صراحة مدعومة

الجزء 15

هنادي اتدخلت .. قالت لامها يا امي عليك الله روقي شوية خلينا نفهم الحاصل منها برواقة ..

سمية بقت تحكي .. قالت ليها انا لمن كلمت راجلي بالكلام .. الجابتو العازة .. زعل ودافع عنك وقال قال قال .. والله معاهو كمال ودخالتو طلعو ماهدأو ولا رجعو الا لمن لقوك بريئة .. والكان شاكي اكتر حاجة الباقر .. وهم الاتنين ديل دايرين يقنعوهو .. ابا يقتنع لمن جاهو الدليل ..والحمد لله ظهر الحق ..

قالت ليها عشان كدا .. هسي الباقر رسل اختو.. داير يرجع لي ؟ طيب زمان كان براسلني ليه ياربي.. مادام انا كدا؟

شفت يا ابوي الزول ده وخساستو؟ .. يعني كان براسلني في الاول.. ماعايز عرس .. ولمن الموضوع بقى عرس .. خلاني .. ولمن ظهر ظنوا ماصح رجع لي .. سبحان الله ..

تمام ياسمية فهمنا الحاصل.. مافي مشكلة.. انا اصلا عارفة انو اسامة وكمال ناس محترمين.. وبتعاملو معاي بالاحترام.. مستحيل يظنوا فيني كعب.. ديل بعرفهم انا ..

امها قالت ليها .. اها ح تسكتي لللباقر وامه .. في اشاعاتهم البعملو فيها دي ؟ قالت ليها انا خليتهم لي الله .. وربنا اقوى مني ومنك .. مافي داعي اعمل لي قلاقل ومشاكل .. بي سبب كلام فاضي واهلو ناكرنو ..

منى قالت ليها انا مابسكت .. انا مابخليهم ..

هنا سمية قالت ليهن.. انا بمشي بجيكم وكت تاني ان شاء الله ..

هنادي قالت ليها بي سبب القوايل .. ما اديناك حاجة تشربيها .. اعفي لينا ياسمية ..

قالت ليها ده كلام شنو ياهنادي؟ البيت ده بيتي .. وانا ماضيفة عندكم هنا ..

سمية طلعت وهنادي وصلت معاها الباب تقدمها .. قالت ليها يا هنادي .. انا كنت دايراك في موضوع كدا برانا.. وريني فاضية متين عشان اجيك راجعة .. قالت ليها .. في اي وقت .. الصبااحية بكون فاضية ..

كدي هسي خليني امشي اهدي الحجة الولعتيها ل لي دي .. سمية قعدت تتأسف .. وتعتذر هنادي قالت ليها انتي غايتو خشمك ده الا يخيتوهو ليك.. لكن يازولة ماتشيلي هم .. انا بعالج الموضوع . اعجبني (اصرار سمية على النجاح بعد الفشل)

سمية لمن رجعت لي بيتها مالقت زوجها .. انتظرتو لمن جا ... وماسألته قالت انت كنت وين .. مع انها دايما بتٍسألو السؤال ده ..

بس قالت ليهو انا مشيت لي ناس هنادي.. ومالقيت لي معاها طريقة .. امها وابوها لاصقين فيها .. لكن فتحت ليها اضانها..

قلت ليها عايزاك في موضوع ..

متى ما القى وكت بمشي ليها ..

قال ليها يازولة متى ماتمشي ليها امشي ليها .. بالتوفيق والله انا كمال متمنيها ليهو ويستاهلا ..

سمية قالت ليهو والله فعلا البت دي ذاتها بعد كدا .. المفروض تتزوج عشان انت شكرك ليها كتر شديد ..

عاين ليها كدا وبسم .. قال ليها يعني كبرت؟..

قالت ليهو خلاص فكنا من سيرتها .

وبرضو مأسألتو كان وين .

طبعا البلد بيغادي مقلبوبة .. وسمية ماعندها خبر.. وراجلا طبعا اصلو مابكلمها بالاخبار .. لانو عارفها اذاعة ..

طبعا البلد مالا مقلوبة؟ الحاصل فيها شنو؟ .. بي اختصار طبعا حسين اخو الباقر الكبير .. لمن مشى يفتش لي ياسر .. ولاقاهو وكان حسين شايل عصاية .. كان ضربوا بيها الفيل يقع .. قال ليهو البخليك تراسل اختي شنو؟ انا قاعد اراسل اخواتك؟ حصل يوم.. رفعت عيني علي امك ولا خالاتك؟

قال ليهو ماحصل والله .. لاهي رسلت لي ولا انا رسلت ليها ..

هاك التلفون شوفو .. شال منو التلفون ..وفتح الرسايل وفتش ومالقى رسايل من اختو .. وجاء راجع تاني للباقر .. وكان داير يلطشو .. وقال ليهو انت كذاب .. والباقر اصر يرسلو لي ناس اسامة وكمال .. لانهم قروا الرسايل..

ورسلو لي اسامة وكمال ..اسامة قال فعلا الرسايل كانت موجودة ومسحناها انا وكمال .. مراعاة للسترة .. البت غلطانة ونحن مافي داعي نخلي الرسايل في تلفون الولد .. لانو ما معروف يقع في يد منو

..

حاج عمر قال ليهم.. انتو السبب البخليكم تفتشو تلفونات الناس شنو؟

كمال قال ليهو ..والله ياعمي عمر ..الباقر كان شاكي في هنادي .. وبفتش في تلفونات الاولاد .. عشان يلقى ليها دليل . وحصل انو صادف رسايل ليميا ده كل الحصل .. بس ياعمي يعني رسايل ليمياء .. مافي شي صعبه شديد ..

يعني انا متأكد انها ماعملت حاجة كعبة .. ياها الونسة .. لكن برضو غلط .. بس ما في داعي الناس تنفعل اكتر من اللازم ..

وممكن تداركو الموضوع .. لانو كل ما الموضوع ده يتشعب مافي مصلحة البت .. في النهاية الناس بتصدق كل البتقال.. صح كان كضب .. والناس بظنو اسوء الظنون .. والناس بزيدو الكلام .. عمك حاج عمر قال ليهو صدقت والله .. بس كنا عايزين نتأكد من الموضوع.. وتاني خلاص ما ح نفتحه ..

ليمياء لمن خلاص حالها انكشف .. قالت علي وعلى اعدائي ..

قامت .. فضحت الباقر فضيحة نكراء.. قدام ابوهو .. وحكت ليهو الحقايق .. انو هنادي اصلا مارفضت الباقر ..والباقر هو الرسل ليها رسالة .. عشان سامع عنها كلام ما كويس ..

المهم يازول بي اختصار.. بعد المشكلة اتشعبت.. والحقايق كلها اتعرفت ... واتعرف انو الباقر اتهم هنادي قدام امو .. وامو نقلت الكلام للعازة والعازة نقلتو القهوة ..

حاج عمر قرب يغمى عليه.. من الكوارث البسمع فيها ..

قال للباقر انت عارف انك زول ملعون .. وقلبك وسخان .. والحمد لله انك ظهرت على حقيقتك من هسي.. عشان البت المسكينة ديك ماتقع فيك .. والله ربنا بحبها.. نجاها منك وطلعت من حياتها قبل ماتدخل فيها ..

تتذكر انا قلت ليك انت مابتستحقها.. كلامي مشى وجا طلع صاح .. الحمد لله على ما اراد الله .. اسمع ياحسين زي ما قال كمال .. الموضوع ده اكتلو هنا .. اخوك واختك الاتنين الفيهم اتعرفت .. الله يعوضني فيك انت..

الباقر ورقة واتحرقت .. بي سبب قلبو الاسود ولعبه بعروض الناس ..

اها يازول كمال واسامة رجعو ..

و هدا المكان الكان فيهو اسامة وما حكى لي سمية ..

سمية اليوم كلو ساكتة .. ومابتتكلم وهي خايفة من ردة الفعل الحصلت لي منى .. وخايفة الموضوع يبوظ بالسبب ده.. واصلا ماكلمت راجلا بالموضوع .. واليوم داك كلو ماجابت ليها سيرة زول .. لامن اسامة استغرب فيها ..

صبحت الجمعة .. والحلة دي تحس بيها فيها التهاب .. من شدة الاخبار .. والشمارات والقوالات الملعونة .. من الصباح اسامة قال لي لي مراتو سمية .. انتي امبارح مالاقيتي شروق عند ناس هنادي؟

قالت ليهو ابدا .. قال ليها لسع هم صاحبات صح؟

قالت ليهو مابعرف.. تاني ماتسألني من زول.. انا تاني حلفت ما اجيب سيرة زول بي خشمي ده .. قعد يضحك قال ليها الحمد لله.. والله دي كرامة.. المفروض نضبح ليها خروف ..

لكن ده مرض قولي ربنا يشفيك .. قالت ليهو ربنا شفاني ياخوي.. تاني لو سمعتني جبت سيرة زول.. بس اكفتني فوق خشمي ده .. حلفتك بي الله ..

اصرار سمية علي التخلي عن النميمة يكلل بالنجاح .. ^_^

اسامة قال ليها والله ده اصرار شديد .. انا هسي سألتك من شروق.. عشان داير اقول ليك.. وسطيها لي هنادي.. لو غلبك البتسويهو .. لانها صاحبتها .. وبتقدر تعرف مداخلها اكتر منك ..

قالت ليهو والله كلامك ده صح مية المية .. دقيقة هسي النكورك لي شادية خالتا .. تضرب ليها تجيني ..

طبعا ناس اسامة جيران شادية خالة شروق طوالي .. كوركت ليها بالحيطة .. وقالت ليها انا عايزة شروق وتلفونها مامعاي .. اضربي ليها تجيني ..

شادية قالت ليها داير بيها شنو؟ اها في شمار تاني ولاشي؟

قالت ليها مافي اي حاجة .. دايراها في حاجة سرية .. قالت ليها متين انتي بتدسي علي حاجة؟ .. قالت ليها لمن اخلص من الموضوع بحكي ليك ..

(اخيرا سمية تنجح في المقدرة على الكتمان) هه

شادية قالت ليها خير ياستي .. شادية ضربت لشروق وشروق جات لي سمية .. وهي متوجسة لانها عارفة سمية بتاعات قوالات وشمارات ..

سمية قالت ليها الكلام فيهو وفيهو .. وكمال قال عايز هنادي .. وعايز يعرف رايها قبل ما ياخد اي خطوة ..

قالت ليها والله يا سمية.. بي صراحة انتي مابتتصدقي .. وهسي انا اقوم لي في كلام .. بعدين اكتشف انك شايلاهو غلط .. او زايدة عليهو ..

قالت ليها طيب .. لحظة انادي ليك اسامة راجلي .. يقول ليك براهو ..

المهم اسامة جاء .. واتكلم مع شروق .. وشرح ليها رغبة كيمو في هنادي ..

وشروق قالت ليهو والله يا اسامة طبعا هنادي هسي .. نفسياتها في الواطة.. بي سبب القوايل والصواطة الفي الحلة دي ..

لكن انا غايتو بعمل البقدر عليهو.. قول ان شاء الله ربنا يهدي سرها..

قال ليها هي لو وافقت ليك.. نحن تاني بنمشي لابوها نشوف رايو .. قالت ليهو اقول لي حاجة.. هنادي لو عطست بتكلم ابوها .. عشان كدا ما ح تديني راي .. الا تكلم ابوها وتشوف رايو .. فشنو انا لو جيتكم بموافقة .. معناها موافقة منها ومن ابوها..

المهم يازول شروق اتوكلت على الله .. ومشت لي هنادي .. وبقت تحكي ليها عن كمال ..

قالت ليها .. طبعا ياهنادي اسامة وكمال ود خالتو ديل الموقف الوقفوهو معاك ده .. ما اي زول بعملو ..

قالت ليها والله صح ي.. اخي ديل ناس اصيلين.. والله من سكنت جنبهم هنا .. ماحصل سمعت منهم كلمة شينة .. ياخي سمية دي موش نضامة .. وخشمها خفيف.. والله بتريدني ريدة ظاهرة فوق وشها ..

قالت ليها هسي ياهنادي لو .. كمال ده اتقدم لي انا ..اقبل بيهو؟ قالت ليها .

ياسلاااام ..والله يكون ده يوم المنى.. ياخي ولد مهذب وراقي لدرجة .. ان شاء الله يسويها عليك الله ..

قالت ليها يعني هسي لو اتقدم ليك انتي دي ..

بتقبلي بيهو؟ هنادي عاينت ليها كدا .. وقالت ليها .. انتي قصدك شنو يا شروق ؟.. انا بعرفك لمن تقعدي تلفي وتدوري ..

قالت ليها بصراحة يا هنادي .. كمال ده قال عايزك ..

قالت ليها عايزني انا ؟؟ انا ياحليلي .. مافي زول دايرني بس يغشو فيني ناس الباقر .. ولمن تجي للجد يزوغو ..

زي نوع كمال ده ولابفكر فيني .. عشان كدا عليك الله ياشروق ماتغشيني ساي .. الحصل شنو؟ عشان اعرف ليك الموضوع ده نافع ولالا ..

قالت ليها والله مابغشك .. والله كلمني اسامة بي خشمو .. وقال لي اشوف رايك .. اها انتي رايك في كمال شنو ؟عشان هو منتظر ردك ..

قالت ليها بالجد؟؟ انتي جادة يا شوشو ؟

قالت ليها يابت انتي متخلفة ؟ انا بحلف ليك بالله يعني كيف اكضب؟ ..

قالت ليها والله كمال مافيهو كلمة.. واي واحدة غيري تتمناهو .. خلي كمال.. انا لو اتقدم لي اي زول .. في الوكت ده .. بقبل بيهو .. عشان اوري ليك الباقر ده .. اني انا ما بايرة ولا رخيصة ..

لكن لو لي كمال.. والله مافيهو كلام .. بس انتي ماتقولي ليهو هنادي موافقة .. ادوني فرصة افكر .. واكلم ابوي اشوف رايو .. حتن بعداك اديكم الراي الاخير ..

قالت ليها انا كنت عارفة كدا .. عشان كدا عايزاك تسألي ابوك طوالي .. لانو انتي عارفة انو احتمال ابوك يرفض .. عشان تاريخ الاسرة .. ومشكلة ابوهو الله يرحمه .. انتي عارفاها صح؟ ..

يتبع.....