خطوات نحو الجحيم

الحلقه 16

#خطوات_نحو_الجحيم

////بقلم الكاتبه زينب ماجد////

الحلقه_16

مخلد:- لو هو جان فرحتي مووووو ...

لجين:- مخلد دتخنكني.. ابتعد..

مخلد:-اذبحج ومتصيرين لغيري افتهمتي.. مجبوره تقبلين بيه... افتهمتييييي......

:- واني قبلت بيك وخلي يكون بعلمك  انجبرت عليك..  بس انته ممكن تحكم جسدي.. مو ممكن تحكم قلبي ابدا.. اصلا متقربله ولا يمه.. وحاليا مشاعر الكره بداخلي الك اكثر من اي شي..

-طبعا مالي راسج ذاك المجرم مووو

-ما شفت الاجرام منه بكد ما شفته منك.. غلط ويايه فد يوم واعتذر الف مره ومحاول يجرحني من يومها. 

انت شنو سويته حتى احبك.. ابتعد.. لزم اديه حيييل.

-متعمده تسمميني بهلكلام.. كل همج تغثيني

-عمري مكنت اتمنى الغثه او الالم لاي احد.. بس انت اذيتني اكثر من اللازم..

دا احجي فار الجاي.. وگام يگلب .. وطفر منه على ضهري.. دفعته ووخرت بساع.. بعدت التيشيرت من ضهري بس ما صعدته..

-هاا احترگتي .. بالله شو اشوف..

- وخرررر.. رحت للسنك.. ابلل ايدي وامدها بضهري امسح مكان اللسعه مال الحرگ..

هو ما بطل.. وخروي وخل اشوف وخل اجيبلج عصاره.. اخر شي صحت مابيه شي..

هالحرك قلييييل جدا المه كدام الامك السببتها اليه.. محاولت تفهمني محاولت تسمع مني..

انت اللي منعت امي تدخل عليه وتركت ابوك واخوك يسوون بيه هشكل واشرله على سواد الضرب بايدي..

انت واهلك سبب مرض امي واختفاء صوتها.. انت سبب دمار حياتي.. لو بس سائلني باسلوب ومو عصبيه كان فهمتك..

بقيت تتهمني اني ما عندي شرف واني ساقطه واسمع منك ومن امك الكلام المباح عني واسكت..

اخذتني غصب .. وما كلفت نفسك بغرفة نوم.. ولو حتى تاخذني بفستان عرس ابيض.. او حتى ممكن تفرحني وتجهزلي بجهاز عرسي..

شنو السويته غير خذتني مثل الهديه او خاوه.. بدووون اي ثمن.. وتريد احبك.. مستحيل.. ابتعد عني ارجوك..

مخلد:- جنت جاي افتهم منج لما اجيتج للفندق.. جنت ناوي افهم منج واحجي وياج.. وما صدكت عمي من كال صاعد اللي اسمه على شباك غرفتج..

جنت خايف عليج خاف يأذيج لان اعرفه مجرم.. جنت خايف ان مهددج.. اروح للفندق الكاه يدفع احساب غرفتج. 

وبقمة الصلافه تلوذين وره ضهره مني.. تلوذين بشخص مجرم من انسان نذر عمر وشيب راسه بسبيلج..

ذبحتيني بصيحتج وانتي تگليله  بميانه مالك لاا..  

تعرفين نطق اسمه على السانج شيسوي بيه.. تعرفين شلون شفت امنيات بعيونج وانتي تباوعيله وتتمنين تهربين من اديه وترحيله..

شتردين اسويلج بوقتها.. وانتي اثبتيلي ان الكلام اللي حجاه عمي صدك وفعلا عندج علاقه وياه..

-مخلد مو انت ابالي افتهم.. وقلبي مو بيدي.. اكو غيري تتمناك.. وانت متباوعلها وانت تتمناني بس ما اريدك..

مو بيدي والحب مو غصب.. اذا اللي تسمي مجرم جرحني مره انت جرحتني الف مره..

لا عقلك ولا تفكيرك ولا حياتك تناسبني.. انت اخذتني غصب.. انت جبرتني عليك.. طول عمرك فارض نفسك ومانع كل احد يقترب مني..

-لج مجرم تفتهمين شنو مجرم

-مو ممكن اصدكك تعبت منك واني كل انسان يتقرب مني تنعته باقبح الالقاب وتطلع عليه اسوء الكلام..

اذا تحبني فعلا اتركني.. كل اهلك ما احبهم.. انت نفسك ما احبك.. مو بيدي. مستحيل احب احد ضربني.. ويعاملني وكأني حيوان مو بشر..

- مو قصدي اذلج واذا ما سويتلج عرس بس راح لان افتحلج بيت بالموصل ..

- وهذا الي اكرهه بيك.. منو كالك اني حابه اطلع من بغداد واسكن الموصل..

تقرر وتنفذ واني ما الي رأي.. وحتى ما كلفت نفسك تسألني اذا كنت موافقه على العيش بنينوى او لا..

انت مو معتبرني انسان.. كل هدفك الغاء شخصيتي وفرض شخصيتك انت عليه.. وهذا الشي اللي ما احبه..

-انتي ليش متأثره بكلام اهل القنوات و..... قاطعته

-لسه تكولي اهل القنوات وام القنوات وابو القنوات.. انت گلي دخلت القناة شسويت.. زنيت.. مشيت بطريق اعوج..

تره اني انسانه واعيه  اعرف احمي نفسي وما اسمح لاحد يفرض نفسه عليه.. اني ضد نظرية الرجل اعلى من المرأه..

اني احتاج رجل يسندني يحتويني مو يضربني.. مو يعصب ويفقد ويتهور ويرجع يعتذر.. ما بيه ابقى تعتذر واسامح طول عمري..

افهم شغله الله يخليك انت مو اللي اتمناه ..

- شوفي وخلي هالكلام ترجيه بأذنج.. لتحلمين اطلقج.. تتقبلين خير لنفسج ..متتقبلين ف على روحج مو عليه..

زين مني رحمتج وما ذبحتج   ولا تكولين ما زنيت.. شنو انتضر لما تنزلين روسنا .. غصب عنج لو برضاج تتعودين تتعودين..اتمنى هلكلام تحفظي زين..

واتذكري.. تمشين وياي عدل امشي عدل.. ما تمشين   والله كابوس اصيرلج..

-ما راح اخالفك ولا راح امشي وياك اعوج.. بس لتظن فد يوم احبك.. مستحيييل اتمنى هلكلام انت تحفظه زين.. جسدي ملكته بس هيهات تملك قلبي

-بسيطه ..انتي تحكمي بگلبج باللي يعجبج.. بس اذا ما اسود عيشتج فلا يطلع اسمي مخلد..

-تركني وطلع.. اخذت نفس و فركت وجهي.. ااه مو بيدي ما اتحمله ولا اتحمل اسلوبه..

يااااااارب دخيلك خلصني.. مشيت للكاونتر سويت لفه ورجعت حميت الجاي.. ومشيت طلع للكراج. 

دا افتح الباب صاح ويييين..

-دا اطلع للكراج اشم هوى واكل شوي بره...

-ممنوع توصلين باب الكراج افتهمتيييي..

-اخذت نفس.. وهزيت راسي.. رجعت للمطبخ .. الجو جان هستوه بي بروده وبليل تبرد حيل مو مال اكعد بالكاع وهم مفارشين بس كاشي

وكفت على الكاونتر اكلت.  سمعت مخلد صعد.. رحت للصاله ..فتحت التلفزيون.. وكمت اكل واباوع فلم عربي..

كملت اكل.. رحت غسلت ورجعت اكمل الفلم رغم شفته من نصه بس فهمته.. ساعه ونص ونزلت عمتي كرجيه ..

شافتني اباوع.. طفت التلفزيون والضوه وتكول ممنوع تشغلين التلفزيون هذا مو بيت الخلفج..

-لا اله الا الله.. استغفرك ربي.. كمت وتركتها صعدت فوك.  مخلد مطفي الضوه ونايم.. فتحته.  فز على حيله وايده جوه مخدته على سلاحه..

متهميتله رجع كمل نومته.. كعدت علميز.. وين اروح.. حاولت اشغل التلفزيون اللي بغرفته.. ريموت التلفزيون ماكو احوله ع الستلايت..

باوعت للغرفه هوسه.. تنهدت بتعب.. اكوم انظف الغرفه هاي تبقى عليه ما يهتم لعبت نفسي من هوستها.. عاد اكعد ارتاح بيها ومنها الكى الريموت

فتحت كنتوره.. طلع صوت ..مخلد نام على بطنه وشال المخده وخلاها فوك راسه.. انزعج حظرته..

علكت بنطروناته وقمصانه البقيه ممكويات.. هو اذا يريدهن يوديهن كوي اشتغل عنده اكويله.. مكلف نفسه يشتريلي غرفه واني اكعد اخدمه..

بقيت انظم الملابس واشمهم النضيف اصفط واخلي بالكنتور.. والوصخ ايييع من اشمه اتفل واشمره يم الباب

بقيت افكر واني اصفط.. اخذني الواهس.. جبتها من مالك لابويه لامي للقناة .. اخر شي اتذكرت مؤيد..

يندعيني فلوس واني هلفكر حياخذني للموصل لازم افك الشراكه اني وياه بالصيدليه.  واسافر وي مخلد.

باجر احاول اروح لمؤيد.. بلكت يقبل علعقده... ااااااه  اني تاليتي اخذ الامر من هذا حتى اطلع.. اهمداج لجين على هلحظ.. وغميت وجهي  

افكر واشتغل ما حسيت الا معزله الملابس كله ومسويتلي تل مال ملابس وصخه وجراجف. 

كرجيه ملتهيه بهذا وذاك متعرف تنظف غرفة ابنها فالحه بسالفة باكتك مني ام القنوات.. طمه الطمها واطم ابنها

ابوگه.. ميته على شوفته وابوگه.. حظرته براد بيت.. اوووي استغفر الله هسه شعليه بيها احجي عليها ..

دنكت اعدل الجرارات صارت طكطكه.. صرخ مخلد...

-الساعه خمسسسسسسسسسسه الفجررررر اطكطكين يم راسي متكولين نعال ناااااايم.  مشغله الضوه وواكفه فوك راسي واطبطبين بنعالج علكاع واطكطكيين بالجرارات..

طفي الضوه و طلعي براااااا..

-وليش تصيح فوك ما انظف غرفتك ..

-كلت طفي الضوووووووووه..

-اوووي خرعتني.. لتصبح شبيك..  كام على حيله بكل عصبيه دفر تل الملابس وطفى الضوه ورجع نام..

خبالك الخبلك.. اگص ايدي اذا هذا صاحي.. مريض

باوعت هستوها الضوه بادي يطلع.. بقيت كاعده علميز بس صوت المروحه يفتر رغم الدنيا بردت.. بس يشغل مروحه تصير حيل بارده..

ورغم البرد ميتغطى ..

ضليت افرفر براسي وافكر اجيبها منا واخليها هنا.. اخر شي نعست من الفجر وبروده وضلام الغرفه من وره البرده تشوف ضوه خفيييييف..

تعبت.. وحتى فراش ماكو انام عليه بس الحصير.. جريت البطانيه من جوه رجليه فز...

-يعني شلون والله علعلتيني مو نومه صارت غضب دناااامي

-دا اخذ البطانيه شبيك.. جريتها واخذت المخده من يم راسه غير اللي حاطها عليه..

فرشت البطانيه وخليت المخده ونمت ولفيت القسم الثاني من البطانيه عليه.. رفع راسه هو هز ايده ودار وجهه نام. 

اني هم درت وجهي ونمت.. بس بصعوبه لان قبل ساعات كعدت..

فزيت الصبح هو مموجود.. شلت البطانيه فرشت بيها السرير وعدلت المخده عليها ونزلت..

لكيت مرت مازن جوه.. كتلها صباح الخير..

طيبه:- صباح النور

لجين:- منو بالبيت اشو ماكو احد

طيبه:- عمي ومازن طلعو للشغل.. مخلد اخذ عمتي وطلعو سوه بالسياره.. وبقيت بس اني والجهال تتريكين ويانه..

-ابتسمتلها ووكفت اساعدها.. كالت بس ثرمي الطماطه.. ثرمت وسوت مخلمة بيض..

حشى نعمت الله ردت اتقيئ الا اشويه هو البيض وحده ما احمله ادور مخبوط يبوووه..

خلت الطاوه بالصينيه والتفتت عليه مخليه التيشيرت بخشمي..

طيبه:- شبيج متحبين البيض والطماطه..

لجين:- ابد..

-لعد اشون ماعدنا اجبان اكلوها بالريوك.. وحتى مسواك ممتسوكين كالت عمتي اتسوك من اجي

-لتهتمين هسه اطلع اجيب من الاسواق

-لا عفيه ميقبلون لجين.. مو عبالج سبورت مثل ابوج ذوله يتخبلون يسوولج مصيبه. 

-يتخبلون على ارواحهم.. اشلون انموت وهم متزقنبين وطالعين ومبقينه بلا ريوك ومسواك  ..

وبعدين هياته المحل خطوتين قابل رايحه لزحل

-براحتج اني ما اتحمل حجيهم

-اوك.. دا اريد اطلع.. مدت طولها تاخذ كلاص من الكاونتر وهي ترفع ايدها الردن مال الدشداشه نزل

اديها بيها اثار ضرب بنفسجي على ازرك .. اثار ضرب عوده او صونده هيج شي..

سألتها طيبه هاي شنو.. كالت شنو.. وانتبهت على ايدها ونزلت اردانها.. ردتني...لا هيج ماكو شي..

-مازن يضربج ؟؟

-عادي زوج وزوجه كلشي يصير بيناتهم.. هسه انتي مو اكو اثار على اديج من مخلد ومتحملته..

-لحظه اني قضيتي تختلف فهموني غلط وانضربت بس مازن ليش يضربج..

-هو من يشرب يفقد ويبقى يضرب والصبح يعتذر بعد رجلي لازم اتحمله..

-لو انتي ضاربته هلضرب يتحمل ويكول بعد زوجتي لازم اتحملها ..

- لا عزاااا  غير يذبحني

-طيب اذا هو عنده كرامه وميقبل تهيني.. انتي ليش تقبلين تنهانين

-اشلون اطلق قابل واصير مطلقه .. هم محد راح يحترمني وكلها تكول هي الصوج و متحملته.  وماكو رجال ميصير عصبي وبعدين يعتذر وتتصلح الامور شنسوي.. 

-اخذت نفس.. ومشيت عنها هلكد الانسانه ضعيفه.. تتقبل الضرب والاهاين ومشاكل وخيانات الزوج في سبيل متتحمل كلمة مطلقه..

طيب هي بالاثنين راح تواجه الاهانه.. الفرق مطلقه محد يضربها بس الناس تحجي.. هنا زوج يضربها والناس ساكته..

اخذت نفس.. مخلد ومازن من نفس الطينه اني شلون اريد اتعايش وياه. 

صعدت فوك اخذت من جنطتي فلوس.. ونزلت افكر بيها معقوله تتحمل كل هذا .. لكيتها توكل اطفالها وتضحك وياهم..

ابتسمت.. اعتقد اطفالها هم السبب ببقاءها وتقبلها هلاهاين والضرب.. بس يا ترى اطفالها يستاهلون..

وشلون ابني شخصية طفل مع اب همجي سكير مثل مازن .. شيريد يطلع مثلا بروفيسور.. اكيد شخصيه مهزوزه او انسان سادي كلشي ياخذه بالضرب..

ما اعرف المرأه شلون تفكر ما اعرف.. لبست جاكيت وطلعت للمحل.. اخذت اجبان.  وحلويات لجهال مازن..

ورجعت.. لمحت سيارة مخلد طبت الفرع بس دخلت مهتميت اله.. رحت للمطبخ اخذت الجبن وانطيتها حلويات جهالها شكرتني. 

جبت كلاص جاي وكعدت.. طب مخلد.. صاح لجيييين

رديت:- نعمممم

اتقرب وشالني من ايدي وكفني.. ولزم ملابسي من يم كتفي ويكلي شعندج طالعه برررره..

-اول شي نزل ايدك

-شعنددددددج طاااالعه..

-وخرت ايده.. كتلك نزل ايدك.. ولترفع صوتك واتذكر اني زوجه مو خدامتك واجبك تحترم وتقدر مثل مواجبي احترمك..

-لج بطلي صلافه بطلي وكليلي وييييييين جنتي

-يعني وين جنت رحت اجيب ريوك .. حظرت جنابكم متريكين وشابعين ابطونكم وطالعين ومحدط مفكر اذا اكو بالبيت بشر ولا حيوانات

ومن اطلع اجيب ريوك حتى  ناكل.. تجي تصيح وترفع صوتك وتتجاوز.. بدل هلصياح الشاطر بي كان تفقدت الثلاجه قبل لا تطلع اذا اكو اكل لو لا..

-لج هذا السانج اذا ما اگصه..

- اذا حجيت غلط گصه گدامك..

كرجيه:- اتركها يمه اتركها انت تگدر لام القنوات هههي يا ربي .. تلعب بيك شلم بلم.. هاي تجك بنطرونها وتضرب الرياجيل جلاق من الصلافه..

مخلد:- اصعدي اگبالي فورا..

لجين:- انتظر اكمل ريوكي.. حجيت وكعدت للصينيه

-كلت امشي كبااااالي لتخليني اتمادى واضرب والله

-منو لازمك اضرب ... حجيتها واني راسي بالاكل .. خليته يفور...

مخلد:- تفووو على اليوم الشفتج بي يا نگسه..

-ما ريحت گلبه ورديت تركته بحرگته.. وكملت اكلي.. دا اكل طب عمي عثمان. 

مهتميت ولا رحت سلمت اصلا.. وكفت وي طيبه انظف وكنست المطبخ ومسحته..كملت كتلها  ح اصعد امسح الغرفه فوك..

اخذت سطله.  وخليت بيها ديتول ومعطر.. ووصلة المسح وصعدت   فتحت الشباك   ونزلت البردات ويه الملابس الوصخه. 

نزلتهم خليتهم بالغساله.. وفتحت عليهم المي.  بس البرده عفتها اخير شي عود اغسلها

وصعدت شلت الحصير اخذت قماش وبللته بالمي المعقم ومسحت التلفزيون و الاخشاب.. وعدلت البيبان مال غرفته..

لان هو ما شاءالله بس يضوج دفر الكنتور ووكع الباب.. مخبل مو بعقله مريض متصيرله جاره.. 

صاحت عليه طيبه :- لجيييين الغساله انترست مي.. كتلها شمري تايت فدوه وشغليها..

مسحت الغرفه وعدت عليها 3 مرات.. صارت تلمع.. جريت الممر ويايه بالمسح.. وطلعت الحصير للسطح   نفضتها وصفطتها على صفحه.. عود بعدين اشوف اشون اغسلها

نزلت لكيت الغساله واكفه غسلت الهدوم وخليت البرده وصعدت جبت ملابس.. صاح عليه عمو عثمان..

سويت نفسي ما سمعت لان متت من العرك ملابسي تبللت.. دخلت للحمام.. سبحت كملت .. و الهدوم هم كملتها وصعدت شريتهم.. ورحت للغرفه. 

ماكو مشط .. بس فرچه رجاليه مال مخلد.. مشطت بيها شسوي.. ومكيجت ورتبت نفسي..

يابه احس حيلي انهد.. طلعت امي هواي تتعب .. الله يساعدها وهي حتى ملابسي الكاها تغسلهم 

طول هلمده عمي يصيح واني ولا ارد عليه.. شكد اكرههم ..بس شسوي رغم كرهي نزلت.. اول مطبيت كال شكد صحت ليش متجاوبين..

-اسفه جنت دا اشتغل ف منتبهت..

-اكعدي

-كعدت.. اباوعلهم.. كلهم يباوعولي.. كلت خير

عثمان:- اسمعي عمو.. مخلد حاب ياخذج وياه هناك بالموصل حتى لا تبقين بعيده عنه واجازته بقالها يومين ..

وكل العنده جو ايده 6 ملايين.. وتعرفين يحتاج ايجار مقدم مال 6 اشهر واثاث وغرفه وتجهيز بيت كامل..

-اي والمطلوب

- انتي زوجته  .. والمره توكف وي رجلها على الحلوه والمره..

-مفتهمت

-شوفي هو قبل فتره شمر كل افلوسه على هالسياره اللي اشتراها وما بقت غير هل6 ملايين.

وهو يريد يجهز بيت الج لازم تساعدي بالتجهيز بتالي البيت بيتج انتي راح تكعدين بي..

-واذا اني اكعد بي لازم اني اصرف على جهازه  ..

-ما كلنه انتي اصرفي بس ساعدي..

- ومنين اساعده.. دتشوفني كاعده   مدا اشتغل

-شنو القصه يعني شغلج بالقناة صار شهر ما اخذتي اتعابج. 

-وليش هو يريد اعيشه بفلوس القناة مو على اساس ساقطين.. وفلوسهم حرام

مخلد:- تعيشيني شنو انعل حتى الخلفج.  لا خلفة الله عليج ما اريد منج ولا فلس

-اول شي احترم .. ولتسب

مخلد:- اكوم اذبحج والله كلبه لا تراددييين

- اسمعنييييي .. ثانيا.. اني اصلا ما انطيك ولا فلس احمر ولا حتى تتأمل اساعدك..

وفلوس شغلي كلها عند بابا.. ومستحيل اسحبهم.. هذوله امان لمستقبلي بعد يومين وطلعت مثل اخيك بالله وتضربني على اقل كلمه..

تريد اسكت واتحملك.. لا والله خليها ابالك.. اخذ رصيدي وانهزم من البلد واروح اعيش حياتي بعيد عنك.. لتفكر اتحمل قسوتك فد يوم يطك صبري واهج

و لتفكر اشمر فلوسي عليك وانت مخاسر عليه ربع دينار

مخلد:- لج لجيييييين اگص السانج والله اطلعي برااا 

-اسمعنيييي للاخير..  تكولي اجهزلج بيت.. غصبا عليج تجهز.. كلها 6 ملايين.. نص مهري ما يجيب

لو نسيت وعودك افتحلها اكبر بيت وشتريد وشتأمر.. كل هذا طلع حجي وتصفيط كلام. 

مخلد:- لج انتي حاوية زباله هواي عليج اعيشيج بيها بنت الفكر

- ههههههههه اني بنت الفكر.. اي صحيح حقك.. كنتوري مكسر وغرفتي معفنه  خايسه حشاك. 

كلت هيج لو كام يفور هو وامه.  هي تصيح تعيرينه ولج.. وهو يصيح لج اني معفن.. لزمني من شعري ووكف عمي بيناتنا..

ضل يغلطون عليه.. ردت اطلع ما قبل عمي.. طلع مخلد من البيت ويصيح بنت الكلب اني الها الا اربيها والله

رجع عمي اندار على عمتي كاللها اريد لجين وحدنا رجاءا.. طلعت وهم تغلط وتسب.. كعد كبالي

عثمان:- انتي ليش ما تستحين اكو وحده تعامل رجلها هيج

-واكو رجال يعامل مرته بهشكل..

-لجييين احترمي نفسج ولا تنسين بفضله انتي عايشه اليوم والا جان قتلناج بس هو كال اريد اربيها

-عمووو المطلوب شنو ... جيبها من الاخير..

-اتركي رصيدج اللي عند ابوج.. بيعي سيارتج.. وساعدي زوجج

-لا صدوك.. سيارتي ابيعها ليش خو يبيع سيارته مو فالحين بالرجال قوامون على النساء دياله خل يقوم بواجبه ويامن حياتي ويبيع سيارته

لو بس وقت التأمر و العضلات تصيحيون قوامون على النساء ..

-ولج ما جان هيج السانج شبيج هيج توكحتي

-عمو جنت سانده نفسي باهلي يدافعولي عسه الكل تركني.. خو ما اترك البشر تاكلني من حقي ادافع عن نفسي

-انتي شكد صلفه ..

- وليش صلفه عمو لازم اصير ثوله فوك ما ماخذني حتى بدون عرس ولا حتى محترمني ومقيمني تريدني اساعده وابيع سيارتي..

خو يبيع سيارته ب80 مليون.. يتفيك بيها على العالم.. ويجي يمي يريد اساعده. 

- كولي باع سيارته .. تنطينه سيارتج  

-وليش انطي عمو هو يستحلف بيه يبيع السياره حتى يأمنلي بيت.. وتريد اني اضحي وابيع كولشي حتى اسانده..

بدل مجاي تطلب مني اطلب منه يبيع سيارته

-يخسر بيها لو باعها..  ينكسر سعرها يا عمو

-وشلي شغل عمو .. هو مو اتزوجني ورجلي خلي يأمنلي حياة كامله.. مو يتفيك بسيارته.. ويريدني اني اصرف..

-هو مستحيل يقبل انتي تصرفين عليه تعرفين مخلد.. عزة نفسه مو انتي اللي تذلينه..

-لا اذله ولا يذلني.. ونهاية الكلام بفلس احمر ما اساعده..

-فالحه مخلصه فلوسج على الصالونات. 

- بكيفي مماخذه من احد.. شغلي واشمره على نفسي مو عيب .. اخلصهم على الصالون  على السوق وشنو يعني من حقي اعتني بروحي واتجمل

:- شفت بنات ك.....اب بس مثلج ما شفت

-خلف الله عليك.. تركته ومشيت للغرفه.. تمددت علسرير وافكر بكلامهم.. شلون علاسه يردون يجهزون بيت براسي والله شنو انتي حتكعدين بي..

ههههي يا الله.. شلون ناس

ردت انام ضوه الغرفه قوي.. رحت جبت البردات بعد بيهم بلل علكتهم عود هم ينشفون وحدهم..

قفلت الغرفه وسديت الباب وشغلت المروحه وتمددت.. بقيت اردد وافكر بالكلام ودخت لحد ما نمت..

هستوني غفيت ..دخل مخلد.. فزيت على حيلي.. ما اهتملي.. شغل الضوه وبقى يدور بالملابس  ..

:-مخلد  اريد اروح لمؤيد.. اتفق وياه على الصيدليه

- ممنوع

- هو شطالبه ممنوع.. مو ح اسافر لازم افض الشراكه وياه او  يشتري حصتي

-كلت ممنوع

-مخلد شنو قضيتك.. لازم اروح صار يومين فاتح الصيدليه واني ماكو وتلكاه يخابرني وميحصلني..

طيب انطيني موبايلك اخابر بابا يتصرف.. طلع موبايله من جيبه وكال اتصلي  كبالي

اخذته ودگيت رقم بابا.. رد.. حاجيته ع الصيدليه كال اجه مؤيد وكال وينها وكتله اتزوجت.. واريد افضها..

راح يشتري حصتج بيها على شكل دفعات شهريا.. واحفظهم يمي.. كتله جيد..

سئلته على ماما كال االاربعاء الجاي حنطلع للبنان نسويلها العمليه وان شاءالله خير..

قفلته كم عنده واخذ مخلد الموبايل.. وحجه

-ابتعدي خل انام شويه..

-كمت من مكاني.. وتمدد.. اااا مخلد قبل تنام..

-رفع راسه.. شكو

- بس الريموت مال التلفزيون اريد احول ستلايت.. كام من مكانه مدري شداس وشغله ورجع.. صاح طفي الضوه وياج

كعدت على الكاع وانتجيت علكنتور وبقيت اباوع وهو نايم...لشوي  جعت..  اوف واني اكول لامي ليش تسمنين

طلع اليكعد بالبيت ماعنده غير الاكل والنوم يصير هلسمنه.. نزلت صبيت غده كانت طيبه مسويه تبسي دجاج.. سويت زلاطه وصعدت فوك  

فز من دخلت.. كعد على حيله.. خليت بالكاع راح غسل واجه ياكل وياي.. بس كال نزلي صبيلي تمن .. رحت صبيت وجبتله خاشوكه وكعد ياكل..

مخلد:- حظري نفسج باجر نطلع للموصل..

-والبيت اجرته..

-اي صاحبي شافلي مشتمل صغير نكعد بي..

-همممم بيش ساعه نطلع

-بال5 الصبح.. حتى باجر انظم البيت عكبه عندي دوام. 

-ان شاءالله.. كمل اكل بدل وطلع   واني بقيت متمدده اندكت الباب فتحتها..

طيبه:- هلا لجين تنزلين ناكل اني وياج جاي وكعك ابو الدهن عمتي والولد طلعو..

-ابتسمت.  هسه جايه.. لميت الغراض ونزلتهم غسلتهم وهي حظرت صينية الجاي والكعك..

فتحنه التلفزيون وكعدنه نسولف وناكل.. بقت تسولفلي على مازن وتعامله وياها.. وعلاقاته

نصحتها توقفه عند حده.. كالت اخاف واني عندي اطفال لازم اتحمل..  ردت سألتني على الولد اللي هربت وياه..

جاوبتها ما هربت وي احد.. كل القصه واحد.يفتر ورايه ويطلعلي بكل مكان وهم عبالهم اريد اشرد وياه   وبس

تمددت واني احجي وياها.. ونحجي نحجي لحد الليل طبت عمتي گرجيه جانت يم اختها.. وي طبتها بدت لغوتها

بنات الشوارع كاعد.حظهن.. الشريفه ما تحصل لكمه وبنت الشوارع يفتحولها بيت فوك سواياتها الطايح حظها..

تركتها تحجي وصعدت.. باوعت تلفزيون والم بغراضي  لحد 12 بليل غفيت..  ما كعدت غير على مخلد يندار يمي بس مضايقني..

فتحت عيني نايم على نفس السرير وياي وطافي الضوه.. كان صفح.. ورجع نام على ضهره.. ردت اكوم جر ايدي وحظنها ونام..

رجعت خليت راسي علمخده.. وجريت ايدي منه ورجعت غفيت لان النوم كان بعيوني..

شفته حرك رجله.. طلع شال البطانيه باخمص قدمه من يم رجليه وغطانا بيها..

درت وجهي عنه.. انطيته ضهري..حيل كان النوم غالبني كرهت وجوده.. بس مابيه اكوم ادور مكان وانام ..

تقرب عليه حيل.. بدون ميحجي .. ابتعدت.. رجع شال راسي وخلاه على ايده.. وايده الثانيه على خصري وسحبني بيها اله..

حاولت اكوم.. همس نامي ما اذيج... كتله وخررر اريد اكووووم..

مخلد:- مرتي وما جابرج على شي شضارج لو بقيتي نايمه يمي...

رجع راسي.. وكال صدكيني ما اذيج بس خليج قريبه مني..لعبت روحي منه.. بودي اتقيئ عليه.. اتشنجت فد مره صرت عصه مو جسم.. من كد ما مرتاحه .

احس اني مو اله... اني ملك غيره..ملك انسان انطيته قلبي وما احس براحه غير يمه.. اللي دا اسوي اشوفه خيانه..

صح مخلد محاول يقترب كان رايد بس ابقى يمه .. بس ما متقبلته مو بيدي.. ما احبه ابد..

جان ساكن واني لعبانه روحي.. ادور بقى يمشي ايده على خصري ورجلي... كعدت من مكاني حيل..

كام وياي ويجرني اله ويريد يبوسني.. كمت ادفع بيه.. وهو ولا همه... بقيت ابجي واكله دوخر ما اريدك وخررر

وكأنه مايسمع... ما اكدر اقاوم كانت قوة ايده عبالك حديد كدام ضعف اديه.. احاول ابعده   ما يسمع..

بقى يم اذني يبوسني ويهمس لجين احبج . واني اكوله ما اريدك ما احبك..

الى ان نطقت كلمه...مكنت متقصدتها.. طلعت من الساني بدون تفكير.. و تصير مرات لما تفكرون بشخص وتردون تحجون تنطقون اسمه..

واني نطقت.. مالك الله يخليك وخر... ابتعد مني بسرعه ولزمني من شعري شلوووون ولج..

-سمعت شنطق الساني  بس ما كان قصدي.. فكتله مخلد ابتعد ارجوووك..

-تغلطين بأسمه وياي وعلى فراااااااااشي بنت الكلب...........يتبع 

☆☆☆☆☆☆

#زينب_ماجد