بقلمي (هدى الموسوي) الاميره الموسويه 👑
ما احلل لاي شخص ياخذ كتاباتي وينشرهم (ذمه)
اسيد .. عفتها يم وحده كرافيره مره وديت اختي يمها كان عدنا مناسبه و واخذتها الها ، هي معروفه فرحت عليها حتى خاف يصير شي ام الصالون اعرفها ولانو مااكدر ابقى يمها فهذي امينه !
اخذت رقمها من لوحة المحل واتصلت عليها ، كالتلي اي اشوكت متريد جيبها .. اني ع بالي نستني لان كلت شافتني مره وحده من اخذت اختي ممعقوله راح تتذكرني لو تعرفني .. لان مااريد احد يعرف بالموضوع ، اشو هاي من شافتني اكلتني سلام وكلام خرب بالحظ الاغبر!
بس لا تفضحني ..
سلمت عليها بس ثكلت كلامي وياها لان ماارتاح احجي ويا وحده خصوصاً من هذا النوع .. خليت داليا يمها وكالتلي ساعه تجي تلكاها جاهزه ..!
دخلت داليا .. واني صحت لام الصالون ..
_اسمعيني زين راح اروح ساعه واجي اذا تأخرت عليها تبقيها يمج ومتطلعيها للشارع ابد .. واذا شعره انمست منها متلومين غير حالج!
ام الصالونه .. شدعوه دكتور شنو قابل اني جديده عليكم اخواتك كل شغلهم يمي ، وبعدين منو يمسها شنو جايبها نتعارك وياها .. هدي حالك وان شاء الله ميصير شي .
اسيد .. مدااتناقش وياج الي كلته يتنفذ .. اني رايح .
رحت بوجهي ع المكوي جبت البدله مالتي منه وطلعت لبيتنا لكيته فارغ محد بي بس الحرس بالباب .. سويت لكمه ع السريع اكلتها .. بعدين زينت وسبحت مرت ساعه وربع من عفتها لحد الان .. هاي كالتلي ساعه وتخلص لازم اروح بسرعه اخذها لان اصلاً ما بقى وقت ع الحفله .. بدلت كملت .. وطلعت ..!
نص ساعه الطريق صار ساعتين الا ربع من عفتها اكيد هسه دتنتظر .. وصلتلها دكيت على ام الصالون طلعتلي منزلت من السياره
بصوت حاد ..
_وينها!!
كالتلي انتظر بعدها ممكمله دقايق وتطلع!!
اسيد .. شنو ممكمله انتي مو كلتي ساعه وتخلص .. صار ساعتين من عفتها يمج وبعدها شدتسوين عمليه؟!!
ام الصالون .. اعتذر منك دكتور هسه اروح اصيحها واجي بس هدي اعصابك.
راحت ام الصالون .. بقيت انتظر وماكوو .. دك موبايلي شفته علي!!
ديتأكد مني ع باله ما اجي ..
علي .. وينك اسيد شنو غيرت رأيك؟!!
اسيد .. يمعود اشبيك دسلم بالاول !
علي .. لك وين صرت راح يزفوني وانت ماكو .
اسيد .. حبيبي جايك والله بس عندي شغله بأيدي اكملها واجي دقايق واني يمك ان شاء الله .
علي .. ماشي انتظرك ..
راح علي وني نزلت من السياره الساعه صارت ضبط وهاي ماكوو صارلها ربع ساعه من دخلت تصيحها اشون شغله هاي .. الجذب يسري بدمهن النسوان ..!
جريت الموبايل دااتصل بيها ... وجان تطلع كدامي !!!!!!!!!
جمالها صدك صدك يخطف الانفاس .. بحيث بقيت صافن بوجهها ما انطق بحرف .. حتى ام الصالون من شافتني استغربت!
من سطرتي منطقت غير اسمها ..؟!!!!!
بسرعه اتداركت الموقف لان الغباء عندي صار يقرا الف ، اتحركت من مكاني فتحت الباب مالت السياره كلتلها اصعدي!
هي صعدت واني رحت دااتحاسب ويا ام الصالون .. انطيتها فلوسها .. جان تسألني!!
ام الصالون .. دكتور ممكن سؤال؟!!
اسيد .. نعم!
ام الصالون .. هذي البنيه شتقربلك اشو اول مره اشوفها؟!!
اسيد .. وانتي شكو تقربلي او متقربلي؟!!
ام الصالون .. لاااا مجرد سؤال لانو اني اعرف اخواتك الله يحفظهم وحتى اقاربك هم اعرفهن بس هذي مشايفتها من قبل فحبيت أسأل .
اسيد .. هذي اتعابج ، ولتحشرين نفسج بشي ميخصج.
عافها اسيد صعد السياره وطلع للقاعه گبل ..!
داليا .. ما احجيلكم بالصالون اشصار بيه ، كلبوني على البطانه مثل ميكولون .. حتى تعبت حسيت نفسي تمثال ودينحتو .. مصدكت من كالت يلا خلصتي واجه الدكتور ياخذج!!
مااعرف شنو من احساس صار بداخلي .. ع بالك اني عروس .. كمت بسرعه بس اريد انهزم منا موتوني.. واني دااطلع اكو مرايه كولش كبيره بنهاية الباب مالت الصالون ..!
اباوع ع نفسي ممصدكه هاي اني .. والمسيح ع بالي وحده ثانيه غيري واكفه .. اني سامعه الميكب يغير هواي بس هسه من صدوك اتأكدت انو هذي حقيقه مو بس كلام!
التسريحه كانت ناعمه كولش .. شعري كوله مسحوب ليوره ومن الامام باف حلو ومن الخلف رافعه شعري كوله مسويته ع شكل ورده يجنن !!
المكياج كان نازك مو اوفر لان اني كولتلها مااحب اللبخ .. هي سوت الي اني اريده .. بس خلتلي رموش صح مزعجات بس يغيرون شكل الواحد كلياً بحيث عيوني صارو يجننننننووووووون .. وخلتلي شادو سموك بحيث لون عيوني كولش برز .. اول مره انتبه لعيوني هالكد حلو لونهم وغريب .. والباقي كوله خفيف
الفستان طلع يموووت عليه (طبعاً مداامدح نفسي ولا ابالغ والرب بس هذي الصراحه حتى اني ممصدكه هذي اني ) بقيت صافنه ع نفسي بالمرايه وممصدكه شكلي اشون تغير!
بعدني دااباوع ع نفسي وفرحانه .. بس طيرت فرحتي من كالت يلا الدكتور دينتظر!!!
ماادري شصارلي استحيت اطلع بهذا شكلي كدامه .. مكدرت اتحرك اديناتي حسيتهم صارو مي من الارتباك والخوف و وجهي صار احمر ..!!
اول مره بحياتي اخلي هيج شي ع وجهي واغير نفسي هالكد .. احس شي غريب عليه وعيب اطلع هشكل كدام العالم.. وانوب هو دينتظرني يعني حيشوفني!!
يا رب ساعدني .. حموت !
بعد صفنه طويله وتردد كبير .. ام الصالون كالت لازم اتطلعين لانو دينتظرج وما انصحج تتأخرين اكثر لانو من اجه شكله معصب حتى اني خفت منه!
اخذت نفس طووووويل هزيت راسي واديه بهدوء واتحركت بالكوه امشي خطواتي ثگلت .. فتحت الباب وطلعت !
طبعاً الصالون بي كراج صغير تدخل السياره حتى محد يشوف البنات الي يطلعون مثل العرايس وغيرهم لانو متبرجات وسافرات .. يعني طلعت من باب الصالون شفته واكف كدامي ومرتكي ع السياره ..!
الباقي تعرفوو .. نظراته المصدومه بشكلي زادت الطين بله اتمنيت الكلع تنشك وتبلعني .. استحيت كولش بحيث جسمي صارت بي رجفه اول ما باوعلي!
كالي اصعدي للسياره رحت ركض دخلت وبقيت اتنفس سريع اريد الهوا يدخل بصدري اختنكت من المستحى!
بقى هو يحجي ويا ام الصالون اشويه واجاني كالب خلقته كالعاده!!
طول الطريق محجه شي والهدوء سيد الموقف !
اني بديت اختنك من المكياج احس ثقل على وجهي .. والرموش موتوني ممتعوده عليهم دخت !
داليا .. هفففف يا ربي .
اسيد .. بصوت جامد بدون ميلتفتت عليها .. شكو؟!
داليا .. مدااكدر اتحمل احس نفسي مختنكه .. وجهي مدايتنفس من الي خلته الي هاي ام كفشه ، وعيوني مدااشوف بيهم مخليتلي مهفات عليهم !!
اسيد .. هي تحجي واني ايبتسم بداخلي من كلامها .. اول مره اشوف بنيه متحب المكياج وهاي السوالف .. الي اسمعه من اخواتي يفقدن ع هي اشياء ، هاي معقوله بنيه!
اسيد .. مد ايده طلع موبايل وانطاهيا ، بصوت جامد .. خلي هذا يمج !
داليا .. شنو اسوي بي ؟!!
اسيد .. اخذي ومن اتصل بيج تطلعين.
داليا .. لويش انت محتجي وياي؟!!
اسيد .. وين اجي وياج القاعه مو مشتركه انتي حتدخلين يمهم واني اروح يم الزلم .
داليا .. زين اشون ادخل وحدي اني مااعرف احد!
اسيد .. اعتقد العروس صديقتج لو اني غلطان؟!
داليا .. اخاف بعدها مجايه للقاعه!
اسيد .. موجوده هسه خابرني علي ، وغطي نفسج وصلنا ..!
داليا .. عدلت الفروه عليه وغطيت جسمي من فوك لانو ردانات الفستان شفافه .. كدام القاعه كان هوسه و ولد كومه واكفين ..دا اريد انزل اشو هذا رجع شغل السياره!
اسيد .. بصوت حاد .. انتظري لتنزلين .. من شفت الولد والهوسه كدام القاعه مكدرت انزلها .. رجعت شغلت السياره وانداريت من الباب الخلفي مالت القاعه كان فارغ محد اكو .. نزلت ورادت تدخل صحتلها ..
_اول ما ارن عليج تطلعين ، وديري بالج تخطين بره القاعه خطوه وحده ، ومن اخابرج اتعدلين نفسج لتطليعن مشلحه فهمتيني لوو لا؟!!
داليا .. اي أوامر اخرى؟!!
اسيد .. ضبي اللسانج وادخلي يلا.
داليا .. يتأمر عليه سوي هيج ولتسوين هيج .. هذا شمفكر نفسه ليكون ولي امري واني ما ادري؟!!
سكتت محجيت شي لانو مو وقتها اعاند واتعارك بنص العالم .. عفته ودخلت للقاعه بس اني بداخلي بركان من تصرفاته وياي ع بالك اني طفله وهو ابويه لو زوجي وديتحكم بيه!
طبعاً ما احجيلكم الكعب اشسوه بيه دمرني ممتعلمه عليه والفستان طويل شل حالي شل .. و الممر طويل من الباب الخلفي للقاعه خطوه امشي وخطوه اعثر لحد ما وصلت ...!
القاعه كولها بياض وتجنن صح مبيها هواي ناس يعني ينعدون ع الاصابع بس المكان يجنن!
اول ما دخلت الكل باوعن عليه .. ع بالك شبح دخل عليهم العيون صافنه بوجهي .. بقيت اني اباوع بالوجوه .. ادور على صديقة عمري .... على اختي الي مجابتها امي .. ع الذكرى الوحيده الي بقتلي من حياتي الي انتهت .. على ايام طفولتي وشبابي الي ضاعو .. ادور بالقاعه والعيون عليه
جان اسمع صوتها ...
سلمى .. بصوت مخنوك .... داليا ؟!!!!!!!!!!!
داليا .. التفتت لكيتها واكفه هي وبدلتها البيضه .. تجنن طالعه ع بالك ملاك حتى معرفتها .. الدموع اتجمعت بعيوني والكلام ضاع .. حسيت الحياة دبت بيه من جديد .. اتذكرت العم امين .. ماما ماري .. اخويه وصديقي داني .. الميتم .. المدرسه .. كل الذكريات اتجمعت براسي ، عجيب اشون نظرة وحده من شخص قادره ترجعك سنين ليوره!!
ردت اركض عليها واحضنها اخذها بين اديه .. اشم عطر حظنها الي نسيته صارلي شهور .. بس مكدرت اتحرك الذكريات جمدتني بمكاني .. بخطوات الكعب البطيئه مشيت الها .. بقينا وحده اتباوع بوجه الخ وعيونا مليانه كلام ودموع .. الكل انظاره علينا .. منو هذي الي خلت العروس تبجي بيوم عرسها .. ولويش ديبجن؟!!
سلمى بصوت مخنوك همس والدمعه بطرف عينيها ..
_صايره مره معرفتج!
داليا .. من بين دموعها ابتسمت .. گلبج ميضيعني اكيد!
لهنا وبعد مكدرنا نلزم نفسنا .. حضنتها وتركت ادموعي تنزل .. وهي حضنتني ودموعها تجري وتشهك .. بقينا على هالحال مده .. بس متحاضنين ونبجي !!
الى ان اجت وحده الظاهر اخته العلي .. كالت ميصير هيج البنيه عروس ميصلح عليها البجي!
بعدنا عن بعض .. اباوع الها الكحله سالت وعيونها تصخمت .. ضحكت على شكلها وهي هم ضحكت كالت انتي شكلج اتعس مني هههههه .. اخذتنا اخت علي اني وياها اكو غرفه خاصه للتعديل وكذا .. دخلنا هناك اثنينا ميتين ضحك !!
سلمى .. ههههه ولج شكلج فلم هندي ع بالك باندا!
داليا .. وج اسكتي هاي ام الصالون تلبخ بيه وترجع ليوره لو تشوفني هسه يمكن تلطم على تعبها الراح ههههه
سلمى .. احجيلي اشون عرفتي بزراجي ، ومنو الي جابج شنو هالتغيير شنو هالجمال ولج معرفتج والرب صايره شخص ثاني ، الظاهر الحياة واخيراً ضحكتلج!
داليا .. هه اي كولش ضاحكتلي ، اوووف يا سلمى الحجي هواي والشرح يطول خلينا هسه نرجع للحفله لا يجي العريس وميلكاج اكيد ينجلط المسكين .. وان شاء الله بعد العرس بكم يوم اجيج واحجيلج كولشي وانتي هم تحجيلي شنو الانقلاب الي صار وخلاج توافقين تتزوجين علي!
سلمى .. مااعرف شنو احجي سلمى .. بس متتصورين اشكد اني ندمانه ع الي صار وعلى كلامي الي كلته الج اخر مره .بس صدكينـ ...
داليا .. سلمى .. سلمى .. حبيبتي سدي الموضوع ابد مو وكته .. اليوم انتي عروس افرحي وبس وانسي كولشي انسي الماضي وابدي من جديد .. مو الاجل احد لا الاجل نفسج وبس.
سلمى ..حضنتها .. ان شاء الله .. متصدكين اشكد فرحانه اني بجيتج والله فرحتي بشوفتج تسوى فرحة عرسي مليون مره .
داليا .. يلا كمل مكياجج واني هم كملت كومينا هلي نرجع عيب من اهل رجلج!
سلمى .. يمعوده لتذكريني اصلاً محد من اهله يعرف بس اخته هذي الي حجت وياج قبل اشويه .
داليا .. اني شكلتلج ... لتفكرين بشي صدكيني كولشي حينحل بعدين .
سلمى .. الله يسمع منج .. يلا امشينا..!
رجعنا اني وسلمى للحفله والكل كان دينتظر العروس وعلامات الاستغراب مرسومه على وجوه الجميع .. لاحظت انو المعازيم زادو اشويه .. كعدت سلمى ع الكوشه مثل الشمس الي منوره واني كعدت يمها .. بقينا نضحك ونسولف اني وياها على الي بالقاعه شوفي هاي وشوفي هذيج متنا ضحك .. من صدوك اول مره من احداث الميتم لليوم اضحك من كل گلبي هشكل .. حيل كنت فرحانه يمكن اكثر من فرحة سلمى نفسها .. واخيراً حترتاح من كل الي عاشته والي شافته ، واخيراً خلصت من الهم الي كان ع گلبي بسبب بعدها عني وتفكيري بيها..
مر الوقت بسرعه محسيت بي .. جان يكولون اجه العريس حيزفوهم .. بعده مداخل العريس دك موبايلي؟!!
فتحت الجنطه شفت مكتوب رقمي!!
جاوبت ..
_الوو؟!
اسيد .. اطلعي بسرعه اني منتظرج بنفس المكان.
داليا .. عفيه بس اشويه حيزفوها اريد اودعها الله يخليك.
اسيد .. بصوت حاد ومليان غضب .. اطلعي ولتكفريني بساعتج حيدخلون الزلم واذا دخلو انتي موجوده انهيج والله.
داليا .. كالي هذي الكلمتين وسد الخط بوجهي!!
كمت بسرعه نزلت من الكوشه وطلعت من الباب الخلفي .. سلمى هم انشغلت تلبس بالطرحه وتغطي نفسها .. ملحكت حتى اسلم عليها .. طلعت لكيته واكف بنفس المكان وعيونه تجدح نار .. محجيت ويا شي صعدت بالسياره گبل بس عيوني تريد تنفجر من البجي الدموع بطرفها.. مخلاني احضنها ولا اسلم عليها ، منطاني مجال حتى اودعها ..!
حرك السياره وطلع .. واني دموعي صبت من ابتعدنا عن القاعه .. مكدرت الزم نفسي اكثر!
اسيد .. ليش دتبجين؟!
داليا .. بصوت مخنوك .. ماكو شي.
اسيد .. سألتج جاوبي لتخبليني ، شكووو دتبجييييييين؟!!
داليا .. بصوت عالي درت وجهي عليه ودموعي تجري .. انفجرت بي داابجي لانو حضرتك منطيتني مجال حتى اسلم على سلمى .. موادعتها ، حتى مهنيتها .. سحلتني مثل السيد الي يأمر عبد عنده .. هسه عرفت لويش؟!!
اسيد .. شكلها وهي منفعله وتبجي .. دموعها والمكياج الي سال على خدها .. مااعرف المنظر جديد عليه ، شفايفها باقي بيهم مكياج خفيف شكلها ماسحاته منظرها يموت تنأكل دوختني .. صفنت عليها رحت بغير عالم ، رغم انو تبجي ومقهوره بس شكلها يسطر فقدت تركيزي .. هي من شافت نظراتي الها دارت وجها عني بسرعه .. بقت تباوع من الجامه وساكته محجت شي بس شهكاتها وبجيها الي عذبني!
طبعاً علي لح عليه وترحاني اروح ويا ازفه للفندق بس اني مقبلت لانو هي وياي وخفت واحد يشوفنه يسويلي قصه ، خصوصاً بهذا شكلها العجيب!
بس من شفت ادموعها وشكلها اشلون تبجي بحركه ومقهوره متحملت مااعرف شصارلي .. لعنت نفسي الف مره لانها دتأثر عليه هشكل .. ما اكدر اقاوم نفسي كدامها ، خبلتني ماادري ليش هيج دتحركني!
لفت السياره ورجعت للقاعه .. لكيتهم بعدهم ممتحركين .. هي من شافتنا رجعنا انصدمت !!
داليا .. هاي لويش رجعت؟!!
اسيد .. بلا غباء يعني ليش رجعت مثلاً؟!!
داليا .. ابتسامه فضيعه ملت گلبي و وجهي من شفته رجعنا .. يا ربي معناها يهتم لامري .. هم مهم المهم حشوف سلمى واودعها ..!
بقينا منتظر اشويه الى ان تحركت السيارات .. طلعنا وياها احنا ورا سيارة العروس مباشرةً ..!!
الاغاني والهوسه مالت الزفه اول مره اعيش هيج شعور واحساس .. فرحه عظيمه اجتاحت كل ذره بيه حسيت نفسي طايره .. اما هو اباوعله نفس الجمود ونفس الملامح اتكول صنم!
وصلناهم للفندق .. ولما راحو الكل نزلني من السياره
اسيد .. غطي نفسج ، امشي ورايه وعينج بالكاع ديري بالج ترفعين راسج ..
داليا .. ماشي .
هويمشي واني ورا اباوع على خطواته مرفعت راسي نهائياً وخانكه روحي بالفروه .. صعدنا بالمصعد ورحنا لغرفة علي وسلمى .. لكينا اخته دتسلم عليه هي وزوجها يمكن .. اني مرفعت راسي ابد .. سلم هو على علي .. واني هم باركتله بس ولني مدنكه مشفت وجهه اصلاً .. دخلت لسلمى لكيتها كاعده وترجف .. من شافتني طفرت عليه حظنتني وكامت تبجي!!
هديتها وكلتلها لتخافين ، باركتلها لانو ملكحت بالقاعه .. ضحكنا اشويه .. جان اسمع صوته المرعب ..
اسيد .. يلا داليا اتأخرنا صارت ليل خليهم يرتاحون.
داليا .. اي اي جايه .. بوست سلمى وكلتلها كم يوم واجيج .. انطتني رقمها وطلعت ركض!
طلعنا من الفندق مباوعت بوجهه اصلاً بس بداخلي كولش سعيده وفرحانه هم بسلمى وهم باليوم الحلو الي عشته رغم الوحش الي وياي!
صعدنا بالسياره .. وسكوت محد حجه لا اني ولا هو .. الى ان وكف السياره يم مطعم كبير .. قريت اللافته مكتوب بيها (يوجد قسم للعوائل)
محجه شي نزل وكالي بصوته الجامد لتتحركين من مكانج!
بقيت اني بالسياره وهو راح .. اشويه ورجعلي كال انزلي!!
داليا .. وين ؟!!
اسيد ..بغضب ، لتناقشين سوي الي اكوله وبس.
داليا .. ماشي ماشي حنزل.
نزلت هو مشى كدامي واني ورا دخلنا للمطعم دافي والاضويه تجنن الي بي .. والعطر واصل لشارع .. كاللنا واحد واكف يم الرسيبشن اتفضلو منا .. لزمني هو من ايدي ومشى ... حسيت گلبي حيوكف .. اديه عرگت صارت مي حتى استحيت منه!
اخذنا لمكان معزول ومحد بي بس احنا .. كعدنا وبعدين هو طلب اكل ..!
اسيد .. شتاكلين؟؟!!
داليا .. بكيفك!
اسيد .. هذا المنيو يمج شوفي شنو تردين .
داليا .. اي شي.
اسيد .. صحت ع الكرسون جابلنا الاكل طلبتلها نفس الي طلبته اني .. راح يجيب الاكل ويجي .. جان اسمع واحد ديصيح عليه!
درت وجهي لكيته زوج خالتي هو وخالتي وجهالهم !!!!!!!!
اشون حظ خايس .. من هسه اعتبر امي عرفت بالموضوع وبعد مااخلص!
عفتها ورحت اسلم عليهك لا يجون ويشوفوها ، ع الاقل اذا ما عرفتها من تكول الامي اكدر اكللها وحده متواعد وياها .
بس اذا شافتها وعرفتها ما اخلص بعد .. ومحد يصدك انو اخذتها لعرس علي خصوصاً علي محد يعرف بعرسه لان امي وامه صديقات فكالي لتكول!!
كلتلها لتتحركين منا ولترفعين راسج هسه اجي.
كمت بسرعه رحت سلمت عليهم .. خالتي مو بس مستغربه لا مصدومه من المنظر ممصدكه اني كاعد ويا وحده!
بقت تلمح وتضرب بسامير .. اني مغلس .. جان تكلي اشو معرفتنا ع الحلوه الي وياك!!
اسيد .. يمعوده مو جديات تسليه فقط.
الخاله .. ميخالف اريد اشوفها هذي الي خلتك واخيراً تطلع من قوقعتك وتحجي ويا بنت.
اسيد .. خاله كلتلج موضوع مو جدي والبنيه تستحي غير مره عود.
الخاله .. يبووو من اسيد شنو الهدرجه تخاف عليها .. خلي اروح اني اشوفها لعد.
كامت بسرعه وراحت عليها ملحكت حتى اوكفها او احجي وياها ...
الخاله .. مرحبا يا حلوه .. مدااصدك اكو مخلوقه تكدر تخلي اسيد يكعد وياها لا ويعزمها بمطعم ، صار عندي فضول اعرفج اكيد انت وحده فريده من نوعج الي كدرتي تغيري هشكل!
داليا .. كالي لترفعين راسج بقيت كاعده ومدنكه هو راح واني انتظر ، مااحس الا وحده وكفت يمي ودتسلم عليه !!
مكدرت ارفع راسي لان مااريد اعاند واعصبه بعد كل الي سوا الي بقيت مدنكه!!
الخاله .. ولك اسيد هاي صدوك خجوله حتى مترفع راسها ، من اشوكت الخجل ينفع وياك!
اسيد .. خلتني بموقف محرج بعد مااكدر اتصرف واتلافى الموضوع .. داليا هذي خالتي ايناس اجتي حتى تسلم عليج!
داليا .. من كال خالتي جسمي كوله رجف ارتبكت حيل .. بس الي ربكني اكثر الاسم !!!!
رفعت واسي دااريد اسلم عليها .... وفجأه العالم كوله اظلم بعيني!!!!!!!!!!!!!!!!!!!!!!!!!
للحكايه بقيه❤️
رأيكم بالاحداث وتوقعاتكم للبارت القادم 🤗
لتنسون التصويييييييت حتى استعجل بالبارت 19 والاحداث القادمه حتصدمكم!
البارحه منزلت بارت لانو ليلة النصف وكنت صايمه مكدرت اكتب فرجاءاً بلا كلام يغث وتعليقات تعبانه من البعض مو الكل والي معاجبها لتقرا ممجبوره ولاخر مره اكول اي تجاوز وتعليق فاشل احظرها .. اذا انتي كاعده ٢٤ ساعه لا شغل ولا عمل مشكلتج هاي اعذرو اشويه ترى اكو كم وحده مصختها حتى ما الي واهس اكتب بعد ، وقت فراغي اكتب والي ميناسبها لتابعني . والله حتى تصويت ميصوتن بس من يتأخر البارت يبقن يتجاوزن ويلغن ع بالك اشتغل عدهن..