بين قمرين

15-14-13-12-11

#بين_قمرين

همس القوارير

البارت 11🌸🌸

من شفت دموع متفاجاءه بالي وراي وگفت وبقت عيونها شاحبه تبلع ريگها وتباوع عليه گمت التفت داشوف منو واگف وراي وانتبهت عليها ضحى غمضت عيوني

وسام

لا يا الله

ضحى

وربي جنت حاسه انت متغير عليه بس ما توقعتها دموع

وسام

كل الي ابالج غلط اني افهمج

ضحى جتفت ايديها

بالله فهمني خلي افتهم اتمنى اكون غلط مثل متگول

وسام

اي اني افهمج تعالي

عافتني وعافت الجهال وراحت اخذت عباتها وطلعت من بيت خالتي

رحت لامي

لكيتها واگفه باب المطبخ

امي

يمه شبيها ضحى تبجي وعافت الجهال شكو وسام شصاير.

وسام

يمه ديري بالج عليهم اني بعدين اجي عليج من تكملين دگي عليه خلي اروح اشوفها

امي

يمه شخيركم غير افتهم

وسام

لا يضل بالج يا يمه اروح وافتهم شسالفه اني همين ما مفتهم

امي

روح يمه چنك صخمت وجوهنا

وسام

ترى ابد مو وكتج يمه

باوعتلها وطلعت رحت لگيتها بالطريق تمشي سريع وتبجي واني امشي وياها ما حجت ولا كلمه خليتها براحتها حقها واي وحده مكانها تحرگ البيت على راسي گلت خلص شما تسوي اتحملها واقدر وضعها وصلنا لبيتنا

فتحت باب البيت ودخلت نزعت عباتها وحجابها وشمرتهن على ميز الطعام بالمطبخ وگعدت عالكرسي

ضحى

احجي ريحني كلي الي شفته والي سمعته كذب گلي عيونج وروحج غلطانه واني الصدگ احجي وسام والله ما بقت روح بيه احسها دتطلع مني شوي شوي دتاخذ روحي وسام گلي حلمانه گلي هذا تفكيرج مثل كل مره ويطلع غلط احجي وريحني (الكاتبه همس القوارير)

وسام

بس اهدي والله كله اله حل والي ترديه يجرالج ويصير

ضحى

داگولك احجي لا تلعب بأعصابي ترى مناقصه اني احجي لخاطر الله

وسام

شوفي اني صريح وياج ومراح اكذب عليج ضحى الي شفتيه وسمعتيه صحيح اني احب دموع واريد اتزوجها وصدكيني مراح تأثر عليج انتي الاصل وانتي الاولى وام جهالي صحيح اني غلطت ودخلتها حياتنا بس الله خلها بطريقي حتى تشاركنا حياتنا

ضحى

واني شنو اذا تحبها اني شنو وسام حرام عليك انت دتذبحني تعرف شنو دتذبحني گاعد تحز بنحري وتخنگني اني الي تعبت واني الي تحملت واني الي وگفت وياك بالمره قبل الحلوه واني الي خليت امك على راسي هي وخواتك لعيونك واگول بيت عمي ومالي غنى عنهم فضلتكم على اهلي وانطيتك من روحي لحتى ترتاح هيج تجي عالحاضر تاخذك اني الي حملت وربيت وتعبت وهي تجي تاخذك بدون تعب كل تعبي وشبابي وعمري راح وياك وهسه انت تگولي احبها شحبيت منها وگفتلك دارتك شنطتك حتى تحبها شنو النقص الي عندي ولگيته بيها گلي يابه هذا غلطج وربي اصلحه لخاطرك ولخاطر جهالي اغير كل اطباعي علمودك بس مو تغدرني وتطعني بضهري

وسام

ضحى والله مراح تاخذ مكانج انتي روحي وام بيتي والله اعتبريها اخت الج والله مراح تغيرني عليج

ضحى

ههههههههه وسام انت دتعرف شنو دتحجي لو لا انت دتجيب واحد قاتلني وتخليه گدام عيوني وتگلي اتحمليه انت شلون تفكر وشلون ماخذ الامور هيج صدمتني كانما اول مره اشوفك واعرفك اسمعني وسام اني راح ابقى وياك هنا وراح تبقى حياتي وياك مثل ما هي لان ما اريد اخلي على روحي نقطه وتالي اتندم عليها طول عمري بس خلي ابالك وخليك مفتهم يوم الي تدخل بيه دموع البيت وهي مره الك هو يوم طلعتي من البيت ومن حياتك وحتى جهالك تحرم تشوفهم وهذا اخر كلام عندي

وسام

شنو بكيفج انتي تتحكمين وتشرطين لا والله اجيبها واخليها وياج بالبيت وغصبن عليج رضيتي او ما رضيتي افتهمتي لو لا بكيفج تحرميني من جهالي شنو مخبله انتي

ضحى

اي مخبله مخبله من صدگتك ومخبله من وهبت حياتي الك كل يوم اگول متغير لازم اكو شي ارجع واگول لا وسام مو خالي اكو شي ممريحه اقنع نفسي انت مضغوط بشغلك وتعبان وبداخلي اعرف مو هذا السبب وسام كافي لهنا حدي وياك وغير هذا الحل ما عندي واني گتلك الي عندي وانت بكيفك بعد لو اني لو هي وانت اختار

وسام

لا تخيريني ضحى صعب الي دتگولينيه مستحيل اختار وحده منكم اريدكم اثنينكم

ضحى

الگلب يشيل واحد ميشيل اثنين وانت رجلي وحب صباي واعرفك كلش زين الي براسك لازم تسويه وعندك قابليه تقنع اكبر واحد واني لان معاشرتك واعرفك كلش زين خيرتك وسام لو اني لو دموع وبيوم الي تختار دموع اني اطلع من البيت

وسام

تدرين بيه احبج وما اتخلى عنج وعن الجهال

ضحى

اثبتلي هالشي واختارني

سكتت محجيت اي كلمه بقيت بس اباوع عليها وهي باصعب وضع شفتها بيه حيل قهرتني خلتني وطلعت راحت للغرفه اسمعها تبجي وتعبانه وما اعرف شلون ارضيها واشيل عنها انطيتها الحق وگلت حقها حالها حال باقي النسوان رجلها وتحبه ولازم اتحملها شما تحجي او تگول وكلامها هذا ادري بيه تهديد علمود لا اتزوج دموع لان هي تحبني ومستحيل تفارگني او تعوفني وتحرمني من جهالي خليها لحد ما تهدئ شويه گعدت على ميز الطعام خليت ايدي على راسي وعيني على الموبايل من غير ما افتحه ما اعرف شنو انتضر او شنو اريد كانما داطلب المساعده من احد يوكف وياي وكلها ضدي اعرف هالشي

دگت عليه امي وگالت تعال علينا ورجعنا للبيت لان الجهال تعبوا نعسوا

وفعلا غسلت وجهي ورتبت شعري ورحت عليها وصلت لباب الهول مالتهم صحت عليها وگفتلي دموع باب المطبخ وبعيونها الف سؤال هزيتلها براسي وغمضتلها عيوني عود ماكو شي لا يضل بالج واخذت امي والجهال وطلعت واحنا نمشي بالطريق

امي

شنو يمه ضحى درت برادتك وهيج سوت

وسام

اي يمه درت بس انتي من تدخلين سوي روحج ما تدرين اخاف تگلج تدرين وموافقه وتشد وياج وتكهرج وادري بيجن وحده تحب الخ

امي

ولك يمه جوز من هالزواجه ولك ضحى ضفرها بألف مره لا تخرب حياتك يمه خلينا مرتاحين مالنا خلگ مشاكل والله تحبك وتريد رضاك لا تتندم تالي عليها

وسام

يمه ماكو مشاكل وعيونج اني اصفيها بس ارضي عليه وادعيلي والباقي كله يهون كلشي بالبدايه تصير مشاكل بس تالي ياخذ الوضع الطبيعي ويصير عادي لا تهتمين وتعبين فكرج

امي

يمه راضيه عليك ودعيلك بس ما تهون عليه ضحى والله حرام البنيه ماكو منها والجهال خاف يتأذون

وسام

يمه ليش حرام هسه اني زاني لو ناهب يمه زواج على سنة الله ورسوله ما كافر اني بس رحموني اني اصفيها لخاطر الله والجهال شعليهم لا تخافين راح يبقون بحضنج

امي

بكيفك يمه ربي يسعدك وينطيك مرادك

وصلنا للبيت دخلوا الجهال يركضون على غرفة امهم لگوها نايمه رحت كعدت يمها ودخلت امي

امي

يمه ضحى نايمه شخيرج يمه شبيج

ضحى

ما بيه شي تعبانه اريد انام

امي

نامي يمه نوم العوافي اني راح اخذ الجهال وابدللهم واغسللهم وانومهم يمي انتي ارتاحي

ضحى

مشكوره يمه

اخذت امي الجهال وطلعت نمت يمها وخليت وجهي بوجها

وسام

كافي ضواي تدرين بيه ما اگدر على زعلج مشتاقلج

ضحى

وسام انت الهوى الي اتنفسه اترجاك لا تغدر بيه والله ما اتحمل وداعتك اموت

وسام

اسم الله عليج يا عمري شو تعاي بحضني وانسي كلشي وتذكري وسام حبيبج وابن عمج لا تفكرين بشي وبعدين هو شنو صاير باقي قابل طاير منج لا تهتمين متعرفين ربج شنو ضاملنا يمكن باجر اموت

ضحى

لا اسم الله عليك

اخذتها بحضني وبديت ابوسها واشمها صحيح تجاوبت وياي بس حسيتها مكسوره ردت اخفف عنها قهرها مو وكتها اصدمها اصفي اموري وحياتي يالله اگدر اخطي خطوه وبعدين افكر شنو اسوي لان ما اگدر اشيل دموع من فكري وگلبي احبها واعشقها

رحت سبحت وبدلت وهي بقت نايمه كعدت يم امي لگيتها منومه الجهال دايرها وتحجيلهم قصه وهم متونسين وكل ساعه يسألونها ليش وشنو واذا خلصت يگولولها احجيلنا غيرها الى ان داخو ونامو واني نايم على القنفه واگلب بموبايلي شفتهم نامو

امي

هاا يمه شلونها مريتك

وسام

يمه زينه بس قهرتني خطيه

امي

حقها يمه حقها تحبك وفتحت عينهاعليك اعذرها يمه

وسام

عاذرها يمه لا تهتمين

امي

يمه اختك حوراء شويه ضروفها صعبه ورجلها كاعد بلا شغل مر عليها يمه وتسوكلها هي ما تحجي بس مسولفه لخواتك وسمعت منهن

وسام

من عيوني يمه باجر اروحلها وتدلل

كمت من يم امي ورحت نمت يم ضحى ما حسيت اله دگ المنبه للدوام كعدت ضحى حضرتلي ملابسي والريوگ بدلت وتريكت وبوستها من خدها وانطيتها ورقه كتلها هذه خليها يمج يمكن تحتاجين شي

ضحى

الله لا يحرمني منك مشكور

وسام

ويخليج الي حبيبتي

طلعت ورحت للدوام بين الشغل والتعب خلص اليوم ورجعت برجعتي لكيت دموع واكفه براس الشارع وگفتلها هي اجت بسرعه وصعدت

دموع

وسام اريد احجي وياك

وسام

ماشي خلي نطلع من المنطقه ما نبقى هنا

دموع

وسام شنو سويت ويه ضحى

وسام

ماكو شي زعلت ونقهرت وبجت وراضيتها بس خيرتني بينج وبينها

شفتها باوعت عليه كأنما تريد تعرف شنو اختاريت وتنتضر جوابي

دموع

وشنو اختاريت

وسام

اثنينكم اختاركم انتم وحده تكمل الخ اني احبج ومستحيل اتنازل عنج

دموع

تگدر تحل مشاكلك

وسام

انتي بس اقبلي بيه والباقي معليج بيه اني اگدر احل مشاكلي

دموع

اني اجيتك حتى اگولك اني موافقه وانتضرك وادري بيك تحبني كلشي شفته بعيونك

وسام

صدگ وشنو الي غير رايج هيج فجأه

دموع

حسيت بيك وبحبك ألي وانت رجال بمعني الكلمه مو من شباب هالوكت الي ملتهين باللبس والحف وشغلات مالها معنى

وسام

وبس

دموع

وتعجبني وبس

وسام

ههههههه اموت بصراحتج فرحتيني

دموع

يلا رجعني للبيت لا يحسون بغيابي ويسولولي سالفه

وسام

انتي الي ومسؤله مني والي يحجي وياج كلمه وحده اسويه الج اربع وصل

تباوع عليه بعيونها النرجسي واني گلبي راح تمنيت بس ابوسها واشمها

وسام

امشي اوديج للبيت ساحت روحي وانطيني رقمج اريد اخابرج

تبادلنا الارقام ونزلتها مسافه عن بيتهم انتضرتها دخلت للبيت بعدها رحت لبيتي

تلكتني ضحى والجهال گعدنا وتغدينا وطلبت مني العصر تروح تشوف اهلها كتلها من اگعد اوديج نمتلي ساعه وديت ضحى لبيت عمي ورحت تسوگت لاختي حوراء واخذت امي ورحت خطيه طارت بينا وتلگتنا بقينا يمها عالعشى گتلهم لا تسوون شي اني اجيب كباب وصدگ تعشينا وغيرنا واني گاعد يمهم دگ التلفون ضحى

ضحى

الحگ عليه وسام ابنك علاوي نصرع عليه

وتبجي

لحكايتي بقيه 🌸🌸

كلما زادت التعليقات ينزل بارت جديد

#بين_قمرين

همس القوارير

البارت 12 🌸🌸

من خابرتني ضحى وكالت ابنك نصرع وهي تبجي

وسام

اجيتج لا تخبصيني جاي اني لا تبجين

امي

شكو يمه شصاير

وسام

ماكو شي يمه هسه اجي

امي

ولك يمه طاح گلبي شبيهم الجهال

وسام

يمه علاوي مصخن لا يضل بالج هسه اشوفه

عفتها تحجي وطلعت لان حيل شندهت

ما عرفت شلون البس حذائي تكرمون ولا عرفت شلون اسوق بقيت بالي مشدوه وطاير ردت بس اوصل يمهم واطمئن على ابني حتى السياره ودي انزل منها يتهيئلي لو رحت اركض اوصل قبل السياره تعبت من التفكير بس لا صار بأبني شي الف حسبه وحسبه ابالي لحد ما وصلت نزلت اركض

ضحى

الحگلي راح يموت الولد

وسام

صعدي بسرعه دناخذه للمستشفى

صعدت يمي والولد فاقد بأيدها وهي مخليه ايدها على راسه وتقرأ ايات عليه وصلنا الطوارئ مثل المخبل ادور احد يسعفني تلگاني الممرض ودورا على الدكتور الخفر واجه شفته ضربه ابره وخلاله مغذي وبقى مراقب حالته

وسام

شبيه ابني دكتور ليش هيج صار وياه

الدكتور

ابنك عنده التهاب وهذا الالتهاب خله درجة حرارته تصعد بحيث سوت عنده صرع حراري منا ورايح ديرو بالكم منه لان اذا صعدت حرارته مو زين ينصرع مرة الخ

وسام

وحاليا شنو وضعه

الدكتور

حاليا الحمدلله سيطرنا عالوضع ومن يرتاح شوي تگدر تاخذه بس مثل مگتلكم ديروا بالكم من الحراره

💕💕💕💕.........💕💕💕💕

شويه طمئنيا من كلام الدكتور والحمدلله صحى واخذنا ورجعنا بالبيت لكيت امي كاعده بالطارمه هي والجهال تنضرنا وبالها كله يم علاوي وتبجي وتندعي دخلنا وطمناها والحمدلله والشكر كلشي تمام من رجعت من المستشفى دكت عليه دموع اخذت تلفوني وطلعت بره

دموع

هلو وسام شلونك

وسام

يا روح وسام انتي هسه صرت زين من سمعت صوتج

دموع

بشرني عن ابنك سمعت من بيبي مريض وبالمستشفى وضل بالي يمه

وسام

لا الحمدلله احسن ضل بالج بس يمه واني مالي حصه

دموع

هههههه الحصه الكبيره الك

وسام

احبج وعمري محبيت ولا جربت الحب ولا عندي اي علاقه بوحده اول مره اجرب الحب وياج ولج دهورتي احوالي

دموع

يمه منك تريد تفهني انت محاب بحياتك

وسام

وعيونج ما حبيت صح احب ضحى والها مكانه وللعشره الي بينا بس انتي تختلفين طول عمري اخاف من النسوان وحتى من حبيتج ردتج بالحلال عمري ما فكرت بعلاقه لان اخاف من الله

دموع

واني همين ما ادري ليش ارتاحلك واحس بالامان واني وياك بس وسام بيبي مستحيل تقبل بيك لان متزوج وعندك اطفال شلون راح تحلها

وسام

انتي بس ابقي وياي وانتضريني والباقي كله يهون واني متأكد راح يجي يوم وتقبل

دموع

اتمنى هالشي

وسام

اوووف فديت الي يتمناني ولج انتي حلم ولازم احققه عمري ما تمنيت شي وما حصلته وانتي راحة بالي وتعب سنيني احبج واعشقج

دموع

خجلتني يمعود هسه اروح لا تجي بيبي وتشوفني يلا تصبح على خير

وسام

ديري بالج على نفسج وبوسيلي روحج احبج

مرت ايام واحنا على حالنا اخابر دموع بلبوگه لو بالدوام لو واني طالع من البيت واحس ضحى تشك بيه اكثر من قبل والتحقيق مالتها ما يخلص نهائيا وين جنت وين رحت ومنين جاي تلفونك ليش مشغول واليوم شسويت بالدوام ومنو شفت وفلان شيريد منك اوووف اوووف اني شسويت بروحي اسئله الها بدايه مالها نهايه وتحاول تلبس وتدلع وتمكيج وتلعب لعب في سبيل ترضيني وتكسبني يمها ما الومها واتجاوب وياها واحسسها بس هي بحياتي حتى لا اقهرها واحاول ارضيها بكل الطرق مهما يكون هذه زوجتي وبنت عمي وام اولادي بس گلبي وروحي ويه دموع بس بقت حياتنا مستقره ما بيها فد شي

💕💕💕💕..........💕💕💕💕

بقت تلفوناتي ويه دموع گتلها اليوم اجي احجي ويه خالتي بلكت تقبل وفعلا من غير ما احد يحس من اهلي رحت لبيت خالتي دگيت الباب طلعت دموع

وسام

هلا حبيبت گلبي شلونج

دموع

اشششش لا احد يسمعك خالتج جوه خلي انطيها خبر

شويه واجتي گالت تفضل

وسام

شلونج خاله شخبارج

خالتي

الحمدلله يمه بخير انت شلونك امك شلونها عيالك

وسام

كلنا بخير انتي صحتج شلونها

خالتي

والله يمه ما عندي صحه تعبانه

وسام

سلامتج ما عندج اله العافيه وما طول صحتج مو زينه ما ناويه تأمنين على دموع

خزرتني ودنگت تسبح بسبحتها الي كانت بيدها

خالتي

يمه وسام گتلك دموع ما تصلحلك يمه انت ليش تلح اني ما انطيها على شرج اخاف عليها

وسام

وداعتج اخليها بعيوني واذا اجتج يوم ما مرتاحه دعاتبيني

خالتي

صعبه يوم صعبه ما أگدر لا تخليني اخسركم انتم اهلي

وسام

يمه وداعتج ما تخسرين احد بس اقبلي والله فتيتي گلبي هسه انتي مو حبيتي الحجي الله يرحمه والله الحب مينحمل

بقت تباوع عليه وساكته

وسام

خاله فدوه لعينج شنو التردينه لدموع ويضمن حياتها وياي اني مستعد اسويه الج اترجاج وافقي

خالتي

يمه ومرتك شلون حجي هذا

وسام

معليها بمرتي يمه كل وحده منهن بحالها اسويلها الفوك وبيتها لوحدها شنو تردين اني حاضر

خالتي

اني همين داشوف دموع گلبها يمك وما اگدر اقهرهاماشي اقبل بس بشرط

وسام

بس اقبلي والله عيوني الج

خالتي

اريد أضمن مستقبلها وهي يتيمه وما عدها احد اريدك تنطيها 25 مليون مقدم و50 مليون مؤخر

وسام بقيت صافن بوجها

وسام

خاله مو هوايه انتي همين فكري بيه شوي يعني هيج مبلغ شلون ادبره وانتي تعرفين الحال

خالتي

هذا مخلص الكلام وغير هالحجي ما عندي من بعد موافقتها طبعا واذا رفضت الزواج منك كلشي ينتهي يمكن اني غلطانه وتغير رأيها

وسام

لا متغير وان شاءالله اكون گدها وادبر كلشي يلا اني اترخص

سلمت وطلعت من بيت خالتي وما شفت دموع بقيت محتار منين اجيب هيج مبلغ اله ابيع قطعة الارض الي انطتها الي الحكومه بس هذه حلال الجهال شلون اتصرف بيها رجعت للبيت مالي خلگ روحي صاحت عليه ضحى اتعشى گتلها ما اريد تعبان اريد انام ودموع كل شويه داكه عليه وما اجاوبها لان بالبيت طلعت بالحديقه وخابرتها

دموع

وينك حبيبي ضل بالي يمك

وسام

دايخ دموع ما ادري شسوي

دموع

اي اعرف اجتي بيبي وحجت وياي وكالت اجه وسام وطلب ايدج واني قبلت لان اعرف انتي مهتمه بيه حسيت بيج تردينه واني طلبت منه مبلغ كبير ضمان الج ولمستقبلج وادري انتي راح ينشلع گلبج من الشرج ومراح تتحملين فهذا ضمان الج

وسام

والله يا دموع محتار ما اعرف شسوي كل الي عندي عشر ملايين فقط وافكر ابيع قطعة الارض مالتي حتى اكمل المبلغ

دموع

اصبر شوي بلكت تلگه غير حل

وسام

ماكو غير هالحل واني باجر احجي ويه امي واشوف شنو اسوي تعشيتي حبيبتي

دموع

اي حبي هسه اكلت سندويج برگر وببسي

وسام

عافيات يا روحي يلا روحي نامي ولا تدگين عليه بعد لان اني بالبيت

دموع

ماشي حبي هذا الوضع موقت بعدين براحتي

وسام

اكيد حبيبي تصبحين على خير

سديته ورحت تمددت على السرير مالتي اجوي الجهال يلعبون حواليه واني فكري مو يمهم وبالي مشدوه بالمبلغ من وين ادبره ما حسيت على نفسي اله وغفيت اسمع صوت ضحى تصيح على الجهال وتطلعهم وتگلهم عوفو ابوكم نايم يلا امشو نامو نمت واسمع ضحى الصبح تگعدني

ضحى

يلا وسام حبيبي گوم دوام

وسام

اي حبيبتي گعدت

سبحت وتريكت غيرت ملابسي وطلعت للدوام كملت ورحت عرضت الارض مالتي للبيع گلت انتضر كم يوم بلكت ينطوني بيها سعر مناسب لان تعرفون قطع الاراضي مالت الحكومه تكون بعيده عن المركز واسعارهم عاديه مو ذاك المبلغ فگلت انتضر عليها رجعت للبيت وضحى دتسبح الجهال وبس امي بالمطبخ گعدت سولفتلها طلب خالتي

امي

شسالفه سعاد تخبلت شلون تطلب هيج مبلغ وهي تدري املاكنا كلها ورثه وخواتك الهن حصه وبعدين يمه قحط نسوان شجلبت يا يمه ابقى على مريتك دره من الله

وسام

لا يمه راح ابيع الارض مالتي يمه احبها فدوه اروحلج لا تعارضين خليني براحتي

امي

براحتك يمه براحتك هو اني اگدر احجي بس اكول حرامات هذا حلالك وحلال جهالك

وسام

لا يمه ميضيع بوجها

امي

يمه شدعوه هالگد تحبه بحيث راح تهدم حياتك لخاطرها

وسام

ما ادري يمه احس اول مره احب واذا اخسرها اموت

امي

لا يمه اسم الله عليكم ما عدكم غير العافيه

وفعلا مرت الايام وبعت الارض مالتي وكملت فلوسي وبلغت خالتي ان يوم الخميس اجي اخطب دموع وافقت ومبلغه عمامها بهالشي بالبدايه مقبلوا بس بعدين قنعتهم خالتي لان شافت الفلوس كامله وشافتني گد كلامي

وقررت احجي ويه ضحى حتى اروح اخطب دموع وصار الي مجنت محسب حسابه ولا كان ابالي

لحكايتي بقيه 🌸🌸

لا تنسون التعليقات وارائكم بالقصه

#بين_قمرين

همس القوارير

البارت 13🌾🌾

من بعد ما كملت فلوسي وبعت الارض مالتي وقررت اخطب دموع

امي.

يمه الله يسعدك ويفرحك بس خلي يكون بعلمك ما أگدر افارگ الجهال وضحى مهدده تاخذهم وتروح

وسام

لا يمه ضحى حنينه وگلبها طيب وتحبني ما تسويها

امي

براحتك بعد امك ربي يوفقك ويفرحك بس اني گتلك يا يمه

وسام

يمه ماكو اله الخير ان شاءالله

امي

والله مقهوره عليها ساكته وبس تبجي

وسام

اني هم قاهرتني وگلبي يتفطر عليها بس كلشي بالبدايه صعب بعدين كلشي يصير عادي

امي

الله كريم يمه

من رجعت من الدوام داتغدى واجتي ضحى كعدت گبالي

ضحى

وسام ما ادري ليش احس انتم ضامين عني شي اشو دوم كلامكم تبسبس خير شكو

وسام

ههههه لا تبسبس ولا شي اني اصلا اريد احجي وياج موضوع بس خلي اكمل غداي واشرب جاي واحجيلج

ضحى

والله گلبي يلعب

وسام

لا تستعجلين على رزقج خلي اتغدى هسه

🌾🌾🌾🌾.........🌾🌾🌾🌾

وفعلا كملت غداي ورحت لغرفتي جابتلي الجاي واجت گعدت يمي وتباوع عليه تنتضرني احجي واني مغلس مو مغلس بس ما اعرف شلون ابدي ما اريد اقهرها بقت تباوع واني ساكت

ضحى

وسام يعني شلون أجر الكلام منك گوه متحجي مرمرتني

وسام

شوفي حبيبتي انتي مريتي وحبيبتي ونور عيني واني بلياج كلشي ما اسوى انتي وجهالي وامي اغلى من روحي وادري بيج تحبيني ويهمج راحتي

ضحى

ورى هالمقدمه شنو گلبي يلعب

وسام

من غير لف ولا دوران ضحى اني احب دموع واريد اتزوجها وانت تبقين بمكانتج وبحبج

ضحى

😨😨😨😨مستحيل انت متگدر تسوي بيه هيج وسام اترجاك اني ما اريد اخسرك انت وعمتي وسام لخاطر الله اترجاك ابوس ايدك لا تأذيني وربي ما اتحمل ما أگدر وسام

لزمتها من وجها وحضنتها

وسام

والله مراح يتغير شي انتي تبقين مثل ما انتي

ضحى

وسام لخاطر جهالك ااترجاك

وسام

ضحى وعيونج مكانتج مثل ماهي

ضحى

يعني انت مصمم على دموع

لا تخسرنا وسام

وسام

ما اخسر شي يا روحي انتي ومستحيل اتراجع اترجاج وافقي انتي همي الكبير كل تفكيري انتي

دفعتني وبقت تبجي وتحجي بصياح

ضحى

انت ما تحبني ولا تريدني ولا الي خاطر عندك لا اني ولا الجهال لو كان اكو ذرة حب بداخلك ما تأذيني انت راح تدمرني اني فتحت عيني عليك وصرت روحي وحياتي وكلشي بدنيتي صنتك وصنت عرضك وفلوسك وبيتك گلي بشنو قصرت وسام احجي

وسام

والله ما انكر بنت عمي وعلى العين والراس واحبج والله

ضحى

وسام لا تحلف انت اناني تحب بس نفسك راح انطيك اخر فرصه وسام تتراجع بيها يوم الي تخطب بيها دموع تطلگني ما ابقى عندك فهمت لو لا والله احرمك من جهالك

وسام

مو بكيفج وطلاگ ما اطلك افتهمتي لو لا انتي مو تحبيني

ضحى

احبك واموت عليك بس من توصل لحقوقي راح اراويك وجهي الثاني

وسام

شتردين تسوين سوي واني خلاص الخميس خطبتي

ضلت تدگ على روحها وراسها وتلطم اجت امي مخترعه من صريخها

امي

يمه ضحى استهدي بالرحمن ولج يمه محد يفيدج صحتج هاي

ضحى

عمه تدرين شيريد يسوي وقابله عمه اشوفج ساكته

امي

لا والله يمه ما اقبل عليج انتي بنيتي وشگد حجيت وزعلت وياه اسأليه يمه بس رجلج وتعرفينه الي براسه براسه

ضحى

وهسه تردوني ارضى مو والله لو اموت اسمعني وسام لو اني وجهالك لو دموع ولا تلوموني بلي راح اسويه ولك والله حرامات التعب وياك اوووف بويه انوليت بويه ليش ما اخذتني وياك ولا خليتني بيد الضلام

عفتها تحجي وتصيح وتبجي وطلعت

🌾🌾🌾🌾..........🌾🌾🌾🌾

اني ادري اذيتها بذاك اليوم وقهرتها ومگدرت اتحمل اشوفها بهيج منضر ولا اگدر اتراجع لان ما صدگت يقبلون فلذلك عفتها وطلعت من البيت رحت لبيت صديقي رافد الي دائما اروح يمه بأزمتي اكثر من اخ بالنسبه ألي

حجيتله كلشي

رافد

وسام لا تستعجل انصحك ترجع لبيتك وجهالك ولا تورط نفسك صدگني راح تندم لان النسوان مشاكلهم ما تنتهي ومراح ترتاح

وسام

لا يا خوي اني اگدر اضبط نسواني وراح تشوف هههه بس انت سويها وصير بطل مثلي

رافد

هههه لا عمي لا بطل ولا بطيخ خليني على مريتي احسلي شلي بدوخت الراس راح تشيب من وكت

المهم بقيت يمه للمغرب ورجعت للبيت لگيت البيت هدوء وضحى كاعده تسوي عشى للجهال دخلت سلمت ما ردت عود زعلانه بيني وبين نفسي الحمدلله والشكر ما طلعت رحت گعدت يم امي بغرفتها

وسام

ها يمه شلونج

امي

هلا بيك بعد امك تعال اگعد يمي

وسام

يمه شنو صار ورى ما طلعت منو اجانا منو راح شنو سوت ضحى

امي

يمه متت من القهر عليها بقت تبجي وتندب حضها وبعدين كامت سبحت الجهال وبدللتهم وبقت بغرفتها ما طلعت قريب ساعتين وبعدين طلعت هيج مثل ما تشوفها

وسام

اها. يعني ما خابرت بيت عمي وگالتلهم

امي

لا ما سمعتها خابرت ولا حجت

وسام

الحمدلله يعني ماكو شي

امي

يمه خطيه مريتك لا تخسرها ولك يمه تراجع ما طولك عالبر

وسام

يمه رحمه لموتاج عوفيني ولا تلحين خليني مرتاح من جهه والله مالي خلگ

امي

كيفك يمه كيفك هو اني احل لو اربط كلشي بكيفكم ياريت ترجعون جهال مثل قبل واتحكم بيكم قبل جنت اگول يمته يكبرون ويشيلون همي وارتاح اشو كلما تكبرون يكبر همكم وياكم ولا واحد منكم ياخذ حجايتي كلمن بكيفه

وسام

انتي الخير والبركه ام وسام فدوه لعينج

وبوست ايديها وراسها ورحت لغرفتي تمددت بفراشي اجاني ابني

باقر

گلي بابا تريد عشى

وسام

لا بابا ما اريد امك وين

باقر

بالمطبخ بابا

انتضرت ساعه تقريبا وتالي اجت نامت يمي وانطتني ضهرها عود متحجي وياي تقربت عليها وحضنتها من ورى شفتها غمضت عيونها وجرت حسره

وسام

راح تبقين زعلانه مني

ضحى

ويهمك زعلي

وسام

طبعا يهمني مو مرتي وحبيبتي

ضحى

لا والله لا اني مرتك ولا حبيبتك الي يحب ميئذي الي يحبه

وسام

ما اگدر اتراجع

ضحى

تگدر بس انت متريد وسام اني گتلك وانت اختار لو هي لو احنا وهالمره ما منها رجعه صدگني

وسام

لا متعوفيني اني اعرف

ضحى

ذاك اول هسه الوضع اختلف وضحى تغيرت

وسام

مستحيل ضحى تتغير اشو افتري عليه وخليني اضمج حيل

وفعلا حضنتها وتجاوبت وياي كانما شي لم يكن وكلشي طبيعي

ثاني يوم گعدت الصبح رحت للدوام ومن الدوام رحت لبيت خالتي واتفقت وياهم على كولشي وشفت دموع وحجيت وياها

وسام

محتاجه شي حبيبي شنو الي تتمنيه راح اقدمه الج وراح تعيشين اميره

دموع

ياااي اموت عليك اي اريد فستان حيل عاجبني اريد اشتريه للحفله مالتي واريد وياه مستلزمات حجاب وجنطه وحذاء تكرمون واكسسوارات و

وسام

لحضه لا تعددين شكد تردين حبيبتي

دموع

حبيبي اريد خمسميه و١٥٠ للصالون يعني 650

وسام

مو هوايه حبي

دموع

لا حبيبي مو هواي شنو اني ما استاهل

وسام

تستاهلين يروحي لو ما تستاهلين ما بعت الدنيا علمودج خلاص العصر يصيرن يمج واشتري الي يعجبج

دموع

شكرا حبيبي وراح اعزم كل صديقاتي واسوي حفله كبيره واو كلش فرحانه

بقينا نسولف على الاحتياجات والحفله حسيتها طفله وفرحانه وهي تعدد وتطلب ما حبيت اكسر خاطرها او فرحتها احبها واعشقها وما متندم لان طلبتها ولزموني عالغدى بس ما تغديت رحت للبيت اول ما دخلت

ضحى

وسام وين كنت متاخر اليوم

وسام

جان عندي شغل

ضحى

اتمنى اصدگ

خزرتها وعفتها ورحت اسبح وابدل ملابسي هيج مرت يومين عالخميس بيوم الخميس خلاص يوم الخطبه نويت اخطب بعد كلشي انتهى وراح تصير دموع من نصيبي وضحى اووف يا ضحى صدگ كاسره خاطري وفرحتي معقوله بوكتها هيج جنت اناني ومفكرت بيها اني ما انلام ما عشت حياتي مثل باقي الشباب دموع اول حب بحياتي امي زوجتي واني صغير وهي هاي النتيجه اه منك يا زمن

لحكايتي بقيه 🌾🌾

لا تنسون التعليقات كلما زادت نزل، البارت. الثاني من وكت فديتكم

#بين_قمرين

همس القوارير

البارت 14 ☀☀

يوم الخميس واليوم هو خطبتي وكنت طاير من الفرحه عبالك اول مره اخطب او اتزوج ما داريت مشاعرها نسيت نفسي والضحكه ما فارگت وجهي اي اناني يمكن جنت وقتها اناني بس من انتبه عليها اغير مزاجي واسوي نفسي ضايج قبل يوم عزمت كل خواتي ونسابتي واصدقائي ولد عمي الباقين بس الغريب بالموضوع اهل ضحى ما علقوا ولا عاتبوا ولا حجو وياي قبل الخطبه بيومين وديت على اخو ضحى الكبير صافي

وسام

خويه بعد انت تعرف واني ما أگدر اخليكم ورى ضهري لازم اگلگم ومرتي اختكم وانتم على عيني وراسي وانتم اخواني واحبكم

صافي

استعجلت يا خوي بلغتنا ضحى وكالت ما اريد اي واحد منكم يدخل او يحجي بالموضوع اني وزوجي واني اتصرف وياه مهما يصير ويدور بينا ما اريدكم تدخلون وبصراحه احترمنا القرار مالتها هذه حياتها وهي حره بيها ربي يهدي سركم

وسام

اي مو اگول ما اجيتوا ولا حجيتو وياي وانتم اعرفكم ما ترضون عليها مهما يكون اختكم

صافي

اي صح بس هذه كانت رغبتها واحترمنا قرارها وبعدين انت رجال وفاهم وتعرف مصلحتك مو طفل حتى نوجهم هذه حياتك وانت الي اختاريتها

بصراحه كبرت بعيني اكثر لان ما دخلت اخوانها اووف يا ضحى عمري ما شفت منج شي مو زين كل هذا ديخلي ضميري يأنبني اكثر واكثر

بيوم الخطبه يوم الخميس

ضحى

خلاص وسام بعد نويت تخطب وعزمت خواتك واهلك كلهم ومالي خاطر عندك

وسام

خاطرج عالعين والراس وانتي تدرين احبج بس همين احب دموع

ضحى

ضحيت بيه علمودها واختاريتها هي لان اني خيرتك بيني وبينها خلاص وسام كلشي انتهى

وسام

ما انتهى شي واني ما اختاريتها او فضلتها عليج بس احبكم اثنينكم وحده تكمل الخ ما اكدر اترك وحده منكم

ضحى

لا وسام الگلب ميشيل اثنين الگلب يدگ لوحده منا وگلبك دگ لدموع واني عرفت قيمتي ومكانتي عندك خلاص لهنا حدي وياك وكلشي انتهى انطيتك فرصه وانت ما استغليتها اعذرني بعد اني اروح لبيت اهلي

وسام

روحي زياره ورجعي حتى ترتاحين اعرف الامور صعبه عليج يومين واجي اخذج وراح ترجعين لبيتج ولجهالج وألي

ضحى

بس اذا رجعت ما اضمنلك راح ابقى نفسها ضحى يمكن راح تتفاجئ بيه

وسام بستها من خدها

مستحيل ضحى تتغير طول عمرها بالها وسيع وگلبها طيب وتحبني

ضحى

لان احبك راح اتغير وسام على العموم هسه اروح لهلي والله كريم لكل حادث حديث

☀☀☀☀...........☀☀☀☀

وفعلا بدلت واخذت اغراضها والجهال وراحت لبيت اهلها صدگ وكتها نقهرت عليها ونكسرت فرحتي بذاك اليوم اخذت اغراضها والجهال وراحت واتفقت وياها يومين ترتاح واجي اخذها لان مجرد ترتاح نفسيتها اعرفها صعبه عليه مو سهله المراه تتحمل هيج موقف

نجمعت خواتي وامي وولد عمي واصدقائي بالبيت واجواء الفرح غامرتنا من كل مكان

ورحنا على بيت دموع وصارت الخطبه ودخلت البسها الحلقه وگلاده واساور وتراجي دخلت بين الناس وشفتها طالعه مثل الاميره ايه من الجمال لابسه بدله ماروني وهي بيضه بقيت صافن عليها گعدت يمها وگامت الهلاهل والافراح لبستها حلقتها واباوع بعيونها واخيرا صرتي ألي لبستها الگلاده

وسام

اوف ودي اخطفج واطير بيج يا روحي

دموع

خجلتني حبيبي

وسام

غير اموت على خجلج

كعدنا وكملنا مراسيم الحفله والكل جان فرحان ومكيف بينا بعد مخلصت الحفله الكل راحت واصرت خالتي ابقى يمهم عالعشى بقينا اني وامي وگعدنا وسولفنا بعدها عافونا لوحدنا بالاستقبال

وسام

لج تعاي لحضني مشتاقلج

دموع

مااا اخجل وسام شنو هاي

وسام

لج يا خجل اليوم طالعه ملكه

حضنتها من خصرها وقربتها عليه وبديت اشم برگبتها وبشعرها بعدها بستها من خدها

وسام

احبج واريد اضمج بروحي اريد شي يطفي نار اشتياقي گوليلي شسويلج

خليت راسي على راسها وحاضنها

دموع

هالگد تحبني واني ما ادري

وسام

اوووف كلمه احبج قليله گولي اعشقج گولي اموت عليج اليوم احس اني اسعد انسان بالدنيا اتمنى اخذج هسه واروح بيج لاخر الدنيا

دموع

يا بختي والله واني همين احس كلش فرحانه وسعيده ودي اطير وياك ههههه

بستها من راسها ومن خدها ومن شفتها واحس بعدني عطشان مدارتوي منها احبها واخيرا تحقق حلمي ومناي وصارت من نصيبي واحنا مندمجين ودگت خالتي الباب گالت يلا تعالو تعشوا راحت دموع غيرت ملابسها لبست گلابيه وبقت بمكياجها بس شمرت حجاب على راسها لان ولد عمها گاعدين (الكاتبه همس القوارير) اجت كعدت يمي وتعشينا وكل شويه اشوفها ممصدگ كملنا عشى وگعدنا وسولفنا وضحكنا وبعدها اخذت امي ورجعنا

امي

الف مبروك يوم تتهنى وليدي

وسام

ويبارك بعمرج يا تاج راسي

امي

يمه متروح على ضحى تجيبها اليوم

وسام

لا يمه خليها ترتاح كتلها يومين واجي عليج

امي

وسام يمه اشو وضع ضحى ما عاجبني اشوفها ساكته يمه وما تحجي بس تبجي يمه خايفه عليها تتمرض السكته مو زينه

وسام

لا يمه ضحى عاقله ومؤدبه وتحترم سكتت لان متحب تتجاوز على احد وشافتنا قابلين فرضت بالامر والواقع

امي

اتمنى هالشي يمه بس خايفه من سكتتها يمه اذا سوتها وحرمتنا من الجهال ما اسامحك

وسام

لا يمه شسالفه وين عايشين شو احنا الباب بالباب شنو تحرمنا هذا مو حجي عوفيها السالفه وخليني متونس فدوه لعينج

رجعنا للبيت ودخلت گبل لغرفتي سبحت وبدلت ونمت عالسرير وبديت اخابر دموع واسولف وياها للفجر اووف شسويتي بيه يا دموع رجعتيني مراهق احساس اول مره اعيشه واحسه

☀☀☀☀........☀☀☀☀

گعدت الصبح متاخر لان ماخذ اجازه يومين لان خطوبتي خابرت على ضحى مغلق رجعت دگيت هم مغلق اووف هي هيج دومها تخلي الموبايل بيد الجهال ويخلصون شحنه وتنساه العصر امر عليهم واشوفهم دزتلي دموع رساله

دموع

صباح الخير يا روحي انت

وسام

صباح النور والجمال على عيونج الحلوه

دموع

وين انت گلبي

وسام

بالبيت حبيبتي

دموع

والحيزبونه يمك مو

وسام

ههههههه ضحكتيني قصدج ضحى

دموع

اي ضحى اكو غيرها

وسام

شوفي حبيبتي هذه ام جهالي وزوجتي وما احب تتجاوزين عليها من البدايه انتي لوحد وهي لوحد انتي راح اعزل القاط الفوك مالت البيت وتبقين فوك وهي جوه يعني مو يمج اذا تحبيني لا كل ساعه تجيبين طاريها وتحجين عليها ترى ما ارضى عليها

دموع

شدعوه هيج اتأثرت اني شحجيت بس لان احبك واغار عليك هيج گلت ما اريد غيري بحياتك

وسام

يا روحي انتي حياتي كلها لازم تعرفين بيه كلش احبج واحب خاطرج وتعرفين مكانتج عندي ماكو احد يأثر عليج هم بحالهم وانتي لوحدج دنيتي

دموه

ماشي حبي اسفه فدوه لگلبك

وسام

حبيبتي خلي ابالج عرسنا بعد اسبوعين راح اجهز الفوك واشتريلج غرفه ونكمل كلشي

دموع

لا حبيبي والله ما الحگ هاي شبيك ليش هيج مستعجل

وسام

اوووف دموع والله ما اگدر اصبر اسبوعين كافي خلاص جهزي نفسج

دموع

اوكي ماشي حبيبي

وبقينا نسولف حبيات وغرام وما حسيت عالوقت گمت صليت وتغديت ويه امي وكعدنا نسولف من صار العصر

وسام

يمه راح اروح اجيب ضحى لان ادگ عليها مغلق

امي

اي يمه زين تسوي فدوه لعينك بالي يم الجهال

وسام

شبيج يمه عالجهال اول مره يرحون لبيت جدهم هذا هو فرق بيتين عنا

امي

لا يمه يعنون عليه وداعتك البيت موحش بلياهم تعلمت على علاوي يكعدني من الصبح فدوه لريحته حبيبي

وسام

هااا. يمه صاروا جهالي اعز مني منو ترى اني اغار

امي

ههههه اي يمه ما سامع اعز من الولد ولد الولد

وسام

يلا اني اروح اجيبهم و شبعي بيهم مع السلامه

طلعت ورحت لبيت عمي دگيت الباب طلعلي صافي ابن عمي

وسام

شلونك خويه شخبارك

صافي

هلا بيك خويه تفضل خويه

وسام

مشكور خويه بس اجيت اشوف ضحى والجهال لان جهازها مغلق من البارحه وضل بالي عليهم

صافي

والله وسام ما ادري شگلك مستحي منك

وسام

خير خويه الجهال بيهم شي طمني

لحكايتي بقيه ☀☀

#بين_قمرين

الكاتبه همس القوارير

البارت 15 🌿🌿

من رحت لبيت عمي اسأل على ضحى والجهال استغربت من رد صافي ابن عمي

صافي

والله وسام ما ادري شگلك مستحي منك

وسام

خير خويه الجهال بيهم شي

صافي

لا خويه كلهم بخير وسلامه كلشي ما بيهم بس ضحى

وسام

شبيها ضحى بعدها زعلانه

صافي

خويه ضحى بعد ما تريد تشوفك وتريد تطلگ وتگول جهاله موجودين ما احرمهم من ابوهم بس اني بعد ما اريده خلاص طابت نفسي منه

وسام

شنو بكيفها خو ما بكيفها صيحها اريد احجي وياها

صافي

ما موجوده خويه اخذت الجهال وسافرت للزياره كم يوم تغير جو

وسام

شلون تسافر بدون متکلي وشلون اخذت الجهال وراحت من غير ما اشوفهم

صافي

وسام بصراحه من يوم الي خطبت بيه وضحى مو هي ضحى تغيرت كأنما اول مره اعرفها كلشي الي تريده وتسويه برأيها هي ومتاخذ نصيحة احد شگد حجينا وياها وفهمناها الي تسويه غلط بس ماكو الي براسها براسها كأنما تحجي ويه حجر واحنا مخلينها بكيفها لان نفسيتها تعبانه وما نگدر نضغط عليها والله مجانت هيج جانت حبابه وكلمتنا هي الماشيه بس حيل متأثره وسام ضحى مو هي ضحى

وسام

وهسه هي وين

صافي

والله راحوا للزياره هي وامي واخوي حالياً بالنجف مو مشكله خليها تغير جو وترتاح يمكن ترجع متغيره شوي ومتقبله الوضع ويصبرون على گلبها الله يساعدها نار وشابه بروحها مو شويه عليها

وسام

الله كريم خويه وهم يخابرونكم هم بخير مرتاحين

صافي

لا تخاف عليهم زينين ومتونسين وان شاءالله فد يومين ويرجعون

وسام

ماشي خويه عود طمني عليهم ومن يجون انطيني خبر

🌿🌿🌿🌿..........🌿🌿🌿🌿

طلعت من بيت عمي مستغرب حيل من تصرف ضحى عمرها ما گالتلي لا او طلعت من شوري هاي اول مره بحياتها تسويها وتطلع من غير متگلي ومو طلعه هذه رايحه للزياره احجي بيني وبين نفسي معقوله فعلا تغيرت وبعد ما تريدني معقوله اكون جرحتها لهلدرجه الي تنسى بيها كلشي حتى الشي المتعوده عليه يمكن اشوفه شي عادي بالنسبه الي بس الها جرح كبير يمكن من احجيلها واگوللها احبج وما اتغير عليج ما تصدگني بس فعلا اني هيج ناوي اعدل بينهم واخليها مثل قيمتها وكرامتها واكثر يمكن هي متشوف الي اني دأشوفه وتنضر بنضرة الغيره والكرامه بالرغم من كرامتها محفوضه صحيح اني فد مره قارئ عن برجها الحمل ان هي اذا حبت تحب بكل جوارحها وتنطي حبيبها من روحها ومن تنغدر اول شي تفكر بيه كرامتها هي هيج فعلا صفات ضحى غريب والله غريب هيج تغيرها

وصلت لبيتنا گعدت يم امي

امي

شبيك يمه وجهك مغيم

وسام

سلامتج يمه بس مستغرب من ضحى

امي

ليش يمه شبيهم ضحى والجهال

وسام

لا يمه ماكو شي بس استغربت منها لان ماخذه الجهال ورايحه للزياره من غير متكلي

ما گلت لامي تريد تتطلگ گلت تضوج وتضل تفكر واصلا من ترجع من الزياره ناوي ارجعها مو بكيفها

امي

شافتك ملتهي يوم ميخالف مجروحه ومكسوره خليها تروح وترتاح وترمي حمولها يم اهل البيت اتذكر يمه ابوك من گالي اريد اتزوج علمود يصير عندي ولد لو تعرف يا وسام شصار بيه احترگت حرگ وهددته وگتله بس تدخل المره منا انه احرگ روحي منا وانت بكيفك ههههه يمه الشرج ما ينحمل متشوفني ما قبلت على زواجك على ضحى لان حسيت بيها اعذرها يمه مسكينه

وسام

لا يمه ادري بيها خليها براحتها خليها ترتاح محجيت وياها شي بالعكس بس مستغرب لان مكالت بس

🌿🌿🌿🌿..........🌿🌿🌿🌿

بقيت يومي كله ضايج وقلق ودموع كل شوي تدزلي مسج احبك واموت عليك واني من اشوف مسجاتها روحي ترد ألي وما تندمت وتمسكت بيها اكثر بليل نتخابر للفجر وبالنهار مسجات ابد ما حسستني بفراغ بالعكس تمنيت ماخذها من زمان واولادي منها ادگ على ضحى بعده مغلق اخابر على صافي واسمع اخبارهم منه يگلي زينين ومرتاحين وراح يجون تدرون الصدگ بديت اشتاقلها اشتاق لضحى اكثر من الجهال ادخل للغرفه مكانها فارغ وفراشي بارد اضل اتگلب الليل كله تمنيتها يمي صحيح احجي ويه دموع ومتونس بيها بس مجرد ما اسد التلفون ضحى گبال عيني واضل افكر بيها وشلون ارضيها

بقوا تقريبا اسبوع بالزياره واني مسامع صوتها ولا شايفها قبل ما تجي بيوم كنت داحجي ويه دموع

دموع

وسام شبيك مو على بعضك داحس بيك مالك خلگ

وسام

والله تعبان مشتاق حيل للجهال من خطبتنا واني مشايفهم احس روحي يمهم

دموع

اخاف اشتاقيت لضحى

وسام

وشنو يعني واذا اشتاقلها حرام

دموع

وسام ترى ما اتحمل والله احبك واريدك بس ألي ما اكدر اتقبلها

وسام

حبيبتي المفروض انتي متغارين منها لان اني حبيتج واختاريتج انتي وفضلتج عليها هي الي لازم تغار مو انتي

دموع

احبك وسام والله ومن حقي تكون ألي

وسام

صدگيني دموع من نتزوج مراح تحسين اكو وحده ثانيه بحياتنا راح اكون الج وبس هيج راح تحسين

دموع

ياااي حبيبي اتمنى هالشي واعرف بيك انت حنون وطيب وما تكسر خاطري لان اني يتيمه وما عندي غيرك بالدنيا من تكسرني محد ألي اضيع

وسام

لا يا روحي لا تحجين هالكلام اني احبج ومستحيل اكسرج اني اهلج وناسج وكل حياتج احبج واموت عليج يا احلى شي بدنيتي

ليليه كلامنا حب وغزل وانام على نغماتها وصوتها اعشقها ومره رحت شفتها لگيتها لابسه برموده تركواز وخاله مكياج وفاتحه شعرها دخت وذبت عليها من دخلت وسلمت كانت خالتي گاعده وبعدها عافتنا لوحدنا وراحت جابتلنا كيك وعصير وطلعت

وسام

خرررب والله راح اقضي عليج شو تعالي گعدي بحضني

دموع

ههههه لا وسام اخجل

وسام

واني اعشق اليخجل واذوب باليخجل

جريتها وگعدتها بحضني واشم وابوس بكل مكان بوجها وبرگبتها وهي متجاوبه وياي وذابت بين ايديه تالي متحملت گتلها

وسام

گومي لا اسوي جريمه

دموع

مو گلنا انت مو گدي ومتخذ بيدي غلوه

وسام

اووف لج انتي تدمرين اكبر واحد مداتحملج

دموع

هههههه لعد خاي اروح ابدل واغير مكياجي وارجع لان لعبت بيه طوبه

وسام

روحي عيني روحي بس بعد لا تتقربين يمي ابتلي بيج ترى

دموع

ماشي وغمزتلي

اوووف يا بنت احمد شراح تلعبين بحوالي ولج اعشق حتى سوالفج واحبج بقيت تعشيت يمهم وسوالف ويه بيت خالتي وعبالك صرت واحد من البيت افتر براحتي بدون تقييد وگتلهم الاسبوع الجاي زواجنا لان مكمل كلشي وبقيت تقريبا عدهم للوحده بليل ورجعت لبيتنا ومثل كل مره حياتي حلوه حيل بوجود دموع وطبيعيه وبالنسبه لضحى لحد الان متقبل تحجي وياي وراها تقريبا بيوم جنت گاعد بالحديقه اقلم اوراقها ودگ موبايلي شفته صافي

وسام

هلا بيك خويه شلونك

صافي

هلا وسام شخبارك

وسام

شنو اخبار ضحى والجهال

صافي

وسام ضحى من البارحه اجت ومقبلت نبلغك بهالشي وهسه اني گتلك من وراها لان متدري

وسام

ليش يعني هي دتعاند لو شنو الشي الي تريد توصله بالضبط

صافي

والله ما اعرف وسام لا تخلينا نحجي ولا ننصحها ومن نحجي وياها تگول اذا مليتوا مني أجر بيت واطلع منا

وسام

يعني بعدها مصره ما ترجع

صافي

اي والله كلش مصره يمكن من تحجي وياها انت تقنعها وترجع لبيتها ترى وربي كاسره گلبي هالضحى مكسوره حيل وراحت ضحكتها حتى من مات ابوي مو هيج حالتها

وسام

لا تهتم يا خوي والله اني هم مقهور عليها ومقدر مشاعرها اليوم اجي المغرب واحجي وياها ومشكور يا صافي والله من غيرك انت اني اضيع

صافي

والله انت اخوي وما اريد اخسرك صدگ كاسره خاطري ضحى ولو احد غيرك مأذيها جان شربت من دمه بس انت ما اريد اخسرك

وسام

تسلم يالغالي ان شاءالله مصار شي وترجع وكلشي ينتهي واني اخوكم

صافي

ان شاءالله

ليش هيج تتصرف شنو قصدها وشتريد معقوله صدگ كرهتني لا مستحيل جانت تگلي انت اغلى من جهالي عندي وادري بيها تحبني وتريدني شغيرها لهالدرجه بقيت فاير بدمي وما اعرف شلون ارضيها مشتاقلها وخفت لا اخسرها ضحى روحي ودموع كياني ما اگدر اتخلى عن وحده منهم ما سولفت لامي بس تشوفني مقهور وساكت وتسئلني واگلها اشتاقيت للجهال منا للعصر ما تحملت گلت اروح اشوفهم متت على شوفتهم سبحت ولبست تراك ورحت لبيت عمي اقابل ضحى لازم افتهم شسالفه متصير نبقى معلگين الله يهديها عليه

لحكايتي بقيه 🌿🌿