عرين النار الجزء الثاني

صباح العافية

عرين النار
#لهيب الذكريات
الفصل 2
ج 1

في الليل ماذا يحدث ..
تصرخ الارواح ...
تتضارب الافكار
لتعلن ..حرب
حرب خاسرة ..من بدايتها ..
. لا تنتهي الا بقدوم النهار ..
واشراقة الشمس لتمحي معاناة الليل ..
هناك من تتقلب ذكرياتهم ..كاتقلب الفصول ..
شتاء
صيف
خريف
ربيع ..
واحيانا ..تتوقف الذاكرة في الخريف وتتساقط الاوراق
اوراق الذكريات ..

حسيت بهوى عالي يحرك الجام
بقوة وتهتز

فتحت عيوني
الغرفه ظلمه ..حييل .
كمت من فراشي ..ريام ..ريام ..
اذكرت ..بيت اهلها ..
اووف ..
نزلت من السرير ..
وصلت يم البردة ..
اتلمستها ..مسدودة ..
انداريت اريد مي احس ريكي يابس ..وكوة اجر النفس ..
مديت ايدي ..
شي غريب هاي مو غرفتي ..
فتحت عيوني اكثر اني وين ..
جان ضوة الكراج يعكس الي للغرفة ..
وبانارة خافته ..
شفت مو غرفتي ..لا برداتي ولا غرفه نومي
كمت بسرعه
التفت ..وين اني ..

حسيت كلبي دكاته زادت ..
وين اني ..
اسمع صوت ..ون ..بس ناصي ..
وصوت كلام موواضح ..
منو هنا ..
منو..
سمعت ضحكه ..عاليه ..بس هاي الضحكه مو غريبه عليه ..
منو هنا
كريمه ..
ريام ..
اشببه بالاعمى ..كمت امشي واتلمس ..
بس ماكو لا سرير ولا شي ..
وصلت لحايط ..
ضليت اتلمس بي لعل اوصل واشغل الضوة ..
ماكو كل شي فارغ
واحس صوت نفسي اعلى من صوت الهوى العالي ..
رجلي طخت بشي ..
منو هنا
ريام ..
كريمه ..
منو
يووم ..
محد يجاوب ..
وصوت ..البجي قرب اكثر ..
وحسيت احد تلمس رجلي ..فزيت
رجعت من مكاني ..
منو ..
بصوت ناصي .
ماما ليث ..
منو
اني امك..ليث من ينام ابوك اجيب القصه واجي اقره الك
اشششش بلا صوت لا يسمعنا ..وغطت راسها باديها
بقيت افرك بوجهي وعيني اريد المح شي

تقربت اكثر ..
ي صوت امي وهذا عطرها ..
نزلت للكاع وكمت ازحف ..اريد اوصل الها ..
كلما امشي ..الصوت يبتعد عني اكثر
والهوى الي بريتي احسة يقل
واصوات الي بالغرفه زادت ..
مداركز منها شي ..
فجاءة اشتغل الضوة ..
ورفعت راسي ..وكفت ع حيلي
وصوت دكات قلبي دك باذاني ..
غرفه فارغه ..
وبيها اربع حياطين ..
بقيت اتلفت واباوع ..
كل ركن بيها ..
شخص ..
هاي امي ..
وهذا سبع ..
وهاي زوجتي ..
سبع بايدة سلاح ويلعب بي ..بس الكاع كلها دم ونص وجهه ماكو ..
سبببببع ..اتقربت عليه اكثر ..واحس الكاع تبعد.
سبببع ..درت وجهي ..
هاي امي دتلعب بشعرها ..
سبع ماما ..
احجي محد يسمع
احس جوة رجلي مي
اباع الكاع كلها
دم
ضليت اتلفت واصرخ
منو يسمعني
اني هنا
شنو هاي
ماما
سبع
كلما اتقرب ع شخص يبتعد عني واحس الغرفه بدت دوور بيه
دوران
لزمت راسي احس بصغط
والكل يحجي
بابا
ليث
تعال حبيبي
مدافتهم شي
اريد اصرخ بصوت ماكدر
الكلام وكف ..بالعومي
لزمت حلكي احس بحرارة
تلمست وعيوني ادور بكل مكان بالغرفه
ملامحهم جانت غريبه اشبهه بالاموات
حسيت  دم مسحت حلكي الدم اقوى
ونزل للكاع
وفجاءة الدم مثل البوري وداسيطر لا ع نفسي ولا الاصوات
واشكالهم بدت تزرق وتصفر ..
وشكلهم صار يخوف اكثر
كمت امشي واعثر بدم الي يوكع مني
لزمت خشمي وكمت من الكاع
بحاله خوف وهلع
اريد اوصل للباب
الباب تغيرت ومشايفها قبل
باب كلها جام
وصلت يمها
مديت ايدي افتحها
طلعت بوجهي ريام خلف الباب
ريام ..طلعيني منا راح اتخبل
جانت تبتسم الي باتسامه تخوف
مديت ايد ع مقبض الباب ..بسرعه قفلتها
ريام
بقيت ادك واصيح
ريااام ا فتحي  الباب ريااام
ابتعدت اكثر ..والرؤيا انعدمت عندي..
والظلام صار احمر بالون الدم
بقيت ادك بالباب
واحس اكو احد يلزم رجلي  ..وسحبني
صرخت ..
الله

............
فزيت ...
من نومي ..بصوت هوى عالي
كمت مثل المخبل ..امسح بوجهي اريد اشوف الدم
شغلت التيبلم ..
واكلب بالفراش..
تلمست وجهي عركان ..ومحتر ..
ماعرف شبيه
جنت احلم
ايييي حلم ..
استغفر الله شنو هالحلم الي اجاني ..
كمت من الفراش..
اتعوذت من الشيطان ..
رحت غسلت وجهي بس احس روحي حييل تعبان مثل الي جان يركض ..وهو عطشان ..
طلعت من الحمام
اخذت بطل ..وشربت مي ..
والباقي درته ع راسي
مسطور
من الحلم
غريب جدا كلشي بي غريب
امي سبع الدم
ريام قفلت عليه الباب
اخذت جكارة وورثتها ..
حاولت اهدي اعصابي
من التوتر
اخذت الفون ..ورنيت ع ريام ..
مغلق ؟؟؟؟
شعجب هي متغلق فونها ابد
اتصلت مرة ثانيه وثالثه
نفس الشي مغلق ..
عجييب  ليش مغلق ؟؟

شبيك ليث اضل بهالافكار السودة ماكو شي اكيد شحنها خلص ونامت
اباوع ع ساعه
بالاربعه ..
كمت ..واكو شك وقلق بداخلي
اخذت هدومي ..وطبيت سبحت
والحلم ميفارك مخيلتي ابدا ..
كملت..وطلعت ..
نزلت جوة البيت هدوء والكل نايم
طبيت للمطبخ
حضرت الي جاي
حتى اصحصح ..
كعدت ع الكرسي ..خليت الفون كبالي وبديت اكلب بي بايدي
اريد اتصل ع صهيب ايمن بس اطمئن ع ريام
ومن ساعه 7اروح الهم ..
احسن ..
واعجل بيعه البيت ..
وانقل نفسي قريب ع البيت ..
اسمع صوت القوري يصفر ..
فزيت ..
كمت كملت الجاي وصبيته وكعدت ..
مر بيه حلم ..دافي .و بارد ..
ريام
ضحكتها دمعتها ..لمستها ..
حبها ..
ابتسمت ..
وبنفس الوكت توجعت ..لان اذيتها هوايه
لا. .
اني اذي كل من يتقرب مني ..
حتى فجر مالها ذنب
..
وعقلي ياخذني لسبع ..
واحاول ابعدة عني ..
اخذت نفس عميق وطلعت برة ..بالحديقه ..
افتر ..
انداريت ع البيت ..
هذا البيت ..
متوارث من اجيال ..
من جدي لوالدي والي ..
معقوله افرط بي وابيعه ..
بس اني خسرت كل شي بسببه
الوانه اثاثة  وقوانينه اخذت مني كل شي حلو ..

اباوع ع الطرمه بيها الف ذكرى ..

اجتي صورة كبالي ..
هاي اني ..
افتر بالبايسكل ..
انداريت امي بالمرجوحه ..
وبيدها ..مجله الف باء ..
رفعت راسها الي ..كالت عفيه بالبطل ..
عيونها العسلي .وشعرها ..
جانت الي ملائكه مو ام ..مشافت عيوني اجمل منها ..بيوم ..

وكعت من البايسكل ركضت عليه ..
حاولت تكومني ..
حسيت احد دفعها ..
ابويه
....
ابقي ابقي خنثي الولد بسوالفج هاي مال نسوان
اسمع ابو ليث خطيه تعور ..
اسكتي الزلم متتعور ..ولا تبجي ..
ابتعدت عنهم ..بسد السيارة ..
واحس رجلي طك وحدة بالثانيه ..
وضل يصرخ ويحجي عليها ..
ماريدج تربي
ولا تبوسي ولا دللي ..هذا ولد عيييب ..

غمضت عيوني ..
وفتحتها من جديد ..
اخذت حسرة ع طفولتي الي ضاعات بايد قسوة ابوية ..
الي مالها سبب
يصنع رجل ..
احسه صنع وحش مو رجل ..
واني نفس الاسلوب تبعته ويا سبع ..

رغم هوى الله كله
اختنكت اكثر ..
واحتاجيت ريام ..
ترتب حياتي الي تخربطت كلها وانتهت...
باوعت ااساعه بعد وكت اروح الهم عيب
دك الباب من هسة
اتصلت ..
مرة مرتين اكثر نفس الشي
مغلق ..
الحيرة والقلق زاد
اخاف امها صار بيها شي
معقوله ..
والحلم ..ضل بفكري وابالي ..
ماعرف شكد ضليت كاعد وافكر .
مديت ايدي ع باكيت الجكاير شفته ..
خلص ..
من التفكير ولا اذكر اشكد دخنت ولا فكري شنو قرر..
قرارات اهوايه
اولها ابيع البيت
وابلش حياه جديدة ..
ويا عائلتي واطفالي ..
وابتعد عن ضغوط الماضي ..
وبقيت اردد اني استحق حياة افضل ..
حسيت بابنا الداخليه  انفتحت ..
وطلعت ..
امي ..
ليث ليث ..
مديت راسي
نعم ..
شعندك كاعد من الصبح
كمت ..
ها ماكو شي ..بس شبعت نوم ..
ساعه بيش ..
دارت وجهها كالت عبرت التسعه ..
خوش لعد اروح اجيب ريام ..
ماتتريك ..
لا لا اجيبهم ونتريك سوى ..
صعدت فوك ..
الكل كعد من نومه ..
طبيت للغرفه ..
فتحت الكنتور ..
طلعت ملابس الي ..
انتبهت اكو هدوم ..مخربطه بالكنتور ..
وهوسه ..
سديت الكنتور
بديت انزع ..
رجعت فتحت الكنتور ..
طلعت الهدوم الي واكعه
شكد اضوج من الهوسه ..
وكع منها شي ..
شنو هذا ..؟؟؟
قطعه ذهب ..شنو هاي تك تراجي ..
مين اجتي ..
اكو مجرات داخل الكنتور ..
هناك ذهب ريام..
دورت ماكو ..العلبه ..
استغربت وينها ..
منو صاعد لهنا ..
معقوله شايلتها ..
هي ؟؟؟؟
وواكعه منها القطعه ..
دكيت عليها اكثر من مرة ..
بين مداابدل ..
ماكو مغلق ..
لا اكو شي مو طبيعي ..وينها معقوله نايمه
خلي ادك ع الولد
بقيت افتر بالغرفه ..
اريد اتصل واتراجع ..
ماريد اتصادم وياهم ..
احسن حل اتصل بامها ..
اي ..
اخذت السويج ونزلت من الدرج
دك ...
جاوبت
هلا يمه ..
شلونج خاله ..
هلا شلونك ابو سبع ..
برحمه الله وانتو خالة ولو داضوجكم وينها ريام
نايمه يمه ..
ها اجي هسة عليها كعديها وفونها مغلق من البارحه
ليث يمه اني مكرمه وكاعدة بالغرفه بس بابهم مسدودة
حتة الولد نايمين
وهي خوما بيت غريب ..
من يكعدون ..اخليها دك عليك
لا خاله مداقصد هيج بس ضل بالي وعبالي نتريك سوة
كالت ...تعال يمنا اتريك ..
لا شكرا ..
اجيهم العصر ..
وسديته منها ..
صعدت بسيارة وطلعت من الكراج ..وابالي اخذ كيمر وكاهي وارةح لاهل ريام ..اي خوش حجة اروحلهم هسة ..

بس طلعت من الكراج
اندكت باب السيارة
اندرايت
مراة عجوز جبيرة
ادك بالجام
نزلت الجامه
اتفصلي ..؟؟؟
كالت
يمه انت استاذ لليث
اي نعم تفضلي .
بدون مقدمات ..انهارت
يمه دخيلك ودخيل اهلك انة واكعه عليك
شكو حجيه منو حضرتج
جانت تنهد وجر النفس كوة
يمه اسمعني انت لليث ..
اي اني ..
فتحت الباب ونزلت
تفضلي المطلوب شنو ..
اكدر اساعدج بشي ..
جان شكلها كلش تعبان ..وتحجي وحلكها يابس ..
وترفع اديها ع وجهها وتمسح دموعها بشيلتها ..
واديها ترجف ..

......
بحياتنا الحذر واجب ..
مو من منصب لا كوضعية عامه ..وامن بلاد ..
لكن هالمراة حسيت منها بمصداقيه ..
ورجفه اديها ..يستحيل تكون ..تمثيل ..
كتلها اصبري الي ..
قفلت سيارتي ..
كتلها حجية هذا بيتنا ..تفضلي جوة .واسمعج واساعدج بالي اكدر عليه ..
باوعت ع البيت وعلية ..
كالت ..
اني مو مجدية ..اني طالبه جاحه وحاجتي يمك ..
مادخل بيتك ..
اكعد هنا ع تيغه ..
الي بالباب واسمعني هنة كلمتين وارد لاهلي ..
مشت كدامي وكعدت ..
وكفت كبالها ..
ادخلي احسن نكعد بالحديقه ..
لا ابد ادخلك من تنكظي حاجتي ..
دكيت
الجرس ع اهلي ..

اسمعج ..

يمه دخيلك اروح فدوة الك ..
حجية الي تردي شنو واني حاضر ..
ابني يمه ..
شبي ..
ابني يمكم ..
ودزوني عليك ..فدوة اروح الك ..
الله يحفظك لشبابك ..
والله والله ..
مامسوي ذنب ..
وراح بيها ..
بهالاثناء ..طلعت كريمه ..بالباب ..
كتلها جيبيلي كرسي ..ومي بارد شويه ..
استاذ ليث شكو
ماكو شي ..روحي وسدي الباب ..
دقايق واجتي ..
كعدت كبالها وجانت الشمس تضرب ع وجهي..
وملامحها ..
وتجاعيد وجهها ودك الي ع وجهها موواضح ..
بسبب الشمس ..
بس جان اكو عطر بيها ..
مثل ريحه البخور ..
رغم قوتها بس حسستني بالامان وياها ..

....
كملي ..مفهمت شي لحد هسة يامي انتي ابنج شجابه يمي ..

يمه يمك الولد كالو الي اقسم برب الكعبه من الفجر انا طالعه وعافيه وراي مرته وجهاله اربعه ..
ومكابله المركز مالكم ..وماكو رجة يايمه ..ماضل سكر ضغط كلهن صعدن وماشفته
احلفلك بيش تريد ماله شغل بشي
كل الي صار ..
واخذت حسرة وفتحت الماي ..
تريد تقربة لشفته اديها ترجف والكاع تبللت وهي لحد هسة ماشربته ..
خلت شويه باديها ووغسلت وجهها وعدلت شيلتها ..

كالت هناك يمنا ..
جواد ..ابن ديرتنا ودوم ياخذة بكروة يايمه العيشة صعبه
والفروخ هواي ..عدنا وكلها فاتحة حلكها ع اللكمه ..
وابني محمد ..بس هو يشتغل ..تكسي
اخذة جويد
وعبر بي لهنا يمكم ..ولزمو
الوادم تكول لكو بسيارته مخدر والله يابني بس بلمسلسل نشوفه هالمخدر وابني ماله ذنب
وابني راح بعد ..
دك عليه كال يمه رحت اني الحكو الي ..
وجيت هنا ودورت لكيته ..
بالمكافحه يايمه
والله كفيلك ابو فاضل لا اله بالمخدرات ولا شي ..

حجية مافهمت شي يامخدرات ويا مكافحة
الي دلاج عليه غلطان
لزمت ايدي وجرتها تريد تبوسها ..الله يحفظك ويعمر بيتك اني مثل امك ودخيله يمك لا بيتنا هنا ولا ديرتنا ابوس رجلك
لا استغفر الله انتي امي ..
بس ..مو شغلي هذا ..
لايمه قبل يومين لازميهم ويمكم
بين ماتصعد اوراقه
اها ..
يامي اذا لازمي بحوزته شي هذا ماكدر اسوي شي ..

اني الي عليه احقق ..واطلع الصدك من الكذب ..
واسد المحضر ويصعد للقاضي يامي ..

يمه دخيلك ..
بقى الوضع فوك ااساعه واني مامفتهم شي ..
الى ان ..اخذت اسمه الكامل ..
قنعتها تروح واني اتوله المو ضوع اذا جان مظلوم ..

واذا  لا احاول اساعدها بشي بسيط ..
اتصلت بزميلي بشغل ..
وكتله لا صعد اوراقه واني اجي احقق وياه ..

اباوع الساعه اجاوزت ال12
جان الوكت يمشي بطيئ ..
ويوم غريب ..
رجعت اتصلت بريام ..
وكذالك مغلق..
الحيرة والقلق دخل بروحي اكثر ..
فريت السيارة
وتوجهت لبيت ريام ..
مستحيل لحد هسة نايمه الا اكو شي ..وينها ..
اكو انسان طبيعي لل12نايم ..
وصلت للمنطقة ..
مالتهم ..
ودخلت بالفرع واحس راسي متبنج بين الحلم والذكريات والحجيه وريام ..
من بعيد اشوف صهيب وايمن بالباب وولد يمهم ..
القلق زاد بأن اكو شي ..مو طبيعي .
وصلت ..وكفت السيارة شوية بعيد ع البيت ..
نزلت ..
وعيني عليهم ..
من بعيد ..
صاح صهيب ..
ولك ..اكسرك اليوم ..
وايمن يجر بي ..
وين ريااام وين وديتها ..
وللحكايه بقيه
شهرزاد ..