هلا وغلا بارت طويل لعيونكم🌹
///// البارت الحادي عشر /////
من من خلال تجربـتي بالحيـاة .. تعلمـت ان لاأثـق بأي احد ..
حسيـت بخوف من هذا الشخـص وقررت مااسكـت بس اذا اگول الزياد اكيد راح يلومنـي ويطلع السبب بيه .
قررت اگول الضرغـام وهو يحلها .
دخلت للبيت وانـي مقهوره ع ابني تلگتني ماما وسألتني على رضاوي ..
گلتلها يوم اصبعة انگطم وميقبل يخليني اعتني بي اخاف محد يدير باله عليه ويلتهب الجرح ..
ماما تواسي بيه وتدعيـله بالشفاء ..
گالت روحي ياامـي ارتاحي ونامي اكيد طول الليل سهرانـة ..
دخلت بدلت ونمت بس بقيت اتگلب بالفراش هواي .
من جهه هذا الي مااعرف شيريد مني ..
ومن جهة ثانيه ابني وجرحة خايفـة عليه ..
لليل اتصل محمد ..
رديت بسرعه خفت ع رضاوي ..
-الو
-هلو حور ..
-محمد مرتضى بي شي?
-رضاوي يريدج .. وبس يبجي وميقبل ياكل ولايشرب ..
-جيبه يمي بس هالفتره على مايطيب ..
-لا راح انطيج الموبايل واحجي وياه وقنعيه .
-محمد لاتصير اناني اترك عنادك المهم صحة ابنا خلي يطيب وشتريد سوي ..
-سمعت صوت مرتة . گالتله لاتبقى تاخذ وتنطي وياه بالحجي ودي الها وخلص ..
رجع يحجي وياي .. گال راح اجيبه بس هو صفاوي مااجيبه .
گتله اوك منتظره ..
شوية واندگ الباب .. طلع زياد واني وراه ..
هو من شاف زياد ماسلم ولاحجة گال هاج رضاوي وهاي ادويته ..
واي شي يصير تتصلين عليه ..
حور .. ماشي ..
زياد واگف ويخنزر ..
محمد ماطول بسرعة راح ..
زياد .. خو فدنوب دخليه يتعشا ويانا ..
حور .. يا هو شحجيت اني ..
زياد .. ادخلي يله ادخلي .
حور .. هاي بدل متبوس الولد وتگله خالو شلون صرت ..
اخذت ابني ودخلت ..
راح البيبته حظنها ..
وماما بوسته وانطته خمسه گالتله اكل واخذ ادويتك ..
هز راسه ..
سويتله شوربه ولفة كباب وعصير ..
اكلهن كلهن ميت من الجوع ويكابر حبيبي ..
انطيته ادويته .
وعنده ابر ضربتهن اله بالكانونه ..
خليته بحظني بسرعـة غفـة ..
فرح وضرغـام وبيت عمي اجو يشوفون رضاوي من سمعوا بي بالليل ..
وجايبيله هدايـا ..
هو فرح بيهن حبيبي ..
استغليت الكل گاعدين ويسولفون .. اشرت الفرح وضرغـام .. طلعنا بالحديقـة ..
گتله .. ضرغـام اكو شخص دايما اشوفـة مقابيلـي واحسـة ديراقبني ..
بكل مكان يطلع بوجهـي ..
بسرعة قاطعنـي وگال .. إستـاذ قيس ..
استغربت .. اي شمدريـك ..
ضرغـام .. هو گالي ..
حور .. شنو گلك... ?
فرح .. دفهمونـي شكو. كلها الغـاز ..
ضرغـام .. ماردت هذا الموضوع ينفتـح الا لما تتطلگين سيد.. استاذ قيس طالبج للزواج ..
اني وفرح بصوت واحد .. شنوووو
ضرغـام .. اشششش فضحتنـا . شبيج الي يشوفجن يگول الرجال اجرم . انسان محترم وورايدج بالحلال .
حور .. تحجي صدگ ضرغـام .
فرح .. شگد عمره وين يشتغل ..
حور .. شعليه بعمره وشغله قاضي بس مالي دخل بي اني زواج بعد مااتزوج ولااريد جنـس ادم بحياتي كافي الي جرالي من محمد ..
ضرغـام .. لاتستعجلين حور . الحياة صعبه ولازم رجال يسندج ومو كل الزلم محمد ..
حور .. اني اسند روحي عندي وضيفه وعندي امي وانتو يكفي ..
فرح .. كلام ضرغـام صحيح . احنه ماندوم الج . وامي هم كل يوم مريضه واسم الله عليها مادايمه هم .
وزياد هذا نفسه ومايتغير .
منو الج حور ..
محمد ماراح يتركج وجهالج مايرجعون اذا مااكو رجال يسندج ويوگفلج ضده ..
وج راح يحاول يضغط عليج بكل فرصـة الى ان ترجعيلة ويرجعج تحت رحمته من جديد ..
حور .. يعني هاهي .. اتفقتوا عليه .. وبعدين هذا شكله غامض ويخوف ومستحيل ارتبط بي ..
فرح .. ضرغـام انت تعرفه شگد عمره..
ضرغـام .. اي اعرفـة الكل تحلف بأخلاقه نزيه ومحترم ومايحكم الا بضميره لهذا خلوه بالمحكمه العليا بالتمييز
وعمره متوسط مو كبير واصله من الجنوب والي اعرفـة متزوج بس ماادري زوجته واطفاله وين وشگد ..
حور .. شفت انت گلت متزوج ومن الجنوب يعني كلشي مانعرف عنه .. واني مااخذ واحد عنده زوجه . اني تركت محمد الهذا السبب شلون اخرب بيته ..
ضرغـام .. لاتستعجلين فكري على ماتخلص سالفه محمد .
فرح .. والعمر مو مهم بالعكس مادام عنده ضمير ويخاف الله بلكي يرجعلج اولادج . وهيج انسان مااعتقد يظلم زوجته ومانعرف حياته .
اذا تردين ضرغـام يسأل ويعرف كلشي عنه .
وج متشوفيني كنت مااريد ضرغـام ولااطيقه واكبر مني بهواي وهو عاند الا ياخذني ..
ضرغـام .. وهسا شنو
باوعتلـة فرح وگالتله .. اموت عليك ..
ههههههههه ضحكوني .. بقوا بالساعات يقنعوني الى ان عمي صاح الساعـة 12 ماترحون ..
وزياد اجـة ماعجبه الوضع .. گال شنو مسوين اجتماع الامم المتحده صارلكم كم ساعه ..
ضرغـام .. لاتغار . تدري بمعزة حور عندي . وضحكوا وطلعوا ..
بقيت الليل كلـة افكر بكلام ضرغـام ..
مستحيل اذا موزين ضرغـام يحاول يقنعني ..
وهو قاضي وواصل ..
بلكـي يرجعلـي اولادي ..
هـاي شنو حور من كل عقلـج تحاولين تقنعين نفسـج
كلهم نفس الشي ..
وحظج ماگعد وي محمد الي حبج وحبتيه راح يگعد وي انسان غريب وغامض ومتعرفين عنه شي .
واكبر منج وماتعرفين اطباعه ..
لا لا... جهالي اول تالي يرجعولي . بس اذا دخلت النفس الجحر شيطلعنـي ..
[فـي بعـض الاحيـان تكـون تجاربـنا السابقـة .. عائقاً امامنا لرؤيـة الامور بصورة صحيحة واتخاذ القرارات الصائبة ..]
...........................................................
گمت اداوم الصبح واترك ابني يم ماما تعتني بي ..
ومن ارجع اقضي اليوم كلها وياه ..
علاجة كل وقت بوقتـة مااخلي يفوتة ..
مرات يتدلل حتى ماياخذة .. بس اگلـة ازعل عليك ياخذه
وحبيبي جان يگلي ماما مااريد اطيب خاف بابا ياخذني وارجع لهنـاك ..
اااااه شنو بيدي عليكـم ياامي .. هذا ابوكـم وجبروته واني السبب الي خليته هي يصير كلـة سبب خضوعي ودلالي الـة ..
بيوم بالدوام ..
استاذ قصي گال ..
-ست حور . مدير المكتب يريدج ..
كان كل ظني يريد اوراق او شغل ..
دگيت الباب ..
-صباح الخير استاذ ردتنـي ..
-اي حور تعالي اگعدي ..
-لاااستاذ شكرا اذا اكو اوراق او شغل انطينياه .
-لا الشغله غير هيج اگعدي ..
گعدت واني مستغربـة ..
عيني ع حلگة وحسيتة يريد ينطق وميگدر
-گتلـة خير استاذ صاير شي ..
-گال .. حور اجه امر بنقلج للمحكمـة العليا .
هناك محتاجيج وطلبوج ..
-استغربت اكثر .. ليش استـاذ صار اكثر من شهر وياكم بدر شي مني قصرت بواجبي ..
حتى الكتب الي تجيبوها بغير لغات جاي اترجمها ومااأخرها ..
المدير .. لا واالله شاهد عليـة ماكو بأخلاقج ونزاهتج بالعمل بس احنـة عدنا كادر هواي .
وهناك محتاجين موضفه دقيقه مثلج ومثابره ..
انـي بس ساكتـة . معقولـة هيج حظي ..
حتى الشغلـة الي ارتاحيت بيها وبمكان مثل هذا يطردونـي منه ..
گتلة هذا هو استاذ ماكو داعي تبرر ..
بس ليش بالمحكمه العليا .
اكو هواي دوائر غيرها .. والصراحـة اني افضل لو دائره مدنيه .
المدير .. بالعكـس هناك افضل الج وتثبيتج يكون اسرع اذا شافوا شغلج ..
گمت واستأذنت منه ..وسلمت عليه ..
وهو هم سلم واتعذر وگال لاتنسين تاخذين راتبج قبل متطلعين والامر مالتج هذا ..
طلعت واني حيل ضايـجة ..
تلگاني استاذ قصي وكأنه يعرف ..
گال تعودت عليج خويه وشلتي عني الشغل ..بس شنسوي هي هاي الحكومة مالها رأي ثابت ويضحك .
اني هم ابتسمتله . ولميت غراضي . وگتله ابريلي الذمـة ..
گال وانتي هم .. بس اريد اگلج شي . وانتي مثل اخيتي ديري بالج ع نفسـج . وصيري نبهه .
صفنت بوجهه . ليش شكو ??
قصي .. لاماكو شي . بس طلبوج من المحكمه بالاسم ..
يعني اكيد احد يعرفج نقلج ولازم ايده طايله ..
حور .. لاعفيه استاذ لتخوفني . اذا اكو شي گولي .
قصي .. لا والله ماكو شي. بس حبيت انبهج لان الناس بهذا الوكت ماتحزر وانتي طيبه وعلى نياتج ..
سلمت عليه وطلعت ..
واني الف فكرة اجت ببالي وللحظه فكرت ابطل ..
رحت الضرغـام ..
وگتله استغرب مثلي يعني ماعنده علـم ..
گال روحي للبيت واني استفسر وارجعلج خبر .
رحت بيومها من وكت للسوگ لان باجر جمعه وصفاوي يجي . اشتريتلهم حلويات ومواد للبيتزا ..
ولان مستلمـة راتب .
اخذتلهم ملابس .. والاولاد زياد هم هدايا وبنات فرح .
حسيت فعلا شي حلو لما تعتمدين ع نفسج .
وتستلمين راتب وتصرفين من تعبج ..
اول مره احس هذا الاحساس ..
كل عمري لو اطلب من بابا فلوس لو من محمد .
بحياتي ماصار عندي مصرفي الخاص من شغلي ..
اااه ياحور وين كنتي دافنه نفسج بذيج القوقعـه .
لاردت الايام الي اگول بيها .. لمحمد انطيني فلوس اشتري عندي احتياجات ..
ويگلي .. اكتبيهن بورقـة واجيبهن . خاف اخذهن واشتري بيهن غير شي .
ماجان يحب يخليني الزم فلوس بيدي.
حتى راتبـة مااشوفـة .
اذا اگله مشتهيه حب .
يگلي من اجي اجيبلج . مايگلي هاج فلوس ودزي الجهال يشترولج ..
بعد كل هذا الظيم . يريدني ارجع ..
شلون كنت عميه الهذي الدرجـة ماادري ..
وصلت للبيت لگيت ام محمد استغربت ..
شافتني جاي من الدوام وسافره .
عوجت حلگها ..
بدون لاسلام ولاكلام ..
گالت .. جنج ماتركتني محمد لان تزوج عليج . بس حتى تطلعين وتطبين بكيفج وتنزعين العبايه الاسلاميه وتراوين جسمج ..
استغفرت الله .. لوما ببيتي جان عرفت شآسوي ..
گلتلها .. الحمد لله مستوره تنورتي عريضه ولابسه ستره وشال ومحترمة نفسي ومن اخذني هذا لبسي بس هو يدور ستر وياي وعايف مرته الي لابسه بنطرون لزگ ع جسمها ..
هي سكتت بعد ماحجت . بوست رضاوي وگالتله كلها يومين وتجي بحظني اني اباريك .
سلمت على ماما وطلعت ..
هزيت ايدي .. والله يربي تباريه . ماباريتيهم العمر كله هذا هسا ذكرتي ..
اجت ماما .. گلتلها يوم هاي شعندها هنا .
ماما .. يمه فتحت الباب لگيتها بوجهي گالت اريد اشوف ابن ابني قابل امنعها ..
حور .. لا طبعا بس عجيبه ع هيج بشر . فوگ ماگاعده ببيتي وتذم بيه ..
ماما .. من شفتها وشافتني هذا طبعها .. مو انتي كنتي متحملتهم وتگولين يمه علاجهم السكوت من اسكت عنهم يموتون حرگة .
اسكتي عنها هسا هم ..
حور .. لا يمه كنت غلطانه .. السكوت يخلي الناس تستغلنا وتدوس علينا ..
ومايكفيها هذا كله تخيط حلگنا خاف نريد نحجي وندافع عن نفسنا ..
شحصلت من السكوت غير المذلـة والاهانـة ..
ماما .. اگلج حور صدگ غير عندج دوام شو راجعه من وكت ..
حور .. انقلت .
ماما .. ليش .
حور .. ماادري والله اوووه هو وين مااخليها تصير سوده ماما .. ان شاء الله كاتبلج الاحسن . لاتتشائمين
حور .. واالنعم بالله . لعد ايمان ماكو وين .
ماما .. والله ماادري . طلعت ولدها للمدرسة ومانزلت من غرفته بعد .
صحت ردت ماكو..
حور .. خاف شو شبيها . خليني اصعد اشوفها ..
................................................
صعدت الغرفتها دگيت الباب .
ماترد ..
فتحتها . شفتها متلفلفه ونايمه .
رحت عليها . حركتها بإيدي . ايمان ايمان .
من ورى البطانيه ..گالت مالي خلگ عوفيني .
گلتلها مريضه بيج شي . گومي اخذج للطبيب .
ايمان .. مابيه عوفيني وحدي ..
تركتها ونزلت بس صوتها مخنوگ يمكن تبجي ..
مااصريت عليها بعد .
ماما .. ها شبيها
حور .. ماشفتها لافه راسها وگالت مالي خلگ بس يمكن دتبجي .
ماما .. سترك يارب شصايرلهم . اخاف متعاركين بس زياد مايعاركها ابد ليش تبجي .
حور .. ماما اكيد شغله بينهم وماتقبل احد يعرف خليها ع راحتها واذا هي تريد تحجي تحجي من وحدها لاتصغطين عليها ..
رحت بدلت ونضفت وسويت غدا ..
لان گاعده من الصبح .
طفيت جوه الگدور ورحت غديت ماما ورضاوي وانطيته علاجه .
وحضنته ونمت .
رغم هو بالمدرسـة بس لسـا احسـة طفل رضيع من يحضني يضم راسة بصدري ..
فزيت العصر ع صوت عياط ..
طفرت . شفت زياد يعيط وايمان يمه ..
شكو شبيكم ..
ماما اشرتلي اسكت .
گال .. كله من وراج طلعتيلنا بسالفه الشغل وتقرين براسها ..
حور .. ياااا اني شعليه .
زياد .. لا اني .. بين يوم وليله طلعتلي بسالفه تريد تفتح مشروع وتريد فلوس وصارلها يومين گالبه وجهها عليه لو انفذلها طلبها لو تروح الاهلها .تردين تخربين بيتي يحور .
حور .. اشو كلشي خليتوه براس حور .. الي يوگع حور والي يريد يشتغل حور .
من الله ياخذ حور وترتاحون كلكم ..
زياد .. لاتاخذينا بالحجي . مو انتي گايله المرأة بلا شغل ماتسوه شي وحتى الرجال مايفيدها باجر عگبه يشمرها سلاحها شغلها وشهادتها ..
ضحكت ههههه وهاي شلها علاقه بايمان . اني دااحجي وي فرح وامي . گلتلهن من اشتغلت يله حسيت بهذا الشي .. شسوي المرتك الي كلشي تشوفه تريده .
اني اشتغل لان ماعندي احد يصرف عليه .
قابل ابطل حتى ارضي حضرتها ..
كافي تعبت الخاطر الله . نص حمل البيت جاي اشيله حتى ماتحجي لاانت ولامرتك .
لاكلش تذبوه براسي ..
تركتهم يتعاركون ودخلت يم ابني ..
وهي مصره تريد تفتح صالون وهو مايقبل وصوتهم واصل لوين ..
ثاني يوم انتظرت صفاوي يجي اتأخر ..
صار الظهر ومحمد ماجابة .
قلقت اتصلت عليـه .
الو محمد صفاوي بي شي ليش ماجبته .
محمد .. لا مابي بس ماراح اجيبه هذا الاسبوع .
حور .. ليش مشتاقتله وبعدين هاليومين الي مو من حقك ماتجيبه .
محمد .. واني هم مشتاق الرضاوي وهو عندج الاسبوع كله خليه الباجر واخذة يعوضج عن صفاوي ..
احترگ دمي وگمت اسب بي بداخلي . مااگدر احجي وياه لان هذا نذل يعاند ومايجيبهم ..
گتله بس رضاوي بعده مريض .
محمد .. طلابه صارله ست ايام هسا طاب ..
حور .. خلص لعد اذا اجيت باجر تاخذ رضاوي جيب صفاوي خلي اشوفه ..
محمد .. ها الله كريم اذا ماعنده دراسه ..
صدگ فورها الروحي .
ماطولت وياه بسرعه طبگته .
شگد خسيس يحاول يتلف اعصابي . مااعرف شنو غايتة
واني گاعده من الصبح ومنتظرته ..
رجعت خايبه حتى ريوگ عود منتضرته اتريگ وياه .
بيومها مااتريگت .
واطبخ ودموعي تنزل لاارديا .
شغلت نفسي بالشغل... انتظر ساعة ساعه تجي الجمعه وهو يضحك عليه ..
ااااه ياالهي شوكت يجي الوكت الي اخذهم بحظني ..
ومااتركهم ابد ..
ثانـي يوم اجه محمد وماجايب صفاوي . كانت عيني تدور بالسيارة .
اريد اشوفه ماكو
گتله .. صفاوي مااجه ..
محمد .. جيبي رضاوي يله بسرعة وجان گالب وجهه
جبت رضاوي والادويه مالته وملابسة
گتله ليش عود ماجبت ابني . مستكثر عليه هاي الدقايق الي اشوفه بيها ..
سحب رضاوي خلاه بالسياره . وباوعلي من فوگ لجوه گال لاتسوين نفسج مهتمه بيهم .
بينت طينتج شنو ..
-شتقصد انت ??
-هههههه لاعبالج خايف من التهديدات ترى مااخاف بس من الي خلقني .
وصعد بالسيارة وراح ..
هذا شيحجي كلشي مافهمت ..
دخلت واني بحيره ..
سولفت الماما .. گالت يمه اذا هو رجلج طول هالسنين وماعرفتيه شنو ترديني اني اعرفـة ..
حور .. اي والله يوم طلعت مااعرفـة ابد ..
ثاني يوم باشرت دوام بالمحكمة ..
سويت الاجرآت . وكملت .
وضيفتي هي محاسبـة قضائية ..
كان الامر عادي وطبيعي ..
الى ان شفت القاضي قيس مقابيلي ..
هنا ربطت الخيط مع بعضها . وافتهت شنو يقصد استاذ قصي ..
معقوله عنده الجرأة والسيطرة حتى ينقلني هنا يمه .
شنو هالتسلط اني ماانطيت موافقتي ولابدر اي شي مني بأني مرتاحة الوجوده بحياتي بعد ليش هيج يتصرف بساعة قهر .. رحت الغرفتـة الي دخل بيها .
الحمايـة مالته بس شافني گال تفضلي .
عبالك يعرف بتواجدي هنا وماكان متفاجأ الوجودي بالمحكمه العليا ..
دخلت ..من شافني ابتسم وگال منوره المحكمه ست حور ..
انت الي نقلتني هنا .
اي اني .. يحجي ويگلب بأوراق گدامـة وهذا الشي نرفزني ..
گال اگعدي ليش واگفـة..
گتله ليش شتريد مني ..
گال الكل يمدح بشغلج ونزاهتج واني محتاج شخص نزيه يرافقني بالقضاياي القانونيه والي تخص المحاسبه والحسابات .
گتلـة .. جان المفروض تسألني وتعرف رأي اني هناك مرتاحة .
قيس .. هناك اشكال الي يطبون ويطلعون والوضع مامرتاحله وانتي بعدج صغيره وع نياتج .
حور .. ومنو انت وتدافعلي . اني اگدر ادافع عن نفسي وبعدين هنا ماكو خطر عليه اشو من اسمها محكمه عليا واكيد اشكال الوان الي يدخلولها ..
رفع راسـة .. گال بس انتي هنا گدامي وبحمايتي ..
حور .. هههههه وشعليك بي .
قيس .. ضرغـام ماگالج .
حور .. گالي واني مموافقـة وبعدين اني لسا ع ذمة زوجي وماعندي غايـة ثانيه غير اولادي وشغلي .
وهسا عن اذنك ..
ردت اطلع ..
گام من مكانه وگال اوگفي .
التفتت اتقرب مني . وكلما يتقرب اتوتر اكثر .
شخصيته تهد جبل بحاله . مو عاد حور .
گال .. لاتتسرعين بالحكم . فكري زين . وبخصوص زوجج واولادج كلشي ينحل .
وهنا شغلج راح يكون وياي ومالج علاقـة بأي شخص ولاتنطين وجه الاحد .
عيوني بعيونـة وماگدرت احجي اي شي .
مااعرف شبيه .
استأذنت بسرعه وطلعت ردت بس اخذ نفس احس روحي اختنگت حتى ماسمعت شنو گال ..
يتبع.........
صباح الخيرات كلها عليكـم احبتـي ..
ضروف عندي ماتسمحلـي بالكتابه والنشر ..
اعذروني .. وان شاء الله اعوضكم بالايام القادمـة ..
///// البارت الثاني عشر /////
طلعـت من غرفتـة واني مستغـربه نفسـي ..
شگد عيب هاي شلون هيج حجيت وياه ..
مهما يكون هو قـاضي واني بمكان عمـل مو بالشارع ..
زين مافصلـني باول يـوم .. ااااه حور دوم تتصرفيـن بدون تفكيـر ..
گمت اداوم عادي ..
واستاذ قيس مايضايقـني .. حتى اذا احتاج شي يدز حمايته الي ..
كان حذر جدا بالتعـامل معي بالدوام ..
قل التقائي بي .. فقط لما يحتاج شي قانوني يخص المحاسبـة ..
اني اجتهدت بهاي الفترة وگمت ابحث واقرأ عن المحاسبه القضائية ..
وطورت نفسـي ..
مرت ايام ع دوامـي بالمحكمه لكن كنت جدا مرتاحـة .
مكتبي خاص الجانب مكتب القضاة ..
من اطلع اخذ تكسـي ..
مرات يعرض عليـة استاذ قيس انه يوصلـني بس اني مااقبل .. مااريد حجايـة تجيني ..
ارجع للبيت تعبانة لان ايمـان هذي الفترة زعـلانة وعند اهلها هي والاولاد ..
وزياد يدخل بس ينام ويطلع لايگعد ولايحجي ويانا .
حتى اكل مياكل عدنا .
بس اني وماما ومن يجون جهالي ..
رضاوي تحسنت حالته ..
بيوم رجعت من الدوام تعبانـة ..
اتصل محمد ..
رديت ..
الو اگلج وين انتي .
بالبيت ليش .
راح اجيب سيد واجي ونفظ سالفـة الطلاگ .
ماحجيت اي شي وكنت ممصدگة الي اسمعـة .
معقولـة محمد هيج تنازل عن عناده بسرعـة ..
زياد كان نايم بغرفتـة . گعدته .
-گال شتردين ..
-محمد خابر يگول راح يجيب السيد يطلگ ..
-واخيرا اقتنع استاذ محمد ..روحي هسا ومن يجون گعدنـي ..
-ياشگعدك اذا هو گال جايين بالطريق ..
-اي گمت گمت .. شوكت تخلص مشاكلج وارتاح ..
تركتـة وطلعت .. شريد احجي قابل .
نزلت گعدت ماما ..
اتصلـت ع فرح وگلتلها .
گالت اي اجاكم ضرغـام يدري ..
بقيت صافنـة اكيد هذا محمد گالـة .
بس،محمد شلون قنـع ..
اكيد شيخ عشيرتـهم ضغط عليه وخلاه يطلگ ..
اووووه وشعليـة بي ..
المهم يطلگ وارتاح كلشـي،مااريد.
ساعـة واندگت الباب راح زياد فتحة ودخلهم للاستقبال .
ووراهم ضرغـام وعمي ..
دخلوا بسرعـة صاحوني . لبست عباية ماما وطلعت .
من طلگني السيد منة ومحمد گالي انتي طالگ ..
حسيـت الدنيا افترت ورجعت بيه .. من يوم الي گلت للسيد نعم انت وكيلي ..
اتذكر فرحـتي بذاك اليوم وهذا اليوم ..
صحيح هسا ارتاحيت لان محمد طلگ . بس بنفس الوقت ضجت وحسيت كل الي بنيته انهدم بلحظة ..
الكل گام يلومني من شافني اختنگت ونزلت دموعـي
ويگلولي تندمتي ..
او بعدج رايدتـة ..
اني مستحيل اعتبرة زوج الي بعد او سند ..
بس الحقيقة صعبـة . بينا حب وايام وسنين وعشره واولاد كل هذا مو بالسهل انساه ..
محمد من طلع دزلي رسـالة ..
گال بالخير عليج .. گلتلي نفسج ع الطلاگ .
وبعتيني وبعتي اولادج عمود القاضي لان صاحب فلوس ومنصب ..
هان عليج ابو اولادج يتهدد ويتبهذل .. لو ادري بيج هيج جان طلگتج من زمان ..
ولا هالـذله وعلاقتج بالقاضي قبل مااطلگج والله اليعلم من شوكت هاي العلاقـة ..
افترت الدنيا بيه هذا شيقصد ..
هههههه هو منو الي باع منو . مو هو الي باعني وفضل وحده ماتسوه فلس عليه وتزوجها وبهذلني بالمحاكم وطلگني ..
وشمدريـه بالقاضي .. معقوله استاذ قيس مهدده .
لا ممعقولـة شلون عرفـة ..
اتصلت ع فرح وسولفتلها كلشي ..
وعاتبتها ع ضرغـام لان يدري بنقلتي ماحجة وهو الي ناطيه وجه ..
گالت القاضي قيس مستحيل يهدد او يسويله شي ماتدرين بمحمد حيال ويفتري ..
بس هو وضرغـام التقوا بي وفهموا الوضع انه اذا اشتكـيتي عليه ..
يگدرون ياخذون تعويض ويتبهذل بالمحاكم .
وهو من سمع بيها تعويض طلگ بسرعـة ..
حور .. وضرغـام شنو علاقتـة بالقاضي ليش هيج مهتمـله ..
فرح .. اگلج حور مو كافي دلال . وج الرجال شاريج ومو مال لعب ورايدج بالحلال ..
وهاي صارلج شگد يمه بالمحكمة هم شفتيه حجة وياج وتعرضلج .. لاتكبريها عاد ..
وبعدين ضرغـام سولفله قصتج كلها .
وحتى اولادج گال اخذهم محمد بالغش والواسطة ويگدر يرجعهم الج .. بعد شتردين .
انتي لازمج رجال يكون سند الج ويحميج ..
احنه مالنا احد حور لااخو ولاابو .
وقيس انسان ماكو منه .
حور .. كلامج عنه عبالك تعرفيه .
فرح.. ها اي مرة التقينا بي اني وضرغـام بالمطعم واتعرفت عليه . انسان كله وقار ورزانـة .
حور... امممممم وشوكت ناويـة تگليلي حضرتج .
فرح .. مااگلج لان اعرف راسج يابس ..
حور .. مااگدر فرح مااگدر ماعندي اي مشاعر اتجاهه شلون اعيش وي انسان مااعرف اي شي عنه ولااعرف طباعـة.
فرح .. مو اخذتي الي تحبيه وتعرفيـه شحصلتـي منه غير بس شلعان الگلب وطلعتـي اصلا ماتعرفين وجهه الحقيقي ..
حور .. روحـي فرح شوشتي افكـاري انـي اذا مايرجعـون اولادي ماافكـر بأي شي ..
فرح .. ابقـي بهذا عنادج .. ومحمد اعند منج اخذهـم بالحيلة والمكر صدگتي يرجعـهم ..
حور .. كافـي فرح دااحسج تضغطين علـيه ..
فرح .. خلص بعد مااحجي وياج سدي الموضوع.
سديت الموبايل وانـي افكر بكلام فرح ..
التهيت بالعشـا وكملت ..
گاعدين نتعشـا .
گالت ماما لزياد .. يمـة شوكت ناوي تجيب مرتـك وجهالك ..
زياد .. مااجيبهم خليهم هناك ..
ماما .. يمة عيب عندكـم جهال بطولكم وينكم ووين الزعل زياد .. مو جانت ماعاجبتجن هسـا ارتاحن منها ..
وترك العشـا وگام ..
ماما .. ياااا اني شحجيت غير المصلحته .. ويايوم اني حجيت على مرته لو شكيت .
حور .. اتركيه يوم هو يهدأ ويرجعها . وبعدين هو حجى هيج لان مشتاقلهم وضايج لفراگهم ..
ماما .. الله يهديهم ان شاء الله ..
.......................................... ..
كملنا عشا وغسلت المواعين واجيت للغرفـة ..
گعدت وي ماما واجـة ببالي استاذ قيس ..
گلتلها ماما ..
اجتني قسمـة ..
ماما .. منين هذا .
حور .. قاضي جبير بالمحكمه .. يعرفـة ضرغـام .
وهو الي حجه وياه .. شخصيه ورزن وشخصيته مختلفـة عن اي رجال اعرفـة ..
هو اكبر مني بهواي بس مامبين عليه الكبر ..
ماما .. زين هذا متزوج ارمل مطلگ .مامعقولـة لسا مامتزوج ..
حور .. مااعرف ماما لان اصلا ماجان ببالي بس ضرغـام وفرح يگلولي شاريج ويعوضج عن الي شفتيه وگايللهم ارجعلها جهالها بجلسـة وحده ..
وهو هم ماضغط عليه گالي فكري براحتج ..
ماما .. ياامي والله مااعرف شأكلج . هستوج طلعتـي من تجربـة فاشله وي محمد .
وماصارلج هواي وخاف الناس تگول جانت منتضرة تتطلگ حتى تتزوج ..
حور .. ماما والله موببالي الزواج الي يهمنـي جهالي ..
اريد ارجعهم الحظني ..
ماما اني عقلي مشوش ومااعرف شنو اريد .
لهذا اريد نصيحتج اريد احد يدلني ع الطريق الصحيح ..
ماما .. بااعي ياامي . اني مادايمتلج ولااخوج الج .
وامنيتي اليوم قبل باجر تكونين عند رجال يصونج ويحميج طول العمر ومايضل بالي عليج من اموت ..
انتي مره اختاريتي بإرادتج ومااخذتي شور واحد ..وشفتي النتيجه ..
هسـا شوفي ضرغـام وعمج وشيگلولج سوي وبعد انتي بكيفج تگولين مااريد واريد اعيش حياتي هم بكيفج ياامي ومانجبرج على شي ..
خلتني ماما بحيرة اكثر وماعرفت اخذ قرار ..
خليتها للزمن هو يحلها ..
ثاني يوم بالداوام جان طول النهار عندي قضيـة تخص المحاسبـة يم استاذ قيس ..
من كملنا دوام .. استأذنت واريد اطلع ..
گال حور ممكن طلب ..
التفتت ..
تفضل استاذ ..
اريد اگعد وياج بمكان واحجي وياج ..
ماكو شي نحجي بي غير القضايا استاذ ..
حور رجاءً اذا ضايقتج او ماعجبج كلامي من حقج تگومين وتتركيني ..ها شگلتي ..
سكتت فترة وگتله ماشي . بس مااگدر اتأخر .
هز براسـة وگال انتضرج بالسيارة ..
رحت للغرفـة جمعت اغراضي وجنطتـي وطلعت .
لگيته منتظر ..
صعدت بالسيارة بسرعـة ليشوفنا احد .. مالي خلگ حجي يطلع عليـة .
رحنا المطعم معروف وراقـي ..
نزلنا طبعا هو طول الطريـق مافتح اي موضوع گدام الحماية مالته ..
من نزلنا گال تفضلي وفتحلي باب المطعم ..
راح حجى وي النادل يريد طاوله هادئة ومنعزلـة .
اشرلـة فوگ .
ومشى النادل گدامنا ..
عيني صارت ع قيس . حركاته كلامـة طريقتـة بالتعامـل .
فعلا انسـان راقي ..
التفتت واشرلي بإيدة معناها اصعدي ..
صعدنا اثنينـة كنا نفـس الخطوات ..
عيني كانت ع حركة رجلينا .
نفس الخطوات ويصعد ببطئ ..
بالاضافـة الى حذائة الي تلمع ..
عبالك مايمشي ع الگاع .. وجونا هذا المتـرب.
وصلنـا سحب الكرسـي وگال تفضلـي ..
گتلة شكرا وگعـدت ..
النادل مال تطلبون شي .
قيس .. حاليـا بس مي . من نريد نطلبك اگلك .
اني كانت عيـني ع الشارع اباوع من الشبـاك ..
گال حور !!
باوعتلـة . گال بيه شي محدد للرفض .
اخذت نفـس .. وليش متوقعرالسبب برفضي شخصك .
اني اصلا رافضة فكرة الزواج نهائيا .
واكيد تعرف كلش زين البارحـة تطلگت سيد .
يعني مصار هواي ع طلاگي ..
شتگول الناس اذا ارتبطت بسرعـة .
او محمد اذا عرف راح يخلينـي اشوفهم ..
استاذ اني تعبت من الصدمات ومو حمل الم وقهر بعد ..
قيس .. وانتي ليش تفكرين بالناس .. انتي متزوجـة بالحلال . واذا ع اولادج مستعد ارجعهم من باجر .
حور .. يعني مثل ماهددته ع الطلاگ .
قيس .. هههههه هو گالج هيج .. هذا شگد دون .
اسف على اللفظ ..
اني مو من طبعي اهدد .. اي شي اسويه استخدم العدالة والنزاهـة ..
وانتي اشتغلتي وياي فترة وشفتينـي ..
ماعندي لاخوف ولاواسطـة وهذا الي مخوف الناس مني يعرفون مااخاف ولااتهاون عن الحق ..
بس محمد بعد ماسألت عنـة وعرفت مايستاهلج ..
قبل فترة جان متزوج طالبة عنده بالسر ..
ومطلگها قبل ليتزوج ..
البنية مطلقـة واستغلها ..
يعني هذا مايستاهلج ولايستاهل اولادج ..
حور .. متزوج بالسر شلون عرفت ..
قيس .. لازم ناسية اني قاضي .
واذا اگلج عنده حساب بالبنگ ومحد يدري بي ..
حور .. هههههه معقولـة خلص عمره وياي يبجي ويگول ماعندي ..
منين جابهم ..?
قيس .. هيج بشر يصير طماع ومايشبع بالقليل ..
استغل طيبتج وحبج المصلحتـة ..
ومازال يفكر بمصلحتـة وديضغط عليج بأولادج ..
نزلن دموعـي .. گتلة شلون هيج اني عميه . انت تحجي واني ممصدگه احس شخص ثاني الي تزوجته مو هو نفسة ..
طلع كلينكس وگال . هاي الدموع حرام ينزلن بس للفرح
الحزن ميلوگلج ..
حور .. انتي مميزة بالنسبة الي .. مااعرف شلون گدرتي تحافضين ع طيبتج ونقائج . وانتي عايشة وي ناس مخادعـة وغدارة مثل محمد واهلـة ..
نادرا مااشوف انسانه . تفكر بالكل قبل ماتفكر بمصلحتها ..
مااريد اذكر الصفات الي شفتها بيج وعجبتني احب احتفظ بيها النفسي حتى ماتتغير بيج وتبقى نفسـها ..
حور انـي متزوج .
رفعت عينـي بعينـة ..
اي لاتستغربين متزوج وعندي اولاد واحفاد . وگضيت عمري افكر بيهم وبمستقبلهـم ومايوم فكرت بنفسـي او بحياتي ..
لاول مره من شفتج تذكرت اني ماعايش اني ميت ومدفون ..
حور .. وزوجتـك وين ليش هيج تحجي ..
قيس .. زوجتـي بنت عمي .. مااريد اگلج قصرت وياي ولا هاملتني ولااي صفـة تسيئ الها ..
بنت عمي ذهب صافي .. ورغم تدري بيه مااهواها ومارايدها بس تحملتني وعاشت وياي بالحلوة والمره .
رغم هي اكبر مني ب 8 سنوات ..
بس ماحسستها انه هي اكبر مني .
احترمتها واحترمتني .. وكانت بالنسبـة اليه ام اولادي وبس . ماكانت حبيبه الي ..
اثنينه خضعنا الارادة ابوي وجبرنا ..
وضيفتي وگلبي بعدوني عنها .. هي عايشه وي اولادي بالجنوب واني اغلب وقتـي هنا ببغداد ..
وحدي ومالي احد . من حقي بعد مالگيت الانسانة الي اريدها اعيش حياتي وياها ..
وثقـي اولادج هم اولادي .. ودوامج يستمر ..
واخليج بعيونـي ..
حور .. زوجتك تعرف تريد تتزوج ..
قيس .. اي تعرف وماحجت لان هي من زمان تگلي تزوج وعيش حياتك ..
حور .. حجي السان ماكو مره تگول الزوجها تزوج .
اني تركت محمد لان تزوج علية .
شلون تريدني اني اتزوج انسان عنده زوجه واولاد .
لانگلي هي قابلـة . بس تلگي داخلها يغلـي ..
اعتذر استاذ .. خلينا نروح ..
قيس .. حور لاتتسرعين . اذا تحبين اخذج للجنوب واعرفج عليهم وتسأليها بنفسج .
اني مااخطي خطوه اذا مايكون عندها علم ..
ولو مامريضه وماتگدر تگوم جان جبتها بنفسي الج واتأكدي ..
حور .. مااريد اخطأ بعد . تعبت اخطي خطوه واندم عليها قيس .. فكري زين حور . لاتظلميني اريد اعيش مثل الناس العايشة .
حور .. ممكن ارجع اتأخر الوقت ..
قيس .. اكيد ولو ماتغدينـا .
حور .. شكرا ماكو داعي . اتأخرت .
طلعـنا من المطعم .. گال بخصوص حضانه اولادج ارفعي قضية استأناف . واحاول اني اراقبها ومايصير غش وخداع ..
حور .. شكرا .. بس يستقر وضعي اني ناويه اقدم دعوه حضانه ..
قيس .. اي مساعده اني حاظر.
حور .. تسلم ..
كان كلامـي جاف وياه . من سمعت زوجتة عايشه ومريضـه وهو يفكر بنفسـة وحياته ..
كل الرجال انانيين ميفكرون الابنفسهم ..
وصلنا الشارعنا گالـة نزلنـي هنا ..
دخلت للبيت شفت زياد وزلم بالحديقـة واكفين ويسولفون بسرعـة دخلت للبيت شفت ماما گاعده ..
گلتلها ذولي شنو الرجال بالحديقـة ..
ماما .. هذا اسطة وعمال جابوهم حتى يسوي صالون بالحديقـة المرته ..
حور .. شنووووو وليش بالحديـقه مااجرلها بأي مكان .
دخل زياد ويمكن سمعني ..
اني جاي ابني بحصتي ست حور ومحد اله دخل ..
اني هم مااهتميت ..
بدلت وتغديت ..
ردت انام بس كلام قيس يدور بعقلـي ولهفتـة الي .
حسيتـة مو ذاك القاضي الي من يمشي بالمحكمـة يهز الگاع بمشيته ..
كلام وياي كلام عاشق ويحب من سنين مو اشهر ..
مااعرف ليش هذا الرجل يزيدني حيره وتوتر ..
احسـة غامض وقصته مادخلت بعقلي ..
هيج انسانه مثاليه مثل بنت عمته ليش تركها .
وليش هو اغلب حياته هنا وتارك ديرته واهله ..
ااااااه ياقيس ..
غموضـك زادنـي اهتمام وتفكيراً بك !!
يتبع ..
هلا وغلا حبايب 🌹💕
///// البارت الثالث عشر /////
ونمضـي في طريـق لانعرف مـداه ..
ولانـدرك ماذا يخبـئ لنا القـدر..
نسـير ولانعـلم الـى اين نـذهب ..
وكل خطوه تأتي بعدهـا خطـوة ونسـتمر في سيرنا .. الـى مايكتبه القدر عند الوصول..!!
گعدت قبل المغرب .. شفت ايمـان واولادهـا راجعين ..
وگـاعده تسولف وتضحك ولاكأنه شي صاير ..
يعنـي كانت دموعـها وبجيهـا وزعلـها ..
كلـة عمود تحقق غايتـها ..
اااااه يازمـن لو يرجـع شوية .. جان غيرت تعامـلي وي محمد .. اتمنيت يرجـع حتى اگلة كلمـة لا ..
كنت اذا اگله شغله او طلعـة او تعزمـني فرح او وحدة من صديقـاتي ..
بـس يگول كلـمة لا اسكت ومااجادلـه .
ولاازعل او اضوج ..
ولااعبـس بوجهه ..
بالعكـس كنت ابدل وارتب نفسي واحظر العشـا ولاكأنه شي صاير ..
مااتذكـر بيوم رحت زعـلانة الاهلـي ..
وهذا الـي خلاه يستغـل طيبتـي ويـذلنـي ..
گالـت شلونـج عينـي حور .. مبروك ع الطلاگ ..
گلتلها .. الله يبـارك بيج ..
اتلگونـي ولد زياد بوسونـي وحضنونـي ..
العجيب بيهم حنيـة ماموجوده عند امهم وابوهـم ..
اتصلـت عليـة وحده من صديقـاتي بالجامعـة..
گالت حور ..
من زمـان ماملتقين . وراح نطلع نتعشـا كلنا البنات تطلعـين ويانا الحو البنات اجيبج ويـاي ..
گلتلها منار تدرين بوضعـي وماصار هواي من تطلگت .
واخويـة مايقبل اطلـع ..
منار .. شنو هاي حور ماصدگنا رجعتي تتواصلين ويانا نوب اخوج هذا طلعنا من جهه .
انطينـي خالـة اني احجي وياها ..
گلتلهـا ماما منار الي كانت بالخط وياي بالجامعـة تريد تحجي وياج ..
بقت تحجي وي ماما شويـة وگالتلها اذا تاخذيها انتي وترجعيـها ماعندي مانـع ..
نطتنـي الموبايل ..
منار .. ها حور بعد ماكو حجـة خالـة وموافقـة جهزي نفسج راح امر عليج اخذج ..
حور .. ماشي انتضرج ..
ماما .. ماردت اكسر بالبنيه خطيه توسلت بيه . بس مو تتأخرين للعشرة وترجعين .
حور.. ماشـي ماما ..
بدلت ورتبت نفسـي ..
وانتضرت منار تجي ..
اتصلت عليـة طلعت ..
بوستنـي وگالت متغيره بس حليـانه والضعف لايگ عليج
كانت هي واختـها الي تسوق بالسيارة ووياها بناتها اثنين يخبلن ماشاء الله ..
نزلنـا بالمول ..
هناك شفت صديقـاتي كلهم ..
كل وحده هي واولادها جايات ..
رجعت الايام الجامعـة والضحك والسوالف ..
سألني ع اولادي ..
گلتلهن ابوهـم اخذهـم مني ..
نور .. طبعـا بدون زعل حور انتي مااعرف شعجبج بي هو من جان بالجامعه نسونجي وعيني زايغـة .
حور .. ماسامعـة الحب اعمـى .. حبيتـة وعميت عيونـي عن كل مساوئة ..
منار .. بس زين سويتي وتركتيه . كان معقد لايخليج تطلعين ولاتتواصلين ويانا .. حتى فيس ماعندج .
حور .. كانت كل هالاشياء ماشافيتها من كثر حبي الـه
بس بعد ماتطلگت واشتغلت وشفت حياتي ..
حسيت اني كنـت ظالمـة نفسي ودافنـة روحـي بالحياة ..
اغلب كلامنا كان ع محمد وسوالفـة ..
ضحكت منار .. گالت معقولـه محمد ابن حلال ..
اشرتلنا لورى ..
التفتت شفت محمد هو ومرتـة .
مخلين ايد بإيد ويمشون ..
سحب الكرسي وگعدت وتبتسم ..
من عاب هالشكل .. وفوگاه شلون مقدرهـا .
ولو طنجرة ولگت غطاها ..
ماكلف نفسـة يطلع اولادي وياه ..
خطيـة لو اني اطلعـهم من يجوني لو ماكو .
درت وجهـي عنهم ومااهتميت ..
گلتلهن خي يولي لاتخلنا ينتيه علينا ..
زهراء .. وج معقولـة هاي فضلها عليج شنو شاف منها .
حور .. سمعت الوحده الاهلها وعندهم فلوس واملاك وماشاء الله محمد يموت ع الفلس ..
منار .. گبر الـة . ولجن شافنـا ويباوع النـا ..
سوينـا نفسنا ماشفناه .. اجت طلبيـة الاكل الي طلبناها ..
كنا حاجزين طاولـة للاولاد وحدهم بصف طاولتنا .
واحنـة وحدنا حتى ناخذ راحتنـا ..
اني ناطيتـة ظهري مايشوفنـي .
بس منار تگول عينـة عليج يمكن عرفج انتـي گاعده ويانا .
زهراء .. خرررب ولجن اجـة اجـة ..
حور .. من گالت اجـة عرفت الفضول قتلـة ويريد يتأكد اذا انـي الي گاعدة او لا ..
گال السـلام عليكم ..
گامن البنات رحبن بي ..
وگاللـة شلونك استاذ .. لسـا يگوللة استاذ ضحكنـي لااراديا وانـي گاعده بمكانـي ماباوعتلة اصلا ..
محمد .. شلونـج حور ..
حور .. زينه الحمد لله .. لعد الجهال ماكو ??
محمد .. تركتهم يم الوالده عندهم دراسـة ماقبلوا يطلعون ..
حور .. امممممم .
محمد .. بشري لسـا ماعقدتوا ..
حور .. اعتقد هذا الشي ميخصك واصلا ماكو هيج شي ..
وهسـا من رخصتك روح المرتك لان شكلها حتنفجر ..
باوعـلها واستأذن وراح ..
هو مشى عنا .. والبنات طگن من الضحك ..
نور ..وج شسويتي وجهه صار كركم من الفشلـة ..
منار .. باعن زعلت يمكن گامت تحجي وهو يهدأ بيها ..
خطافـة رجالة هم تغار عود ههههه .
زهراء .. وج ياخطوبه هاي اشو ماگلتي ..
حور .. هذا وحده يحجي ويني ووين الخطوبـة واني هستوني تطلگت ..
اكو شخص رادنـي بس اني رفضت لان ماصدگت طلعت من السجن ارجع بهد ادخلـة واكرر الغلط مرة لخ ..
منار .. مو كل الرجال محمد .. حور اذا قسمـة زينة شبيها يعني . وبلكـي اذا خوش رجال يرجعلج جهالج وترتاحين ..
حور .. ها صرتن فرح وماما ليل ونهار يزنن ع راسي .
زهراء .. شسمه وشگد عمره وشنو يشتغل ..
حور .. قاضي تمييز بالمحكمه العليا ..
كلهن بصوت واحد .. خررررررب ورفضتيه. وفوگاها تقارنيه بهذا ابو النسوان ويأشرن عليه ..
حور .. هههههههه كـافي فضحتنـا..
منار .. لا صدگ ليش رفضتيه ..
حور .. ماكو سبب محدد بس خايفه من التجربه مرة ثانيه ومتزوج وعنده اولاد ومتزوجين .
زهراء .. عزززه هذا شايب .
.................................................
حور .. انتن تگولن هيج بس اذا شفتنه تغيررن رأيجن
طول وشخصية .
شعره ولحيته وشواربه بيهن شيب .
بس كله وقار وهيبه ورزانـة .
كلامـة وتصرفاته بهدوء ..
بس اذا عصب يتغيرن ملامحه للاحلى ..
عمره كبير بس شكله مايبين عمره ..
منار .. عيني عيني شوف شلون توصفـة وتگول مااريده . وج احنه حبيناه من الوصف لعد انتـي شلون ..
حور .. بس هذا كلة ماينكر انه متزوج وعنده عائله .
انـي تركت محمد لان تزوج عليه وماردت وحدة تشاركنـي بي . شلون تردنـي اخذ رجال من مرتـة .
نور .. وج تقارنين هيج شخصيه بمحمد .. اكيد مايخطي خطوه اذا ماحاسبلها .. واكيد مفكر الكلشي قبل مايحجي وياج يعني انتي مو نزوة بالنسبة الة ..
منار .. اي والله صدگ محمد رغم كبر عمره بس تحسيه متسرع وتصرفات مراهق كل يوم وي وحده من جان بالجامعه ..
تتذكرين من جنه انگلج عنده بنات شلون تزعلين وماتصدگين بينا ومن خطبج گلنا يمكن ظلمناه بس طلع ابو طبع ميغير طبعة ..
حور .. كافي سدن الموضوع ملاحظات من اجينا لسـا بس اني محور الحديث .. انتن سولفلي عن حياتجن وهذا الاكل الي برد ومااكلناه ..
منار .. ههههههه شوف شلون تريد تغير للموضوع ..
اكلنا وكملنا اخذنا الجهال لعبوا شويه ..
وبعدين رجعنا للبيت وصلتني منار وراحت ..
فتحت الباب ..
شفت زياد گاعد بالصاله وگالب وجهه ..
زياد .. وين جنتي لسا ..
حور .. وي صديقاتي وماما تدري .
زياد .. واني طرطور بالبيت محد يگلي ..
ماما .. غير اني امها والي حكم عليها .والبنيه اخذتها منا ورجعتها ..
زياد .. وشمدريني البنيه رجعتها .. اسمها مطلقه وطالعه وحدها بالليل الناس شتگول اذا شافتها راجعه بالليل وي غربه ..
حور .. اذا ماعندك ثقة بيه فهاي مشكلتك واذا تحب روح البيت ابو هوار وشوف بكامراتهم منو وصلني ..
وبعدين واذا مطلقـة قابل كافره لو مسويه خطأ..
كافي عمري 30 وكلها تتحكم بيه وتاخذ قرارات عني ترى كبرت شوكت تفهمون اني كبرت ..
زياد .. كبرتي بس ماتكبرين عليه وماحسيت الا براشدي دار وجههي كلها من قوتـة ..
شهگت بصوت .. اول مرة يضربني صحيح كان يسمعني حجي ويغلط بس بحياته ماضربني ..
گتلة شكرا يااخوي الوحيد وسندي . خوش وكفه وگفتلي من تطلگت لسا ..
تركته ودخلت للغرفـة . خدي يسعر نار بيه .
ردت ابجي اعبر عن قهري .
ماتطلع دموعي .. عيوني ملت من بواجيي وخلصت دموعي ..
دخلت ماما ..
گالت ليش ترادديه اتركيه يحجي ويسكت وحده ..
اخذتني الصدره وباست راسي ..
گلتلها يوم تعبت اريد ارتاح شوكت ..
گمت اون بصوت واشهگ بس دموع ماكو ..
گالت گومي اسبحي حتى ترتاحين ..
دخـلت سبحت ونمت بعدين ..
مااريد افكر بشي ..
گمت اخذ ڤاليوم حتى انام بسرعـة وانسى همومي وتفكيري ..
كنت اشغل نفسي بالشغل حتى ماالتقي بقيس ..
كان سلام وبس بينا ..
بس عيونـي كانت تراقبة من يگوم ويگعد ..
او من يطلع يتمشى برى المحمكة اذا ماعنده شي .
دايما يحب يمشي حتى اذا عنده قضيه يقرأها وهو واگف ع الشباك وجگارتة بيده ..
محمد گام يعاند وياي .. اولادي يجيبهم الجمعه العصر او مرات يطلع ججة حتى ميجيبهم ..
ضرغـام گال حاليا صار عندج وضيفـة .. وعدنه تقرير المستشفى مال رضاوي .
وتعاملـة وياج وشلون ماانطاج حقوقج ..
الاحسن ترفعين قضيه تطالبين بيها بحقوقج والحظانه سوه .. واستاذ قيس راح يثبت انه عنده رصيد بالبنگ ويجيبلنا وثيقـة بهل شي ..
حور .. لاضرغـام لاتدخل استاذ قيس مااريده يتدخل ..
فرح .. وج عوفي كلشي وفكري بأولادج هذا محمد ملعب وماكو غير هيج نسوي يله نگدر نكسر خشمـة وناخذ الجهال ..
حور .. هاااا لعد اتفقوا بينكم لاتدخلوني اني . مااريد التقي بأحد ..
فرح .. ههههههه لاتخافين مانخليج تلتقين بشريك المستقبل ..
حور.. خزرتها فرررررح .. حرجتني گدام ماما وضرغـام
قدمت دعوة ضد محمد ..
والمحامـي كمل الاجرآت ..
گال راح يدزون اله تبليغ ويبلوغوه بموعد المحاكمه ..
رجعت من تعبانه ..
اشرتلي ايمان .. اشششش ادخلـي بسرعـة غسلي وبدلي وتعالي ..
حور.. شكو ..
ايمان .. مااعرف نسوان جايات عليج .
حور .. علية منو ..
دخلت للاستقبال من غير ماابدل بملابسي مال الدوام ..
شفت مرة كبيرة بالعمر بس مبينه بعدهي بقوتها ولابسـة اسود ..
ووياها اثنين بنات يمكن بعمري او اصغر مني ..
سلمت وگعدت يم ماما ..
ماما .. ام هدى هاي حور ..
المرة گامت تصلي ع النبي ..
اني ماافهم شنو السالفـة..
ام هدى .. گالي صغيرة وحلوه بس مااتصورت هيج ..
حور .. منو الي گال ..
سبقتها ماما وگالت ..
الجمـاعة من طرف استاذ قيس . وخزرتني ..
........................ .......................
اني صفنت ..
گلتلها اهلا وسهلا . وعيوني عليهن معقوله هاي مرته والبنات ذولي بناته ..
اكيد عرفن واجن يعاتبن ويحجن عليه .
بهذي الثواني تفكيري تشتت والف فكره خطرت ع بالي .
مثل ميل الساعه من يرن براسي اذا الجو هدوء وماكو احد ..
للافكار كانت تجيني وحدة ورى الثانيـة ..
بس الي طمنـي شويه البنات يبتسمن بوجهـي ..
ام هدى .. هذي بنتي هدى ماخذه ابن اخوي سعد .
جبتها واستشهدت ابو هدى وبقيت عليها ماتزوجت كبرتها وتخرجت وهسا تزوجت واولادهم بحظني اربيهم .
ابتسمتلها .. الله ينطيج طولت العمر وتفرحين بيهم ..
كملت كلامها ..
وهذي وفاء بنت اخوي قيس ..
وبعد عنده نجلاء الصغيرة مااجت لان ماصارلها كم شهر تزوجت وبعدهي تستحي تطب وتطلع ..
گالت ..اخوي انظلم هواي بحياته تعب علينا وصرف وبعد موت ابوي هو اتكفل بينا كلنا .. ام امجد جابتها مرض بمرض وماشاف شي سوده عليـة .
ومن شافج وشاف اخلاقج عجبتيه ويريد يستقر ويرتاح ولازمـة مره ببغداد احسن مماعايش وحيد ..
زاد استغرابي اكثر .. جايات يخطبن . هذي اخته افتهمنا بس هذي وفاء ابوها يريد يتزوج ع امها ..
شلون تقبل ابوها يتزوج على امها ..
حور .. جيتكم على راسي .. بس مااگدر اقبل برجال متزوج وزوجته عايشه .. اني تركت زوجي لان تزوج عليه .. بعد شلون اقبل شي اني مااقبلـة ع نفسي ..
حتى اذا مريضه المفروض مايتركها ويراعيها يعني اني هم اذا تمرضت يتركني ويتزوج ..
ام هدى .. يمة قيس مو هيج .. انتي ماتعرفيه گلبه حنين وماترك بنت عمها من يوم الاخذها .
وصارله وياها 32 ماتركها ولا تزوج عليها ..
بس هسـا هي الي گالتله وشافته شگد انظلم وقدرت وضعه ..
وفاء .. اذا تحبين تحجين وي ماما صدگي ماعندها مانع .
حور .. هههههه تحجين صدگ انتي بنتها شلون هيج تحجين وشنو ترديني اگلها .. اريد اتزوج زوجج موافقـة لو لا ..
وفـاء .. حور اذا تسمحيلي احجي وياج ع انفراد ..
حور .. تفظلي وياي .. اخذتها ورحنا الغرفتـي ..
گعدنا ع السرير ..
گالت .. تعرفين ليش اريد بابا يتزوج ويعيش حياته ..
ماكو بنيه تقبل ابوها يتزوج ع امها ..
بس بابا يستاهل السعاده . وخاصـة من شفته رايدج وعيونـة تلمع من حجى بيج ..
اني من گالت هيج دنگت سويت نفسي ممنتبهة .
گالت .. ماما من تمرضت .. الكل ملتهي ببيته وحياته .
وبابا اخذ اجازة شهرين بدون راتب وسافر بيها للخارج .
بس هو وياها ..
كانت ماتگدر تتحرك ولاتگوم ..
وهو الي اعتنى بيها .. حتى حاجتها هو ياخذها من جواها ويغسللها ويبدللها ..
الى ان صارت احسن ..
ماما عندها مرض ولادي ..
ومن تزوجها بابا وهي مريضه .. ومنعها الدكتور من الحمل بس هي كانت تحمل وتجيب وتبقى تسع اشهر نايمه . وبابا هددها اذا حملت بعد يتركها عمود صحتها .
لان بسبب الحمل والولاده تأزمت حالتها وبعد لاتگوم ولاتمشي بس نايمه ..
واخذها وسوالها عمليه ..
صحيح هي تگعد ع الكرسي بس احسن من قبل اديها رجليها تحركهم .
تسوي حاجتها وحدها تگدر . بس المشي شويه صعبه عليها .
بينما احنه لاهين ببيوتنا وازواجنا . بابا الي سافر وياها واعتنى بيها ..
ماشاف شي من حياتة...
وهي الي دايما تگلـة تزوج وعيش ..
بابا وماما انظلموا بسبب جدو الله يرحمة ..
فكري حور ولاتتسرعين بالحكم عليه ..
طول ماهي تحجي اني ساكته واستمع .. معقولـة اكو انسان هيج ..
والحلو بي ابد ماحجة ولاگال اني سويت هيج وهيج ولاطلع نفسه ملاك ..
خلاني اتصوره انسان خاين وترك زوجته بأصعب ضروفها
گلتلها وفاء جيتكم ع راسي بس حاليا عقلي مشوش وعندي قضية اولادي اذا مااربحها ويرجعولي مااگدر افكر بنفسي ..
طلعنا من الغرفـة وهي تبتسم وتگول من اول ماشفتج حبيتج مايلام بابا من حبج ورادج ..
من گالت هيج ابتسمت وصارت ملامحة گبالي .
لگيت ماما وام هدى ماخذتهن السوالف وعبالك جانن عشره عمر .. تآلفن بسرعـة ..
ايمان كانت گاعده وتستمع بس ابد ماناقشت ..
ام هدى .. ها يمه شصفيتن ..
وفاء .. عمه ان شاء الله خير بس حور تگضي قضية الحظانه مال اولادها ونجيها مره ثانيه ..
ام هدى .. الله يرجعهم الحظنج يمه .. والله قيس من سولف سالفتج انقهرنا. شلون عشتي وياه تسع سنوات وماعرفتي طينته ..
ايمان .. هي حور دومها تتقشمر ماتعرف تتصرف ..
ماما .. دادة ربيتهن ع الطيبه والنيه الصافيه وشلون يديرن بالهن على رجلهن وبيتهن ماعلمتهن ع الخبث لهذا قشمرها واستغلها ..
ام هدى .. مبينه طيبه وبنت اوادم لو موهيج مااختارها قيس لان هو يعرف المره من مشيتها اذا زينه لو شينه ومادام تمسك بيها ماعليها شايبه ..
استأذنن وطلعن واخذت وفاء رقمي گالت نبقى ع تواصل اتصلت ع فرح بعد ماطلعن ..
وتخبلت ليش ماگلتيلي اجي بسرعه وبقت تلوم بيه .
وتسأل واني اجاوب صارت محقق عليه ..
لليل اجة زياد معصب والنار تطلع من عيونه ..
وج......... تطلگتي وداومين بالمحاكم ومسوية علاقات منين عرفج هذا القاضي واجه يخطبج شعندج وياه ..
يتبع..................
مساء السعـادة عليكـم حبايـب🌹
///// البارت الرابع عشر /////
اصعب شئ .. عندمـا يكـون العقل والقلب في تناقض ..
عقلنـا يحاول ان يسيرنـا نحو الصواب والمنطق ..وقلبنـا يسير عواطفنا ومشاعرنـا بإتجـاه مخالـف ..
بعد مااجـة زياد يعيط ويغلط عليـة وطلعنـي حالنـي حال العاهـرة ..
وحتى اتهمنـي بترك محمد الي ..
وگال ..
وج طلع محمد مايلام من تركج وراح الوحده ثانيـة هاملته والله الي يعلـم شمسويتلـة حتى شاف غيرج ..
ههههههه ضحكت لان معرفت شنو ارد علـيه ..
ليش تضحكين حاجيلج نكتـة ..
انت ساعـة احسك اخويـة وساعـة احسك عدوي ..
انت ليـش هيج تكرهـني ..
قبل فترة حسيتك تغيرت وزين وياي ورجعت النفـس حقدك .. اذا انت اخويـة هيج تتهمنـي لاعتب ع الغريب
ولاعتب ع محمد والي سواه وياي لان يدري ماعندي سند التجأ الـة ..
-انتي من يوم الي تزوجتـي محمد حذفتج من حياتـي واذا تشوفيـني الين وياج شويـة فالسبب امي ..
لومـا الحاحهـا علـية جان ماحجيت وياج اصلا ..
هاهي رحم الله والديك كفيت ووفيت يااخوي الوحيد
درت وجهي للغرفـة .
گال هييييييي احجي وياج وين رايحـة ..
التفتت عليـه .. گتلـة خلص اني مو حور القديمـة شوكت ماتحجي ويـاي بأسلوب حلو ومحترم اوگف واحجي وياك واخليك ع راسـي بعد ..
درت وجهي ودخلـت بقى يحجي وي ماما ويفرفح ..
وسمعتـة يحجي وي ضرغـام ويعاتبـة .
ويگـلة ليش ماگتلي وانـي اخر من يعلـم ..
بعد مااهتم .. دايما افكر بعواطفـي اتجاه الناس وتاركة گلبـي يتحكم بيه ..
والاصح المفروض عقلي هو الحاكم الاموري وتصرفاتـي
بعد مااهتم الاحد .. واخلـي مصلحتي ومصلحة اولادي فوق كلـشي ..
دخلـت ماما گالت زياد گلب الدنـيا ويگول ماانطيها لان مااعتبرنـي رجال وراح الابن عمها ..
حور .. ماما هذا طبع زياد يحب يتحكم بكل شي ..
الي يشوفـة لو يسمعـة يگول باجر زواجـي هو شدعوة قاتل نفسـة هيج ..
اني الاهـم عندي حاليا قضيـة اولادي يخليـه هو يحجي وحده ..
ماما .. والله مااعرف شأكلج ياامي اني حايرة بينكم .. وعبالكم ارتاح من اشوفكم هيج .. اموت الف موتـة واني اشوف بزر بطنـي عبالك عدوان ..
رحت يمهـا وحضنتهـا...
اسفـة ماما ماقصدي اضوجج ..
بس دا تشوفين بعينـج .. كلشـي يصير وگام يعيط ويغلط غلطت مـرة وتندمـت قابل كفرت ..
ليش ميحـاول يشجعنـي ابدي من جديد وارجع اطفـالي مو هذا ضرغـام .. عود هو ابن عمـي بس دااحس بأخوتـة وخوفـة عليـة اكثر من زياد ..
ماما .. شوفـي ياامي اخوج گلبـة المرتـة ويحبهـا والمرة ييدهـا تخلي الرجال حنين او قاسي وگاطع بس زياد طاح بمرة عندهـا مصلحتـها فوق كلشـي ..
وهي الي داتقـرأ براسـة وماخذتـة الصفها بالزعل والدلال ..
حور .. بس ماما اكـو عقل الي يحكم. وهو رجال المفروض يحكـم عقلـة مو گلبـة ..
ماما .. الحب مابي عقل وگلب .. شوفـي نفسج ياامي الحب شسوة بيج .. انـي ماادافع عن ابنـي بس دااگلج اخوج موبيده .. بيد مرتـة وحبه الها مسيطر عليـه .
اتركـيه للزمـن بلكـي يتغيير ..
نايمـة ع كتفهـا وهي تمسد بشعري حسيت بحنانها وردت اغفـى ..
گالت يلـة گومي سويلنا عشا جعت ..
گمت سويت عشا الي والماما زياد وعائلته تعشوا وحدهم ..
خليت العشا بالصينيه.. دخلوا ضرغـام وفرح وبناتهم ..
گلتلهم بعدهـي بأولها تعالوا ..
ضرغـام .. لا احنه راح نطلع برة بس اجينه نتطمن عليج لان من كلام زياد وياي حسيته مايعديها ..
حور .. لا عادي تعودت نطاني المقسوم وصعد ..
فرح .. ههههههه يعنـي گولي صارت زلاطة..
حور .. وهو كذلك هههههه .. دتعالوا دخلوا شويه ماما بالغرفـة ..
شافتهم ماما فرحت ..
وحلفتهم الا يتعشون ويانا ..
احنـة مسوين كباب بالفرن وزلاطه وطماطة شوي وخضره وطرشي ..
گعدنا كل واحد لفة لفه وسالفه وضحكة شبعنا ..
وگدروا ينسوني الي سواه زياد ..
اباوعلهم .. اي ذولي عائلتي .
ماما وهذا اخويه الي ماولدته ماما وهاي اختي الي مايوم تركتني وحدي وعاشت وياي بحزني وفرحي .
كان ناقصني بس اولادي بحظني وان شاء الله يتحقق هالشي ..
مر كم يوم وصارت وقت المحكمه مالتي ..
حظرنا اني والمحامي وضرغـام ..وحتى قيس موجود بس مااتقرب ولاحجى وياي ..
بس كان هو وضرغـام واكفين يسولفون .
(المحكمه الي بيها قضيتي مو نفسها الي اداوم بيها )
كانت عيونـي تراقبـة وهو شلون يشرح او يحجي مااعرف شنو يگول بس احسـة مهتم للقضية ..
مرت ساعة او اكثر ومحمد مابين لاهو ولا المحامي .
صاحوا اسمائنا ودخلت بس اني والمحامي والطرف الثاني ماكو ..
اضطر القاضي يأجل القضيه لعدم حظور الطرف الثاني ..
طلعت مقهور ومعصبه حيل .
ضرغـام .. هذا اتعمد مااجه يريد يتلف اعصابج لاتتوترين واهدي .. اني اتفاهم وياه ..
اتصل عليه ضرغـام شگد مايرد .. اني هم اتصلت ماكو مغلق ..
اتقدم قيس النـا .. گال من اتأخر اتوقعتـة مايجي ..
بس لاتقلقون هي وراه وراه يجي غصب عنه ..
اني بس ساكتـة ومااحجي ..
رجعنا للبيت .. ومقهوره حيل سألتني ماما گلتلها مااجه وبقت تدعي عليه .
گلتلها باجر يجيب اولادي واني اعرف شلون احجي وياه ..
گلتلها شنو زياد جايب مواد مال بناء ..
ماما .. اي باجر تبلش العمال تطلع ..
حور .. حرامات الحديقة كلها يتلفها .. الورد والزرع ليش هيج لو مسوي من جهة الطارمة ومسويلنا ممر صغير من الحديقـة ندخل منه للبيت ..
ماما .. ياامي الطارمة صغيره . وهي تريد الصالون كبير مو صغير . سمعتها تريد تشغل صديقتها وياها عندها خبره بهالشي ..
تغديت ونمت من التعب والوكفه بالساعات بالمحكمه ..
............ ...........................................
گعدت كالعادة بين العشا والشغل والروتين اليومي ..
غسلت ملابس ونضفت حتى باجر ماعندي شي من يجون اولادي اتفرغ بس الهـم ..
اشتهيت اسويلهـم كليجة يحبون ام اللقم والتمر بس ..
سويت العجينـة تقريبا كيلو مو هواي ..
اولاد زياد فرحـوا ..
گالوا عمـة هاي النا .
گلتلهم حبايب للبيت كلـة ماردت اكسر بيهم ..
هيبت ..عادي نساعدج ..
حور .. بلي حبيبي بس هاك اخذ القالب واطبع وياي ..
گمت اسويلهم وهمه يطبعون اشكال مختلفـة ماحسينا بيهم بسرعـة خلصـنا ..
شويتها بالفرن .. ونطيتهم حصتهم گلتلهم الي تعب الـة حصة بالكليجة ..
مهيمن .. لعـد هذي بس النـا لان ماما متعبت هههههه .
صدگ ضحكني ..
الباقـي خليتة بحافظة وضميتـة ..
لليل گعدت اتراسل وي صديقاتـي ..
وگاموا يلحون ع سالفة قيس ..
گلتلهم دز اختـة وبنته .. تخبلوا ..
وبقوا يصرون عليـة اوافق ..
ويگلولي مدام بنتـة هيج وهي الي تحاول تقنعج معناها امها فعلا ماعندها مانع .. واصلا علاقتـهم منتهية من زمان بس بالاسم زوجتة لان بنت عمـة ومسؤلة منه ..
بوجهت نضرهم فعلا اقتنعت .. وخاصـة عدتـي مابقالها شي وتخلص ..
واذا رجعوا اولادي لازم افكر بمستقبلهم ومحمد اذا ماوراية سند وظهر مايتركني بحالي ..
حتى اذا مااحبـة القيس .. بس بالمقابل هو شخص مايتعيب ومحترم وشخصيته عاجبتني ..
والله يگدر بمرور الوقت يخلينـي احبه ويمكن يعوصني عن حبي الفاشل لمحمد ..
داافكر بي .
راسلتني وفاء ع الفايبر ..
تعجبت ..
-گالت شلونج حور ..
-رديت عليها .. هلو حبيبتي تمام انتي شلونج ..
-اسفة اگلج بأسمج بس مااعرف اسم ابنج ..
-هههههه لاعادي اسم ابني مصطفى ..
-اخاف نايمه وراسلتج ..
-لاعيني باجر جمعة وي اكو نوم ..
-ها زين بس حبيت اسأل واسلم عليج ..
-تسأل عليج العافيه تسلمين الوالدة شلونها ..
-زينة الحمد لله .. اليوم جبناها البيت جدو لان باجر بابا يجي واحنه كلنا نجتمع من يجي ..
-الله يديم لمتكم ..
-اسفه اذا ضوجتج ع راحتج ..
-لاعادي حبيبتي بأي وقت ..
-مع السلامه .
-مع السلامة .
من گالت بابا راح يجي باجر .. احس گلبي انقبض .
واني ماعندي اي علاقة بي .. ليش من سمعت راح يترك بغداد باجر ضجت وكأنه عايش وياي ..
يارب اهدينـي ونور طريقي ..
ثاني يوم ..
گعدت من الصبح وحضرت الريوك والكليجة الاولادي ..
سمعت صوت زياد وهوسة برى ..
نزلت ايمان فرحـانه ..
نسيت اليوم العمال يبلشون ..
گالت اكو كليجة بعد اريد اسوي ريوگ للعمال ..
گلتلها اي اكو شويه ..
گالت ها وعينها ع صينيه اولادي ..
ودها تاخذها وتنطيها الهم . واني مشتريتلهم اجبان من الغاليه وعسل وبيض حايره شمسويتلهم ..
شلتها ودخلتها جوه بغرفـة ماما ..
لان اعرفـها بس تحجي وي زياد . ياخذها ويمشي ومايهتم .
بقيت انتضر وانتضر وصارت ساعات واولادي مابينوا .
گلبي وجعني ..
اتصلت ع محمد بعده مغلق ..
هذا ليش اتأخر المن اخابر هسـا ..
صار الظهر وهمه ماكو ..
اجت ايمان .. گالت وينهم جهالج شو مايينوا لو ناطين الريوگ للعمال مو احسن مما راح هيج ببلاش ..
ماما .. ايمان اتركيها بحالها اذا تردين الصينيه اخذيها .
ايمان .. لا شسوي بيها اشو البيض برد بس الجبن حرامات اروح اصمهن واصفي الصينيه .
اخذت الصينيه وطلعت واني بالي مو يمها ..
اروح وارجع بالغرفـة ..
اخر شي گلت خلي اتصل على اخوته ..
اتصلت على بسام .. گتله محمد وين ..
بسام .. ليش ماگالج ..
حور .. شيگولي ..
بسام .. محمد سافر هو والجهال ومرتة الاربيل يتونسون ..
حور .. شنووووو ? اربيل شنو البارحة عنده محكمه مااجه واليوم موعد جهالي يجوني ماجابهم .
مو بكيفـة يخلف ..
بسـام .. والله ماادري ام مصطفى عود خابريه وافتهمي منه ..
حور... هو اني محصلتـة ومااتفاهم ..ع العموم شكرا تعبتك ..
سديته وبسرعـة اتصلت ع ضرغـام ..
-الو ابو نور شلونك ..
-هلو حور شبيج ..
-هذا محمد ماخذ جهالي ورايح الاربيل ..
-متأكدة مو بكيفة اجاه تبليغ ومستلمه .. واليوم موعد جهالج يجيبهم ..
-ماادري ماادري راح اتخبل خاف سواها عناد وبعد مايخليني اشوفهم ضرغام خاف ياخذهم وينهزم .
-مايگدر لاتخافين لان عنده دوام ومايفرط بمهنته بس يريد يعذبج شويه ..
روحي هسا واني استفسر واگلج ..
-اوك انتظرك ..
رحت خبرت ماما تخبلت .گالت هذا شلون عشتي وياه .
حور .. ماما كافي تلومون الله عماني وماشفت عيوبه وبعدين ماجان هيج والله . صحيح بخيل ومايهتم البيت اولاد بس موهيج نذل ..
ماما .. ياامي هو هذا طبعه بس بعدين بين معدنه لاتگولين ماجان هيج ..
بيومها موبايلي ماسكت .. فرح وضرغـام كل شويه يتصلون ..
وعمي هم بالة يمي ..
ضرغـام گال خبرت استاذ قيس وگال اني احاول اعرف بطريقتي وين همه ..
گتلـة .. ضرغـام ليش گتله عيب ابتلى الرجال بينا .. وبداخلي احس بذنب لان اليوم مجتمعين كلهم واني خربت عليهم ..
اني دمعتي مانشفت .. ولاريوگ ولاغدا .
خفت بعد مااشوفهم ويرحون منـي ..
زياد شافني ابجي گال شصاير .. سولفتلـة گال شتتوقعين من النذل كلشي يسوي .
وصعد الغرفتة ..
گال تعبان وي العمال واگف ..
گتلة معذور ع راحتك ..
بقيت اني وماما بالغرفـة اني ابجي وهي تواسي بيه .
............................................
دگ رقم غريب ع موبايلي ..
رفعتـة واني صوتـي مخنوگ ..
-گال شلونج حور ..
الصوت مو غريب بس من تفكيري بأولادي ماعرفته ..
-گلتله منوووو حضرتك .
-گال اني قيس ..
من سمعت اسمه جمدت ..
-گلتله اهلا وسهلا استاذ ..
-ضرغـام خبرني ع الي صار .. وتحققت من الموضوع .
قبل فتره محمد مسوي جوازات الة والاولاده والزوجتـة .
اني سمعت احس روحي راحت گعدت بالگاع واشهگ .
-گتلة يعني سفرهم الخارج العراق ..
قيس .. لاتخافين اهدي بعدهم .. ماكو اي خروج الهم بالمطار او الحدود .. وهذا شي مبشر .
گمت ابجي .. وهسا شلون استاذ شأسوي حتى مكانهم مانعرفـة .
-حور اهدي اولادج يحتاجوج قويه ومالازم تنهارين ..
عهد عليه اجيبهم الحظنج بس اهدي ..
مااحب اشوفج ضعيفـة ..
-موبيدي . خايفه محمد حلف يندمني ودا يسوي كل الي يگولـة ..
-ثقـي بيه حور گتلج اولادج يرجعون الحظنج .. واصلا محمد بهاي سوايته ربحنا القضيه لگدام ..
لانه مغفل ومتسرع يتصرف بدون تفكير ..
-اخذت نفس وگتلـة . قيس ..
-صفن .. گال تفظلي حور امري .
-اذا رجعت اولادي اعتبر الي تريده صاير .
-حور الي اريده كون يطلع من داخلج وبرغبتج مو تسويه رداً للجميـل ..
-وهسـا روحي ارتاحي واهدئ ومايصير خاطرج الا طيب .
-گتله شكرا وسديته ..
قيس .. من خبرنـي ضرغـام وگالي محمد اخذ اولاده وسافر .. صـارت حور گبالي وتذكرتها شلون وگعت بالحكمه وانهارت ..
اكيد هسا انهارت وتبجي وخابصه الجو ..
كلنا مجموعين ع الغدا ببيت الوالد اولادي وبناتي وام امجد ..
استأذنت من الغدا ..
امجد .. ها يابا خير ..
قيس .. اتصلوا عليـة من الشغل ..
گمت اتصلت بكل معارفي وعرفت هو مامسافر وبعدة بأربيل ..
ردت اطمأن عليها وبنفس الوقت اطمنها عليهم ..
كان رقمها عندي من زمان حافظة بموبايلي ..
اتصلت صوتها مخنوگ وماعرفتني .
من گلتلها اني قيس صفنت وارتبكت .
بس كانت اول مره تحجي وياي بهداوه .
بس من گالت قيس ولاول مرة من غير استاذ .
استغربت وفرحت بنفس الوقت ..
ومن گالت اذا رجعت اولادي اعتبر الي تريده صاير ..
انقهرت وضجت .. اني ماردتها توافق حتى ترد الجميل الي ردتها توافق من نفسها واحسها هي راغبتني وتريدني مثل مااني اريدها ..
عدم ثقتها بالغير سببها محمد .. وكنت احاول ارجعلها اولادها الها حتى ارجع ثقتهـا بالغير ..
وحتى تعرف مو كـل الرجال مثل محمد ..
حور .. بقيت منتظره وعمامي وضرغـام وحتى زياد ماسكتوا ولاگعدوا من مكان المكان .
ومن عرفوا يريد ينهزم للخارج .
راحوا العمامه بس شيخ عشيرته تبرأ منه وگال لان مااخذ حجايتنا ودزينا عليه ومااجه فبعد مالنا دخل بي منكم اله .
وشتسوون بي مالنا دخل بعد ..
اني لااكل ولاشرب وحتى دوام ماداومت ..
اربع ايام وهذا الخامس وهمه ماكو خبر ..
استحي اتصل ع قيس واسألـة .. بس ضرغـام راح وياه
الاربيل واحنه نتواصل وياه ..
وفاء سامعـه من ابوهـا واتصلت تطمأن ..
وگلتلها ماكو خبر ..
گالت بابا اتصلت عليه هم گال لسا ندور عليه ماگاعد بفندق حتى يعرفون مكانه يمكن مستأجر بيت ..
حسيت ساعتـها انه خلص اولادي بعد مااشوفـهم ومحمد گدر يذلنـي وراح يخلينـي العمر كلـة بحسرتهـم ..
تسطحت ع السرير وابجي واباوع الصورهم بالموبايل ..
ااااه ياماما صار اكثر من عشر ايام مشايفتكم اشتاقيتلكم يروحي ..
واخاف العمر كلـة مااشوفكم .. لو تكبرون وتجوني ومااعرفـكم .. واذا شفتوني ماتعرفونـي ..
هاي اذا عايشـة بعدني بفراگكم ..
واني اباوع اتصل ضرغـام رفعتـة بسرعـة ..
گال حور لگيناهم ..
هو گال هيج واني عطت ومن غير ماافهم شلون ووين ..
صحت ماما فرح وينكم وركضت لبرى ..
اخذ نفس واگلهم لگوهم لگوهم ..
البيت انگلب من الفرحة بين دموعنا وعياط ولد زياد وهوساتهم لان لگوهم ..
ويسوون گولات .. لزموا محمد الفار ورجعوا اولادنا ..
هههههههه ضحكنا عليهم ماعرفنـا شلون طلعوها ..
يتبع......... ..
///// البارت الخامـس عشر /////
بيـن طيـات الحزن والالم والقهر ..
هناك شعاع من الامل والسعادة ..
يخبئهـا الله لنـا على هيئـة بشر..
بعد مااتصـل ضرغـام وگال لگينـاهم .. كانت الفرحـة ماسايعتنـا كلنا .. ورغـم فرحتـي لكن عينـي مافارقت الموبايـل ..
وكأنـي منتضرة اتصال ..
وفعلا رن موبايلـي .. وفاء تتصل...
رديـت .. گالت بالخير حبيبتي حور هسـا بابا اتصل وطمنـي ..
حور .. شكرا حبيبتي ماقصرتـي والوالد هم تعب ويانة .
وفاء .. لايمعوده تعبيش ان شاء الله احنـة اهل ..
سديتـة منها وكنت متأملـة هو يتصل .. مثل مااتصل بوفاء جان يگدر يتصل بيه ويطمني ..
معقولـة اخذ على خاطرة منـي ..
(احجي بداخلي ) شبيـج حور .. انتي مصارلـج ثلاث اشهر من تطلگتي .. وماناطيتـة وجه وبكل مرة تصديه وهو انسان راقي وعنده كرامـة قابل يتوسـل بيج لو يذل نفسـة ..
دخلت فرح وفهمت صفنتي ..
گالت انتي بشنو تحسين اتجاه قيس حور ..
فزيت من صفنتي هاااا... مااعرف مترددة .. من اشوفـة احسد نفسي عليه لان اختارنـي بين هاي البنات كلها ..
وساعـة اگول هذا مجرد اعجاب لان وگف وياي وكان تعاملـة حلو ولطيف ..
فرح .. اثبتي على مشاعر معينـة وفكري زين حور
قبل لتنطين اي جواب .. هذا زواج مو لعبـة وخلي الي صار بيج عبره واتعلمـي منها .. اذا رايدة تتزوجيه كـ رد للجميل ..
فتراجعـي افضل . لان راح تأذيه وتأذين نفسج ..
هنا انتبهت الكلام فرح .. نفس كلامـة . گال اريدج انتي الي تختاريني برغبتج مو ردا للجميل ..
اوووووف لازم اصفي بالي هالفترة وارتاح حتى اگدر افكر ..
كنت طول الليل منايمـة ومنتضرة الصبح يجي وتقر عينـي بشوفتهم ..
وماصدگـت من شفتهـم .. رحت اركض مثل المخبله وكانوا اكو عمال برة ماگدرت اطلع بقيت بالمطبخ الى ان دخلوا وحضنتهم .. حسيت الدنيا رجعتلي ..
ابجي وهمه يبجون يگولون ماما گمنا نبجي عليج هواي .
ضرغـام.. والله هاي دموعج لو حنفية جان خلصت من زمان .. رجعوا الحظنج بعد شتردين ..
مسحت دموعي وضحكت .. گتلـة مااعرف شلون اجازيك ابو نور والنعم الاخو انت ..
نسيت زياد واگف .. ماعجبـة الحجي وطلع يم العمال
ضرغـام .. لايابة شسويت . الفضل كلـة الاستاذ قيس ..
گلتلهم اعذروني راح اخذهم اسبحهم وابدللهم ..
ماما وفرح طبخوا الغدا ووياهم ايمان .
سوينا غدا الوجه الله الرجعوهم ..
وكان الكل موجودين عمامي وخالتيزهم عدنا واحنه كلنا
وبالاضافـة للعمال ..
دخلتهم سبحتهم وبدلتلهم وگالوا ماما خلينا ننام بحضنج ..
فرشت بالگاع ونمت بالوسط ونيمتهم واحد ع اليمنى وواحد ع اليسرى ..
امسد براسهـم ومصطفى يسولف .. يگول بابا يگول ماما متريدكم بعد وگالت لتجيبهم الي ..
وماما حتتزوج وتعوفكم ..
واني راح اطلعكم للخارج اونسكم ورباب حتصير امكم ..
دموعي نزلن وهمه يحجون .. ليش هيج محمد رغم كل الي سويته مايوم نطيت بيك گدام اولادك ومايوم شوهت صورتك گدامهم .. بس هو هذا حظي ..
خيراً تعمـل شراً تلقـى ..
باوعتـلهم نايمين ..
اخذت موبايلـي فتحته ..
عيب لازم اتصل واتشكره ..
بس خاف تعبان ونام ..
اممممم بقيت متردده تالي تشجعت وضغطت اتصال ..
بقى يرن فترة ..
وجاوب .. گال الو .
-غمضت واخذت نفس وگتلـة شلون استاذ ..
-هلو حور شلونج قرة عيونج بشوفتهم ..
-كلـة بفضل الله وبفضلك .. مااعرف شلون اتشكرك .
-ماكو داعي تتشكريني ..
-الي سويتـة ماكو احد يسويـه ..
-ماسويت شي بس لان عندي اتصالات ومعارف الشغله تسهلت ..
-ولو تعبان بس حبيت اشكرك ع راحتك ارتاح ..
-لا راح اطلع هسا للدوام ..
-هسااااا بس .
-بس شنو .. وانتي هم لاتتعودين ع الاجازة داومي باجر الاولاد ورجعوا سالمين ..
-اي صدگ هواي قصرت وشكرا ع الاجازة ..
-حور انتي شبيج??
معقولـة انتي هيج بارده ..
شبيه ?? شسويت ..
لاهيج كلشي ماكو يله على راحتج مااعطلج ..
استأذن وسد التلفون .. هذا شبي اشو هادئ وفجأة تعصب .. وشنو بارده قابل شأسوي اخذة بالاحضان ..
والله ياربـي .. يلـة هو ويامن گعد حظي ..
حضنت اولادي ونمت ..
گعدونا ع الغدا .. گعدنا سفرة وحدة كلنـا ..
وضرغـام يسولف شلون راحوا وقيس شسوه وشلون وصلوا للشقه الي مأجرها محمد ..
حور .. ومحمد هسـا وين ..
ضرغـام .. محمد من شافنا خاف اصلا .. ولان احنـة تحركنا بدون دعوه او امر قضائي ماگدرنا نسوي .
بس اخذنا الجهال وگلناله نلتقي بالمحكمه ..
بس اكو ولد صديقه هو الي شهد عليه وگال جان ناوي يسافر للخارج ويهربهم ..
يعني كل الامور انقلبت ضده ..
بين سالفه وضحكة گضيناها .. اباوع ع الوجوه شلون تضحك والسفره ع طولها مفروشـة ..
اااااه فعلا كنت محتاجه هيج جو يحسسني ولو لمرة بالامان ..
اولادي كانت راح تبدي امتحاناتهم النهائية ..
رحت للدوام واخذت اجازة ساعتين ..
ورجعت اخذتهم للمدرسـة ياخذون الجدول وحجيت للمديره قصتهم وتعجبت گالت الي قاهرني الاولاد خطيه تبهذلوا بينكم ..
رجعتهم للبيت ورجعت للدوام ..
طلبنـي استاذ قيس رحت .. كانت عنده قضيه .
سلمت رد السلام عادي ..
بقيت يمه الى ان كملت القضيه والكل طلع ..
گتلـة استاذ محتاج شي ..
گال لاشكرا اخذي راحتج .. مااعرف ليش ضجت وحسيت روحي انذليت . اشو هذا من گتله اذا رجعوا جهالي يصير الي تريده گام يبيع ثگل ..
مااهتميت وطلعت .. وگمت اتجنب الكلام وياه وهو كذلك
ع گد الشغل وبس ..
................................................
انشغلت بين الدوام وبين امتحانات اولادي ..
ماارتاحيت ابد ..
ادرسهم واگعد من الصبح اراجعلهم وابدللهم وبعدين اخذهم للمدرسـة واروح الشغلي ..
وخليت الخط مالتنا هو يوصلهم للبيت بعدني اخاف من محمد ..
محمد حظرتـة نهائي وبعد مااعرف اخباره ولااريد اسمع صوتـة ..
ماصدگت خلصوا اولادي امتحانات ونجحوا الاوائل ..
فرحتي بيهم كبيرة ..
والفرحـة الاكبر هو لمـا حكم القاضي الي بالحظانـة ..
بيومـها كنت خايفـة ومتوترة ..
اجـة ضرغـام اخذني ورحنا للمحكمه ..
شفت محمد ردت اروح اطلع قهري بي وعذاب گلبي الي خلاني من اخذ اولادي ..
بس استغفرت ربي وهدأت ..
هو كانت عينه عليه ويخزر وماشالها ابد ..
الى ان دخلنا يم القاضي ..
والمحامي مالتي طلع كل التقارير مال المستشفى واصبع رضاوي من انجرح والوثائق الي تثبت الادانـة ع محمد بخصوص تهريبهم للخارج ..
طبعا هو ضاج .. وحس بنفسـة خسر كلشي ..
لما حكم القاضي الي بالاولاد وحقوقي ينطيها الي خلال شهر ..گعدت بالگاع من فرحتي وماتحملت ..
واخيرا ربي نصرنـي عليه ..
واخيرا اخذت حقي منك محمد ..
طلعت وعيوني تدمع من الفرح .. ضرغـام يبتسم وگال مبروك خيتي ..
تشكرنا من المحامي وگاله ضرغام اتعابك كلها توصلك ..
گتله خلينا نطلع بعد مااتحمل من فرحتي ..
طلعنا بره اجه احد وسحبني الة .
التفتت محمد ..
سحبت ايدي منه ..
گال .. حور سامحيني حور تصرفت بتهور ولاوعي . ارجعيلي حور ومستعد اسوي كل الي ترديه حتى اذا تردين اطلگ رباب اطلگها . بس ارجعيلي مااگدر بلاج انتي واولادي ..
باوعتلة بشماته .. گتله هذا اليوم الي كنت انتظره واجه تحلم يامحمد ارجعلك بيوم انت خسرتني وللابد ..
هدمت عائلـة بكاملها .. عائلة موفرتلك الامان والراحة تركتها عنود وحدة متسوة فلس ..
اتحمل تتائج نزواتك ..
واذا كنت اشوف جهالي يومين بالاسبوع وانت تمن عليه بيهم .. فهسـا القاضي حكملك ساعتين بس وبالمحكمه مو خارجها تشوفهم .. وهذا اكبر عقاب الك ..
من شافني صديته ومانطيته مجال ..
گام يعيط ويهدد ويگلي اعرف ليش ماترديني بسبب القاضي الي ضحك عليج وصدگتيه ..
بيومها فضحني وضرغـام راد يضربة واني منعته . صعدنا وتركناه يهدد ويتوعد ويگلي مصيرج ترجعيلي حور ..
مااهتميت الكلامـة محمد صفحة وطويتها من حياتي وانتهـت ..
گتلـة ضرغـام اليوم عشاكم عليه كلكم نطلع بره ..
ضرغـام .. اگعدي يموعده هو انتي شعندج ..
حور .. عندي الحمد لله ولاتنسا هذا الشهر راح اخذ حقوقي كلها من محمد ..
ضرغـام .. قابل تصرفيهن كلهن خليهن ذخر الج والولدج
حور .. الله كريم خويه مادام ولدي رجعولي مااريد لامال ولاجاه المهم همه بحياتي ..
بيومها احتفلنا بره .. وتونسنا وتعشينا وحتى بيت زياد طلعوا ويانا ..
كان يوم مميز بالنسبـة الي .
نسيت همومي كلها وراي وبديت بصفحة جديده كلها حب وسعاده واني اباوع ع الضحكه المرسومـة بشفاه اولادي وفرحتهم لان راح يبقون يمي ..
اشتريت تاب الكل واحد لان عطلة وينشغلون بي ..
زياد استرط الاشتراك الدفع بالنص ووافقت ..
عمود جهالي يلتهون وميطلعون برى ..
محل ايمان قرب يكمل وطلعت هي وزياد اشتروا تجهيزات للصالون ووياهم البنيه صديقتها دوم تجي عمود تساعدها .. لان هي هم دفعت وياهم فلوس للاجهزه بأعتبار شريكتها ..
بس زياد مااعرف منين جاب كل هذي الفلوس وهو اسمـة يبجي ماعندي ..
طبعا ايمان كفت شرها عني بعد ماكمل بناء الصالون لان انشغلت بي ..
ومااشوفها بس بالليل تتعشا وتصعد تنام ..
يعني البيت هدوء نوعا ما ..
قيس صار بارد اتجاهي ومااشوفـة هواي ..
بس وقت الشغل ..
كان اكو ضابط بالمحكمـة مو راحـة .. دايما يجي يسلم واني مااعيرله اهتمام ..
بس هو مايبطل كل شويه وجاي بشغلـة ..
كان استاذ قيس من يشوفـة يسأل لو يريد شي تبقى عينـة عليه ويخزر ..
يوم من الايام .. ردت اطلع وهذا الضابط اصر الا يوصلني تعذرت وگتلـة مااريد وعندي خط للمهم بالگوة خلصت منه ..
ردت اصعد للخط ..
اجتنـي رسـالة من قيس.. هذا شعنده وياج وشيريد .
باوعت منا منا مااشوفة لعد شلون شافني ..
صعدت بالسيارة ودزيت ..
-ماكو شي راد يوصلني وماقبلت ..
-اذا ضايقج گولي .. لان هذا مو راحة لاتنطيه وجه .
صدگ نرفزني شنو انطيه وجه قابل شايفني اضحك لو اسولف وياه ..
مارديت عليـه ولااهتميت . الي يشوفة يگول ولي امري وهو اصلا مامهتم الي . وحتى وفاء صارلها فترة متراسل ..
ثاني يوم بالدوام ..
صاحنـي المكتبه اول مادخلت هو ورى الباب ..
گال حور وهو معصب ويفرك بوجهه ..
اني من ردتج وطلبتج من اهلج يعني صرتـي تخصيني مامسموح الاي احد يسولف وياج او تسولفين وياه ..
تردين تخبليني انتي ..
گتله .. استاذ ملاحظ انت دا تتهمني بشي ممسويته .
قيس .. اعرفج انتي شنو ومااتهمج لان واثق منج ..
بس هنا محكمه واشكال تدخللها قابل اتعارك وي كل واحد يحجي وياج واسوي فضيحة ..
مااريد احد يجيبج بالكلام ..
اصلا لو بيدي جان نقلتج الغير مكان ومااخليج هنا .
حور .. ليش اني لعبه كل يوم ناقلني المكان ..
قيس .. ردتج يمي قريبه حتى احميج .. بس مااگدر احميج من عيونهم .. لان ماكو اي صفـة تربطنا ..
اذا حجيت بصفتـي شنو ..
سكتت من گال هيج ..
حور انطيني كلمـة تخليني اسكت الكل واخلي اصبعي بعين كل الي يباوعون عليج ..
احجي اذا ماترديني گولي حتى اشيلج من بالي وماابني امال فارغـة ..
باوعتلـة گتله انت انسان رائع واي وحدة تتمناك ..
قيس .. يعني موافقـة ..
حور .. بس انطيني وقت امهد الطريق الاولادي ..مااريد اصدمهم ..
قيس .. الج كل الوقت بس مو تطولين عليه ..
ابتسمتلـة وطلعت ..
يتبع......