حليب اسود ..للكاتبه شمس

البارت الثالث 🛇

مساؤؤؤ حبايب 💕🌹
///// البارت الثالث /////

إرضـاء الاخـريـن غـاية لا تـدرك ..
لـن تـقتـنع بـهذا الا بـعد ان تهـدر سـنواتك فـي إرضـاء مـن حـولك…

رحت لبسـت شـالي واجيت شفـت زياد معصب ..
ويحجـي وياهم بنتر ..

گـلت السلام عليكـم ..
رد عمـي ..
بـس عمتي دارت وجهه .. وعبالـك اني الـي غلطانة بحق محمد مو هو الي كسرني ودمرنـي ..

عمـي .. تعاي بويـة حور .
اني اجـيت علمـودج انتـي وجهالـج وحتى ماتتشتتون .
مهمـا يكون ذاك بيتج وانتـي ام ولـدة ومايفرط بيج ..
ارجعـي بويـة والعنـي الشيطان ..

حور .. عمـي اني لليـوم ماقصـرت عنكـم وعن محمد .
شـلتكم بعيونـي رغم هواي اسمع حجي واغلس ..
واگول اهل رجلي اهلـي .
وكلشـي يهون الاجلـة . تالـي جزاتـي تاخذة وتخطبلة بيدك .
والكل يدري الا اني .مثل الاطرش بالزفة .
ولومـا زياد بالصدفـة داري ..
جـان اني لسا ماادري ..
الي هانت عليـه العشرة . وماغزر وياه تعبي .
مااريدة بعـد..

ابو محمد .. بويـة هي نزوة جـانت وتدرين بنات الجامعـة والموضفـات شلون يلزگن .
وهو انجبـر ياخذها . لان عمامها واهلها دروا .
وتصير دم لو ماخاطبهـا ..

زياد .. انت شنو جاي تبرر لابنك وتطلعه بريئ . خانها لو ماخانها . حب عليها وحده لو ماحب .
يعني هو من البدايه باعها . وهاي اهلها ضغطوا عليه . الله اليعلم بالمخفي. يمكن بنات الجامعه كلهن ضاحك عليهن وكل الي يدرون اهلها يتزوجها مو .
هذا مو حجي ابنكم هواي اسمع حجي عن سوالفه المكسرة .
وخاف لايسمعون عمادة الجامعه ويفصلوه راح تزوجها لا اهلها ولا جبروه .
محمد عنده مصلحته فوق كلشي ..
اختي ببيت ابوها . وولده اذا يريدهم يجي ياخذهم يشوفهم ويرجعهم الها .
وهو اصلا راح يتزوج بعد شلة بيهم ..

ابو محمد .. ردناكـم محظر خير . والي علينا سويناه .خطية بنتكم بعد برگبتكم ..
واولادنا ناخذهم ناخذهم مانخليهم عندها اذا مارجعت .

زياد .. انت رجال جبير لاتخليني اتجاوز . ببيتي وتهددني
بس هي صوج اختي الي خلتنا نتعامل وي هيج بشر.

ام محمد .. لا والله احنه الساعه السودة الخطبنا منكم فرحانه بجمالها وشايفه نفسها علينا . وهي ماعرفت تحوي رجلها وتحافظ عليه ..

زياد عصب وطردهم من البيت . امي گالتلها عيب داده ميصير هالحجي .
وذيج اكلتها بالغلط والسـب .

اني مانطقت ولاحرف . بس دموعي تنزل .. شسويت بروحي وبأهلي ..
تالي عمرهم ينسبون ببيتهم . وينفضحون .
بحياتنا ماطلع صوتنا والجيران سمعته ..

رجع زياد .. گال ارتاحي يحور هاي اولها . خلي نشوف تاليها شنو .
من باجر اشوف محامي واطلگج منه مااخليج على ذمته بعد ..

دخل لجوة ودخلت وراه مرته ..
گعدت الطم . شنو ذنبي گلولي هاي قسمتي بعد .
صحيح عاندت وردته بس لو ماقسمتي جان ماصرت من نصيبه .
شمدريني هيج يصير قبل هو خيارة واضوگها اذا مرة او لا ..

امي .. كافي ياامي خلص خلي يطلگج وهذا راتب ابوج مااحتاجه وشوفيلج شغله وعيشي منها انتي وجهالج ..

فرح .. واني هم اساعدج الى ان توگفين ع رجليج . مو اول وحده تعيش بلا رجال وتشتغل وتربي جهالها .
لاتخلين محمد يأثر على حياتج .
الي باعج بيعي ..

كلها تحجي وتهدي بيه . بس اني بالي يم جهالي .
خلي يطلگني وكلشي ماينطيني مااريد لاحاظر ولاغايب
بس جهالي يخليهم الي ..

نزلوا جهالي ..
حضنتهم وابوس بيهم ..
تالي اخذتهم فرح مني .. وانطت الهيبت ومهيمن فلوس گالتلهم روحوا اشتروا واخذوا وياكم صفاوي ورضاوي ..

باوعتلي .. كافي خبالج راح تخبلين الجهال وياج ..
يله گومي غسلي عيونج راح تعمى من البجي ..

رحت غسلت .. وماما گاعده تلف كبة والبنات وياها يلفن شفت بنات فرح وبنت زياد شلون يلعب بالعابات وفرحانات ..
ياليت ترجع طفولتي مثلجن . وانسى كل هذا الهم ..
اتذكرت من احنه صغار وعود فرح امي واني بنتها .
ونگعد نطبخ بالجذب ..
وبابا يجي يلعب ويانا عود هو جدنا ..
ااااااه يابابا لو انت هنا جان هسا حاظني وتهدي بيه وتحل مشاكلي كلها ومن غير مااشيل هم الشي .

هسا حاسـة روحي ضايعـة وماكو احد الي .
رغم اهلـي يمي . بس احس روحـي وحيدة ..

اجت رساله ع جهازي ..
محمد كاتب ..
بسيطة حور . تغلطون على اهلي وتطردوهم وتهددوهم اراويج منو محمد .
ولاعبالج ميت عليج واريد ارجعج . لا .. بس الا اكسر خشمج واحطمج ..

اني قرأت الرساله ايدي گامت ترجف ..
صاروا گبالي جهالي ..

صحت اولادي وين . نور خاله حبابه روحي صيحيهم بسرعه ..
فرح .. شبيج شكو .
حور .. محمد يهدد محمد حاف ياخذهم لايطلعون اريدهم .
اخذت الموبايل وقرأت الرساله ..

گالت شگد انذال .. الله العالم شموصلين الابنهم .
منو الي غلط عليهم منو الي داسلهم ع طرف ..
ذولي شلون كنتي عايشه وياهم ومتحملتهم ..

ماما .. ماتشوفيها شلون صاير حالها من ظيمهم وتكابر وماتشكي خاف نلومها ..

حور .. اي خفت تلوموني ادري راح تاكلون گلبي مثل هسا .
كل ساعه وعيرتوني بأختياري ..
حظي وقسمتي شأسوي .
اتهسترت ..
ملخت روحي ولطمت ..
ايمان .. شبيج تخبلتي غير نريد مصلحتج ..
حور .. ايمان الخاطر الله الي بيه كافيني مااريد لوم وعتب ارحموني الخاطر الله .
ايمان .. اني هم صوجي وگامت ..
فرح .. كافي يله .. عليمن نلومج هذا حظج بعد .

دخلوا جهالي .. عطت بيهم . وين لسا ليش طلعتوا بعد طلعة برة البيت ماكو حتى مدرسه ماكو منا لمن تفض سالفه ابوكم ..

همه صفنوا وخافوا .
ماما .. ياامي مو هيج .همه اطفال شفهمهم لاتضغطين عليهم خطيه .

……………………………………
گمت ابجي .. أجوا حظنوني . ماما لاتبجين مانطلع بعد .
حضنتهم وزدت بالبجي ..
اعصابي تلفانه ومتوتره مااعرف شأسوي .
خايفه اخسرهم .. 

فرح .. يله گوموا بدلوا ..
حور .. ليش ..
فرح .. الجهال تكأبوا خطيه .. وانتي هم نفسيتج تعبانه
راح اتصل ع ضرغام يجي ياخذنا نتعشا برة ونغير جو ونرجع ..
يله ماما گومي .. وخلي اگول الايمان ..

ماما .. لا ياامي اني اريد اصلي والليله جمعه .. رحوا انتو شباب وتونسوا ..

راحت فرح گالت الايمان .. .
گالتلها اي بس اگول الزياد ..

بدلت للجهال وكملت .. وبدلت اني ..
اجت فرح .. هاج اخذي هذا خافي عيوب يخبل ..
حور.. لا مااحب احسه ثگيل ع الوجه ..
فرح .. لاتصيرين فد مره . اصلا من تخليه ع البشرة يجف ولا اگولج خليني اني ارتب وجهج .
گعدت تخبط وتلعب بوجهي طلعتي وحدة ثانيه .

فرح .. شفتي شلون طلعتي تخبلين . ليش قبل متخلين بس كحله وحمره .
حور .. غير محمد ميقبل ويگول مااحب تخلين مكياج .
فرح .. اي طبعا مايقبل بحجة يغار وهو تلگيه عينه ع المحمرة والي لابسـة حصر ..
حور .. ها فرح بديـنا خليني شوية انسـى ..
فرح .. اي عيني ماگـلنا شي على حبيب الگلب ..
حور .. انتو ليش تتوقعون بعدنـي احبه .والله كارهتـة بس ابجي لان ماغزرت العشره وياه والحـب والاهتمـام الي نطيتهيا ..
فرح .. يله كافـي اريدج اليـوم تنسين محمد واهله ..
هههههه .
لبست وكملت ..

اجة ضرغام .. شلونـج خيتي .
حور . هلا خويه ع الله .. انت شلونك .
ضرغام .. خويـة اي شي تحتاجيه اني يمج . واخذ حقج من عيونـة بس گـولي ..

حور .. والنعم منـك ابو نـور ماتقصـر ..
فرح .. يلـة نگضيها سوالف . ويـن ايمان ..

صـاحت .. ايماااان ايمااان . وينكم يله ..

ايمان ردت من فوگ .. اي هياتـني اجيـت . بس منتضـرة زياد يجي غير ..

دخل زيـاد .. هاكملتوا .. وانتـي يمـة ماترحيـن .
ماما .. لا يمـة خلوني هنا اريد اصلي وعندي ختمـة ماالحگ والليلة جمعه ..

فرح .. لعد لاتتعشين احنة نجيبلج عشا ..

كملنا وطلعنا كلنا سيارتين ..
اني وجهالي وي فرح وضرغام بسيارتهـم .
وبيت زيـاد بسيارتهـم ..

طلعنا تعشينـا برة ..
بس زياد گالب وجهه . وكلامة ثگيل وياي ..
فرح تغمزلي عود لاتهتمين ..

ضرغام گال حور شتحبون تاكلون .
الجهال گالو بيتزا وفنگر ..

زياد .. هجم بيتكم اولاد محمد هم تعرفون الفنگر .

صدگ انقهرت ..
ضرغام .. زياد طالعين نتونس بلا مغثة . اطفال شنو ذنبهم خطيه .

حسيت مصطفى انهضم ..
صح هو ثاني ابتدائي بس يفهم كلشي وذكي ..
ومن زمان كان يگولي .
خالوا زياد ميحبنا .
ومن نصعد نلعب وي ولده فوگ . يطردنا .

اعرف زياد ميطيق محمد .
بس اولادي شنو ذنبهم ..
سكتت ولازم اتحمـل ..
الله لاينطيك يامحمد لان بهذلتـني اني وجهـالي ..

كملنا عشا . افترينا بالمول .
فرح اخذت كم قطعه ملابس الي والجهالـي ..
فرحوا بيهن حبايبي ..
واشترتلهم اصباغ ..

اتصلـت ماما على زياد ..
ضرغام..اووووه .. نسيـنه الحجية بلا عشـا خطية

رد زياد وشكلة تعصب .. گال يلة جايين ..

كلنا نباوع .. ونريدة ينطق ..
فرح شكو ..

زياد .. العار كسر الباب علـى امي ويگلها انطونـي جهالـي ..

اني لزمـت گلبي .
صعدنا بالسـيارات بسرعه ورجعـنا ..

وصلـنا البيتنا . وشفت محمد واخوه وياه ..
گلبي لزمني . حضنت جهالـي ..

اول مانزلـنا .
عاط محمد ..
ها خاتون عفتيني علمود تسرحين وتمرحين بكيفج .
ولاطخة وجهج وطالعه عروس . اصلا يمكن منتضرتها الهاي اللحظه من زمان ..

زياد .. احترم نفسك ويله ولي منا .
محمد .. انطوني جهالي مااروح . وهاي الكلبه اني اعرف شلون ارجعها ..

اني تخبلت من گال كلبه . شگد اناني كان وخاني وباعني بس ابد مايغلط عليه .
كانت هاي اول مرة اسمعها منه .
ولو المفروض مااتعجب منه بعد سوايته وياي .

زياد اتعصب من غلط عليه .. تهجم عليه راد يضربه .
واتدخل محسن اخو محمد وضرغام ..
صارت عركة والجيران كلها طلعت تتفرج ..

ضرغام .. گال المن واكفات ادخلن وعاااط بينا .

تركناهم ودخلنا .
وگلبي نار على زياد لايأذيه محمد ..

ايمان .. ارتاحي يحور لمن يموت واحد منهم والثاني يدخل السجن يله ترتاحين .

باوعتلها بأستغراب ..
ماما .. ايمان انتي مالج دخل . هو اخوها اذا مايوگفلها منو يوگفلها .
ايمان .. واذا صار عليه شي منو الي اني وجهالي ..

اني ساكته بس دموعي تجري .
وفرح هم ردتها وگالتلها مو كل النسوان رجولتها تباوع الحلگها مثلج ..
اختي ناقصه حظ وبخت شتسوي ..

ايمان .. هههههه شوف منو التحجي . وضرغام عساس مو خاتم بأصبعج وشتگليله يگلج صار .

فرح .. ابن عمي ومحترمته ومقدرته ليش ميخليني تاج بس وكت مااغلط بحق احد.  مايسكت ويحاسبني .
مو انتي الي مخليج زياد تسمعينا حجايه بالرايحة والجايه ويسمع ويسكت .

ايمان گامت تلطم على وجهه .
خلي يجي زياد ويشوف اخواته . دور هاي راح تتطلگ وتگعد على گلبي ..

حور .. فرح كافي الي بيه مكفيني . خلوها شتحجي تحجي استاهل الي يجرالي ..

دخل زياد قميصه مشگوك وشحاله .
ويهدد ويتوعد ..

گال الايمان انطيني هويتي بسرعه .
ماما .. وين رايحين
زياد .. الا اشتكي عليه وابهذله . بالمراكز ..
باوعلي ..
بس يطلگ ذوله مايبقون مامجبور اتحمل ولده اني .
خلي يتحملهم هو ..

………………………………………
من گال هيج تخبلت ..
گلتلها يمه والله اذا انطيتوا ولدي ارجعله .
لو اعرف اعيش خدامة جوه رجله بس اولادي مااخليهم وحدهم ..

ماما .. وج ياامي ساعة عصبيه وحجاها لاتخافين .
وبعدين اذا گلتي ارجع اني واول وحدة اتبرأ منج .
هالنذل مترجعيله بعد ..

اندگت الباب اجت جيرانه ام هوار ..
هاي كرديه . وجيرانه من زمان واكثر من اهل ..

شافتني ابجي ..
گالت ياماما ليش هيج حظج انتي ..
سلمت على ماما ..
وگـالتلها .. ردت اجي بسرعة . بس هوار گال هوسه ببابهم لترحين .

هذا شبي نسيبكم تخبل ..
ماما .. الساعه السوده الي نطيناه مره تورطنا .
بهذلها وضيع شبابها وهسا خانها وراح يتزوج .
وفوگاها لان تركته يريد ياخذ ولدها منها .

لطمت ع صدرها ..
يوووم هذا شلون كنتي عايشه وياه .
حور الحلوه الي ماليه الشارع بضحكاتها ولعبها .
هيج صار بيها .
ولاعرفتج من شفتج متغيرة حيل ..

الكل جان يحجي .. والي يلوم والي يعاتبني لان وثقت زياده .
والي والي ..
الكل كلامها كان اشبه بسيوف تنغرز بگلبي ..
مافكروا بمشاعري شنو ..
اني امرأة انخذلت وانكسرت من اقرب شخص الي .
انسان للحظه صار كلشـي بحياتي ..
احبة اكثر من روحي ..
مااتخيلت يوم راح نفترق او ننفصل .
حتى زعلنا مايطول ..
مااعرف اخليه ينام وهو زعلان .
اتمازح وياه واضحكة وابوسه لحتى نرجع متصافين .
كل هذا انمحـى بسرعه .
والعشره هانت وباعني .
والحب اختفى وراح ..
ومابقى بس ورقه تجمعنا ..
ومصيرها تتمزگ وكل شخص يروح بطريقه ..

اتصل ضرغام على فرح .. گالها سجنوهم اثنينهم للصبح .
لان واحد اشتكى ع الثاني وتعاركوا گدام الضابط وانسجنوا ..

امي من سمعت ارتفع ضغطها وتخربط ..
راحت ام هوار صاحت ابنها واخذوها للمستشفى وراحت وياها فرح ..

وبقيت اندب حظي مع من لايرحم ..
ايمان ..!!
الي بقت تحجي وتدعي عليه وتگول لازم تموتين واحد منهم يلـة ترتاحين ..
والجهال كلها تبجي وانـي بقيت بالمنتصف .حايرة ومااعرف مصيري وشنو الي راح يجرالي ..
حتى بيت ابـوي مالي حق بي ..
بعد ماقشمرنا زياد وسويناله تنازل ..
بحجة احنه ممحتاجين وكل وحده عندها بيت ومتزوجة .
وحتى يرضينا انطانه كل وحده خمس ملايين ..
ببيت يسوى 100 مليون ..

يتبـع……… ..
……………………………………
انتظرونـي ببارت ثانـي بعد منتصـف الليـل ..
احبكـم 🌹