.
.
بشر متعوب من دنياي
زغير وكاشخ بحزني
أنه مو سدره بيرغ گوم
مو ياهو اليجي يهزني
وصلت المرحله من الضيم
أليگلي شبيك اسد اذني
حچي العين مامفهوم
وانه سوالفي بذني
أنا المبيوگه عافيتي
أحساسي الباگها وحلني
يجيني مهندم ومرتاح
ويبي كلشي يعرف عني
يطگ بالسبحه ويسولف
وينشد ع اليلچمني
وين الگه اليعرف الناي
بهاي سوالفه شيعني
يوون چي ضهره مزرف
ليش الناس تلوم الناي
أووف احساسي والتعب البيه محد يعرفه
ليش هيج يصير بيه شنهي السويته
ربي مالي غيرك وطاقتي بدت تنفذ ريحني ياألهي
گمت افتر بالغرفه خليت ايدي على راسي احسه راح ينفجر .
شنوو الأسوي الحچي الگلته مامقتنع بي يعني شمعنه بس اني الي اتنازل وارضي غيري على حساب روحي ليش اني هم بشر هم عندي احساس
حسيت روحي راح انفجر باوعت للميز بطرف ايدي طيحت كلشي عليه للگاع مردتهن مرد الحاسبه التحفيات حسيت اذا ماسويت شي اطگ كسرت شكو شي قابل للكسر .
شويه وبده الباب يندگ سمعت صوت هاني
..جعفر جعفر خويه افتح الباب جعفر شبيك افتحه
سكتت ماجاوبت اي شي وماردت افتح الباب مااريد اشوف احد حته هاني الي بعمري مارفضت شوفته ماردت اشوفه هالمره انفتحن جروحي كلهن وهاني من ضمنهن لزمت راسي بأيدي ومااعرف شسوي
..جعفر راح اكسر الباب اذا ماجاوبت راح اكسره
طلعت فتحتله الباب انصدم
..جعفر شبيك
..هاني تسألني شبيه گلي شمابيك گلتها بصوت ناصي وحيل مهموم
..جعفر لك مساع انت مسيطر وتحجي شجرالك هسه البنيه ماتريدها تتعود عليها وشوكت ماتريد تزوج غيرها منو لازمك
.. هاني هذا الحل عندك بشر انه عندي احساس گلبي مو حجر ولا انه نبي ولا انه ملاك ولا ولي صالح ولا امام بشر انه كلي ذنوب وماعندي طاقه اتحمل انه جعفر مو أيووب حته اصبر هالگد لك الظيم البيه ماتلگاه عد شياب لك گلبي شاب وانه بعز شبابي گلي شگد انه عمري گلي گمت اصييح وفقدت اول مره اصيح بوجه هاني
..گلي عمرك تلاثه وعشرين گتله بذمتك الضيم البيه مال تلاثه وعشرين ولك هاني مرارتي طگت
..جعفر گول ياالله شبيك انت حبيبتك الله يرحمها الحي اولى من الميت انت بعد شوف طريقك يجوز الله رحمك وصارتلك هالسالفه
.. هاني انت كلشي ماتعرف ماتعرف البيه لاتسألني
.. خويه عذرني اذا مقصر وياك بس شبيدي عليك شتريد اسويلك انطيني التريده وانه وياك للموت
..المشكله انه مااعرف شريد انه الأريده مايصير الدنيا تمشي وياي عكس
.جعفر ليش ماگتلهم بتكم مارايدها وهيه اجت ليش تحمل نفسك فوگ طاقتك
..ولو كتلها اخوها الأرعن وين اروح انه أضل اكل بروحي والندم شيفيد بعدين لك هاني الصار وياي جبرني احميها
..هذا هوو خليك على احجايتك وحاول تتأقلم انه عاذرك صعبه عليك بعدين تتعود
گتله الله كريم .
گلت بگلبي محد فاهمني محد يعرف البيه غير كاظم
نزلت اخذت السويج وخابرته گتله كاظم تعال نطلع
طلعنه ركنت السياره على جانب الشط وگعدت عيني ع الشط واسولف كلشي البگلبي الكاظم گلي انت قوي وسبع خليك قوي ولاتضعف المواقف هيه التعلمك والضربه كل ماتكون اقوه تقويك اكثر
وهاي بت عمنه لو بيدي اگطعها ولو راح تصير مرتك بس والله من شفتها گاعده وي البنات وجن كلشي ماكو گوه لزمت روحي .
..جا خوش انه حاميها من نويصر المسودن
هنوب احميها منك
ضحك گلي ولك مو صاحيه شلون تخليك بهيج موقف
.. والله يمكن هاي بت عمك سباعيه اكثر مني
گال افا ليش هيج تگول
گتله شمرت روحها للتهلكه والله شنهي تحبني
جا لو مكتوله بيش افيدها انه
گال هيه تدري بيك ماتعوفها لخوها ومأمنه بيك
يله گدرت هيج تسوي
..لا والله شحده اليگربلها وهيه بحمايتي احرك اهله اليجيس شعره منها
بس وعلي من الگفها هسه الا اشوفها نجوم الضهر
وروح جدك مساع فقدت لو هيه يمي اله اخطط جسمها تخطط بالحزام على هالهبيه الطيحتني بيها
انه كلها بصفحه وهذا نويصر من يتهدد بصفحه الكله ماشفت گلبي بي لو معيبله ايد رجل جا ارتاحيت
ضحك گال جا خوش كون حلال عليك وحرام على غيرك .
گتله بعدالة الله هوه ياهو التأذه غيري
من حجيت وي كاظم ارتاحيت ورجعت لگيت الغرفه مرتبه يمكن ريم منضفتها
ثاني يوم گعدت كلشي طبيعي .
نزلت سلمت على ابوي وامي بوست روسهم
وماجابولي طاري موضوع البارحه همه هم سكتوو
گتله بويه بلغ بيت عمي اليوم نعقد بالليل
گلي انت رايدها گتله لا
.. جا شلون
.. گتله اعقد حته احميها
.. لاتضلم البنيه بويه افتحلها گلبك
والله يابويه گلبي ماادري انه بعد عندي گلب لو لا .
الله كريم اذا هيه شاطره وحوك تخليني افتح گلبي
اذا تضل على طفگتها ماتفيدني .
گالي جعفر ماعدنه بنات عم يتطلگن تدري انت لو تسوي روحك ماتعرف گتله منو گال انه اطلگ
..ولك جعفر انت حيرتني بويه انت شنهو التريده
.. طلاگ مااطلگ بس اعيد ترباتها من جديد ومحد منكم يدخل بينه
انه اعرف شلون اعدلها بنت فهيمه
..بويه على كيفك وياها وهيه تنعدل المره وره زلمتها الزلمه المعدل يعدل مرته غصبا عنها
..دلال
من بلغوني بالعقد حيل فرحت وچنت طايره طايره
احساس حلوو انه جاهدت حته محبوبي يضل الي
حته لو انه مو اباله يجي يوم ويحبني
وانه من اخذه اعرف شلون أرضي
بس كون هوه ينطيني مجال
صار وكت العقد وراحوو وعقدوو وهلاهل وفرح
وجانت دلال محضره نفسها وكاشخه ومعدله وجها وحواجبها واليعرفها وشافها ينصدم بشكلها وشلون متغييره هواي اكو فرق ولابسه فستان تور مبطن من يم الصدر وايديها بارز جمالهن التور وبياضهن يجذب الي يشوفهن امها جانت حيل فرحانه وتفاجأت بأمها وفرحتها وحستها تحجي حچي حلوو عن جعفر تعجبت بيها معقوله هاي امي تگلي هالحجي تگلي مبروك وجعفر زلمه حوك ومعتبر شنهي السالفه
عقدوو وطلع الشيخ وصار وكت جعفر يشوف العروس وكلها تفاجأت بلشي السواه جعفر
سلم على عمه ومالك وعاف ناصر وسلم على باقي ولد عمه واتباركوله طلع بالحوش ضل واگف گال وين عمتي ام مالك سلم عليها وهيه تلگته بلهفه وباوسته وخله وطلع .
الكل انصدم والعروس واهله البعدهم يم العروس متانينه ويدگن ويرگصن
العروس انكسر خاطرها وبچت وامهاته ضلن وحده تباوع للثانيه طلعن وهنه حيل مستحيات ليش هيج جعفر يسوي ليش يخلينه بهيج موقف ..
جعفر..
فكرت بيني وبين نفسي گلت ماافوتها الج هالسالفه
والا ابدي اربيج وانه اعرف دواج شنهوو
بدلت وطلعت ولد عمي واخواني كلهم موجودين
ويمكن هاني تفاجأ بيه طلعت اضحك واسولف ولا جني الگلبت الدنيا بالليل گلت مو انه الي اضعف وابيين ضعفي لحد

عقدنه وخلص العقد سلمت وطلعت من الباب شفتهم سوولي درب حته اطب للعروس بگلبي گلت هذي البدايه يادلال خليت وطلعت وحته اهلي عفتهم هناك
دلال ..
جنت حيل فرحانه وطايره بالسمه من طلع ومامرني حيل انجرحت گلت ميخالف اكيد بعده مارايدني وانه الردت وانه الأتحمل
ريم .
بيني وبين نفسي حيل فرحت وادري بجعفر مو الي واصلا ماافكر بي وعندي هاني يسوه الدنيا كلها بس ليش فرحت ماادري ماي بارد وانصب على گلبي هاني گال جعفر بده يلعب وياهم ضحك وگال منا وهيج يحله اللعب جعفر محد يعرفه غيري مو من النوع الي يتنازل بسهوله ولا من النوع الي ينجبر على شي خطيه تورطت وياه دلال الله يهدي ويحبها
ويرتاح .
ام هاني وابو هاني ماضايقوه ولافتحوو الموضوع وحته اهل دلال مافرق عدهم المهم عقد وحته ع العرس مااتفق وياهم على موعد گلهم من ارتب اموري اخذها
هاني خابر علاء الجندي الي وياه بالدوام واتفق
يروح باجر يتعنه لهلها بلكي يفكون النهوه
وبلغ ابووه گله انه اروح الخاطرك وبلغ جعفر هم يمشي ويانه وعلي وناخذلنه سيد وجاها وبلكي الله يفكها
اتفقوو يرحون ثاني يوم ..
هاني ..
ريمه .
..روحها وگلبها
..ولج لادوهنيني انه بدون هاي وهاي يمج اخدر هنوب گلبي وروحي شيصير بيه
..ههههه وعمري كله فدوه الك
..أحترك هاني من جدمه الراسه ولج هاني وديرة هاني تروح العينج فدوه تعاي انتي تگضينها اليوم روحي وگلبي تعاي هنا يمي ريمه تحبيني صدگ گالها وصوته نصه
..ترددت بالجواب وگتله اموتن عليك وحيل اشتاقلك لو رحت وگلبي يضل هيج مفرفح على شوفتك
..أحترگ گلبي عله هالسالفه ولج جا انه الماافرفح الليل كله الوب مثل الملدوغ حيه بس اريدن حضنه منج ريمه انتي حليتي دنيتي كلها .
جعفر..
بلغني هاني حته نروح المشيه وسولفلي السالفه وحيل ضجت ع الولد وانه منا گلبي مورم من هاي العادات الي العشاير الهسه مجلبه بيها فصليه وهديه ونهوه يعني لو مامنطين ريم هديه جاهسه هيه مرتي وجا ماشفت هالضيم هذا ومايوميه انام وانه اواعد روحي انسه وأگعد الصبح جن ماواعدت
گلت الهاني اروح ونحاول وياهم وعلى الله
يتبع