حليب اسود ..للكاتبه شمس

السابع 👈👈

يامسـاء العافيـة عليكـم حبايـب 🌹
///// البارت السابع /////

انتـم قـدري .. وروحـي .
يوم سـتذهبون عنـي .. سـيكون قدري قد توقف ..
وروحـي قد فارقـت جسـدي ..

العصر ..
گلت الماما راح اخذهم للمول واعشيهم واشتريلهم كل الي نفسهم بي .
اتصلت عليـه فرح ..
وگلتلها راح اخذهم ونطلع ..
فرح .. لاتطلعين انتضريني . احنه ناخذكم وهو نقضي وقت وياهم ..
هنا مااتحملـت دموعـي نزلت .. كنت احاول انسى انه محمد راح ياخـذهم مني ..

بدلتلهم وبدلت ..
واجت فرح واخذتنا .. رحنا المدينة الالعاب بالبدايه ..
كانت عيني عليهم طول ميلعبون ..
يفترون باللعبه ويضحكون ويأشرولي بإيديهم ..
ابتسم بدموع ..
ومرت عليه حياتهم من اول ماولدتهم الى الان .
ذولي من حقي مو من حق اي احد ياخذهم مني .
الي ربيتهم وكبرتهم وتعتب عليـهم ..
شلون راح اتحمل اشوفهم بس يومين بالاسبوع بعد ماكانوا يمي وبحظني طول الايام ..

فرح .. حور لاتقهرين روحج . الله ع الظالم . وداعتج يمل منهم بس يتزوج ومرت ابوهم ماتتحمل وتالي يرجعهم الج بيده . هو سوى كل هذا لان كسرتي كلامة وذليتيه وتركتيه .
محمد محب للسيطرة ويريد كلشـي ملكة ..

اني كنت مااسمع ولااشوف بذيج اللحظة بس اولادي .
عيني عليهم ومتفارقهم ..
كل حواسي متجهة الهم ..

كملوا لعب ..
اخذتنا فرح للمـول .
تعشينا هناك .. وافترينـا واشتريتلـهم كل الي بنفسـهم .
كانوا فرحانين حيل وضحكتهم مافارقت وجههم ..
اما اني فكانـت نهـاية الدنـيا بالنسبـة الي ..

حسيـت موتي قرب .. كلـما يقرب الوقت الي راح افارقهـم بي ..
اجانـا ضرغام للمول ورجعنا للبيت ساعه عشره بالليل ..
وهمه رجعوا البيتهـم ..

فرشت انـي واولادي بالاستقبـال .
گلتلهم ماما راح احجي وياكم شغلـة مهمة واريدكـم تسمعوني ..

گالوا اي ماما نسمعـج ..
حور .. باعوا حبايبي .. من باجر راح ترحون يم بابا البيتنا صفاوي .. واخيراااااا
حسيتهم فرحوا برجوعهم الابوهم ..
مرتضى .. وانتي ماما ترجعين ويانا . كلنا واح نرجع سويـه .
حور .. لا ماما اني ماارجع . اني وابوكم تركنا بعض .

عبسوا وجهم ..
صفاوي .. ليش واحد عاف الثاني . احنه نحبكم ونريدكم اثنينكم .. نريد نرجع مثل قبل .
حور .. ماما افهمونـي بابا راح يتزوج . وهو قدم بالمحكمه واخذكم ..
تدروني احبكم ومااعوفكم بس مااگدر .
صفاوي .. شنو متگدرين ماما . ارجعي ويانا ليش خليتينا نطلع من البيت ليش جبتينا لهنا خلينا نرجع .

حور .. اسمعني ماما انت بعدك صغير من تكبر راح تفهمني . اني تركت بابا لان تركني وراح يتزوج غيري
اخذتكم وياي وماتركتكم بس بابا هسا اخذكم مني بالقوه

صفاوي .. اني مو صغير وكلشي اعرف .. حتى اذا بابا تزوج شعليج بي . ابقي يمنا احنه نحبج ونريدج معليج بي احنه نكبر ونساعدج . بس لاتعوفينا ماما حبابه ..

گمت ابجي ع بجيهم مرتضى حضني ويبجي ماما خليني يمج هنا .
گتله حبيبي اذا مارحتوا وي ابوكم يجيب الشرطه عليه .
انتو كل جمعه وسبت راح تجون يمي .
وهناك جدو وبيبي هم يحبوكم وبابا مايعوفكم ..

صفاوي وهو يبجي .. بس احنه نريد نعيش وياكم ليش تعوفينا . ارجعوا معليه اذا ماترجعون مااحبكم اثنينكم انتي وبابا .

حور .. عيب ماما هالحجي .. انت مو تگول اني كبرت لعد افهم كلامي واسمعني ..
اريدك تدير بالك ع اخوك وتقرون سوه وماتهملون دراستكم واني كل جمعه وسبت راح ادرسكم واراجع الكم ولاتخلون واحد يضربكم صيروا عاقلين واحترموا بابا واسمعوا كلامه ..

مرتضى .. ما اني ماتحبه اخذنا منج .
حور .. بس اني ماراح اعوفكم وراح اجي اشوفكم بالمدرسة واجيبلكم هدايا ..

صفاوي ماعجبه الحجي . هو عنيد بطبعه . راح لفراشه وتغطى ونام .
بس رضاوي بقى طول الليل نايم بحظني وكأنه خايف اتركه او ياخذوه مني وهو نايم ..

من صفاوي حضنته وبوسته وشلته خليته ع ايدي ونمنا ..
گعدت الصبح ع صوت ماما.
تگول حور گوموا تريگوا ..

باوعت ساعة سبعه الصبح ..
گمت حظرت غراضهم واني ابجي ..
يعني الليله ماراح ينامون بحظني ..

خليت ملابس منهن يمي خاف يجون لهنا . والعابهم هم بقيتهن ..
گعدتهم ردت اودهم للمدرسه . ماقبلوا گالوا خلينا يمج اليوم لان بابا يجي ياخذنا الظهر ..
صفاوي ..
ماما تعالي ارجعي نامي خليني انام بحظنج .
رجعنا ع نفس نومتنا .
وهمه غفوا بحظني بس اني ماگدرت اغفى مت التفكير والاشتياق . شلون راح اگدر افارگهم ماادري ..

دخلت ماما .. اشرتلها مااگدر اعوفهم .
تركتني وطلعت ..

البيت هدوء الكل راح لامدرسه بس ايمان وماما .
صارت العشرة گلتلهم يله ماما اگعدوا .
گعدوا ولميت الفراشات بين ماغسلوا سويتلهم ريوگ تريگوا.
كملت جنطهم .
دخلوا شافوهن . گالوا ماما لاتخلين ملابسنا كلها . خاف نرجع .
فتحتلهم الكنتور ..
-لا حبايبي هياتها ملابسكم والعابكم هنا .
رضاوي .. اي ماما واني بس اشتاقلج تگول البابا يجيبنا مو تزعلين وتبجين هواي . عيونج تضل توجعج .
ويمسح بإيده بعيوني .
اخذت ايده وبستها براحتها .

اوووووف ياليت دموعي كافيات حتى ارجعكم الحظني .
ياامي الدنيا والهوا وكل شي بلاكم يخنگ .
وماادري اذا راح اگدر اعيش او لا ..

تفاجأت بماما تگلي هذا محمد بالباب ..

محمد !!! شعجب طالع هيج وكت .

جان مايجينا لحد ساعه 3 وهسا لان يريد يحرگ روحي اجه ب 12 .

بدلتلهم ..
واخذت جنطهم بإيدي ..
وهمه لابسين جنطهم مال مدرسه ..

لبست شال ع راسي ..
وطلعتهم .. طلعت الجنط سحبهن وخلاهن بالسياره .
محمد .. يله بابا بسرعه للسياره الدنيا حاره ..

همه لازمين ايدي ويباوعولي بتوسل ..
ماما روحي ويانا لاتعوفينا ..

گلتلهم .. ماماتي بعد ثلاث ايام وتجون يمي .
صيروا حبابين وادرسوا زين ..

محمد .. يله بابا بسرعه وراي شغل هواي . ومستعجل لاتأخروني ..
باوعلي . گال اتركي ايديهم خليهم يصعدون .

…………………………………………….
حور .. متشوفهم همه الي لازميني .. حرام عليك محمد ذولي اطفال ليش هيج حرمتهم مني .
محمد .. ومو حرام من تحرميهم مني . جان گلتي النفسج هذا الحجي قبل ماتعوفين البيت .
واذا هامج اولادج .
ارجعي بس ها ارجعج خدامه لان بعد سوايتج مستحيل تصيرلي مره بعد ..
حور .. لو تبقى اخر رجال ماارجعلك . وخاصه بعد ماكشفت عن وجهك الحقيقي انت واهلك .
واذا على اولادي . فالله ينتقم من كل واحد اخذهم مني ومصيرهم يرجعولي ..

سحب اولادي حيل من ايدي واخذهم ..
گال اني اعلمج حور ..

اولادي گاموا يبجون ..
شغل السيارة حيل وراح . وهمه يباعولي من الشباك .
اخذوا گلبي وياهم .
سحبتني ماما ودخلتني للطارمة .
گعدت بذيج الظهريه الحارة ع الگاع واشهگ من البجي.
واحس روحي المحترگة مو جسمي..

ماما .. دگومي ياامي . الجو حار . الله يرجعهم الحظنج ويقر عينج بيهم . لاتسوين هيج بنفسج گومي .
بالگوة گومتني هي وايمان ودخلوني ..

ايمان .. لاتبجين حور الله يرجعهم الج . وكلها كم يوم ويجوج .
لاول مره احس بتعاطف منها . لان يمكن هي ام مثلي وتحس احساسي ..
دخلت للغرفه وگلتلهن خلني وحدي .

طلعت ملابسهم من الكنتور واشم بيهم .
حتى ملابسهم الي نزعوهن هسا .
ماراح اغسلهن راح اخليهن بحظني .

عبالك مو دقايق تركوني . ايام واشهر ..
كل شهگة مني ادعي بيها على محمد ..
للحظة ضعفت وتمنيت راجعه وياه حتى لو خدامه بس المهم احظني جهالي واشوفهم يمي ..

بس ارجع واگول مستحيل هيج بشر افكر رجعله بيوم .
بقيت ابجي واون الى ان غفيت ..
من يومها اختاريت النوم انيسي الوحدتي ..
اي احس روحي وحيده وضايعه .
مالي احد .
حسيت بوحده من تركني محمد .
بس مو مثل هيج وحده وغربه . اولادي همه الي انطوني القوه وگدرت اتحدى محمد بيهم.
ويمكن محمد عرف همه نقطه ضعفي لهذا حاربني من خلالهم ..

بقيت يومين لااكل ولاشرب وحابسه نفسي بالغرفه .
اجوا ضرغام وفرح . وشگد حاولوا يطلعوني من الي اني بي .. بس ماگدروا .
ماما هم تتوسل اكل شي . ومااكل .
يمكن تحديت نفسي وحالي وردت اعاقب روحي الي اختارت هيج انسان ..

وصلت لدرجه اذا اگوم اوگع من التعب .
بنص الليل ..
واني نايمه . حسيت احد دياخذ روحي شهگت وفتحت عيوني .
جان بس گلوب خافت مفتوح بالغرفه ..
وماما نايمـة .
اباوعلها ومااگدر احجي .
صوتي مايطلع .
اريد اتحرك كل اطرافي انشلت ..
بالگوة اخذ نفس وعيوني غوشت .
گمت احاول بأي طريقه اطلع صوت ماكو .
استسلمت واتشاهدت بداخلي وغمضت عيوني .

هذا حياتي لهنا وخلصت .
انتهت بفراگ اولادي ..

بابا وينك اخذنـي لاتخليني بهذي الدنيا الوسخه .
الضعيف البيها ينداس عليه .
والمراة مالها لاحول ولاقوه .
والرجال يگدر يعذبها ويأذيها ويتزوج عليها .
وهي لازم تكون خاضعه ومطيعه ..

ربي مااوصيك بس باولادي .
ارحمهم ولاتخلي احد يذلهم ..
لو تموتهم وياي لو تحميهم ..

بعد مافقدت ومااعرف شنو الي صارلي ..
احس حلگي ناشف وعطشانـة اريد مي ..
گمت احجي بصعوبه واگول مي .
عطشانـة اريد مي .

سمعت صوت ماما وهي تبجي ..
اي ياامي هذا المي . اروحلج فدوة يمه لا تموتيني بفراگج فكري بيه اني امج .
مثل ماانتي ام وتبجين ع اولادج وردتي تموتين .
اني هم اموت بلاكم ياامي .
صيري قويه وگومي ..

فتحت عيني .
اني وين ماما وشنو الي صارلي .

فرح .. ليش هيج حور جان رحتي من ايدينا اليوم .
حور .. شكو شبيه .
فرح .. لگتج ماما مثل الجثه اسم الله ونايمه .
وگامت تعيط وتبجي ولو ما زياد متلاحگج للمستشفى جان هسا ميته .

ماما .. وج يمه من شفتج نايمه مثل الميته وخشمج ينزف دم وانتي ماكو نفس تخبلت .
ارتفع ضغطج وصارت جلطه بيج من القهر ليش هيج تسوين بيه ياامي ليش ..

نزلت دموعي .. ااااه ماما لو مخليني ميته مو احسن ممااعيش بلاهم .

فرح .. اسم الله شنو هالحجي .. اليوم المفروض يجيبهم محمد . وتشوفيهم
حور .. ليش اليوم جمعه . ليش مخليني هنا طلعوني .
ماما . شلون نطلعج . مخليج تحت المراقبه .
حور .. ماما طلعوني مااريد جهالي يجون مايلگوني .
ماما .. دنامي هسا وارتاحي والله كريم .
بس يجيبهم نطلعج ..

الادويه مفعولها قوي وفعلا بس غمضت غفيت ..

اجه ضرغام .. گال اتصل محمد ويگول مااگدر اجيبهم لان حنته باجر ويريدهم يحضرون .. يگول عود اجيبهم الخميس الها واخليهم ثلاث ايام ..

ضرغام يحجي وي ماما وفرح .. وعبالهم نايمه مااسمع .
اني فعلا كنت نايمه بس صوت ضرغام گعدني .

نزلن دموعي من گال ميجيبهم .
اعرف محمد يتعمد حتى يشلعه الگلبي وحتى يسمعني بأنه باجر حنته وراح يتزوج عباله اهتم .
او يمكن فعلا انقهر . لان باعني بهيج سهوله وحطمني وهسا فرحان ويتزوج ولاعبالك مسوي شي ..

………………………………………
انتبه ضرغام الي .. سكت .
وگال لاتتعصبين موزين . وداعتج رزلته وبهذلته وگتله مدام هيج اخذهم من الاربعاء .
ولان انتي تعبانه ومريضه ماردتهم يشوفوج بهيج وضع .
والدكتور گال تبقين بالقليل يومين يله تطلعين ..
صيري زينه وشوكت ماتطلعين اجيبهم الج ..

مضطره اتحمل واسكت مالي حل ثاني ..
اباوع الضرغام. تمنيته اخويه . لان اخويه الحقيقي ماهو اكيد بداومه مايتركه ابد .
مو هذا ضرغام عنده دوام وبمكان حساس . وهو شايل هم مشاكلي ومصايبي ..
اتمنيت عنده اخو وناهي عليه بذيج الفترة وماتزوجت محمد مثل مانهى ضرغام ع فرح واخذها ..

احنه عمامي وبابا . كلهم عندهم ولد واحد وبنات ..

بقيت بالمستشفى ثلاث ايام . واقاربنا كلها اجت . وزيارات ماتخلص بس اني كنت اتصنع النوم مااريد اشوف احد .
لان فعلا احس بوحده وهاي الناس كلها ماتهمني بعد ولدي ..

طلعت من المستشفى الاثنين ..
بس حالي حال ..
احس روحي كبرت عشرين سنه .
وجهي اصفر وشاحب .
اخذوني الاخصائي العصر .
ونطاني علاجات ..

زياد مرات يجي يسألني شلونج لو محتاجه شي . وطبعا اگله لا ..
اتصلت ع فرح گلتلها فرح بعد مااتحمل اريد اشوفهم .
گولي الضرغام يجيبهم اني استحي اخابره هواي تعبته وياي ..
فرح .  لايمعوده هو غير اخوج .هسا اخابره وللعصر همه يمج ..

وفعلا الثلاثاء العصر جابهم ..
ومهدد محمد وگاله كلما تأخرهم دور . ناخذهم مضاعف .
للسبت العصر يله تجي تاخذهم . وهذا ماحجه لان اكيد مشغول وي مرته الجديده .
فمابحالهم ..

من شفتهم احس روحي رجعتلي ..
ودبت الحياة بجسمي ..
حضنتهم وابوسهم من كل جهه وهمه هم حاظنيني .
شافوا الكانونه بيدي استغربوا .
ماما انتي مريضه ..

حور .. هسا صرت زينه من شفتكم ..
احس ضحكتي رجعتلي .
وگمت ع حيلي . وكلها تحجي عليه ويگلولي استراحي موزين حتى ايمان ..
بس اني مصره اگوم واشبع من هاي اللحظات وي اولادي .
سويتلهم عشا بإيدي وتعشينا سوا .
ويسولفولي ع زواج ابوهم ..

ماما ماقبلت يحجون لان تخاف عليه اضوج ..
بس بالليل ماتحملوا گعدوا يسولفون .
طلع مخليها ببيتي الي بينته بذهبي .
وصابغه ومغير غرفتنا بايعها ومشتري غرفه تركيه .
ومأثث البيت ..
انتبهت اشو هذا تزوج وغلس ع فلوسي وحقوقي ..
كتبت رساله الفرح وگلتلها خلي .
ضرغام يگول للمحامي يحجي وياه ويطالب بحقوقي ..

مااعرف ليش كتلني الفضول وسألتهم .
حور .. هي حلوه العروس .
رضاوي .. هههههههه ماما دبيه مو مثلج ضعيفه .
وهي موبيضه مثلج انتي احلى منها .

ويقلدولي مشيتها وشلون تحجي ويگول كل ساعه تبوس بينا ..
من گالوا هيج ضجت . ماغرت ع محمد بگد ماغرت ع جهالي . لان ذولي الي مو من حقها تبوسهم ..
وبعدين گامت الافكار تجي ببالي .
اخاف تقشمرهم وتاخذهم مني .
مبينه شيطانه مثل مااخذت محمد مني.
خاف تاخذهم ..
بعدين گلت . لا مستحيل اولادي يحبوني وماستغنون عني .
گمت اشكك بكلشي وبكل شخص .
انتزعت ثقتي بالناس كلها .بعد الي شفته .

زياد تكفل بأولادي ياخذهم ويجيبهم من المدرسه وي اولاده بذولي اليومين .

الجمعه رحنا للزيارة سيارتين رحنا ..
تغدينا هناك وزرنا وغيرنا جو ورجعنا ..
السبت درست اولادي ..
وحضرت غراضهم لان راح يجي ابوهم ياخذهم العصر ..
من اجة طلعت وياهم ..
ردت مااطلع بس گلت خاف يتشمت ويگول ضايجه لان تزوجت ..

هو واگف يم السياره .
حضنت جهالي وبوستهم ونطيتهم جنطهم .
صعدوا للسياره هو اتقربلي .
استغربت ..
گال حمدا لله ع سلامتج حور .
مارديت عليه ..
ردت ادخل گال ..
-هيج فراگي اذاج ومرضج مااتحملتي اتزوج مو .
اذا تحبيني ليش مارجعتي الي .
-ضحكت بأستهزاء ..
متوهم .. فراگ جهالي الي مرضني مو فراگك ..
اي واضح من شكلج الي تغير 180 درجه وصرتي اكبر من قبل .
هزيت ايدي عليه وسديت الباب بوجهه ..
ضحك ضحكه قويه وراح ..
سديت اذني ماردت اسمع صوته يوترني ..
واختنگ من هيج يحجي وياي ..
ابقى اقارن بين حبه وغزله الي وبين شماته بيه هسا
وقررت لازم اوگف ع رجلي واثبتله انه مايعني الي اي شي . وقبل كلشي لازم اشتغل واصير احسن منه ..

يتبع………………………