حليب اسود

بارت 9

مساء الگاردينيا قليبااااتـي 💕
///// البارت التاسع /////
  #حلـــيـب_أســـود
  #الكــاتبة_شـمــس

طبگت الباب بوجهه .. واحجي وي ولدي ..
يله ماماتي سويتلگم ريوگ اكيد ممتريگين لسا ..

صفاوي .. اي ماما جوعانين .
حور .. ليش ومرت ابوكم متسويلكم ريوگ ..
رضاوي .. ماما رباب تتأخر وماتسوي ريوگ مثلج مرات بابا يشتريلنا صمون وجبن احنه نسوي بالمدرسه لفه ..

من گال ماما رباب .. حسيت الدنيا افترت بيه ..
حور .. رضاوي شگلت منو ماما ..

صفن بوجهي ودنگ .

صفاوي .. رضاوي اني مو گتلك معليك بيها لتگول ..
گام يبجي رضاوي يمكن خاف او استحى ..
گال .. ماما هي ماتقبل تگول ماانطيكم اكل ومااشتريلكم ومااطلعكم . اذا مگلتولي ماما .. انسوا امكم ..

حس دمي فار ..
ماما واگفه تسمع .. اشرتلي عود اهدي ..

قرفصت گدامهم .. گلتلهم حبايبي . ماكو ماما بس اني واذا گالتلكم لتسمعون كلامها . وروحوا گولوا البابا .

صفاوي .. بس اخاف بابا مايصدگنا .
حور .. لا لتخافون اني احجي وي بابا ..
بس انتو لتخلوها تستغلكم وتخوفكم . انتو اقوياء ومتخافون بس من بابا وماما .
واني مراح اخليكم يمها راح اجيبكم عندي بس اخذ راتب گمت اشتغل حتى يصير عدنا فلوس وبيت ..

فرحوا وحضنوني .. بس بعده گلبي نار من ورى هاي رباب .
ماكفاها اخذت محمد جايه هسا تريد تاخذ اولادي مني .

سويتلهم ريوگ وگعدنا نتريگ .
بدلتلهم وگعدوا يلعبون وي ولد زياد ..

ايمان سمعتني اني وماما نحجي ..
گالت .. والله حور خاف احجي وتزعلين بس الصوج بيج انتي استسلمتي بسرعه وخلتيلها الساحه فارغه .
جان رجعتي بشروطج ويخليلج بيت بأسمج وانتي بجهه وهي بجهه المهم اولادج عندج ..

حور .. وكرامتي وين .. شلون اعيش وي انسان غدر بيه وخطب من وراي ولو مازياد بالصدفه سمع .
جان هسا متزوج وماادري ..
تقبلين زياد يتزوج عليج وانتي ممقصره وياه وموفرتله الراحه وج حتى اولاده ميدري عنهم شي .
ادرس واربي هو ميعرف اصلا هذا بياصف وهذا ياصف
يدخل للييت .
اعطرله الغرفه وواخليها باردة واسد الباب عليه من ينام حتى يرتاح واني اروح انام يم الجهال وادرسهم بهدوء حتى ميزعجوه ..

كل سبل الراحه موفرتها وتالي يغدر بيه . وترديني ابقى وياه .. مو حور الي تنذل بعد كل التضحيات الي ضحيتها .
ايمان .. اووووه ادري بيج راح تاخذين كلامي بغير شي
حور .. لا اعرف قصدج كلش زين . واني دااحجي عن رأي . واذا على اولادي مصيرهم يرجعون الي ..
لان محمد مو مال مسؤوليه ..

ايمان .. بس الظاهر مرته رايدتهم وبس لاتاخذهم الصفها وهمه اطفال شمعرفهم تقشمرهم وتوفرلهم كلشي يحبوه وانتي شفتي شتگللهم .
تريدهم يگلولها ماما حتى ينسوج ..

صدگ انقهرت وخفت من كلامها لايطلع صدگ ..
گلتلها . ايمان سدي الموضوع الخاطر الله ماناقصني تفكير ..

هزت اديها وگامت ..
واني الافكار گامت تاخذني وتوديني ..
للظهر غديتهم ودخلنا للغرفه . گلتلهم تنامون ساعه ونگعد ندرس ..
وهمه بالفراش گعدت اوصيهم مايسمعون كلامها ومايگلولها ماما ماادري ليش خفت صدگ تاخذهم مني .

ردت اتصل ع محمد بس گلت خاف هي يمه ..
خليتها من يجي واحجي وياه ..

بعد ماخلصنا دراسه لليل طلعتنا فرح بسيارتها هي والجهال وهالمره ماما ويانا خطيه دايما ماتطلع وحابسه نفسها بالبيت ..

تعشينا واخذنا الاولاد للالعاب ورجعنا ..
باتت فرح يمنا بيومها لان ضرغـام عنده شغل بره المحافظه ..
وسهرنا وي ماما النص الليل سوالف ونتذكر ايام قبل .
احس رجعت الحيويتي ..
وگمت اتجنب اي شي يضوجني ..
تالي فرشنا كلنا بالاستقبال ونمنا حتى اولاد زياد سهروا وناموا ويانا ..

ثاني يوم من اجه محمد يريد ياخذهـم ..
طلعتله ..
هو شافني ابتسم ..
سلم مارديت كالعادة ..
گتله قبل متاخذ الجهال عندي كم حجايه وياك ..
مال اي بس اطفي السياره .
راح طفاها واجه ..
گتله منا ناس ميصير بالباب تفضل جوه ..
دخل جوه وهو ومبتسم .
عباله اشتاقيتله لو اريد انفرد بي ..

اول مادخلنا للاستقبال ..
اجت ماما دخلت لابسه عباتها وگعدت بعد ماسلمت .
هو رد السلام وعبس وجهه .
گال تفضلي شرايده .. غير نبرة صوته ..

خليت رجل ع رجل وگتله باوع ابو مصطفى ..
اولادي اخذتهم مني وگلت ابوهم ويخلي باله عليهم ومايأذيهم ..
بس زوجتك مااقبل تتحكم بيهم وتتلاعب بعقلهم ..

محمد .. هههههه شنو گمتي تغارين .
حور .. اغار شنو دااگلك خليها تبتعد عن اولادي ولاتگللهم گولولي ماما واني امكم وتحاول تبعدهم عني .
محمد .. وليش مقهوره . هي وياهم خمس ايام بالاسبوع ومن حقها يگلولها ماما ..

حور .. هههههه محمد انت واعي .. تقبل اولادك يگولون الغيرك بابا .. ذولي اولادي ومستحيل يگولون ماما الغيري فاهم . ولاعبالك ربحت القضيه..
هسا گمت اشتغل وبس استلم كم راتب ارجع اطالب بيهم
محمد .. هااااا اگول شنو سبب هاي التغييرات .
اليوم شغل وباجر تدورين رجل ..

حور .. شنو هالالفاظ وبعدين انت شعليك . مالك حكم عليه مجرد ابو اولادي ..
وياليت نرجع الكلامنا الاول ولاتحاول تغير الموضوع .

محمد .. اني مااغير واصلا انتي الي مو واعيه انه انتي بعدج ع ذمتي والي حق احكمج وامنعج فاهمه ..

حور .. هههههه ضحكتني .. اني مو حور القديمه الي تنهى وتأمر وتگولك سمعا وطاعة ..
هسا حالك حال الغريب بحياتي ..

محمد .. غلطانه . صحيح اني طلگتج محكمه بس انتي مرتي بشرع الله .
والي حق عليج ..

تنرفزت من گال هيج ..
حور .. انت شنو بشر لو حشر بحياتي مشايفه بوقاحتك
شنو زوجي احنه تطلگنا انسى ..
#بقلمي_الكاتبة_شمس
………………………………………………
ماما .. يمه حور انتو هم رحتوا السيد طلگكم لو لا .
حور .. لا ماما .
ماما .. محمد بلا مشاكل طلگها هسا وفضها هي مو مرتك بالقانون وانت متزوج حلها بهدوء احسن مماتكبر ويسمعون اخوها وابن عمها ..

محمد .. لاحجيه مااطلگ والا اخليها هيج لاهي للسما ولاهي للگاع ..
عتفتني وراحت وعبالي ترجع بس اخذ جهالها . وتالي مارجعت وتكبرت عليه واشتغلت وغيرت شكلها شوفيها شلون راجعه بنت ال 18 سنه .
حتى تقهرني وتعاندني وباجر هم تتزوج وتجيب رجل ام الاولادي ..

ماما .. جا يمه حلال عليك وحرام عليها . من عفتها وتزوجت ماحاجيت روحك ..
وهسا خلص الحجي وياك انت ماتحترم واحد .
روح يمه عندها عمام واهل الي يحجون ..

حور .. اطلع محمد مااتحمل وجودك بحياتي مو دور واگف ببيتي وتتشرط .
واذا ع الطلاگ فغصب عنك تطلگ مستحيل ارجعلك تحلم ..

طلع للطارمـة . وگال صيحي الجهال .
صحتهم بوسوني وطلعوا للسياره ..

هو وصل يم الباب والتفتلي .. تقرب كلش يمي وعصر ايدي ..
هاي العيون والشفايف والجسم كله الي ومااخلي غيري يتهنى بي ..

حور .. زمن راح وولى . لااني ولاگلبي ولاروحي الك .
انت صرت ماضي بالنسبه الي . وماضي اغبر .
انت الي تركتني ورحت ورى وحده لابجمالي ولابمستواي وحتى ماعندها نص اهتمامي ودلالي الك .
ها وعود لاتنسى .. خليها تسويلك ريوگ انت والجهال مو تطلعكم جوعانين ..

راد يحجي .. شفت زياد اجه دفعته بسرعه وسديت الباب بوجهه ..

سمعت زياد يحجي وبعدين دخل  ..
معصب حيل .. لزمني من ايدي .. شعندج وياه واگفه وتسولفين لازم حنيتي وتردين ترجعين ..

حور .. شنو هالحجي زياد .. كلشي صار بحظور ماما ..
زياد .. ادخلي واريد اشوف شلون موكفه هالساقط بباب بيتي ومن وراي .

ماما .. شكو شبيكم ياساتر ..
وطلعت فرح وايمان ع صوته ..

زياد .. محمد شيسوي هنا . مو كل مره يطلعوله وياخذهم شعنده واگف ببابنا ..

ايمان .. اصلا جان جوه بالاستقبال مدري شعنده ..
زياد فتح عيونه اثنينهم ..
تردين تجيبين العار الي تالي عمري .
من جان رجلج ماحويتي وحافظتي عليه .
هسا من طلگج وحرم عليج تردين ترجعينا ..

ماما .. ولك ياحرم عليها .. جا من طلگها محكمه ماعرفتوا تاخذوه ويطلگها سيد .
اجه ويهددنا ويگول بعدهي مرتي ..

زياد..  ليش هو مارمى عليج الطلاگ ..
حور .. لا
زياد .  ااااه هالساقط يريد يلوي اذراعنا .. اني اله هسا اخابر عمي وضرغام يرادله لويه ذراع ..

وانتي حسابج بعدين ع دخلته للبيت ..ويأشر عليه .
ماما .. ولك غير اني موجوده قابل وحدها ..
زياد .. المفروض انتي الي تعلميها يمه مو تشجعيها محد دللها غيركم انتي وابوي ..

بيومها اكل گلبي زياد بالحجي والغلط ..
اجو عمامي وضرغام .
واتصلوا ع اهله وگالوله يجي يطلگ وراسه فوگ رگبته .
ابوه يگول .. يريد مرته يرجعها ومايقبل يطلگ ..

عمي تخبل .. گال هذا يلعب علينا . راح رفع دعوه عليها وطلگها وذلها وحتى حقوقها لسا ماانطاها شي .
وهسا يريد يلوي اذراعنه بحجه مرتي واريدها ..

ضرغـام .. باجر اعرف شيخهم منو ونروحله ونتفاهم وياه ذوله اهله مثله مالنا تفاهم وياهم ..

ثاني يوم داومت وي ضرغـام ..
بالطريق گال ..
حور اني اخيج احجيلي انتي هاويه ترجعين لمحمد لو لا .
گتله . ضرغام تحجي صدگ طبعا لا مستحيل ارجع الهيج انسان وخاصه بعد ماشفت وجهه الحقيقي .
كل مره يجرحني وارضى لان اختياري جان واهلي يلوموني ..
بس هسا مستحيل ارجعله . كرهته تعرف شنو كرهته .
ضرغـام .. هذا هو ريحتيني . اني اتصرف وياه يصير خير

داومت عادي وانشغلت بين الشغل والتفكير بسواية محمد ..
وساعات اخذ شغل من استاذ قصي حتى انسى وارتاح من التفكير ..

گال استاذ قصي ..
حور اخذي هذي الملفات الغرفة المدير ..

اخذتهم ورحت .  اول مادخلت صارت عيني بعين شخص كله وقار وهيبه . احس نفسي شايفته بس مااعرف وين
اوووف مشاكل محمد خلتني افقد الذاكره ..

انطيت الملفات للمدير ..
وطلعت .. بس احس هذا الشخص نضراته مشالها عني
وكانت تراقب خطواتي .

مااهتميت . لان اكو هواي نماذج مثله .. عينهم ع الموضفات بس كنت مااهتم واسوي نفسي مااشوف اي شي ..

رجعت ع مكتبي .. اتصلت عليه فرح .
گالت عمي لگه شيخهم لمحمد واتفق وي ضرغـام يرحون الظهر من وكت ..

گلتلها ان شاء الله تنحل واخلص ..
شويه واجه ضرغـام ..
گال حور لگينا شيخ عشيرة محمد .. بس بالعماره بيته .
ولازم هسا نطلع حتى نلحگ ..
تگدرين ترجعين وحدج ..

گتله عادي ادبرها .. ديربالكم ع روحكم وتوصلون بالسلامه ..

راح وگمت اقرأ ايات وراهم بلكي الله ينصرهم ..
كملت شغلي وطلعت ..

وگفت اشوف تكسي ماكو ..
گمت اتمشى شويه ..

احس سياره وگفت يمي ..
خفت ..
گمت اسرع بمشيتي ..
نزل ولد گال اختي من رخصتج ..
گتله شرايد بنتر ..
الولد .. العفو اختي اني عبد المأمور . سيادة القاضي استاذ قيس يريدج بالسياره .

استغربت .. قاضي ويريدني شيريد??

نزل هو من السيارة .. لابس مناظر . والهيبة تسطر .
مامبين عليه الكبر والعمر بگد الوقار والرزانه ..
هيج اشخاص اعتقد قل وجودهم بالبلد شخصيه مرموقه وهيبه ..
#بقلمي_الكاتبة_شمس
…………………………………… ..
گتله تفضل استاذ رايد شي .. كلامي معاه جاف لان تعلمت مااثق بأي احد ..

قيس .. عفوا ست حور مو لو اني غلطان ..

استغربت اكثر .. اي بلي منين تعرفني ..
گال .. ماتذكرتيني ..

حور .. باوعتله بتركيز .. اي هو نفسه شنو هاي الصدفه بس شلون عرف اسمي ..

گتله .. اي تذكرتك بس مدام حضرتك قاضي فبالمحكمه عادي التقيت بيك ..
اما هنا مو عادي ..

قيس .. وهنا هم صدفه جانت عندي شغله يم الوزير وشفتج بمكان مستحيل اتوقع اشوفج بي ..

حور .. اسفه بس هسا لازم اروح واتشرفت بمعرفتك
قيس .. لا عادي بس اذا تحبين نوصلج .
حور .. لاشكرا راح اخذ تكسي ..
سلمت عليه . وبأول تكسي مرت صعدت بسرعه حتى اخلص منه ..

وبقيت اتذكر وگفته من اغمى عليه بالمحكمه وگعدت وجان ديشرب جروت ..
الصراحة خفت منه وحسيته غامض ومو راحة ..

رجعت للبيت تعبانه تغديت ونمت ..
وللعصر اتصلت فرح .. گالت شيخهم مرحب بعمامي وگايللهم اني اخذلكم حقكم منه ..

گلتلها ان شاء الله لان تعبت ومالي خلگ بعد ..
بقينا ندردش شويه وسدته .
التهينا بالعشا والتنضيف .
لليل دخلت سبحت وغسلت ملابس ..

طلعت جهازي ..
فكرت اسوي فيسبوك .
محمد جان مايخليني اسوي .
يگلي بس الموزينه عندها فيس ..
واني هم كنت ملتهيه بالبيت والشغل والاولاد ومامفكره بي ..
بس هسا اريد اتصفح اشوف العالم شبي .
تسع سنوات اني حابسه نفسي بكهف ..

گمت سويت صفحة لان اني شغلي بالحاسبه وكلشي اعرف ..

ردت اسمها حرت بالاسم ..
سميتها حور الحزينـة .. لان فعلا بس الاحزان تلاحقني ..
مااعرف ليش اول ماسويتها خطر ببالي .
الرجل الغامض ..
ردت اعرف شي عنه .
كتبت القاضي قيس .  ماطلع شي .
شگد بحثت ماكو .
معقوله ماعنده صفحة ..

ضفت فرح .. استغربت لان مسويه صفحة ..
وضفت صديقاتي من الجامعه لان عندي اختلاط بيهن بالفايبر مرات ..

واتفقنا نلتقي .. وسألني ع محمد لان شايفاته وي رباب وتعجبن من گلتلهن انفصلنا .
گالن هو الي خسرج ..

مرت الايام ومحمد معاند مايقبل يطلگ ..
دوامي مستمر. وتعرفت ع موضفات جدد ويانا حبابات .
وگمنا نروح ونرجع سوه ..

احس رجعت حور القديمة ورجعتلي حياتي وحريتي ..
اول ماتركني محمد .
حسيت الدنيا توقفت وهذي نهايه العالم .
بس بعدين حسيت انه طلاگي من محمد فتحلي ابواب جديده وشفت ناس وحياة ثانيه..
وبالنسبه الاولادي ..
ماتركتهم ودايما اروح للمدرسه واتابعهم ومستواهم زين لان اني كل جمعه وسبت اراجعلهم دروس الاسبوع كله ..

ييوم واني راجعه من الدوام اعترض محمد طريقي ..
وكان يريدني اركب وياه ..
عاندت وماقبلت ..
بس هو سحبني من ايدي حيل ..

وگفت سيارة يمنا ..
وتفاجأت بالقاضي قيس گبالي ..

گال ست حور محتاجه شي ..
محمد صفن بوجهه .. وانت منو وشعليك روح منا ..
قيس .. حضرتك منو ..
محمد .. اني زوجها ..
حور .. قصدك طليقي ..
قيس .. شرايد منها متشوفها متقبل تصعد وياك .
محمد .. روح ولاتتدخل فاهم .. ولد اثنين وي القاضي سحبو سلاحهم يمكن حمايته .
اشرلهم قيس ماكو داعي ..
سحب محمد حيل من ايده ودفعه ..
گاله اذا تعرضت الها مرة ثانيه احاسبك قانونيا ..

بقيت صافنه ع اندفاعه ودفاعه ..
محمد بقى يهدد ويتوعد وركب سيارته وراح ..
اني محلوه وگفتي بالشارع وهمزين كان ظهر وماكو احد تشكرته ومشيت ..

قيس .. ست حور عندي موضوع وياج ..
حور .. اسفه استاذ بس المكان مو مناسب واعتقد ماكو موضوع مشترك بينا .
وشكرا مرة ثانيه لدفاعك عني ..

اتعجبت من هذا القاضي .. فعلا احسه رجل غامض مااعرف شيسوي بشارعنا وشيريد مني ..
معقولـة كل هذي صدف ..
لو هو يتعمد يتواجد وياي بنفس المكان ..

من انت ايها الرجل الغامض ..
بالله عليك ابتعد عني .. فحوآء قد عانت الكثير من جنس آدم ولاتتحمل المزيد من المعانـات..
#بقلمي_الكاتبـة_شمس
يتبع……….
………………………………………………
حبايب نزلت البارت قبل ميخلص اشتراك النت .
لان بعد اقل الساعه وينقطع ..
تحياتي الكم وانتظروا الاحداث القادمـة بحمـاس ..

ارآئكم احبتي ..
من هذا القاضي . وماذا يريد ..
وماذا سيكون مصير حور ..

الكاتبـة شمس 🌹