ديسباسيتو

الجزء 07

قلت ليها مشكورة ي ميرو طمنتيني ...شكرآ ..شكرآ شكريا ..سلام نمستي وبكل اللغات بقول ليك شكرآ

قالت لي : سلام نمستي م معناها شكرآ ي بهيمة الأنعام..اصبري اسمعي كلامي بالاووول ..

قلت ليك سجمممك كيف تخافي من واحد تافه كده ! اوعك اوعك تستسلمي فاهمه ! انتي ترتيل الطيب بتها لي نجاة ..اوعه اسمع مننننك كلمة حقت خوف او أستسلام..نسيتي عملتي شنو في أسحق الزفت !! ( دا واحد تافه وقليل أدب ..وريتو الجن الأحمر لمن سافر نيالا بي سببي )

ونسيتي نفيسه السمينه ( دي قرت معانا في الاساس كانت بتهرشنا وبتشيل فطورنا تاكلو بس انا يوم جنيتي قامت ومسكتها دقيتا وندمتها وبقيت اهرشها لمن خليتها تتنقل ..اتاري السجل بتاعي حافل ..والسبب حضرة الصول معالي )

حتي هشام اخوي انتي أدبتيهو .......

سمعت صوت لووب وهي قالت: آآي

طبعآ هشام لبعها ..خطف منها التلفون وقال لي بنبرة جاده : اسمعي هنا ..لو اي زفت طين عاين ليك نظرة م ياها كلميني...اقسم اجي اعدمو الروح ..

طبعآ هشام اداني احساس بالقوة م عادي ..واصل كلامو وي ريت لو ما واصل : انتي م براك ..اخوك لسع عايش م مات ..

اخوي !!! اخوي ي هشام .!! ياخ انا بحبك افهم !!

قلت الكلام دا في نفسي ورديت ليهو بصوت واطي : حاضر ..

💙💙💙

جا يوم السبت ..اليوم الموعود..جهزته نفسي وطلعته انا وانصاف..آشرف أصر انو يوديني بس قلت ليهو لازم اعرف الطريق براي عشان اتعود..

المهم..أنصاف طبعآ كليتها في السوق..قبل م تمش اول ركبتني..ياخ لو شوفتو كمية الطلبه !! صفصف قالت لي احمدي ربك هو الليله السبت..في كليات ما شغالين..يعني بكرة اتوقعيهم أكتر من كده..

بعد مشت شويه كده والهايس اتحرك..

تاني الكمساري طقطق اديتو خمسه رجع لي تلاته جنيه..قلت ف نفسي مواصلاتهم رخيصه..

بعد يمكن زي عشرة دقايق كده وصلنا ..الناس كلهم نزلو وانا نزلت معاهم..

البنات دخلو بي اتجاه والاولاد باتجاه..

انا مشيت محل البنات..يلا الحرس الفي الباب قعدت تستجوب فيني وين بطاقتك ¿¿¿¿

)تحية للحرسات الصعبات ههه)

قلت ليها انا جديده..

قالت لي الطلبه الجداد كلهم بطاقاتهم طلعت..

قلت ليها انا اتنقلته عشان كده..

اتجادلته معاها كدااا ..المهم في النهايه اتخارجت منها المرة اللئيمه دي ..وقت طلعته طبعآ ما فاهمه حاجه..والبنات الكانو معاي فص ملح وذاب ..

انا م فاهمه نظامهم كيف..وانا واقفه متحيرة في عربية سنتافي حمراء فاقع لونها جات والناس الجوه مشغلين اغاني عاليآ صوتهااا

والشي الغاظني انو العربيه دخلت بدون ما أسيادها ينزلو ويمرو بالحرس..عرفته انو في تفرقة حاصله..

العربية دي جات ادتني هواااء ¡¡¡ وحات رحمة امي لمن وقعته ¡

في بت جات رفعتني وقالت لي ي ساتر ¡ بس م تكوني اتعوقتي ¡

قلت ليها لالا انا كويسه..

قالت : اصلآ ود السفير دا متغطرس ..أسي مفترض ينزل يعتذر مننك

قلت ليها م مشكله حصل خير..عايني ..انا بقرا في هندسه قسم النوويه..وانا جديده ..ممكن توصفيها لي ؟؟؟

قالت لي بعد شهقت : بتقري مع ناس ديسباسيتو !!"

قلت ليها لالا ما بسمع اغنية ديسباسيتو..

قالت لي لالا قصدي مع مدريدي !!!!

هنا قلبي اتدردق دردقت تحت رجولي..وبلعته ريقي وخشمي جفه ..بالله زي الأكلته تلاته بسكويتات ورا بعض..

قلت ليها بعد تمتمه :ااا ا اي

قالت لي : السنتافي الحمراء الغريبه الهسي مرت بينا دي حقت مدريدي..والناس المعاهو وهو كلهم سامنهم قروب ديسباسيتو..تيمنآ بي مدريدي ود السفير السوداني لأسبانيا

طبعآ حاسه بي نفسي واقفه في واحد من كواكب المجموعه الشمسيه ..وانو الأكسجين مقطوع وكده..

لكن استجمعته قوتي وقلت ليها : اسباني ولة ياباني ..ارح وصفي لي انا عندي محاضرات..

قالت لي انتي العربيه الجيتي بيها من السوق وينا ؟؟؟

تاني واصلت : لكن صح انتي جديده ..يلا بكرة لو جايه الجامعه..العربيه الجيتي بيها حتنزلكم برة وتنتظركم جوة.وقت تمرو بالحرس بتجو تركبو تاني بدون ما تدفعو..وتقولي للكمساري يوقفك في هندسه تمام؟؟ ( تحية لكل زول بقرا تواوا ...وضاق شلهتت المواصلات ..قولو سلام .وابعتو لي ادد بلييييس )

طبعآ طلعته كيشه وحاتكم..شكرتة البت بعد ما ركبتني واحده من الهايسات واتكلمت معاهو لزوم حافلتي فاتتني وكده..عشان ما يشيل مني..وكلمتو ينزلني في هندسه..غايتو ما قصرت معاي

💙💙💙

طول الطريق ماف آيه ما قريتها...لغاية البت الجمبي لكزتني عاينته ليها بخوف ..هي زاتها لمن اتخلعت قالت لي الكمساري بتكلم معاك ..عاينت للكمساري قام قال لي ديك كليتك ..

نزلته ونزلو معاي كم نفر..سامعاهم بتوشوشو..م اشتغلته بيهم...

المهم ..جيت بي جمب الكافتيريا في زول وقف قدامي ...

رفعته راسي عاينته ليهو لقيتو منو ؟؟؟؟؟؟

لقيتو منوو!!!!

ياهو ياهو زاتو ..مدريدي زفت الطين!!

تعالو اوصفو ليكم..

يلا انا عشان شاماهو حأقول ليكم شيييين وقبييييح..لونو قمحي كده..ملامحو أجنبيه أجنبيه وشعرو ملونو ..السواد غالب لكن فيهو شوية حمار (افتحو الحاء والميم ما تبشتنو لي الروايه )بالله زي المريخابي

معضل طبعآ ..طويل ..جسمو رياضي..صراحه هو وجيه بس انا حأقول شين..عامل زي الغول

طبعآ فرقة ديسباسيتو جات وقفت وراهو..والطلبه شايفاهم بدو يتجمعو..والقريب نادا البعيد..

غايتو جنس شمارات !!

طلع النضاره الشمسيه وقال لي : ترتيل الطيب عمر ..كيفك.؟؟

م عارفه عرف اسم جدي كيف ..هو انا قاعده أنساهو بعد مرات

رديت ليه بقوة م عارفه جاتني من وين : انا كويسه..وحضرتك ؟؟

ضحك لغاية بانت انيابه..مسك دقنو وقال :احيي جراءتك ..انا كويس..

رديت ليهو وانا حاسه خوفي راح : والوقعه كيف ؟؟ عساك م اتعوقته ؟؟

هنا ملامحو اتغيرت..انا قلته حيضربني خلاص..

عاين في السماء مسسسافه اظن استغفر ربو واتصبر ..تاني رجع عاين لي : الوقعه ؟؟! سبحانه ربي..الوقعه صحت وحش جواي كان نايم في سبات ليهو حكاية بتاعت سنه كاامله.وهو جعان اتخيلي ؟؟

طوالي شهقته شهقت الاستهتار ديك وقلت ليهو : حرامون عليييكاااا..وخاليهو جعان ليي !!!؟؟؟؟

يلا خليهو يفطر وما تنسي كباية الشاي..وغمزته ليهو وزحيت منو..

طبعآ انا اتشهودته ..اتوقعته تحت اي لحظة يهجم علي..

الناس ديل وقفو وفتحو خشششمهم زي كبوت العربية..وفي واحدين اتصدمو تقريبآ ..استغربو من حاجتين ..عدم خوفي..ومن برود مدريدي ..

💜💜💜

دخلته الحمام طوالي..

غسلته وشي وانا بررجف وبرجف ..قلبي دا عمل لي اضاني صمم من صوت ضرباتو العاليه..

استغفرته ربي ..ولاني في الحمام م قريت ولا آيه..هديت شويه وطلعته

قلته ربنا معاي ماف حاجه بتجيني..

دخلته القاعه لقيت الدكتور شغال..وجن نادتني قعدته جمبها..

اللهم حضرت المحاضرة..بس والله العظيم الدكتور دا بقول سنووو !! ما عارفه ..

💙💙💙

بعد المحاضرة..الناس طلعو انا فتشته وجن دي فوق وتحت م لقيتها..كمان اتصلته عليها تلفونها مغلق..

اللهم اتوكلته مشيت الكافتيريا..اصلآ كنت جوعانه

بعد ما اشتريت مشيت كبيت شطة ..قبل م أزح في بتين جو

قامت واحده رشت لي شطة ف عبايتي ..قالت : اووبسس..سوري م شوفتك..

ودنقرت لي جمب اضاني وقالت : البرش مدرديدي بي عصير انا برشو بي الشطه..

وضحكت هي وصحبتها ومشو..

م اتمالكته نفسسي و طوالي شلته ماعون الشطه وقلت ليها بصوت عالي : وانا البرشني بالشطه بحممو بالشطه..واا شوو رشيتها وحممتها كلها

البت صرخت وقالت والله م اخليك

م كضبته ختيت الفطور وقلت ليها تعالي ..انا بوريك ما تخليني كيف ..

الناس طوالي حاجزونا..يلا تتزكرو حنان ؟؟؟ بااس

حنان جات مسكتني وجرتني طلعتني من محل الشكله..وانا نفسي قايم وهايجه ..بالجد الوحش الجواي هو الصحي ما الوحش بتاع مدريدي

حنان جابتني تحت شجرتهم

شوقي قال : دي جريتيها من وين !!! ومالا عامله كده 😳😳

حنان : اتشاكلت مع هديل ومنن ..بي الله ويايمين جريتها من هناك

اروي طلعت منديل وقشت لي الشطه ..: هديل لي عملت كده !! وسخت ليك عبايتك

حنان ضحكت وقالت : وهي قصرت !!؟ ياخ حمممتها بالشطه كولها هههههه

قعدو يضحكو وقالو لي أتاريك م هينه .

احمد قال : البت دي شبه ديسباسيتو بس..رائيكم شنو نضموها ؟

شوقي : احسنت قولآ..

في واحد ( الود السلم لي وقت مع وجن ) قال : مدريدي ي ناس نسيتوهو ؟؟

في صوت قال : نحن محتاجين بت في القروب ي وليد ..و ترتيل خير الاختيار ..

طبعآ اتلفته ودي كانت آخر شخصيه اتوقعها ..

توقعاتكم

يتبع....