بين قمرين

6 و 7 و8 و9و 10

#بين_قمرين

همس القوارير

البارت 6🌸

اني دموع اتمنى ما نسيتوني

من بدى يجينا وسام ابن اختها لبيبي وانه حاسه بنضراته مختلفه ما اعرف شلون اوصفها احسه معجب بيه كل بنيه اذا نضرلها شاب غير نضره راح تحس بيها اكيد بس وسام نضراته تختلف بيني وبين نفسي مستحيل افكر بيه لا اني من النوع الي ما أومن بالحب ولا احب اجربه ما اثق بأي بشر واهم شي بحياتي اكمل دراستي واخذ شهاده تنفعني من كانوا عدنا هو وأمه وهو راح يغسل طفت الكهرباء بيبي گالت اخذي اللايت وضويله خطيه اخذت الايت ورحت يمه داضويله اشو هذا من خلص تغسيل بدى يحجي وياي بعدها بدى يتقرب عليه انه تفاجئت شبيه هذا تخبل باوعت عليه تقرب اكثر عفته ورحت لغرفه بيبي وقفلت الباب وگفت ورى الباب حسيت گلبي راد ينط من مكانه من الخوف هذا شنو يفكر اكيد يريد يلعب عليه متزوج وعنده جهال اكيد نيته سوء عشم ابليس بالجنه اني دموع ومو كل طير ينوكل لحمه لالا لازم يوگف عند حده مو اني الي يضحك عليه لا هو ولا غيره لا يحلم بقيت هيج افكر واحجي ويه نفسي الى ان راحوا بس بقيت كلش حذره من تصرفاتي بس اني شنو الي بدر مني عامود هيج يفكر كل ساعه اتمناهم يرحون لان حيل ضجت منهم حاولت اتجنب ما اگعد يمهم بس بيبي كل شوي وصاحت عليه كلما ارفع عيني داشوفه يباوع عليه هذا شيريد مني بالضبط من راحو رجعت طبيعيه وارتاحيت شوي وراح القلق والخوف مني اول مره اتخلى بهيج موقف

وسام

ثاني يوم رجعت من الدوام ورحت على ضحى اجيبها دخلت بيت عمي وگعدت وصحت لضحى

وسام

يلا ضحى حضري جهالج خلي نروح

ضحى

لا وسام الله يخليك خلي ابقى اليوم وباجر تعال عليه

وسام

لا هسه تجين مشتاقلج ومشتاق للجهال البيت محلو من غيركم

ضحى

حباب بس اليوم باجر نجي

وسام

گتلج حضري روحج وتعاي كافي يلا انطيتج مجال امشي احسلج

ضحى

شبيك وسام شصاير اشو مالك خلگ

وسام

تعبان من الشغل يلا تحضري

راحت تجيب الجهال وغراضها لازم اسوي هيج لازم ترجع للبيت لازم ما اخلي عندي فراغ لازم التهي ارجعها للبيت حتى لا احس بفراغ لازم اضحي لخاطرها ولخاطر الجهال ما انكر الها معزه وحب بگلبي بس ويه دموع عبالك داعيش مراهقتي الي ما عشتها ولا حسيت بيها

كملت ورجعت للبيت دخلوا الجهال يركضون على امي ويبوسونها

امي

هلا هلا بسورها وبنورها توه نور البيت يا بعد اهلي

وسام

هذا الحب كله لشواذي هذول واني راحت عليه

امي

هههههه لا يمه انت الروح والريه بس مثل ما يگولون اعز من الولد ولد الولد اگولك يمه باجر خواتك كلهن هنا وما عدنا مسواگ

وسام

هلا بيهم ومرحبا گليلي شنو تردين وانه اجيب من السوگ يستاهلن البنات انه راح اطلع عود خلي ضحى دزلي رساله شوف شتردون

طلعت رحت يم ولد صديقي عدنان من الابتدائيه بيتهم جان يم بيتنا بس بعدين شالو من يمنا اخذت سيارتي ورحت يمه استقبلني وگعدنا سوه نسولف وشكيتله حالتي

🍁🍁🍁🍁.........🍁🍁🍁🍁

عدنان

وسام لا تضيع حالك هذا اعجاب ونزوه صدگني مرتك وجهالك اولى بيك

وسام

ادري والله ادري وهذا الحجي كوله مفكر بيه بس ما اگدر اشيلها من بالي من اشوفها اتمنى اباوع عليها وما اشيل عيوني گلبي تزيد دگاته احس لمعه بعيوني وفرحه حاولت اتجنب هالشي وابتعد اخر مره من شفتها ما گدرت اقاوم تمنيت احضنها

عدنان

لا يا خوي فكر بجهالك وهاي مرتك بنت عمك تعودت عليها وعلى طبعها وممقصره وياك بالعكس شايلتك بالصلوات بعد شتريد

وسام

اي صحيح احاول وافكر ابتعد بگد ما أگدر راح اضحي لعيونهم وابقى اتجنبها الى ان انساها

عدنان

اي بعد اخوك عندك خير من الله لا تضيع الاول والتالي

وسام

لا يمعود مرتي وجهالي اولا وبعدين افكر بنفسي اني اروح وراي مسواگ

طلعت من عدنان اجر حسرات وقهر خلاص ابتعد قراري الاخير رحت للسوك جبت مسواگ للبيت دجاج ولحم وباميا ومخضر مخليت شي بعد الحجيه اذا التمن بناتها عبالك عدها عيد

اجيت هلكان التموا عليه الجهال واحد يجيبلي مي وواحد يمرخ برجلي اله علوش صاعد على گلبي ويتشرط ويلعب بشعري ومحد يتقربله اله الصلاحيه بكلشي

مر اليوم طبيعي وما فكرت بدموع التهيت بالجهال وبالبيت واكو شغلات رتبتها بالبيت والحديقه اني احبها للحديقه بس جهالي دوم يخربون بيها واعيط عليهم وارجع ارتبها اريد شي يلهيني وميخليني افكر

ثاني يوم اجن خواتي كلهن ورجالهن وجهالهن بحيت البيت صار عباره عن مهرجان بس ماكو احلى من لمتهم وگعدتهم وسوالفهم الحلوه بقن قسم من البنات باتن والباقي راحوا بليل دنتعشى ونسمع باب البيت ينضرب حيل واخو ضحى ابن عمي يصرخ ويبجي الحگوني ابوي وگع ومحد بلبيت

ضحى گامت تدگ على وجها وتصرخ وخواتي يلزمن بيها اني اخذت نسيبي ابراهيم ورحت عليهم خطيه جاب السياره وراي رحت لگيت عمي واگع ووجهه اصفر ويشخر شلناه بسرعه للمستشفى اني وونسيبي وابنه وصلنه نزلناه للطوارئ اخذوه بالسديه يركضون ردت ادخل وياه ما خلوني بقينا برى ننتضر والتلفونات احترگت علينا واحنا ما نعرف شنو بيه اجوي ولده الباقين

صافي

وسام شنو شبيه ابوي مگال الدكتور

وسام

خير ان شاءالله لا يضل بالك بس ادعوله بعده مطلع الدكتور

صافي

يارب ان شاءالله ماكو شي

وكتها حيل خفت على عمي لان وضعه موات مو مال يگوم منها ورى ساعه يلا طلع الدكتوروگال صايره عنده جلطه دماغيه ومسببه عنده شلل نصفي ولازم يبقى تحت المراقبه خمس ايام بعدها نشوف نطلعه لو لا

🌸🌸🌸🌸........🌸🌸🌸🌸🌸

اولاده حيل انهارو ونقهروا عليه اني هم نقهرت عليه لان انسان طيب وممأذي احد ويحبني هواي

بقينا يمه لساعه متاخره تالي واحد من الولد بقى بات يمه والباقين رجعوا للبيت مكسورين اني رجعت وياهم تلگتني ضحى تبجي ومقهوره على ابوها حضنتها وابوس براسها وبأيديها وهي تبجي احاول اصبر عليها واگلها ادعيله بس گلبها محروگ عليه گالت

ضحى

وسام وديني لبيت اهلي ابقى يمهم الى ان يطلع ابوي ما اگدر ابقى هنا گلبي مثل النار

وسام

واني ضحى ما اگدر افارگم انتي والجهال

ضحى

اتحمل وسام لخاطري اني تعبانه محتاجه اروح لهلي واكون يمهم واسمع اخبار ابوي

وسام

خلاص حبيبتي اخذي اغراضج وجهالج وامشي اوديج

فعلا صعبه عليها لازم تتواجد ابيت اهلها مهما يكون لازم توگف وياهم الله يساعدهم ويصبرهم وفعلا اخذت اغراضها وديتها لبيت عمي گابلت امها وبقن يبجن اثنينهن واني احجي واصبر عليهن خطيه يكسرن الخاطر بقيت يمهم ساعه وبعدين رحت للبيت لگيت خواتي وامي گاعدات گالت امي

امي

يمه وسام راح نروح لبيت عمك اني وخواتك نبقى يمهم شوي

وسام

روحوا اني راح انام عندي دوام باجر اريد اخذ اجازه واروح للمستشفى بس مو تتاخرون لليل كلش خلي ابراهيم يجيبكم خابرو عليه

امي

ماشي يمه احنا رايحين عيب منهم

صدگ خليتهم يرحون واني من التعب نمت بالهول عالقنفه فزيت الفجر ما ادري منو مغطيني ومطفي الاضويه گعدت صليت واندعيت لعمي ويبرد نار گلبي ويشيل دموع من عقلي وگلبي بعدها رجعت تمددت بالفراش بالسته ونص اسمع امي تسوي ريوگ بالمطبخ رحت صبحت عليها وتريگت وسبحت وبدلت وطلعت للدوام اخذت اجازه وگبل للمستشفى شافني ابن عمي

ابن عمي

الله جابك وسام ابقى هنا اني اروح للبيت ابدل وانام شوي لحد ما الولد يجون

وسام

عمي شخباره

ابن عمي

لحد الان ماكو شي على حاله يلا حبيبي مع السلامه كلش تعبت

وسام

روح الله وياك اني موجود وان شاءالله ماكو بس الخير

بقيت بالانتضار بالمستشفى وبعدين بحكم شغلي خلوني ادخل اكعد يمه بقيت والله لساعه تقريبا ١١ شفت عمي يفتح عيونه ويسدها اي يا رحمة الله بلكت يصحى بس يفتح ويسد اتقرب منه ميباوعلي كانما ميدري بالدنيا صحت عالطبيب واجوي يشوفونه گال الدكتور للاسف مديعرف احد الجلطه حيل قويه ورجع كانما طفل ضاربه هواي اماكن براسه ومديركز على شي يبقى تحت المراقبه كم يوم

مع الاسف والله هيج الانسان بلحضه يصير شخص ثاني بعد طبعه وشخصيته المرض اووف يالمرض فعلا يذل البشر

اجو ولد عمي وبلغتهم خطيه ضلوا يبجون على ابوهم اني احس بيهم اعرف الاب شگد غالي وشگد سند وعزوه بس الحمدلله على كل حال بقيت وياهم وبعدين رجعت رحت لبيت عمي اشوف ضحى واصبر عليها گعدت يمها وحجيت وياها وشفت الجهال وطمئنيت عليهم بعدها رحت للبيت سولفت لامي وحيل نقهرت وگامت تبجي رحت نمت تقريبا نص ساعه وگعدت هم طلعت لبيت عمي وللمستشفى ضغطه مينزل ابد يوم اسوء من يوم مرن تقريبا اربع ايام وبعدها واني نايم واسمع الصريخ

لحكايتي بقيه 🌸

لا تنسون التعليقات حبايبي

#بين_قمرين

همس القوارير

البارت 7💕💕

تعبان ونمت الضهر واسمع الصريخ بالمنطقه امي گعدتني

امي

وسام يمه دگعد يوم بس لا عمك يمه الحگ علينا

وسام

على كيفج يمه لا تنخبصين ضغطج هسه اشوف بس ارتاحي انتي

امي

لا يمه جايه وراك دروح يمه شوفهم

ما عرفت شلون البس نعالي تكرمون رحت اركض وفعلا الصريخ بيت عمي رحت لگيت النسوان بالطرمه تدگ وتلطم اجت عليه ضحى حضنتني وتبجي

ضحى

وسام ابوي مات حزام ضهري مات ابو هيبتي ودلالي راح كلشي راح وسام اريد ابوي

حضنتها وضليت ابجي وياها

وسام

ابجي شكد ما تردين ارتاحي بس على كيفج ويه روحج فكري بيه وبجهالج حبيبتي حقج يا عمري انتي

ضحى

ما بقى بيه عقل ما مصدگه بعد ما اشوفه راح اموت وسام ماكو شي يبرد گلبي

وسام

الله يصبرج ويصبرنا

شويه ودخلت امي تصرخ حضنت ضحى وضلن يدكن وينوحن ما تحملت الموقف يبجي الصخر طلعت يم الولد كلها تتباجى واني همين ابجي وياهم بصراحه صعب هاليوم مر علينا صعب انسان كان عايش وياك سنين طويله وهيج بغمضة عين يروح ولا كأنما كان موجود بحياتنا صحيح هذا أمر الله ولا نعترض على حكم الله بس يبقى الفراگ يموت الانسان بين ليله ويوم تغيرت حياتنا البارحه كلشي مبينا واليوم المصاب اخذ من حيلنا

بدت مراسيم العزى وجابو التابوت ودمرت اعصابنا ونهارت حيل صعب هالموقف بجينا دم مو دمع ما احب من يجيبون التابوت للبيت والنسوان تلتم عليه تحس گلبگ يتفطر من الالم والقهر

اخذه ابنه وراح يدفنه واحنا بقينا لازمين الفاتحه تلاث ايام بس هلكنا من التعب ما بقى شخص ما اجه يعزينا حيل تعبنا بعدها خلصت الفاتحه واصرت ضحى تبقى يم اهلها كم يوم ما حبيت اعترض لان فعلا هي محتاجه تبقى يمهم بس ابد ما عفتها كل يوم اروح اشوفها واطمئن عليها هي والجهال واگعد يمهم ساعه او اكثر وارجع للبيت بصراحه البيت كئيب بدون ضحى والجهال فد يوم جنا كاعدين العصر اني وامي وندگت الباب رحت افتح الباب لگيتها خالتي ودموع وديمه فتحت الباب وبقيت صافن عليهم

خالتي

شنو يمه شفت جني دوخر خلينا نفوت

وسام

هههههه هلا بيج خاله شلونج شلونها صحتج تفضلي تفضلي

خالتي

هلا بيك يا بعد خالتك انت شلونك يمه

وسام

بخير خاله اذا انتي بخير شلونجن بنات شخبارجن

جاوبن اثنينهن الحمدلله بخير ودخلوا جوه يم امي شفتهن. گعدن ورحت للاسواق جبت عصاير ونساتل وحلويات اجيت وخليتها يم امي عادك فرغتها بصينيه وقدمتها وگعدن يسولفن اني سويت روحي طالع بس بقيت بالشباك مالت الحديقه الي تطل عالصاله اباوع لدموع تگلب بالحلويات وتريد تختار اخذت نستله ورفعتها دتفتحها وشافتني داباعلها هي التفت على خالتي وامي ورجعت باوعت عليه ودنگت عرفت هي شافتني بس خجلت بقيت اباوع اوووف يا ربي شنو هالوضع الي اني بيه حسيت على نفسي رحت كعدت بالمرجوحه بعدين همين گمت اتفرج عليها اريد أملي عيوني منها اريدها تعرف اني احبها ومتعلق بيها بقيت اباوع عليها بعدها لازم اصحى اني شبيه اروح اسگي الحديقه احسن لازم التهي بشي معجبتني حالتي بقيت ازكي واقلم بالحديقه حسيت احد وأكف على راسي رفعت راسي شفتها دموع نكثت ايدي وگمت وگفت گبالها

💕💕💕💕..........💕💕💕💕

وسام

هلو دموع شلونج

دموع

تحب الحديقه والزرع

وسام

اي احبها ودائما اشتغلها بأيدي

دموع

اي دألاحظ هالشي

رحت وگعدت عالمرجوحه وتباع عليه

دموع

وسام شكو شصاير

وسام

اجيت وگعدت يمها بس بالطرف المرجوحه لان مرجوحتنا كبيره

شنو شتقصدين

دموع

وسام اني مو طفله او ما افتهم صحيح اني يتيمه بس ترى اعرف اتصرف

دنگت

وسام

همين ما فهمتج شنو تقصدين

دموع

اعرفك ذكي وفهمتني بس راح اوضح اكثر اشوف نضراتك تختلف واهتمامك يختلف شنو تريد بالضبط

وسام

ما ادري دموع والله ما اعرف شنو الي ديصير بيه من اشوفج

دموع

وسام انت متزوج وعندك اطفال والك حياتك ما اسمحلك تتجاوز عليه او تتقرب مني ترى اني مو من النوع الي ابالك اني الاحظ اهتمامك بس گلت انت انسان محترم واواجهك بالموضوع احسن لان الي ديصير غلط

وسام

واني همين مو من النوع الي ابالج بس مداگدر اسيطر على مشاعري من اشوفج ما اگدر امنع نفسي ان اباوعلج او ان اشتاقلج او احلم مستحيل اشيلج من بالي

دموع

ونهايت هالشي شنو مستحيل اقبل بيك او اخرب حياتك انت وزوجتك اصحى لنفسك وسام الي ديصير والله غلط

وسام

اعرف والله اعرف بس مو بيدي اشيلج من بالي دموع انطيني فرصه اثبتلج حسن نيتي

دموع

مستحيل ولا تحاول ارجع لزوجتك ولجهالك افضلك مستحيل اقبل بشخص متزوج

وسام

يعني اعتراضج علي لان متزوج بس جاوبيني اعجبج لو لا

دموع

اي طبعا شي اساسي زواجك عندك زوجه تحبك واطفال مو مهم تعجبني لو لا المهم ترضي بيتك واطفالك وسام انت مو طفل حتى اني اعلمك وگلت خلي اكون جريئه وياه وافهمه من البدايه يكون افضل

وسام

اعرف الي تقصدينه والي تردين توصلينه بس مشاعر الانسان مو بيده واني من شفتج تغيرت احوالي

دموع وگفت ودتروح

وسام الافضل الك ترجع لحياتك لان مستحيل اقبل بيك

عافتني ودخلت جوه بقيت گاعد بالحديقه وعيني عالباب كل الي گالته صح وعجبتني جرائتها وقوة شخصيتها هنوب تعلقت بيها اكثر عبالك دتنبهني اني موجوده ومو بكيفك تنساني بقيت اصفن وارد اباوع للباب شلون اتصرف وشأسوي ضحى هسه مكسوره واني بياحال اني بشنو ملتهي شفتهم ديطلعون يرحون لبيتهم وكفت دأسلم عليهم

امي

يمه وسام روح وصلهم وليدي ميصير يرحون لوحدهم

خالتي

على شنو يمعوده ماكو داعي هي خطوتين

وسام

لا خاله اني اوصلكم من عيوني بس اغسل ايدي وأجي

وبين الكلام اسرق النضر لدموع بس هي متباوعلي ابد عبالك دتگولي انتبه لنفسك اني ما اريدك كلما التفت عليها تدور وجها عني والله ما اعرف شنو اني بنضرها يمكن عبالها اريد العب عليها او اضحك عليها يمكن هيج بنضرها وصلتهم للبيت بس محجت وياي ولا حجيت وياها واني رجعت لبيت عمي اشوف ضحى والجهال افتقدهم حيل صحيح البيت مو بعيد بس امهم متخليهم يطلعون تخاف عليهم حيل فتت لبيت عمي شفتهم وشفت ضحى حيل تعبانه ومكسوره الحزن مالي عيونها وگلبها تقربت منها

💕💕💕💕..........💕💕💕💕

وسام

ضحى انتي انسانه مؤمنه وهذا قضاء الله وقدره لا تعترضين على حكم رب العالمين

ضحى

وسام اشتاقله وافتقده بكل مكان

وسام

والله حاس بيج يا روحي شوفي وجهج ذبلان والحزن كبرج عشر سنين واني والجهال محتاجينج رجعي وياي

ضحى

لا وسام فد يومين بس للخميس وارجع تحملني شويه حبيبي

وسام

خايف عليج وربي مالنا غيرج وانتي مثل الورده الذبلانه

ضحى

لا تخاف ما اموت كولشي مبيه بس للخميس وارجع

وسام

براحتج حبيبتي انه اروح لان امي لوحدها راح اخذ الجهال وياي بليل واجيبهم

ضحى

اي حبيبي اخذهم بس لا تخليهم يطلعون

وفعلا اخذت الجهال ورحت يم امي كيفت عليهم وتونست بيهم بقيتهم يمي لليل عشيتهم وبعدين وديتهم لامهم ورجعت لان ثاني يوم عندي دوام ورحت لفراشي ردت انام تذكرت كل كلمه گالتها دموع كل حركه كل نضره كل همسه اتگلب بفراشي يا ترى اكو امل تقبل بيه حتى لو قبلت حياتي شلون ضحى والله تخلي حياتي جحيم وهذا كلش مو وكته اذا اخطي هيج خطوه صعبه هسه ياربي مو جنت مرتاح شجابني عليها وشجابها عليه ليش دخلتها حياتي ليش هيج افكر بيها نار وشبت بيه عشگ ودمار ما ادري شوكت نمت گعدت لگيت امي بالمطبخ دتسويلي ريوگ صبحت عليها وتريگت وياها

امي

يمه وسام مرتك شوكت تجي يمه مليت لوحدي بالبيت واشتاقيت لصيحة الجهال

وسام

ما بقى شي يمه باجر ثواب عدهم لان خميس اجيبها الجمعه ان شاءالله

امي

اي يمه عزموني باجر اروحلهم الله كريم يمه

وسام

محتاجه شي يمه گبل لا اطلع

امي

لا يمه اريدك سالم روح وداعت الله

طلعت اخذت سيارتي ورحت للدوام كملت دوامي بين مد وجزر رجعت حيل تعبان واني جاي بالطريق شفت دموع دمتشي لوحدها بالشارع راجعه من المدرسه بالضهر تفاجئت بيها هاي شنو بقيت التفت عسى احد وياها ماكو لوحدها بالضهر شكو وين الباقين

لحكايتي بقيه🌸

كلما زادت التعليقات كلما نزل البارت الجديد على وكت

حبايبي التفاعل كلش قليل مثل ما انتم تردون بارت جديد اني همين اريد تفاعل فديتكم

#بين_قمرين

همس القوارير

البارت 8🌸🌸

واني راجع من الدوام شفت دموع راجعه لوحدها من المدرسه وگفت يمها ودگيت هورن هي خطيه كمزت من شافتني اجت بسرعه صعدت بالسياره

دموع

همزين شفتك ردت اموت من الخوف لوحدي

وسام

وعليكم السلام ورحمة الله

دموع

ههههه من الخوف نسيت اسلم

وسام

وين ديمه ومروان ليش لوحدج

دموع

ديمه مريضه اليوم مداومت ومروان رايح سفره

وسام

وانتي يعني اله تداومين جان گعدتي اليوم شنو راح يصير شلون هيج بالضهر ولوحدج

دموع

عندي امتحان وبعدين انت ياهو مالتك بكيفي ترى

وسام

لا مو بكيفج ذاك اول بكيفج هسه الوضع اختلف

ردت احسسها ان هي الي وخلاص

دموع

وشنو الي اختلف بالله نفس الوضع ما تغير شي ونفس الضروف شتقصد مثلا

وسام

قصدي واضح وانتي فاهمتني

دموع

وسام انت من كل عقلك ترى انت الي تحجيه بس انت عايش بيه اني مالي دخل بمشاعرك اني ما اريدك

وسام.

مو مهم ترديني اني اريدج واحبج

دموع

واني ما اخذ واحد كبير

وسام

واني مو كبير اذا تحبين اثبتلج بس نتزوج

دموع

بأحلامك تتزوجني اولا ما اخرب حياة ضحى والجهال وما احبك يا أخي

وسام

حياة ضحى متخرب راح تبقى مثل ماهيه ميتغير شي وثانيا مو مهم تحبيني اني احبج واريدج وهذا يكفيني

دموع

اني صوجي صعدت وياك والله اله احجي لبيبي كولشي

وسام

واذا انتي محجيتي اني احجي

دموع

انت متگلي شتريد مني الله يخليك عوفني والله مو مال حب اني اريد اكمل دراستي واخذ الشهاده

وسام

والله ليلي مدانامه ليل ونهار انتي شاغله تفكيري وگلبي اذا ما اخذج وربي اموت ما اتحمل تكونين لغيري صح متزوج واحب زوجتي بس انتي حبج يختلف مسامعه حبك يدگ بالراس هو هيج احبج ما اگدر اعوفج ولا تفكرين بيوم اشيلج من بالي وبالنسبه لدراستج كملي واني كل خطوه وياج وين متردين توصلين اني وياج

دموع

كافي وسام نزلني وصلنا مداتحمل كلامك

وسام

تخافين تضعفين

دموع

ما اعرف بس خليني هيج مصره على قراري

وسام

جربيني ومراح تخسرين شي بس انطيني فرصه

وگفت السياره وهي تنزل بقت تباوع عليه حسيتها لانت شوي بس دتكابر

دموع

بأحلامك تاخذني

وسام

والله اله احقق هالحلم وراح تشوفين

دموع

ههههههههه متگدر لا تثق هوايه بنفسك

وسام

انتي عايشه واني عايش وشوفي

طبگت الباب حيل وراحت

وسام

هههههه والله اندمج على سدة الباب هاي

اني شسويت خلاص مشاعري صارت مو ملكي ما أگدر اتحكم بيها كل ساعه اتذكر وجها وكلامها وابتسم لا اراديا حسيت بگلبي دگاته دتخربط من اشوفها افرح عبالك العيد يا سبحان الله شلون خلق الحب بگلوب البشر لازم تكون الي اذا صارت لغيري اموت حلوه مشاعر غض النضر عن ضحى والاطفال بس احس اكو فد شي حلو بحياتي بعد ما كانت فارغه اكو فد لون جميل ديخليني اشوف الدنيا حلوه هيج الحب يغير الانسان حتى وان كان عذاب يبقى حلو وشي راقي واله قيمه

دموع

من صعدت ويه وسام وگام يحجي كلامه الي سمعتوه ما اعرف منين يجيب هالثقه او بالاخص هيج مصر اني شنو ناقصني حتى اخذ انسان متزوج وعنده اطفال ليش شنو محتاجه مستحيل اقبل بهالشي وبعدين زوجته واطفاله ما أگدر ادمرهم هالشكل بس ما اعرف شسويله هذا يدور حجج حتى يشوفني والله شلون ابتعد ما ادري دخلت للبيت

بيبي

هااا دمعه يمه منو وصلج سمعت صوت سياره بالباب

دموع

بلي بيبي هذا وسام شافني بالطريق وصعدت وياه لان دنيا ضهر وخفت

بيبي

ينطيه العافيه هالوسام شلون ولد ماكو منه

دموع

اي بيبي اي حگوم ابدل واتغدى

عبالها وسام ديسوي كلشي من اخلاقه العاليه متدري ميت عليه اوووف هذا هم حضي شلون ورطه هاي ما اگدر احجي لبيبي خاف توصل لعمامي هنوب حتى مدرسه ماكو راح ابقى اصده واشوف شنو تاليتي وياه

وسام

بقت حياتي هيج كل يومين لو تلاثه اروح لبيت خالتي بأمل اشوفها بس من تشوفني متطلع گلبي طگ عليها مثل الصايم ومشتهي شربة مي ترويه اعرف بيها يمكن دتعاقبني او تتهرب مني مااعرف شلون اخليها تقتنع بيه

فد يوم جانت ضحى بيت اهلها وامي گاعده لوحدها اجيت وگعدت يمها

وسام

هاا امي اشو لوحدج گاعده

امي

يمه وين اروح مريتك والجهال عند اهلها

وسام

شرايج اتزوج مرة الخ واجيبلج مره ثانيه اگعد وياج وتونسج

امي

ههههههه لا يمه خلينا هيج احسن

وسام

يمه احجي صدگ مو شقى

امي

ياااا شنو التحجيه صدگ يا يمه اعرف سوالفك

وسام

وروح ابويه ما اتشاقى اريد اتزوج

امي

ولك يمه شجاك هذا شلون حجي بنية عمك وأم وليداتك وما مقصره بشي يمه تخبلت

وسام

يمه ضحى انتي اختاريتيها مو اختياري واحبها وما مقصره بس يمه انه احبلي وحده واريدها يمه گلبي شاب عليها

امي

لا يمه ما اقبل وحرام عليك حليبي يمه اذا تفكر تاخذ على ضحى مره وتكسر گلبها

وسام

يمه لا تزيديها عليه فدوه اروحلج وربي احبها واموت عليها انتي ما تردين راحتي

امي

لا يمه لان اريد راحتك هيج احجي ولا تفكر بالزواج يمه ترى تخسر بيتك وامك

وسام

لا يمه ماكو خساره ان شاءالله انتي مو تردين رحتي وتحبيني

امي

اي يمه راحتك مو هجمان بيتك

وسام

انتي بس ارضي واني اصفيها

امي

وسام وربي اغضب عليك دنيا واخره وخلاص سده للموضوع ما اتحمله بعد

خلتني وگامت وانه ضليت مثل النار هسه هاي شلون ورطه شلون بيها امي كلشي ولا زعلها لازم اقنعها كلش ضجت وضليت محتار شلون ارضيها خليها بمرور الوقت بلكت ترضى وتريحني هسه معصبه ما اگدر احجي وياها رحت نمت شوي والعصر رحت جبت ضحى والجهال من بيت اهلها بقيت كلما احجي ويه امي احس بيها خاطرها ثگيل وضال أبالها مني بقت هيج كم يوم ضحى لاحضت هالشي على امي

ضحى

وسام شبيها عمتي وياك احسها زعلانه عليك شنو صاير

وسام

ما ادري روحي سئليها كلما احجي وياها تبيع ثگل عليه هههه

ضحى

مو سئلتها تگولي ضايجه ومالي خلگ تعبانه

وسام

اي يمكن تعبانه

ضحى

يعني تعبانه بس وياك اشو سوالفها ويانا ويه الجهال عاديه بس انت

وسام

ضحى دوختيني تردين شي روحي سئليها لا تلزگيلي اريد انام

گعدت العصر ضحى نايمه يمي رحت لگيت امي تشرب جاي بالمطبخ شافتني ودارت وجها

وسام

يمه لشوكت تبقين هيج دايره وجهج عني

امي

لحد ما تشيل الي براسك

وسام

يمه من هسه غضبتي قابل هو صار

امي

مو ابني واعرفك اذا تخلي شي براسك تسويه

وسام

يمه راح تخلين ضحى تشك البارحه تسئلني شنو صاير بيني وبينج

امي

هاااا شو هسه تداري ضحى لعد من تصير صدگ شلون

وسام

يمه شنو عبالج من اتزوج راح اعوفها لا والله ما أگدر لان احبها واحب جهالي ولازم اداري مشاعرها وخاطرها هي الاولى وام جهالي يمه بس احبها ما أگدر اريد اخذها يمه والله اتعذب

امي

يمه تعذبلك شوي باجر تنسى يمه فدوه لعينك ارجع لعقلك يمه انه وگلبي شب نار لعد هي شلون

وسام

يمه بس ارضي انتي والله الباقي كله يهون اني اصفيها وداعتج

امي

لا يمه ما أگدر مستحيل اقبل اخليك تاخذ على ضحى

وسام

اوووف يمه تعبتيني اروح اطلع احسن

غيرت ملابسي وطلعت امشي بالسياره ومحتار شلون ارضيها هاي امي وكلشي ولا زعلها ما اتحمله ابد گعدت افكر ما ادري شسوي بعدها تذكرت اختي داليا لازم اروحلها واحجي وياها هي الوحيده الي تگدر تقنع امي

لحكايتي بقيه 🌸

#بين_قمرين

همس القوارير

البارت 9 🌸🌸

من طلعت من البيت تعنيت لبيت اختي داليا امشي وافكر شنو اگوللها وشلون راح اخليها تقنع امي اهم شي رضاها عندي وگفت يم بابهم تنفست بقوه ودگيت الباب فتحه ابنها الصغير وراح يركض يمه اجه خالي وسام دخلت وسلمت عليهم ودخلت شفتها بس هي وجهالها

طبعاً من بعد السلام والكلام والضيافه گلت خلي احجي وياها وافهمها احسن اني متاكد اگدر اقنع دموع بس ابدي بيهم واحد واحد

وسام

خويه اريد احجي وياج بموضوع

داليا

گول خويه عيوني الك

وسام

اريدج تقنعين امي بسالفه

داليا

اني اقنع امي ليش هو انت تحتاج واسطه يا خويه اشو طول عمرك شمعة بيتها انت وما تردلك طلب شمعنا هسه يمكن الموضوع چايد لا تخوفني

وسام

اي صدگ هو هيج وانتي اريدج واسطه هالمره

داليا

گول خويه اني بخدمتك الي اگدر عليه عيوني الك وما اقصر

وسام

شوفي اني تعرفت على وحده خوش بنيه وحلوه وكلش عاجبتني وحبيتها ما أگدر اعيش من غيرها واريد اتزوجها وامج ما تقبل

شفتها تفاجاءت وفتحت عيونها

داليا

بضميرك تحجي صدگ لو تشاقى شبيها ضحى خويه والله حرام عليك

وسام

خويه هسه اني گايل بيها شي بالعكس مداريتني وتحبني وما بيها كل قصور بس الخلل بيه اني گلبي هواها وما أگدر بلياها تساعديني لو لا

داليا

شلون اقنعها بشي اني ممقتنعه بيه وسام غلط وربي لا تهدم حياتك اسمع مني يا خوي

وسام

براحتج خويه ما لازم عود ردتج عون طلعتي فرعون

داليا

لا تزعل خويه ترى اني اعين واعاون شعتدي غيرك بس والله ما ادري شلون اني احجي وياها بلكت اقنعها بس انت صدك تحب يعني وين شفتها وين عرفتها

وسام

راح اگلج منو بس لا تجيبين طاري لاحد بس امي بعدين اني احجي

داليا

گول خويه گول سرك بير ما احجي

وسام

دموع بنت احمد ابن خالتي

داليا

ياا عود صدك هذه بعدها صغيره شحبيت منها وامي منو يگول تقبل بيها وخالتي همين طريقك طويل وكله مشاكل

وسام

لا مو صغيره ١٨ سنه عمرها بعد الگلب دگ عليها شسوي خربطت احوالي ودمرتني وان شاءالله امي تقبل وليش ما تقبل شبيها كلها تقبل اني اقنعهم

داليا

اخاف ولد عمها يردوها وما ينطوها وبعدين هالگد تحبها بحيث تخرب حياتك علمودها

وسام

واذا ما اخذها اتخبل اريدها وما اتصور ولد عمها يردوها مسامع هالشي

داليا

ولو هالشي راح يقهرني على ضحى بس راح احاول ويه امي وان شاءالله خير

وسام

وشوكت اجي عليج ترحين لامي

داليا

الضاهر كلش مستعجل

وسام

اريد ارتاح خويه ما اتحمل زعل امج

داليا

تعال عليه الخميس من تروح ضحى لهلها حتى احجي براحتي

وسام

ماشي حبيبه يلا اني اترخص اروح للبيت اخذلهم مسواگ وشغلات للجهال مع السلامه

وفعلا رحت اخذتلهم مسواگ للبيت وامي بعدها على حالها اجر منها الكلمه گوه بقت كول هالفتره مالها خلگ وضحى تسألني واگولها ما ادري

لحد يوم الخميس من اجتي داليا علينا

خابرتني وسام تعال عليه اليوم رحت جبتها واجيت واستأذنت اروح انام بس منمت گعدت اتسمع على كلامهم

داليا

يمه شبيج ويه وسام مو على بعضكم

امي

يمه هذا اخوج يريد يسويلنا مشكله

داليا

ليش يمه شبيه

امي

وسام يريد يتزوج على ضحى

داليا

والله عبالي مشكله جبيره سهله يوم

امي

ياااا هذا شلون حجي سهله شلون اشو جنج راضيه لعد وضحى

داليا

يمه ضحى شعليها كاعده بيتها معززه مكرمه

امي

والله وگلت جيتج مو خاليه جايبج حتى تقنعيني مو باحلامكم اقبل مستحيل

داليا

انتي بس سمعيني يعني واذا جابني اقنعج غير يحبج ويريد خاطرج

امي

اذا يحبني ما ياخذ على مرته

داليا

يمه وسام طول عمره ما ارتاح مشلوع گلبه من ورانا يفكر بينا وناسي نفسه شصار لو گلبه حب بنيه وصارت اله يمه وسام ديتعذب وما يهون عليج خليه يتزوج ويرتاح وگلبه يرتاح لا يروح يصير بيه مرض اذا ما اخذها وبعدين هو عمره ما حب ولا شاف حياته زوجتيه انتي وهو صغير لا شاف ولا حب ولا نحب من حقه يعيش مثل باقي الناس وضحى انتي الي ردتيها وجبتيها اله وهو كان طايعج وما كسرلج كلمه كل همه رضاج وقبل علمودج جايه هسه تمنعينه من حبه يمه خطيه والله

امي

اسم الله عليه يمه اموت غير اذا صار بيه شي يمه اخاف على جعاله اني روحي بيهم

داليا

يمه خلي ياخذ الي يتمناها ليش تالي نتندم براحته هو رجال ويعرف شلون يصفي اموره وجهاله شعليهم اشو مدللهم دلال وهو حنين ما يعوفهم لو على عشر نسوان

امي

ومنو هاي سعيدة الحظ الي يحبها وراح تاخذه من مرته

داليا

يمه ابنج الي راح عليها هي مالها ذنب ولا موديه عليه وبعدين هي دموع بنت احمد ابن خالتي الله يرحمه

امي

عزه وعاف الدنيا كلها وما حب اله دموع هذه مدلله عند خالتج وما تنطيها على شرج شلون بالله راح يذلنا تالي وكت

داليا

لا يمه مو وسام الي يهين كرامته علمود مره انطوها اله انطوها ما انطوها يدوس على گلبه ويگعد انتي بس اقبلي خلي الباقي عليه هو يدبر اموره

امي

بعد شبيدي قابله شسوي قابله وخايفه عليه وعلى بيته الله يهديه يارب ويريح باله

دخلت عليهم

وسام

الله يخليج الي يا اغلى الحبايب

امي

هاا ولك تسمعلنا شلون حجي هذا انت صغير ولك

وسام

وداعتج لان الموضوع يخصني ردت افرح بموافقتج

امي

الله يسعدك يمه بس شد حزامك للمشاكل

وسام

اني گدها يمه لا تخافين عليه

مشكوره دلو يا بعد اخوج

داليا

ربي يسعدك يا نضر عيني ويفرحك

وسام

هسه ارتاحيت برضاج عليه يا اغلى الحبايب

امي

يمه منك اگدر للسانك اني

بعد هنا لازم افكر للخطوه الجايه ولازم افكر واعرف شلون ادبر اموري خالتي شلون راح اقنعها همي الكبير خالتي وبعدها ضحى اوووف يا ضحى والله صعبه عليج وعليه هسه من اگوللها تگلي استغليت الفرصه لان ابوي مات واني لا عالبال وعلى الخاطر هي هيج لا مره ولا شي وكاتلتها الغيره لعد من اگوللها راح اتزوج شلون بيها اخخخ يا ضحى والله ما ادري شلون اقنعج مو جنت مرتاح شجابني عليج يا دموع طلعت اقلم بالحديقه واجتي امي

امي

وسام يمه والله صعبه مدري شلون راح تعفسنا عفس

وسام

يمه گولي يالله هي تصفى يمه احبها وگلبي تعلق بيها يمه تكرهين تشوفيني مرتاح

امي

لا يمه منى عيوني اشوفك مرتاح ومستقر بس مو على حساب ضحى يمه انقهر عليها وما شفنا منها شي مو زين طول عمرها خادمتنا وتحبنا

وسام

لا تزيدين همي يمه اريدج وياي

امي

الله كريم بلكت ربك يحلها من يمه

طلعت المغرب اخذتني رجلي لبيت خالتي دگيت الباب وفتحته دموع وصفنت بوجهي

وسام

اوووف وربي احبج

دموع

خالتك جوه روح شوفها

وسام

دموع انتضري شوي بس سمعيني

دموع

مو هي وحده من الاثنين لو تخبلت لو متخبل

وسام

ههههههه واثنينهم صارلي هسه انجنيت بيج راح اخطبج بعد ما اتحمل

دموع

وسام فدوه خليني اكمل ما اريد اتزوج كافي ترى بعدني ما مفكره لا تشغلني عن دراستي

وسام

ما اشغلج واني ادرسج بس وافقي والله وداعت جهالي مراح تندمين اعيشج اميره

دموع

مو هسه وسام لخاطر الله

وسام

فوتي سويلي درب اريد احجي ويه خالتي

دموع

وسام بربك روح مو وكتها ترى

وسام

خاله خالتي وينج

خالتي سعاد

هلا يمه وسام تعال اني هنا بالهول فوت يوم ماكو احد هنا

وسام

فتت عليها بوستها وبست راسها

شلونج خاله شخبارج

خالتي

يا بعد رويحتي يا يمه بخير امك شلونها

وسام

بخير خاله تسأل عنج رادت تجي وياي بس محد بالبيت لان ضحى عند اهلها

خالتي

اي خاله الله يعينها فراگ ابوها مو هين عليها عود گلت باجر امر عليهم اشوفهم

وسام

اي خاله هلا بيج شعجب الجماعه ماكو احد

خالتي

والله يمه راحوا لهلهم من البارحه بس اني وابو مروان ودموع بالبيت واليوم بليل يجون

وسام

هاااا حقهم خاله عندي يمج سالفه وطلب يمج وما اريدج ترديني

خالتي

يا يمه عيوني الك بس گول محتاج فلوس يمه

وسام

لا يمه مو سالفة فلوس اكبر شوي

خالتي

اذا اگدر عليها ليش لا خاله تدلل گول يمه شتريد

لحكايتي بقيه 🌸

لا تنسون التعليقات

همس القوارير

البارت 10 🌸🌸

من بعد ما حجيت ويه خالتي وعبالها شغلت فلوس

خالتي

يمه اذا اگدر على طلبك غالي والطلب رخيص شنو تأمرني حبيبي

وسام

يمه لا مو شغلة فلوس الخير كثير والحمدلله راح اگلج بدون مقدمات اني اريد دموع

خالتي

شنو دموع شلك بيها يعني ما فهمت

وسام

خاله اريد دموع على سنة الله ورسوله احتويها زوجه الي واخليها بنص گلبي وبعيني

خالتي

يمه انت تحجي صدگ هذا شلون حجي ومرتك وجهالك شنو يمه انت واعي

وسام

لا تفكرين بس انتي قبلي وربي اخليها بعيوني بس قبلي انت واي قصور مني الج حق تحجين

خالتي

اقبل شلون اقبل اشمر دموع هيج شمره انت شنو متفكر ما اگدر

وسام

ليش شمره خاله شبيه اني شناقصني

خالتي

لا خاله ما بيك شي بس متزوج وعندك جهال شلون تقبلها ودموع مدلله وبنت المرحوم احمد ما تصيرلك خاله انسى مستحيل

وسام

ليش خاله والله ادللها واخليها بعيوني واذا قصرت حاسبيني وراح تشوفين بعينج الي تردينه وتأمرين بيه يجرالج

خالتي

لا خاله لا. گطنه وشيلها من اذنك مستحيل اقبل ودموع مو الك خاله لا تفكر بيها

وسام

مع الاسف عليج خاله اني هم مثل ابنج ليش هيج تعزينها عليها

خالتي

خاله هاي دموع بنت روحي هاي ما انطيها لشرج لو اعرف اموت وهي صغيره ودتدرس انت شلون تقبلها صحيح انت وليدي وما اعز عليك روحي بس دموع لا خط احمر ما اگدر توكل على الله وانساها

وسام

خاله بس فهميني احبها واريدها ومستحيل اتنازل عنها اني حاضر لكلشي ولا ما تتندمين وداعت امي

خالتي

خاله لا حب ولا بطيخ دموع متصيرلك مره هذا قراري ولا تفكر بيها بعد

وسام

خاله بس اسمعيني

خالتي

دسكت خاله رحمه لهلك ما تصير خاله يعني ما تصير عوف السالفه وارجع لمرتك وبيتك

وسام

هو هذا قرارج

خالتي

ومستحيل اتنازل عنه اعذرني

وسام

مع السلامه

طلعت وگفت بالباب وخالتي طلعت وراي شفت دموع وگفتلي باب الغرفه تباوع عليه مقهوره وتهز براسها كانما دتلومني او تگلي مو گتلك بطل وعوف السالفه ولا تحجي بيها

طلعت من بيت خالتي واني ميت قهر امشي مو بعقلي سلم عليه جارنا ورى شوي انتبهت ورديت السلام من كثر الضوجه لحد ما وصلت البيت واني الف حسبه ابالي امشي بلا وعي گعدت باب البيت واخذت عوده واخطط بيها عالترابه وافكر شراح اسوي شلون اقنعها لخالتي شلون راح اخليها ترضى ومنو الي يضغط عليها اتمنى اشوف رائي دموع وتگلي اي قابله والله لاحارب الدنيا لعيونها والله اذا اخذها غيري اموت شلون اقنعها ما اعرف شنو سوت بيه دموع معقوله هذا عشگ اني عمري ما حبيت صحيح احب ضحى بس دموع احس نفسي مراهق وياها دخلت للبيت ضحى وامي كاعدات بالمطبخ سلمت عليهم وفتت اسمع امي تگول لضحى

امي

يمه روحي ورى رجلج شوفيه شبيه

اجتي ضحى يمي

ضحى

وسام بيك شي عيني اشو مالك خلگ

وسام

سلامتج بس تعبان ضغط الشغل

ضحى

وسام اكو شي شاغل بالك صارلك فتره تفكر واني مو طفله او غشيمه حتى ما افهمك بس اتمنى تجي انت وتگولي شنو ديصير وياك

وسام

لا تستعجلين خليج مرتاحه يجي يوم وتعرفين كلشي

ضحى

شنو تقصد يعني فعلا شكي بمحله وانت ابالك سالفه

وسام

ضحى تعبان مو وكتج رجاءاً اريد ارتاح

ضحى

ماشي راح اتركك بس ما اترك الموضوع نحجي بعدين

خلتني وطلعت ما أگدر هسه اصدمها واقهرها والله احب خاطرها بس اني همين تعبان شسوي احبها ياربي ريحني لو تخليها من نصيبي لو تشيلها من گلبي ضليت اتكلب وافكر واسولف ويه المخده لحد ما نمت

فزيت على ايد ابني وهي تلامس خدي لزمت راحت ايده وبستها گعدت لگيتهم گاعدين بالهول سولفت وياهم شوي وطلعت ورى تقريبا اربع ايام عزمنا ابن خالتي ابو مروان بيت اهله مسوين ثواب لاخوه الله يرحمه دورة السنه مالته گلت اروح فرصه اشوف دموع

دموع

حقها بيبتي رفضته من التفت وشافتني واگفه بباب الغرفه وعيني عليها من طلع وسام توجهت عليه

بيبي

سمعيني بيبي اني ادرى بمصلحتج بنيتي ولا تتوقعين راح اضلمج انتي روحي والي تردينه يجرالج بس خليني اني اتصرف

دموع

لا بيبي ادري بيج تفكرين بيه لا تهتمين اروح اكمل دراستي

فتت للغرفه لاول مره اباوع بعيون وسام لاول مره اشوف بيها انكسار مو قوه ما اعرف ليش انقهرت عليه وحسيته يحبني من صدگ لالالا دموع لا تفكرين هيج خلي زوجته وجهاله گدام عيونج ولا تتسرعين بقت ايامي عاديه بيبتي محجت السالفه لاحد ونبهتني ان ما احجيها بقيناها بالسر وصادفت دورة السنه وفاة اهلي الله يرحمهم وقرور يعزمونهم اصلا هم كل سنه يجون يمنا وفعلا بدينا شغل من الصبح حضرلنا دولمه وذبايح ومركه وخضره وفواكه وعزمنا خالاتي وخوالي وعمامي وعوائلهم وبيت وسام واهله وجوي كلهم بقينا نصب ونحضر بالاكل وبدينا بقرأة الفاتحه والايات القصيره من القرأن وزيارة الامام الحسين وهديناها لرواحهم بدون كلام دموعي تصب شگد افتقدهم ومشتاقتلهم شصاير هسه لو هم موجودين وعايشه بينهم معقوله روحهم دتشوفني وتحاوطني والله مشتاقتلهم بيبتي حضنتي وبقت تبجي واني ابجي بحرگه

ام وسام

ميصير هيج يوم اقريلهم قرأن صليلهم حتى ترتاح روحهم

دموع

افتقدهم خاله مو بيدي

ضحى

الله يصبرج ويعينج اني بس ابويه وتدمرت اعصابي واخذ قطعه من روحي

بيبي

كافي يمه گومي غسلي مو زين عليج القهر

طلعت دافوت للحمام وشفت وسام ديغسل

وسام

عيونج حمره كافي بجي اموت من اشوفج هيج

دموع

وسام عوفني لخاطر الله

وسام

دموع ريحيني وأوگفي وياي والله لحارب الدنيا كلها علمودج ما اعيش من غيرج

بقيت اباوع بعيونه كومه من الحنان والحب تمنيت ارتمي بحضنه وابجي اجت وراي بيبي وشافته ديحجي وياي

بيبي

وسام شيل هالحلم من راسك لا والله اني الي اخليه الك سراب

وسام

خاله رحميني لخاطر الله شنو تردين اقدمه الج حتى لو روحي بس اقبلي

بيبي

كافي وسام واطلع منا هذا اخر كلام وياك لا تخليني افضحك گدام اهلك روح منا

طلع وسام ودخلت غسلت وطلعت نقهرت عليه بيبتي حيل عصبت عليه فتحت باب الطارمه ولگيته گاعد على عتبة الحديقه ومخلي ايدينه على رجليه ومدنگ راسه تقربت منه وگعدت مسافه عنه شفت رفع عينه عليه ورجع دنگ

دموع

تعرف الامام علي شنو يگول

وسام

شنو يگول

دموع

دع الامور تجري في اعنتها ولا تنم اله وانت خال البالِ فما بين غمضة عين والتفاتها يغير الله من حال الى حالِ

وسام

صدق امير المؤمنين

دموع

لا تفكر هواي والله هي تصفى لو كان الله قاسملنا حياة مع بعض صدگني مراح يمنعنا اكبر واحد هو مدبر الامور

وسام

انتي منين تعلمتي هالسوالف وبهيج عمر

دموع

امي الله يرحمها كلشي علمتني علمتني الصبر ومخافة ربي وكلشي حلو

وسام

اكيد هسه هي فخوره بيج

دموع

اتمنى هالشي

وسام

دموع والله احبج اول مره بحياتي احب صحيح احب ضحى بس انتي ما اعرف شيصير بيه من اشوفج احس دگات قلبي تتوقف واتمنى يوگف الزمن بلحضه اشوف بيها عيونج اريدج وكلشي بيه يتمناج واتمنى اصرخ للدنيا واگول احبج وما يهمني غيرج

دموع

والله الي ديصير غلط ما اگدر اهدم حياة واكون انانيه زوجتك تحبك وتحب بيتك واطفالك

وسام

مراح اقصر وياها ولا راح اخليها تحس بوجودج بحياتنا انتي بس اقبلي

باوعتله وابتسمت

وسام

من بعد الموقف الي صار ويه خالتي ومن بعد اعترافي لدموع بمشاعري حسيتها تبادلني نفس المشاعر بس اكو شي بداخلها تخاف منه من كنت داحجي وياها

وسام

خلاص دموع اني احبج وانتي فرحتي صرتي والله الدنيا من غيرج فلا تطاق وراح احارب الكون لعيونج دگومي روحي لا احد يشوفج يمي ويسويلنا مشكله

دموع

ماشي

وگفت دموع ودتمشي شفتها تفاجأت بشخص وراي كان واگف وفاتحه عيونها ومتفاجأه وتباع عليه وعلى الي وراي گمت داريد التفت اوووف مو وكته

لحكايتي بقيه 🌸🌸

منو تتوقعون سمعهم وشافهم