Kabanata 27
Brave and Weak
Pagkarinig ko sa sinabi niya ay nanghina ako. Bumagsak ang mga kamay at balikat ko. Hindi ko kayang umalis.
Hindi kapani paniwala. May parte sa akin na nagsasabing hindi iyan totoo. Na playboy lang siya at gusto niya lang akong mabihag kaya niya sinasabi 'yan. Ayokong maniwala. Pero ang maliit na parte sa akin ang nasusunod. Iyong parteng pwede... pwedeng mahal niya ako.
Tulala ako sa kanyang sasakyan habang nag dadrive siya patungo sa building. Nang nakita kami ni Mia kanina ay sinenyasan ko na lang siyang magkita na lang kami doon. Nakuha niya kaagad at siguro'y siya na rin ang nagpaliwanag kay Ma'am para sa akin. Kailangan kong magpasalamat sa kanya mamaya.
"Sorry..." Tikhim ni Rage habang hinihinto ang sasakyan dahil sa pag pula ng traffic light.
Hindi ako kumibo. Nanatili akong tulala.
"Sorry..." Ulit niya. "Hindi ko sinasadya. Hindi ko dapat sinabi 'yon. It's too fast for you. I'm sorry, Sunny. It's true pero alam kong iniisip mo na hindi dahil masyadong mabilis."
Suminghap ako at binalingan siya. Hindi ako nagsalita. Nakita kong naghihintay siya sa sasabihin ko ngunit wala akong masabi kundi ang punahin ang box na ibinigay niya kanina.
"Hindi ko 'to tatanggapin." Sabi ko sabay lagay sa box doon sa gilid ng aking upuan.
"Alam kong di mo 'yan tatanggapin."
"Hindi ako gold digger, Rage."
"I know, Sunny. Hindi ka nanghingi. I've been with you for a while now and I'm sure you're not like that. Just please take the damn phone. Di ko maatim na ginagamit mo 'yong kay Kid."
"Nasasaktan lang ang ego mo dahil ginagamit ko 'to. Ego trip-"
"Yes! Alright? Nasasaktan ang ego ko!" Iritado niyang sinabi. "Nasasaktan ang ego ko kasi kaya kong bigyan ka ng cellphone pero nag titiis ka sa cellphone ng taong 'yon. Sunny, aasa siya sa'yo. You should return that phone."
Tumahimik na lang ako. Inabala ko ang sarili ko sa panonood ng mga sasakyan sa labas. Tama siya. Pero hindi ko parin maiwasan. Natatakot parin ako. Pakiramdam ko ay masasaktan lang ako sa huli. Hindi ako mapakali. Pakiramdam ko may mali sa lahat ng ito at hindi ko lang malaman kung saang parte. Pero nahuhulog na ako sa kanya. At ang pagdududang ito ay hindi na makakapagpatayo ulit sa akin.
Nang kinuha ko na ang sweldo para sa gabing iyon at sa wakas ay nakausap na si Mia, pagod na pagod na ako. Naghihintay si Rage sa labas at panay pa ang tanong ni Mia tungkol sa nangyari.
"Sinaktan ka na naman ba niya? Simula ata nong pinatulan mo 'yang si Sir Rage, palagi ka ng umiiyak!" Ani Mia palabas kami ng building.
Suminghap na lang ako at nanghihinang naglalakad. Niyayakap ko ang sarili ko dahil sa pinaghalong ginaw ng aircon at ng malalim na gabi. Mabuti na lang at may dala akong jacket.
Natahimik lang si Mia nang nakita niya si Rage sa labas. Naghihintay siya sa amin at pinapanood niya ako habang papalapit sa kanya. Kinalas niya ang kanyang pagkakahalukipkip at tumayo ng maayos.
Hindi ako makatingin sa kanya kaya hinawakan niya ang baba ko para magtagpo ang aming mga mata.
"Alam kong di ka rin papayag kung sabihin kong sa bahay na kayo magpalipas ng gabi. Pero sana pumayag ka kung sabihin kong sa Lounge niyo ako matulog."
Tsaka pa lang ako napatingin sa kanya nang sabihin niya iyon. Nagkasalubong ang kilay ko. Si Rage Del Fierro? Matutulog sa sofa?
"Wala kaming kama don para sayo." Sabi ko.
"Dalawa lang ang sofa. Don't tell me chupi muna ako?" Utas ni Mia.
"Please, Sunny." Hinaplos niya ang pisngi ko. Hindi ko mapigilan ang pag pikit sa marahan niyang haplos.
Alam kong kahit hindi ako pumayag ay gagawin niya parin ang gusto niya. Hindi ko alam kung saan siya pu-pwesto sa Lounge pero nang nakarating na kami doon ay agad siyang umupo sa sofa na madalas kong tinutulugan.
"You seriously need a bed here." Aniya habang abala kami ni Mia sa pag aayos ng mga gamit.
"Hindi na kailangan, Sir. Next week, aalis na kami ni Sunny dito. May bed space na kaming nakuha."
Hindi na nagsalita si Rage. Pumasok si Mia sa banyo pagkatapos kong mag hilamos. Naka pajama na ako at puting spaghetti strap na siyang madalas kong pinapantulog. Kinuha ko na ang kumot at tiningnan ang sofa na inuupuan ni Rage.
Naka puting white v-neck tshirt na siya at nilalagay niya sa gilid ang coat na suot niya kanina. Nakita ko ring itinabi niya ang kanyang sapatos humilig siya sa sofa.
Bitbit ang kumot ay dahan dahan akong lumapit doon sa sofa. Pinagmasdan niya ako. Ngumuso siya nang nakalapit na ako ng husto. Nilagay niya ang unan ko sa kanyang hita.
"Dito ka matulog." Sabay tapik niya doon.
Umiling ako. "Mahihirapan ka. Pwede namang diyan ka na lang tapos sa sahig ako."
Umiling din siya. "No. I want you to sleep here with me." Sabay tapik niya ulit sa unan.
Tumikhim ako at umupo sa sofa. Tiningnan ko ang unan na tinapik niya ulit para imuwestra sa aking doon na ako humiga. Kinuha ko ang unan. Nagulat siya sa ginawa ko.
"Ilagay mo na lang 'tong unan sa likod o sa ulo mo. Di ko na kailangan ng unan." Sambit ko.
Ngumuso siya. "Will you be comfortable?"
Tumango ako at binigay ulit sa kanya ang unan.
Nakita ko kung paano niya iyon nilagay sa kanyang batok at kung paano siya bumuntong hininga dahil sa ginhawang nadama niya. Umangat ang labi ko. Hindi ko mapigilan ang mapangisi. Siguro ay masyado siyang napagod ngayong araw na 'to. Kakagaling niya sa meeting ay dumiretso na agad siya sa bar para lang puntahan ako.
Dahan dahan akong humiga sa kanyang hita. He stiffened. Naramdaman ko kung paano ko ninakaw ang ginhawang nadama niya kanina dahil sa paghiga kong iyon.
Tumingala ako. Nakita kong nakadungaw siya sa akin. Ilang sandali pa bago ko naramdaman na guminhawa ulit ang kanyang katawan. Pagod siyang ngumiti sa akin. Ilang sandali ay kinagat niya na ang kanyang lower lip. Tumikhim siya at nagsalita.
"Pwede bang sa bahay ka na lang matulog gabi-gabi? This bothers me all the time."
"Hindi ako don nakatira." Sabi ko.
"Well, ako doon ako nakatira." Nagtaas siya ng kilay.
"Ikaw ang doon nakatira. Ako hindi. Kaya bakit ako doon titira?"
Ngumisi siya. "Because I'm courting you."
Ngumuso ako para magpigil ng ngiti. "Ganyan ba ang sinasabi mo sa lahat ng babaeng nililigawan mo?"
Sumimangot siya at dahan dahang hinaplos ang buhok ko. "I don't do courtship, Sunny."
"Sinabi mo sakin sa sine na may niligawan ka na non."
"That was my first and it was very very different." Aniya.
"Basta niligawan, pareho lang 'yon." Sambit ko.
"I didn't offer her to stay in our house, Sunny. Tsaka that was high school. We just make out a lot and that's all. No feelings involved."
"Bakit mo siya niligawan kung wala ka palang feelings?" Napapikit ako nang hinawi niya ang buhok malapit sa aking noo.
"Kasi teenager pa lang ako at tingin ko ganon dapat."
May kaonting selos akong naramdaman para sa babaeng una niyang niligawan. Kahit na nilinaw niyang walang involved na feelings ay pakiramdam ko imposible.
Hindi na ulit kami nag usap tungkol sa pag alis ko. Ang tanging pumipigil sa akin na umalis ay ang nararamdaman ko para sa kanya. Nakakapanghina iyon at parang nawawala ako sa aking sarili. I lack better judgement these past few days but I don't mind. Lalo na pag naaabutan ko si Rage na nanonood sa akin sa gitna ng busy niyang opisina. Halos mabitiwan ko ang mop tuwing nakikita ko siyang nakatitig sa akin.
Shit!
Ngumingisi lang siya at umiiling saka tinitingnan ang kanyang mga papel. Nalalapit na iyong event nila ngayong Biyernes kaya mas lalo siyang nagiging busy. Ang tanging mga panahon lang na nagkikita kami ay tuwing gabi, minsan sa Lounge niya ako pinupuntahan, minsan naman sa opisina ko siya naaabutan.
"Leave the cart there, Sunny." Aniya habang hinahawakan ang batok.
So far, itong araw na 'to ang pinaka busy niya. Hindi ko napansin kung nakakain ba siya kaninang lunch pero may naghatid ng pagkain sa akin sa Lounge.
"Okay ka lang?" Tanong ko.
Nakaupo siya sa kanyang swivel chair at minamasahe ang kanyang batok.
"I will be if you sit here." Sabay tapik niya sa kanyang hita.
Kumalabog ang dibdib ko. Halos maestatwa ako sa kinatatayuan ko. Nakita ko na noon kung ano ang kaya niyang gawin sa loob ng opisina niya. Napalunok ako at halos napatalon siya sa kanyang kinauupuan.
"Nevermind. You can sit there." sabay muwestra sa sofa.
Siguro ay nakita niya kung paano ako nagulat sa alok niya. Tumikhim ako at dahan dahang naglakad patungo sa kanya. Nag angat siya ng tingin sa akin na para bang milagro iyong pag lapit ko doon.
Dahan dahan akong umupo sa kanyang hita. Narinig ko ang kanyang pag buntong hininga. Inilapit niya agad ang kanyang katawan sa aking likod.
"Ayos ka na ba?" Nilingon ko siya at agad kong naramdaman ang pagpulupot ng mainit niyang bisig sa aking katawan.
Shit! Halos mapapikit ako lalo na nang huminga siya sa aking tainga.
"Very fine now. I'm just tired." Aniya sa aking leeg.
"Kumain ka na ba ng dinner?" Halos manginig ang boses ko sa pagtatanong.
"Hindi pa. I'm nervous." Aniya.
Tumaas ang kilay ko at sinubukan ko ulit na lumingon sa kanya. "Bakit? Para bukas?"
"Uh-huh..."
"Wow! Rage Del Fierro, nininerbyos?"
Ngumiti siya. "Well because if I close the deals, I can have my precious vacation. Kailangan kong gawin ang lahat para makapag bakasyon."
May kung anong mga mananap na nagwala sa loob ng tiyan ko. Kinailangan ko pang huminga ng malalim para mapakalma iyon pero parang mas lalo lang atang lumala.
"Kaya mo 'yan. Saan mo ba balak mag bakasyon?" Tanong ko.
"I don't know. Kung saan mo gusto?"
Nanlaki ang mga mata ko sa sinabi niya. "H-Hindi ako pwede. Magsisimula na 'yong pasukan next week. Mag aaral ako." Sabi ko.
"Well, sa school niyo ako magbabakasyon?" Humalakhak siya.
"Nagbibiro ka ba? Dapat ay pumangibang bansa ka o mag beach para ma enjoy mo 'yong vacation mo."
"No... I asked for this vacation so I can be with you, Sunny."
"Binibiro mo ba talaga ako? Imposible." Sabi ko.
"Yeah right. Akala ko din imposible akong magka ganito."
Huminga ulit ako ng malalim. Masyadong mabilis ang hataw ng puso ko at pakiramdam ko ay ramdam niya dahil sa lapit naming dalawa.
"Okay, I'm sorry. Am I freaking you out? Am I too fast?" He stiffened again.
Humalakhak ako. "Nope. Pero sorry, hindi talaga ako makakapag bakasyon." Kahit na gusto ko. Nakakaengganyo.
Nilingon ko siya at nakita kong nakatingin siya sa akin. Hinigpitan niya pa lalo ang kanyang pagkakayakap sa akin. Napatingin ako sa basa at mapupula niyang labi. "At di mo pa ako sinasagot. I'll wait till you say yes before I'll kiss you again so stop staring."
Ngumiti ako.
My mind is clouded. I lost my wisdom and judgement. Nawala ko ang lahat ng prinsipyo ko sa kanya. At natatakot akong wala na akong pakealam kung matalo man o manalo ako sa pagsusugal ko sa kanya. He's making me brave and weak at the same time.
Hindi ko matanggal ang ngiti sa aking labi araw-araw na naroon ako. Kahit na pagkagising ko ay may naka plaster paring ngiti sa aking labi.
"Hoy, hija! Dalawang araw na 'to dito! Hindi mo ba 'to nakikita?" Sabi ni Mia pagkagising ko.
May nilapag siyang sulat na agad kong nakuhang galing sa unibersidad na inenrol-an ko. Mabilis akong bumangon at binuksan ang sulat. Nakita ko ang break down ng expenses para sa semester na iyon at ang pag welcome nila sa akin.
"Di ka na excited sa pag aaral." Sabi ni Mia habang nagsusuklay ng buhok.
"Excited no." Sabi ko sabay tupi sa sulat at tabi nito.
Nag angat ako ng tingin sa kanya. Pinagtaasan niya lang ako ng kilay at nginitian. Tumunganga ako hanggang sa narealize kong abala na pala ang lahat dahil ngayon ang event. Nag madali ako sa CR para makaligo at makapagbihis. Sinuot ko ang kulay royal blue kong uniporme na hanggang ngayon ay malaki parin para sa akin. Inayos ko ang sintas ng sapatos ko at sinikop na ang buhok para gawing pony tail.
"Big day ng Rage mo?" Sabi ni Mia sabay halukipkip at hintay sa akin.
Abala ang lahat sa pag punta sa kani kanilang floor. Pagkatapos maglinis sa floor nila ay bababa na kami para doon naman sa event maglinis. Panay ang talak ni Aling Nenita dahil late 'yong iba at mapapagalitan daw kami ni Mrs. Ching. Umiirap lang si Mia tuwing naririnig niya ang nanay ni Eric na nagmumura. Iniisip ko tuloy kung magkakaayos pa ba sila.
"Oo. Baba na tayo?" Ani Mia nang nakitang tapos na ako.
Tumango ako at humugot ng malalim na hininga. Tinulak ko ang cart ko at sabay na kaming bumaba ni Mia.