بقلمي (هدى الموسوي) الاميره الموسويه👑
ما احلل لاي شخص ياخذ كتاباتي وينشرهم (ذمه)
أسيد .. موافق!
داليا .. نعم؟!!
اسيد .. مثل ما سمعتي.
داليا .. ع شنو موافق؟!
اسيد .. سكت دقيقه وكأنه يلفظ الكلمات بصعوبه ، بصوت جامد وحاد .. لتستغبين تعرفين ع شنو .
داليا .. ولويش متكول الكلام بلسانك لو ميهون عليك تلفظ موافقتك الزواج بحثاله.
أسيد .. اسمعي لج ما اجيت اجادلج ولا اتناقش وياج اتصور دااحاول اساعدج يعني المفروض تكونين ممنونه وتشكريني ع الي دااسوي مو تتواقحين.
داليا .. هه اتساعدني؟؟؟
اتصور كلتلي قبل كم ساعه انو متريد تشوف خلقتي شنو الي غير رأيك واجيت برجلك تشوفني؟!!
عموماً اذا دترد الجميل بسبب الي كلته للامر فأني مسويت شي علمودك وانما عملت بأصلي ، وبخصوص الطلب الي طلبته منك فـ مكانت رغبتي ولا ردت اسوي هيج شي غبي بس انجبرت وندمانه اكثر متتصور ، مع ذلك اني اشكر شهامتك ومساعده منك مااريد.
اسيد .. بلا كلام وطولة اللسان كلتلج موافق وخلص مو بكيفج الموضوع طلع من ايدج بعد.
داليا .. شنو هو الي مو بكيفي ، ترى انت لا ابويه ولا ولي امري ، فـ ابتعد عني ولتخليني ادخلك بقضية تحرش .. دفعته وراحت!!
أسيد .. بحياتي ما شايف هيج بنيه جريئه وصلفه ، الغبيه ردت اساعدها عافتني ولا كأنو واكف كدامها وراحت ، مع انو تصرفها ازعجني وعصبني بنفس الوقت ، واشكد اتمنيت الزمها امسح بيها المعسكر ع هذا اسلوبها ، بس جرئتها صدك تجذب الانتباه ..
بقيت واكف بمكاني اباوع عليها ، من سنين ممركز بوحده لهدرجه جنس حواء كارهم ولا يجذبني ابد بس هاي بيها شي غريب !
اسلوبها الجريء متخاف من شي ، متهاب احد ، كلامها حدي متتراجع بقيت صافن عليها اشلون تمشي ع بالك غزال .... شعرها ع طول ظهرها واسود مثل الليل .. هالمخلوقه من صدك تسحر!
لحظات سرحت بيها .. فجأه مرت ابالي ذكريات قديمه!
هزيت راسي بقوه و كأني احاول ابعدها عن تفكيري!
استغفر الله اشبيه اني اتخبلت ، هاي حالها حال .... سكتت احس نفسي كامت تلعب ، كرهت روحي لان فكرت بوحده ، لان سمحت المشاعري تحسها ، اتمنيت بهذي اللحظه اروح اخنكها بأديه لان خلتني احس بهيج شي ، رجعتني لاشياء حاولت بكل ما أملك امحيها من تكويني.
درت وجهي ورجعت لغرفتي ... بعد هذا اليوم مشفتها نهائياً ولا عرفت عنها اي شي ، بس مرات اسمع علي يسأل الامر عنها هي واختها ..!
اني اول ميجيب سيرتهن اترك المكان واطلع.
مرت ايام واشهر ... الى ان فد يوم .....!
داليا .. كلتله هذا الكلام وعفته ورحت لان مااريد اسمع اي شي من كلامه الي مثل السم ، مشيت بس احس عيوني تتوسلني ارجع اشوفه !
ما ادري لويش رغم كل الي سوا بيه و رغم كل اهاناته الي بس اني من اشوفه انسى روحي!
والله والله احس كل ذره بيه تكول انخلقت لهذا الشخص!!
اعرف احساسي غبي وتفكيري بعد اغبى ، وين اكو شخص عاقل يحب من اول نظره؟!
وبمثل هيج ظروف؟!
و شخص مثل هذا أسيد؟!
گلبه اقسى من حجر الصوان ، و مشاعره أبرد من الجليد ، هاي اذا عنده مشاعر اصلاً!!
يعني تصورو اروح اتوسله ينقذني ... يهيني ويعاملني مثل الحثاله!
عموماً مو موضوعنا هذا.
عفته و رحت لكيت سلمى تنتظرني بالباب الخارجي شافتني امشي بسرعه و جسمي وعيوني حمر !!
سلمى .. ها داليا شنو كالج؟!
داليا .. مكال شي وأمشي حتصير الدنيا الليل.
سلمى .. وج بس فهميني شنو راد من عندج؟!!
داليا .. بصوت عالي وحاد .. سلمى كلتلج ميريد شييييي امشي لخاطر الرب وسدي هذا الموضوع مااريد اسمع سيرته.
سلمى .. ماشي ماشي بس اهدي.
مشينا اني وسلمى دنطلع من الباب مالت المعسكر او (المدرسه) جان اسمع واحد يصيح .. داليا .. سلمى .. انتظرو؟!!!
درت وجهي لكيته دكتور علي!!
علي .. بأنفاس مقطوعه الظاهر كان ديركض .. يمعوده شنو متسمعين داليا صار ساعه اصيح عليج؟!
بعدين شنو هاي رجليج لو تايرات اريد الحك بيج ماكوو انكطع نفسي!
داليا .. اسفه مسمعتك ، اتفضل رايد شي؟!!
علي .. يباوع لـ سلمى ويحجي .. لا مرايد شي بس حبيت اودعكم قبل لترحون واشوف خاف محتاجين شي؟!
داليا .. شكراً ممحتاجين بس سلامتك ، ومن رخصتك لازم انروح لان الدنيا حتظلم واحنا وحدنا.
علي .. وين راح ترحون هسه؟!!
داليا .. حضرت الآمر كثر خيره مقصر ويانه وانطاني عنوان دير حنروح بي فتره الى ان نرتب اوضاعنا و انشوف شنو حيصير.
علي .. اهاا ان شاء الله خير ، و وين صاير هذا الدير؟!!
داليا .. لويش السؤال؟!!
علي .. لاا مو قصدي شي بس اني نازل الاهلي فكلت اذا نفس الطريق اني وياكم اوصلكم بطريقي.
داليا .. هاا لا شكراً الك احنا ندبر حالنه.
سلمى .. بغداد ... طريقنا ... لـ ... بغدا .. د
علي .. الابتسامه ملت وجهه ع بالك سلمى كانت خرسه وهسه نطقت!
ممصدك سلمى حجت!
اني هم رايح لبغداد .. لعد اذا هيج لازم اوصلكم بنفسي.
داليا .. بقت صافنه بوجه سلمى متعرف لويش تصرفت هشكل ، ولويش كالتله عن مكان الدير؟!!
مع ذلك كان لازم اترد على علي الي كان ينتظر يسمع جواب منها ...!
_لا منريد انكلف عليك احنا نروح ، شكراً الك.
علي .. لااا ميصير ، وغلات الوالده الا اوصلكم وياي ، مهما يكن اني رجال وغيرتي متسمحلي اعوفكم لحالكم ترحن كل هذا الطريق و خصوصاً بهذي الاوضاع ، اني مصر ولازم تقبلن طلبي.
داليا .. بس..
سلمى .. ماشي موافقين.
داليا .. رجعت صفنت بوجه سلمى بس هالمره خزرتها حيل ، اكيد هاي تخبلت اشون تخليني بهذا الموقف؟!!
معرفت تحجي شي بعد وما كان كدامها غير انو توافق وبس!
راح علي جاب السياره .. صعدن البنات اخذهم وطلع!
طول الطريق السكوت كان سيد الوقف محجن اي كلمه ويا علي الي حاول بكل الطرق يلطف الجو ويصير ودود وياهن .. بس كانن حديات ع كد الجواب ميتناقشن ويا ولا يحجن شي خارجي.
صارت الدنيا الليل و هم بالطريق .. نزل علي يجيب شي حتى ياكلو لان الطريق طويل وصار هواي مت طلعو اكيد جاعو ...!
داليا استغلت الوقت وحجت ويا سلمى بسرعه قبل ليجي علي ...
داليا .. لج سلمى انتي غبيه لو شنوو ، اشون تخليني بهذا الوقف كدام الولد وتحرجيني هشكل؟!!
سلمى .. و شسويت اني يعني الغبيه مو اني ، مفكرتي من وين النا فلوس نروح بيهم لبغداد؟!
زين اشون تردين نجي لحالنا بس اني وياج كل هذي المسافه وبهذا الليل؟!!
منو الي راح يرحم بينا اذا شافونا وحدنا ومحد النا؟!
عادي هذا نعرفه وصارلنا اشهر ويا بالمعسكر مطلعت منه المو زينه.
داليا .. ميخالف المفروض تكوليلي قبل لتحطيني بهذا الموقف المحرج ، وبعدين شكو تكوليله ع مكان الدير وين؟!
ما كان ناقص غير تنطي رقم الموبايل.
سلمى .. والرب انتي صدوك غبيه ، وج يا ثوله اذا ما اكوله وين حنروح اشون يعرف احنا رايحين لبغداد ويوصلنا للدير شنو يضل يفتر بينا ، وبعدين اني اصلاً ما عندي موبايل من وين انطي رقمي؟!
داليا .. اووووف منج ومن غبائج احنا بيا حال وانتي تتغابين ، خلي اسكت احسنلي.
بهذي الاثناء اجه علي .. جايب عشا اشكال واللوان الولد صارف كومه ع الاكل ممقصر الله يبارك بي.
اتعشو بقى علي يسوق ... وهي وسلمى نامن!!
ما فتحن عيونهن غير يم باب الدير!
المنطقه كانت فقيره نوعاً ماا من خلال البنايات القديمه الي بيها والظلام الي يعم المكان !
نزلن وعلي هم نزل وياهن!
داليا .. منعرف اشون نشكرك دكتور علي تعبناك ويانه!
علي .. لا ماكو اي تعب ولا اكو داعي للشكر انتو حسبت اخواتي ، ويباوع لسلمى ويبتسم.
داليا .. مقصرت تسلم.
علي .. ولوو تدللون ، وهذا رقمي اذا احتاجيتو اي شي اني موجود بأي وقت ، اعتبرني مثل داني اخ وصديق الله شاهد.
سلمى .. من سمعت اسم داني الدموع اتحمعت بعينها مكدرت تكتم عبرتها .. عافتهم وراحت حتى مسلمت على علي!
وعلي حيل انقهر من راحت راد يسلم عليها بس منطته مجال..!
اخذت داليا الرقم اتشكرته مره ثانيه ، ودعته وراحت ورا سلمى!
لكتها كاعده بالظلمه كدام الباب مالت الدير وتبجي!!
فجأه اتذكرت اليوم الي كعدت بي كدام الميتم وهي صغيره وتبجي .. خنكتها العبره وتذكرت اختها ، مسحت ادموعها قبل لتنزل و راحت لسلمى حظنتها وسكتتها .. كامن دكن الباب ..
طلعتلهم مره كبيره بالعمر ..!
داليا .. مرحبا ، احنا من طرف الاستاذ أياد !
المرأه .. اهاا .. اهلاً وسهلاً اتفضلو ...
دخلت داليا وسلمى ، الدير كان اشبه بالبيت صغير مو حيل كبير بس مرتب ونظيف ، من شكله وترتيبه تحس بالدفو والهدوء!
كعدن ويا المريه وتبادلن اطراف الكلام .. عرفت انو هذي المسؤوله هنا واسمها الاخت ماريان!
كالتلهم كل الاخوات الي بالدير نايمات حالياً وبأذن الرب الصبح حتتعرفون عليهم!
هنه هم عرفنها ع نفسهن .. بعد حديث مطول استمر بالساعات دلتهن ع مكان منامهن .. وانطتهن ملابس خفيفه حتى يرتاحن بيها وينامن لان اكيد الطريق طويل وتعبانات!
نامن داليا وسلمى بهذيج الليله مثل الاموات من التعب والارهاق .. كل مره تنام سلمى كانت داليا تسمع صوت بجيها وشهكاتها الي كاتمتها بالمخده!!
بس هذي المره مسمعت غير صوت انفاس سلمى وهي غركانه بالنوم .. صح كانت دليل ع تعبها بس داليا فرحت لان سلمى مبجت هذي الليله ..!
ثاني يوم الصبح كعدن داليا وسلمى وتعرفن ع بنات الدير ، طبعاً كل الي بالدير كانن راهبات!
هي هذي قوانين الدير متتواجد بي غير الراهبات الي نذرن روحهن ونفسهن لخدمه الرب وحده!
لا زواج لا متعه ، لا عائله ، لا اطفال ، لا شهوات ، لا علاقات ، ولا اي شي ثاني !
فقط عباده الله وخدمه الكنيسه لا غير.
للتوضيح *(يمكن بعض الاديره تختلف حياة الراهبات وطبيعة علاقتهم والاشياء المسموحه والمرفوضه بالنسبه للراهبه مثل الزواج والارتباط وغيره ، بس بهذا الدير كانت هذي القوانين الي سائده ، حتى لتجي وحده وتكول من وين جبتي هالافكار وماكو هيج شي !
هذا توضيح لان اعرف بعض النفوس التعبانه حتكول هشكل 😑)*
المهم .. مرت الايام وسلمى بدت تتأقلم ويا الوضع ، حبت الحياة هنا لان ناسبتها تماماً خصوصاً بعد الي صار الداني حياتها انقلبت رأساً على عقب صارت منعزله على نفسها وانطوائيه ، اغلب وقتها لو صافنه لو تبجي!!
فالحياة بالدير لائمتها
اما داليا .. فكانت العكس تماماً ..!
محبت الحياه بالدير القوانين الي اعتبرتها تعسفيه تعزل الراهبه عن الارتباط وتكوين علاقات الزواج والعائله!
كرهت العيشه بالدير كولش ، بس الشي الوحيد الي كان مصبرها هو سلمى!
كانت تحسها مثل اختها وهي مسؤوله عنها رغم انو سلمى اكبر منها حاولت بكل الطرق تتحمل ضغط مديرة الدير عليها انو تصير هي وسلمى راهبات او يتركن الدير ، بقت تماطل المديره وتأملها الى ان تشوف حل وتاخذ سلمى وتروح !
طبعاً خلال سكنهن بالدير صار عدهن صديقات (اخوات) داخل الدير ، وكانو ينطوهن راتب رمزي تدفعه مؤسسات انسانيه للدير كمساعده للراهبات اليتيمات فقط!
اشترن ملابس واغراض خاصه بيهن يعني حالتهن اشويه تحسنت
بس الي صار بيوم من الايام غير كولشي بين سلمى وداليا للابد!!
سلمى .. داليا اريد احجي وياج.
داليا .. اي حبيبتي تعالي اني هم ضايجه اريد افضفض اشويه.
سلمى .. ماشي احجي انتي بالاول !
داليا .. يمعوده مو شي مهم ، بس طالعه روحي من الاخت ماريان وموضوع الراهبه احسها دتخنكني.
سلمى .. هااا .. بصراحه اني اريد احجي وياج بنفس الموضوع.
داليا .. ماشي احجي اسمعج.
سلمى .. هاا .. أ .. أنــ ..ي .. اني قررت اصير راهبه.
داليا .. شنووووووو؟!
شدتحجين سلمى كل عقلج؟!!
سلمى .. من كل عقلي ومدااتشاقه.
داليا .. لا سلمى انتي اكيد انجنيتي تعرفين شنوو يعني تصيرين راهبه؟!
يعني حياتج حتنتهي ، بعمرج مراح تحبين ، مراح تتزوجين ، ولا حتى تصيرين ام ، حتنهين حياتج هشكل.
سلمى .. اني اصلاً حياتي انتهت من مات داني ، ولحد ما اموت ماافكر ارتبط بأي شخص بعده ، فهذا احسن حل ، هم احفظ نفسي وهم اخدم الرب.
داليا .. لج سلمى الله يخليج لتخبليني ، اخدمي الرب بس مو بهالطريقه اصلا الي دتسوي حيدمرج والله ميرضى هشكل .
سلمى .. داليا ارجوج اني اخذت قراري وخلص ، مأجيت حتى اطلب موافقتج وانما اجيت ابلغج بقراري وبس ، فكل الي اتمنى منج تسانديني مو اكثر.
داليا .. اساندج؟!!
اساندج واني اشوفج دتدمرين حياتج؟!
عموماً هذا الكلام ميفيد بعد انتي اخذتي قرارج وانتهى ، يعني ممحتاجه لا مساندتي ولا رأي اصلا!
فبراحتج واتمنى من الرب ميجي يوم وتندمين على هذا قرارج.
هذا كان اخر كلام بين سلمى وداليا
ثاني يوم داليا لبست وطلعت من الصبح حتى تشوفلها شغل تشتغله وتطلع من الدير لأن بعد ما سلمى قررت تصير راهبه اكيد المديره مراح تنطيها فرصه انو تبقى بالدير اذا ما صارت راهبه!
طلعت تفتر ع المحلات النسائيه ، حتى بالمطاعم راحت سألت عن شغل كـ منظفه !
بس ماكوو للاسف الوضع بالبلاد جداً تعبان وماكوو وظائف او شغل!
افترت وسألت الى ان وكعت رجليها .. بس ماكوو نتيجه وبعض الوظائف الي راحت قدمتلهن يكون من شروط العمل الاساسيه يكون المتقدم للوظيفة عنده شهاده ؟!!
تعبت و قررت ترجع للدير ما عدها غير حل ، بس مهما يكون لو تعرف اتنام بالشارع متصير راهبه!
مو كرهاً بالراهبات بس لان حست الشروط الي ديفرضوها على الراهبه قاسيه ومو انسانيه!
ورادت تعيش حياتها مثل ما هي تريد ، تكمل دراستها ، وتصير فد شي مهم ، تبني عائله وتعيش اطفالها الي انحرمت هي منه!
احلامها وافكارها كانت اكبر من دير وراهبه.
المهم راحت اشترت لفه لان كانت حيل جوعانه وتعبانه رادت تاكل لكمه حتى تكدر تمشي بعد ما بيها حيل.
اشترت لفه وكانت ملفوفه بجريده!!
وهي دتفتح الجريده حتى تاكل اللفه شافت اعلان بالجريده ... (مطلوب ممرضه للعنايه بشخص كبير بالسن)
گلبها طار من الفرحه رغم انو فرصه حصولها ع الوظيفه ممكن تكون مستحيله لان اولاً مكتوب ممرضه!!
وثانياً احتمال هذا الاعلان قديم والوظيفه راحت اصلاً!!
بس مع ذلك قررت تحاول عسى ولعل!!
اخذت رقم الموبايل و راحت لابو المحل الي اشترت منه اللفه!!
كالتله ممكن تنطيني موبايلك بس احجي بي مكالمه وانطيك بمكانه فلوس.
الرجال كان خوش انسان وطيب انطاها الموبايل بدون مقابل !
اخذت الموبايل واتصلت !!
داليا .. مرحبا .. اني شفت اعلان بالجريده محتاجين ممرضه لرعاية شخص كبير بالسن ، فأخذت الرقم واتصلت في حال الوظيفه ما زالت شاغره!!
الشخص الي ع الخط .. اهلاً ، نعم محتاجين ممرضه والوظيفه بعدها شاغره حظرتج اول وحده تتصل.
داليا .. حست نفسها طايره بالهوا من الفرحه ، اخذت العنوان منه واتفقت انو باجر المقابله!
انهت المكالمه ورجعت الفون للرجال اتشكرته ، وطارت ركض للدير .. كان كل الي ابالها انو تبشر سلمى بألي صار وتفرحها .. بس اول ما وصلت وشافت سلمى بملابس الراهبه وشكلها الي تغير تماماً حست بغصه بگلبها .. كل فرحتها تبددت!
سكتت محجت شي ، راحت الغرفتها وبقت تبجي بفراشها ..!
سلمى هم اتجاهلتها و كأنها مموجوده ولا حاولت تحجي وياها اصلاً!
بالليل مديره الدير صاحتها .. وحجت وياها للمره الاخيره..!
داليا فهمتها انو تنطيها فرصه بس يومين وبعدها تترك الدير ، بس المديره كالتلها كدامج يوم واحد وبعدها اشمرج بالشارع!!!
خلصت داليا ليلها بس تبجي .. حتى الاخت الي كانت معتبرتها عائلتها عافتها بكل سهوله وتخلت عنها ولا كأنو بيوم تعرفها ..!
شنو الي غير سلمى وخلاها تصير بهالقساوه مكدرت تعرف ابد.
ثاني يوم الصبح بدلت ولبست ملابس مرتبه ، تنوره سوده طويله ومخصره ، وقميص سمائي فاتح كولش مرتب ورفعت شعرها ليفوك .. وطلعت !
طول الطريق ما بقى دعاء ما دعتى ترجت الرب وتوسلته انو ينتشلها من الضياع الي عايشته ، ويساعدها قبل لتنشمر بالشارع!
ما حست غير السايق يكوللها وصلنا ...!
نزلت كدام بيت كبير وبمنطقه راقيه واضح من شكله الخارجي انو الي عايشين بي حالتهم كولش زينه!
حرس وباب ضخم !!
نزلت وبخطوات خايفه ومتردده .. وصلت للباب سألها الحرس عن هويتها ؟!
كالتله انو هي جايه علمود الوظيفه الي ناشريها بالاعلان!
دخلها الحارس للبيت .. حديقه كبيره ومليانه ورود مزروعه بشكل مرتب ، وصلت للبيت انفتح الباب ودخلت!
اخذتها الخدامه مااعرف بنتهم بس شكلها تشتغل هنا مو من العائله !
اخذتها كعدتها بالصاله اشويه واجتها بنيه متوسطه بالعمر !!
مرحبا .. اني نور انتي الممرضه الجديده؟!
داليا .. مرحبا .. اسمي داليا ، بصراحا قريت الاعلان واجيت بعدني ممتوظفه.
نور .. هههه لتخافين مدام وصلتي لهنا ان شاء الله الوظيفه الج ، شوفي عزيزتي والدتي مره كبيره بالعمر واحنا كولنا متزوجين وطالعين عنها ، وبس اخويه الكبير باقي وياها ، وهذا اخويه كل وقته بالدوام يعني مو ع طول متواجد وياها ، لذلك قررنا نجيب شخص يعتني بيها ويشوف شنو تحتاج احسن متبقى وحدها.
داليا .. قبل لا احجي كولشي لازم اكولج شي كولش مهم ، .. اني .. اني بصراحا مو ممرضه !
بس اني كلت هشكل لانو حيل محتاجه الوظيفه ، يعني تكدرين تكولين حياتي متوقفه عليها ، اسفه لان كذبت ولنتي براحتج بس محبيت ابدي وظيفتي بكذبه.
نور .. اممممم بصراحه احنا كتبنا ممرضه هيج شكليات ، لان نريد شخص يكدر يعتني بوالدتي ويساعدها ، بس مو ظروري عنده شهادة تمريض المهم يكدر يخدمها.
داليا .. صدكيني اني اعرف اعتني بالناس واداريهم واكدر اشتغل وانطف وكولشي اسوي وتكدرين اتجربيني فتره وبدون مقابل اذا معجبتج اترك الشغل .
نور .. الفلوس ابد مو مهمه ، بس اني حجربج واشوفج اذا دبرتيها وماما حبتج ورضت عليج .. اعتبري الوظيفه الج !
داليا .. ماشي موافقه .
نور .. بس ترى انتي حتبقين هنا بالبيت ويا امي يعني ايام دوام اخويه انتي حتباتين يمها ، واذا اجه عادي تكدرين ترحين لبيتج مو مشكله.
داليا .. موافقه.
نور .. هاااا .. يعني مراح تسألين اهلج ، ماعدهم مانع تباتين بره البيت؟!
داليا .. لا عادي ماكو مشكله .
نور .. امممم ، ماشي من باجر تكدرين تجيبين غراضج وتنتقلين لهنا ، واني راح اخليهم يفرغولج غرفه حتى تنامين بيها.
داليا .. متعرفين اشكد ساعدتيني بهذي الوظيفه ، اشكرج واوعدج ما اكون عند حسن ظنج وظن والدتج.
نور .. تدللين عزيزتي ان شاء الله .
سلمت عليها داليا وراحت .. دخلت للدير الكل كان يتجنبها وميحجي وياها وكأنها مسويه جريمه او معصيه كبيره !
هي هم اتجاهلت الكل جمعت غراضها وملابسها بجنطه صغيره حضرت كولشي ونامت !
الصبح كعدت اخذت جنطتها وطلعت مسلمت على احد ولا ودعت احد ، حتى سلمى ما ودعتها ، اكتفت بتوديعها وهي نايمه ، باستها وطلعت.
راحت الوظيفتها الجديده..
هم استقبلتها نور سلمت عليها .. واخذتها حتى تعرفها بأمها ...!
دخلت داليا على ام نور شافتها مره كبيره بالعمر بس الوقار والهدوء واضحات على ملامحها .. سلمت وكعدت اتعرفت عليها من اول ما شافتها داليا ارتاحتلها لان شكلها طيبه وحبابه مو شريره وقاسيه ، يعني البشر يبين من خلال كلامه وسيماء وجهه
المهم ..
استلمت داليا الوظيفه الجديده وكانا كولش سعيده وفرحانه بيها ، اول مره ترتاح بشي !
شكرت ربها لانه ساعدها .. بس بداخلها كانت خايفه من السعاده والراحه الي عايشتها لان تاريخ حياتها الحافل بالمصايب والحزن ميخليها ترتاح للسعاده!
كانت تساعد المريه بأكلها ، بدواها ، بملابسها ، بفراشها وغرفتها بكل الي تحتاجه هي تسوي الها !
بالمناسبه نور كالتلها صيحيلها ست وفاء ، بس وفاء بعد مرور الوقت وبعد ما ارتاحتلها .. كالتلها صيحيلي حجيه وبس.
مر على دوامها بالوظيفه مالتها تقريباً شهر الا يومين ، حيل اتعلقت بالحجه وحبتها حستها مثل حنية الام عليها مو ع بالك تشتغل عدها.
والحجيه هم كولش حبت داليا وارتاحتلها بحيث صارت متستغني عنها نهائياً ..
داليا كولما تكعد ويا الحجيه بالحديقه العصريه .. كانت الحجيه تسألها عن حياتها وأهلها ..!
داليا بمرور الوقت بدت تثق بيها لذلك حجتلها كولشي عن حياتها من طفولتها لحد هذي لللحظه!
الحجيه هوااااي انقهرت عليها وهذا الشي خلاها تتعاطف وياها اكثر وتحبها اكثر !
فد يوم كعدت داليا من الصبح كالعاده راحت للمطبخ تحظر الريوك للحجيه.....!
كملت الريوك وخلته بالصينيه وهي دتطلع من المطبخ وشايله الصينيه ... دتمشي وجان تنظرب بواحد كدامها ....!
رفعت راسها دتريد تشوف منوو وهنااااااا كانت الصدمه !!
داليا .. انت؟!!!!!!!!!!!!!!!!!!!!!!!!!!!
للحكايه بقيه🤗
اسفه طولت عليكم بس تعرفون السبب ، البارت هذا كولش طويل تعويض الكم اتمنى يعجبكم.
رأيكم بالاحداث وتوقعاتكم للبارت القادم❤️
البارت القادم يعتمد نشره ع التصويت اذا ماكو تصويت ما انشر اعتذر منكم بس اريد القصه تصعد