مساء الخير متابعيني الغوالي ويسعد الله مسائكم
#عشگ_ابن_السواتر
بقلمي #مولاتي_يازينب
البارت #٥
علاء التحقت وكل يوميه نتخابر انه وجنه طبعاً جان القلق والخوف ابحجيها دائماً قلقانه عليه
جان يفرحني هذا الشي يعني لمن تحس اكوانسان يحبك ويخاف عليك ويبادلك شعور الحب
هل احساس حلو
علاء. ياجنه شبيج خبلتيني كليوميه تخابريني وتبجين شبيج قابل اشصاير بيه انه هسه علوا
استشهد
جنه لاتكول هيج علاء وزدت بالبجي والله اموت وراك علاء
علاء اسم الله عليج وعلي هسه بعيد الشر عن الموت خل انعيش يومنه وما انفكر اباجر ماضل
شي كلها باجر وعكبه وراجعلج
جنه وشلي يضمنلي انته باجر ابخير
علاء جنه تراج مللتيني شنو السالفه احجي حجي حلو خل انسولف ترا انه بالكوه اخترقت رمز
الراوتر مالت القائد شوفي صرت حرامي علمودج
جنه وشدعوه عليه القائد ماينطيكم الرمز
علاء تدرين ليش ماينطينه الرمز معناها كل واحد كاض تلفونه وكاعد والدواعش يطبون علينه
وماندري مثلي انه بالضبط هسه
جنه ههههه
علاء اي فكيها كضيتيها بس بجي علي وشويه واجالي هذا الوجه 👈🏻👹اكيد عرفتو
علاء مو حتا كرهتني ابروحي ادري انته ابليس حتا ابليس شوي اهون منك
جنه ها
علاء ههههه لا مو وياج هذا صديقي خليج وياي ع الخط التفتت على اشرف انته شنو فلمك
اشرف ياخي مضغوط راح انفجر يعني هسه انه خاطب راح يصيرلي شهر وماشايف خطيبتي
غير اثلث مرات وحتا تلفون مثل الاوادم مايخلون عدها وانته تكعد من الساعه ١٠:٠٠ لحد
ماتكول هاي انه الثنتين مره تضحك مره تعبس مره تبسبس مره تصيح ولك موتتني ولك شلعته
الكلبي ارحمني ياخي ارحمني ضليت اغار من عندك
علاء. ههههه وانته امراقبني لازم
اشرف. مو بس امراقبك صاير ضلك حتا اسمع حجيك وتالي الليل اشبك بالمخده
علاء. اشو يله كوم كوم منا
اشرف ترا صدك ضليت اغار من جنه يعني خذتكً مني اربعه وعشرين ساعه تلفونك على ذانك
ياخي انه هم صويحبك اكعد اتغزل بيه اضحك وياي حتلو تضحك علي
علاء. هسه كوم خليني اكمل الاتصال وبعدين تدلل كلشي اسويلك حتا اكفخك
اشرف صدك والله وعد وعد ارجال
علاء. وعد بس كوم منا
جنه جنت اني ميته من الضحك على علاء وصديقه ضلينه كاعدين انسولف ع اشرف وعلى حياة علاء واشرف
علاء. يله حبيبتي خل اكوم انام اشكم ساعه وراي حراسه وشويه اكعد يم اشرف خطيه
جنه يله حبيبي بي باي اموووووح
علاء. ماتصيرلج جاره انه اكول خل اخطبج كبل لاتسويلي طركاعه وسديت التلفون
ورا يومين رجعنه للبصره اجازه جنت ناوي احجي وي ابوها بالموضوع بس ما اعرف ليش خايف
يجوز خايف من امها اتعارض زين انه منويلي حتا اخطبها قررت ابيع سيارتي بس علمود جنه
تصير الي سيارتي نوع سايبه وقديمه اشكد اتريد اتجيب يعني بعتها بثلاثين ورقه
ورحت الابو جنان اخذ منه الموافقه المبدئيه وبعدها حتا ادز
الاهل طبعاً ما فتحت الموضوع وي اي واحد حتا امي ماتدري وحتا جنه ماكلتلها رحت البيتهم
دكيت الباب سمعت صوت مره من ورا الباب كالت منو
علاء. انه انه ابو جنان موجود
ام جنان اي ثواني واصيحه
علاء وماكو دقيقه واجه ابو جنان فتح الباب كتله السلام عليكم شلونك عمي
ابو جنان اخذته بالحضن وبوسته هلا وليدي الحمد الله على سلامتك
علاء الله يسلمك ياعمي عمي اجيتك وعندي حاجه يمك
ابو جنان ابفرح وانه ركبتي سداده تعال تعال حياك حياك اتفضل بابا اتفضل صحت بصوت سو طريق
علاء. جنت محتار اتقدم خطوه وارجع خطوتين ياربي سهل عليه ياربي انه احبها حب شريف
وانته وحدك المغني ياربي كون مايفشلوني اجه ابو جنان وبيده اكلاصين عصير
ابو جنان اتفضل بابا اشرب واحجيلي شلي تريده وانشاء الله ما اقصر وياك
علاء. عمي ماعرف انه شلون ابدي احجي وانه متوتر ادور بعيوني ابكل مكان
ابو جنان قاطعته اول شي بابا لاتتوتر ولاتستحي مني اعتبرني ابوك وانشاء الله اكدر اساعدك
علاء. عمي انه اريدك تسمع مني ولاتقاطعني انتم والنعم منكم ناس كلها تحجي بيكم وبزينكم
انه هذاك اليوم من شفت كريمتك وبنتك جنه طبعا انه ما اعرف عنها اي شي بس سئلت الناس
وكلولي هي بنتك واسمها جنه وبعدها مامتزوجه جنت متردد اجيك وافاتحك بالموضوع بس خفت
اتفوتني هاي الفرصه ان اناسب ناس مثلكم عمي انه طالب الكرب منكم انه ادري انه مو من
مستواكم ولا من طبقتكم بس الرسول صل الله عليه وأله وسلم (( خذوهم فقراء يغنيهم الله ))
وانه من هذا الباب اجيتك اجيت اخذ موافقه مبدئيه حتا اذا اتوافق انته ادز اهلي ايخطبون
ابو جنان ابتسمت ودنكت ورجعت رفعت وجهي ابوجهه شوف بابا ايجوز ماتصدك ويجوز
اتصدكني اذا اكلك انه اول ماشفتك دخلت ابكلبي وتمنيتك صدك تاخذ بنتي حبيت شهامتك
و أسئل فرقد انه اجيت سئلت عنك وسولفلي هواي بيك وانعجبت حيل ابشخصيتك علاء بابا
انه ما الكه احسن منك البنتي ولفلوس مو كلشي ترا الي يدور فلوس مايحصل سعاده احنه
اندور رجال يحب ويصون ويحافض ع البنيه انه موافق بس بقت البنيه اتوافق وموافقتها اهم
من عندي بهواي
علاء اكيد ياعمي اهم. شي هي توافق واشكرك ع كلامك وهذا كله يعكس طيب اصلك والله
ماعرف اوصف اعجابي بيك ياعمي لو كل الناس مثلك جان هسه العراق بخير
ابوجنان. ههههه انت الطيب بابا انه اعرف جوهر الناس بس اباوع بوجوهم وانت رجال والنعم
منك
علاء يله عمي من رخصتك
ابوجنان كل الهلابيك والله وياك وانه اخذ موافقت جنه واردلك خبر
علاء مشكور عمي طلعت ورحت طاير ع اشرف سولفتله الصار وهو فرحلي
ابو جنان جنه جنه بابا وينج
ام جنان ها ابوجنان شبيك تصيح
ابو جنان صيحيلي جنه
ام جنان رحت صحت جنه واجيت اني وياها
ابوجنان بابا جنه اجاني علاء طبعاً علاء هذاك الولد الي شدلج سبلت غرفتج
جنه مجرد ما كال علاء طبت الفرحه الكلبي وبالكوه ضامه الابتسامه
ابو جنان ماسئلتيني شيريد وليش انه صحتلج
ام جنان اي صدك ليش
ابو جنان اعيوني ام جنان انه احاجي جنه ماحجيت وياج
ام جنان اسفين
جنه اي بابا وليش اجه
ابو جنان اول شي بابا علاء انسان مامنه هواي خصه ابوكتنه هذا طيب واصله
شريف وشهم وصاحب غيره والف وحده تتمناه
ام جنان شنووو بس لا
ابو جنان خليت ايدي اكبال ام جنان بمعنى لاتكملين انتي ما الج دخل الحجي وي بنتي اي
بابا الولد جاي يخطبج واذا تردين رئيي انه اكول وافقي رجال ونعم منه
ام جنان بس هو اشيشتغل وشعنده وين اهله
ابو جنان اهله بالمنطقة... ماعنده شي رجال على كد حاله يشتغل عند فرقد بالفرن ويداوم بالحشد
ام جنان طكيت على وجهي شنوو يشتغل عند عديله لا وبعد اتكلي بالحشد بالله مات اضل
هاي ارمله لا يا ابو جنان الهنا وصل حدها اني على فرقد ماجنت راضيه انوب اجيتني بهل
حافي لمنتف والله يا ابو جنان اذا ناوي صدك اتزوج بنتك الهذا انه من باجر الم كل غراضي
واروح الاهلي شنو شنكل لناس بنات القاضي ياخذونهن وين الحافي الي ذابه الدهر هاي اني
كتلك وكمت من مكاني
ابو جنان التفتت على جنه ابكل برود بابا جنج ماسمعتي حجي امج ولاتخافين من شي ترا
كلشي مايصير والبيت مايخرب وامج تزعللها كم يوم وترضا وانه بعدين احجي ويها اهم شي
يالغاليه انتي اريد اعرف رئيج
جنه. جان ابكلبي خوف خاف تصير مشكله بس جانت فرحتي اكبر دنكت واني اعصر
بأصابعي ومستحيه كتله كيفك بابا
ابو جنان. هذا هو بابا افتهمت شنو تردين اتكولين بس ترا الولد صدك كلشي ماعدنه وحالتهم
تختلف عن حالتهم ١٨٠ درجه بس هذا الشي مايعيب الرجال
جنه. من رخصتك بابا وكمت يبوووووو اركص اغني شنو اسوي يمه فدوه الطولك علوشتي
ركضت ع التلفون
علاء انه جنت خال التلفون اكبال وجهي واكص سيلفي واكلب خلقتي كلساع شكل متئكد راح
اتخابرني جنه وصدك وخابرتني
علاء الووووو
جنه هلا علوشتي ولك اموافقه اموافقه
علاء هلا بالخفه اول مره اشوف وحده يخطبونها وتصرخ اموافقه ولج وين الثكل وين الحجينه
بي هذاك اليوم انتي راح اتعبيني وياج
جنه ههههه ما راح اتعبك اني راح انسيك الدنيه راح انسيك انته عايش وي الناس
علاء. عضيت على شفتي صدك لو هذا بس حجي اللسان
جنه اله صدك وابو الصدك عاد تدري شلون خابر هسه على بابا كله ها شو مارديتو خبر
علاء انتي خبله مساع انه عدكم شبسرعه خل تمر يومين ع الاقل
جنه. يابرودك شنو يومين والله باجر اتخابر اوعدني باجر اتخابر فدوه باجر خابر والصبح الصبح فدوه حبيبي
علاء. لج سكتي المايعه اشوفج كلش خفيتي ماكو هيج حجي
جنه لا فدوه علوشتي خلي ننخطب هسه قبل لاتلتحق وتخلص الاجازه
علاء. اوك باجر اخابره
جنه والورا اتجيب اهلك
علاء اوكي اوكي بس جنه انه راح اخطبج بس ما اتصور راح اتزوج
جنه. ها شنو هلحجي هذا
علاء. جنه انه ماعندي وزواج يرادله فلوس يعني زفه وغرفه وبدله وانتي يرادلج نيشان يادوب
عندي بس افلوس النيشان
جنه علاء كول البابا خل ايساعدك
علاء هههه صدك تحجين انتي اشبيه اتخبلت واطلب من واحد يساعدني ولج انه مرت علينه ايام
غدا ماكو بالبيت مارحت ومديت ايدي لحد ديري بالج تعيدين هاي لحجايه ترا صدك اضوج منج
جنه اسفه اذا ضوجتك بس جان قصدي دين
علاء وانه مو كد الدين ولا اكدر اوفي ماتكليلي اشطلعج ابطريقي خليتيني احبج واخطبج
جنه هذا القدر علوشتي الله يفتحها ابوجهك انشاء الله
علاء يله روحي حبيبتي انه عندي شغل رحت الامي وكلتلها على موضوع الخطبه جانت ردت فعلها كا لأتي
ام علاء يمه هاي الساعه لمباركه بس يايمه احنه منيلنه افلوس العرس والخطبه ماتشوف بعد
وكت على هذا الحجي
علاء يمه انه هسه راح اخطب وبس عندي هاي فلوس سيارتي والله كريم على الباقي
ام علاء الله يسهلك يمه ما اكدر اعرضلك واعيق مستقبلك وبلزواج اكمال نص الدين
علاء كعدت اسولف الامي والابوي عن البنيه ومنين هي جانو متعجبين شلون بت قاضي وناس
زناكين وينطون الواحد مثلي وصار يوم ثاني وتصلت ع ابو جنان وجاوبني بلقبول ورحب بيه كتله
باجر اجيب الاهل واجي وهو هله بي هواي
جنت كلش فرحان ومتاني يمته يجي باجر واعد الساعات والليالي
جنه امي من سمعت ابوي يكول باجر يجون زعلت ولمت ملابسه وراحت الاهلها بجيت هواي ع
حضي امي وماتحضر خطبتي بس باب صبرني وكلي اختج موجوده عماتج ثنينهن يشيلنج
بعيونهن وامج مردها اتطخ وتقنع
علاء بيوم ثاني رحت انه وعمي اخو ابوي وخوالي ثنين واشرف صديقي وسيف وامي ومرت
اخوي وام اشرف جنت خايف لاكلشي يصير وماتتم الخطبه بس الحمد الله خطبنه وعقدنه
طبعا انه مثل ابو جنان رجال طيب ماشايف ابد راعه ضروفي وطلب مهرها قرآن والي افتهمته
من فرقد ان هم هو طلب عليه قرآن لمن اتزوج بنته جنان كال لبنيه مامحتاجه شي وكلشي
عدها عليمن انضايك الولد بس لبنيه تريد حفلة نيشان مثل باقي البنات الي بعمرها
طبعاً سهل عليه اهواي الله يسهل عليه طريق الجنه حددنه موعد النيشان بعد خمسه ايام
من اليوم جنت كلش فرحان الى ابعد الحدود جنت اتصور لكيت لبنيه الي تمنيتها اكيد بنت
ابوها واخلاقها مثل اخلاقه وهلحجي ثبتته الي من كلامها الي جنت دائماً اسمعه ماجنت
متصور راح يصير بس الي صار ،،،،،،
يتبع
مهلا قد كنت احلم بحياة طبيعيا فحسب لاتقسو علي ياقدري،،،،،