حليب اسود ..للكاتبه شمس

27 و 28

مساء الگاردينيا حبايب🌹
///// البارت السابع والعشـرون /////

حور.. الاحسن انت الي تطلع من بيتـي قبل مااتصرف وياك غير تصرف ..

ضحك ضحكـة طويله .. هههههههههههههه بيتج منين اجة.
بنت الفكر شنو ماصدگتي گعدتي بي سنة زمان وصار الج ..

حور .. قيس كان عندة حق من ضمن حقي وخاف عليه منك .. لان يعرف حاقد وماعندك رحمـة ..
لهذا سجل البيت بأسمي ..

امجد .. انتـي جذابه ابوي مستحيل يسجل البيت بأسمج .
حور .. ليش مو سجل بيته الي بالجنوب بأسمك وسجل نص المزرعـة في سبيل يرضي حقدك وغرورك .. لو كل هذا ماكفاك جاي تاخذ بيت هالطفله اليتيمه ..

امجد .. منو انتي وتحاسبيني .. ولاتنسين مثل ماگلتي هاي اختي ويتيمه .. ويجي يوم حتى هي اخذها منج اعذبج مثل ماعذبتـي امي واخذتـي ابوي منا .

حور .. جرب وشوف .. ذيج الساعه ماراح تلگي حور الهادئه هسـا . الي كان يربطنا راح وتركني الهيج نماذج تحاول تستغل وتاخذ كلشي ..
لهذا اطلع بأحترامك قبل مااشتكي عليك واخليك تختك بالحبوس ..

امجد .. هينـة ست حور بس اتأكد من سالفه البيت واني الج .. هز بإيده بتهديد وطلع ..
صار وجه بوجه وي ضرغام ..

ضرغـام .. امجد خير شرايد . ضرب ضرغـام بإيده وراح .

ضرغـام لواها الايده .. شبيك لك .

گتله .. ابو نور اتركة . مايستحق تتعب نفسك وياه .

باوعلي امجد بحقد .. وگال اشبعي وانتي والزباله مالتج يجي يوم اخذة منج واخليج بالشارع ..

ضرغام .. شيريد هذا .
حور .. بعدة تراب ابوه مانشف وهو اجه يريد يطردني وياخذ البيت ..

ماما ..  ياامي لاتوكفين بوجهه خي يولي هذا يدور مشاكل واحنه مو گدهم ..

ضرغام .. لا عمه هذا لازم واحد يوگف بوجهه عباله ضعيفه وماكو احد يوگف بوجها ..
اگلج حور انتي متأكدة قيس سجله بأسمج عندج طابو .

حور .. لا مو عندي بس بالقاصـة مالته بالمكتب ..
هسا اروح اشوفها ..

رحت للمكتب مالته .. هو معلمني ع الرمز .. خاف هو مموجود واحتاج شي منها .. بس لليوم مفاتحتها وشايفه شنو بيها ..

دخلت الرمز وفتحتها ..
وانصدمت من شفتها ..
كانت مليانه فلوس واوراق وهو لان يحب يلبس ساعات ذهب ومحابس ذهب ..
فكانت الخزنه بيها انواع الساعات والمحابس الرجاليه وكلها ذهب ..

الصراحة متوقعت هيج بيها .. لان اني مو من النوع الي ادخل مكتبه وافتش بي ..
هذي الغرفه كانت خاصه بي ومامسموح الاي احد يدخلها بس وقت التنضيف .. لان بيها اوراق وقضايا مهمه فيخاف عليهن ..

دورت الطابو .. لگيته .. رجعته المكانه وقفلت الخزنه ..
طلعت ولسا مصدومـة ومااعرف شنو احجي ..

سولفت الماما وفرح .. گالوا اكيد من حقج اولادة كلهم مأمن مستقبلهم بيوت ومزارع واراضي ..
وهو مخليهن هنا عمودج والج ..
لو يريد كان اخذ فلوسه للمصرف ليش خلاهم هنا ..

حور .. حتى اذا راح يبقون بمكانهم .. اشوف شلون ماكان واحاول اساعد بيهن فقراء او اي مشروع خيري الروحة .. هو تعب وشقى ولازم يحصد ثمرة تعبه ..
اذا انطيتهن الاولاده يصرفوهن ومايشكروه ولا ينطون الفقير صدقه الروحة ..
وانتم شفتوا امجد شسوه ..

وصيتهم يغلقون الموضوع ومايفتحوه الاي احد ..
رادت فرح تروح ..
ماخليتها ..
گلتلها ابقي هنا يمي والبيت كبير ..
مااريد ابقى وحدي هالفترة ..

ماما .. بس ياامي انتي راح تلزمين عدة ومايجوز ضرغـام يبقى هنا ..

حور .. ماما ضرغام من الصبح للظهر هو بالدوام ويجي يتغدا وينام لليل ..
يعني ماراح اشوفـة . بس لازم رجال يبقى يمنا هاي الفترة ..

فرح .. مو احنه عمردج حبيبتي مانريد نضايقج ..
حور .. ماتضايقونـي .. اني من الصبح للظهر ودور اصعد الغرفتي مايأثر عليه ..

فرح .. زين لعد احنه نبقى ننام بالاستقبال نفرش . لان تعرفين مااگدر اصعد ..
وماما تحاول تصعد بس بالليل يمج ..

وجودهم يمي كان يخفف عليه المي شويه ..
رغم ماكو شي يگدر يخفف حزني واشتياقي الحبيبي ..

ضرغام رتب اجازتي .. وبمساعدة قاضي اسمه مظفر صديق قيس حيل ..
وگال القيس .. المرحوم بالفترة الاخيرة هواي وصاني بزوجته واولادها . واي شي تحتاجة تجيني گبل ..

هاي الفترة كلها اني النهار الهي نفسي بالشغل والقرآن واولادي ودراستهم ..
وبالليل يبدي السهر والون والبجي ..
حتى التراك الي بي ريحته .. خليته بصندوگ وغلقته خفت من گد مااشم بي ريحته تختفي وتروح ..
ماما گالت خلينا نوزع ملابسه مايصلح يبقن بالبيت بس اني ماقبلت ..
كانت راحتي من اتلمسهن واحضهن وعبالك دااحضن بقيس ..
اخذ مت عطره وارش ع قميصه ..
واحضن قميصه يالله انام ..

النوم يضيع مني بالليل واحس بروحـة تحوم حولي .
ساعات واني نايمه احس بلمساته ع وجهي وانفاسه وصوته تهمس بأذني ..
بس افز اريد اشوفـة يختفي كلشي ..
خليني اشوفك حبيبي خلي اشبع ناضري بطولك ..

اني بعد مالزمت عدة .. مااطلع ابد . بس صديقاتي ماتركوني كل فترة يجوني ومرات يتغدون لو يتعشون يمي ..
ولو اني اعرف هاي سوالف فرح . هي تتصل عليهم يجون حتى ينزلوني من غرفتـي ..
تحاول تشغلني وتنسيني ..

ضرغام ماقصر .. حتى اولادي هو يدرسهم. بس اخوي ماشفته غير كم مرة ..
يجي ساعه ويروح .. يمكن لو يعرف عندي فلوس جان گابلني وگعد وماتركني ..
ااااه عمت عينج يدنيا بس مصالح ..

……………………………… ..
بيوم اربعينية قيس ..
سويت ثواب كبير وعزمت اقربائنا كلها ..
بس ماسويت لطم ..
خليتها بس مأتم وقرائة قرآن الروحة ..
وبعدها العشا .. بيومها ختمنا عشرين ختمه من نسوان وزلم من غير الختمات الي ختمتهن طول هاي الفترة ..
الناس ومحبيه كانت كلها تقرأله قرآن ..
حتى ام احمد الي جانت تشتغل عدنا . خاتمه خمس اجزاء اله ..
بالعافية عليك حبيبي تستاهل ابو گلب الطيب ..
بعد ماطلعت الناس ..
بقت ام احمد وايمان وبنات عمي اخوات ضرغام ..
نضفن البيت وغسلن المواعين ..

گلت الفرح .. خلي ياخذنا ضرغـام من الفجر نروح للمقبرة حتى مااتواجه وياهم ..

وقبل صلاة الفجر طلعنا .. لبست سواد من فوگ لجوه وخليت غشوة ع وجهي ..
فرح بقت بس ماما راحت .. واخذت مسرة حتى يشوفها حبيبي يموت عليه واكيد اشتاقلها ..

وصلنا بعد الاذان ..
ذبيت مسره ع ماما ..

ورحت اعاتب بحبيبي .. ليش يروحي متجيني وغايب عني اسمع صوتك مااشوفك خليني اشوفك حتى لو بطيفي ..
اريد اشوف وجهك الحلو يابعد وجهي ..
اشتاقيتلك يابعد عمري ..
بجيت ونعيت وونيت حضنته واشم بي اريد ريحته اشمها ماكو ماشميت بس ريحة تراب ..

تقرب ضرغام وحجة وي ماما ..
گالها يله عمه خلينا نروح قبل مايجون ..

قرأتله الفاتحه وبوست گبرة وگتله اجيك غير هاي الجيه حبيبي مااتركك ..
قربتله مسره .. وگتله حبيبي هاي مسره حبيبتك اشتاقتلك ..
ومسره مااعرف شبيها بس تبجي عبالك گلبها يحس ..

ركبت السيارة وعيني ع گبرة ماودي اروح ..
گلتلها ماما هاج هاي فلوس ..
خلي ضرغام يجيب لفات گص كباب اي شي ..
اريد خمسين لفة اوزعها بالامام على روحـة ..

اشترى ضرغام لفات .. وراح وزعها بالامام وانطاهم اسم قيس ..
ربي تقبلها منه هاي فلوسة وراتبه وتعبه الي ياخذهن بنزاهة .
دخلت للامام وخليت بالشباك وحدة من محابسـة الذهب.

كنت مستعده اسوي كلشي حتى يتقبل الله اعماله ..
حتى الثوابات ..
كنت اطبخهم واخلي ضرغام ياخذهم يوزعهم ع النازحين والفقراء ..
من غير الي الفلوس ..
وربي كنت باليوم الي انطي من فلوسـة الفقير .. احس روحة تحوم حولي ..
عبالك يشكرنـي ..

اول ليلة احلم بي هي بعد رجوعنا من الاربعين .
كان لابس دشداشه بيضه ..
ودخل من باب الغرفـة .. وينبه عليه اگوم اصلي ..
كان مايفوت صلاة الفجر . واذا نايمة يگعدنـي ..

گعدت ملهوفـة وفرحانه بشوفته ..
صليت الي واله ودعيت ربي يرحمه ويغفرله.

مرت الايام والاشهر .. وفرح جابت ولد ..
اجه الولد الي حلمون بي بس فاجأونـي ..
من گالوا راح نسميه قيس ..

نزلت دموعي ..
وج فرح انتو مو تردون جود ..
فرح .. ضرغام طلب يگول قيس كان مثل اخو الي واريد اسمي ابني على اسم اخوي ..

حضنتـه وشميته گمت ادور ريحة قيس بي ..
گلتلها غرفة قيس الصغير عليه ..
مثل ماوعدكم قيس بهديته .  راح تختارون الغرفه الي تعجبكم وتوصون عليها والفلوس من قيس ..

اختاروا واني دفعت الفلوس . ومن فلوس قيس .
لان هو وعدهم وماردت اكسر بوعده الهم ..

مرت خمس اشهر ع وفاة قيس .. بس الوجع هو نفسـة وجع اول لحظه مات بيها ..

خلصت العدة وبيت ضرغام رجعوا البيتهم ..
صار الوكت ارجع الدوامي واوگف ع رجلي ..
اولادي محتاجينـي ..
امجد ماشفته بعد مااجـة ..
وكنت خايفه من هذا الهدوء ..
اتصالي وي وفاء مستمر ..

ومرة گالت امجد تغيير وطلب مني اعزمج انتي والجهال تجين لهنا . لازم مسرة تعرف اهلها وتتعود علينا ..

حور .. وفاء امنيتي يتغير ويرتاح قيس بگبرة . مااريده يتعذب وهو يشوفنا ناس تاكل ناس ..

بس اني هستونـي رجعت الدوامي . مااگدر اجي ..
اخذلي فترة واجيكم ..

ماما بقت عدنا .. وكانت مسرة تبقى عندها ..
شفت خط ياخذنـي ويجيبني ..
وقررت اسوي نقل ع دائرة مدنيـة او مصرف .
مااريد ابقى بالمحكمه وقيس ماكو ..
من داومت وشفت قاضي ثاني گاعد بمكانه متت ورت اعيط وحتى اتخربطت بيومها ..

رحت الاستاذ مظفر .. هو كبير بالعمر ومحترم .. زوجته اعرفها انسانه رائعة وتداوم بالضريبـة ..
كم مرة عزمناهم وعزمونا بحياة قيس ..

من شافنـي رحب بيه .. وعزانـي لان مشافني . والله شاهد المحكمه كانت كلها مقهورة عليه وكلها تلگتنـي وگالوا احنه هنا اخوانج واي شي ترديه گولي ..
بس مو بيدي لازم انقل منا ..
احس بخنگه من ادخل للمحكمه .

حجيت وي استاذ مضفر .. گال تددلين .. وگعد يسولف ع قيس وشلون خلانا بأمانته .. وحلفني بالغالي اذا احتاجيت اي شي اگله ..
گال .. ااااه ام مصطفى شگد گتله وحجيت حتى يتنازل ويشتري روحـة بس تعرفين قيس اكثر مني اذا حط شي براسه مايتنازل عنه والاهم هو رجال يخاف الله ومايقبل الظلم ..
هو هذا بلدنا الانسان الشريف مينراد ..

كنت اني بس استمع وبدون حجي . لان ماكو اي كلام يعبر عن جرحي ..

بعدين فتح شغله السيارة .. لان كانت محجوزة ..
گال راح اسلمها الج ..بأعتبارج مرته ..
واذا تردين اخليهم ياخذوها الحي الصناعي ويرتبوها لان يرادلها هواي تصليحات ..
گتله بكيفك ابو زين الي تشوفـه سويه ..

استأذنت ورجعت المكتبي ..
من شغلي للبيت .. اولادي بقوا بالمدرسة الاهليه .
بس قررت من تخلص السنه ارجعهم للمدرسه الحكوميه وخاصه هم مستواهم جيد ميحتاج اهلي ..
ولان اني بس راتب وفلوس قيس مااگدر اصرف منهن الجهالي .. احس هاي الفلوس من حق مسرة .
ابوها راد يضمن حقها بيهن .
وهم كنت اخذ منهن للفقراء والثوابات ..

بعد الحاح وفاء وبطلب من امجد ..
قررت اروحلهم الجمعه ..
اجرت ولد جيران اهلي ياخذنا ويجيبنا ..
صحيح گلبـي ممرتاح ..
بس گلت لازم انهي العداوة الخاطر قيس ..
بدلت المسرة واولادي .
وماما اصرت تروح ويانا گالت مااتركج وحدج ..
قفلت البيت وطلعنا من الصبح ..

وصلنا . رحبوا بينا ودخلنا .
كانوا مكبرين صورة قيس بالاستقبال ..
اجت وفاء حضنتني ..
وام هدى هم من شافتني گامت تبجي ..
وهدى وسعد ومرته ومرت امجد .. الكل موجود.
نجلاء ماهي ماشفتها ..

دخل امجد .. گال شلون ام مصطفى.
سلمت عليه عادي ..

تغدينا وكملنا ..
صاحنـي امجد للاستقبال ..
خليتي ولدي عند ماما ومسره هم ..
وگمت بقيت بس ام هدى يمها .

اني لزمت وفاء ومتوترة ..
همستلي وفاء .. لاتخافين اني يمج ..

گعدنا وكانو سعد ووفاء گاعدين هم ..

امجد .. باعي ام مصطفى ابوي اختارج وصار الي صار واني شايف المشاكل مامنها فايده ومايجوز اتعارك تالي عمري وي حرمـة ..

لهذا قررت .. نحل كلشي بتفاهم ..
وهذا البيت راح يبقى بيتج انتي ومسره وبأي وقت تجون واذا تردين ادليج بگبر ابوي وترحيله ماعندي مانع ..

التفتت ع وفاء .. خزرتنـي معناها مايدري اني اندل گبر قيس وجاي اروحله ..

كمل كلامـة .. انتي ابوي سجل بيت بأسمج يعني ضمن حقج وحق بنتج ..
والسيارة هم اخذيها مانريدها ولو هي اصلا ماتجيب سعر بعد ..
بس لازم تتنازلين عن كل حقوقج الي هنا وماتطالبينا بشي ..

استغربت .. حقوق شنو . قيس غير قسمة كله عليكم هو گال ..

امجد .. اي قسم علينا المزارع والاراضي .
بس بقى هذا البيت.  يسوة هواي واكيد يجي يوم تطالبينا بي .

حور .. لا مابحاجته اصلا .. ومااريد اي شي منكم .
امجد .. والاحسن عندي خيار الج ..
حور .. شنو هو ?? ..
امجد .. انتي شابه وعندج بيت وشغل والعيون راح تبقى عليج .
ومااريد اختنا تربى عند غريب . ولا ورثها يروح للغريب لهذا بدل متتزوجين واحد ما نعرفـة .
خطبج ابن عم ابوي .  هو ضابط ومو جبير يجي عمره اصغر من ابوي ومطلگ ووحدانـي ..
اني گتله موافق علمود اختي تربى گبال عيونه ..
وانتي انقلي شغلج وبعي البيت وتعاي لهنا ..

گمت من مكاني وگلبي يغلـي ..
حور .. انت شدتخربط .  منو انت وتقرر ازوج اولا .
امجد .. احترمـي نفسج ولاتعلين صوتج ..
حور .. احترم انت بالاول . ابوك صارله خمس اشهر من توفى وانت تفكر تزوجني ..
انت لا ابوي ولا اخوي تقرر فاهم .
وگتلك كلشي مااريد منكم ..
وحتى بنتي ماتريد . وواسويلك تنازل عن حقوقي بس اتركوني بحالي ..
اني اعرفك ماتنعدل واستغربت من عزمتنا عبالي صرت ادمي فعلا ..

امجد .. احترمي لج .. اذا معاجبج .. اتنازلي عن ذاك البيت الي ببغداد واتركج بحالج ومالي علاقـة بيج .

حور .. ههههههه بينت طينتك گول هيج من البدايه .
عشم ابليس بالجنه .. تحلم اتنازلك عن ذكرى قيس وحق بنتي ..
تركتة وگمت ..
گلتلها يله ماما گومي ..
اخذت بنتي .. وگلت الوفاء . لو اعرف هذا فخ جان مااجيت ..
وفاء تبوس بيه .. والله ماادري بي . لو ادري ماتورطت وجبتج . بس قشمرني وگال نفتح صفحة جديده شمدريني يكذب ..

اني مشتعله نار وقهر . سحبت ولدي واتصلت ع الرجال السايق گتله هسا تجي نريد نرجع البغداد ..

ماحسيت الا امجد سحب مسره مني ..
اذا ماوافقتي على واحد من الشروط تحلمين تشوفين بنتج .. اختنا واحنه نربيها ..

احس حرارة صعدت الراسي .  وعطت امجد رجعلي بنتي لااتصرف تصرف ميعجبك رجعهااااا..

يتبع…..

///// البارت الثامن والعشـرون /////

احس حرارة صعدت الراسي .  وعطت بصوت عالـي امجد رجعلي بنتي لااتصرف تصرف ميعجبك رجعهااااا..

امجد .. بكيفج تردين تبقين هنا وتوافقين تتزوجين لو تسوين تنازل عن البيت ..
او بنتج .. اختاري ..

تقربت يمـة .. تخسى اذا تجبرنـي اخذ شخص غير قيس . لان بعشيرتكم كلـها مااعتقد اكو رجال يوصل الضفرة ..

امجد .. ههههههه اضحكي ع روحج بهذا الحجي كلنا نعرف شلون ضحكتي عليه وخليتيه يتزوجج وليش ..

حور .. مو مشكلتي اذا صدگت او لا وماابررلك ..
انطينـي بنتي اجيت اريد اخذها .
دفعنـي حيل وگعنـي بالگاع ..

سعد .. امجد مو هيج ..
وفاء .. حرام عليك ليش هيج انطيها البنيه متشوفها تبجي ع امها ..
امجد .. خلي هي تفكر ببنتها مو انـي ..

ماما .. عزا العزاك . عبالنه صدگ تغيرت وراجعت ضميرك ماندري بيك ثعبان وسحبتنا الجحرك ..

حور .. ماما اخذي اولادي وروحي انتي .. وي السايق
ماما .. شلون اروح واتركج ..
حور .. روحي ماما وخلي ضرغام يجي .. مااگدر اترك بنتي هنا .

امجد .. لاتخوفيني بضرغام ماادري منو مااخاف بس من الي خلقني . تردين روحي وي امج ماتهمينا .
اختي واني اربيها حالها حال ولدي ..

صاح زوجته .. هاج اخذيها ..
سحبتها منها .. انطيني بنتي . تحلمون تشوفون اظفر منها ..

امجد .. لاانتـي ماتمشين بالعيني والاغاتي .. يرادلج العين الحمرة ..

سحبني من ايدي واخذ بنتي .. ودفعني بره واني اعيط ..
لك امجد اريد بنتي الله لينطيك انطينياها متنام اذا مو بحظنـي ..

دفعني وسد الباب ..
گمت ابجي وادگ الباب .. وماكو . شلون صدگت بي واجيت شلون ..

السايق .. يله عمي الشمس غربت . ترحون لو لا .
ماما .. ماتشوف ياحجي اخذوا بنتها بعد شلون ترجع .
حور .. شلون امشي ماما وبنتي تموت ماتتحمل بلاي . اذا ماتشم حضني مستحيل تنام ..

روحوا انتو ماما . واني راح ابقى هنا احاول ادخل الها . وانتي اتصلي ع ضرغام يجيني .
جنطتي بقت جوه بالبيت ..

بالگوة صعدت ماما والجهال وراحوا ..
واني بقيت بالشارع . الرايح والراجع يباوعلي ..

اجت جيرانهم مرة كبيره ولابسـة شيله سودة يسموها وعباية ع الراس .

تعاي يمه جوة لاتبقين بالشارع . انتي شتصيرين منهم .
دموعي ع خدي .. اني مرت قيس ابوهم ..

المرة .. ياانتـي البغداديه .. بعدج صغيرة سوده عليه بس شعندج هنا مو انتي ماقبلتـي تحضرين فاتحة المرحوم ..

دموعـي نزلن واعيط..  همه الي ماخلونـي منعوني اشوفـة واودعة واشمه .. توسلت بهذا الظالم امجد وماقبل حتى گبرة منعني اروحله ..
شلون مااقبل اجي وهو مات بحضني وعينه بعيني ..
قيس روحي ومن راح بقت بس جسد ..
وجاي تشوفين شلون استفردوا بيه واخذوا بنتي ..
بوجودة محد يتجرأ يسمعني كلمه ..
بس من راح الاسد اجت الكلاب وتجرأت عليه ..

المرة .. اووووووف گومي خاله گومي . حرگت گلبج هاي كافيه . مبينه بنت اصول وتحبين المرحوم .
الله لاينطي الخلانه ناخذ غيبتج ..

الدنيا ظلمت وهمه ماعندهم رحمه ومافتحوا الباب .
گومتنـي المرة وياها ..
ودخلتنـي البيتها .. كان بيت بسيط بس مليان دفئ .
عندها ثلاث بنات واثنين جناين ..
رحبن بيه وگابلنـي من گالتلهن امهن هاي مرت استاذ قيس ابن الحجي ..

شافنـي ابجي واحجي وي قيس ..
ااااه ياقيس شوف خلافك شنو صار بيه . 
الي كنت خايف منه صار ..
مارحمنـي ولا رحم بنتـي ..

اباوعلهن مگابلاتنـي ويبجن ..
عاطت بيهن امهن . گومن يله كل وحده على شغلها ..

وانتـي يمه گومي صلي واذكري الله هو الي يحل مشكلتج ..

گمت صليت ودعيت شويه ارتاحيت ..
جابن العشا ..
گلتلهن مااشتهي .. شلون اكل وبنتي هسا ميته علمودي
البنات داير مدايري ..
المريه .. يمه لاتخافين الله يحميها .. مدي ايدج حتى تصير عندج قوة المصايب مبينه رفيجتج من الصغر ..

اتعجبت الكلامها .. گلتلها اي والله خاله . من توفى ابوي واجتني المصايب من كل جهه واجه قيس وانتشلنـي من مصايبي . تالي القدر اخذة مني عبالك عنده عداوه وياي ومايريدنـي اتهنى ..

گالت اكلي وارتاحي وانـي افتحلج القرآن واشوف حالج شني .. لاتستحين ولدنا برة بالديوانيه . مايدخلون للبيت
وهذني مثل اخياتج ..

سوتلي لفة دجاج شويه وگالت هاج اكلي مني هاي .
اكلت شويه .
سألتنـي بنتهم . يگولون انتي قشمرتي ابو امجد واتزوجج وبعدتيه عن هنا وانتي سبب موته بس مبين عليج فقيره ومو مثل ماگالوا ..

گلتلها قيس جان كلشي الي . وهو الي رادني وسوه المستحيل واخذني . من دريت بي متزوج رفضته . بس گدر يقنعني بحبه . اني عندي اثنين ولد. حسبهم مثل ولدة وماقصر وياي .
بس ابنه ماحبني وحاربني من اول ماتزوجنا .
وهسا يريد يجبرني ويزوجني الاقربائهم واخذ مني بنتي وساومنـي بيها ..

المرة والي اسمها ام رضا ..
گالت اي يمه اصدگ . احنه وبيت الحجي عشرة عمر .
امجد ماذي من هوة صغير .
ومايحترم .
دللة الحجي .. ومن تمرضت امه ربته خالته صبحة هاي المنطقه كلها يجور منها ومن مشاكلها .
بعكس ام امجد هاديه وحبابه ..

…………………… ……………
اما قيس فتربى بينا واعرفـة . جان يحترم مرته ويقدرها .بس سودة عليه ماشاف شي من حياته .
خلصتها مرض بمرض وهو يراكض وياها .
حتى برة طلعها وعالجها ..
بس ابنه دوووم يتعارك وياه ويگله انت الي مرضت امي ودوم يتهمه عنده بنات ببغداد وتاركهم علمودهن ..
لحد ماسمع راح يتزوج ابوه .
بيومها گبت العيطه . وصار عرك ومهامش ..
ويگله راح تاخذ وحدة من گـ……  بغداد ..
وجان رافض زواج ابوه ..
وهي اصلا امه منتكسه حالتها ..
دووم اروح اشوفها .. وتگول امجد يعارك ابوه .
اني مادايمه الابوه ولليوم ماصرتله مرة وراضيه عنه من گلبي خلي يتزوج ويشوف حياته ..

بس ماتت المرة من نگ ابنها ومعاركة يوميه ..
صارت بوسطهم وفرفحت لمـا وگعت فد مرة ..

المرة تحجي واني صافنـة . يعني هو سبب موتت امه بعد ليش يتهمنـي اني السبب ..

قاطعتها گلتلها خاله اريد موبايل اخابر الاخوي يجي موبايلي بقى بجنطة بنتي عندهم ..

طلعت موبايل صغير مو كامرا من جيبها . هاج يمه خابري بس ماادري اذا بي رصيد هواي ..

دزيت رساله منها استحيت اتصل .. كتبت ضرغام اني حور اتصل بيه على هذا الرقم ..

ماطول بسرعة اتصل ..
حور انتي وين اني ساعـة واصير يمج ..
حتى اخذج ونشتكي ..

گلتلها اني ببيت مقابيل بيتهم بابه لونه ازرق ..
گال من اوصل اتصل عليج واطلعيلي .

سديته وتشكرت ام رضا ..
ام رضا .. لايمه العفو بس اكلي شويه لو اشربي سوب صوتج رايح من الصياح ..

صدگ شربت تشريب شويه احس بلعومـي ارتاح ..
گالت ام رضا .  جيبي القرآن يمه ..

انطيتها اسمي واسم امي ..
گعدت تقرأ .  گالت يمه انتي حياتج وعرة . وعندج ازلام رايدج بس مو من صالحج . كلهم شر وجيتهم مابيها خير .
احذري منهم ولاتأمنين بواحد ..
خلي ايمانج بالله وهو قادر يحل امورج ويسهلها ..

حور .. والنعم بالله .
بقيت شويه گاعده والبنات عبالك عندهم ضيف غريب بس يباوعن ويتبسمن ..
جنتهم تگلي لو وجهج عريض تشبهين شمس البارودي .
ضحكتنـي بوسط همي وحزنـي ..

ام رضا .. يمـة هذا اخوج يمكن يخابر .
رفعته ..
ها حور اطلعي اني ببابهم ..
تشكرت من ام رضا والبنات .. وگلتلهن اجه اخوي رايحة اني ..
ام رضا .. مودعه بالله يمه والله يباوعلج لاتخافين . فعلا ارتاحيت الكلامها وانطانـي القوة حسيتهـا من اهل الله .

طلعت شفت .
ضرغام وزياد الي استغربت من وجوده .
ووياهم ضابط لاخ صديق ضرغام ..

دگ الباب حيل زياد ويعيط . 
فتح الباب امجد هو وسعد ويستهزأ .
ها خير شعندكم .
باوعلي . بله هو هذا الي الله گدرج عليه .
جايبتلي كم واحد تهدديني بيهم ..

اسمعوا ولكم. شايفين المنطقه هاي كلها بكلمه وحده اخليها تفرمكم فرم ..
وسبق وان گلت . بتنا احنه نربيها . واذا اختكم ماتريد تفترق عن بنتها تتزوج واحد من عدنا وبينا حتى انأمن ع اختنا وحقوقها لان ادري بأختك ماتتحمل بلا رجل وباجر عكبه تجيب واحد مامعروف منو ويضل يدمغ بمسره وياخذ فلوسها ..

مااتحمل ضرغام وانطاه بوكس ع حلگة ..
وامجد ماسكت وصارت هوسه والشارع كله تجمع ..

الكل ملتهي بالعرك واني عيني ع الباب اريد فرصـة اخذ بيها بنتي ..

اسمع صوتها ومااشوفها ..
الضابط الي وي ضرغام . جاب شرطه من المركز واجه .
والظاهر مسولفلهم السالفه شنو .

گالوا وين امجد قيس ..
امجد . اني .
الشرطي . تفضل ويانا . وانتو هم تعالوا . اخذونا كلنا .
امجد يعيط ويگلهم هدوا علينا ببيتنا شتردوني اسكت .

الضابط .. انت متهم بخطف طفله .
امجد .. ياخطف هاي اختي واذا اريدها اخذها بأي وقت بعد ليش اخطفها .. بس لازم اني الي اسألها وين ودت اختي . بأهمالها ضيعتها وجايه تتبلى علينا المفروض اني الي اشتكي عليها ..

حور .. الله لينطيك انت اخذت بنتي وطردتني وگلت ماارجعها الا توافقين ع شروطي . لك تريد تجبرني اتنازل لو اتزوج لو بنتي . انت شنو من بشر ..
وين وديت بنتي اريدها…

الولد ماتحملوا كلامه .. بقوا يغلطون وهو يغلط وصارت هوسـة ..

الضابط .. كافي وين گاعدين . الي يريد يقدم بلاغ يقدم وهناك تصافوا بالمحكمه ..
احنه قدمنا ع امجد بخطف بنتي واحتجازها  .
وامجد هم قدم على ضرغام وزياد متهجمين عليه ..

اخذوهم للحجز . بس لان ضرغام ضابط وعنده معارف گدر يراوسها ..
زياد .. ابتليت بيج اني . كل زواجه تتزوجيها اقذر من الثانيه . وهاي تاليتها انسجن بسببج ..
حور .. ماجبرتك تجي ولااتصلت بيك .
زياد .. هاي فوگ ماتجيت بس صدگ الصوج بيه ..

مااهتميت وتركته . بعد مااشيل هم الاي احد بس همي واولادي ..

اخذنا ضرغام نرتاح بفندق ..
وگال الصبح نروح العمامة نتفاوض وناخذ مسره . اذا ماقبلوا مانتنازل ونخليه بالسجن .

اخذت موبايل ضرغام واتصلت ع وفاء .. الو وفاء حبابه مسره وين وشلونها خليني اجي اخذها .

وفاء .. حور مسره مااعرف وين اخذها امجد هو ومرته ومااعرف وين اخذوها .. شگد حاولت وياه ماقبل ينطيها الي يگلي مااثق بيج انتي وياها نفس الصنف ..

حور .. لامستحيل.  منين اخذها اني كنت گاعده بالباب الى ان ظلمت الدنيا ..

وفاء .. وروح ابوي ماادري اخذها من الباب الخلفي راح ورجع وحده .. وماقبل يگلي ..
حور اسفه انـي السبب لو مااني مااجيتي لهنا ..

حسيت اذنـي صارت بيها وشة ومااسمع وگع الجهاز من ايدي .. هذا وين اخذ بنتي . اگول جان گلبه بارد من يحجي خاف صدگ بعد ماينطيها الي ..
اااااه ربـي ليش هيج .  بنتي اريد بنتي .

ضرغام .. اهدي حور صيري قويه لاتخلين اي كلام يضعفج بنتج ارجعها الج لو اعرف ادخل وسط بيوتهم وحريمهم اجيبها الحظنج اجيبها ..

يتبع…………