حليب اسود

بارت 21

هلا وغلا وردااااياااات 🌹🌹
///// البارت الواحد والعشـرون /////
#حلـــيـب_أســـود
#الكــاتبة_شـمــس

حسيـت بخوف من كلام امجد ..
صعـدت الغرفتـي بسرعـة . شفت قيس نايم ..
بدلت واجيت بحظنـة بس ماغفت عينـي دقيقة ..
حس قيس بوجودة ..
قربنـي اله .. سويت نفسـي غافية ..

بقت عينـي ع الساعـة ..
ماصدگت صارت الخمسـة ..
گعدت حضرت ملابس قيس ..
لبست گلبيه ورحت ابدل الجهالي ..
شفت وفاء مسبحتهم كلهم ودا تبدللهم ..
گلتلها اني جايه ابدللهم ..

وفاء .. ماكو فرق هم مثل ولدي همه .. نمت وگعدت شفت البيت هدوء گلت ابدل للجهال على ماتگعدون .

رتبتهم .. ورحت گعدت قيس ..
حضنـي ويتمازح وياي ..
واني اضحك غصب .
قيس .. بيج شي حور ?
حور .. لا مابيه بس راسي مأذيني هسا بس اسبح ارتاح
دخلت سبحت بسرعـة وطلعت .
دخل قيس وراي ..
بدلت وكملت وبدل قيس ..
نزلنا جوه وشف الكل مبدل ومنتظر ..
كانت عيون امجد تباوع بحقد ويضحك بسخريه ..
حاولت اتجنبـة ومااخلي عينـي بعينة .
طلعنا كلمن بسيارته ..
وهالمرة مااخذنا حمايه .
قيس گال طلعـة عائليه مااريد ازحمهم خطيه ..

حجزنا طاولـة كبيرة ..
طلبنا الاكل واكلنا بس كلما اشيل عينـي اشوف امجد يباوع .. ومرتـة حست عليه وبقت خازرتنـي مااعرف شبيها ..
حسيت روحي متضايقـة ومماخذة راحتي ..
وحتى مامنتبهه ع كلامهم من التوتر ..

لزم ايدي قيس شافها ترجف ..
شبيها ايدج ليش هيج ترجفين .
گتلـة لا بس مالي خلگ ..

قيس .. نرجع ?
حور .. لاماكو داعي اروح اغسل واجي ..
كان امجد يضحك بمكر استفزنـي ..

رحت اغسل وگلبي يدگ حيل .. ربي شوفنـي الطريق الصحيح اگول القيس او لا ..
اخاف اگوله ويتعارك وياه واطلع اني الي خربت بين الابو وابنه ..
او يمكن يتبلى عليه هذا ويزرع الشك بگلب قيس ..

مرن يومين مثل الكابوس علية .. مااتحملت نضراته وتعامله من غير الكلام الي يشمرة عليه ..

من رجعوا البيتهم ..
حسيت براحـة .. احس حيويتـي رجعتلي ..
وليش اني اخاف منه اذا همه بمحافطة واحنه بمحافظه بعدين وين نلتقي ..
اذا يجون مرة بالشهر .. اتحمل شأسوي ..

بدأت دوامات اولادي ..
وسجلناهم بمدرسـة اهلية ..
وسيارة تاخذهم من البيت للمدرسه ومن المدرسه للبيت اهلي واحنه نروح ناخذهم ..
لان احنه دوامنا يتأخر ومااگدر اتركهم وحدهم ..وبس الحمايه بالبيت ..

حياتنا حلوة اني وقيس .. واولادي جدا يحبوه وهو يحبـهم اني تثبتت بفضل الله وقيس ..
وصار شغلـي جزء من حياتـي لان ماردت اخجل قيس وهو وياي بنفس المحكمـة ..

مابقى بس اجيب طفل القيس لان شفتـة متلهف عليه ..
وهاي صارلنا شهرين ع زواجنا وماكو. شي

قررت اراجع دكتوره ..
واستغليت الفرصـة من قيس راح الاهلـة واني رحت الاهلـي الجمعـة ..
#بقلمي_الكاتبه_شمس
………………………..
اخذت فرح ورحنا ..
فصحتنـي الدكتورة وسوتلي تحاليل وسونر ..
وطلع ماكو اي اشكال للحمل ..
بس نطتني منشطات ومساعد للحمل ..
بعدين سألتني عن عمر زوجي ..
گلتلها خمسين وهو اخر طفل اله عمرها 25 سنة ..

الدكتورة .. ياعيني هذا شايب وين لگيتيه وانتـي وردة مفتحه .. اكيد السبب منه بدون زعل شايب ويريد اطفال ميگعد ويسكت ..
صدگ قهرتنـي ..
وگلتلها لا مو شايب يخبل ..
ضحكت ضحكة طويله ..
تعمدت طلعت صورتـة بالموبايل هي شافتة انصدمت .

الدكتورة .. هذا موجود بالعراق .. شخصيه وهيبه ومامبين عليه الكبر ..

حسيت بغيرة عليه ..
هي حاولت تلاطف الجو من صدمتها ..
بس گالت مايمنع اسويله تحليل ..
لان فترة طويله ماعنده اطفال وشي وارد انه يصير عندة ضعف .. راح انطيج هاي الورقه وخليه يسوي التحليل وجيبه.

حور .. بس دكتورة خاف ميقبل وهو اصلا عندة اولاد من. قبل ومابي شي يعني راح يرفض ..
الدكتورة .. عيني اذا هو عندة اولاد فأنتـي هم عندج اثنين . واولادج صغار يعني هذا الشي مايأثر ع حملج .

بقيت مترردة من كلامها وحسيت بخيبة امل ..
شلون راح ابلغ قيس ..
من جهة استحي ..
ومن جهة ثانيه خاف يعصب ومايستقبل الامر بسهولـة.

اخذت العلاج وسألتنـي وسولفتلها ..
تالي رجعنـا للبيت ..
شفت ماما ايمان وصديقتها بالمطبخ يتغدن ..
عرفتنا عليها ..
اسمها نيران .. تشتغل وياها بالصالون ووقت الغدا تتغدا عدنا ..
جانت تگدر تاخذلها الغدا بالصالون اشو جايبتها للبيت وهي بنيه حلوه ترملت اول متزوجت وبقت لا ولد ولا الها احد ..
وحسب مافهمت من ماما ..
ماخذة راحتها بالبيت وتدخل وتطلع عادي ..

سوينا غدا احنه وماما والجهال ..
دا نتغدا اتصل قيس .. يمـة رف گلبي عليه ..
اليوم من الصبح لسـا ماشفته ..

-هلا يروحي شلونج ..
-هلو حبيبي مشتاقتلك .. شلونهم البنات والولد ..
-كلهم بخير انتي شلونج . رحتي للدكتوره ..
-ها اي رحت .
-وشگالت ?
-بعدين من تجي نسولف ..
-ان شاء الله اني باجر الصبح اجي اخذج .. لان مااتحمل مشتاق حيل ..
-واني اكثر .. سلملي ع الاهل كلهم .
-وانتي هم وبوسيلي اولادي وامهم ..
-هههههه ان شاء الله .

مااعرف شمسويلي هذا الرجال راح يخبلنـي .. قادر يسحب حزني وضوجتي بسهولـة ..

اجـة ضرغام الظهر..  سلم وگال حور اتصل محمد .
يگول زواج اخوه اليوم بالقاعه ويريد الجهال ساعتين ويرجعهم ..

حور .. اليوم جمعه منين اكو زواج هذا يكذب ..
ضرغام .. لا صدگ شفت ناشرين بالفيس ..
حور .. اني ماامن بي وخاف هم ياخذهم وينهزم .
ضرغام .. لا مايگدر لان الظاهر قيس مسويله فركة اذن ذيج المرة ..
حور .. قيس ?? وين شافه
ضرغام .. يمكن بليله عرسج من داز رساله ..
دز عليه وملتقين ومخوفـة وگاله اذبك سجن اذا تقربت الحور واولادها ..
حور .. ابتسمت الحمد لله الي خلاه سند الي ..
خلي يجي ياخذهم بس ها..  ساعتين اذا اتأخروا ابلغ عليه ..
ضرغام .. لاتخافين اني هم راح احجي وياه ..

گاعدين وايمان خبصتني الا تجين تسوين حواجبج 3D
نيران يخبلن تسويهن ..
فرح .. اي صدگ حور حواجبج شگر وخفاف سوين حتى يترتب وجهج ..

گمت وياها دخلت ..
ومبينه هاي البنيه شاطره .. لان شفتها صبغت وگصت الوحده گدامي شغلها مرتب وحلو ..

عجبنـي اخصل فوگ شعري بلاتيني واني شعري بي لون گالت يطلع حلو ..

سوت الخصل الشعري بين ما كملت حواجبي ..
فعلا تغير شكلي وطلع وجهي حلو بالحواجب ..
وشعري هم انطاني تغيير حلو ..

كملت وفرح هن رادت تصبغ .. اجه رضاوي گال بابا بالباب ..
اني مبدلتلهم ومكمله ..
لبست حجابي وطلعت اله ..
هو سلم ..
اني ردت بس بثگل ..
گتله محمد ساعتين ويرجعون لاتأخرهم ..

هو صافن بوجهي ورايح بعالم ثاني ..
انتبهت طالعه خصله من شعري ..
عدلت حجابي وگتله محمد دتسمعني ..

محمد .. ليش هيج حور .. هذا الجمال ليش طلع كله الغيري من جنتي يمي ماسويتيلي هيج ..
حور .. لان اخذت واحد يقدرني ويهتم بيه مومثلك وبعدين مااسمحلك بعد تحجي وياي هيج انت رجال متزوج واني متزوجه ومايربطنا بس الاولاد .
اصلا اني صار كم شهر مرتاحة ومااتواجه وياك لو ما هسا الوضع جبرني ..
لحظة اصيح ابو نور يحجي وياك ..

نضراته وعيونه كانت تدل ع الندم والحسرة ..
بس بعد شنو وهو كسر بيه وغدرني وفضل وحدة ماتسوه عليه ..
اصلا من اقارنه بقيس اگول الحمد لله محمد خاني وتزوج عليه ..
صحيح انعذبت وتأذيت بس بعدها الله رزقتي بأنسان يقدرني ويفهمني من غير مااحجي ..
يكفي انه واعي ومثقف بتفكيره واسلوبه ..

صحت ضرغام وطلعله ..
حجة ونبه عليه ساعه سته يكونون بالبيت ..

بقيت طول هاي الفترة گلبي ماكلني عليهم الى ان اجو وشفتهم احس روحي رجعتلي ..
حضنتهم وابوس بيهم ..
قيس من گتله ماحجه وگال هم ابوهم واله حق لاتقهرين روحج يرجعهم لان مو من صالحه يغدر مرة ثانيه ..
وهذا الي خلاني اطمأن .. بس ماانكر اكو قلق بداخلي لان محمد ماينحزر بأفعاله ..
بس من شفتهم ارتاحيت ..

ضرغام رجع البيته بس فرح وبناتها بقن ..
وسهرنا احنه وماما .. ام وبناتها لان من تزوجت لسا مابايته عند اهلي ..

لليل سمعنا عياط فوگ .. هذا صوت ايمان ..
ردنا نصعد گالت ماما لاتصعدن . همه ذوله هيج صارلهم فترة يتعاركون ويتصالحون معليجن ..
بس العياط زاد وصار تكسر بالغراض ..

الله يستر .. باوعت الماما .
يوم ذولي شبيهم مو جانوا واحد يباوع الحلگ الثاني شغيرهم ..
ماما .. ياامي الشك اذا دخل بين اثنين يخرب كل علاقه .وايمان تشك عندة وحده . لان تگول يتأخر بالليل .
ومخلي رمز الموبايله ومايخليها تفتحه بينما قبل موبايله دوووم بيدها ..

فرح .. وزياد شيگول ?
ماما .. حجيت وياه وواجهته يگول ماعندي شي بس هي تشك وتغار .. واني اركض واتعب علمودها وهي ماتقدر هالشي ..

شويه وهدء الصوت .. گلتلهن ..
لا مستحيل زياد يخونها لان يموت عليها وبينهم جهال .
فرح .. اي صدگ هو يعبدها عبادة ..

نومنا الجهال ونمنا ..
للعشرة سمعت الباب تندگ واحنه لان سهرانين بالليل اتأخرنا بالنوم ..

اجت ماما .. حور هذا رجلج بالباب جاي ..
طفرت .. باوعت للساعه .. قيس شوكت اجه شوكت لحگ .
فرح .. الظاهر سيادة القاضي جاي من الصبح متلهف ع مرته ..
ضربتها بالمخدمة وگمت .
رتبت شعري ..
ورحت غسلت وجهي بالحمام ..
وطلعتله كان گاعد بالاستقبال ..
شافني فتح اديه مثل اب من يشوف بنته ..
رحت الاحضانه وحضنته قوي وهو يرفع بشعري ويشم برگبتي ..
اااااه شگد اشتاقيت الهاي الرگبه ..

انتبهلي .. اوگفي شمسويه ..
خررررب وج هو اني عايز وتسودنيني . شطالعه تخبلين .
وين الجهال اشتاقيتلهم .
يله خلينا نروح البيتنا ..

حور .. لا خلينا نتريگ ونروح عيب من ماما خطيه محظرة الريوگ ..
#بقلمي_الكاتبه_شمس
…………………………
رحت گعدت الجهال وفرح گعدت اتصلت ع ضرغام يجي .
سوينا ريوگ عبالك وليمه وماما لان اول مرة قيس ياكل عدنا حايرة شجايبه ومخليه ..

زياد نزل سلم ع قيس وگعد يتريگ ويانا بس ايمان مانزلت الظاهر بعدهم زعلانين ..

تريگنا وبين ضحكة وسالفه ..
گال قيس .. سفرة دايمة ان شاء الله.  بس اني تعبان من السفر واذا مابيها زحمه نگوم نترخص احنه ..

گمت بدلت وحظرت غراضنا وطلعنا ..
ورجعنا البيتنا .. صارت ال 12 . لان اتأخرنا عند اهلي وتريگنا متأخرين ..
فگالوا مانشتهـي ..
بدلوا الجهال وگعدوا يلعبون بلي ..
واني رحت القيس .. لگيته بهيئة الاستعداد ..
گال مشتاق بگد رحمـة الله…

بدلت واجيت يمـة ..
حضني وگال بشري شگالت الدكتورة ..
صفنت ..
كنت احاول اتجنب الموضوع وهو فتحـة ..
حور .. انطتنـي منشطات وسوتلي تحاليل وسونر مابيهن شي بس… ..
قيس .. بس شنو احجي… .
حور .. لا بس .. باوع قيس موتزعل واذا متقبل عادي بس مو تعصب ..
شفته رفع حواجبه بأستغراب گولي شنو ..
حور .. الدكتور رادتك تسوي تحليل…
قيس .. تحليل شنو ..
حور…  هاااا انسـة ماكو شي ..
قيس .. هااااا افتهمـت عليج وليش خايفه مابيها شي .
استغربت اكثر .. تحجي صدوگ انت تعرف شنو التحليل
قيس .. اي افتهم شبيج بعد مستغربه .. هاي الشغلة تصير ومثلما انتي ترحين وتراجعين اني اروح وماعندي اعتراض ..

طفرت وحضنته .. انت شنو متگلي معقوله الله يحبني هالشكل ونطانياك ..

يومين وراح سوه التحليل واجـة ..
اخذت التحليل ورحت ..
شافته الدكتورة .. گالت نسبته جيده .. بس بقت انطيكم منشطات ومساعدات والباقي ع الله ..
كان قيس متحمس اكثر منـي للطفل .. وعبالك ماعندة اولاد ..

يوم من الايام نايمين الظهر وتعبانين من الدوام ..
واجه اتصال القيس من الحرس ..
فتح عينة ..
قيس .. حور مرت اخوج بالباب تريدج ..
استغربت ايمان شجابها ..
بدلت بسرعـة ونزلت ..
لگيتها بالحديقة ..
شافتني گامت تعيط وتبجي وبيدها جنطه مال ملابس ..
اريد افتهم شبيها ماادري ..
دخلت للصالـة .. وبس تبجي وماتقبل تحجي ..
تالي احجي شبيج ماما بيها شي .. زياد والجهال شبيهم گولي ..
ايمان .. كلشي مابيهم تركت البيت الهم وطلعت وماعندي مكان اروحله بس هنا ..
وراح ابقى عندج وعليج القرآن اذا گلتي الواحد ..
بقيت صافنـة بوجهها ..
انتبهت القيس وراي ومصدوم مثلـي ..
#بقلمي_الكاتبة_شمس
يتبع… .
حبايب اعتذر ع البارت لان قصير احاول اعوضكم بالليل اذا كملت البارت ..