دخلو للفيلا لقاوها عامرة دخلو كيسلمو ، كان الاخ ديال علي و مرتو وولادو ب2 سليم 26 سنة و عمر 21 سنة .
وكانت عائلة ليلى حتى هي امها الحاجة رقية وبنتها الاخرى ،عزيزة و بناتها التوائم مروى وصفاء 23 سنة ، مروى ضريفة ومهدنة وداخلة سوق راسها عندها خطيبها ، و صفاء المسمومة فاشلة فحياتها ماشي بحال ختها ، مقابلة غير الخروج والسهير ، ليلى كتهدر مع بناتها ، اهلا حبيباتي مرحبا بيكم اجيو تسلمو .
دخلو البنات كيسلمو على العائلة .
ليلى: ماما هاهي نور الهدى ل عاودت ليكم عليها خطيبة ولدي زاين! الحاجة رقية: تباركله على بنتي كبرات وولات عروسة غزالة ماشاء الله اجي قربي عندي .
مشات عندها نور بالابتسامة وعنقاتها كتشكر فيها .
رميساء: جداتي انا غنغير . عنقات رميساء: وعلاش غتغيري ب2 ماشاء الله عليكم كبرتو ووليتو عريسات الله يحجبكم كنعقل عليكم فاش كنتو صغار متعقلوش كنتو مازال تريبيات ودابا كبرتو وزيانيتو ههه . عزيزة :؛تطلع وتهبط فيها * اه هادي هي نور الهدى ،نور تقرسات من هاد الشوفة ولكن مداتهاش فيها ، عتقات الموقف مروى : سالام انا بنت خالة رميساء وزاين متشرفين ، غزالة ما شاء الله عليك .
نور: شكرا نتي لي غزالة ، دخل ياسر و زاين حتى هما سلمو عليهم .
الحاجة رقية : صافي ازاين واخيرا هداك الله وغتدير دارك . زاين: اياه اجدة وكيجاك اختياري بعدا ههه .
نور فخاطرها : كنتي تختا فبقة الله يعطيك غبارة . علي: ياكما نسيتي راه انا لي خطبتكم و جدودكم لي جمعوكم .
الكل :ههههه. الحاجة رقية: نتا هو ياسر تباركله عليك اولدي ، ومبروك عليكم ، تهلا ليا فحفيدتي . ياسر: راها فعيوني اجدة كانو مجموعين على الضحك والنشاط حتا دخلت صفاء ، غير شافها زاين وهو يجمع الضحكة ، ورميساء شافتها بدات تطلب السلامة حيت عارفة المشاكيل غيبداو .
صفاء: اهلا اهلا وفين غبورك ازاين ،هو كيخنزر فيها محاملهاش : لاباس الحمد الله نتي لي فين غبورك *ضحكة صفراء* الكل متبعينهم حيت كانو عارفين لي كان بيناتهم ولكن معارفينش سبب فراقهم . قربات صفاء للنور نتطلع وتهبط فيها ونور شافت فيها ببرائة : واو نتي ومروى توينز واقيلا ياك ؟ صفاءط غير كتطلع وتهبط فيها .
مروى: اه احبيبة توينز نور: ااااه حيت كتشابهو .
صفاء: اكيد كنتشابهو *حدرات صوتها* شهاد الكلاخ . نور سمعاتها و دارت راسها مسمعاتهاش .
رميساء كتطلب الله غير تقلب ساعة باخرى حيت الى ناضت ليها نور مغايوقعش خير . رميساء: سمحولينا احنا غنطلقو منعسناش مع السفار .
الحاجة رقية: سيرو احبيبة الله يرضي عليكم .ناضت رميساء دات معاها نور تحت انظار زاين لي تاهو كيطلب الله ميوقعش شي مشكيل دخلو البنات للبيت .
نور: هاديك مالها جالسة كتبورد عليا لتحت اش خاصها .
رميساء: متديش عليها راها واحد المسمومة ،انا بنت خالتي ومعنديش معاها .
ياله ندوشو ونرتاحو راني عييت .
دوشو البنات وتخشاو فالناموسية مفاقو حتال 8 العشية .
ناضو لقاو كولشي مزربع كيف البابوش العيالات فجيه والرجال شي خارج شي فالمكتب والشباب مجمعين فالجريدة ، سيف و سليم وعمر وياسر ومروى .
خرجو عندهم البنات السلام ، الكل : وعليكم السلام .
ياسر: عاد طفات عليكم الشمعة من 2 ونتوما ناعسين .سيف: ههه تلاقاو هاد النعاسات .
ضارت رميساء عند نور : سمعتي شي حاجة نور: لا واقيلة ش دبانة كتزنزن .
الكل :هههه ، مروى: سمعت كنتو فكوريا واش زوينة ، الى كانت زوينة نمشي ليها فالصيف مع خطيبي .
نور: اه غير سيري ليها غزالة بزاف فيها بزاف مايتشاف و الجو فالصيف كيكون غزال ، غير سيري والله . ياسر: اه بالصح غير هو تعلمي شوية للغة هما ماشي كلشي كيفهم الانجيليزية .
مروى: اه بالصح ،كتعرف شي معهد اللغات فيه الكورية .
ياسر : اه معهد **** كين ف **** مروى: شكرا والله حتا مشي ليه . جات الخدامة حطات للنور ورميساء طبسيل البريوات حيت ماواكلينش ، بيما يتحط العشاء بداو ياكلو نور: مممم هادو غتكون دارتهم غير ماما رميساء: بالكروفيت ياك ؟ نور: اه بقاو كياكلو وهما كيتحتو حتا بقات وحدة ،نور شافت فرميساء ورميساء حتا هي طارو عليها ب2 gلبو الفوطوي لي جالسين فيه كايدابزو عليها و ولاد العائلة حالين فامهم معجبين فيهم وياسر داير ايدو على وجهو ، ميقدروش يجلسو ويتهناو بحال الناس ناش سيف خداها من ايد نور وهرب بيها ونور ورنيساء غوتو ب2 : لاااا وتبعوه كيجريو وهو غادي وهازها كيقلي ليهم السم والاخرين ميتين بالضحك. كان خارج زاين من الفيلا ودازت قدامو رميساء وشدها من قبها ، زاين : مالكم محيحين تاني .
رميساء: طلااااق غياكلوها .
فلتت منو وتبعاتهم . وزاين مشا جلس معاهم .
زاين :هادو مالهم تاني ؟ ياسر: مراgعين على بريوة تخيل .
مروى : ههههه هاد البنات عاالام ميسحابليش رميساء حمقاء هكا ، كانت ديما مهدنة ودايرا عقلها .
ياسر: اه حتا تلاقات ختي .
زاين: لخرا تاهي كانت غير طالبة عليها ، كان خاص غير لي يبداها وكون غير يديرو عقلهم شوية . مروى :اش بغاو بيه ، باقين صغار خليهم يضحكو ويلعبو ههه.
سليم : ههه شحال فعمرهم دابا .ياسر: 19 سنة عمر: زربتو علهم اصاحبي ههه زاين: ياله يتعودو على الزواج ونربيوهم على يدينا .
سليم : والله يقدركم هههههه. ياسر وزاين : امين هههه حتى كيسمعو الضحك بالجهد .
تلفتو لقاو نور ورميساء معانقين ومتييين بالضحك وسيف حداهم مسرح شاد ظهرو .
ياسر : توما عاونوه ينوض ونتوما كتضحكو تما ، تحناو البنات هزوه وهما فاشلين ! حطوه حداهم وجلسو تاهما كل وحدة جلست حدا خوها ، وبقاو تما قولها وضحك عليها ، وسيف شاد فالبنات وهما كيجاوبوه ، نور متقدرش تجلس مقادا دطات رجل على رجلين خوها كتحتت معاه ، زاين معجبوش الحال ، وخاصة الدراري جالسن معاهم ، بقا كيخنزر فيها عاله تفهم راسها ، والو ممسوقاش ليه .
عمر: عجباتني علاقة الاخوة بيناتكم ، كتبانو مفاهمين ، والله ماكرهت تكون عندي ختي تا انا .
ياسر: اش بغيتي بصداع الراس ، منين كتفيق وهي فوق راسي حتا كتنعس ، وبلا منعاود ليك على زبايلها .
سليم: واخا هكاك الاخت كتكون عندها طعم ، زعما كتعول على وكتلجأ ليه ، وحتى الاخ كتكون هي مصدر الحنان رقم 2 بعد الام . ياسر: هادشي كينطابق على gاع الخواتات الا هادي ، الشيطان ياربي السلامة ، ميعرف مايدير قدامها .
عمر: هههه اشمن زبايل كدير .
ياسر: منين دخلات ليا المراهقة والشيب بداني داكشي لي دارت انا لي دري مادرتوش ، فاش كانت عندها 14 سنة ،كانت ديما مناتفا مع البنات فالكوليج ، كان دمها سخون فداك الوقت ومع كتتريني كتديما مرعفا بنادم وجايبا ليا التبريا ، كانت كدير عصابة ديال البنات وتنمر على عباد الله ، كانت واحد شاطة ماطة منها ماكان .
وصلات ل15 سنة ، تصاحبت مع واحد . نور: *كتنغز فيه * بلا متجبد داك الموضوع هاالعار . زاين: *بغا يعرف* كمل معا من تصاحبت ؟ نور بقات كتشوف فزاين بنص عين. ياسر: واحد الدري كان فعمرو ديك الساعة 18 معرفت والديهم فين تلاقاو ، هو كان من داك النوع المتمرد ومعندو سوق فشي حد كان مربي الشعر ومهلي فراسو كان سميتو لؤي ولد شي عائلة معروفة ، ايوا هو لي زاد ضسرها فينما كانت شي زبلة ولاو يديروها ب2 مخلاو بيران ممشاو ليهم معرفتش كيفاش حتا كانو كيسلتو ويدخلو ، كل مرة غاديين للبلاصة والغياب منقولش ليك عليه ، هي فالاول ما قال ليا والو عليه عارفاني غنرفض علاقتهم ، ودازت مدة على علاقتهم ، انا مع كنت فكوريا كانت صعيبة نعرف ، ماقالها ليا غير حمزة صاحبي لي خليتو يحضيها .
نور: كنت عارفا هو لي قالها ليك ياسر: كولشي كان كيوصلني كوني هانيا .
زاين: كمل اياسر .
ياسر: انا خديت عطلة ورجعت ليها نشوف حريرة هاد لؤي حيت بصراحة هادشي لي كنت خايف منو ، فاش رجعت درت راسي مفخباري والو ، حتا نحصلها ، داكشي لي كان الدرية غخارجا داخلة مكنعرفها فين كتغبر ، واحد النهار كنت دايز من عين الدياب حتا كتبان ليا هي وياه شادين gارو وجالسين ،وهي كتحنقز حداه وهو متبعها بالعين وكيضحك معاها ، تما مشيت ليها ضربتها حتا سرطاتو ، تبريت منو وديتها للدار ، هو كان كل نهار كيرجع عندها للدار ، كنضارب معاه وهو والا بغا يفهم ويبعد .
حبست نور فالدار المدرسة كنديها ونجيبها ليها ، الكونجي قرب يسالي ليا و الا مشيت غيرجعو يتلاقاو داكشي علا شمشيت عند باه هضرت معاه ، وحتا هو مرضاش وسيفط ولدو للبرا يكمل قرايتو ، نور معجبهاش الحال تاهي وحلت معاها وقسحت معاها وضربتها ، حتا فهمات انه لمصلحتها ، ورجعت وبقات تحت مراقابتي ، واخا بعيد عليها ولكن الزبايل ماسالاوش كل مرة تابعها حمزة للمستشفى اولا الكوميسارية ، دابا راه تهدنات و مابقاتش كدير داكشي ديال شحال هادي .
سيف : هادشي غير تهدنات باز ليك اخويا ههه ولكن ختك راه بزاف على القباحة .
رميساء: ولكن انور عمرك عاودتي ليا على هادشي .
نور: ماجابتهاش الوقت .
زاين: نور باقا عندك شي صلة بيه .
نور: لا غير كون هاني هاد خاينا دار خدمتو .
وناضت طلعت .زاين: مالها ؟ ياسر: غيكون غير تفكراتو ، كان عزيز عليها بزاف ، ولكن انا فرقتهم غير حيت كان مضسرها وعلمها شحال من حاجة خايبة ،واتر فيها حتا ولات كتصرف بحالو ، رميساء: انا غنتبعها .
مروى: زعما هكا المراهقة خصها دوز غير متعلمش العادات الخايبة ، اما الضحك والخروج لابد منو هدا هو الشباب والصغر . ياسر: اه انا معاك ولكن خفت لايوليو فشي ماصل خرين ، لاهم يتفرقو احسن .
بقاو الدراري كيتحتو ونور طالعا كتزعف ،حتا تساطحات مع صفاء: اه نتي بشوية متشوفيش قدامك ؟
نور: سمحيلي اختي مرديتش ليك البال صفاء: دابا نتي البرهوشة هي خطيبة زاين .
نور: كيفاش مفهمتش ؟ صفاء: ههههه حلك ساهل احبيبة .
ضربات فيها ومشات كتضحك وتلاقات مع رميساء فالطريق وخرجات للجريدة عند الدراري .
نور: هادي شنو قصتها .
رميساء: اففف بصراحة هادي هي خطيبة زاين القديمة .
نور: كيفاش ؟!!! رميساء: دخلي للبيت بعدا .
دخلو وسدو الباب نور: هادشي علاش منين جينا وهي كتطلع وتهبط .
رميساء: العااااار انور الله يرحم الوالدين لا ما طنشيها وخليو هاد الجماعة دوز بيخير ،نور دورات راسها بالزعفة وعاقدا حجبانها .
رميساء: اجي بعدا شنو قضية هاد لؤي.
نور: غجليني بلا متفكريني ، عقلتي على اول bf ؟ ايوا راه هو ، كان عزيز عليا وفرقنا داك الخراي ديال ياسر يسحاب ليه كيحميني ، مهم من بعد ونعاود ليك عليه دابا زيدي نشوف هاد الخرية شنو قضيتها .
تمت خارجة وشدتها رميساء :واعديني مغديريش عقلك فيها .نور: لا مغنواعدكش .
وخرجت رميساء: افففف وتبعتها كتجريهبطو البنات للجردة ، ومع الدخلة لقات نور صفاء جالسة حدا زاين ، ومع كسوتها قصيرة طلعات وعرات فخاضها وهي متعمدة هادشي دايرا رجل على رجل وكتبحلس عليه ، نور مشات جلست حدا خوها قدامهم وهي الشر خارج منها ، ورميساء حداها كتبرد فيها وبقاو كلها كيتحتت نور مجمعة مع عمر ،ومروى مع رميساء و سيف وياسر وسليم مع بعضهم وصفاء ملسقة فيهم وهما ممعبرينهاش ، زاين كل شوية يلوح عينو ليها كيلقاها مشرgا فمها كتضحك مع عمر وحيت قراب فالعمر تفاهمو كتعاود ليه تاهو كيضحك ، عجباتو عقليتها .
عمر: دابا نتي بنت عمي ، فين كنتي شحال هادي غقولي ليا .نور: كنت خدامة عاد كونجييييت .
عمر: ههههههه واللهتا مقطعا نتي .
نور: هههه .زاين غير كيخنزر معجبوش الضحك ديالها .هي لاحظت هادشي وبغات تفقسو ! وهي لاحظت رميساء منين جلسو وهي غير مجمعة مع مروى ويتعاودو . جات الخدامة وقالت ليهم يدخلو العشاء واجد دخلات ناضو، و غاديين جرات نور رميساء وقالت: واش مروى حتا هي صاحبتك، لدرجة كتعاودي ليها ، داكشي لي كتعاودي ليا .
رميساء: ههههه ماتقوليش ليا غرتي .
نور: صافي جاوبيني بركة من الهضرة .
رميساء: يخليلي لي كتغير عليا ، نتي لي صاحبتي ونتي لي كاينة عنقاتها ودخلو للداخل كان ياسر و زاين وراهم وسمعوهم ، ياسر: هههه شتي اش قلت لك مغيارة ، مكتحملش المتطفلين ، فرأيي غير بلا متخليها تجرب تغير عليك حيت غدوقك المرار هاني علمتك .
زاين فهم بلي دوز ليه مساج ، حيت لاحظ كفاش صفاء كتقرب منو . تنهد زاين و قال: الله يحضر السلامة .
دخلو والكل جلسو يتعشاو داز العشاء فالضحك بين العائلة وكل شوية تنطق نور اولا رميساء وكلشي كيضحك وكيكمل ليهم سيف .
بقاو شحال وهما مجمعين ورا العشاء شوية ناض زاين جاه شي اتصال من الخدمة وخرج للجردة شوية تبعاتو صفاء نور لاحظات هادشي وبقات جالسة على نار ، كان هو كيهضر حتا جات هي من وراه وعنقاتو ، هو فرح فالاول يسحابلو نور ، قطع وضار كيبتاسم ، حتا بانت ليه صفاء وهو يبعدها عليه وبدا يصعر: نتي اش قربك ليا .
شد ليها دراعها زاين: ياك قلت لك متبقايش تعتبي هاد الفيلا ، منبقاش نشوفك فها، انا مقلت والو للعائلة ،باش منديروش المشاكيل بين العائلة ،وباش متشوهيش، يعني نتي بلا ميعجبك راسك و لا يسحاب ليك شي حاجة اخرى ، صفاء: بلا متكدب نتا باقي كتبغيني، باقي كنشوفها فعينيك ياله بغا يبعدها عليه وهي تطير على فمو باستو .....
نور مبقاتش قادرة تصبر ناضت ،عرفاتها غتكون معاه مشات كتسلت ، شافتها رميساء غمزات ياسر وتبعوها ، نور غير شافت صفاء معلقا فيه كتبوس ، حسات بالسخونية طالعة معاها و دمها سخن ويديها بداو يتكمشو بالفقصة باغا غير تنتف ، مصبرتش طارت عليه عليها جبداتها من شعرها دارتها تحتها هاد المرة عطاتها ضرب البنات ، تقمش وتعض و تضرب وكتقول: هاداك راه خطيبي لي لاسقة فيه الق*** ، شكون كيسحاب ليك راسك ، شفتيني ساكتة ليك طلعتي فوق راسي ودزتي ليه نيشان اه؟
زاين شحال كيحاول يفك صفاء من ايدين نور، حتا هزها وجا ياسر جر صفاء ورميساء حاطا ايديها على فمها حيت شنتفات نور وخمجات ليها وجها بالقميش، زاين شادها و هي كتركل ليه فايديه وهي معصبة وحمرة بالفقصة وهي كتحلف على صفاء: والله وباقا تقربي ليه ، حتا ندمك ونوريك نور الهدى علاش قادا ، صافي مبقاش خطيبك فهميها الى عندك شي نفس .
مشات رميساء جرات صفاء من الباب لوراني وطلعاتها للبيت وهي حابسة الضحكة حيت بغاتها فيها ، اما صفاء غير كترعد يسحاب ليها غتقدر تحgر عليها وديرها فايديها حيت باقا صغيرة ، ولكن وراتها وجها واش كتسوا . رميساء عطاتها شي دوا لوجها و خرجات ...عند نور، ياسر: اش هاد الحالة نتي ؟ واش متقدريش تحكمي فاعصابك شوية ؟باغا تشوهينا وسط العائلة؟
نور: ماشي شغلك نتا متدخلش .
زاين: صافي اياسر، خلينا شوية انا غنهضر معاها.
خنزر فيها ياسر ومشا تلاقا مع رميساء جايا وجرها داها معاه . زاين: نور ، متفهميش هادشي لي شفتي غلط راه هي لي غفلاتني ولسقاتني مبغاتش تتبعد .
نور: *مخنزرة و كترعد والغيرة واكلاها* اسمع اش غنقول ليك ، انا دافعت غير على كرامتي محدنا مخطوبين وحتا بعدما نتزوجو ، حتارمني قدام بنادم ، حيت كولشي عند بالو مزوجين بالصح ، ومنبغيش بنادم يهضر فيا ، فاش نطلقو ديك الساعة دير لي بغيتي مغندخلش فيك ..
ضربات فيه وطلعت ، هو ضرب بالكرسي لي حداه وغوت : مييييرد .
ونور: طلعت للبيت وبدات تبكي .
حتا دخلات عندها رميساء دخلات عندها رميساء لقلتها غارقة فدموعها، قربات ليها كتدوز على شعرها : صافي من البكا راك بردتي ليا هوايشي فيها، اصلا كنت نغزفا عليها تستاهل بنت الحرام.
نور ناضت جلست حداها ، شفتيه الحمار جالس كيتباوس معاها ، محتارمني مفكر فيا اهئ اه اهئ . رميساء: انا متأكدا هي لي رمات راسها عليه هو سد موضوعها هادي شحال .
نور: دابا غتعاودي ليا قصة هاد 2 ، حيت منضمنش راسي اش ممكن ندير فيهم ب2 .
رميساء: ايوا المهم كانو مرتابطين شحال هادي ، وخويا كان ناوي المعقول منين يرجع من امريكا يتزوج بيها، وعلم العائلة كاملة بعلاقتهم ، بابا كان مموافقش فالاول تحد مفاهم علاش ولكن دابا باينة على موضوع الوصية ، المهم شحال وهما مع بعضياتهم و واخا كان برا كان كيجي غير على قبلها ، بعد مدة ولاو كيتخاصمو بزاف وغير على لبسها و خروجها الكتير وصحابها الدراري لي كتار ، خويا طلع ليه الزعف منها ، واحد المرة كان هو وياها فشي كافي ،ناضت هي للطواليط ، وصلها شي مساج كان فيه : حبيبة بغيت نشوك اليوم .
خويا يسحاب ليه شي صاحبتها ولكن بانت ليه سمية راجل وحداها حبيبي ، هو مبغاش يضلمها وخدا نمرتو و دار راسو ماشاف والو ، الغد ليه عيط ليه ودار معاه يتلاقاو ، وداكشي لي كان تلاقا معاه وعرف بلي لاخر تا هو مقلوبة عليه القفة مسايق خبار كانت كتلعب عليهم ب2 بنت الحرام، دايرا واحد فالجيب ولاخر فالقلب ، خويا كانت طامعة غير ففلوسو ، ايوا هو فاش عرف ، مرضاش وهلك مها عصا ، وتبرا منها متبقاش تقرب ليه ، وقال للعائلة غير متفاهموش وتفارقو غير حيت ميديروش المشاكيل فالعائلة ، ولاخر تاهو فر فيها وجلست للارض ، كتطرطا من هنا للهيه ، مهامهاش حياتها ، مدوزاها غير النشاط والدراري ، انا شفتها عرفتها ناويا علخزيت حيت سمعت بخطوبة زين معاكم .
نور: كيشفتي انا غير ساكتة ليها ، هاد الق*** ملقات معامن تلعب غير معايا ، زاين خطيبي ومغنخليهاش تقرب ليه .
رميساء: هههه الواحد هو لي يموت على بلادو اولا على بات ولادو .
نور : علاه كنلعبو هنا ، دابا هادشي كولو لي دارت ليه ومشوهاش مع العائلة واخا كتستاهل ؟ صدق راجل ، اجي نتي منين عرفتي هادشي ؟ رميساء: زاين كيعاود ليا كولشي .
نور: ااااه . عند زاين لي دمو كيفور فالجردة خرج عندو ياسر: هادشي لي كنت كنهضر ليك عليه قبايلا ، شفت ديك بنت خالتك كيف كانت كتضور بيك فاش كنا جالسين ، كون تشوف نور راه كنت كنتسنا اي لحظة غتطير عليها ، قول ليا بصراحة واش بيناتكم شي حاجة ؟ .
زاين: كانت ، هيكانت خطيبتي وكنت ناويها للزواج (عاود ليه كولشي ) ياسر: وباقا لاسقة فيك ؟ اش هاد قلة النفس .
زاين : واهانتا تشوف .
ياسر: سمع قولها تبعد على نور راها مساهلاش ليها ، انا عمري شفتها كتضرب شي بنت بحال هكا ههه، راه البنات لي كانو معايا مدارتش ليهم هاد الحالة ، نور كتموت على حاجتها مدام غارت عليك هكاك فراها كتبغيك هههه ، وهادشي لي شفتي غير البدية الى بقات ديك صفاء لاصقة فيك ، غاتشوف ما اكتر ههه هاني علمتك .
مشا ياسر غادي وكيضحك وكيقول: البرهوشة كبرت وولات كتغير على راجلها .
زاين عاد تفكر نور فاش كانت كتضرب صفاء واش كانت كتقول وعاد كلام ياسر ، وبدا يتبسم ويضحك : هادشي كولو عليا انا ، العفريتة ديما كتقول ماباغانيش وباغا تطلق وها الغيرة فضحاتها وتأنا غنمشي معاها دقة دقة حتا تعتارف .
سكت شوية وبدا يضحك : ههههههه نتفاتها المسخوطة ، نمشي نطلع نقي ليها ودنيها شوية ....عند صفاء لي جالسة قدام لمراية كتحسر على وجها وكتبكي : بنت الحرام اش دارت لوجهي ، صدقت ماساهلاش وانا لي يسحابلي برهوشة و نقدر عليها ساعة صدقت ماساهلاش ، ولكن غير بلاتي ال مرديتها ليها منتسماش .
دخلت مروى: اويلي مال وجهك نتي ؟
صفاء: ضاربت مع ديك البرهوشة ديال خطيبة زاين ، الرهوشة صدقت كطير! مروى: هههههه غزات فيك مغتكوني غير درتي ليها شي حاجة ، شوفي فيا بعدي عليهم عليهم حسن ليك انا علمتك .
وخرجت خلاتها كتحلف .... عند نور مسرحا فوق الناموسية و رميساء حداها ، متكنيين مكونيكطين .
رميساء: الساطة اش غديري مع زاين نتي عارفة بلي هو ماداير والو .
نور: هههه متخافيش شفتو كان كيدفعها ولكن غنربيه بتش عمر يعطيها فرصة حتى باش تهضر معاه هههه رميساء: ههههه شريرة . سمعو زاين كيعيط للنور .
نور شهقات : ناري طالع غطيني غطيني وقولي ليه نعست .
رميساء : واخا واخا . تحل الباب رميساء: شششش راه نعسات .زاين: خرجي خاصني نهضر معاها .
نور تحلو عينيها تحت الغطا وبدات كتفتف : ناري غيخلي عشتي مافيهاش
خرجات رميساء وخلاتهم ب2 فالبيت ، جلس زاين حداها وكيشوف فيها بنص عين وهي كتسنا تحت الغطا ، اش غيقول اولا اش غيدير ، هو عايق بيها فايقا وبدا يهضر: نور انا عارفك شفتي شي حاجة لي مخصهاش تكون ، باش نكون صريح هاديك راه كانت خطيبتي .نور قاطعاتو عارفا. زاين: مبقا بيني وبينها والو ، هي لي لاحت راسها عليا .
نور: عارفا .
زاين : انا كنبغيك نتي ، وعمري حاولت ولا غنحاول نغدر بيك ..قاطعاتو :مكيهمنيش..
زاين تعصب وغمض عينيه كيعض شفايفو ..زاين: غنبقاو نهضرو ونتي عاطياني بالظهر ؟
نور: خرج بغيت نعس .. زاين صعر: نوضي تهزيييي .قفزت ناضت جلست قدامو عاقدا حجبانها :ولاش الغوات ؟ زاين: راسك قاسح ، واش انا كنهضر معاك ونتي ممعبرانيش كنقول ليك ، كنبغيك ونتي كتقولي ليا باغا تنعسي ؟ نور حدرات راسها ماباغاش تشوف فعينيه غتجيها الضحكة . زاين: واخا ، على خاطرك ودابا قولي ليا اش هاديك الحالة درتي ليها ولايني راك قبيحة مع راسك .
نور بدات تغوت: وشنو بغيتي ندير نقول هاهو خوديه ، عطيتها قتلة باش تعرف حدودها .زاين خرج عينيه : حدري صوتك .
نور: ماشي شغلك ، اجي ياكما جاي دافع عليها ،*نسات راسها* ايوا سمع نقول ليك نتا خطيبي انا و لي قربات ليك نخمج لمها وجها .
خرجات عينيها ودارت ايديها على فمها وهو عجبو الحال بدا يضحك عليها وقال: ههه غبوحدك مقرصك حد ،*كيقرب* غنبقا معاك بشوية عليك حتا تقولي ليا كنبغيك اراجلي ومنقدرش نعيش بلا بيك *كيهضر ويشوف فعينيها بضحكة جانبية شريرة * نور حدرات راسها مغمضة عينيها كتلعن لسانها لي خارج عليها .
زاين تفكر هز ليها راسها وتقابل مع عينيها لقات الضحكة طارت وقال ليها : قبايلا فاش سولتك على داك لؤي ولا ماعرفت اش سميتو مالك زعفتي ونضتي ، ندمتي عليه ؟
نور: بلا متبدا تخربق ، لؤي صفحة قديمة وتطوات من شحال هادي .
زاين : مبغيتك تخبي عليا والو واش كنتي كتبغيه؟
نور: اففف ، نتوما دابا غيبان ليكم هاداك كان مجرد لعب و نزوة ديال المراهقة ، ولكن علاقتي معاه كانت كتر من هكاك ، جمعونا بزاف ديال القواسم المشتركة ، داوينا جراحنا لبعضياتنا حتا هو كانو عندو المشاكل مع عائلتو ، هو لي علمني نتجاهل المشاكل وعلمني كيفاش نخوي لي عندي بلا منحتاج شي حد ، انا عارفا بلي خويا كيضن بلي هو شخص ممزيانش حيت وليت نكمي بسبابو ولكن عمرنا فتنا الحدود ، وخويا متفهمش هادشي و فرقنا ، وفاش سافر استسلمت و درت لخويا خاطرو و خليتو يفهم بلي انا اقتانعت وصافي .
زاين: دابا واش عمرك مازال سمعتي عليه شي حاجة .
نور: أللا غير كون هاني .زاين: ايوا خوك مادار غير لي خاصو يدار . نور: اه عارفاكم كتفكرو بحال بحال داكشي علاش مغنتزايدش معاك .
زاين: نور عافاك بغيتك ديري فبالك انا كنبغيك نتي وهاديك الحمارة غنشوف شغلي معاها ، مهم نتي غير بعدي عليها ومتهوريش تحكمي فراسك شوية اوك ؟ *باس ليها راسها * كنموت عليك المغيارة ديالي .
وخرج ونور بقات تركل فالناموسية وتضحك كيعجبها تسمع كنبغيك منو . طلعات عندها رميساء لقاتها هكاك وقالت ليها : الله يستر تخشاو فبلايصهم طفاو الضو ونعسو .....