوي علاقات وراد يخطبج بسرعه بس جدو كاله تاكد من مشاعر البنيه . استحيت ودنكت اليوم شبعت احراجات واحساس الغربه متملكني واني مو اجتماعيه مااعرف شون اتصرف وياهم كضيتها ساكته ..
ريما ... اني طالعه هسه اجي انت خليج هنا ماشي
ابتسمت وطلعت ..
بقيت اني مرتبكه وافرك بيدي واتسائل ليش،جابتني هنا وليش طلعت ..
دقايق وحسيت الباب انفتح رفعت راسي وشفته بطوله وهيبته متت رجلي كامت ترجف
تقرب يمي انمار
كتله اريد اطلع
.... انطيني صبر مراح اكلج
... عفيه لايجي احد شيكولون عليه
... مايكولون بس خلي احجي وياج ..
اني جنت ضايجه وخايفه وممرتاحه وصرت بهيج موقف بسرعه كمت ابجي ... وأبجي ...
يتبع ...