حليب اسود ..للكاتبه شمس

الجزء الأول .بنات ⚠

مساء العافية عليكم غوااااالي 🌹
///// البارت الاول /////
  حلـــيـب_أســـود
  الكــاتبة_شـمــس

دائما نحــاول إرضـاء غيرنـا .. علـى حسـاب راحـتـنا وسعـادتـنا ..
لكـنهم لايرضـوا ولو اشعـلنا لهم اصابعـنا العشــر…

والاســوء مـن هـذا نكـرانهـم الجمـيـل وجـحـودهـم ..

دگ المنبـه…
فتـحـت عيـن وحـدة وبـاوعت .. الساعه ستـة ..
اوووف شبسرعـه صـارت الستـة ..
احـس دقايـق من نمـت ..

من الأرق بالگـوة گـمت ..
طلعـت للمطبخ .. غسـلـت وجهي .. وترسـت القـوري
مـي .. وخليتـة ع النـار ..

طلعـت بيـض من الثلاجـة ..
نـص خليته بالغلايـة سلگـتهم ..
والنـص البـاقي . خليتهم اسـويهم وي الطمـاطة لأن محمد يـحب بالريـوگ طماطـة وبيـض ..

رحت للـصالـة . گعدت الجهـال .
صفـاوي مـامـا يلـة گوموا .. صار الصبـح ..

فتـح عيونـه مرتضى ..
مـامـا بعدني نعسان ..

يلـة حبيـبـي گـوم . بس الكسـلان .. يبقـى نايـم لسـا
يلـة صفـاوي گـوم ..

اگعـد بيهـم . واروح للمطبـخ . وارجـع .. الگيـهـم بعدهـم . نايمـين ..

گـلتلهـم . صـارت السبعه .. وابوكـم حيعوفكـم ويمـشي تطافروا هههههه ..

بـعد ميعرفون شنو يسـون ..
رحـت للغرفـة جبت ملابسهـم واجيت . 
بين ماغسلوا واجـوا ..
ابـدل الهـم وهمـه يغفـون ..

كملـتهم ..
رحـت ثرمت طماطة ناعمه .. وخليتها بالطاوة ..
خليت جاي للقوري ..
وحظرت الصينيه ..
خليت البيض السلگ بماعون ..
وماعون خليت زيتون وطماطة ثرمت وخيار .. احنه هيج نحب وي البيض السلگ .
حضرت اكواب الجاي ..

ورحت للغرفه ..
محمد محمد .
اممممممم شويه شويه .
محمد هسا سته ونص .. على ما تتريگ وتبدل . تصير السبعه .

گاعد گاعد ..
فتح عينه .. گال كويتي ملابسي ..
گتله . اي حبيبي . من الليل . وصبغت الحذاء والجواريب هياتهم يمك .

اني اروح اخلي الصينيه بين ماتغسل ..

رحت گلبت الطماطه و وخليت البيض فوگها ..
وخليت القبق ع الطاوة حتى تنفش وتستوي من فوگ .

رحت للصاله ..
لميت فراشات الجهال . وصفطتهم ع الميز بالغرفه ..
احنه عدنا غرفه وحدة بالبيت .
والاولاد ينامون بالصاله ..

جبت صينية الريوگ ..
خليتها رحـت جبت الحليب للجهال شربـوا وسويتلـهم لفـات….
اجـة محمد گـعد صبيتله جـاي ..
اكـلوا ..
كمـلوا ..
گالهم يلـة بابا .. بسرعه لاتأخروني ..
اكمل تبديل الگيگم واگفين يم السيارة ..

صاحوا ماما جواريبنـا ..
گلتلهم .. رحوا غسلوا بالصابون وهسا اجيب الجواريب .
جبت الجواريب لبستهـم ..
گال محمد .. حـور وين الحزام مالتـي ..
رحت للغرفـة گتله هياتـه بالزاويـه ..
نطيتـه الحزام ..
ورحت خليت للجهال لفاتهم والفواكه وحلوياتهم بالجـنط

رحت لمحمـد .. گـال يلـه انـي رايـح محتاجيـن شـي .
بوسـتة وگتله سلامتـك حبيبي .
بـس خضرة ويـاك من تجـي ..

وصلتـهم للبـاب .ودخلـت ..
صبيـت استكـان جـاي .. ردت اكـل شي مااشتهيـت ..
شربـت الجـاي وگمت ..
اخـذت الصينيـة للمطبـخ صفيتهـا ..
وغسلـت المواعيـن ..
رتبت المطبـخ ..
طلعـت لحـم خليتـة ع النـار ..
ورحـث گشـرت الباذنجـان ونگعتـة بمي ومـلح شويـة ..

اخـذت فـرة ع البيـت ..
فرزت الملابس الوصخة ..
خليتهم بالغسالة ..

نضفت وكمـلت ..
باوعت ساعة تسعـة ونـص ..
رحت للغرفـة تمددت ع السريـر ..
بين غافيـة وگاعـدة ..
انـدگ الشبـاك حيـل .. طفـرت من مكـاني ..
بـاوعت هـاي عمتـي ..

گـالت .. حظوظ نايمـة لسـا ..
گلتلها .. لاعمة مانايمه ..
عمتي .. شعلية بيج . بس اني رايـحة اتسـوگ .
وخليت الگدر ع النار .
شوية وروحي للبيت شوفيه ..

عافتني وراحت ..
رحت طفيت الگدر مالتي ..
وخليت حجابي على راسي ورحت درت البيت عيالي ..

فتحت باب المطبخ محد موجود ..
الولد بالدوام وعمو بالشغل .. ومرت حماي هم بالدوام .

صفنت ع المطبخ هوسة ..

تذكرت من كنت وياهم بنفس البيت ..
شلون عمتي كانت تأمر وتنهى .. واگعدني من الصبح حتى انضف ..
وماقبلت اتعيين وهسا مرت بسام متعينه وتطلع ومحد يحجي لان بنت اخوها ..
ااااااه الك الله يالغريب ..

ركبت تمن . وطبخت المرگة ..
هدرت الگدور .. ورجعت البيتي ..
لاگيت عمتي بالباب ..
گلتلها كملت طبخ ..
حتى ماشكرت او گالت شي ..

رجعت البيتي ..
وهو اصلا مشتمل بنيناه بحديقة عيالي ..
لان بيتهم ضيگ .
وبسام راد يتزوج .
ومحسن غرفته وحدة ماعندهم مكان ..
بس بالاسم عازله ..
وكله بينيته من ذهبي ..

رجعت البيتـي كملت طبخ وشطفـت الملابس وجـففتهم ..
بقى بس كـوي ..

سويت زلاطة ..
صار الظهر بسرعه ..

رجع محمد والجهال ..
اخذت الخضرة منه نضفتها وغسلتها .. وصبيت الغدا
تغدينا وكملنا ..

محمد .. حور ملابسي كاويتهن ..عندي فاتحة العصر .
حور .. لا والله مالحگت. هسا بس تجي الكهرباء اكويهم
محمد .. وليش ماكاويتهم .. شنو شغلج .
هو بس طبخة ماعرفتي تغسليهن وتكويهن من وكت ..
حور .. شبيك محمد . ليش شمسويه .
هذا كله وتگلي شمسويه . شو اركض ليل ونهار ورحت الاهلك ركبت الغدا .
محمد .. اووووه بدينا بالاسطوانه ..ها طلعتي دور شايله اهلي .. وتعايريهم
حور .. ترى ماگلت شي شبيك وياي . صاير اقل شي تحجي ..
محمد .. اني تعبان وانتي تحرگين بروحي .. اروح انام احسن . وب 2 گعديني . مو تنامين وتنسين ..

گام من يمي ..
واني صافنة عليه ..
ليش هيج تغيير . بعد ماكان يموت ع التراب الي امشي عليه ..

ليش حياتنا انقلبت شغل وتعب ومشاكل ..
بعد ماكنت متأمله نعيش بسعادة بعد قصة حبنا ..

كويت ملابسـة ..
ورحت نضفت المطبخ ..
اجو الجهال جابوا . جنطهم .
بدينا نحظر الدروسهم ..
ودا احفظ مصطفى املاء عنده ..

باوعت للساعة ب 2 طفرت گعدته ..
من غير مايحجي ..
گام سبح .
وطلع بدل وتعطر وعلى آخر حباية ..

محمد .. اني اتأخر لاتنتظروني تعشوا ..
حور .. وين رايح . غير گلت عندي فاتحة ..
محمد .. زعطوط وتحاسبيني . معزوم ع العشا .

سكـتت لأن مالـي خلـك مشاكلـة .
ومن احاسبة يگول خنگـتيني ..

درست الجهال وكملتهم ..
گـالوا ماما .
مو بابا ميتعشا هنا .
متسويلنا بيتزا . لأن هو ميحبها .
واليوم بس احنـة ع العشـا ..

حور .. صار حبايب ..
گمت سويت العجينه وحظرت الحشوا . طلعت الجبن من الثلاجة ..

للمغرب ..
شغلت الفرن وگـمت اسوي بالبيتـزا ..
خليتهم بالفرن .
ودزيت صفاوي ع بيبسي ..

وتوضيت وگمت اصلي ..
اجة رضاوي گال . ماما موبايلج يدگ.

كملـت صلاة . فتحت الجهاز .. بعدني منازعة ملف الصلاة ..
شفت ماما متصلة ثلاث مرات ..
توترت .
خاف صاير عليهم شي ..
رجعت اتصلت ..
ردت ..
-هلو ماما شلونـج
-هلو بنيتـي . رجلج وين ?
-ماهو .. عندة فاتحة .. ليش صاير شي .?
-لا ماكو بس ?
-گولـي ماما خوفتيني محمد بي شـي ?
-لاتخافين عليه هالـنذل !!

-گلتلها ليش تحجين هيج يوم شكو?

سمعت صوت صفاوي اجـاني ..
ماما ماما .. هذا خالوا زياد اجة ..

استغربت .
ماما كلامـها غامض ..
وزياد هنا شكو !!

گمت من مكاني ردت اسلم علـيه .
بس هو سبقتي بكلامـة ..
زياد .. وين هذا رجلج الناقص ..
حور .. ماهو معزوم ..
زياد .. طبعا انتي نايمة ورجليج بالشمس !
حور .. زياد شكو خوفتوني .
سديت الخط ع ماما من غير ماادري
زياد .. ولج زوجج الناقص والي تحديتينا علمودة .. واخذتيه غصب علينا .
اليوم گطع مهر ..

هو گال هيج .. واني طحت ع طولي ..
فتحت عيني ..
اهذي ..
زياد لاتجذب عليه .
محمد مايسويها مستحيل ..

زياد .. گومي اصحي وبعدين نحجي ..
گمت .
گال هذا الطباخ طفيته مدري شنو بي شاط ..
حور .. عوف الطبخ مو گلبي راح يوگف گلي الحجي مو صحيح .. شمدريك انت .

زياد .. وج قابل اجي لو ماصدگ. ابن عم البنيه الخطبها يصير صديقي .
واليوم المشيه والمهر .
وخابرني . وگال هذا نسيبكم منفصل عن اختك .
گتله لا . گال جا شلون خطب بنت عمي اليوم .

گمت الطم ع وجهي ..
لامستحيل . محمد مايسويها . ولو صدگ جان دريت جان اهله راحوا وياه جان حسيت .
محمد. ماخذ جماعه وابوه وعمامه وبس .

گمت احجي وي روحي .. لا محمد مايسويها محمد يحبني ..
گمت اهذي وابجي ..

زياد .. كافي ولج . لاتعاندين . عاندتي مرة وشفتي النتيجة .
لمي غراضج وتعاي وياي ..

لا مااروح الا يجي واسمع منه .اريد اعرف ليش سوه هيج ..

يعني ماتصدگيني . قابل اجذب عليج .

خويه حشاك .. بس هذا بيتي ومحمد ابو جهالي وذوله جهالي شلون اعوف كلشي من غير ماافهم شي ..

احجي وابجي ..
بقى زياد ساعه يحجي ويقنع واني مصره اواجه محمد .
دخل محمد ..
شاف زياد استغرب .
لان علاقتهم ضعيفه ومايجينا زياد هواي ..

محمد .. السلام عليكم . شكو شبيج حور .
زياد .. والك عين تسأل ياناقص .
انطيناك بنيه من جمال واخلاق وشهاده .
وبعد ما ذبلتها وحطمت حياتها ومستقبلها .
تروح تخطب وتگطع مهر ..

هو صار وجهه مثل النومـيه .
گال حـور . آنـي… .

عطت بوجهه .. شنو انت محمد گلي شنو ..
الي سمعت صحيح . لو لا .

محمد .. باعي اني ردت اگلج بس ماگدرت .
حور .. يعني الي سمعته صدگ .. ليش گلي ليش .
شنو القصرت بي وياك ..
لك هدرت عمري وحياتي عمودك .
تحديت اهلي الاجلك .
ليش . ليش.  بشنو هي احسن مني بشنو .
شنو الي بيها مميز .
عشرة تسع سنوات تبيعها بسهوله ليش.??

زياد .. وج بعدج تعرفين ليش . شنو تترجين من واحد ناقص جان يودي مرته تجيبله فلوس من اهلها ..
گومي وياي وذبي ولده عليه .

محمد .. احترم نفسك انت ولاتتدخل . اني ومرتي وهسا تفضل اطلع ..

زياد .. ماميت على بيتك . بس اخذ اختي وامشي ..
باوعلي وگال يله ..

محمد .. احسبي حسابج اذا طلعتي ماتشوفين اضفر من اضافر ولدج ..

زياد .. وخليهم الك مانريدهم . اكيد تربي وتتعب عليهم ويطلعون مثل ابوهم ناقص ..

محمد گام ضرب زياد . وزياد رجع ضربه ..
واني منهارة بوسطهم ..
گتله خويه ابوس ايدك . روح مااگدر اجي اذا ماولدي وياي واذا مااعرف ليش كسرني ماارتاح ..

زياد اشرلي بأصبعه .. وگال اسمعي حور لو ماامي تلح ماأجي لهنا .
ولثاني مرة تكسرين حجايتي وماتسمعيها .
انتي حرة ابقي ..
بس لاتجين يوم وتگولين الحگلي خويه . من يسويج خدامة عند مرته .
مثل ماهدر جمالج وخلاج خدامة اله ..

تركنا وطلع ..
باوعت لمحمد ..
يباوع بتكابر ولاعبالك غلطان بحقي .
لااجه اعتذر ولاجه برر .

گتلة حبيبي صفاوي اخذ اخوك ودخلوا لجوه .
ماردت اولادي يسمعون كلامنا ..

گتله ليش محمد .
وين راح حبك الحور .
باوعلـي محمد .
اني حور الي حبتك وأتحدت الدنيا علمودك ..

منو الي فضلتها عليه . تحبها هيج رايدها لدرجة تبيعني اني وجهالك علمودها ..

وليش اني ماحسيت .

معقوله اني هيج مغفلة .. وجنت نايمه ع وجهي وماادري شتسوي ..الكاتـبة شمـس

هو ساكت ..

احجي لاتسكت فهمني ..واعيط وابجي

گال اني حبيت حور الفاتنه الجميله . الي تهز الجامعه لما تمشي ع الگاع ..

حور ذيج الي اتباهى من اگول هاي مرتي .
حور انتي من صاروا الجهال عدنا لسا .
هامله روحج .
جمالج راح .
روحي باوعي الروحج . شوفي نفسج بالمرايه .
عبالك عمرج بالخمسين مو بالثلاثين .
عندج البيت والشغل والجهال اهم مني ..
شوكت اخر مرة رحتي صالون وعدلتي روحج .
شوكت اخر مرة اشتريتي ملابس نوم لو ملابس مغريه .
شوكت اخر مرة سهرنا سويه مثل اثنين متزوجين .
اني رجال .
وشما احب زوجتي واقدرها .
هم اريد اعيش .
ودوامي بي اشكال بنات يمرن .
والي يغرني هواي .
ماناقصني شي وبعدني بشبابي .
واريد وحده الي تدللني ..وتهتم بيه .
مو مخليتني بآخر اهتماماتها ..
واحسن مااروح بالحرام..
الشرع حلل اربعه .
وهذا مو يعني مااريدج او مااحبج ..

هو يحجي واني اباوعلـة بأشمئزاز ..
-ااااااه شگـد اناني يااخي ..
هذا كلة شايلة بداخلك ..
جان گتلي حجيت . حتى لو تلميح ..
يس انت اخترت الطريق الاسهل حتى تبرر الي سويته .

لك اني المن اتعب واشتغل مو الك وجهالك .
حتى تجي تعبان من الدوام تلگي البيت نضيف ومعطر ولگمتك جاهزة ومرتاح .
المن هدرت شبابي غير حتى اوفرلكم الراحة انت وجهالك لك اني حتى جرجف الجربايه اجويه واعطرة يله افرشه
حتى ترتاح بنومتك ..

اسهر الليل كله حتى اكمل متطلباتك الماتگضي .
ولبسك الي كل يوم شكل ..

اني هامله روحي ومااطلب منك واروح صالون حتى مااحملك مصاريف زايده .
لان عدنا اقساط وراتبك يادوب يكفي ..
وشايله همك ومااريدك تنطلب ..
وتالي انت تاخذ الفلوس وتروح تتزوج بيهن .
بدل ماتگلي .
هاج حبيبتي هاي فلوس وروحي صالون رتبي نفسج واشتري ملابس .
او انت جيب ملابس الي تعجبك والبسهن الك .
مو هذا زياد وهذا بسام اخوك .
يجيبون ملابس نوم الزوجاتهم بنفسهم .
ويگلولهم البسن النا .
وهنه ماشايلات ربع جمالي ..

-لك انت اناني . ماقدرت تعبي وحبي وسكوتي على ظلم امك ومسويتني خدامه الها والبيتك في سبيل رضاك.
اروح اجيب فلوس من اهلي وانطيك اذا متضايق وماعندك وانت تروح تشتري وتلبس وتخطب والله اليعلم بعد شتسوي من وراي ..

انت شنو شنو واعيط ..

محمد .. كافي ولج فضحتينا . خطبت بعد وانتي دريتي والي صار صار ..
بعد شتسوين ..
انتي بمكانج وهي بمكانها .
اگعدي ربي جهالج واني مااقصر وياج ولاتتهورين .

-هههههه نجوم السما اقربلك مستحيل ابقى ع ذمتك اذا اخذتها ..

-وشتردين اعوفها واني اليوم عاقد عليها .

-لا تطلگني . لان مااعيش وي انسان خاين ومايقدر تعبي وناكر للجميل مثلك ..
طلگني وانطيني حقوقي واخذ جهالي وانت ابقى يم حبيبة الگلب .

-هههههه تحلمين . حقوق ماالج الي . وجهالي مايخطون خطوه برة البيت تردين اخذي هدومج وروحي الاهلج ..

-انت تخبلت . هذا البيت والسيارة من ذهبي وفلوسي .
وجهالي اني احق بيهم تحلم اخليهم هناك ..

محمد .. لاتتجاوزين لا اتعامل وياج غير تعامل كلشي بأسمي . وهذا العندي . واني طالع فكري زين والعني الشيطان احسن مماتخسرين كلشي بلحظه..

طبگ الباب حيل وطلع ..
واني دموعي عشرة عشرة تنزل ..
لامستحيل ..
اني اكيد بحلم ..
اي حلم ..
محمد يحبني .
جان يگول انتي حوريتي .
دخلت الغرفتي وابجي ..
گلتله صفاوي ماما روح اگعدوا ع التلفزيون ..

مصطفى .. ماما شبيج ..
حور .. ماكو شي حبيبي مريضه .
مرتضى .. ماما جوعانين والبيتزا وين .
حور .. هسا اسويلكم بس اطلعوا شويه ..

طلعوا . وگفت مقابيل المرايه واباوع ..
الوجهي. تعبان . شعري لافته وصار فترة طويله من صبغته .
احس روحي صدگ كبرت .
كبرت واني مهتمه بزوجي حتى اطلعه بأبهى صورة
وحتى ادرس جهالي ويطلعون من المتفوقين .
هملت روحي . حتى ارضي عمتي وماتحجي عليه .
وتالي جزاتها يرحون يخطبوله من وراي ..

لطمت ع وجهي .
وج ياغبيه شسويتي بنفسج .
مو هذا الي كتلتي نفسج عليه وحبيتي ..
مو هو نفسة الي گالج اعيش بدلال وسعاده .
وج عيونج الشهب وين راحن .
وجهج الابيض شسمره هيج .
شوكت كبرتي وانتي مملاحظة نفسج ..
وين حور المرحة والجميله ..
وينها ..

انتبهـت ع نفسـي .. الكاتبة شمـس
اي اني حـور .

البنت الصغرى والمدللة الاهلي ..
عندي اخ واحد اسمه زياد .. متزوج وعنده اثنين ولد وبنت
واخت اسمها فرح .. متزوجة ابن عمي وعندها اثنين بنات ..

اني المدللة عند اهلي وطلباتي اوامر ..
بابا الله يرحمة ماكان يعز عليه شي .
من كنت بالجامعه .
ماجبرني على حجاب او لبس معين ..
كـانت مواصفاتي حلوه وبيضه .
الكـل بالجامعـه كان يتمنى يحصل عليه ..
رغم تحرري ولكن ماخالفت تربيتي واخلاقي ..
ومااهتميت لاي شخص بالجامعه ..
ماعدا محمد .. الي اخذ گلبي وعقلي من اول يوم شفته
(الكاتبة شمس)
محمد كان استاذ حاسوب بالجامعة  ..
واني كنت ادرس لغات ..
من شفته وكانت عنده كاريزما قويه عجبني حيل ..
كانت نضراتنا تتلاقى كل ما نلتقي ..

والاعجاب تحول لمصارحة ..
وگلبي بدأ يحبه ويتعلق بي ..

كانت حالته المادية متوسطة . واحنه حالتنا جيدة جدا .
هذا الشي زرع فروق بينا ..
وخاصة لما خطبني ..
والدي واخويه رفضوا .
لان ادرس اولا ..
ولان كنت مدللة وعايشة برفاهية .
اشترطوا بيت وحدي .
ومحمد ماكانت عندة امكانيه ..

بعد رفض اهلي اله . اني تمرضت وتركت الدوام فترة وكنت مصره عليه ..
لان قلبي هواه خلص . وماكو مفر من الحب ..

لأنـه عندمـا نعـشق .. تصمـت جميـع حواسـنا .
ويبقى القلـب هو المتحـكم الوحيد ..
لأختياراتـنا ..

زياد اجاني بيوم للغرفة وگال ..
باعي حور اني اعرف اكو شي بينكم شي من اصرارج عليه .
ولاعبالج تعبر عليه سوالف امي من تگول . يمه الولد خوش ولد وهاويها .
اعرف ابوي وامي مايكسرون بيج ..
بس اذا صارت القسمة . لاتجين يوم وتگولين مليت تتحملين نتيجة اختيارج .

اني ساكته وماحجيت .
بس كان داخلي فرحانه لمـا اهلي وافقوا عليه .

يوم مـهرنا كان اسعد يـوم ..
ورغم انه محمد جاب ذهب خفيف وع گد امكانيته .
بس ماكانت تهمني الفوارق .
المهم راح اعيش وي الانسان الي اختارة گلبي ..
ابويه ماقصر عني .
كان ينطيني فلوس ويگـلي روحي اشتري الي ترديـه .
ومحمد صاحب اللسان ولبق .
گدر يكسبهم الجانبه . واهلي ناس طيبين .
مايردون يضغطون عليه ..

تنازلت هواي  وكلمـا نطلع نشتري شي الجهازنا ..
واحسه غالـي اگله حبيبي خلينا نختار غيرها ..

ابد مااتطلبت رغم بنت دلال . ولبسي كله ع الموديل ومن الغالي ..
الا اني اكتفيت بألي عندي .
والفلوس الي نطوهن الي . اشتريت الشغلات المهمه بس وملابس النوم ..

تزوجنـا .. وحسيت ملكت الدنيا بإيدي ..
عشت احلى ايام ببداية زواجي ..
اهلي كلما اروح يحملوني اشكال ..
ومحمد مايحجي وحسيته يفرح من ينطوني .
واني كنت اخاف يزعل من اخذ من اهلي .
لو يحس بنقص ومايقبل ..

اهلي جابولي ثلاجة .
فرحت .. گمت اشتري اشياء واخلي بيها .
لأن عمتي من النوع المسيطره ع العائله
وماتقبل بالتبذير ..
نطبخ ع العدد .
ومرات نرجع اني ومحمد من الدوام .
نلگي عازلين النا .
مقدار نفر واحد .
ومحمد جوعان واستحي اكل وياه .
ابقى انقش .
ويخلص الاكل واني جوعانه ..
اني الچنة الاولى بالعائلة ..
فكان الحمل عليه .
من ارجع من الدوام النص الليل اني بس اشتغل ..
وعمتي متطلبة حيل ..

ومن حبي الزوجي .. كان كلشي اسويه واتحمله لعيونه .
واهلي دايما يگلولي لاتكونين ضعيفة شخصية .
الناس تستغلج ..

استغرب من كلامهم .. معقوله الحب والطيبه بهذا الزمن تتسمى ضعف بالشخصية ..

محمد كنت مااشكيله ولااضوجه ..
بس هو دايما يعاتبني بتقصيري اتجاه البيت .
ويگلي ليش ماتساعدين امي .
ابقى صافنه ورغم انه احلف اله واگله اني ممقصرة
بس كان كلام عمتي الة تأثير اقوى ..

وزادت المشاكل بينا وخاصه بعد ماولدت صفاوي وزاد الحمل عليه ..
وبعد ماخطبت عمتي بنت اخوها البسام حماي .
حاولت تطلعنا بأي طريقه لان ماكو مكان عندهم ..

وحلا للنزاع .
طلب محمد نبني مشتمل بالحديقه مال اهله ..
ولان ماعنده فلوس ..
بعت ذهبي كله وحتى الذهب الي اهلي جابوه هديه الي
واخذنا مواد بالاقساط وبنينه ..

ارتاحيت فتره .. بس عمتي ماتركتني .
حتى بعد زواج بسام ولان مرته موضفه .
تطلب مني اجي انضف وياها لو اطبخ الغدا .
وهي تروح للجوارين لو للسوگ.
وتجي تلگيه ع الجاهز.
واني مااحجي . خاف محمد يتضايق .
والعجيب ماتگول حور الي طبخت .
وابد ماتشكرني او تمدح بيه ..
وحملت بسرعه برضاوي ..
واني بقيت مستمره بهالوضع ..
الى ان جبت وكبروا جهالي ..
واني مثل المكينه ماالحگ حتى اروح الاهلي اشوفهم .
ومحمد تغيير .
وماعاد مثل الاول .
حتى مااتذكر بيوم گال امشي نطلع نتعشا اني وياج وارتاحي شويه من البيت واعوضج عن التعب ..
بالعكس كل يوم يزيد تذمره ..
ويعصب هواي .
واحس حبه قل او اختفى .
بس كنت اكذب روحي واگول لا .
اكيد يتعب ومايرتاح وبالاول والاخير هو يشتغل ويركض علمودنا اني وجهالي ..
تالي طلع ماخفي كان اعظم ..

هذي اول بدايه لمصاعب حور القادمة ..

يتبع…
………………
عودة معاكم احبتي من جديد.
بقصة حقيقيه مختلفه عن التي سبق ذكرهم .
القصه ..تتحدث عن شقاء المرأة وعذابها اتجاه مصاعب الحياة ومع جنس ادم  .
وظلم من حولها والمجتمع لها ..
ورأي الناس والنظرة للمطلقه ..
التي لاحول ولاقوه لها .
سوى سوء اختيارها لأنسان لايستحقها ..
اتمنى تفاعلكم يزيد اكثر .
وتنضرون للقصه .. من ناحية اجتماعيه .
وتسندون المرأة .
قصص الحب كثيره .
لكن هذا النوع من القصص اهم واجدر للذكر والطرح ..
متابعة ممتعه احبتي ..