ما احلل أي شخص يسرق كتاباتي (ذمه)
#بقلمي_الاميره_الموسويه 👑
...............
حجي طه .. كان شيخ عشيره معروف على مستوى البلد !
شيخ سمعته سابقته صاحب مبادئ وأخلاق ، كلمته متصير اثنين ، امين وشريف ، الناس كلها تحبه وتحترمه وتهابه بحيث اذا صارت اكبر مشكله بس يحظر شيخ طه تنحل المشكله وبرضاة جميع الاطراف لانو معروف عنه عادل وميظلم احد!
شيخ طه هو الكبير لأخوانه عنده 3 اخوان (محمد، احمد ، وياسين)
واخت وحده (خديجه) ..
متزوج .. (سميه ام غزوان ) بنت عمه عنده منها 4 ولد (غزوان ، اركان ، فيصل ، عبدالله) و 2 بنات ( رفل ، شهد)
طبعاً انتصار هي زوجة اخو للشيخ (ياسين) ، اخو كان دكتور جامعي ومعروف عاش بالمدينه لانوو حياة الريف والقريه متناسبه ، هو استاذ جامعي ودوامه يتطلب منه ينتقل للمدينه لانو ماكووو جامعه بالقريه ، اتعرف ع استاذه ويا من الجامعه اتقدملها ، وتزوجو صارت عندهم (يُسر) و (صهيب ) بعد انتظاااار طويل
لما انتقل للمدينه علاقته تقريباً صارت شبه مقطوعه بأهله الي بالقريه لان انشغل بدوامه وبعائلته
فكان يروح لاهله بس بالمناسبات ، وياخذ زوجته وأطفاله لما كانوو صغار .. هواي يحبون يرحون لبيت جدهم ويلعبون ويا جهال عمامهم بس بعدين كاموو ميرحون ويا لانوو امهم متريدهم يتعلمون ع بيئة القرية ويختلطون بمجتمعها!!
فد يوم من الايام ياسين كان راجع من الدوام وصار انفجار ..!!
بيت ياسين ......
انتصار .. ماما يُسر شوفي هذا منو الي ديتصل ؟!!
يُسر .. ماما اني دااسرح شعري حيجون صديقاتي بعد ما ألحك انتي شوفي !
انتصار.. اووووف يا ربي الله يصبرني عليج ما فد يوم صخرتج على شي وسويتي ، هسه المن هذا التعديل والتسريح اشو صديقاتج كل يوم هنا قابل اول مره يجوج؟
يُسر .. يا ماما يا حبيبتي قابل استقبلهم كولي وصخ ومبهذله ، شيكولون عليه بنت دكتور ياسين ماعدها ملابس ومخربطه؟
انتصار .. اي اي اضحكي عليه بكلامج هذا خلي اروح اشوف منو الي ديتصل احسنلي اذا ابقى وراج كولشي متسوين.
راحت انتصار ردت ع الموبايل ... الووو .. اي نعم اني زوجته لياسين منو حضرتك؟!!
شنووووووووووو ... انفجار....... لااااااااااااااااااا .
سمعت يُسر صوت الصياح اجتي تركض على امها .... لكتها واكعه بالكاع والموبايل بأيدها ... اتخبلت .. كامت تصحي بيها ماما .. ماما .. اشبيج حبيبتي شصار؟!!
ماما ... عفيه احجي وياي .. ماما اشبيييييييج بس جاوبيني !!
ركضت جابت مي وغسلت وجه امها بدت اتصحصح !
يسر .. ماما اشبيج شصار لويش وكعتي
انتصار .. بصياح وبجي .. وج اتسود وجهنا ، وج ابوووووج راااااح .
يسر .. بابا ؟!! اشبي بابا شصاير ماما منو الي خابرج؟؟؟
انتصار .. وهي تبجي .. خابرني واحد ويكول صاير انفجار وابوج حالته خطره ويمكن مات .. وج رااااااااح ياسييييييييين رااااااااااح
يسر .. بدت تبجي وترجف متعرف شنو تسوي .. كالت لامها تهدى واخذت الموبايل خابرت ع اخوها صهيب
حجتله ألي صار ، كاللها اني بالطريق جاي حضرو نفسكم حتى نروح للمستشفى الي كالو لامه عليه!
فعلا يسر بدلت ملابسها لانو كانت بملابس البيت وامها هم حضرت نفسها ، اشويه وأجه صهيب اخذهم وراح بوجه للمستشفى!
دخلوو وسأل صهيب ع ابو انطاهم اسمه وكاللهم متصوب بأنفجار!
طول الطريق يسر وامها يدعووون ويتوسلون برب العالمين كون يطلع الخبر كذب وياسين مصايرله شي!
بعد انتظار كم دقيقه اجتي الممرضه .. وموتت كل آمالهم ......!
الممرضه ... ياسين طه مختار للاسف استشهد!!!!!!!!!!! ربي يرحمه ويصبركم .
انتصار اول ما سمعت الخبر وكعت بالكاع فقدت الوعي!
ويسر حظنت امها الي اتخربطت وبقت تبجي وتصيح !!
صهيب من شاف حالة امه وكعت كدامه .. سحبها من حظن يُسر وأخذها دخلوها بغرفه وخلولها مغذي لانو لكو ضغطها مرتفع فوول!
بقت انتصار نايمه بسبب المسكن الي أخذته لانو كالو الاطباء الارهاق مو زين عليها واحتمال تنجلط اذا رجع ضغطها ارتفع ،انطوها مسكن ونامت.
طلعت يُسر من يم امها شافت صهيب واكف ومخلي ايديه على عيونه ميريد احد يشوفه ديبجي ... اول ما شافها ركضت عليه حضنته وبقت تبجي هي ويا....
بعد مده من البجي والقهر .. كعدو وكالتله هسه شنو حنسوي ؟!
اشون ندفن بابا؟؟
صهيب كاللها انو لازم ننطي خبر لبيت جدو و اعمامنا حتى يجون لانوو هذولي اهله واحنا منكدر نتصرف بدون علمهم!
يُسر .. اوووووف يا ربي حنصير تحت رحمتهم الله اليستر شنو حيسوون بينا بعد بابا.
صهيب .. لتحجين هيج عليهم مهما يكون هذولي اعمامنا وأهلنا.
يُسر .. صهيب الله يخليك لتجيب سيرتهم ولتكول اهلنا ، نسيت اشون كانو يلحون ع بابا حتى نروح نسكن يمهم بالريف .. هسه هذي فرصتهم اكيد.
صهيب .. سدي هذا الموضوع هسه مو وقته ، خلي اروح اخابرهم وانتي ارجعي يم ماما اخاف تكعد.
راحت يسر يم امها .. وصهيب خابر على جده ....!!
اول ما سمع شيخ طه بالخبر ، انقهر وحس جزء من عنده راح !
بس هو كالعاده أسد وميبين ضعفه كدام احد خصوصاً اولاده حتى ميصيرون ضعفاء أو يتأثرون بأي شي !
حمد الله وشكره على كل حال ... وجمع اخوانه واولاده وكاللهم ألي صار .. هواي تأثرو ونقهرو اخوانه لياسين
خصوصاً صارلهم فتره طويله مشايفي ولا سامعين اخباره فهذا الخبر صدمهم وكسر گلوبهم!
شيخ طه .. الحمدلله على كل حال ، انا لله وأنا اليه راجعون ، شدو حيلكم اخوتي .. وحضروا نفسكم لازم اليوم نروح ندفن اخونا وابنا ياسين .
الكل كالو .. لا حول لله ولا قوة الا بالله ، احنا حاضرين شيخنا وعلى أمرك نتوكل 💔
فعلا .. اتجمعوا الكل اخوانه و ولدهم و والشيخ وولده و ولد عمامهم واقاربهم ومعارفهم حتى يرحون لبغداد يحضرون الدفن!
بس الشيخ كال لازم تبقى مجموعه هنا حتى تنصب الفاتحه ونسويله عزه هنا ابيت ابو
والبقيه يرحون للدفنه!
بقوا ولد الشيخ و ولد اخوان الشيخ ما شاء الله خير من الله كل واحد عنده 5 و 6.
وهو واخوانه و ولد عمه راحوو للدفنه !
وأخذ ويا ابنه فيصل .. لانو يعتبره ذراعه اليمين ، هو مهندس ومثقف عكس اخوانه كلهم ، طبعاً ترتيبه قبل الاخير بين اخوانه بس الشيخ كل اعتماده عليه .. لانه واعي وذكي الشيخ يحسه يشبهه يكول دائماً فيصل طالع عليه !
هم محبوب مثل ابوو وشخصيته قويه ، كلمته ميثنيها ، والناس كلها تهابه وتحسبله الف حساب
المهم اتوجهو للمدينه كلهم سياراتهم حديثه وحماياتهم اخذو موكب سيارات شكبره وراحوا!
وصلو لبيت ياسين بالليل ..!
طبعاً صهيب طلع امه من المستشفى و وداها للبيت هي و أخته وخابر ع خالاته وخواله انو يجون يمهم بالبيت لانوو ماعدهم احد وخاف يحتاجون شي
وانتصار حالتها حيل تعبانه ، اجوي اهل انتصار كولهم واجتمعو الجوارين كولهم من سمعو بالخبر!
لليل تقريباً الساعه بال 9 اندكت الباب .. وصلوا اهل ياسين طلعو اخوان انتصار والجوارين استقبلوهم
خابر الشيخ على صهيب واخذ عنوان المستشفى .. وراحو ، بس بقى فيصل بالبيت لان محد ابيت عمه واهل انتصار بالنسبه الهم غربه وميصير يتفرجون على عرضهم!!!
حسب تفكيرهم يعني هذا ميصير عيب .
راح الشيخ وألي اجوي ويا للمستشفى .. اخذو جثة ياسين وطلعو بيها للمقبره طبعاً الجثه مينطوها بسهولة لازم الا أجراءات وتبقى كم يوم بالمستشفى وروح وتعال يلا ينطوها ... بس مكالمه وحده من الشيخ استلم الجثه بنفس الساعه واخذوها دفنوها.
بقى فيصل ابيت عمه .. صارت الدنيا ليل كلش وهو بقى كاعد بالحديقه مالت بيت عمه
طبعاً الدنيا ظلمه بس الحديقه بيها اضويه ، وهو كاعد بين الا شجار الي بالحديقه ميبين ومحد يشوفه بس يشوف الي يطلع ويطب لانو اكو ضوه!
اشويه وسمع واحد ديحجي ويبسبس بالتلفون!!!
ركز زين وانتبه شافه ابن اخوو انتصار ام صهيب اسمه (سرمد ).. يحجي بالموبايل يتغزل ويضحك!!
ولا ع بالك رجل خالته ميت وهو بعده بالعزه مالته ، ضاج من تصرفه هذا وهواي انزعج بس محب يسوي مشكله لانو هذا مهما يكون ينحسب غريب وما أله حق يعتب عليه.
دار وجهه وبقى يدخن جكاير ( طبعاً هو ميدخن ابد بس من ينقهر حييييل او ينزعج من شي كلش كبير بحياته ، وخبر وفاة عمه ياسين حيل قهره لانه كان يحبه حيييييل ويحترمه واكو سبب ثاني كلش مهم خلا يعز عمه ياسين ويحبه لهدرجه!) هم حتعرفووو بعدين.
المهم .. انزعج من تصرف هذا الي اسمه سرمد ، والي زعجه اكثر سمعه يتغزل ببنيه بالموبايل ويحجي وياها كلام سخيف وهذا الشي ميصير عدهم لان الشرف عندهم غالي ، والي يسوي هشكل مو رجال يعتبرو.
بقى يدخن حتى يهدي نفسه .. بس الي صار بعدها صدمه صدمة كبييييره وخلا يفقد اعصابه للاخير!!!!!!
بعد كم دقيقه شاف بنيه اجتي بالظلمه .. وراحت للمكان الي بي سرمد!!!!!
وشاف هذا سرمد اول ما سمع صوت هاي البنيه بسرعه سد الموبايل وضمه قبل لتشوفه هذي البنيه الي أجت!؟؟
مثل ما كلتلكم فيصل كاعد بالظلمه بس الي يطلع بالكراج والي يدخل للحديقه يشوفه.. فبقى يباوع ع هذي الي اجتي راد يشوفها منووو بس الي شافه وكف گلبه.........!
بقى ساكت مسوه شي بس دمه كام يفور ، يعني لهدرجة هذا الانسان ستقط وبلا ضمير بالعزه مال عمه يخابر ويتواعد ويا بنات الناس؟!!
لهدرجه ما عنده احترام لحرمة الميت؟!!
لا يا نذل اني اعلمك اليوم اصبرلي ، راد يشوفهم شنو يسوون ، وكف وتقرب من يمهم اكثر بس صار وره شجره بحيث ميبين.. وكام يسمع ...!
سرمد .. ها حياتي اشلونج والله العظيم گلبي وبالي يمج اشلونج ؟!
البنت .. كامت تبجي .. اشونه حالي سرمد ، بابا راح.
سرمد .. يُسر حبي لتبجين والله ما أتحمل اشوف دموعج كدامي.
فيصل .. شنوووووو هذي يُسر بت عميييييي ؟!!
هي الي اجتي للحديقه و واكفه يم هذا الي اسمه سرمد!!!!!!!!!
حس جسمه كُله اتشنج ، اعصابه كُلها انشدت ، ميعرف شصارله مثل الي اشتعل نار!
متحمل بعد بكل سرعته راح ..... جرها من ايدها بكل قوه دفعها ورا ولزم سرمد من ياخته وضربه براسه بكل قوته على خشمه .... خلا دمه يجري!
يُسر .. من شافت سرمد بالكاع وسابح بدمه كامت ترجف ... باوعت على هذا الي سحبها و واكف كدامها بأستغراب هذي الملامح اني شايفتها بس مدااتذكره منووو هذا؟!!
بنبره ترجف وصوته كُله خوف كالتله...
يُسر .. انت منووو واشون تلزمني هشكل منو سمحلك؟!!
فيصل .. بدون اي كلام التفت عليها وعيونه تجدح نار .. ضربها راشدي وكعها بالكاع ... وكاللها .. منو سمحلي الزمج مووو ؟!!
راح تعرفين منو اني بس مو هسه .. كومي كدامي بسرعه دخلي جوه واذا المحج بعد طالعه هنااا لو اشوف خيالج بالكراج الا اخلي جدج ينطي لحمج للچلاب... جرها من ايدها بقوه ودخلها جوه للبيت.
ورجع بكل حركه وغضب لسرمد راد يقتله خلاص بس لما رجع لكا شارد النذل.
بقى دمه يفور واعصابه احتركت من الغضب بعد ميتحمل .. معقوله الي شافه حقيقه؟!!
اكيد هاي هي الي جان يحجي وياها بالموبايل ويتغزل بيها!!!
حس نفسه راح ينفجر بعد ميكدر يهدء ، النار اكلت روحه أكل .. بقى يلوب ميعرف شيسوي ...!
معقوله هاي بنت عمه يُسر الي جانو يلعبون سوه من هم صغار؟!!
لهدرجه صايره منحطه وبلا اخلاق ، محترمت حتى روح ابوها الي بعده ما ندفن وكاعده تتغزل بواحد مسقط مثل هذا؟!
اووووووف يا ربيييي صبرني ما اروح هسه واقتلها خلاص وسوي العزه اثنين!
بس اني الها اذا ما اخلي اخوها يكسر راسها ويشرب من دمها على هاي العمله اني مو فيصل.
الجيران راحوو ومحد بقى بس اخوات انتصار اثنين يمها واخوانها الكبار هم راحو رادو يبقون بس اني قنعتهم انو يرحون يرتاحون ويجون الصبح حتى نروح للقريه من الصبح لان العزا راح نسوي هناك ابيت جدي.. وفعلا مصدكوو كلتلهم روحو بسرعه انهزمو!!
راد اكثر من مره يدخل للبيت لان الجو بارد وهو تعبان من السفر وباجر هم ورى وجعه .. بس مكدر خاف يدخل ويشوفها كدامه وميرحمها .. بقى يروح ويجي مثل الي ينازع الموت حتى يهدء اعصابه .. للصبح بقى بالحديقه بس يدخن ، هاي أول مره بحياته يدخل هالكد!!
ميعرف ليش حس النار تاكل بروحه وگلبه ديحارك.......!
ضل على هذي الحاله الى ان سمع صوت السيارات رجعوو من الدفن وجه الصبح!
شاف صهيب فيصل .. حضنه وكام يبجي .. طبعاً من طفولتهم كانو واحد يحبون بعض مثل الاخوه اثنينهم بس انتصار منعت جهالها يرحون بعد لذلك فترقوا .. بس مع ذلك بقوا متواصلين بالموبايل ومرات صهيب كان يعاند امه ويروح ويا ابو لبيت جده ويخلص الايام كُلها ويا فيصل ، لذلك اول ما شافه متحمل بقى بس يبجي.
كعدو اشويه .. ارتاحو وسوولهم ريوك .. وبعدين الشيخ حجه ويا صهيب ... كاله انو احنا قررنا انسوي عزه ابوك بالقريه ابيت ابو!
طبعاً صهيب يعرف جده اذا كال كلمه انتهى الموضوع وغير قابل للنقاش .. بس كان خايف من ردة فعل امه واخته!
محجه شي وكال الجده انو لازم يبلغ امه حتى تحضر روحها هي وأخته.. وفعلا راح كال لامه الموضوع..
انتصار رفضت رفض تام ، وكالت انوو الفاتحه مالت زوجها تصير ابيته وهي مستحيل تروح للقريه لو على موتها .. !
صهيب حاول وياها بكل الطرق بس هي كانت مصره ع قرارها .. وصل الخبر للشيخ انو انتصار متقبل تسوي العزه بالقريه او حتى تروح وياهم.
صاح لصهيب وكاله .. مثل متريد امك وبراحتها احنا منجبرها على شي ، هي حرة نفسها ..
بس انت واختك تلمون غراضكم وتجون وياي ، انتو ولد اخوي واني ما اخليكم وحدكم هنا لو على جثتي ، وهذا اخر كلام عندي.
راد صهيب يحجي ويا الشيخ بس فيصل كاله انو مو وقتها هسه لازم يسوون فاتحه لابو وبعدين لكل حادث حديث.
راح صهيب وكال لامه الي حجا الشيخ .. انتصار اتخبلت وكالتله لو اموت مااعوفكم ..
بس صهيب شاف كلام فيصل صحيح وهسه مو وقت عرك وخلافات وأبو اصلا ممسويله عزه!
حجه ويا امه وقنعها انو تتحمل هالكم يوم لخاطرهم هو وأخته على ما تخلص الفاتحه ويرجعون.. بعد نقاش ورجااااء كدر صهيب يقنع امه انو تروح وياهم للقريه .. وهي اصلا اضطرت توافق لان تعرف الشيخ اذا كال شي مستحيل يتراجع عنه وخافت ياخذ جهالها منها....!
حضرو نفسهم ومن الصبح راحوو للقريه ......
..........
للحكايه بقيه 😍
رأيكم يهمني ❤️