Kabanata 24
Roses
Tahimik kaming sumama kay Rage. Tahimik din siyang nag drive patungo sa building. Naririnig ko ang buntong hininga niya at minsan ay akala ko magsasalita siya pero hindi naman.
Nang tumigil ang sasakyan ay mabilis kong kinalas ang seat belt. Narinig ko ulit ang pag hinga niya ng malalim...
"Sunny, kailangan niyo ba ng kama sa Lounge?"
Nagulat ako sa tanong niya. Narinig ko ang singhap ni Mia sa likod. Paalis na siya ngunit natigilan din sa tanong ni Rage.
"Ay oo! Ang sakit na ng likod namin sa kakatulog sa sofa-"
Matalim kong tinitigan ang natatawang si Mia at tumahimik siya. "Hindi na kailangan. Tsaka, aalis din kami ni Mia don next week. Mag aaral na ako, remember?"
Napaawang ang bibig niya at tumango siya. "Right!"
"Alis na kami. Salamat sa pag hatid." Sabi ko at lumabas na.
Tumango siya at ngumuso.
Sinarado ko ang pintuan ng kanyang sasakyan. Si Mia ay panay na ang ngisi sa akin. Alam ko kung ano ang iniisip niya. Hindi ko rin alam kung ano ang sasabihin ko sa kanya pero hindi ko kayang sabihin sa kanya iyong nangyari sa CR.
"Ano ba kasing nangyari?" Hinawakan ni Mia ang braso ko habang papasok kami sa buong building.
"Wala nga..." Sabi ko at nagkunwaring naiirita.
"Eh! Kung nakita mo yung mukha niya, parang kahit anong gusto mo ay susundin niya."
Umiling ako at dumiretso na sa loob ng building. Kinwento ko ang sinabi ni Rage bago kami pumasok sa sasakyan pero hindi ko parin maikwento kay Mia ang nangyari sa CR. Mas lalo lang lumaki ang ngisi ni Mia.
"Anong plano mo?"
Madilim na dahil patay na ang mga ilaw. Nasa kabilang sofa siya at ramdam ko na ang antok niya sa kanyang boses. Habang ako naman ay dilat na dilat parin at nakatingala sa madilim na kisame.
"Isosoli ko kay Kid 'yong cellphone bukas." Sabi ko.
"Ibig sabihin pinipili mo si Rage?" Gulat na tanong niya.
Suminghap ako. "Isosoli ko ang cellphone kay Kid dahil kanya 'yon. Mia, imposibleng magseseryoso si Rage sa akin. Kung ano man 'yong nararamdaman niya sa akin para ngayon lang 'yon. Hindi natin alam kung magtatagal ba 'yon."
"Nahulaan ko na talaga na 'yan ang sasabihin mo!" Tumawa siya. "Ikaw, Sunny. Nasayo ang desisyon."
Ilang sandali lang ay nakatulog na agad ang pagod na si Mia. Natagalan pa bago ako nakatulog. Inisip ko ang mga mata ni Rage at ang pakiramdam ko kanina. Natatakot ako sa mangyayari. Natatakot akong 'yon lang ang habol niya sa akin. Ang sabi ni mama, ang mga demonyo daw ay hindi nagpapakita bilang pangit at halimaw, madalas silang nagpapanggap na maamo at nakakabighani. Paano kung bitag itong pinaparamdam niya sa akin? Just to get to me?
But I'm falling. Hard.
Tumulo ang luha ko. Hindi ko inaasahan 'to. I used to be a very smart girl. Akala ko kahit kailan hindi ako magkakaganito. Akala ko non nahihibang lang si mama sa pag ibig sa isang lalaking may asawa na. Pero ano 'to ngayon at bakit ako naman ang mukhang nahihibang?
Hindi ako halos makatulog kaya madaling araw ay nilinisan ko ang office ni Rage. Nagulat din ako dahil nakapag text si Kid ng madaling araw. Sinamantala ko iyon para magyaya sa kanyang makipagkita.
Ako:
Good morning, Kid. Pwede ba tayong magkita? 8AM, breakfast?
Mabilis siyang tumawag sa akin at dinig na dinig kong kakagising niya pa lang dahil sa napapaos niyang boses.
"Sunny, sure! Good morning by the way!" Humalakhak siya.
Ngumiti ako habang pinipindot ang number 15 sa elevator. "Thanks. See you then."
Pagkarating ko sa Lounge ay nakita kong naroon na si Mang Carding at iilan pang crew. Maingat silang dumadaan sa sofa dahil sa tulog na si Mia.
"Oh, Sunny, tapos ka ng maglinis?" Tanong ni Mang Carding sa akin.
Tumango ako at nilagay ang cart sa tabi. "Maglilinis din siguro ako mamaya pag naka alis na si Sir Rage."
"Ang sipag mo naman." Kumunot ang kanyang noo. "Hindi ba may trabaho kayo kagabi?"
"Opo. Maaga kasi akong nagising. Babawi na lang siguro ako ng tulog mamaya." Sabi ko.
Tumango siya at nagpatuloy na sa kanyang gawain.
Pinasadahan ko ng tingin si Mia bago ako pumuntang CR para makaligo at makapag bihis na rin. Maaga din akong umalis ng building. Naisipan kong ititext ko na lang si Kid na nandoon na ako sa Fastfood na gusto kong tagpuan namin nang mailibre ko siya sa lahat ng nagawa niya para sa akin.
Nagkape muna ako doon at nagmasid sa mga taong lumalabas pasok sa buong fastfood. Nang nag 7:45 na ng umaga ay nakita ko na kaagad ang pamilyar na sasakyan ni Kid sa labas. Nginitian ko siya nang nagtama ang aming tingin. Naka Ray-ban siya at tinanggal niya ito para makita ako ng maayos saka siya ngumiti.
Naglakad siya papasok sa loob ng fastfood at tumigil sa table ko. Binati niya ulit ako ng magandang umaga bago umupo.
"Free ka na today? Walang trabaho?" Tanong niya.
Ngumuso ako. "Meron sa umaga."
Kumunot ang kanyang noo. "Buti nakatakas ka? Hindi ka ba papagalitan ni Rage." Halos napangiwi siya nang binanggit niya ang pangalan ni Rage. "You should leave that building, Sunny. Hindi maganda ang maidudulot sa'yo ng kompanya niya at syempre, lalong lalo na siya."
Tumango ako. Naiintindihan ko kung saan nanggagaling si Kid sa mga sinasabi niya. "Malapit na rin naman akong umalis. Malapit na kasi ang pasukan."
"Nakahanap ka na ba ng bed space?" Nag aalala niyang tanong.
Tumango ako. "Magkasama kami ni Mia don."
"Mabuti naman. I know you're smart, Sunny. You won't fall for the beast's trap." Humalukipkip siya.
Natahimik ako sa sinabi niya. Hindi ako makatingin sa mga mata niya. Iniba ko na lang ang usapan.
"Nga pala, ililibre kita ngayon. Anong gusto mo?" Ngisi ko.
"What? No! I can't let a girl pay for me!" Natatawa niyang sinabi.
"Please, Kid! Kulang pa nga 'yan sa pagpapasalamat ko sa'yo!" Sabi ko. "Please, please."
Natatawa siya at pinasadahan niya ng kanyang palad ang kanyang buhok.
"Please?"
"O sige. Kahit ano basta burger." Humilig siya sa kanyang kinauupuan.
"Thank you!" Sabay tayo ko at punta sa counter.
Umorder ako ng pang breakfast ko at 'yong burger na gusto ni KId. Pagkabalik ko ay para siyang batang tuwang tuwa sa dala kong pagkain.
Kumain muna kami at nag kwentuhan tungkol sa school at sa kursong kinuha ko. Nag offer pa siya na pag natapos ako sa pag aaral ko ay pwedeng pwede akong mag trabaho sa kompanya nila. Tinawanan ko lang iyon dahil ilang taon pa 'yon mula ngayon.
"Are you free later tonight?" Tanong ni Kid nang bigla kaming natahimik.
"Uhm... May trabaho kasi ako."
Ngumuso siya. "Oo nga pala. Sorry. Then, I can't see you. How about tomorrow?"
Nag angat ako ng tingin sa kanya. Kung noon ay lagi siyang kasama nina Rage at Logan sa bar, ngayon ay hindi na dahil sa naging bangayan nila sa akin. It's stupid. Bakit sila mag aaway dahil sa akin? "I'm sorry, Kid."
"Sorry for what?"
"Dahil nag away kayo ni Rage dahil sa akin." Sabi ko at pinaglalaruan ang cellphone sa table. Dahan dahan kong tinanggal ang likod non at balak ko sanang kunin na ang sim.
"Don't worry about that. He's a jackass. Mabuti na lang at hindi ka nag papabola sa kanya."
Nag angat ang tingin ko sa kanya. Kinagat ko ang labi ko at naaalala ko si Mia at kung paano siya naniniwala na hindi talaga ako magkakagusto kay Rage.
"Kid, isosoli ko sana 'tong cellphone."
Nagtaas ng kilay si Kid. "Bakit? May cellphone ka na?"
Umiling ako. "Bibili ako this week ng cellphone."
Umiling din siya. "Kung ganon, habang wala kang cellphone, di mo muna 'yan isosoli."
Nagtalo kaming dalawa tungkol sa pagsoli ko sa kanyang cellphone. Gustong gusto ko na talaga 'yon isoli. Tinanggal ko na ang sim at nilapag sa harap niya ang cellphone ngunit panay ang iling niya sa akin.
"Sunny, you are hurting my feelings. Ano ngayon kung isosoli mo 'yan sa akin pag may cellphone ka ng pampalit?"
"Pero kasi... bibili din naman ako. Tsaka... ang dami mong naitulong sa akin."
Umiling ulit siya. "Walang anuman 'yun. In case you didn't notice, I like you and I'm willing to do anything just for you. Remember that. Kung sasagutin mo ako ngayon ay ititira kita sa condo ko. You can bring Mia if you want."
Ngumiti ako. "Nababaliw ka na, Kid."
"I'm serious." Natatawa niyang sinabi. "I'm just waiting for you, Sunny. Rage can't do that for you."
Nagulat ako sa dinugtong niya. Hindi ako nagsalita ngunit wala sa sarili niya ulit na dinugtungan iyon.
"Hindi sa sinisiraan ko si Rage pero kung alam mo 'yong lifestyle niya, then you would know."
Tumango ako. "Alam ko."
"He's damn afraid of committment and I'm sorry for the girls who're in love with him. Kahit si Ezra ay hindi 'yan mapaamo."
Nagulat ako sa binanggit niyang pangalan. "Ezra?"
"Ezra. 'Yong kababata niyang VJ ng isang malaking music company? Don't you know her? VJ Ezra?"
Umiling ako pero naalala ko 'yong mestizang babae na nakasama niya sa bar. Medyo pamilyar nga sa akin ang babaeng iyon. Siguro ay nakita ko na nga siya sa TV.
"No one can tame a beast like him, Sunny. And it's sad. Kaya nga mas lalo akong nairita nang sinabi niyang gusto ka rin niya. Gusto? Really? Gustong maging ano, past time?"
Nanuyo ang lalamunan ko. Iyon din ang tingin ko. Tama si Kid. Pero hindi ko talaga maipagkakaila na may parte sa aking umaasa parin na sana nga... dahil natatakot akong mahulog mag isa. Shit!
Tumango ako at hindi na nagsalita.
"I know you're smart. Hindi ko alam kung paano siya dumiskarte but I hope you won't fall for him."
Ang mga salita ni Kid ang patuloy na tumutunog sa aking tainga kahit nong hinatid niya na ako sa building. Nagpasalamat ako sa oras at sa kanyang paghatid. Next time, isosoli ko na talaga ang cellphone. Kumaway siya at pinanood ko siyang umalis. Nang malayo na ang kanyang sasakyan ay nabasa ko 'yong message niya na kakarating lang.
Kid:
Date? Tomorrow?
"You were with me last night and you're with him early this morning? Really, woman?"
Halos mapatalon ako nang umalingawngaw ang boses ni Rage sa likod ko. Mabilis ko siyang binalingan. Nakatayo siya doon at naka maroon na t-shirt. Ang mas ikinagulat ko pa ay ang hinahawakan niyang bouquet ng puting mga rosas sa kanyang kamay.
"Isosoli ko sana 'yong cellphone niya." Paliwanag ko at itinago 'yong cellphone ni Kid sa bulsa ko.
"Just throw it. Papalitan ko 'yan ng mas maganda."
Kumunot ang noo ko. "Hindi na kailangan. Bibili din ako ng akin kaya ko gustong isoli 'to."
"Ayokong may gamit siya sa gamit mo. It's better if you throw it away. Ngayon, bibili ako ng cellphone. Just throw that trash away."
"Ang sama mo. Kay Kid ito. Dapat isoli ko sa kanya at hindi basta bastang itatapon lang-"
"Ba't di mo na soli? Sabi mo isosoli mo dapat 'yan? Ba't di natuloy?" Naiirita niyang tanong.
"Kasi ayaw niya." Paliwanag ko.
Pinagtitinginan kami ng mga security guard ng building. Mabuti na lang at Sabado. Hindi tulad ng weekdays ay wala masyadong tao ngayon.
"Fuck it." Sabay tingin niya sa kanyang dalang bouquet.
Nakita kong pumula ang kanyang pisngi at nag fi-flex ang kanyang muscles habang hinahawakan ng mabuti iyong mga rosas.
"Sasalubungin sana kita ng roses pero sinalubong mo ako ng selos! Just... what the hell..." Nag iwas siya ng tingin sa akin.
Shit. Kinagat ko ang labi ko at tiningnan ang roses na dala niya.