اسيرة بموافقة أبي الجزء الاول

الشخصيات+الفصل الاول

___

الشخصيات

(1) عائلة السيوفي :

١. ابراهيم السيوفي : في أواخر الخمسينات من عمره، ذو بشرية قمحية وشعر أبيض يتخلله بعض الخصلات السوداء، خريج من كلية التجارة ويمتلك سلسلة من معارض السيارات ورثها هو وشقيقه من والدهم

الزوجة : تزوج من رقية وبعد وفاتها بعد ولادة أبنتها مودة بفترة قصيرة، تزوج من شقيقتها سمر

سمر : في اوأخر الثلاثينات من عمره؛ تمتلك أعين عسلية وشعر بني به بعض الموجات، بشرة بيضاء من يراها لا يظن أنها علي وشك الاقتراب من الاربعون فمازالت تحتفظ برشاقة جسدها وملامح هادئة تخفي تقدمها بالعمر، انجبت من ابراهيم فاطمة

ابناء ابراهيم السيوفي :

عمرو : يبلغ من العمر الخامسة والعشرون، يعيش في الامارات منذ سنوات، خريج من كلية التجارة ويعمل كمحاسب في أحدي الشركات هناك

هبة : تبلغ من العمر ثلاثة وعشرون عام، ذات أعين بنية وخصلات فحمية وبشرة تميل الي القمحية فتمتلك تقاسيم وجه والدها ومتزوجة من أبن عمها (أحمد) منذ ثلاث سنوات تقريبًا

ولديها فتاة تبلغ من العمر عامين، وقد أخذت دبلوم تجارة فلم تكن رغبة والدها فقط بل هي لم يكن لديها شغف في استكمال تعليمها

٢. مودة : تبلغ من العمر عشرون عام وهي أكثر ابناء ابراهيم تشبة والدتها رقية وخالتها سمر، انتهت من الثانوية العامة منذ عامين ولكن رفض والدها ذهابها الي الجامعة فلم تأتي بمجموع يمكنها بذهاب أقرب جامعة لها كلية العلوم وهو يرفض ذهابها الي أماكن بعيدة وتلك هي عقدتها فهي طموحة الي أبعد حد، تمتلك أعين عسلية وبشرة بيضاء وشعر يتناسب مع لون عيناها، قصيرة القامة وجسدها متناسق مع طولها

٣.فاطمة : هي ابنه سمر الوحيدة، وفي الثانوية العامة وأصغر ابناء ابراهيم تشبه شقيقتها مودة ولكن تختلف عنها بعيناها البنية ونحافة جسدها، تطمح في الدخول الي كلية الهندسة فتشبه موده في طموحها

________

(٢) يوسف السيوفي : هو شقيق ابراهيم ويكبره بخمسة أعوام، توفت زوجته منذ خمسة عشر عامًا ولم يتزوج بغيرها، كان قد تخرج من كلية الحقوق
وعمل بالمحاماة لسنوات عديدة وله مكتب محاماة ويمسكه الان ابنه احمد

الابناء :

١. أحمد : يبلغ من العمر اثنان وثلاثون عامًا ومتزوج من ابنه عمه التي يعشقها منذ الصغر، وخريج من كلية الحقوق يعمل مع والده .

٢.سليم : في الخامسة والعشرون من عمره خريج من كلية الهندسة فهو مهندس معماري، ويعمل علي نفسه كثيرًا حتي يصل الي أعلي المناصب، وأكثر الدرجات العلمية

٣. سلمي : تؤام سليم وهي خريجة من كلية التربية قسم لغة أنجليزية وتعينت في أحدي المدارس، متعلقة بشقيقها وتوأمها كثيرًا وتعشق والدها فهو لم يكن مجرد اب بالنسبة لها فهو الاب والام والصديق والحبيب وكل شيء لها

________

عائلة الدمنهوري

معتز : يمتلك سلسلة من الفنادق وموخرًا أراد الاستثمار في السيارات وفي اوائل الستينات من عمره

يسرا: ابنته الكبري وتبلغ من العمر سبعه وثلاثون عام ومتزوجة من طبيب يدعي مالك ويعمل في الخارج

محمد : يبلغ من العمر تسعه وعشرون عام، قد عقد قرأنه من سنوات علي ابنه خالته ولكن توفاها الله قبل الزفاف بأشهر، يعمل في فنادق والده، ويمتلك بشرة قمحية وخصلات فحمية ولحية جذابة

ياسمين : الابنه الصغري وتبلغ من العمر عشرون عام وتدرس تجارة خارجية

____

الفصل الاول

_______

في أحدي العمائر السكنية القديمة، في عمارة عائلة السيوفي، فيسكن بها ابراهيم السيوفي ومعه شقيقه الأكبر يوسف السيوفي واختهم الصغري نهلة وهي من الاب فقط، وتعيش معها والدتها في العمارة ولهما شقة منفصلة

كانت تقف مودة مع خالتها سمر وزوجة والدها في نفس الوقت يعدوا طعام الغداء وكالعادة هتفت مودة بضيق شديد الذي يعتريها منذ انهاءها للثانوية العامة:
- انا نفسي أفهم ليه بابا بيعمل معايا كده..مش معني ان مجاليش جامعة القاهرة او اي جامعة هنا أني اقعد في البيت لمجرد أنها بعيدة أنا مش مقتنعة ليه مش عايزني أكمل سنتين وأنا نفس الموال وكل ما اتكلم يشخط فيا من غير سبب مقنع

- هنعمل ايه يا بنتي أبوكي دماغ لوحده ومن ساعة ما عمرو سافر ومحدش فاهمله حاجة

هتفت مودة بانزعاج وهي تزفر بضيق فهل ستتحمل هذا الظلم اكثر من ذلك:
- يرضي مين ده يا ناس يضيع من عمري سنتين وانا قاعدة في البيت حاطة ايدي علي خدي..انا عايزة أدخل كلية العلوم اي محافظة ان شاء الله سيناء هي الشرقية كانت بعيدة في ايه بس

تنهدت سمر بضيق قائلة بنبرة ساخرة:

- هو انتِ معايا لسان ما تقولي ليه هو أنا مالي هو بيسمع كلامي أوي... يا بنتي انا مقدراكي و عارفه كل الكلام اللي انتي بتقوليه بس ما باليد حيله هنعمل ايه يعني

صاحت مودة بضيق وهي تعقد ساعديها:
- اصل مفيش سبب واحد يحقله يعمل كدا وكل ما أكلمه يهب فيا..حتي عمي يوسف مش فاهمه..ده أحنا حتي نزول السوبر ماركت بحساب يا ماما

ذهبت مودة بعد انتهاءها من كلماتها متوجهه الي غرفتها بيأس شديد، فتنهدت سمر بحزن علي حالها فهي ابنتها بالرغم من أنها لم تلدها وابنه شقيقتها الا أنها هي من قامت بتربيتهم جميعًا؛ ولكن ماذا تفعل مع ابراهيم فهي لا تفهم لما يفعل ذالك؟!!

_______

في غرفة مودة وفاطمة، كانت فاطمه تجلس علي هاتفها المحمول تشعر بالضيق الشديد والملل وحينما لاحظت ولوج شقيقتها هتفت بانزعاج:

- انا هموت من الملل بجد قدامي اقل من شهر والاجازه تخلص واخش تالته ثانوي ونفسي اخرج ولو لمره مع اصحابي

حدقت مودة بها هاتفة بسخرية علي حالهما فالخروج عندهم شيء مُحرم علي الأغلب:

- فاطمه بنت ابراهيم السيوفي عايزه تخرج من المعتقل اللي احنا فيه..ليه عايزة القيامة تقوم

زمت فاطمة شفتيها بضيق قائلة:

- واضح انك مش في المود وأنا مش ناقصة كئابه والله يا عسل

- فيها ايه لو كانت أمك طاوعتني

قالتها مودة بغموض فتمتمت فاطمة بعدم فهم قائلة:

- طاوعتك في ايه مش فاهمة

- اني اروح اقدم في التنسيق واروح الجامعة من وراه مهوا اصلا مش بيرجع الا علي الساعه ١٠ او ١١ بليل..فضلت تقولي مينفعش وينفع..وسنه بتجر سنة وأنا زي ما أنا

تنهدت بضيق وهي تمدد علي الفراش هاتفة بسُخط:

- حتي مارينا كل ما تعوز تشوفني مينفعش اروحلها الشارع اللي ورانا لازم هي اللي تجيلي لغايت ما هي زهقت وبقينا نقضيها تليفونات..دي مبقتش عيشة دي

- بت انا لقيتلك الحل

قالتها فاطمة بمرح وابتسامة تزين ثغرها، فهتفت موده بنبرة ساخرة:
- الحقيني بيه

- تدعي ربنا يقرب فارس الاحلام اللي هياخدك علي حصانه الابيض ويحققلك اللي نفسك فيه

قهقهت مودة قائلة:

- يا سلام

صمتت لدقيقة وابتلعت ريقها ثم هتفت بضيق وفقدان الامل في كل شيء:
- انا ولا عايزه فارس ولا زفت هو أنا تاقصة اروح اتجوز واحد يسجني في البيت زي ما انا مسجونه هنا
وبعدين انا ليا احلام وطريق طويل بعيد عن فارس الاحلام بتاعك ده..والله يا بخت عمرو قاعد برا عايش حياته

هزت فاطمة رأسها نافية حديثها :
- لا كل ما يكلمنا بيحكي قد ايه هو مضايق من الغربة وحاسس انه وحيد ..ده بيفكر يرجع أساسا

صاحت مودة باستنكار لحماقة شقيقتها:

- غبي والله هناك احسن من السجن اللي هنا وله يمكن علشان ولد بابا هيكون مريحه عننا

- مش فكره ولد وله بنت هو في الكام سنة الاخيرة في حاجه اتغيرت والواحد مش عارفها

_____

في الجونة، يجلس محمد في الردهة الخاصة بالفندق ويتحدث مع شقيقته الكبري علي الهاتف فجاءه صوتها وهي تقول باشتياق:

- عامل ايه يا حبيبي

أجابها محمد بهدوء:

- بخير انتم عاملين ايه

- كلنا بخير طول ما انت بخير..راجع امته يا محمد

هتف محمد مجيبًا أياها بهدوء:

- بكرا أن شاء الله

- ان شاء الله يا حبيبي ربنا معاك باذن الله هقفل دلوقتي علشان ولاد الجزمة بيتخانقوا

- هي وصلت للجزمة لا ربنا معاكي بقا..سلام

جاء صديقه وابن خالته مازن الذي يبلغ من العمر ثلاثون عام هو خريج من كلية الحقوق وهو المسئول عن الشئون القانونية في شركتهم الصغيرة الخاصة بالسياحة وفنادقهم، وأيضا شريك معهم بنسبة بسيطة فهتف مازن بمرح كعادته وهو يجلس بجوار محمد:

- يارب صبحنا وربحنا وعلي العصر نكون بنفطر في بيتنا ..استويت خلاص عايز أرجع لأرض الوطن

أجابه محمد بسخرية:

- علي اساس انك كنت في كندا

- انا لقيت حبة مزز هنا جنان بس برضو القاهرة وحريمها أولي بيا

قالها بمرح لينهض الاثنان ويسيروا سويًا ويباشروا تجهيزات الفندق الجديد قبل رحيلهم

______

في عمارة السيوفي تحديدا في شقه نهلة شقيقتهم الصغري ووالدتها أمين، كانت مودة تجلس معها فهتفت بنبرة فرحه وهي ممسكة بتلك الكتب:

- جبتيهم ازاي وامته يا عمتو

ضربتها نهلة بخفة هاتفة بحنق:

-متقوليش عمتو هما عشر سنين بس يا روح خالتك متعصبنيش

- خلاص اسفة ياست نونو بلاش عمتو

قالتها مودة بمشاكسة لتبستم نهلة علي حديثها ثم هتفت بعملية:

- معاكي الكتب اهي بتاعت كليه علوم بصي انا معرفتش اجبلك كتب لقسم واحد بس انا جبتلك كتب متنوعه معرفش بقا حاولي تستفيدي ولو حاجه مفهمتهاش ممكن افهمهالك

ابتسمت مودة كالطفل الصغير الذي رأي لُعبة كان يريدها؛ وشعرت نهلة بفرحتها العارمة فهي طبيبة وتعلم تفوق مودة ولكن لا أحد يعلم لما يفعل شقيقها ذلك مع ابناءه..

______

كان ابراهيم يجلس في احدي المعارض في مكتبه الخاص ويستعد للرحيل وقبل ذهابه وجد هاتفه يعلن عن اتصال من رقم مجهول ليبتلع ريقه بتوتر ليجيب علي هذا الرقم:

- خير

أتاه صوته الضاحك والساخر:

- خير طبعا وبعدين هتفضل تخبي بناتك كتير عني..حقي هيتاخد يا ابراهيم يا سيوفي وأبقي خلي بالك برضو من اختك نهلة

أغلق المجهول المكالمة ليترك أياه يغلي من الغضب..