بقلمي (هدى الموسوي) الاميره الموسويه👑
ما احلل لأي شخص ياخذ كتاباتي وينشرهم (ذمه)
داليا .. احس الزمن توقف من سمعته كال هاي الكلمه !!
معقوله هذا ديعتذر لو الضربه البارحا اثرت عليه؟!
صح انصدمت من سمعته كال اسف .. بس بقيت ملامحي جامده ممتأثره كدامه ، رادت تنزل دمعه من عيني بسرعه رفعت ايدي مسحتها .. هو بقى صافن بوجي ينتظر ردة فعل ع الشي العظيم الي كاله !!
بس اني منطيته مجال يحس انو ممصدكه اعتذرلي ، باوعت بعيونه نظرة عدم اهتمام .. عفته ومشيت.
اسيد .. مادري .. ما ادري اشلون طلعت هاي الكلمه مني .. اني اعتذر لهاي؟!!
وفوك هذا كله لبستني وراحت ولا ع بالك اعتذرتلها ، ولا اهتمت اصلا!!!!
يابه دروحي طبج مرض اني الي كبرت راسج
مضايج بسبب اعتذاري منها .. لا لان اني غلطت وأذيتها ، بس الي قهرني اشون اتجاهلتني ولا كأنو حجيت شي !
يمكن ملامحها التعبانه ، عيونها الوارمه من البجي ، وجها الي كله اثر ازرك !!
والاعظم من كل هذولي النظره الي بعيونها والدموع الي متجمعه متقبل تنزل!
هم هذولي الي دمرو كل طاقتي كدامها واعتذرت.
هسه اني شكو مهتم وشاغل بالي .. طز بيها قبلت الاعتذار او مقبلته ، هي كلمة وطلعت سهواً.
بقيت وحدي بالمطبخ سويت ريوك خفيف اكلته وصعدت الغرفتي ، سبحت وبدلت .. بعدين كعدت اتصفح نت بجهازي!!
مااعرف اشكد مر من الوقت وجان يدخلون عليه جهال اخويه كرار ، بقو يلعبون ويكمزون يمي الى ان طلعو روحي والغرفه كلبوها كلب .. اخذتهم ونزلت جوه لكيت الكل كاعدين ومتجمعين بالصاله!!
امي اول مشافتني دارت وجهها ، الظاهر بعدها زعلانه من الي صار!
دخلت سلمت عليهم ، كرار ومرته بنت عمي ساره ما اطيقها انسانه حقيره واللسانها ينكط سم!
بس اني اسلم عليها واحاجيها على حساب عمي ورجلها ، يعني على كد السؤال ما عندي ميانه وياها.
المهم ..
سلمت عليهم ورحت كعدت بصف امي .. خليت راسي بحظنها وبقيت ابوس بأيدها..
بقت هي تدلل وتحجي عليه .. كوم من يمي ، ما اريدك ، انت مو ابني، اني الي ميسمع كلامي ما اريده ولا ابني.... من هذا الكلام!!
ضليت اني حاظنها ولازك بيها ما وخرت عنها .. الى ان رضت!
كعدنا اشويه وبعدين اجتي ام عادل كالت الغده جاهز اتفضلو ..!
كعدنا ع ميز الطعام طبعاً اني اكعد براس الطاوله كوني الكبير يعني بعد ابويه!
كعدنا دناكل و ام عادل طلعت دتودي اكل للحرس بره .. ساره بقت تحوص ماادري اشبيها!!
بعدين ابنها كام يبجي الي كاعد بصفها ..!
سألتها امي اشبي الولد يبجي؟!
ساره .. لا خاله مبي شي بس خلص التشريب كوله ويريد بعد ، دااكوله ماما كافي ميقنع الا بالضرب!
ام اسيد .. يا بنتي ميستوجب اتضربي ، الاكل هواي ، هسه اصيح على ام عادل تصبله.
ساره .. هاا لا خاله ام عادل راحت اتودي للحرس غده ، اني حكوم اجيبله.
رادت اتكوم ساره ... جان نطق (ابو الهول) ...
أسيد .. بصوت جامد وهو دياكل مرفع راسه .. ولويش هي اتكوم ، مو اكو وحده ثانيه المن جايبيها صيحيها هي تجي تصب للطفل.
ام اسيد .. انحرجت وتدري بأبنها ميتعاند كلمه ثانيه يسويها مشكله ويطرد البنيه!
حاولت تتلافى الموضوع .. بسرعه كالت ... هااا .. اييي .. دالياااا .. دالياااا بنتي وينج ؟!
داليا .. كنت بالمطبخ واكفه وسرحانه بالكلمه الي كالها ممصدكه والرب احس نفسي بحلم .. كالي اسف؟!!!
افكر ورايحه لغير عالم ... فززني صوت الحجيه تصيح عليه!!!
بسرعه مشيت اريد اطلع اشوفها شتريد ... بس بعدين اتذكرته!
اشون اطلع اخاف يشوفني ويبقى يحجي ويفشلني كدام العالم الكاعده ، وفوك هذا كوله هاي الحيه سارووو موجوده وهي بلا شي كارهتني وحتشوف وجهي صاير خريطه .. اوووووف يعني حتجيها من السما ...!
بقيت واكفه بمكاني واسمع الحجيه تصيح ... مكدرت افشلها وما اطلع جريت نفس وطلعت ..
داليا .. مرفعت راسي واني مدنكه .. نعم حجيه رايده شي؟!!
ام اسيد .. بنتي داليا بلا أمر عليج بلكي تصبين للطفل كاسة تشريب .
داليا .. صار هسه اجيبله .
راحت داليا صبت كاسة تشريب من الكدر ، بس التشريب حار كولش لانو ام عادل عايفته ع النار وطالعه ..!
شالته بحذر وراحت ودته يم الولد الي كاعد يم امه ... وصلت يمها دتريد اتخلي الكاسه جان ساره عدلت كرسيها وخلت الرجل مالت الكرسي ع رجل داليا وكعدت عليه ..........!
داليا شاغت روحها مكدرت تتحمل الوجع الكرسي مرد اصابيع رجلها ومرادت الطفل ينحرك بالكاسه بعدتها عنه جان تنكلب الكاسه ع ايدها ......!!
ساره .. يووومه ابني حيحترك ، جرت ابنها حيل وحظنته ، وبصوت عالي صاحت بداليا ... انتي اشبيج عميه متشوفين؟!!
من سوء حظ ساره اسيد منتبه عليها اشون حركت الكرسي لما داليا وصلت يمها ، ونظراتها لداليا واشلون تتفحصها من فوك ليجوه هم منتبه عليها ...!
مع ذلك بقى ساكت محجه شي ، بس من صاحت عليها .. هناااا هو تدخل...
اسيد .. ابنج ما بي شي والحمدلله ، ما له داعي الصياح.
ساره .. بصوت عالي .. متشوفها اشون رادت تحركه للطفل؟!
اسيد .. كرار كول المرتك تنصي صوتها وتسكت ابنك وما بي شي كافي لغوه.
كرار .. ساره خلص اسكتي مصار شي البنيه مو قصدها.
رادت تحجي ساره بس كرار خزرها بمعنى كافي ... سدت حلكها و سكتت.
داليا .. انخرست محجت شي ، بس الوجع الي دتحس بي فضيع ، ايدها مشتعله نار .. ورجلها موتتها من الألم!
بس الي وجعها اكثر الذل الي حسته من صاحت بوجها هاي الحقيره .. رادت تلزمها وتشوه وجها ، تكفشها من شعرها وتمسح بيها الطاوله .. بس اشلوووون!
اني منو وهي منو؟!
صح الحجيه تحبني وتعزني .. بس مهما يكون هاي منهم وبيهم واني وحده اشتغل هنا حالي حال الخدامه اكيد محد راح ينطي بيها على مودي!
هه اخاف اني عايزه هسه كملت ...!
كالعاده الدموع اتجمعت بعيوني وما بجيت حاولت بكل قوتي اكتم دموعي ، الضعف مو الج داليا ... اكثر من الذل الي شفتي قابل؟!
سكتت بس ايدي موتتني من الوجع اباوع عليها صارت حمره طماطه .. درت وجهي وردت اروح للمطبخ ... جان وكفتني الحجيه.
ام اسيد .. بنتي خوما تأذيتي ، شو شوفيني ايدج؟!!
داليا .. بصوت مخنوك والكلمات بالكوه تطلع .. لا .. مبيه .. شي .
الحجيه .. سوده عليه يمه اشلون ما بيج شي هاي ايدج محتركه ، باوعت الاسيد بنظره حاده .. شو تعال يمه اسيد شوف ايدها البنيه خاف بيها شي ناخذها للمستشفى خطيه.
اسيد .. رفعت راسي من الاكل من كالتلي امي تعال شوف ايدها ... وباوعت لامي بنظره استهزاء ، يعني من كل عقلج ترديني الزمها و كدامهم؟!!
رجعت دنكت راسي بمعنى لا ما اكوم ... بس امي كالعاده مستحييييل تعوفني اذا متسوي الي تريده ..
الحجيه .. اسييد !!
اسيد .. استغفرت الله وكمت ، شراح يخلصها ويا امي ... رحت يمها بعدني ما واصلها اشو عاي ترجف؟!
لزمت ايدها اني ع بالي شي بسيط ميستوجب هالخبصه والاهتمام مالت امي .. بس من شفت ايدها انصدمت ، فعلاً ايدها متأذيه حيل بحيث الجلد كله مطكك!!
اجتي ام عادل تركض .. ها خير شصاير .. اشبيها داليا ..؟!
اسيد .. بصوت حاد .. بسرعه روحي جيبيلي ادوات الاسعافات بسرعه.
راحت ام عادل ركض تجيبهم واني جريتها من ايدها بس بخفه حتى لتتأذه اكثر .. اخذتها ومشيت بيها للصاله كعدتها ع التخم ، كعدت بصفها ولازم ايدها !
هي بس ترجف مثل السعفه مااعرف من الحرق الي بأيدها لو لان اني لازمها؟!
المهم بقت هشكل اني وياها وامي واكفه على راسنا تكول جندي!
اجتي ام عادل جايبه الاسعافات ..
اسيد .. بهدوء .. راح تأذيج اشويه اتحملي ، مديت ايدي وجريت كل الفقاقيع الي صارت بأيدها بمكان الحرق .. امي كالت لني متحمل اشوف المنظر هذا سندتها ام عادل وراحو .. بقينا بس اني وياها .. هي الظاهر تأذت حيل من لزمت منطقة الحرق مدت ايدها الثانيه ولزمت ايدي الي دا اداويها بيها بس من زندي وضغطتها حيل بحيث حسيت اظافرها نبتت بأيدي!!!
اني بقيت اعالج الحرق محجيت شي .. بس من خلت ايدها ولامست جسمي گلبي هم رجع يرجف!
وجسمي كله سرت بي رعشه!!
ما ادري ليش هيج يصير بيه من تكون قريبه مني لهدرجه ، يمكن لان اني من زمان ملامس بنت!!
فكري كوله اتشتت مااعرف شصارلي ، وگلبي يرجف بقوه خبلني .. حاولت احافظ على هدوئي وما ابين شي ، ضمدت ايدها وكملت .. بس من شفت ايدها الي لازمتني بيها جمدت بمكاني!
ايدها صايره زركه والدم محصور بيها بحيث شكلها يخوف!!
اسيد .. هاي شبيها ايدج الثانيه؟!
داليا .. بسرعه سحبت ايدها من انتبهت هي لازمته .. بصوت مخنوك وهي مدنكه ، مبيها شي!
اسيد .. سألتج سؤال جاوبي وكلتلج من احجي وياج ارفعي راسج وحاجيني.
داليا .. رفعت راسي .. وعيني صارت بعينه ، هنا اني كل الالم الي كنت احس بي اختفى!
كمت مااحس غير صخونه بكل جسمي ، اريد احجي مااكدر الكلام اختفى !
اسيد .. بقت صافنه بوجهي ومتحجي ، هاي متوب ابد ؟!
الكلام وياها ميفيد احجي وياها صافنه بوجهي ع بالك شاشة سينما وصافنه عليه!
بصوت جامد كلتلها .. داانتظر الجواب!!
داليا .. مره ثانيه عيوني خانتني ونزلت دمعتي ، ليش هيج ديصير بيه؟!
ليش اتحمل كل هذا الذل ، ونظره من عيونه تضيعني ؟!!
حسره بكبر الكون بنص گلبي على حظي المايل ، دموعي صبن على خدي بدون ارادتي ... ما احس الا ايده على خدي ويمسح بأصابعه دموعي ......!!!!
للحكايه بقيه ❤️
رأيكم بالاحداث وتوقعاتكم للبارت القادم ، ولتنسون التصويت حتى انزل البارت الـ 11 بسرعه 😘