#ابتزاز_اودى_بحياتي
بارت7
يوسف :،فهمني عمي لو ميته جان شكلت لروحك شلون الله يسامحك وتضل روحها بركبتك لاخر عمرك
انت تتحمل هيج شي ؟؟يلا جاوبني ؟!!
ابو منتصر :بلا زحمة يوسف خليك بعيد عن الشغله بتنا واحنا نعرف نربيها ،لاتتدخل
يوسف:اني اعصابي كلش صايرة نار وهذا يحاجيني هيج ،كبيت بوجهه كمت اصيح
شنو تربييييها فهمني شنو ،تحركها وتموتها هيج يعني التربيه ،زين انت هيج مواثق بتربيتك الها ؟؟جاوبني
،بعد هاي ضلت يمك يعني الصوج مو منها منكم وتجون تحاسبوها الها ليييش ،احاجي بصياح راسي راد ينفجر منهم احس دماغهم ناااشف ما ياخذون حجي
اخر شي خصمت الحجي وكتله
-شوفو شكله الحجي ميفيد وياكم ،الي يتعرض لمهى حسابه يلكاه عندي وراح ارفع عليكم دعوه تعنيف بالمركز
وخلي ذاك الوكت منتصر يصير زلمة ويمد ايده عليها ،وهسه راح اخذها وياي الى ان يصدر قرار المركز
عفتهم وطلعت صارت امي وخالتي ومهى بوجهي بالمطبخ كاعدات خلو شال على راسها ،
سعاد :ها يمه حاجيتهم ،فهمتهم عالسالفة
يوسف :اني جنت عصبي ومن سالتني امي انفجرت ،
شفهمهم بس كوليلي شلون يفتهمون هم بيا طريقه حتى اكدر اتناقش وياهم واحجيلهم الموضوع ،
خابري محمد خل يجي يحاجيهم وانتي هم ابقي يمهم ،ومهى خل تجهز اخذها وياي للبيت
ام منتصر :وين تاخذها خاله ،وين يقبلون ابوها واخوها
يوسف :باوعتلها واني روحي طافره ورديت
عيني ما ماخذها تتونس، ،اني ماخذها اخلصها واحميها منكم ومن شركم مثل ما احمي الغريب من يوكع بيد مجرمين هي هم واكعه بيد غضببب مو بس مجرمين
بس فهموني انتو شتفرقون عن المجرمين ،والله راسي وكف منكم مجاي اتحمل دقيقه وحده هنا اني طالع مهى بسرعة لبسي وتعالي بالباب اني ،يمه خليج وياها
مهى :كاعده بالمطبخ سمعت صراخ يوسف وهو يصيح ويرزل بيهم وهم ساكتين وانوب اجه كال اخذها وياي
يممه وين ياخذني ،اصلا اخاف منه وحتى ما حجي ويا انوب اروح وياه وحدي؟؟!!!بس ليش اخاف يكفيني الامان الشفته منه طلعني من حلك الموت ،حتى لو جان واحد غريب هم يضل هو اامن من اهلي عليه
بقيت اباوع لخالتي وامي ،
راحت امي تجيبلي الصايه مالتي حتى البسها وخالتي لزمتني وكفتني ساعدوني لبستها يوسف طلع برا ينتظرني
كملت وجاي اطلعله جاي اتمشى بالكوة من الضرب جسمي يون الم كله
صار منتصر بوجهي جرني من ايدي احس انكسرت بيده وكام يصيح وضربني راجدي رجع خشمي طك دم
منتصر:تعالي تعالي وين عبالج تخلصين مني ،لو تنكلب الدنيا متطلعين ،انعل والديج هسه بنت الزمايل
-يحجي ويضرب بيه وخالتي وامي يجروني من ايده ميقبل يهدني
خالتي كامت تصيح يوسسسسسف ولك تعال الحكنه
دخل يوسف يركض لزم منتصر ووخره عني وكام يضرب بي
منتصر :ولك وخرررر شنو كوا...يد احنا وندزها وياك
ابن الكلب ،متطلع من البيت كتلك متطلع
يوسف :المن تسب ولك ناااقص هو انت مو رجال افعالك بلسانك كادر بس عالنسوان يااامرررره ضربته رجع جر سجين من الكاونتر وراح على مهى يصيح
منتصر :ولكم اذبحها واشرب من دمها ومتطلع منا
مهى :كمت ابجي بخوف وركضت اختل ورا امي
اجه جرني من امي
بسرعة يوسف جرة وخله سلاحه براسه كامت امي وخالتي يصيحون ومرته تبجي
يوسف :مهى روحي للسيارة بسرعة هسه جيت وراج
وانت يا چلب والله لو ما خالتي جان كتلتك هنا وخلصت العالم من واحد فاشل مثلك .
عفته وطلعت وهو مثل الجلب يخاف من الموت كام يرجف من شاف المسدس
لكيت مهى واكفه يم السيارة فتحت ،
-يلا اصعدي
مهى :صعدت واني احس يريد يغمى علية ماعرف من الضرب او من ريحة البانزين القوية مالحكت اغير ملابسي ،البانزين اتبخر بس بقت ريحته قويه بيه نفسي هم كامت تلعب ،ولزمتني الباردة
يوسف :اباوع عليها وجها كله كدمات واثار ضرب وهي بيضه كلش فيبين بيها الاثر اكثر وحاطه كلينكس على خشمها والكلينكس كله دم ،وجاي تطكطك
_بيج شي ،بردانه ..؟
مهى :ها لا بس شويه
يوسف :طفيت التبريد مال سيارة
هسه نوصل للبيت وغيري ملابسج اعرف كلهم بانزين الله ياخذك منتصر ،ضربت عالستيرن بس اتذكر سوالفه وشسوى بيها اكوم افور
مهى :بقينا الطريق كله ساكتين ،شوي وحطيت راسي عالجامة ونمت ،من وصلنه صاحني يوسف كعدت
السيارة جانت يم الباب برا نزلت وياه فتح الباب ودخلنه
يوسف :نغغم نغغغغم
نغم :ها خويه جيتك
يممه مهاوي شصاير بيج صخام الصخمني
مهى :شافتني نغم كامت تلطم على وجها
ولج مابيه شي لاتخافين ،جتي حظنتني وكل جسمي يصل عليه من الوجع ااااااخ شصيح اخ وكل وجعي من اخويه ،ياربي
نغم:شنو هاي الريحه ولج ،هاي نفط بانزين منين اجاج
يوسف :هذا اخوها مصخم مو منتصر راد يحركها ابن ال....اتذكرت مهى كدامي وسكتت
مهى :من كال مصخم متت ضحك رغم كل وجعي ،لان شكله وهو عصبي وكال هيج اتذكرت منتصر صدك يلوكله مصخم
يوسف :احجي بداخلي صدك طفله من تضحك رغم كل وجعها ،وشكلها الطفولي ومخليه ايدها على حلكها ومنزله وجها وتضحك ،الله يطيح حظ اهلج اي والله،
اني عندي هيج وحده وااذيها !!!
عفتهم وصعدت ارتاح بغرفتي وحتى هي هم تاخذ راحتها اعرفها ما متعوده عليه مثل محمد
مهى :اخذتني نغم للحمام وانطتني ملابس من عدها سبحت وطلعت خليت المنشفه على راسي خاف الولد موجودين
اجتي اخذتني لغرفه مريم جانت مريم هستوها كاعده من النوم كامت استقبلتني وبوستني
نغم حاجيتلها وضعي
بقو يداروني نغم تمشطلي لان مابيه حيل اشيل ايدي جسمي مكسر تكسير ومريم تشاقيني وجابتلي عطورها كال اختاري منهن
كلش نسيت روحي وياهن اتمنيت لو عندي اخت ،جان صارت رفيقتي بكل خطواتي وفرحتني بحزني مثل ماهسه البنات مفرحيني ،بس يلا الحمد لله ما اجت على هالدنيا جان حالها هسه مثل حالي مادام عدنا هيج اهل .
بليل رجعت خالتي هي ومحمد
مهى :نغم انطيني گلبيه منج استحي اضل بالتراك خاف اطلع من الغرفه
نغم :يمعوده هو منو اكو قابل غربه هم اخوانج الكبار
-ميخالف حبابه استحي
-هسه اجيبلج من عيني والله
راحت جابتلي گلبيه ردنها طولها لجوا العكس وطويله لون جويتي واطرافها اسود وخليت شالي الاسود على راسي
وطلعت على خالتي اول ما شافتني ،فتحتلي حضنها
سعاد :تعالي يمه لحضني تعالي فدوه اروحلج
-رحتلها بسرعة بقت تمسح على راسي وتحجي على اهلي ،يااا الللله شكد احس بالامان يمها كون من عمري على عمرها
احجيلي خاله شصار
سعاد:اجه محمد وحجالهم كلشي امج وابوج صدكو بس منتصر رغم كل الحجي ويكول الصوج منها وبس يصيح حقير متصيرله جاره
مهى :بقيت يم خالتي ٣ايام خلال هالايام يوسف اخذ مني حساب نور وفارس وعنده واحد صديقه يكدر يخترق الاجهزه يعني يعرف بهيج مواضيع
عطل حساباتهم وحرك حساب الموبايلات بعد ما اتاكد من وجود الصور بجهاز فارس الثاني نور راسلتهم اله مره ثانيه بعد ما محمد كسر جهازه حسبي الله عليهم دمرو حياتي الناقصين
بس ما سكت يوسف اخذ ادلة عليهم ومحادثاتهم الي بينهم صديقه محظرهن اله من مخترق حسابهم ،وراح قدمهن للجامعة واخذو اجراء بيهم بتهمه تشهير بأعراض الطلاب وفصلوهم هم الثنين ،وهم الي سمعته من البنات ان يوسف هم رايح لفارس وكاضي بيه التوبة ومجنزة تجنز
والله مرات اصفن على وضعي ادور على اخويه شو ميعرفني بهيج وكفات بس بالكتل والتهايم ذاكرني ،وارجع احمد الله الي وكفلي ولد خالتي وما كطع بيه
بعد ال٣ايام اجتي امي عليه ،اول ما شفتها خفت اكيد منتصر دازها وراح تضل تحجي وترزل بيه متعلمه عليها .
بس صار العكس ضليت مصدومه من شافتني كامت تبجي وحضنتني
الام :امشي وياي ولج شلون الج كلب تعوفين امج ،منو الي اني انتي بنيتي الوحيدة
مهى :يمه هسه صرت بنتج الوحيده مو شلعتو گلبي والله هاي بأول موقف واجهني ما صدكتيني وطبكتي ويا ابنج گلبي خلص واني باول عمري كمت ابجي
الام :اسكتي يمه شعندي غيرج ،بس شسويله اخوج عصبي واخاف منه اذا اطبك وياج يكلي تطلعين عينها
مهى :انتي الي فرعنتي علينه وخليتي يكسر ركبتي بتحكمه ،اضربها ادبها واحكمها كله انتي علمتي وهاج شوفي كلشي انكلب عليكم كلكم مو بس عليه صرتي حتى انتي تخافين منه
الام:كلشي ينحل يضل اخوج والاضفر مايطلع من اللحم هو يخاف عليج وهيج يسوي يلا كومي وياي نرجع للبيت
مهى:كمت اضحك بداخلي ههه يخاف عليه !!
منو جابج يمه؟
الام :منتصر وهسه كاعد يم محمد بالصاله ،يلا حتى نرجع قبل الليل
بعدني ماحجيت خالتي ردت الها
سعاد :خيه والله ماكدر ادزها وياكم ،هسه يجي يوسف يكلب الدنيا ،تعرفين هو متكفل بيها انتو روحو وان شاء الله من يجي هو يجيبها الصبح ،ولا تكوليلي منتصر ولا شي انتي قنعي واخذي
الام :ماشي خيه لعد خل اكوم اروح
سعاد :مو كاعده خليكم عالعشى
-لا والله مو ابو منتصر بالبيت وعموري منو يسويلهم عشى
-ليش مو جنتج هناك
-يمعوده دخل تتصخر لزوجها بالاول بعدين تسوي عشه لعمها
يلا تصبحون على خير من هسه وسعاده لاتنسين حاجي يوسف خل يجيبها مابيه حيل مشاكل
راحت امي ومنتصر بالكوه قنعته امي واخذته ،خايفه شلون راح ارجع وياه هذا واحد مجرم يمكن بليل واني نايمه يموتني ،
رحت بعدين ويا البنات سوينه عشى واجه يوسف كعدنا كلنه عالعشى انتضرت خالتي تحجي وياه شو ضلت ساكته ،وماحجت ابد
لمينه السفره ورحنه للمطبخ
نغم :مهاوي قلبي هذا الجاي صبيته ودي الهم بالصاله
مهى :مو محمد راح لغرفتكم يمكن .
نغم :يلا ودي بس لخاله ويوسف من اخلص اصب لمحمد
مهى:اوك
اخذت الصينيه ورحت للصاله بعدني بالباب
سمعت خالتي تحاجي يوسف
سعاد: يمه يوسف ليش ما اخطبلك مهى والله ما تتفوت وانت هم كافي بعد شكبرك تصير
مهى :بقيت مصدومه وصافنه بمكاني يبوو خالتي شجاي تسوي وفزيت على صوت يوسف وهو كام يصيح بصدمة
يوسف :هاي شبييييج يا امي صدك تحجين اكيد تتشاقين هاي طفله طفله شيلي هالسالفة من راسج فدوه اروح لراسج
و سدي الموضوع لا تحجين بي كدامي بعد
.......يتبع