#البارت_الأول
مساء الخير اسمي نارين عمري 23 سنه طولي 165 وبييضه ثلج عيوني عسليه شعري بني من الله عايشين بالبيت اني وماما واخويه الجبير ألي مطيح حظنه بليل شرب وسكر والنهار كله نايمه بالكوه عايشين ماما عدهه مكينه تخيط بيهه للجيران وتطلع هذا القاسمه الله واني اشتغل انظف بالبيوت حتى دراستي بطلت منهه جنت اشتغل خدامه عند بيت كل يوم اروحلهم بيت ابو سدير الي بي سدير وهوه دكتور وهوه الي معيش عائلته .. واني احبه اي احبه من جنت اشتغل يمهم كلش معجبه بي وهوه ولا مهتملي وحبيته اول شي على جماله شايل جمال الكون كله مشايله من اباوعله اكول سبحان الخالق اروح يمهم الصبح اشوفه يطلع كامش الستره مالته والجنطه ويروح للعياده مالته يعني شخصيه فد شي ..وامه عايشه وياه خوش مره وحبابه وتحبني وترتاح التظيفي ومخليتني على راحتي شوكت مااروح او شوكت مااجي عادي بس اذا يكون عدهم شي ضروري او خطار لازم اكون يمهم ...واخو الاكبر منه أبراهيم متزوج وعايش بأمريكا عنده 2 اطفال ولد وبنيه وميجيهم يجيهم بالسنه حسنه يشوفهم يبقه يمهم شهر ويرجع لأمريكا هوه وزوجته ...واخته سهاد كلش حبابه وتداوم كليه اول سنه الهه كلش شاطره وحبابه وهادئه واحبهه ... تمر الايام واني وماما عايشه اسوء أيام حياتي ويه اخويه احمد معيشنه عيشه تعيسه بنص الليالي يجيب اصدقائه ويكعدون شرب وركص واني وامي خاتلين بالغرفه وقافلين علينه الباب وكاعدين نبجي على حظنه امي المسكينه مابيدهه شي تسوي اكثر من مره كتلهه نشتكي عليي ومقبلت هذا حنان الام الي يعمي عيونهه حتى عن سيأت ابنهه ..شوي وراحو اصدقائه وصاحني
_تعاي ولج فرشيلي خلي انام
كتله بداخلي ونومة التنومك وماتكعدك رحت فرشتله ونطمر طبعا بيته كلش صغير بي غرفتين استقبال ينام بي احمد وغرفه جوه صغيره اني وامي نام بيهه وبره اكو حمام ومطبخ وعايشين هيج هذا القاسمه الله ..
كعدت ثاني يوم بدلت جانت الدنيا كلش بارده يمكن الحراره تحت الصفر لبست بنطلون يصير مثل الستريج اسود وبي كفه شوووي و وياه بوتين ابيض لماعي وبلوز ابو الركبه طويل ابيض وفوكاه قمصله سوده وبيهه لماعي ..اني مامحجبه ﻷن هيج عاجبني واني حلوه اخلي فوك راسي لكلاو مال القمصله واطلع
اخذت جنطتي وسلمت على ماما وطلعت توجهت لبيت سدير طبعا بيتهم يبعد علينه فرع
وصلت واني دادك الباب شفت بابا الحوش نفتحت الحارس فتحهه وشفت سيارة سدير يريد يطلع صاعد بالسياره يمه شطااالع يبووو ضليت صافنه هوه اشرلي بأيده اوخر علمود يطلع اني وخر وهوه طلع
دخلت للبيت سلمت على سهاد و ام سدير وكذلك نضفت ولتهيت بالبيت حظرت الغده خليته على نار هادئه لبين ميجي سدير واصب وياكلون
وره شوي سمعت صوت سياره باوعت من باب المطبخ شفت الباب دينفتح مال حوش اني طلعت للحديقه الي تقابل الباب ووخليت ايدي بجيبي واباوعله هوه شافني واستغرب دخل السياره ونزل بعصبيه
_عمو صلاح قفل السياره داخل جوه
وشمر عليي المفتاح مال سياره ويباوعلي بخزره يربي شكو شسويت اني ليش يخزرني بس يمه فديت هالخزره الي تجنن ولله ..
دخلت وراه من باب المطبخ لكيته كاعد على الميز ومخلي سترته ع الكرسي ومحد بالمطبخ
بديت اصب بالاكل وبدون اي كلمه وانقل على الميز وهوه مكتف ايدي ويباوع رحت اريد اصب الماعون الثاني واحس خطوات قريبه مني نداريت شفت سدير يمشي ورايه ومكتف ايدي الصراحه اني ارتبكت وخفت اول مره هيج يسوي لا واصلا سلام ميسلم عليه ااف عركتت .. وصل يمي كلي
_شعندج قبل شوي طالعه
اني مجاوبته ضليت اباوعله مصدومه من كلامه يربي اول مره يحاجيني راح اموت
انداريت اصب بالماعون
_اتعلمي من احد يحاجيج جاوبي منو الي احاجي ويدير وجهه عني
اني درت وجهي وباعتله
_ااني جنت بره بسس اااشم هوه يعني اكو اعتراض
_ومستحيتي من انفتحت الباب وبيتنه عام وناس رايحه وجايه وانتي بستريجج
يبو رح يخبلني هذا الولد ولله اول مره يحاجيني صدك راح اموت
وبعدين هوه شعليي بيه
_ل للليشش لببسي مبي ششي
ضرب الكاونتر على كيف وكال لا بي شي
وباوعلي من جوه ورفع عينه عليه بغرور وهوه عاوج حلكه وراح كعد ع الميز صراحه اني متت بمكاني اول اووول مره هيج يسوووي اااف
صبيت الاكل وبسرعه طلعت صحت ع امه واخته وراحن ضليت الهي نفسي وماافكر بحركاته كمت اروح منا واجي منا سمعت صوت
_نارين ماما تعااب تغدي
_لا خاله مااشتهي
_تعاي تغدي يعني تعاي كافي ماشي
ياربي هذا صوت سدير يعني هوه صاحني على الغده اووول اووول مره بحياته راح اموت صدك اليوم..
نزلت واني مرتبكه كعدت يمهم وبالكوه اكل
خلصت بسرعه وكمت وهمه خلصو سدير خلص وراح غسل وصعدت الغرفته وسهاد هم هيه وامهه اني لملمت المواعين وغسلتهم وعزلت المطبخ طلعت لكبت البيت هدووء وكلهه نايمه كلت خلي انظف طبعا اني نظفت بس الجوه ﻷن امه كلتلي والفوك منظفته وبيتهم مشاء الله شككب رره فوك بي 3 طوابق
اخذت غراض التنضيف واني اتيه بالغرق نفس البيبان ومادري هاي غرفة منو وهاي غرفة منو نضفت غرفتين ولمعتهن تلمع فوك عدهم سطح وغرفه وجوه بالطابق الثاني 4 غرف الي هيه غرفة سدير وغرفة سهاد وغرفة امهم وغرفه فارغه مخليهن بيهه ملابس وصخه ومنضفات وهيج شغلات
المهم نضفت غرفة خالتي لكيتهه طاعده كلتلي تعاي نظفي نظفتهه وطلعت وهيه رجعت نامت انوب نظفت هاي الغرفه الفارغه ولمعتهه وحتى عدت اثاثها صارت حلوه رحت للغرفه الي بصفهه الي ماعرف غرفة سهاد او سدير فتحت الباب على كيف دخلت وسديته هم على كيف جان شفت سدير على الجربايه نايم بالكيمونه وعضلاته طالعه ياالله يجنن ملاك ونايم تقربت منه وضليت صافنه عليي ربي من شنو خالقه من ذهب مستحييل هوه طوله 180 واسمراني يخبل ومعضل وشعره اسووووود وعنده لحيه وهم سوده وتموت عليي عود كل رجال رجال خرب لو هوه لو مااريد 😭😭
تقربت منه واني صافنه بشكله درت وجهي غرفته مرتبه وعطرهوعطره تارسهه ترس رحت على الميز مال الجربايه الي يصير قريب عليي شفت يمه ورق واقلام ودفاتر شفت ورقه صغيره اخذتهه شفت مكتوب
((احببتها ولم تعلم هي تعلم فقط أنني اشفق عليها)) وكاتب جواهه
((يكفي لي ان ارى عيانك الذي يسحراني))
😳😳 لاياربي مستحيل يحب وحده مستتحييييللل كامت عيوني تجري واني كامشه الورقه حتى تنكعت دموع درت وجهي اريد اطلع واحس ايد لزمتني نداريت شفت سدير فااتح عيونه بتعجب ويباوعلب وكامش ايدي اخذ الورقه مني وشكاهه
_ منو كلج تدخلين الغرفتي
_معبالي غرفتك بالبدايه
_ ومن تشوفيني نايم تطلعين مو تجين تدورين بأوراقي
_لحظه دكتور اسفه اذا ادخلت بشي من خصوصياتك بس جنت انظف وشفت هاي الورقه بالصدفه
_أي وﻷي نتيجه وصلتي
_لا مردت أي نتيجه مجرد صدفه ها وصدك الله يسعدك ويسعدهه الي تسحرك وابتسمت اخذت غراض التنضيف وهوه ضل صافن عفته وطلعت ركض للمطبخ وابجي ياربي طلع يحب وحده لا وكاتب تسحرني ومدري شنو ولله كلبي تعذب شوكت ارتاح شوكت يحس بيه انو اني احبه
خليت الغرتض ورحت لبست قمصلتي وبوتيني وطلعت من باب المطبخ وطلعت لبيتنه رحت دخلت لكيت احمد بعده نايم من نومه التطمرك ياقذر الي عيشتني كل عمري اخدم بواحد ميستاهل حبي اله ويحب وحده اووف يابابا وين خليتنه ورحت تعال شوف حالنه شوف ماما شحالهه من عفتهه وشوف ضيمي وين وصلت وتعال شوف هذا السكير شلون متعبنه الله يرحمك بويه ...
دخلت للبيت كابلتني ماما سلمت عليهه وبوست راسهه دخلت سبحت وبدلت وارتاحيت رحت للغرفه ماما صاحتني اتغده كتلهه متغديه ونمت .
كعدت باليل سويت عشه وتعشينه اني وماما طبعا احمد كالعاده طالع ويه اصدقائه شرب و ورق الله لا يسامحك يا احمد شوكت نخلص منك
واحنه دناكل شفنه الباب ندفر دخل احمد شارب دفر الصينيه ويعيط اني ختلت وره امي وامي تصيح وتبجي
_ادب سززز باجر يجي يعقد عليج محمد
ماما_محمممد لا يمه كلشي ولا محمد استر على اختك هذا سكير وسرسري
_يطبهه مرض ترضه مترضه خلي اخلص منهه باجر يجي الولد يشوفهه ويعقد عليهه وخلاص
اني هنا مصدومه ودموعي تجري لازم اشتكي عليي
وخرت من امي دخلت للغرفه خابرت سهاد كتلهه
_فدوه سهاد تعالو ساعدونه فدوه بسرعه
_شكوو نارين
_بعدين افهمج بس تعاي ساعديني اروحلج فدوه
_دقايق ويمكم
قفلت التلفون ورحت يمهم واحمد يصيح
_مااتزوج محمد لو يضل اخر رجال بالعالم سمعت ماازوج هذا السكير
_طولان لسانج كح... فا.... شوي والباب مالتنه تفلش من الدك اريد اطلع افتح جرني من شعري احمد وسحلني سحل وكتل وضرب بالحزام وامي تعيط لحد مدخلو علينه سهاد وسدير وامه واني ناطه مفرفرحه موتني من الكتل دخل سدير شبعه كتل وهذا يعاركه وماما وامه يفارغوو لحد ماسحله وطلعه بره البيت خابر صديقه الضابط واجوي اخذوه وهوه سكران نايم
دخل سدير يركض
ماما_لله لا يوفقك يااحمد ماتت البنيه
ام سدير_بس فهموني شكوو شصاار
ماما_ولله يااختي يريد يزوجهه الصديقه واحد سكير ويطب ويطلع على البنات وهيه هم بنيه من حقهه تشوف مستقبلهه شنو تزوج واحد سكير يكومهه بضربه ويكعدهه بضربه
سدير_شنوو يزوجهه سكير ولله للعظيم ادفنه هنا
اني كاعده واول من الالم الي بجسمي وسدير واكف كدامي وداير ضهره وصاير عصبي وطالع من حلكه دم ويمي سهاد تهدي بيه بعد ماكال ادفنه هنا حتى نسيت وجعي ..
ام سدير_يله كومو ويانه اليوم ترحون
ماما_لا عيني وين نروح
سدير_خاله كومي فدوه نفذ صبري زين وماكتلته بأيدي واخلصكم من ضيمه
يبو هم دكتور وهم صاك وهم طاك وهم متكعد راحه على كيفك وياي موتتني 😍😭
كمت ساعدتني سهاد وسدير يباوع على حالتي جان دار وجهه وطلع اني ساندتني سهاد وانطتني ملابسي وبدلت وطلعنه وبعدني اون من الالم وصلنه البيتهم دخلنه وسدير طبك السياره بالحوش ونزل وهوه كامش لحيته اني جنت كاعده ليوره بجهة سدير نزلت امي وامب سدير وسها اريد انزل فتحت الباب ونزلت اريد اسد الباب مال سياره لزمت راسي وحسيت نفسي دخت وجان بصفي سدير نزل ويايه وماحس اله واكعه بحظنه وبعد محسيت بشي غي ر اني بالمستشفى وفوكاي ماما وسهاد وامه وهوه ماكو امي تبجي اول مكعد كللي الحمدلله على السلامه
_الله يسلمكم
ضليت كاعده يسولفن كدامي حتى ينسني همي واني اون جان دخل سدير كامش عصير انطاهن وبقن بيده ثنين باوعلي نظره متنوصف وانطه واحد السهاد وأشرلهه عليه اني فتهمت انو اليه كومتني سهاد وانتطتني اشرب شربت شوي وخليته على الميز شربت مي واكلت فواكه لثاني يوم طلعت الصبح ب 9 رجعنه للبيت تمددت على الجربايه بغرفة سهاد ونمت واني تعبااانه حيل.
_____________________________
#البارت_الثاني
كعدتني سهاد وكلتني صرت شوي احسن كمت سبحت وبدلت لبست تراك اسود بجامته مثل الستريج سوده والبدي اسود بي ذهبي
رفعت شعري ذيل حصان 😂😂😂
ونزلت يمهم سدير طالع للعياده وسهاد راحت للكليه
ماما_هاي شنزلج
_صرت زينه
ام سدير_ لا يمه اكعدي ارتاحي
_شبيكم ولله صرت زينه خلي احظر الغده
ورحت حمست اللحم وخليت الباميه وسويت تمن وسويت مقبلات وحظرت كلشي سمعنه صوت السياره مال سدير دخل للحوش ونزل ااني كمت انقل بالاكل دخل من باب المطبخ
_السلام عليكم
_عليكم السلام
باوعلي _ها نارين شلون صرتي
_زينه الحمد لله
هز راسه وراح للحمام غسل ورجع كعد وكمت انقل بالمقبلات وام سدير وماما كعدن
انوب كعدت اكلت بهدوء وبالكوه ﻷن استحي منه هاي ثاني مره اكعد ويا على الاكل 🙈🙈
خلصت ولملمت المواعين ونضفت المطبخ وسويت جاي قدمتلهم وكعدن يسولفن ماما وامه وهوه شال سترته وصعد لغرفته أني كعدت شوي انوب اخذت جاي وطلعت بالحديقه افتر واشرب واردد اغنية معقول الغرام نانسي عجرم
ضليت افتر سمعت ماما تصيحني دخلت
_يله عيني بدلي نرجع البيتنه
ام سدير_شنو وين لبيتكم يمعوده
_لا ولله ازعجناكم وتعبناكم وماعرف شلون اشكركم على وكفتكم ويانه
_صدك جذب لا شكر على واجب بس وين رايحات
نارين_لا خاله ولله هم يله والبيت مناك ضال هدد
دخل سدير وهوه يعدل البدي مالته جان مبدل ملابس مال بيت
_منو يروح
_شوف يمه يردن يرحن
باوع الامي وكلهه وين خاله صدك جذب
نارين_ولله دكتور تعبانكم وشكرا على وكفتكم ويانه
هوه باوعلي بتعجب
_لعد مدام مصرين على رأيكم اني اوصلكم
وصعد الغرفته
اني صعدت وراه الغرفتي بدلت لبست ملابسي مال بارحه والبوتين واني دااطلع شفت سدير ديطلع من غرفته الي بصف الغرفه مال سهاد باوعتله وباوعلي عفته ونزلت انتظرناه بالحديقه نزل وصعدت بالسياره سلمنه على خالتي وكتلهه سلميلي على سهاد ورحنه للسياره اريد افتح الباب الوره امي كالت
_اني اكعد ولله ﻷن تعبانه انتي ليكدام
سدير دار وجهه باوع ولزم لستيرن اني صعدت ليكدام وامي ليوره مشينه بلا صوت
وصلنه ونزلت امي دخلتهه وطلعت السدير جان منتجي على السياره ومكتف ايدي رحت يمه
_شكرا الك تعبانك
_عفوا ديري بالج على امج وباجر نروح للمحكمه
_محكمه
_أي علمود ينحكم اخوج
_لا منكدر نروح ماما تعبانه
_امج تعبانه لو انتي
ضليت ساكته ودنكت
_باجر حظري نفسج انتي امج متروح اجي اخذج
وصعد بالسياره وراح اني دخلت نضفت البيت وعطرته وفرشت الماما وكعدت كتلهه باجر اروح للمحكمه هيه كالت لا عوفي همه شوكت ميحكمون خلي يحكمون عليي معلينه بعد كتلهه ماما مو باجر يجيني الولد كالت على راحتج
نامت واني هم نمت يمهه كعدنه بالليل ب10 من التعب سويت عشه وتعشينه وضلينه كاعدين اني وماما سولفنه ل12 نمنه
كعدت الصبح بدلت لبست جينز زيتوني وقمصله زيتونيه وبوتين اسود وبدي اسود اخذت جنطتي وانتظرت يجي سدير امي جانت نايمه
سمعت صوت هورن فتحت الباب قفلته وطلعت لكيته صاعد بالسياره شطالع كمر كمررر لابس قميص ابيض وفوكاه يلك اسود ومخطط ب نيلي وبنطول اسود هم مخطط ب نيلي ومخلي نظارات شمسيه
فتحت الباب وصعدت
_صباح الخير
_هلاا
كالهه من وره خشمه 😒
وصلنه للمحكمه دخلنه وانتظرنه لحد مااجه كامشينه باوع عليه بحقد واني باوعتله ودرت وجهي دخلنه للقاعه
وحكمو عليه سنتين
من طلع باوعلي كتلهم ممكن احجي وياه
_مع الاسف عليك الاخ الي اعتبرته اب بدال بابا هيج يسوي باوع هاي نهايته الي يسوي هيج ابقه بالسجن ابقه
ضل ساكت وانداريت السدير وطلعنه
صعدت بالسياره وعيوني مغوركه مسحتهن هوه باوعلي
_عليمن تبجين على واحد ميستاهل
_مو عليي ابجي على حظي الي خله هيج شخص يعيش وياي جان معيشني اتعس عيشه لو تشوف مكومني بضربه ومكعدني بضربه يدخل اصدقائه بليل يشربون ويركصون ولا عبالك عنده اخت شابه ضاله جوه قافله الغرفه عليه وابجي واندب بحظي لا وجاي يكلي تزوجين صديقي اني ازوج واحد سكير يطب ويطلع على البنات اني جنت اتمنى اتزوج واخلص من عيشتي وياه بس مااعيش مره ثانيه واخرب حياتي ويه واحد مثله تعبت تعبت منه بابا عافني وراح خلي يجي يشوف ضيمي وين جنت وشلون صرت ااف ياابابا تمنيتك ويايه ..
جان يباوعلي وكامش الاستيرن بقوه
_يله اهدأي اهدأي
حرك السياره
باوعتله
_اسفه
_على شنو
_على الي صار
_لا عادي فضفضتي
ابتسمت
وصلنه المطعم
_هاي وين جايين
_تعاي شربي عصير ارتاحي شوي
_لالا شكرا ارجع للبيت ماما وحدهه
_هسه دنزلي
نزلت وسديت الباب مشه ورايه هوه
دخلنه للمطعم طلب عصير بس الي
_اشربي
_ليش ماجبت الك
_ماريد اشربي
_اسفه انتي تعبتك هواي
باوعلي بغضب وكلي
_كتلج اشربي شكد تلغين
خفت وشربت اشوي خلصنه ودفع وطلعنه وصلني للبيت وراح
اني دخلت لكيت ماما تتريك تريكت وياهه وسولفتلهه عن الي صار محجت شي
_يله اني اروح لبيت ام سدير
_ماشي
بوستهه وبدلت وطلعت تمشيت بالشارع وصلت لبيتهم فتحلي لباب الحارس مالتهم ودخلت شفت سيارة سدير موجوده يعني ماطالع 😆😆
دخلت البيتهم من باب المطبخ جان هدوء صعدت لغرفة سهاد ملكيتهه رايحه للكليه دخلت لغرفة ام سدير نايمه نزلت للبيت نضفت وغسلت الحوش دااغسل وطلع سدير لابس بجامه سوده وبدي نص ردان 😱 رصاصي جنت كامشه الصونده باوعتلي هوه جان كامش موبايله يخابر شافني وراح كعد بالمرجوحه
أني كمت أنضف رشيت الزرع مي درت وجهي لكيته مخلص المكالمه ومخلي ايدي بجيبه ويفتر
أني شلت غراضي أريد أدخل جوه
_ليش أجيتي نارين
_ هاا دكتور
_ليش أجيتي للشغل
_عادي صرت زينه كافي دلال وابتسمت
هوه باوعلي
_البيت نضيف وكلشي تمام ارجعي للبيت
_وأني ماأريد أرجع اكو مانع
مدري شلون أجتني الجرأه وهيج حجيت انوب كمت ارجف
تقرب يمشي على كيف
_صايره هواي تحجين مو صح
_😂😂
_روحي للبيت
_منتظره سهاد شوي وأروح ودرت وجهي بغرور
هوه غضبب ووجهه صار احمر من العصبيه اجه من وره لزمني من زندي حيل ودارني عليه بقوه أني صيحت ااخ إيدي
_من يحجي وياج سدير تعلمي مديريله ضهرج واحجي عدل
_أني شحجيت دكتور
عافني وباوع لزندي ﻷن لزمني حيل جان دخل للبيت
أني ضليت كامشه زندي هنيالي كمشني هذا لصاك الي من اجيتهم ليهسه ميسلم عليه هسه كمشني فدوووه 😍😍
دخلت الغراض لكيته كاعد بالمطبخ على الميز يكلب باللابتوب أني صفطت الغراض وحميت الغده
_شكرا مااريد غده
_ومنو كلك الك ألي
_😡😡
حبيت اغثه وهوه عصب بقه كاعد يسوي باللابتوب اني دااصب غده ودخلت خالتي سلمت عليهه وكعدت اكلنه اني وياهه هوه مقبل ياكل ملتهي باللابتوب .
_____________________________
#البارت_الثالث
كملت اكل دااغسل المواعين واجتي سهاد بوستني
_شلون صرتي نونو
_هههه زينه الحمد لله انتي شلونج بالكليه
_الحمدلله ..ميته من الجوع متغديت
_غسلي واكعدي هسه اصبلج
_تسلم ايدج حب
راحت غسلت وكعدت على الميز وسدير بعده كاعد
حظرت الغده السهاد وخليته كدامهه
وحميت الجاي انطيت الخالتي وخليت كدامه هم جاي هوه باوع بطرف عينه على الجاي انوب باوعلب اني كعدت اشرب جاي وهوه ولا طخ الجاي
كمت اسولف ويه سهاد وتسولفلي عن الكليه وسوالف الحب وكذا وكذا وكل هاي السوالف سدير بعده مطاخ الجاي وعينه باللابتوب
كامت خالتي
_اريد اروح للسوك يمه
سهاد_صراحه اني هم
سدير_اوصلكم
_لا خلي عمو صالح يوصلنه أنت مشغول
هز راسه وكال ماشي
_ماما انب مبدله انتي بدلي ويله نطلع انتظرج بااي نونو
_الله وياج
صعدت خالتي لبست عبايتهه وحجابهه ونزلت وطلعو اني لميت الكلاصات مال جاي وغسلتهن وردت اغسل المطبخ اتلوك كدامه رفعت بطروني هوه يصير مطاط بسرعه ينكف كفيته طلع نص رجلي وومسحت المطبخ كدامه هنا درت وجهي وماشوفه اله طبك اللابتوب بعصبيه وحيييل اني كمزت اخذ لابتوبه وصعد الغرفته
أني صفت شنو منين نفعل كملت المطبخ وكعدت على الميز كتفت ايدي وخليتهن على الميز ونمت عليهن واني اتذكره فدوه لألله من اشوف عيونه اذووب شكد يخبل شخصيه ..
وماحس نفسي اله غافيه
حسيت شخص شالني بس محسيت بنفسي تعبانه ومفتحت عيني سندت ايدي على ركبتة حييل وحسيت نفسي نمت على جربايه بسرعه فتحت عيني شفت فوكاي سدير دينزلني للجربايه واني لازمته من ركبته حيل بسرعه وخرت ايدي وطفرت باوعت كتله
_اسفه غفيت
_أي هذا مصيره ألي ميرد عليه
_شنو قصدك
_قصدي كتلج ارجعي وماقبلتي
_وأني كتلك صرت زينه بس نعست
_يله كومي روحي لبيتكم
_ماشي رح اروح اصلن ماريد ابقه يمك
_وشعليه اني
_لاهيج 😒😒
_كومي لبسي قمصلتج و ولي تره مالي خلكج
_منو الي تولي
_أنتي ولي ماشي
_اي بسيطه اولي ليش لاا
وغطيت راسي ونمت عنادا بي هوه جرني وكومني من ايدي
_أني قبل شوي نبهتج شي صايره عنوديه
_بكيفي شعليك وبعدين ماالك حق تلزمني
_هاا ولله
وضغط على أيدي
_شبيك عوفيني أيدي توجعني خلصت من أحمد تجيني انته وكمت ابجي هوه هنا عافني وباوعلي
_يله روحي البيتكم ونامي
عافني وطلع أني لبست قمصلتي وطلعت من الغرفه لكيته واكف مباوعتله أريد أنزل كلي
_أني أسف بس انفعلت شوي
_شووي هههه انته دائما منفعل
_حركاتج تخليني اعصب ف احترمي نفسج
باوعتله وعفته ونزلت هوه بقه واكف
نزلت وطلعت للحديقه فتحت بابهم وطلعت امشس الى أن وصلت لبيتنه فتحت الباب مال حوش ودخلت للبيت اول مدخلت شفت بيت جيرانه مره جبيره يمنه
_السلام عليكم
_وعليكم السلام
المرأة_اخيرا اجيتي شلونج يمه
_الحمدلله بخير
امي_روحي بدلي وغسلي وتعاي
هزيت راسي ورحت بدلت وغسلت ورحت يمهن
المرأة_اني ماريد الف وادور رح ابدي وياكم من البدايه
_كولي خاله شكو
_حبيبتي اني جايه اطلب ايدج ﻷبني حسن وانتي اخذي راحتج شوكت متوافقين ردينه جواب
اني هنا نصدمت انسدت كل البيبان بوجهي احس سجينه ودخلت لكلبي بس افكر واردلهه الجواب هوه اني شبقه من حياتي وضاله اركض وره واحد ميحبني خلي اعيش حياتي
_انشاءلله خاله باجر اردلج جواب
امي_انشاءلله خير
_يله عيني اني استأذن منكم وانتي بنتي اخذي راحتج بالتفكير شوكت متردين ردي خبر
_انشاءلله خاله
طلعت من عدنه المرأه واني رحت الغرفتي اجتي ماما
_يمه انتي شايفته الولد حلو وخوش ولد وحباب
_اي ماما انشاءلله هسه بس خلي افكررر
رحت نمت واني افكر اوافق لو ابقه على حظي
كعدت بليل سويت عشه وحتى بدون مااحجي تعشينه اني وماما
_يمه هيه باجر تجي المرأة
_اي باجر تجي انتي فكري
خلصت اكل ورحت سويت جاي وشربنه اني وماما واجتني صفننه ومحست على نفسي كلت الماما بدون ماباوع عليهه
_موافقه
_شنوو موافقه يمه شفكرتي
_يمه موافقه ولله شو هوه خوش ولد ومناقصه شي وبعدين ليش يجيني واحد غريب هذا وبيتهم بصف بيتنه واضل طالعه وداخله عليج
_على راحتج يمه هيه المرأه باجر اخابرهه واكلهه وافقت ونحدد موعد العقد اي عادي شوكت متسووهه عادي هسه اريد انام_روحي روحي يمه
رحت نمت كعدت الصبح للشغل تريكت ويه ماما
_اكلج خابرت المرأه وكالت العقد السبت
_اي يمه ماشي
_كلي لسهاد والام سدير خلي يجن
_اي يمه
طلعت واني امشي دخلت من بابا المطبخ سيارت سدير موجوده شعجب مطالع دخلت لكيتهم كاعدين يتريكون
_صباح الخير
_صباح النور
_تعاي تريكي يمه
_تريكت ولله
هنا دك تليفون ام سدير
_الو هلا ام احمد
هاي امي
باوعتلي وابتسمت
_هاا عالخير ..اي اي انشاءلله اكل لسدير ...اي اي ..هوه السبت مو ..ماشي..انشاءلله تشوف كل خير ...الله يسلمج ..مع السلامه
_ع الخير حبيبتي
_تسلمين خاله
سدير وسهاد صافنين ميدرون شكوو
سهاد_شكو ماما
_نارين السبت العقد مالتهه
سدير_شنووو
_شكو يمه
سدير_هاا ع الخير نارين
وجر سترته وطلع من ورايه
سهاد_ع الخير نا رين حبي
_تسلمين عيني يله اريد انضف ااطلعوو 😂😂
_ع راحتج
طلعن واني انضف باوعت من الشباك سيارة سدير بعدهي موجوده كملت المطبخ سهاد راحت للكليه وامهه رجعت بالمطبخ اني صعدت فوك انضف نضفت غرفة خالتي وسهاد وصلت الغرفته غمضت عيني وماحس اله واحد جرني باوعت سدير جرني ودخلني لغرفته خلاني على الباب
_تردين تزوجين
_اي شكو وليش
_ماخليج تزوجين لو اعرف اقتلج
اني انصدمت من كلامه شديحجي
_شنوو شدتحجي
لزمني من شعري على كيف
_على جثتي تزوجين مفهوم اسويهه بحر دم واخذج سحول
نصدمت يعني يحبي يربي مااصدك شنو الي دااسمعه
_شبيك دكتور
تقرب يمي وباسني على كيف أني مضلت بيه قطرررة دم وجهي صاار احمرر وكمت ارجف كمش ايدي وهوه ديبوسني اني مغمضه وذااايبه وخر مني وكلي
_أحبج بس أنتي متحسن
من كالهه احس الدنيا مشايلتني ماعرف شلون اوصف احساسي من كالهه فتحت عيوني وباوعتله وهوه باوع بعيوني اني عيوني مغوركات ردت اكله شلون احس وانته اثلن متسلم عليه ولا تتقرب مني وانته حسيت بيه من حبيتك..
جان حجه بعصبيه
_هسه ترحين وبسرعه تكلين الامج مموافقه
دفعته حيل رجع ليوره
_اي ولله مو اني لعبه شنو ارجع اكل الامي مموافقه كلت للولد ورح يجي يعقد السبتت وبعدين انته ملمحتلي هالشي من زمان وهسه دتعذب روحك
درت وجهي دااطلع وجرني حيل من ايدي
_أذا تزوجين اموتج
_أي أتزوج
باوعلي وضل يكمش بوجهي بهستيريا أنوب كام يبجي من شفته هيج متت اول مره اشوفه بهاي الحاله ومنهار
جان وهوه يبجي كمش راسه وكعد بالكاع ردت اتقرب يمه اشرلي وكلي
_اطلعي بره
_اا...
اريد اكمل وصاح
_أطلعي بره تره اقتلج وماكدر اسوي هيج
طلعت وكفت وره الباب وابجب على كيف مسحت دموعي ونزلت سلمت على خالتي ورحت للبيت جنت مصدومه من سدير يعني يحبني واصلن جان ممحسسني بهالشي ولا لمح ولاا اصلن يشوفني بعينه
زين شلون بالنسبه اليه شلون الغي الخطبه ياربي
وصلت للبيت سلمت على ماما كتلهه ماما رح اكعد من الشغل بس علمود تجهيزات العقد
_اي يمه عادي همه مقدريج
_اي
رحت بدلت وتغديت ونمت بالكوه.
يتبع