"နည်းနည်းတော့ အေးနေပြီ။ မိုးရွာမလားမသိဘူး။"
ဒီမိုးယံဘေးနားသို့ ရောက်လာသော မမက စိတ်ပူသလိုပြောပေမယ့် သူ့ကို အခန်းထဲ အတင်းဝင်ခိုင်းခြင်းတော့မရှိပါ။ အေးနေပြီလားသိချင်သောကြောင့် သူ့ပါးပြင်ကို လှမ်းကိုင်သော မမ၏ လက်ချောင်းများမှ မေတ္တာဓါတ်သည် နွေးထွေးပါသည်။
"ကျွန်တော်လေ။ အိပ်ပျော်သွားတိုင်း ပြန်နိုးမလာတော့မှာကို သိပ်ကြောက်တာပဲ။"
သူ့လက်ဖျားအောက်မှ အုတ်တံတိုင်းငယ်ကို တင်းတင်းဆုပ်ထားရင်း ဒီမိုးယံ ခက်ခက်ခဲခဲ ပြောဖြစ်သည်။ အခုနောက်ပိုင်း နေ့အချိန်များတွင်ပါ ဘယ်နေရာဖြစ်ဖြစ်၊ ဘယ်အချိန်ဖြစ်ဖြစ် သတိလက်လွတ် သူ အိပ်ပျော်သွားတတ်သည်။ ပြန်နိုးလာတိုင်း နိုးထလာရမှာကို သူကြောက်မိသလို မနိုးထနိုင်တော့မှာကိုလည်း အရမ်းကြောက်နေမိသည်ဟုဆိုလျှင် စိတ္တဇဆန်နေမည်လားမသိ။
"ဆောရီးမမ။ စိတ်ညစ်စရာတွေ ပြောမိပြန်ပြီထင်သည်။"
သူ့စကားကို မမ ပြုံးပြီး ခေါင်းခါသည်။
"မင်း ပြောသမျှကို နားထောင်ခွင့်မရတော့မှာကိုလည်း မမက သိပ်ကြောက်တာပဲ ဒီဒီလေးရဲ့။"
"ကျွန်တော် ဘာလို့ လူဖြစ်လာတာလဲ မသိဘူး မမရာ။ တစ်ခါတစ်လေ ဘယ်တော့မှ မမွေးလာခဲ့ရင် အရမ်းကောင်းမှာပဲလို့ တွေးမိတယ်။"
မမရဲ့ မျက်လုံးများကို ရင်ဆိုင်ဖို့ ခွန်အားမရှိသောကြောင့် သဲပွင့်များကို ခြေဖျားဖြင့် ထိုးကော်ကစားရင်း သူ အကြည့်လွှဲဖြစ်သည်။ သူ့ကိုချစ်ရသူတိုင်းကို ၀မ်းနည်းစေဖို့ သူမွေးဖွားလာခဲ့သည်လားမသိ။ ကိုယ့်ကိုကိုယ်မမုန်းမိပေမယ့် စိတ်နာမိသည်။
"မမလည်း အဲဒီ့လိုအတွေးမျိုးကို အရင်က ခဏခဏ တွေးဖူးတယ်။ ဒီဒီ့ကို မမ ပြောခဲ့ဖူးတယ် မဟုတ်လား။ မမက ငယ်ငယ်တုန်းက မိန်းကလေးမဟုတ်ခဲ့ဘူး ဆိုတာလေ။ ကိုယ့်ကိုကိုယ် ဘာသတ္တ၀ါမှန်း မသိနိုင်တဲ့ ခံစားမှုမျိုးက အရမ်းကြောက်ဖို့ကောင်းတယ်။ ဒီလို လူတိုင်းက လက်မခံတဲ့ လူတစ်ယောက်အနေနဲ့ လူ ဖြစ်လာမယ့်အစား တစ်ခါတည်း မမွေးဖြစ်ခဲ့ရင် ပိုမကောင်းဘူးလားဆိုတဲ့ မေးခွန်းကို မမ အချိန်တိုင်း မေးနေခဲ့တာ။"
"မမလည်း အရမ်းစိတ်ညစ်ခဲ့မှာပဲနော်။"
"အခု ပြန်စဉ်းစားကြည့်တော့လည်း သြော် ငါ အဲဒီ့လို တွေးခဲ့မိပါလားဆိုပြီး ပြုံးမိရုံပါပဲ ဒီဒီရာ။ တကယ်တော့ လူဆိုတာ တခြားလူတွေ ကိုယ့်ကိုလက်ခံဖို့ထက် ကိုယ့်ကိုကိုယ် လက်ခံဖို့ပဲ လိုတာမဟုတ်လား။ အဲဒါကို မမ သတိထားမိတဲ့နေ့ဟာ ယောက်ျားလေး၊ မိန်းကလေးဆိုတဲ့ သတ်မှတ်ချက်တွေထက် လင်းလက်ဆိုတဲ့သူတစ်ယောက်အနေနဲ့ပဲ မမကို ခင်ပါတယ်လို့ မင်းပြောခဲ့ဖူးတဲ့နေ့လေ။"
ပင်လယ်လေက ခပ်ပြင်းပြင်းတိုက်နေသောကြောင့် မမ ဆံပင်တွေလည်း တောင်ပံခတ်နေသော လိပ်ပြာငယ်လို လွင့်ပါးနေသည်။ သူ့ကိုလှည့်ကြည့်နေသည့် မမ၏ မျက်လုံးများမှ အပြုံးများသည် နူးညံ့နေသည်။မမသည် သူ့အတွက်တော့ ဖြူစင်သည့် ကြာပန်းတစ်ပွင့်၊ နူးညံ့သည့် လိပ်ပြာတောင်ပံလေးတစ်စုံဖြစ်သည်။
"အဲဒီ့နေ့က မမ ငိုဖြစ်တယ်။ ငိုတာမှ နှလုံးသည်းခြေပျက်တဲ့ အရူးမလေးတစ်ယောက်လို ငိုဖြစ်တာ။ အဲဒီ့နေ့ကစပြီး မမဟာ လင်းလက်ဖြစ်လို့ မရှက်တော့ဘူး ဒီဒီ။ မမကို ဘယ်သူလဲ၊ ဘာကြီးလဲဆိုပြီး မေးလာခဲ့ရင်လည်း လိုက်ရှင်းပြမနေတော့ဘဲ သူတို့ဘာသာ စဉ်းစား ခေါင်းရှုပ်ဖို့ မမ ထားလိုက်တော့တယ်။ မမ မွေးဖွားလာခဲ့ရတာကို ပျော်တယ်လို့ မပြောနိုင်ပေမယ့် ကျေနပ်တယ်လို့တော့ ပြောလို့ရမယ်။ မင်းနားမှာ ရှိခွင့်ရတိုင်း၊ ဘယ်လောက်ပဲ သေးငယ်တဲ့ အရာလေးပဲဖြစ်ဖြစ် မင်းအတွက် လုပ်ပေးခွင့်ရတိုင်း လင်းလက်ဆိုတဲ့သူတစ်ယောက်အနေနဲ့ မွေးဖွားလာခဲ့ရတာကို ကျေနပ်မိတယ်။"
"မမရာ။"
ဒီမိုးယံ ကောင်းကင်ပေါ် မျက်နှာမော့ရင်း တီးတိုးရေရွတ်မိသည်။ ကောင်းကင်ထက်မှ ခုန်ဆင်းလာသော မိုးဖွားလေး တစ်စက်က သူ့ပါးပြင်ထက်မှာ အနမ်းတစ်စက် ခြွေချထားရစ်ခဲ့သည်။ ထို့နောက် မိုးစက်လေးနောက်တစ်စက်က သူ့နှုတ်ခမ်းများထက်မှာ လာရောက်နားခိုပြန်သည်။
မိုးစက်များ၏ အနမ်းသည် ချိုမြိန်အေးချမ်းလွန်းပါသည်။
"ဘ၀ဆိုတာ နေမင်းလိုပဲ ပူလောင်လွန်းတယ်ဆိုရင် အချစ်ဆိုတာကတော့ သစ်ပင်ရိပ်လို အေးမြပါတယ် ဒီဒီလေးရယ်။ မွန်းတည့်ချိန်မှာ နေမင်းကို ဘယ်သူမှ မော့မကြည့်နိုင်ပေမယ့် သစ်ပင်ရိပ်ကနေ လှမ်းကြည့်ရင်တော့ သစ်ကိုင်းသစ်ခက်တွေကြားက နေရောင်လေးတွေဟာ လှလွန်းတယ်လေ။ ဘ၀ဆိုတဲ့ နေမင်းကြီးကို အချစ်ဆိုတဲ့ သစ်ပင်ရိပ်က မင်း မော့ကြည့် ကြည့်ပါလား ကလေးရယ်။"
ဒီမိုးယံ မမ စကားကိုနားထောင်ရင်း ပါးချိုင့်လေးပေါ်အောင် ရွှင်ရွှင်လန်းလန်းပြုံးတတ်သော ကောင်လေးတစ်ယောက်၏ မျက်နှာကို မြင်ယောင်လာကာ သက်ပြင်းချမိသည်။ ထိုကောင်လေးနှင့်အတူ ရှိခဲ့ရသည့် ပျော်စရာအချိန်လေးများကို ပြန်လည်အမှတ်ရလာတော့ ကြည်နူးမှုနှင့်အတူ ၀မ်းနည်းမှုကြောင့် ရင်တွေနာလာပြန်သည်။
"ကိုယ်က တခြားလူတွေအပေါ် ချစ်တဲ့အချစ်၊ ကိုယ့်ကို တခြားလူတွေက ချစ်တဲ့အချစ်။ ဒီအချစ်တွေကသာ ဘ၀ကို လှအောင် ပြောင်းလဲပေးနိုင်မှာ မဟုတ်ဘူးလား ဒီဒီရယ်။ တစ်ရက်ပဲဖြစ်ဖြစ်၊ တစ်နှစ်ပဲဖြစ်ဖြစ်၊ တစ်သက်ပဲဖြစ်ဖြစ် အချစ်မရှိတဲ့ ဘ၀ကို ရင်ဆိုင်ရတာက နေမင်းကို မော့ကြည့်နေတဲ့ ကလေးတစ်ယောက်လိုပဲ မင်း ပင်ပန်းမှာပေါ့။"
ရေစိုသော ညှို့မှိုင်းနေသည့် အညိုရောင် သဲသောင်ပြင်နှင့် သူ့ခြေဖ၀ါးအောက်မှ ခြောက်သွေ့သော သဲသောင်ပြင် အဖြူရောင်။ သဲသောင်ချင်းတူပေမယ့် အရောင်ကွဲနေသည်မှာ ယုံချင်စရာပင် မရှိပါ။ ဘ၀ဆိုတာသည်လည်း အတူတူပေမယ့် တစ်ယောက်ချင်းစီရဲ့ အမြင်ကတော့ ကွဲပြားမှာပါ။ မမရဲ့ စကားတွေကို နားထောင်ရင်း ဒီမိုးယံ ရင်ထဲ လေးလံလာသည်။
"ဒါပေမယ့် မမရာ။ အဲဒီ့ အချစ်ဆိုတာကြီးကြောင့် ပိုပြီး ခံစားရတယ်ဆိုရင်ရော။"
"ဘယ်အရာမဆို ညှိုယူလို့မရတဲ့အရာမှန်သမျှကြောင့် ခံစားရမှာပဲလေ။ အချစ်မှာလည်း အတူတူပဲ။ ကိုယ်လိုချင်သလောက် ပြန်မရရင်၊ ကိုယ်ပေးသလောက် သူက ပြန် မယူရင် ပူလောင်ရမှာပဲ။ မမလည်း ကိုကို့ ကို ချစ်မိတုန်းက လူးလှိမ့်နေအောင် ခံစားခဲ့ရတာပဲ။ ကိုယ်လိုချင်သလောက် သူကမှ ပြန်မချစ်နိုင်ခဲ့တာပဲလေ။"
"ကျွန်တော့်ကိုကျတော့ရော မမ။ ကျွန်တော့်ကိုချစ်ရတဲ့အတွက်ရော မမ မခံစားရဘူးလား။"
ထိန်းချုပ်ထားသည့်ကြားမှ ပွင့်အန်ထွက်လာသော စကားတစ်ခွန်းအတွက် သူ နောင်တ မရဖြစ်။ မျက်ရည်ဝိုင်းနေသော မမရဲ့ မျက်ဝန်းများကို မညှာတာမိတဲ့ သူ့ကို မမ မုန်းသွားလျှင်လည်း သူ ကျေနပ်နိုင်ပါသည်။
"ခံစားရတယ်ဆိုရင်တောင် ၀မ်းနည်း နာကြည်းမှုတွေ မဟုတ်ဘူး ကလေးရယ်။ မင်း ပြန်ပေးခဲ့တဲ့ ချစ်ခြင်းတရားတွေအတွက် ကြည်နူးကျေနပ်ရတဲ့ ခံစားမှုတွေပဲ ဖြစ်လိမ့်မယ်။ မင်း မမကို ချစ်တာပဲလေ။ မင်း ပေးနိုင်တဲ့ ချစ်ခြင်းမေတ္တာတွေနဲ့ မင်း အတတ်နိုင်ဆုံး ချစ်ပေးခဲ့တာပဲ မဟုတ်ဘူးလား။"
မမရဲ့စကားများကြောင့် သူ အံ့သြရသည်။ မမ ကျေနပ်သည်တဲ့လား။ သူ မမကို ပြန်မချစ်နိုင်ခဲ့ပေမယ့် သူပေးဖြစ်ခဲ့တဲ့ ဂရုစိုက်မှုတွေ အခြားမေတ္တာတွေအတွက် မမ ပျော်ခဲ့သည်တဲ့လား။
ဟုတ်မှာပါ။
သူ မမကို အတတ်နိုင်ဆုံး ဂရုတစိုက် ဦးစားပေးဆက်ဆံခဲ့တာပဲ။ အတတ်နိုင်ဆုံး စိတ်ချမ်းသာအောင် ထားပေးခဲ့တာပါပဲ။ ဒါပေမယ့် သူ စိတ်ချမ်းသာအောင် မထားခဲ့သူ တစ်ယောက်တော့ရှိသည်။ သူ့ရှေ့မှာ မျက်ရည်မကျအောင်ထိန်းရင်း အံကြိတ်ထားတဲ့ ကောင်လေးတစ်ယောက်နဲ့ မျက်နှာက သူ့မျက်စိရှေ့မှာ ပေါ်လာပြန်တော့ ရင်ညွှန့်ထဲက အောင့်တက်လာသည်။ ၀မ်းဗိုက်တစ်နေရာကို ဓါးထက်ထက်ဖြင့် ထိုးခံရသလို နာကျင်ရသည်။
"ငါ မင်းကို အရေးကြီးတဲ့ စကားပြောစရာရှိတယ်။"
ပင်လယ်ပြင်မှ တိုက်ခတ်လာသော လေအေးတစ်ချို့နှင့်အတူ ဝေးလံသောအတိတ်တစ်ခုမှ ရှိုင်းထွဋ်အသံသည် အတူလိုက်ပါလာသလို သူ ပြန်ကြားယောင်မိသည်။ နားရွက်ဖျားများပင် နီရဲနေကာ မသိမသာ ခေါင်းငုံ့ထားသော ပုံရိပ်ငယ်ကို ပြန်မြင်ယောင်ရင်း ဒီစကားတစ်ခွန်းပြောထွက်ရန် ရှိုင်းထွဋ် ဘယ်လောက်တောင် ကြိုးစားအားယူခဲ့ရမည်ကို တွေးမိတော့ ရင်ခွင်တစ်ခုလုံး ရစရာမရှိအောင် ဆုတ်ဖြဲခံရသလို နာကျင်မိသည်။
သူ အတ္တကြီးခဲ့တာ။
နားထောင်ရဲသည့်သတ္တိမရှိခဲ့တာ။
သူ့အတွက် မမ စိုးရိမ်နေတာကို မြင်ရဲပေမယ့် ရှိုင်းထွဋ် စိုးရိမ်ပူပန်နေမှာကိုတော့ မမြင်ရဲခဲ့။ သူ့ရောဂါအတွက် မမ ၀မ်းနည်းနေတာကို လက်ခံနိုင်ခဲ့ပေမယ့် ရှိုင်းထွဋ် ခံစားနာကျင်နေရမှာကိုတော့ မမြင်ရက်နိုင်ခဲ့။ သူလိုလူတစ်ယောက်ကို မမ ချစ်နေတာကို မထူးခြားသလိုနေနိုင်ခဲ့ပေမယ့် သူချစ်ရသည့်ရှိုင်းထွဋ် သူ့ကိုချစ်နေမှာကိုတော့ သူ မလိုလားခဲ့ပါ။ ထိုအချိန်ကမျက်လုံးဝိုင်းများမှ နာကျင်မှုတွေကို သူ မမြင်ချင်ယောင်ဆောင်ဖြစ်ခဲ့သည်။ ရှင်းသန့်သောမျက်နှာထက်မှ ရှက်ရွံ့မှုတွေကိုလည်း သူ လျစ်လျူရှုဖြစ်ခဲ့သည်။
ဘောလုံးပွဲ အားပေးစင်မှာ သူ့ကိုမြင်ရသည့်ခဏ မယုံနိုင်လောက်အောင် အံ့သြသွားသော မျက်လုံးများ၊ ဘောလုံးပွဲကို လုံးလုံးဂရုမစိုက်နိုင်ဘဲ တခြမ်းစောင်းထိုင်ကာ သူရှိရာသို့ အကြိမ်ကြိမ် မသိမသာခေါင်းငဲ့ကြည့်နေခဲ့သည့် မျက်နှာတခြမ်း၊ မဂ္ဂဇင်းမျက်နှာဖုံးမှာ လက်မှတ်ထိုးပေးပြီး ရင်ခွင်ထဲပြန်ထည့်ပေးလိုက်ချိန်မှာ ပျော်ရွှင်ရိပ်ကို ဖုံးမရနိုင်လောက်အောင် ပြုံးနေသည့် နှုတ်ခမ်းများ။ အရာအားလုံးက သူ ခံစားဖူးသည့် ဝေဒနာများစွာထက် ဆိုးရွားစွာ နာကျင်စေချင်ပါသည်။
"ငါ မင်းကို ရအောင် မုန်းမယ်။"
ဒီစကားတစ်ခွန်းသည် သူ့ရဲ့မျက်နှာပြင်ပေါ် ကျဆင်းနေသော မိုးစက်လေးများကိုလည်း အက်ဆစ်အဖြစ်သို့ ပြောင်းလဲနိုင်သလို သူ့ကို ထွေးပွေ့နှုတ်ဆက်နေသော ပင်လယ်လေညှင်းကိုလည်း အဆိပ်ငွေ့ဖြစ်စေပါသည်။
အခုတော့ သူ့ဘ၀မှာ အချစ်ရဆုံးသူရဲ့ အမုန်းများသာ ကျန်ရှိတော့သည်။
ဝမ်းနည်းမိပေမယ့် ကျေနပ်မိပါသည်။
သူကိုယ်တိုင်က ရှိုင်းထွဋ်ကို ချစ်ခဲ့ပေမယ့် ရှိုင်းထွဋ် သူ့ကို ပြန်လည်ချစ်ခွင့်ကိုတော့ မပေးခဲ့နိုင်လောက်အောင် ရက်စက်ခဲ့တာပဲလေ။