للكاتبة نور الشمس
.
.
عيوني تراقب الطبيبه شتنطق
رجفت اي والله رجفت وحسيت بضعف بساعتها
يمكن نتناسه بس ماننسه ضاع كل فكري مابررت الروحي ولاگلت انه نسيت ولاگلت ليش بعدني اخاف عليها ليش ابالي بس هيه وبس هواي حجي براسي واسأله وانه مالاگيلهن جواب توقف كلشي تركيزي يم الطبيبه گالت
..ألف الحمدلله على سلامة الأم والطفل
چنت واگف وانتضر منها تأكدلي هيه عايشه
بس گالتلي هيج گعدت واختلطن عندي الفرحه والرهبه ومشاعري الي جانت مدفونه دافنها حته من روحي مااريد احييها
اجاني ناصر گال الف مبروك حوراء جابولها الطفل انطتنياه وهيه تبچي
اباوعله قطعه بيضه ملفوف بأبيض
أذنت بأذنه وكبرت
وگوه لازمه مااعرف شلون شكلي متشنچ وجني شايلي جبل مو طفل خايف علي من نفسي
ناصر..شراح تسمي
..بكيف جده وأمه جاوبته وتذكرت هاني راد يسمي جعفر انعصرت عصر انطيته الحوراء وطلعت بالحديقه تخيلت لو هاني بمكاني شراح يسوي
گتله هاني گدها امانتك انه لو ماوفيت
هاني خويه اعذرني يمكن ماوفيت الك وخفت على مرتك جنها الي ماادري خويه انت عاذرني لو محتقرني انه ساعات اعذر روحي وساعات احتقرها من اذكرك احتقر روحي التدنه على شي الك
هاني اليوم صار ابنك تمنيت انت التلزمه اتمنيت انت التكبر بأذنه
شويه وطلع وراي ناصر گال يردونك تكمل الأجرائات
اتصلت دلال وجاوبتها
..الوو جعفر
..هلا دلال
..ريم جابت
..أي جابت هسه طلعت من العمليات
..الحمدلله على سلامتها
..ألله يسلمچ
..جعفر شبي صوتك
..مابي تعبان دلال شويه واجيكم
..خوش هلا بيك
شفت الساعه سبعه الصبح تذكرت امها خطيه اكيد قلقانه
خابرت كاظم
..ألوو
..هلا كاظم گاعد انت گعدتك
..لا گعدتني گول شكوو من الصبح
..ولك شعندك لضاهري نايم
..ولك ياضهاري غير هسه يله بالسبعه عود اليوم ناوي ارتاح گول شعندك أمر وادلل
..الله يسلمك خجلتني هههه روح البيت اهل ريم
..انه شعندي
..أصبر ولك خليني اكمل روح واخذ امي ام علي وياك خل تگلها ريم جابت عمليه وزينه هسه الحمدلله
..ها شوكت
..من البارحه احنه بالمستشفى وياي حوراء وناصر
كاظم جيب امي وياك خل تبادل حوراء تعبت حته تروح وي ناصر واريدك تبقه يمهن بين مااروح ابدل واغسل وارجع
..صار جعفر تدلل
سديت التليفون وشفت ناصر صافن عليه
جعفر تحبها
ماعرفت شجاوبه ارتبكت گتله ناصر اخذ حوراء وروح ارتاح تعبتك ويانه
..جعفر لاتتهرب من الجواب ولاتتهرب من اي شي يصيرلك خليك تدافع عن كلشي رايده
..ناصر تصدگ اذا گتلك انه مااعرف الجواب حته اجاوبك
..اصدگ بس لهفتك عليها مبينه انت انتهيت تدري بروحك لو لا
..ناصر حته لو بس صعبه حيل صعبه وابد ماترهم
خلي الموضوع يولي
والله يشهد عليه دلال حبها بگلبي وخوفي عليها اكثر بعد
..جعفر عوفك من دلال انه اخوها صح واريدلها السعاده ومو غلط انت تحبها وتحب غيرها شي عن شي يفرق والله ماحلل للرجال اكثر من زواج هيج
گلب الرجال يگدر يحب وحده ويحب عليها بدون ماينتقص من وحده منهن
..ضحكت هاي وين لگيتها يخوي توني ارتاحيت وي اختك لاتسمع وترجع طلايبنه ومالي خلگهن
..بكيفك جعفر بس انطي الروحك مجال انت اول وتالي متزوجها ليش ماتتقتنع بيها احسن واذا ماعاجبك تزوج نهائيا گلي حته انه افكر بموضوعها هم ابن عمكم انه مو غريب گلتها متعمد وشفت عيون جعفر نطن
ناصر شلك بهالحچي هذا تره كلش مو وكته
ناصر...
مااعرف ليش انه مصر اخلي جعفر يتزوجها يمكن لأن احس بالذنب ومن وراي تفارگوو ويمكن لأن شفت جعفر طييب ويستاهل يرتاح وادري بي رجال يعتمد عليه ومايقصر عن اختي بشي مااعرف اكو اصرار بداخلي يگلي لازم يتزوجون حته انت ترتاح
جعفر ..
من حجه ناصر هيچ گلبي اشتعل شعل
گتله مو وكتها ومشيت عنه
شفت كاظم وامي ام علي اجت وفرحانه
تباركتلي وباوستني وكاظم هم گلي الحمدلله على سلامة الولد وامه گتلهم انه راح اروح ابدل واجي
انتضروني وريم وناصر اوصلكم بطريقي
وصلتهم ورحت دخلت للبيت بشرت ابوي وأمي أبوي نزلن دموعه

وتحمد الله وشكره وصه على ذبايح فده
وحچيتلهم كلشي صار وشلون خفت
أمي گالت ترجع اروح وياك اشوفهم التفتت اريد أكوم شفت دلال عرفتها سمعت كلشي
گالتلي مبروك
ابتسمتلها وبگلبي كلت اكيد هسه هيه مقهوره بس تكابر .
كتلها يوم الفرحه الچبيره الي الزم ابني بيدي
وتكوميلي بالسلامه
شفتها فرحت
رحت غسلت وبدلت لگيتها محضره الريوگ
تريگت الخاطرها سألت ابوي شنو نسمي گال بكيف امه هيه الها الحق تسمي
اخذت امي وطلعت وحيل فرحان
امي من شافت الطفل ضلت تبچي وريم على بجيها بچت
اني ماحچيت اي شي بس عيني مارفعتها عن ريم اباوع الها واحس بيها فرحتها مو كامله
گتلها ريم اريد اكمل اجرائات البيان
شنو تسمي
گالت المرحوم مسمي
سمي جعفر
سميته جعفر وكل شويه وارجع اباوع الشكله
تحمدت الله وشكرته الف مره
ريم ..
گعدت من
البنج لگيت اللممرضه يم راسي
کالت هذا الي اسمه ماوگع من السانچ وانتي بالبنج
گلب المستشفى عليج گلاب عباله متي وسواله مشكله والكل خايف منه هسه خاف يقدم شكوه
گتلها
منو قصدچ
گالت زوجج .
بچيت گتلها زوجي مستشهد هذا حماي
البنيه تعجبت معقوله حماچ هيج يسوي عليچ
اصلا الكل حسدچ على هيج رجال خايف عليچ
الممرضات يگولن من طلعتله الطبيبه وگالتله گعد من الفرحه ماگدر يسيطر على نفسه
سولفتلي وانه ماجاوبت شي وطلعت وخلتني بحيره من أمري
الحد مادخلو عليه وحاولت اشغل نفسي
صار موعد الخروج وهم هوه وعمتي ام علي اجوو طلعوني
رحت البيت اهلي
ولگيت الذبايح بالباب وعمي اجه وباسني براسي واخذه خلاه بحضنه وباسه وطلع
بطلعته گلي عمي من ترتاحين نجيج ناخذج
استحيت وماگتله وين اجي انه مااكدر اروح گلت الغير مره
امي شفت الفرحه بعيونها وبچت لأن بأصعب موقف هيه مو وياي كل بنيه تتمنى امها وياها بهيج ساعات صعبه وگالت اتمنيت رجلج اليطلعچ ويتلگاج اتمنيت ابوج موجود واثنينه بچينه مو كلشي نتمناه يصير كلشي بيد اقدارنا واقدارنا مو بيدينا الف الحمدلله على كل حال
جعفر ..
رجعت تعبان وحبيت ارتاح وابالي دلال هواي ضغطت على روحها حبيت ارضيها واريح نفسيتها گبل لا تنفجر
گتلها دلال الحگيني غمزتلها ونصيت صوتي وانه صاعد ع الدرج وملتفت الها گتلها مشتاق للحلوو
شويه وصعدت وگفت يمي دنگت باستني جريتها عليه
ونومتها بحضني گتلها شلونچ
..اذا انت زين انه زينه
..أكيد انه زين الحمدلله الف الحمدلله هوه العنده مثلج شيريد بعد
..جعفر اسألك لو تضوج
..گلت بگلبي بدينه گتلها سألي مااضوج
..أنت صدگ تحبني لو تجاملني
..فكرت بسؤالها احبها انه والله احبها وأگولها بدون مااتردد بس احبها حب عشره ولأن هيه حلالي وماقاصره جمال وحلاه وتحبني بس لو تترك الرعونه العدها جاوبتها
كتلها اموت عليج واحبج والله حيل احبچ
..حضنتني حيل واتنهدت
اني هم رجعت افكر انه احبها زين ليش گلبي يحن الريم وليش راد يوگف عليها يعني معقوله احبهن اثنينهن ماترهم لو هاي لو هاي بس انه گلبي شاذ عن الناس
گطعت صفنتي ورجعت الها گلت اعيش حياتي وي دلال والله كريم منا الوكتها مااعرف نفسي شنو اسوي الي متأكد منه دلال احبها والشي الثاني متأكد هاني فوگ كلشي وفائي اله يبقى اذا چان عدل او مييت
گالتلي جعفر وين صفنت
..وياج روح جعفر وياج انه
..جعفر انت الهوه الي اتنفسه وانت احلى شي بحياتي وعمري كله يرخصلك
..جريتها عليه وضليت اباوع الها شميتها
وگتلها كافي حچي نريد نضوگ
..شنوو تضوگ ورافعه حاجبها
..نضوگ الكرز والجمار
..هاي انه
..أي انتي من احتركت انه
وگفت كل فكري ورحت بعالم ثاني
اشوفها جنه وحبها يكفيني
بس ليش جاي احن الغيرها ليش
معقوله حبي القديم احتيا
لو انه موهم روحي بحبها
لو حچي ناصر صحيح وممكن الرجال يحب الأثنين وكل حب يختلف عن الثاني
كل هالأسئله مالهن جواب عندي
وشكثرهم ذوله التعبوني
وحومرت عيني بسببهم
وانت منهم
لا وحگك أنت كلهم
صار على موعد ولادة ريم شهرين
الوالد يحاول يبينلي بس ماضاغط عليه وهم
اباله بنت اخوو حامل ويخاف عليها ويحاول ميخرب حياتي بس هم مجبور ينفذ قراره
اجه وكت دورة السنه وصرنه نحضر ومشغولين
الفتره القبلها انه ماتركتهم ابد بقت عند اهلها واي شي تحتاج اروح وارجع عليهم بدت دلال تتضايق بس ماانطيها مجال ابد .
بدينه نحضر الدورة السنه ورحنه زياره للنجف
اصعب موقف هذا من خليت جعفر على گبر والده
احساس صعب يمكن البچي البچيته بساعتها اكثر من بچيي على جنازته
بس الشي الحيرني ريم وي كل اوجاعي وحزني البگلبي حاولت مااشوفها من تبچي على هاني
حاولت اغض النضر عنها مااعرف ضعف مني لو غيره
يوم تعب وصعب عليه وعلى والدي وعلى أمي وعلى كل شخص يحبنه
جدد حزن يوم استشهاده
رجعنه للبيت وريم يم اهلها
وبقيت اتواصل وياها على اي شي تريده واي شي تحتاجه .
يمكن گمت اتحجج بشوفة جعفر ابن هاني
مااعرف بس من اشوفها ارتاح نار بگلبي تغلي من اشوفها ارتاح مااريد شي بس اشوفها وخلاص
وماافكر بزواج او ابالي فكرة زواج
احساس مااعرف اوصفه بس هذا الي جاي يصيرلي
اريد بس اشوفها وبس مامفكر بشي وياها ولا اتجرأ وافكر بيني وبين نفسي رافض هالفكره بس ماجاي انجح غصب عني يرجع احساسي يجرني الي مضوجني من تفكيري بريم ض
مو علمود دلال لا شي اكبر من دلال
الي مخليني رافض فكرة افكر بيها اصلا
هوه هاني عايش وياي بكلشي شلون افكر بمرته
بس يمكن بديت احن ورجعتلي مشاعري القديمه وياها يمكن الحنين الدافنه بگلبي بده ينفض اترابه وحيا بروحي .
بس گلبي يحن وگلبي نفسه يصارع حنيني ويگلي عقلك يشتغل صح امشي وراه اخوك صعبه تخونه
مااعرف بس بيني وبين نفسي اني بصراع
عقلي تشوش وگلبي مامرتاح .
شسوي وشلون اتصرف يمر عليه الليل وانه بصفنه وحيره گمت احاول أتعب بالنهار اكثر واتأخر بالسهر وي الولد حته من اوصل مخدتي انام گمت اهرب من افكاري مااعرف شنهي الأريده
بقيت اشهر على هالحال وصار عمر جعفر ٧اشهر
وعلى دورة السنه خمس اشهر بهاي الفتره جعفر من گام يفتهم امر علي واجيبه الأمي وابالي وصية هاني وشلون ماوفيتها جعفر بده يفتهم ويكبر وهوه مو بالبيت وصيته مايطلع من البيت هوه وامه
احساسي تعبني شلون اتصرف ماادري ابوي بده يلح عليه وكتله بويه انطيني فرصه
واحاول اقنعه وهوه مامقتنع برفضي
اندگ الباب من طلعت اشوف منو تفاجأت بخطارنه
چان حمود
السلام عليكم
..وعليكم السلام كل الهلا شلونك مشتاقلك اتفضل البيت بيتك
..بيتك عامر الله يسلمك
دخلته للبيت وسلم ع الوالد
گال اجيتكم بشغله اعتبرها تخصكم
ومو من الأصول اتصرف بيها وحدي
ابوي گاله والنعم منك ابن اصول گول وخل نفتهم شنهي الشغله
گاله انه قررت اخذ امي وياي للبصره بعد ماالها گعده هنا وريم اكيد تجي وياها ضلت ابنكم بكيفكم تتواصلون وياه بس اختي مااخليها وانه هم طالبكم ماتاخذونه منها ريم فقدت كل عزيز اذا اخذتو الولد منها تنتهي هالمره
بدون وعي گتله حمود
انه طالب اختك على سنة الله ورسوله طالبها الي مره شتگول انت
أبوي شفته فرح بس تفاجأ بيه گبل شويه يقنع واني ارفض
حمود گال والله اتشرف بيك بس اكيد اخذ رأيها توافق او لا
..مااعرف ليش خفت منها ترفض گتله هذا الحل الوحيد المايفرقها عن جعفر اول وتالي ابن هاني مااخلي يربه بعيد عنه
..گال الله كريم وراح
انه ضليت قلق وهم فكرت انه شسويت بروحي ماجاي اتقبلها احن الها بس مااتقبل فكرة الزوج والزوجه يعني مااتخيل ايدي تلمسها بعد لمسات هاني ليش تسرعت بس هم ماكو غير حل يعني اخلي جعفر يروح يتربه بعيد عنه ووصيت هاني البرگبتي مااوفيها ضليت ساعه اگول خطوه حلوه وساعه اگول تورطت
أبوي سولف الأمي بصوت عالي وهوه يحچي وبالي يم دلال شيفضها هاي السالفه
گلها ترحين العصر تخطبين ريم الجعفر وگاللها السالفه أمي كيفت لأن جانت خايفه جعفر يتغرب وبعد ماتشوفه وهيه صارت روحها بي
بعدهم يسولفون سمعت شي انكسر بالمطبخ
عرفتها دلال
الضاهر راح اتعب هواي وانه مالي خلگ كلشي
گتله بويه بس گدامكم هذا انت وهاي امي انه اتزوجهه ع الورق بس ماتنتضرون مني عداله وزواج بشروطه المعروفه
أبوي گلي لاتتوعد خاف انوب تصعب عليك لاتاخذ قرار وانوب تندم علي
خلي كلشي للزمن
حچياته ضوجتني وحسستني بضعفي معقوله
صدگ وتصير وأگدر اعيش وياها طبيعي
شلون يصير
عفتهم وگمت اشوف دلال لگيتها تبچي
ماحچيت وياها شي بس ضليت واگف وعيني بعينها
لااگدر اعتذر ولاأگدر انطيها وعد وخاف اندم علي مثل مايگول ابوي بس انه ليش اندم
انه قررت اتزوجها بس حته جعفر مايروح بعيد
اوووف تعبت تعبت حته بالي مو صافي فكره تعارض فكره ضلت عيني على دلال گالت ليش وعيونها تحچي كل حزنها
گتلها مجبور وانتي تعرفين ليش
عفتها وطلعت بيومها مارجعت للعصر
وعرفت امي رايحه ومحصله الموافقه
ولازم هاليومين نعقد وتجي ريم للبيت
أبوي گال تجهز البنيه من كلشي وتعتبرها عروس جديده گتله
سهله أشتريت غرفه وجهاز كامل بس مافرحان بكل خطوه اتعب ازيد من الگبلها احساسي تعبني ومحتار بين احباب گلبي جبت عمري كله عندي حبيبين ماكو اغلى منهم الأول هاني والشخص الثاني الحبيته حب ماينوصف ريم بس حب هاني تغلب على حبها وخايف من الأيام الجايه ياحب اليسيطر على گلبي
جهزت كلشي وحته جهاز الجعفر جبت من كلشي
المشكله دلال صارت نار تريدلها حجه ماتغيرت وياهت بشي ومقدر وضعها بس مابيدي شي عليها
ريم ..
من صار جعفر لليوم عمه ماگطع عنه وگمت اتلهف الشوفته واذا گبل جنت بس احبه هسه عشگته وأموت على طاريه .
الشي المخليني أحبه وماابين حبي هوه وفائه الأخوو واعرف تفكيره من اجانه حمود وگال لازم تجون وياي شبعت بچي شلون ابعد عنه ذيج المره ومجبوره
ويسموني تزوجت وحفضت كرامة رجلي وحفضت اسمه وهيبته وشلته من فكري ليش رجعت احبه اردود وليش كل موقف اليسوي يكبر بعيني
ليش هيج الامي وايامنه المضت
ضليت ابجي وتحججت گتله هسه ياخذون مني جعفر وانه اموت بدونه گال اقنعهم وانه ابالي صدگ خاف يسوونها جعفر اعرفه مايتزوجني بس هوه مايتنازل عن ابن اخوه وخاف ياخذه مني شلون بيه
بچيت وطلع ورجع ولگاني على نفس الگعده والبچيه
..ريم كافي بچي عندي موضوع وياچ وصاح امي اجت يمنه
گال رحتلهم ضليت عيني عليه شيگول بس لاصدگ ياخذون جعفر مني گال گتلهم وجعفر گال ابن اخوي مستحيل يربه بعيد عني بعده يحچي لطمت على صدري يعني ياخذه گال خل اكمل ريم جعفر طلب ايدج ورادج اله مره على سنة الله ورسوله وگال هذا الحل الوحيد الي مايبعدها عن ابنها أنه من گال هيج
باد حيلي جعفر ياخذني انه ربي معقوله بعد هاي السنين اصير من نصيبه ضليت صافنه
گال شگلتي أمي گالتله يمه توافق طبعا توافق جا احسن ماتضل هيج وابنها يروح منها جا الشيخ هاني يتيه ابن ابنه الوحيد بيدنه لا والله ولايتيها
گالها يمه كون توافق من قناعه مو تضغطين عليها
انه شلي غرض يمه انه اريد مصلحتها ومصلحة ابنها يربه يم عمه وبين اهله وناسه
همه يحچون وانه بالي راح بعيد رحت بغير عالم واجه ابالي هاني وخطوبتنه والصار والعرس وايامي الحلوه العشتها وياه ودلالي ذاك المادام بچيت
ونزلن دموعي چون خدي گتله والله ماانساك هاني وانت العشرتي وياك قليله شلون انسه جعفر حبي الوحيد الي وعيت ع الدنيا واول مادگ گلبي اله
كل مشاعر الحب والأعجاب واللهفه والشوگ كلهن عرفتهن بجعفر
الحد يوم الي انكتب كتابي لخووه دفنت كلشي بگلبي وماخنت رجلي
بس هسه كلشي اختلف بعد ماأگدر اضل دافنه حبي
افكر ودموعي تنزل
گطع صفنتي صوت حمود گال اذا مامقتنعه لاتجبرين روحچ گتله لا موافقه انه
هوه ضل يسألني اكثر من مره وأكدتله وامي فرحت حيل
گالت يمه سوده عليه كلشي صارلج من وراي راح من بالي كلشي بيد الله طمعت وردت ابن الشيخ الج وضابط وشاب ماينعاف گلت هذا مو ابنهم ابن اخوهم وردتلج الزين ماابالي الله اليقسم كلشي تاليتها هاني الله يرحمه مات وكلشي صفه الجعفر عبالج مامتندمه على عملتي وياج وكسرة خاطرچ
بچيت گتلها يمه الله يشهد هاني نعم الرجال ماكسر خاطري يوم دللني ولو باقي جا هسه انه اسعد وحده
مااجذب عليج اذا اگلج جعفر نسيته جنت امثل على روحي وأكول ناسيه بس صار فتره وبعد اهتمامه بينه رجع كلشي حبيته واتعديت مرحلة الحب وصرت اعشگه بس مامتوقعته يتزوجني اعرف شلون يحب اخوو وگلت بعد مايفكر بيه
أمي كيفتلي وضليت انه بين الخايفه والفرحانه
خايفه شلون بحياتي الجديده ودلال شلون وياها
لازم ارجع قويه مو ضعيفه الها
انتعشت من جديد ورجع گلبي يعزف الذكره
اجت عمتي وخطبت وگالت جعفر جهز كلشي واخذناج على اساس عروس مو مانين عليج والله ارملة ابنه وتجينه بهدومچ لا نجهزج جهاز حالج حال اي عروس
انه فرحت بداخلي يعني مفكر بيه
تحمدت ربي وشكرته وحيل فرحانه
وأگول ربي معقوله تدوم فرحتي
معقوله انه وجعفر نصير سوه
افكر وطايره من الفرح
سمعت تليفوني رن
قريت الأسم جعفر
گلبي يريد يطلع من مكانه دگ مثل دگاته گبل
من چنه نتواعد بالبستان اول مااشوفه من بعيد هيچ گلبي يدگله
جاوبت وانه مرتبكه
..ألوو
..الوو هلا ريم
..هلا بيك كوه تطلع مني الحچايه
..اريد احچي وياچ بموضوع
..سكتت.. ريم تسمعيني .أي اسمعك
..سككتت گتلها انه طلبتج بس علمود جعفر وانه وياچ مستحيل نتزوج ونعيش حياة طبيعيه بس بهالحاله اثنينه راح نضمن جعفر يتربه يمنه
اني أسولف وياها ومامقتنع بالأگوله بس كملت حچيي شفتها سكتت
..ألوو انتي وياي
..امم وياك گلتها وانه خانگه البچيه
..يعني ؟
..شنوو
..متفقين
..هذا هوو متفقين
سديت التليفون وشبعت بچي احتقرت روحي وكرهت احساسي وگلبي الي حنله وهوه ماحن
احتقرت روحي شگد غبيه الي بعت هاني بسرعه ونسيته بس لأن حنيت الجعفر
ضليت اطگ بگصتي غبيه غبيه ثوله
انه اصلا مال واحد مثل جعفر مو مال واحد مثل هاني انه مااستاهل هاني لو استاهله جان الله طول بعمره الخاطري بس الله يدري بگلبي شبي وراد يعاقبني ويشوفني مو كل النحبهم يستاهلون
ضليت ابچي وانتهت
كل احلامي
ماحچيت شي الأمي ولا احب احچي
صار موعد العقد ولازم نعقد
أمي گالت يمه ذبي الأسوود الرجلج عدلي وجهج
گتلها لا يمه ماأگدر وانه بگلبي اگول عليمن اعدل وجهي واذب الأسود المن هذا حضي وهاي قسمتي
ابقه افكر بأبني وانسه كلشي
دلال ..
اليوم موعد العقد وانه مثل المحترگه اطراف ثيابها اطفر اطفر والگعده ماعرفتها ونار البگلبي محد يدري بيها النفس گوه اتنفسه يصعب عليه كلشي وگوه لازمه دموعي اليقهرني يتصرف وياي طبيعي وطلب مني اجهزله ملابسه جهزتله الدشداشه جوزي والچماغ ابيض وعگاله والساعه والسبحه والعطر جهزت كلشي بيدي وانه بيه نار تسعر
صاح دلال
..حضري الحمام
..بگلبي اگله من حضروو گبري ان شاءالله
كتله حاضر
.. هاا محضرته الي عفيه والله وكفوو منچ احاجيها واتصرف وياها طبيعي بس خايف عليها تثور وتسويلها طلابه ومنا هيه حامل وضل بالي عليها الحد هسه سباعيه دعيتلها الله ينطيها القوه ومابلغتها باتفاقي وي ريم واصلا محد يدري بس انه وهيه
..گالت شنوو الجديد يوميه انه احضرلكياه ليش اليوم مستغرب
..جريتها عليه وسديت باب الحمام
خليت شفتي على شفتها و حسيتها ذابت
خليت عيني بعينها نزلت دموعها وخرت عنها وگفت عدل تنهدت گتلها ليش تبچين
..تسألني ليش ابچي مستغرب جي ابچي عجيب امرك جعفر ليش تصرف وياي وجن ماكو شي
..دلال يكفيچ اذا گتلج احبچ ومشتريچ واضل دوم رايدچ لو هذا مايكفيچ
..سكتت وضلن بس دموعي تنزل
..جاوبي يكفي لو مايكفي
..متأكد تضل دوم رايدني جعفر سألته لأن تذكرت حبهم گبل
..متأكد مها يصير ومهما يكون مكانتج تبقه بگلبي ومحد يدنالها احترامچ وحبچ لاتتوقعين بيوم اتغيير عليچ بس اريدج راكزه وعاقله تحافضين على هدوئج وتبينين احترامي للكل
اقل حركه مامسئوله منچ افهم انو انتي مامحترمتني اقدر الوضع الأنتي بي وحاس بيچ بس تعرفين الضروف الي جبرتني خليچ هيچ وتكبرين بعيني يوم بعد يوم
احاچيها وهيه تشهگ من البچي جريتها على حضني حضنتها حيل رفعت شعرها عن رگبتها وشميتها وضليت ابوسها برگبتها بوجها براسها الحد ماهدأت
وطلعت كل حسرتها البگلبها ضجت عليها صح بس فكري يم ريم ومااعرف القرار الأخذته وياها يضوجها لو يفرحها جان اكو فضول بداخلي اعرف شنو احساسها
صار وكت العقد طلبت من دلال تروح وي امهاتي وخواتي رحنه سوه وابوي وناصر وكاظم واخواني رحنه نطلبها طلب اصولي من اخوها ومن عقدنه طلعوو همه وانه لازم اشوفها
دلال..
صح عيشني وياه احلى دقايق وشلون گدر يمتص غضبي وهدأت بس من طبيت الهم واشوف شكله يخبل وهيبه بين الولد وشفته فرحان ماادري انه يتهيألي بس احساس يمووت من اشوفه راح يعقد ومن طلب منه الشيخ يعقد انعصر گلبي عصر ضاع عليه الهوه مخبوصين الكل يردون يسمعون الشيخ وهوه ينطي مقدمات للعقد انه اريد اتنفس ماأگدر حسيت ضغطي صعد راسي يريد ينفجر ضليت اجر نفس قوي ماأگدر احس صدري انغلق
..جعفر بس سمعت هدوء يم النسوان وبده الشيخ ينطي المقدمات يريد يعقد أشرت الناصر گتله ناصر أطلع بالباب خاف دلال ماتتحمل كلشي يصير كلبي يمها طلع ناصر
ناصر ..
بده الشيخ يريد يعقد صح فرحان الجعفر بس بالي يم دلال شويه وأشرلي جعفر گلي اطلع شوف دلال خاف ماتتحمل يالي يمها
فرحت بداخل نفسي بهاي اللحضه وماناسيها صدگ رجال ويفكر بكلشي ومخلي مساحه الكل شخص بحياته يفكر بالي يحبهم گبل لايفكر بنفسه
طلعت شويه وشفت دلال تشهگ وتحاول تتنفس ماتگدر
تتلفت واحسها مامركزه دايخه صحتها
دلال دلال
.
.
يتبع