Kabanata 18
No Alcohol
Ibig niya bang sabihin ay gusto niya sanang halikan ako kaso hinalikan ako ni Kid? Wala akong ibang maisip kundi iyon. Ayaw kong mag assume pero iyon ang nararamdaman ko.
Tahimik kami sa byahe pauwi. Saka lang siya nagsalita ulit nang natagalan kami sa traffic. Ikinagulat ko rin ang naging tanong niya.
"Siya ba ang first kiss mo?" Tanong niyang bigla.
"Uhm..." umiling ako.
Dalawang beses siyang sumulyap sa akin at kumunot pa lalo ang noo niya. "Sino ang first kiss mo?"
"Nong highschool. Tinulak ako ng mga kaklase ko kaya ayon, aksidente." Pinanood ko ang mga mata niyang nakapirmi sa kalsada.
"Anong pangalan nung first kiss mo?"
Nanlaki ang mga mata ko sa tanong niya. "Bakit kailangan mong malaman?"
"Nevermind." Sambit niya at nag iwas ng tingin sa kalsada.
Hindi na ako nakapagsalita. Tahimik na rin siya hanggang sa bumaba ako sa labas ng building. Nilingon ko siya para magpasalamat ngunit hindi man lang siya tumingin sa akin.
Naalala ko ulit ang sinabi niya kanina. Hahalikan niya ba ako pag di ako hinalikan kanina ni Kid? Halos wala akong maramdaman nang dumampi ang labi ni Kid sa labi ko. Hinawakan ko ang labi ko at naalala ko ang labi ni Rage. Shit! Siguro ay dapat ko nang tigilan ang kung ano mang pagpapantasya ko kay Rage. Hindi tama ang magpantasya sa kanya ng ganito.
Pinakain ko si Mia. Narinig ko ulit ang pabalik balik na mura niya para kay Eric. Hinayaan ko na lang siya. Wala akong masabi kundi ang kalimutan niya na lang si Eric. Iyan ang mahirap sa nagmamahal, e. Niloko ka na nga, mahirap paring kalimutan.
"Anong plano mo, Mia?" Tanong ko nang humiga ulit siya sa sofa.
Hinila ko ang isang mas maliit na sofa at nilagyan ko ng kumot. Alam kong dito na siya matutulog ngayon. At maaaring hindi lang sa gabing ito.
"Maghahanap ako ng bedspace. Sabay na lang kaya tayong maghanap?" Lumingon siya sa akin.
Awang awa ako sa namumugto niyang mga mata. "Sige." Sagot ko.
At hindi kalaunan ay umidlip na siya. Tumingala ako sa madilim na kisame. Naalala ko ulit si Rage at iyong mga sinabi niya. Kung ako ba sasabihin ko sa kanya na hindi ko siya kayang halikan dahil nakita ko na siyang humalik sa ibang babae, pagbibigyan niya ba ako? I doubt that.
Naiirita ako kay Rage ngunit mas naiiirita ako sa iniisip ko. Naiirita ako dahil naiinis ako sa pang hahalik niya sa ibang babae. Naiirita ako dahil kaya niyang alugin ang ulo ko sa isang salita lang ngunit hindi ko kayang pasukin ang mundo niya.
Kinabukasan ay naging abala ako sa pag aasikaso sa resignation letter ko. Kakatapos ko lang mag exam at kampante ako sa mga naging sagot ko. Sigurado akong pasado ako don kaya nag pasa na ako ng resignation letter nang sa ganon ay sa susunod na linggo ay makakaalis na ako dito. Kaka isang buwan ko lang at nahihiya ako kay Mrs. Ching.
"Sigurado ka ba talaga dito, Sunny? Naging maganda ang performance mo. Walang reklamo si Mr. Del Fierro sa'yo."
Tumango ako kay Mrs. Ching. "Opo. Mas importante sa akin ang pag aaral."
Tumango na rin siya na para bang naiintindihan niya ang sagot ko kahit simple lang iyong naging rason.
Pagkapasok ko ulit sa Lounge nong hapon ay nadatnan ko na naman si Mia na umiiyak at hinahagkan ang isang malaking bag. Tumakbo ako para daluhan siya. Sa di malamang kadahilanan, naalala ko si mama sa kanya. Naaalala ko kung paano na wasak si mama don sa lalaking ginawa siyang kabit.
Galit ako kay mama dahil hinayaan niya ang sarili niyang maging ganon pero hindi ko parin maiwasang makisimpatya.
Niyakap ko kaagad si Mia kahit hindi ko alam kung ano ang nangyayari.
"Walangyang Aling Nenita!" Sigaw ni Mia.
"Shhh... Shh..." Pinapatahimik ko siya dahil may iilang crew doon at ayaw kong may sabihin silang masama tungkol kay Mia.
"Siya pa ang nagdala ng damit ko! Sinabihan pa niya akong malandi! Na ako raw naman ang unang nangaliwa! Walangya talaga! Tangina ninyo po!" Sigaw niya ulit.
Nalikot ang mukha ko sa pagtahan sa kanya. "Mia..." Hindi ko siya mapatahimik. Gusto kong palabasin niya ang nararamdaman niya ngunit gusto ko iyong kaming dalawa na lang muna.
"Kunsintidor! Bwisit! Mahal na mahal ko ang anak niya! Alam kong mukha akong malandi pero tangina si Eric lang ang nilalandi ko!" Pumiyok ang boses niya.
Piniga ang puso ko. Nag alab ang munting galit na naramdaman ko para kay Eric at Aling Nenita. Alam kong dapat ay hindi ako manghimasok ngunit hindi ko lang talaga maatim na nasaktan na nga si Mia ay nakaya pa nilang ilugmok siya sa putikan.
Ganon ang naging takbo ng aking araw. Tinawag ako ni Mrs Ching para sabihin sa akin na aalis na raw si Rage kaya pwede na akong maglinis. Iniwan ko ang tulalang si Mia sa Lounge. Nagdadalawang isip pa ako sa takot na baka kung ano ang gawin niya lalo na't mag isa na lang siya doon. Sana naman ay wala siyang masamang gagawin sa kanyang sarili.
Kumalabog ang dibdib ko nang nasa loob ako ng elevator. Alam kong maaaring wala na si Rage doon, or worst, nandoon siya pero may kasamang iba.
Tumunog iyong pintuan ng elevator at nakita ko kaagad ang pamilyar na double doors na salamin. Dim ang lights at alam ko kaagad na nandoon pa si Rage. Shit! Paano na 'to? Liliko ako at babalik sa elevator o papasukin ko?
Bago pa ako nakapag desisyon ay nagtama ang paningin naming dalawa. Nakahilig siya sa kanyang swivel chair, naka gray na t shirt, ay may dog tag sa dibdib. Pinagsalikop niya ang kanyang mga daliri. Umayos siya sa pag upo nang nakita akong papasok.
"Uh, babalik na lang ako mamaya." Sabi ko.
"No. You can clean the office now." Aniya.
Hindi na ako nakipag talo. Sinunod ko na lang ang sinabi niya. Tumingin ako sa sahig at napansin kong walang kalat doon hindi tulad noong mga nakaraang araw. Halos wala akong mahagilap na alikabok. Ngumuso ako at kinuha iyong mop para mag mop na lang sa sahig.
Tumayo siya at humakbang. Naghuramentado ang sistema ko habang nag mo-mop sa sahig. Nakita ko sa gilid ng aking mga mata ang kanyang pamumulsa at paghilig sa kanyang mesa.
"It's clean. Pinalinis ko na kay Tonyo."
Napatingin ako kay Rage. Nakita ko ang blankong ekspresyon ng kanyang mukha.
"Bakit? Kaya ko namang mag linis." Nakapamaywang ako nang hinarap ko siya.
"I know. You just don't need to clean all the trash-"
"Trabaho ko naman 'yon." Sabi ko.
Humalukipkip siya. "Well, you're resigning anyway."
"May dalawang linggo pa ako." Panindigan ko.
Nagkibit balikat siya at ngumisi.
Nangatog ang binti ko sa pagngisi niya. Shit! Ano ba naman ito? Para hindi ako lalo kabahan ay kinunot ko ang noo ko. Bago pa ako makapagsalita ay narinig ko na ang elevator na tumunog.
Nilingon ko iyon para tingnan kung sino ang pumasok ngunit nagulat ako nang nakita ang pulang labi ni Mia. Bihis na bihis siya sa kanyang itim na bandage skirt at cropped top.
"Tutulungan na sana kitang mag linis." Aniya at nilingon si Rage. "Good evening, Sir. Sorry kung bigla akong pumasok. May gusto lang kasi akong sabihin kay Sunny.
Nagulat ako. "Ano?" Nagkabalikan na ba sila ni Eric?
"Alis tayo! Party tayo! Bukas trabaho na naman sa Marlboro! Please?"
Nanlaki ang mga mata ko. "Ha? Saan?"
"Don lang sa cheap na mga bar. Ililibre kita. Tapos ka na bang mag linis?" Sinuyod ni Mia ang buong opisina.
"Why don't you party alone, Mia?" Tanong ni Rage nang di binibitiwan ang pagtitig sa akin.
Mas lalo kong nilakihan ang mga mata ko at inilingan si Rage. Ayokong may tumutol kay Mia ngayon. Bigla na lang siyang sumigla pagkatapos ng todo todong pag iyak niya, sigurado akong hindi iyon magandang pangitain.
"Sige, Mia. Ibababa ko lang 'tong cart tsaka mag bibihis." Sabi ko.
Ngumiwi si Rage sa akin at hinarap niya si Mia. "Bakit mo sinasama si Sunny?"
Napatingin si Mia kay Rage. "Bakit hindi ko siya isasama?"
"She's young, Mia, for God's sake."
Ngumiwi si Mia kay Rage. "Bente na siya at pwedeng pwede na siya sa bar, Sir. Bakit hindi pwede?"
Nagulat ako dahil naging masyado siyang straightforward kay Rage. Nakikipag usap naman siya kay Rage ngunit hindi ganito na parang inaaway niya na ito.
Hindi makasagot si Rage kaya inunahan siya ni Mia. "Kung gusto mo, sumama ka para masamahan mo siya... Daddy Rage..." Humalakhak si Mia at mabilis niya akong hinila palayo don.
Hindi ako makapaniwalang sinabi niya iyon kay Rage! Hindi ko alam kung tatawa ba ako o matatakot para kay Mia. Humahalakhak naman si Mia sa glid ko habang hinihila niya ako doon palabas.
"Okay, fine. I'll go with you two." Narinig kong sinabi ni Rage bago kami pumasok sa elevator.
Humagalpak si Mia sa loob. Hindi ko alam kung healthy pa ba siya o nababaliw na. Normal kaya siya o hindi na? Pinapanood ko lang siya habang nagbibihis ako. Panay ang salita niya at hindi ako makapaniwalang natigil siya sa pag iyak niya.
"Kita mo ang mukha ni Rage? Mukha siyang nagmamaktol na ama!" Tumawa si Mia.
"Mia... tumigil ka nga." Sabi ko at pinanood ko siyang tumawa ng malakas.
Umiling ako at halos maisip ko na talagang baliw na siya.
Tsaka lang nag sink in sa aking utak na kasama si Rage nang bumaba na kami sa building. Nakita ko siyang nakahilig ulit sa kanyang sasakyan habang pinapanood kaming lumalabas sa building. Sumimangot ulit siya nang nahagip niya kami sa tingin.
Muntik halakhak ang narinig ko galing kay Mia. Nilingon ko siya ngunit pinagtaasan niya lang ako ng kilay.
Bumagsak ang paningin ni Rage sa suot ko nang nakalapit na kami. Napatingin din ako sa suot kong bandage skirt na itim at sleeveless top na pinahiram ni Mia sa akin.
"Get in the car." Ani Rage at agad binuksan ang pintuan sa harap pagkatapos ay sa likod.
Iminuwestra niya sa akin ang front seat kaya sinunod ko siya. Umikot siya para pumasok. Pinaandar niya agad ang sasakyan.
"Rage, sa-"
Pinutol agad ni Rage si Mia. "Hindi kayo pupunta sa mga mumurahing bar, Mia."
"Pero di namin afford yong mga mahal, Sir Rage. Gusto ko lang namang magsaya. Pwede na don sa mura." Hindi ko alam kung bakit natatawa si Mia.
"You go my way. You're inside my car." Aniya.
"Tama si Mia, Rage. Don na lang kami sa mga mura." Sabi ko.
Sumulyap siya sa akin at pumungay ang mga mata niya. Akala ko papayag siya ngunit, "No."
Panay ang paligo namin sa kanya ni Mia ng request na sa mga murang bar lang kami ngunit hindi siya nakikinig. Hanggang sa lumabas na kami sa sasakyan niya at sumunod na kami don sa napili niyang bar na hindi pa namin napupuntahan sa Marlboro Girls ay panay parin ang kumbinsi ko sa kanyang sa mura na lang. Hindi na nagpatuloy si Mia sa pangungumbinsi dahil naaliw na siya sa paligid.
"Ang daming gwapo. Ang daming artista!" Tumawa si Mia at luminga linga sa mga tao sa labas ng bar.
Alam kong masaya dahil nakakalimutan niya ang problema niya pero inaaalala ko ang kahihiyan kay Rage. Nakita ko kung paano niya tinanguan ang bouncer. Nakapasok kami dahil sa simpleng tango niya.
"Cool!" Sabi ni Mia habang tinitingnan ang mga neon straw ng mga taong umiinom don.
"Mia..." Sabi ko at naaalala kung paano siya nalalasing. Nawawala siya sa kanyang sarili kaya dapat ay bantayan ko siya.
"Ang KJ mo naman, Sunny! Mag enjoy na lang tayo!" Aniya at agad kumuha ng dalawang colorless na liquior sa tray ng waiter. Binigay niya ang isa sa akin. "Para sa mga lalaking nangangaliwa, sana mamatay silang lahat!" Binangga niya ang kanyang baso sa akin at nilagok niya iyon ng walang kahirap hirap.
Dahan dahan kong nilagok ang vodka sa gitna ng mga nagsasayaw na tao.
Pagkatapos kong uminom ay naramdaman ko kaagad ang kamay ni Rage sa aking siko.
"Doon tayo." Sabay turo niya sa isa sa mga pinaka maganda at pinakamalaking sofa.
Tumango ako at hinila si Mia.
"Ano ba 'yan! Gusto kong sumayaw! Hindi umupo!" Galit na sambit ni Mia.
"Mia, sumama na lang tayo!" Bulong ko kahit alam kong di niya iyon maririnig dahil sa ingay sa loob ng bar.
Sumunod ako kay Rage. Marami siyang tinatanguan sa dancefloor. Inisip ko kaagad paano kung may babaeng lumapit sa kanya dito? Kinagat ko ang labi ko habang tinitingnan siya. Nagulat ako nang nilingon niya ako at napatingin siya kaagad sa labi ko. Nagtaas siya ng kilay.
"We'll sit here." Aniya.
Tumango ako sabay upo sa sofa na iminuwestra niya.
"Ugh! Wala dito ang masaya! Nasa dancefloor!" Sigaw ni Mia habang nag hiheadbang kasabay sa music ng buong bar.
"WOOO!" Sigaw ng mga tao nang may umakyat na sikat na DJ sa taas at nag iba ang tunog ng trance music.
"Shit! First time ko sa first class na bar bilang guest! Gusto kong lubos lubosin!" Sigaw ni Mia at kumuha pa ulit ng dalawang shot ng vodka sa tray ng waiter.
Buong akala ko ay ibibigay niya ang isa sa akin ngunit nagulat ako nang nilagok niya ang dalawa ng walang kahirap hirap.
"WOHOOO!" Sigaw niya sabay taas ng isa niyang kamay.
"MIA!" Sigaw ko sa pag aalala.
"Let her go, Sunny." Ani Rage.
Bumaling ako sa kanya at nadatnan ko siyang naka number 4 ang upo sa kabilang sofa. Naglalapag ang waiter ng beer sa harap niya at gatas naman sa tapat ko.
"Rage, baka mapano siya." Sabi ko at napangiwi sa milkshake sa harap ko.
"Pinabantayan ko siya sa bouncer. Don't worry about her."
Tumitig ako sa kanya at hinayaan kong mag sink in ang salita niya sa akin.
"No alcohol for you, young lady." Aniya at tinulak palapit sa akin ang milk shake.
WHAT? Bago pa ako makapag react ay biglang bumalik si Mia para hilahin ako.
"May gwapo don sa dancefloor! Halika! Sumama ka sakin!" Aniya at napapatayo na ako sa paghila niya.
"Mia, leave her alone." Medyo iritadong sinabi ni Rage.
Ngumiwi si Mia at nakita ko sa mga mata niya ang kawalan ng focus. "Single siya. Single ako. Dapat mag enjoy. Maghahanap kami ng lalaking matino. Hindi 'yong tulad ninyong mga womanizer."