حليب اسود ..للكاتبه شمس

من 15 و 16 و 17

    🌹🌹
///// البارت الخامـس عشر /////
حلـــيـب_أســـود
الكــاتبة_شـمــس

بيـن طيـات الحزن والالم والقهر ..
هناك شعاع من الامل والسعادة  ..
يخبئهـا الله لنـا على هيئـة بشر..

بعد مااتصـل ضرغـام وگال لگينـاهم .. كانت الفرحـة ماسايعتنـا كلنا .. ورغـم فرحتـي لكن عينـي مافارقت الموبايـل ..

وكأنـي منتضرة اتصال ..
وفعلا رن موبايلـي .. وفاء تتصل…
رديـت .. گالت بالخير حبيبتي حور هسـا بابا اتصل وطمنـي ..
حور .. شكرا حبيبتي ماقصرتـي والوالد هم تعب ويانة .
وفاء .. لايمعوده تعبيش ان شاء الله احنـة اهل ..

سديتـة منها وكنت متأملـة هو يتصل .. مثل مااتصل بوفاء جان يگدر يتصل بيه ويطمني ..
معقولـة اخذ على خاطرة منـي ..

(احجي بداخلي ) شبيـج حور .. انتي مصارلـج ثلاث اشهر من تطلگتي .. وماناطيتـة وجه وبكل مرة تصديه وهو انسان راقي وعنده كرامـة قابل يتوسـل بيج لو يذل نفسـة ..

دخلت فرح وفهمت صفنتي ..
گالت انتي بشنو تحسين اتجاه قيس حور ..

فزيت من صفنتي هاااا… مااعرف مترددة .. من اشوفـة احسد نفسي عليه لان اختارنـي بين هاي البنات كلها ..
وساعـة اگول هذا مجرد اعجاب لان وگف وياي وكان تعاملـة حلو ولطيف ..

فرح .. اثبتي على مشاعر معينـة وفكري زين حور
قبل لتنطين اي جواب .. هذا زواج مو لعبـة وخلي الي صار بيج عبره واتعلمـي منها .. اذا رايدة تتزوجيه كـ رد للجميل ..
فتراجعـي افضل . لان راح تأذيه وتأذين نفسج ..

هنا انتبهت الكلام فرح .. نفس كلامـة . گال اريدج انتي الي تختاريني برغبتج مو ردا للجميل ..
اوووووف لازم اصفي بالي هالفترة وارتاح حتى اگدر افكر ..

كنت طول الليل منايمـة ومنتضرة الصبح يجي وتقر عينـي بشوفتهم ..

وماصدگـت من شفتهـم .. رحت اركض مثل المخبله وكانوا اكو عمال برة ماگدرت اطلع بقيت بالمطبخ الى ان دخلوا وحضنتهم .. حسيت الدنيا رجعتلي ..
ابجي وهمه يبجون يگولون ماما گمنا نبجي عليج هواي .

ضرغـام.. والله هاي دموعج لو حنفية جان خلصت من زمان .. رجعوا الحظنج بعد شتردين ..

مسحت دموعي وضحكت .. گتلـة مااعرف شلون اجازيك ابو نور والنعم الاخو انت ..

نسيت زياد واگف .. ماعجبـة الحجي وطلع يم العمال
ضرغـام .. لايابة شسويت . الفضل كلـة الاستاذ قيس ..

گلتلهم اعذروني راح اخذهم اسبحهم وابدللهم ..
ماما وفرح طبخوا الغدا ووياهم ايمان .
سوينا غدا الوجه الله الرجعوهم ..
وكان الكل موجودين عمامي وخالتيزهم عدنا واحنه كلنا
وبالاضافـة للعمال ..

دخلتهم سبحتهم وبدلتلهم وگالوا ماما خلينا ننام بحضنج ..
فرشت بالگاع ونمت بالوسط ونيمتهم واحد ع اليمنى وواحد ع اليسرى ..

امسد براسهـم ومصطفى يسولف .. يگول بابا يگول ماما متريدكم بعد وگالت لتجيبهم الي ..
وماما حتتزوج وتعوفكم ..
واني راح اطلعكم للخارج اونسكم ورباب حتصير امكم ..

دموعي نزلن وهمه يحجون .. ليش هيج محمد رغم كل الي سويته مايوم نطيت بيك گدام اولادك ومايوم شوهت صورتك گدامهم .. بس هو هذا حظي ..
خيراً تعمـل شراً تلقـى ..

باوعتـلهم نايمين ..
اخذت موبايلـي فتحته ..
عيب لازم اتصل واتشكره ..
بس خاف تعبان ونام ..
اممممم بقيت متردده تالي تشجعت وضغطت اتصال ..
بقى يرن فترة ..
وجاوب .. گال الو .
-غمضت واخذت نفس وگتلـة شلون استاذ ..
-هلو حور شلونج قرة عيونج بشوفتهم ..
-كلـة بفضل الله وبفضلك .. مااعرف شلون اتشكرك .
-ماكو داعي تتشكريني ..
-الي سويتـة ماكو احد يسويـه ..
-ماسويت شي بس لان عندي اتصالات ومعارف الشغله تسهلت ..
-ولو تعبان بس حبيت اشكرك ع راحتك ارتاح ..
-لا راح اطلع هسا للدوام ..
-هسااااا بس .
-بس شنو .. وانتي هم لاتتعودين ع الاجازة داومي باجر الاولاد ورجعوا سالمين ..
-اي صدگ هواي قصرت وشكرا ع الاجازة ..
-حور انتي شبيج??
معقولـة انتي هيج بارده ..
شبيه ?? شسويت ..
لاهيج كلشي ماكو يله على راحتج مااعطلج ..

استأذن وسد التلفون .. هذا شبي اشو هادئ وفجأة تعصب .. وشنو بارده قابل شأسوي اخذة بالاحضان ..
والله ياربـي .. يلـة هو ويامن گعد حظي ..

حضنت اولادي ونمت ..
گعدونا ع الغدا .. گعدنا سفرة وحدة كلنـا ..
وضرغـام يسولف شلون راحوا وقيس شسوه وشلون وصلوا للشقه الي مأجرها محمد ..

حور .. ومحمد هسـا وين ..
ضرغـام .. محمد من شافنا خاف اصلا .. ولان احنـة تحركنا بدون دعوه او امر قضائي ماگدرنا نسوي .
بس اخذنا الجهال وگلناله نلتقي بالمحكمه ..
بس اكو ولد صديقه هو الي شهد عليه وگال جان ناوي يسافر للخارج ويهربهم ..
يعني كل الامور انقلبت ضده ..
بين سالفه وضحكة گضيناها .. اباوع ع الوجوه شلون تضحك والسفره ع طولها مفروشـة ..
اااااه فعلا كنت محتاجه هيج جو يحسسني ولو لمرة بالامان ..

اولادي كانت راح تبدي امتحاناتهم النهائية ..
رحت للدوام واخذت اجازة ساعتين ..
ورجعت اخذتهم للمدرسـة ياخذون الجدول وحجيت للمديره قصتهم وتعجبت گالت الي قاهرني الاولاد خطيه تبهذلوا بينكم ..

رجعتهم للبيت ورجعت للدوام ..
طلبنـي استاذ قيس رحت .. كانت عنده قضيه .
سلمت رد السلام عادي ..
بقيت يمه الى ان كملت القضيه والكل طلع ..
گتلـة استاذ محتاج شي ..

گال لاشكرا اخذي راحتج .. مااعرف ليش ضجت وحسيت روحي انذليت . اشو هذا من گتله اذا رجعوا جهالي يصير الي تريده گام يبيع ثگل ..

مااهتميت وطلعت .. وگمت اتجنب الكلام وياه وهو كذلك
ع گد الشغل وبس ..
بقلمي_الكاتبة_شمس
…………………………………………
انشغلت بين الدوام وبين امتحانات اولادي ..
ماارتاحيت ابد ..
ادرسهم واگعد من الصبح اراجعلهم وابدللهم وبعدين اخذهم للمدرسـة واروح الشغلي ..
وخليت الخط مالتنا هو يوصلهم للبيت بعدني اخاف من محمد ..
محمد حظرتـة نهائي وبعد مااعرف اخباره ولااريد اسمع صوتـة ..
ماصدگت خلصوا اولادي امتحانات ونجحوا الاوائل ..
فرحتي بيهم كبيرة ..
والفرحـة الاكبر هو لمـا حكم القاضي الي بالحظانـة ..
بيومـها كنت خايفـة ومتوترة ..
اجـة ضرغـام اخذني ورحنا للمحكمه ..
شفت محمد ردت اروح اطلع قهري بي وعذاب گلبي الي خلاني من اخذ اولادي ..
بس استغفرت ربي وهدأت ..

هو كانت عينه عليه ويخزر وماشالها ابد ..
الى ان دخلنا يم القاضي ..
والمحامي مالتي طلع كل التقارير مال المستشفى واصبع رضاوي من انجرح والوثائق الي تثبت الادانـة ع محمد بخصوص تهريبهم للخارج ..
طبعا هو ضاج .. وحس بنفسـة خسر كلشي ..
لما حكم القاضي الي بالاولاد وحقوقي ينطيها الي خلال شهر ..گعدت بالگاع من فرحتي وماتحملت ..
واخيرا ربي نصرنـي عليه ..
واخيرا اخذت حقي منك محمد ..

طلعت وعيوني تدمع من الفرح .. ضرغـام يبتسم وگال مبروك خيتي ..
تشكرنا من المحامي وگاله ضرغام اتعابك كلها توصلك ..
گتله خلينا نطلع بعد مااتحمل من فرحتي ..

طلعنا بره اجه احد وسحبني الة .
التفتت محمد ..
سحبت ايدي منه ..
گال .. حور سامحيني حور تصرفت بتهور ولاوعي . ارجعيلي حور ومستعد اسوي كل الي ترديه حتى اذا تردين اطلگ رباب اطلگها .  بس ارجعيلي مااگدر بلاج انتي واولادي ..

باوعتلة بشماته .. گتله هذا اليوم الي كنت انتظره واجه تحلم يامحمد ارجعلك بيوم انت خسرتني وللابد ..
هدمت عائلـة بكاملها .. عائلة موفرتلك الامان والراحة تركتها عنود وحدة متسوة فلس ..
اتحمل تتائج نزواتك ..
واذا كنت اشوف جهالي يومين بالاسبوع وانت تمن عليه بيهم .. فهسـا القاضي حكملك ساعتين بس وبالمحكمه مو خارجها تشوفهم .. وهذا اكبر عقاب الك ..

من شافني صديته ومانطيته مجال ..
گام يعيط ويهدد ويگلي اعرف ليش ماترديني بسبب القاضي الي ضحك عليج وصدگتيه ..
بيومها فضحني وضرغـام راد يضربة واني منعته . صعدنا وتركناه يهدد ويتوعد ويگلي مصيرج ترجعيلي حور ..

مااهتميت الكلامـة محمد صفحة وطويتها من حياتي وانتهـت ..

گتلـة ضرغـام اليوم عشاكم عليه كلكم نطلع بره ..
ضرغـام .. اگعدي يموعده هو انتي شعندج ..
حور ..  عندي الحمد لله ولاتنسا هذا الشهر راح اخذ حقوقي كلها من محمد ..
ضرغـام .. قابل تصرفيهن كلهن خليهن ذخر الج والولدج
حور .. الله كريم خويه مادام ولدي رجعولي مااريد لامال ولاجاه المهم همه بحياتي ..

بيومها احتفلنا بره .. وتونسنا وتعشينا وحتى بيت زياد طلعوا ويانا ..
كان يوم مميز بالنسبـة الي . 
نسيت همومي كلها وراي وبديت بصفحة جديده كلها حب وسعاده واني اباوع ع الضحكه المرسومـة بشفاه اولادي وفرحتهم لان راح يبقون يمي ..

اشتريت تاب الكل واحد لان عطلة وينشغلون بي ..
زياد استرط الاشتراك الدفع بالنص ووافقت ..
عمود جهالي يلتهون وميطلعون برى ..
محل ايمان قرب يكمل وطلعت هي وزياد اشتروا تجهيزات للصالون ووياهم البنيه صديقتها دوم تجي عمود تساعدها .. لان هي هم دفعت وياهم فلوس للاجهزه بأعتبار شريكتها ..
بس زياد مااعرف منين جاب كل هذي الفلوس وهو اسمـة يبجي ماعندي ..

طبعا ايمان كفت شرها عني بعد ماكمل بناء الصالون لان انشغلت بي ..
ومااشوفها بس بالليل تتعشا وتصعد تنام ..
يعني البيت هدوء نوعا ما ..

قيس صار بارد اتجاهي ومااشوفـة هواي ..
بس وقت الشغل ..

كان اكو ضابط بالمحكمـة مو راحـة .. دايما يجي يسلم واني مااعيرله اهتمام ..
بس هو مايبطل كل شويه وجاي بشغلـة ..
كان استاذ قيس من يشوفـة يسأل لو يريد شي تبقى عينـة عليه ويخزر ..
يوم من الايام .. ردت اطلع وهذا الضابط اصر الا يوصلني تعذرت وگتلـة مااريد وعندي خط للمهم بالگوة خلصت منه ..

ردت اصعد للخط ..
اجتنـي رسـالة من قيس.. هذا شعنده وياج وشيريد . 
باوعت منا منا مااشوفة لعد شلون شافني ..
صعدت بالسيارة ودزيت ..
-ماكو شي راد يوصلني وماقبلت ..
-اذا ضايقج گولي .. لان هذا مو راحة لاتنطيه وجه .

صدگ نرفزني شنو انطيه وجه قابل شايفني اضحك لو اسولف وياه ..

مارديت عليـه ولااهتميت .  الي يشوفة يگول ولي امري وهو اصلا مامهتم الي .  وحتى وفاء صارلها فترة متراسل ..

ثاني يوم بالدوام ..
صاحنـي المكتبه اول مادخلت هو ورى الباب ..
گال حور وهو معصب ويفرك بوجهه ..
اني من ردتج وطلبتج من اهلج يعني صرتـي تخصيني مامسموح الاي احد يسولف وياج او تسولفين وياه ..
تردين تخبليني انتي ..

گتله .. استاذ ملاحظ انت دا تتهمني بشي ممسويته .
قيس .. اعرفج انتي شنو ومااتهمج لان واثق منج ..
بس هنا محكمه واشكال تدخللها قابل اتعارك وي كل واحد يحجي وياج واسوي فضيحة ..
مااريد احد يجيبج بالكلام ..
اصلا لو بيدي جان نقلتج الغير مكان ومااخليج هنا .

حور .. ليش اني لعبه كل يوم ناقلني المكان ..
قيس .. ردتج يمي قريبه حتى احميج .. بس مااگدر احميج من عيونهم .. لان ماكو اي صفـة تربطنا ..
اذا حجيت بصفتـي شنو ..

سكتت من گال هيج ..
حور انطيني كلمـة تخليني اسكت الكل واخلي اصبعي بعين كل الي يباوعون عليج ..
احجي اذا ماترديني گولي حتى اشيلج من بالي وماابني امال فارغـة ..

باوعتلـة گتله انت انسان رائع واي وحدة تتمناك ..
قيس .. يعني موافقـة ..
حور .. بس انطيني وقت امهد الطريق الاولادي ..مااريد اصدمهم ..
قيس .. الج كل الوقت بس مو تطولين عليه ..
ابتسمتلـة وطلعت ..
بقلمي_الكاتبة_شمس
يتبع……

مساء الخير

       ..   🌹     ..
  🌹
///// البارت السادس عشر /////
حلـــيـب_أســـود
الكــاتبة_شـمــس

أشهر وانـي اعـانـي ومتعذبـة من محمد واخويـة والدنـيا ..
مااعرف قيـس منين طلع وشلون گدر يحتل حياتـي بهـذي السهولـة ..
كلماتة وعصيبتـة وغيرتـة كلها عجبتنـي وحسستني بالامـان ..
طلعـت من الدوام للبيت .. كانت عطلـة الاولاد تلگوني للباب ..
فرحتـي بشوفتـهم يمي ويتلگونـي هيج تسـوة الدنيا ومابحاجـة زواج او احد غيـرهم ..
بس اهتمـام قيس واعجابة واصرارة عليـة خلانـي اعيد حساباتي وارجع افكـر من جديد ..
استرجعـت كلام فرح  ' ماما ' صديقـاتي ..
كلـهم يگولون لازم يكون الج سند .. اولادج صغار واذا كبروا كلمن ينشغل بحالـة والي يتزوج وترجعين للوحدة لازم اكو شخص يملي عليـج حياتج ..

بعد ماتغديت وكملـت .. سولفت الماما كلام قيس .
وگلتلها انطيتـة كلمه احجي وي الاولاد وارجعلـة خبر

ماما .. ياامـي همه جهال شمفهم ..
حور .. لامـامـا كلشـي يفهمون ويحسون ماشفتـي شلون يتعاملـون وي مرت ابوهم وشنو يگولون عليهـا.

لليل .. گعدت انـي وياهم بالاستقبال ..
گلتلهم ماما انتو كبرتوا وصرتوا ابطالي الي تدافعون عني وتحمونـي ..
رضاوي .. اي ماما اني احميج ومااخلي بابا ياخذنا بعد .
حور .. حبيب ماما انت ..
من اخذكـم بابا الاربيل وراد يسفركم .. منو الي نقذكم ومنه ورجعكـم الي ..
مصطفى .. خالو ضرغـام وعلم دار ووياه جماعته ..
حور .. علم دار منو ??
رضاوي .. هذا الي وي خالو مثل علم دار حلو وخوف بابا ورجعنا الج ..
حور .. ههههههه اي هو تحبوه لو لا .
مصطفى .. اي نحبه واحنه سميناه علم دار لان بطل
حور .. هذا علم دار طلب مني طلب .. وگتله اشوف اولادي وارجعلك خبر ..

بقيت صافنـة بالدقايق وخايفه من ردة فعلهم وهمه صافنين ع حلگي يردون يعرفون السـالـفه ..
مصطفى .. يلـة ماما گولي ..
حور .. عمو علم دار يريد يتزوجنـي ونصير كلنـا ببيت واحد ونعيش سويـة ..

بقوا صافنين بوجهي واني منتضرة ردة فعلـهم ..
حور .. ها ماما شگلتوا ..
گالوا .. يعني يخليلنا بيت وحدنا احنه وياج ..
حور .. اي حبايب
مصطفى .. وبيت خالوا زياد مايجي ويانا نصير وحدنا ..
حور .. اي ماما نعيش وحدنا بيت خالو زياد يبقون هنا يم بيبي ..
رضاوي .. اي ماما اذا نعيش وحدنا وبعيد عن هنا نقبل لان خالوا زياد وخاله ايمان يخوفون بينا ويگرصون بينا اذا صعدنا فوگ مانحبهم ..

حور .. تعجبت وانقهرت من اولادي يوافقون على شغله همه اصلا مامفكرين بيها بس حتى يخلصون من زياد ومرته .. لعد شگد مأذيهم واولادي متحملين وساكتين ..

حور .. ماما عيب هذا الحجي هذا خالكم واكبر منكم ميصير ..
مصطفى .. بس ماما هو ميحبنا ويگول نفس ابوكم انتو ومره انتي بالدوام راد يضربنا ولزمته بيبي ماخلته ..

انقهرت حيل وتأذيت ..
گلتلهم يعني هسا انتو موافقين اتزوج عمو قيس حتى نروح منا لو انتو تحبوه ..
مصطفى .. حتى نروح منا ونعيش وحدنا .. وعمو قيس حباب مايضربنا لان اشترالنا ولعب ويانا ..
مو مثل عمه رباب تصيح علينا ..

اااااه ياحور .. اطفالج بعمر الورود ويحسون بألم ويفرقون بين الي يكرهم ويحبهم .  ربي اجعل هذي الخطوه الصالحهم ..
اذا زواجي من قيس راح يسعد اولادي ويعيشهم مرتاحين تممها بمشيأتك ..
واذا تأذيهم ابعده عنـي ..

گلتلهم يله خلونا ننام .. بقوا شويه ع موبايلي يباوعون كارتون باليوتيوب ..
ودور نامو ..

ثاني يوم داومت .. وكانت عينـي تدور قيس .. مااگدر ادخل غرفتـة بصوره مباشره .. لان العيون كلها تراقب واي تصرف اجيب الكلام النفسـي ..
بقيت گاعده على مكتبي مرات اكو محاميات يجن يمي يگعدن ونگعد ندردش ..
بس هالمـرة بالي ابد مو يمهن ..
اتوقعت اول ميجي يسلم او يمر من يم الغرفـة هسـا ابد ماكو كل اثر اله ..
يمكن ماجاي اليوم بس هو ملتزم بدوامـة ممعقوله يتأخر اذا ماعندة ضرف قوي ..

خلصنا الدوام وطلعنا وهو ماكو ..
يوم يومين وهم ماكو ..
قلقت حيل وصفنـة تاخذني وصفنـة توديني حتى الكل حاس عليـة ..

تالي گلت ماكو حل عندي غير اتصل بوفاء بحجة امها ..
اي شلون نسيت گالت ماما مريضه ..
خاف صار عليها شي والهذا السبب قيس مختفـي ..

بلا تردد بسرعـة اتصلت بوفاء تأخرت يله ردت ..
هلو حور شلونج وكان صوتها مخنوگ ..

گلتلها شبيج وفاء صاير شي شبي صوتج ..
وفاء .. ماما تعالج صارلها كم يوم حالتها حيل تعبانه ..
حور .. عندها العافية ان شاء الله ومتشوف شر ..
وفاء .. ربي يسلمج حبيبة .. اعذريني مااگدر اطول الكل بالبيت وهوسة ..
حور .. لا ع راحتج معذوره ربي يساعدكم ويشافيها ان شاء الله..

سديتة منها واني خجلانـة من نفسي .. ماعرفت شأحجي اااه ياحور تفكرين بنفسج والمرة بين الحياة والموت ..
ربي شافيها وعافيها الاولادها ..

رحت خبرت ماما ضاجت حيل وانقهرت عليها ..
اني اداوم عادي بس احس الدوام مالـة طعم بدون قيس ترك فراغ بداخلـي قوي ..
ملأ حياتي بأشهر قليله .. احساس مااعرف اوصفه ..
مو مثل احساسي بمحمد ..
ذاك رغبة لان كنت صغيره وانعجبت بي وحبيته ..
بس قيس لا .. احساسي بي اكبر من الرغبة والاعجاب
حسيته يتغلل بروحي وبكيانـي ..

اشبهه بالجو الحار وانت عطشان وينطوك كاسه مي بارده حيل .. من تشربها تحسها تسري بكل جسمك وتشعر ببرودتها ..
احساسي بقيس هيج .. بقيت انتظر يوم يوم حتى اشوفـة وماكو ..
بقلمـي_الكاتبة_شمس
………………………………………………
الـى ان سمعت من الموضفين استاذ قيس توفت زوجتة
ضجت حيل وانقهرت ..
اتصلت ع فرح وگلتلها ..
گالت عيب منهم خلي اخبر ضرغـام وباجر من الصبح نروحلهم ..
حور .. خاف عيب امشي او يصير حجي ..
فرح .. على شنو يصير حجي .. قابل مخطوبين رسمي هو بس حجي . وبعدين ضرغام يعرفه وعيب من الرجال مانروح نسيتـي وگفته ويانا ..
حور .. اي صدگ بس شنو البس ..
فرح .. البسي عبايه اسلاميه وشال اسود شتلبسين ..
حور .. لا مو گلت البس عبايه ع الراس خاف عيب ..
فرح .. وج شبيج انتـي هو انتي عندج عبايه ع الراس اصلا وبعدين كلمن يلبس حسب عادته وانتي قابل شطالع منج ..عود خبري ماما تروح ويانا هم ..
حور .. لعد وجهالي وين اخليهم اذا راحت ماما ..
فرح .. نخليهم همه والبنات عندي بيت عمي ابو ضرغام لان عمي ومرت عمي هم يمشون احتمال ..

وفعلا خبرت ماما وگالت اروح وياكم فشله من ام هدى وابو امجد ..

ثاني يوم طلعنا سيارتين ..
بس زياد ماقبل .. گال عندي شغل واتعذر ..

اني صعدت وي ضرغـام وفرح ..
وماما صعدت وي عمو ومرت عمو ..

ضرغـام مايعرف عنوانهم بس ع الوصف ماخذة من جماعتة ..
مشينا هواي يلة وصلنا البيتهم .. كان بيتهم مو بمركز المحافظة بقضاء ..
وكانت اكو نزلة وبساتين يلة وصلنا ..
الصراحـة تفاجأت من المكان والبساتين وماتوقعت سكانين هنا .. الى ان وصلنـا البيت كبير حيل وبناء حديث وعالي ..
مرتب وحلو ..
بس كانت ناس هواي جايه .. ومسوين جادر للرجال غير الاستقبال الخارجي الي مليان ناس ..

ماگدرت اشوفـة من بين الناس .. بسرعـة ضرغام وصلنا يم باب بيتهم نزلنا وهو وعمو راحوا يم الرجال ..

دخلنا لگينا نسوان هوسـة وكلها عينها علينا واحنـة مانعرف احد ..
دخلوا ماما ومرت عمي قبلنـا ..
نسلم ومانعرف احد .. بس گلنالهم احنـة من بغداد ..
الكل رحب بينا واستقبلنا وعبالك مااعرف منين جايين .

دخلنا لجوه وكانت ساعة 11 الضحى ..
صارت عيني ع وفاء شافتني طفرت بسرعـة .
سلمت علينا ..
بوستها وگلتلها البقيـة بحياتج ..
وعرفتنـي على عماتها واختها ومرت اخوها الكبير هدى اعرفـها ..
من تگللهم حور صديقتي من بغداد .. تبقى عيونهن عليه
وصلت النجلاء بنت قيس الصغيره ..
ردت ابوسهـا دارت وجهها . اني گلتلها البقيه بحياتج ومشيت ..

گالت تعالوا اگعدوا جوه بغرفـة بابا ..
لان ازدحام فضيع بالصاله ..
گعدنا بالغرفـة وجابولنا مي ..
الغرفـة طرازها قديم حيل بس نضيفه ممكسره يعنـي محافضين عليها ..
كانت عيني عليها بكل تفاصيلها ..
جذبت صوره ع الحايط قديمـة .. بيها قيس والمرحومة مال زواجهم ..
هي سمره بس شكلها محبوب قهرتني حيل نضراتها ووگفتها اما قيس حاليا احلى من قبل .
بقت عينـي عليها الى ان گرصتني فرح گالت نزلي عيونج عيب .
حسيت ع روحي ..
ماما انطت فلوس للمله حتى تقرأ لان احنه مجايبين مله ويانه ..
وگامت تقرأ .. فعلا صوتها يبجي ..
شلون تحجي ع الام وفراگها .. اباوع الماما وابجي ربي احفظها الي واجعل يومي قبل يومها ..

مقابيل الباب كانت وفاء ونجلاء گاعدات ..
نجلاء موتت نفسها وتعيط ..
ووفاء هم تبجي بس مو مثل نجلاء ..
وتگول يمـة منو النا بعدج يوووووم محد ياخذ مكانج يمممممة ..

مااعرف ليش حسيت نفسي بموقف محرج كأنه جايه بعزا والدتهم حتى اخذ مكانها ..

گلتلها يله ماما خلينا نسلم ونگوم .. گالت غير يخابر ضرغام قابل نروح بنص الزلم نوگف ..
احس روحي اختنگت وتضايقت ..
واني اشوف الوجوه كلها تباوع ..
رغم ترحيبهم وكلامهم الطيب .. الا انه اكو علامات استفهام بوجههم ..
شعندج جايه وليش ??

قريب الغدا ..
اجت ام هدى گعدت يمنا ..
گالت غداكم هنا ماكو طلعة اليوم ..
ماما .. تسلمين بعد گلبي بس ورانا طريق ..
ام هدى .. نغديكم ونقوم بواجبكم ونگلكم الله وياكم مانأخركم ..
بعد اصرار ام هدى .. وگالت عيبه بحقنا اذا طلع خطارنا بلا غدا .. وهمه مبينين ناس عشاير وكذا ..

وضرغام اتصلرهم نفس الكلام .. گال ميقبلون نطلع الا نتغدا ..

صبوا الغدا وگعدنا ع سفره وحدة ..
ويانا ام هدى ووفاء زواجات ابن قيس ..
بس نجلاء ماگعدت ..

شويه واجت مريه كبيره بالعمره وكفت تخوزر بيه تخوزر
واني منصيه راسي ماباوعتلها ..
گالت .. وفاء هي هاي ..
وفاء .. خاااله واشرتلها ..
المريه هزت اديها وگالت ماكو خشى جايه بعزاها وتاخذ مكانها اني ادري شلون فرت راسه هالزعطوطه ..

هنا گامت اللگمـة بالگوة تدخل البلعومـي ..
شربت مي وگلت ثواب واصل ان شاء الله

ردت بس اطلع منا ..
بقت ام هدى ووفاء وعماتهم يتوسلن ويتعذرن ..
بس ماما گالتلهن ..
عادي نعذرها حزينه على اختها بس يداده احنه جيتنا الخاطر وقفت استاذ قيس ويانا مو الشي ثاني ..

[طبعا من هذا اليوم ماما قفلت وغيرت رأيها ..
گالت اليوم هيج حجوا .
باجر يطلعوج انتي الموتيها .. ولاعبالك هي مريضه صارلها سنين ..]

وفاء اخذت موبايلها وگامت وام هدى لسـا تتعذر 
فرح اتصلت ع ضرغام وگالتله يله بسرعه ..
بقلمي_الكاتبه_شمس
…………………………………
سلمنا وطلعنا ..
وام هدى تگول امسحوها بوجهي ..
من طلعـنا صار قيس بوجهنـا بالحديقـة ..
لابس دشداشة ولاعرفتـة ..

سلم علينا وامي گالتله البقى براسك ..
عينه صارت عليه ..
گتله البقيه بحياتك ابو امجد ودنگت ..
هو اتعذر الماما وگالها احسبوها عليه ..
وفاء اجت بوستني واعتذرت ..
حور .. لا عادي شنو ذنبكم انتو هي الي حجت انتو شعليكم ..

ماصدگت طلعنا منهم .
احس نفسي اختنگت

طول الطريق اني ساكته .. وفرح تسولف الضرغام ومقهوره ..
مااتحملت عطت .. گلتلها فرح خلينا نكون واقعين ..
استاذ قيس خطبني ..
وهو متزوج ومن توفت زوجته اني رحت بالفاتحه بنيه صافيه بس همه فسروها بغير تفسير .
المفروض ما كان لازم اروح .. غلطت حيل .

ضرغام .. حور لاتصيرين عاطفيه وبكلشي تنهزين وتضعفين .. يعني اذا تزوجتي راح تسمعين اشكال حجي خليج متوقعه الهذا الشي .
مايگولون هي مريضه وماتت والرجال من حقه يتزوج لا يطلعوج انتي الاخذتي منهم .
مع العلم هو حياته كلها ببغداد ..
اسمعي وعبري . انتي مو دائما يمهم ولاهمه يمج عيش حياتج واسعدي الرجال كافي كلشي تلومين بروحج وتنكدين حياتج ..

اني ساكته ومااعرف شلون اوافق ..
كنت متأمله اعيش حياتي وارتاح بعد الي شفته .
بس بعد هسا منو يگول راح اقبل ادخل للنار برجلي مرة ثانيـة ..

مرت الايام ورجع استاذ قيس يداوم ..
حسيت بعيونه قهر ومبين ضايج عليها لان هو كان يعزها حيل ويحترمها .. انسان بمعنى الكلمـة ..

بيومها اشترى كباب للمحكمه كلها ثواب الروحها ..
اني سلمت عليه وابتعدت عنه ماردت ااثر عليه او على حزنة ..

بقينا شهرين احنه واحد بعيد عن اللاخ هو يحتاجني مرات بقضاياه وعيني تراقبه وتراقب تصرفاته بس هو ممنتبه الي شاغل تفكيره الشغل والقضايا وبس ..
ردت احاول اطلعـة من حزنه شويه بس مااعرف شلون .
طلع الاربعين وهو الحزن بعده بعيونـة وبملابسة اغلبها اسود يلبس ..

كلمـا اريد اقترب منـة اكو شي يبعدنـي ..
علگني بي وخلاني افكر بي وتالي هجرنـي ..
يمكن للحظة صرت انانيـة وگمت اغار من انسانه ميته ومايربطها بي بس الذكريات ..
او يمكن گمت اغار من هذي الذكريات ..
احسـها بعدته عنـي ..

وارجع استغفر ربي واگول ربي لاتحسبها ذنب عليه الله يرحمها ويصبره بس گلبي حبه ومالي ذنب بهذا الشي انت الي خليته بگلبي ..
گتلك ياربي اذا مو من صالحي ابعده عنة بس جاي اشوف نفسي اقترب اكثر واكثر ..

صافنـة بغرفتي .. ودخل قيس ..
باوعت بعيونـة وممصدگة اول مرة من شهرين يمر المكتبي ..
گال حور اذا تگدرين بعد الدوام نطلع برى عندي كلام وياج ..
من غير كلام ولاتفكير هزيت براسي وگتله ان شاء الله.
هالمرة حسيت مو اني الي نطقت حواسي وعيوني وعقلي وگلبي همه الي نطقوا بدالي… !!
بقلمي_الكاتبة_شمس
يتبع……

   🌹
   😚
///// البارت السابع عشر /////
حلـــيـب_أســـود
الكــاتبة_شـمــس

أحببتـك بصـدق ..
ولكن لااريـدك ان تكـون حلماً يعبـثُ بـي ثم يترگنـي مبعثـر ..
اريـدك ان تكـون لـي معـي بـي لأجلـي للأبـد 
بـكل ما في هذا الكـون من أنانيـة 💕

كانت الدقايق اشبه بالساعات مايمر الوقت بسرعـة ..
واني عينـي ع الوقت شوكت ينتهـي الدوام ..
كان اشتياقي الصوتـة والكلامـة ماينوصـف عبالك سنين طويلـة نعرف بعضنـا ..

بعد انتهـاء الدوام .. رتبت نفسي وطلعـت ..
حسيت روحـي مراهقـة واني امشي بعيد عن المحكمـة حتى يجي وياخذنـي گال انتضرنـي بمكان محدد..

اجـة يمي بسيارتـة بس من غير حمايـة ..
نزل گال خليتج تنتضرين ..
گتلـة لا هسـا وصلت ..
صعدت وكنت خجلانـة لان گعدت يمـة ..
الطريق كلـة ساكتين ..
ردت اقطع الهدوء گتلـة الاهل والبنات شلونهـم ..
قيس .. الحمد لله .. الابطال الصغار شلونهـم ..
ضحكت من ذكرهـم ..وگتله بخير ..
گال ليش ضحكتي ..
حور .. لا بس تذكرتهم من يگولون عليك علم دار .

ضحك هو بصوت وكانت اول مره اشوف بوجهه هالضحكه بعد وفاة ام امجد ..

قيس .. ليش اختاروا هالاسم ..
حور .. يمكن حسوك بطلهم لان نقذتهـم من ابوهم قبل ميسفرهم ..

باوعلي بنضرة تساؤل گال وانتي شتحسين ناحيتـي ..
ابتسمت ونصيت راسـي ..

هو هم سكت ..
وصل يم مطعم .. گال لا تنزلين هسـا اجي ..
دخل للمطعم اتصلت الماما ..
گلتلها يووم راح اتأخر شويـة عندي شغل ومن اجـي افهمج ..

شوية ورجع بيده علاگة كبيره خلاها بجنطة السياره وصعد ..
حرك السيارة ..ومشينـا ..
دخلنا المنطقـة راقيـة اني استغربت ..
گتلـة وين رايحين احنـة ..
گال ليش خفتـي منـي ..
حور .. لا مو قصدي بس مجرد سؤال ..
قيس .. ماردت احد يشوفنا بمكان عام قبل ميصير كلشي رسمي ..
واني بالاصل گاعد ببيت بالتجمع وبي حمايه .
وماردت اروح هناك اجينـا الهذا بيتي الثانـي ..

حور .. بيتـك ??
قيس .. اي بيتـي ليش استغربتي ..
حور .. لا بس اعذرنـي مااگدر ادخل وياك .. اني عبالي نروح المكان عام ..
قيس .. شبيج حور ليش محسيتنـي مراهق وجايبج الشقتـة .. اني ردت نگعد بهدوء ونحجي وبعيد عن الناس ..

حور .. عادي نروح بغير مكان نگعد ..
قيس .. حور انتـي شتحسين اتجاهي .. من تشوفيني شتحسين ..
حور .. بقيت صافنه بوجهه مااعرف ارد ..
عيونـي بعيونـه ..
قيس .. اذا هاي نضرتج الي شتخليج تحسين ولو الي بيهن كافي .. عيونج فضحنج حور وگالن كلشي ..
حور .. قيس اترجاك ..
قيس .. قيس بدون استاذ حلوه بحلگج ..
دگومي يعني اني ميت جوع وانتي جوعانه ناكل لگمه ونكمل ونخلي النقط ع الحروف ونطلع ..

سكتت بعد اصراره ويمكن گلبي هو الي سكتني بس الغريبه عقلي صف وي گلبي عليه ..

نزل فتح باب البيت ودخل السياره لجوه ..
نزلت وعيني ع الحديقـة مرتبه ومصممه تصميم راقي ..
واكو طاوله وكراسي خشب بوسطها وعبالك مسكون البيت مو فراغ ..
ومرجوحة ع الجهه الثانيـة ..
فتح باب المطبخ ودخل الاكل ..
كان المطبخ كله مارونـي واسود .. تصميمه حلو ..

خله الاكل ع الكاونتر ..
طلع مواعين وغسلهن ..
وخلاهن ع الطاوله ..

اني بس صافنـة ..
قيس ..ها تجين ترتبين وياي لو تبقين خايفه هيج ..

ابتسمت واجيت اساعده .. جايب مشاوي ومقبلات وخبز وسفن ولبن ..
رتبناهن واخذهن للصاله ..
جبت الگلاصات واجيت وراه ..
دخلت للصاله ماتنوصف بأناقتـها ..
كانت كلشي بيها باللون الرمادي..
ترتيب كلاسيك وراقـي ..

حور .. متأكد محد ساكن هنا ..
قيس .. ههههه لا محد بس الاولاد من يجون البغداد اجيبهم لهنا . بس اكو فلاح وزوجته غالبا مااجيبهم بالاسبوع مرة ينضفون البيت كله ويرتبوه ..

حور .. اممممم مو اگول البيت مرتب ونضيف .. زين اختيار الالوان والاثاث ذوق منو ..

نزع سترته خلاها ع الكرسـي وفتح ورفع ردن قميصه وخلة ايده بجيبه .. حركتـة المعتاده ..

گال اختياري شنو رأيج بي ..
حور .. حسيت بهالشئ لان كلشي ينتمي الك والشخصيتك ..
قيس .. اعتبر هذا اطراء او غزل ..

ضحكت ورجلي اخذتـني للاستقبال فتحته تعجبت اكثر .
كان كله باللون الاسود والابيض ..
بداخلي شنو هذا الرجل شخصيته وذوقـة مختلف عن الرجال الي يحيطون بيه ..
معقولـة اكو هيج رجال منظم ومرتب وذواق بهالشكل ..

قيس .. الاكل حيبرد تعاي اگعدي ..
اجيت گعدت وهو گعد مقابيلي . گال بسم الله وگعد يخلي بماعونـي ..
گتلة لاتخلي هواي مااكل هواي ..
قيس .. بس لامسويه رجيم شوفي جسمج مسطره ..
حور .. استحيت گتلـة لا بالعكس اكل ومااهتم بس هو هذا ضعفي ..

واحنـة ناكل ..
گال .. حور شقررتـي . اني بعد الي صار صرت محتاجلج بحياتـي اكثر ..
احنـة كبار اثنينه وواعين وممحتاجين احد ياخذ قرار عنه ..
فلاتخلين احد يأثر على قرارج ..
بس الاولاد حجيتـي وياهم وشگالوا ..

ابتسمت گتله اولادي بالنسبة الهم انت البطل مالتهم يعني ماعندهم اشكال ..
بس….
قيس .. بس منو اخوج ..
حور .. هو صحيح اخوي معارض بس هسـا زادت ماما .
من يوم الفاتحه مال المرحومـة وهي ماقبل ..

قيس .. ليش ع الحجي الي سمعتـة .. اني مستعد اروحلـها وابوس راسها هم ..
حور احنه لما نتزوج راح نكون بعيدين عنهم .. راح نعيش بهذا البيت .. وحدنا .
يعني اولادي اذا يردون يجون مره بالشهر او احنه نروحلهم ..
ومااخليهم يأثرون على حياتنا ابد ..

لساني كأنه ثگل ومااگدر احجي او انطي رأي كنت بس ساكته ..
قيس .. حور احجي لاتسكتين .. قبل مانخطي اي خطوه اريدج كل مخاوفج وقلقج تطلعيه هنا ..
بقلمي_الكاتبة_شمس
………………………………………
حور .. انت تعرف شگد عانيت وتعبت بحياتي وي محمد مااريد الي عشته يتكرر اني همي اعيش بسعاده وي اولادي وووو .

قيس .. ووي منو گـولي ..
اتقرب يمي .  حور لاتذكرين ذاك الناقص بعد بحياتنا انسيه اريدج من تصيرين على ذمتي تبدين حياة جديده .
تدلليني وادللج واحد يعوض الثاني عن الي شفناه ..
اني محتاج الانثى بحياتي تعوصني الحرمان والحنان .
وانتي محتاجه رجل بمعنى الكلمه يشيلج على كفوف الراحة ..
اولادج يكونون اولادي واخليهم بمدرسه اهليه وسياره تاخذهم وتجيبهم ..
وحتى اسجلهم بالنادي وياي ووين مااروح اخذهم  ومااحسسهم بنقص ..

بس گولي اي واخلي باجر السيد يعقدلنا ..
حور .. باجر شنو??
قيس .. مااگدر انتضر اريدج يمي محتاجج .
حور .. بس انتم بعدكم بحزن واني ممستعده ..
قيس .. بالاول والاخير احنه راح نعقد ومانسوي زفـة اذا تحبين سوي حفله ببيتكم ..
واجيب السيد نعقد ونجي البيتنا ..

حور .. لا عفيه انطيني وقت ع الاقل اسبوع اجهز نفسي وارتب وضعي .. وبخصوص الحفله اني هم مااسوي ولااريد لان مااحب الشكليات ..

قيس .. زين جا انطي علم الاهلج واني انطي علم الولدي ودزيلي خبر ..
حتى ادزلج فلوس واشتري الي ترديه ..
البنات بحداد بس راح اخلي هدى تجي هنا تساعدج ..
حور .. لاماكو داعي اختي تطلع وياي ..
قيس .. اذا تحبين نختار الذهب اني وياج هسا قبل ماترجعين للبيت ..
حور .. لا بالاول انطي علم الماما واشوف شتگول ..
قيس .. گومي شمنتظره .
حور .. شكو
قيس .. نروح للحجيه وناخذ موافقه ..
حور .. هههههه خليني الم الاكل ع الاقل ..
قيس .. اني راح اساعدج ..
لمينا كلشي بسرعه خليناه بالثلاجة ..
ومسحت الطاوله غسلنا وطلعنا ..

رجعت للبيت وكان العصر ..
گمت ادعي بداخلي كون زياد ماهو ..
طلعت موبايلي ودزيت رساله الفرح ..
(فرح اخذي ضرغـام وعمو وروحوا البيتنا بسرعه .. قيس راح يجي يحجي وي ماما ) .

قيس .. لاتخافين اتصلت على ضرغام وانطيته علم ..
حور .. شوكت ??
قيس .. وانتي تمسحين بميز الطعام ..
حور .. انت داتعجبني .. تدري اول ماشفتك كنت اسميك الرجل الغامض وفعلا هالاسم منطبق عليك ..

قيس .. ههههههههه لا موهيج اني رجال فقير . بس تدرين لان قاضي ومار عليه اشكال الوان فأحسب الكلشي حساب والخطوه قبل مااخطيها اوزنها ..

ااااه ياحور شمسويه عند ربج وهيج انطاج هديـة ( احجي بداخلي)

وصلنا للبيت فتحت الباب .. طلع ضرغام لان همه بيتهم قريب علينا فواصلين قبلنا ..
وزياد وراه طلع بس گالب وجهه اتقرب مني گال شبعتي ونسه وياه وجبتي واجيتي ..

هنا توقف گلبي واريد اخذ نفس مااگدر ..

دخلت شفت ماما ومرت عمي وفرح وايمان يتبسمن الي بس ماما ضايجه ..
گالت لو ادري بيج وياه فلا وافقت ..
ماتستحين شتگول علينا الوادم .. اخوج لعب جوله يگول ماعندها زلم تطلع وياه من الدوام ومانعرف وين راحوا واجو ..

انصدمت .. حسيت روحي فعلا خطأت من رحت وياه وبعدين اجه وياي ..
هاي شبيج حور كلما تجين تصحيحين الخطأ توگعين اكثر .

حور .. ماما اعرف زياد ورأيه بيه من زمان بس انتي ماجان تفكرين هيج . الرجال راد يتفاهم وياي قبل مايحجي وياكم ..

دخل زياد .. اذا طابخيها ومكملين المن جايبته وجايه بعد سكتت مارديت عليه ..

گال باعي ولج لاعبالج قاضي ويخوفني طلقه براسج وبراسه ..
ودوام بعد ماكو منا لمن يعقد عليج وياخذ.
مو يطلع وياخذ مدري وين ماوين ويشبع ويجي ياخذ .

فتحت عيوني ع حيلهن .. انت شتحجي مااسمحلك تطعن بيه اني واعيه واعرف شنو اتصرف ويخسى الي يطلع عليه كلمه وحده ..

ضرغام .. شبيكم فضحتونا الرجال منا . وانت زياد لاتزودها مو ماتريدها بالبيت انطيها للشاريها والرايدها واخلص ..

زياد .. طبعا انطيها احسن مماتتسمى عليه مطلگة واشوه سمعتي ..

حور .. شوف زياد لاخر مره انبهك مااسمحلك تججي وياي هيج وانت مو گلت انسي عندج اخو ..
هالمرة اني اگلك انسى عندك اخت ..
لان الاخو الي يطعن بشرف اخته مايتسمى اخو .
وتركته وطلعت للمطبخ غسلت وفرح تهدي بيه ..
شويه وصاحوا ماما ..
وقيس بكلامـة ولباقتة گدر يقنعها ويقنع حتى زياد الي اندمج وياه وضحك وسوالف ..
اما اولادي فواحد گاعد منا وواحد منا .. متخبلين عليه اكثر من امهم هههههه ..

اتفقوا وكملوا وگالهم اجيب عمامي بيوم العقد هي مشيه وهي عقد وهي زواج كلهن بيوم واحد ..

من راد يطلع صاحني عمي واخذ رأي ..
گتلـة بكيفك عمو .. وداخلي يگول اي اي اي اريده ..

كانت عيونـة تريد تاكلني وابتسامته ذوبتني ..
طبعا اهلي راعوا ضرفهم وگالهم منسوي هوسه واصلا احنه هم منريد ..

اتصل عليه اول مطلع ..
گال راح اخذلج اجازة هذا الاسبوع كله بس باجر نروح نعقد محكمه ومناك نروح للصايغ ..
گتله الي تشوفـة انت ..
بقلمي_الكاتبه_شمس
…………………………………………
كنت مثل الفراشـة وطايره ممصدگة انه راح اعيش وي هيج شخص راقي ومثقف ..

سولفت الفرح بس .. وگلتلها رحنا البيت والبيت هيج تصميمه وهيج گعدنا وهيج سولفنا وهاي ذايبه ..
گالت اي وبعد ..
گلتلها هاي ماكو شي بعد ..
فرح .. خرررب يومج بس هاي . لو ماخذج المكان عام مو احسن ههههه .
حور .. ههههههه والنعم منج اختي الكبيره خوش تشجعيني ع المنكر ..
فرح .. هههههههه ع الاقل همسه لمسه ماكو .
حور .. لا ماكو وبعدين الي يشوفج يگول ناقصه حنان
فرح .. لا والله بس من سولفتي اشتهيت ههههه
حور .. دگومي گومي من يمي ضرغام خلاج فلتانه ..
نضحك ودخلت ماما ..
گالت ربي مايبعد هاي الضحكه عنج ويسعدج طول عمرج
رحت حضنتها وابجي ..
ماما .. وج شبيج دومج معزايه حتى وكت فرحتج تبجين .
دور اجت فرح وحضنتنا اثنينه وگمنا نبجي ..

كان دعاء امي بالنسبه الي كنز ادعي ربي يسمع دعواتها الي ويستجابهن ..

ثاني يوم رحت للمحكمه وبدينا بأجرات الزواج ويمكن اقل الساعه ماطولنا بسرعه كملنا ..
وبعدين مناك طلعنا للقاضي وكان بدون حمايه هو الي يسوق والضحكه ممفارگة وجهه ..
لزم ايدي وبالايد الثانيه يسوق ..
استحيت ..
گال شبيج مستحيه ..
صرتي مرتي بالقانون ..
ضحكت . گتله بس احنه نمشي بالشرع مو بالقانون ..
قيس .. هههههه امرنا لله نتحمل اسبوع ..

اخذني للصايغ واختارينا الذهب والحلقات .. وهو هم اخذ حلقـة رجاليه ذهب ..
والي لاحظته انه يلبس ذهب .

خلال اسبوع طلعت اشتريت احتياجاتي كلهن وملابس نوم وللبيت اخذت تراكات وملابس قصيره ..
ولان گال نروح الاربيل . اخذت جينز وقمصان . ولو اني مودايما البس الجينز .
واولازي اشتريتلهم ملابس زينه للطلعه والاربيل هم گال ناخذهم ويانا ..

تقريبا كملت كلشي واجـة يوم الزواج ..
اخذت فستان طويل ومخصر والردن كيبور اوڤوايت وسترة نفس اللون البسها من نطلع ..
بدلت وكملت وشعري رفعته كله ونزلت خصل برمنتهن ..
مكياجي والترتيب كله فرح مارحت للصالون .. وشعري لونه بني فماحبيت اغيره خليته ع طبيعته بس درجته ع طوله ..
طلعت شكل ثاني .. عزمت صديقاتي وجيرانه المقربين وبيت عني وخالاتي ..
اولادي يگلولي ماما طالعه تخبلين مثل العرايس ههههه

مقررين اول يومين نگضيهن ببيتنا وبعدين نروح الاربيل .
لهذا وصيت والادي وگلتلهم ماما يومين واجي اخذكم .
وهمه ماحجوا بالعكس كانوا فرحانين الي اكثر مني النفسي ..

وصيت ماما عليهم وفرح ..
والخوف ماخذني ومتوترة .. راح اخطي خطوه مهمه بحياتي .. وحياة جديده ..
اريد اغير كلشي كان بالماضي ابدي بخطوات جديده وامرأة ثانيه ..
امرأة غير حور الضعيفه والمهزوزه والي تمشيها عواطفها .. ادلل واهتم لكن كلشي اله مقابل ..
كنت انطي لمحمد الدلا والاهتمام واني مااخذ منه بس الاذيه ..
وي قيس لا . اريد اخليه يحس انه اني امرأة قويه بتصرفاتي  وقراراتي ..
وطفله تعطيه الحب والحنان بأحظانه ..
والله يقويني ويعيـني انه اسعده ويسعدني ان شاء الله.
بقلمي_الكاتبه_شمس
يتبع……..