گلولها گصرج حلوو
چي ضهري بالفرگه انحنه
گمت احس طولي بطولها
وصلولها
ذاك الترف
والله بغيابج منجرف
منجرف عن العافيه
طايح ولابس فرگتج
بس الملامح حافيه
شفتهم كلهم يتباركون وهوه فرحان احساسي ماكو وصف اله صدري بي الم حسيت ضاگ الهوه عليه
الف سالفه وسؤال ابالي ليش هيج الموقف انحط بي ليش هاني بالذات ليش الأخوي لو الغريب أگدر اتصرف ليش هالحض افكر شلون معقوله هاني ماكو غيره وصل الدور الي گمت باركتله اصعب موقف انحط بي تمنيت لو ميت ..اخوي عندي الدنيا كلها بس صعبه حيل صعبه حبيبتك شخص تحسه الك ملكك ومو شخص عادي حبيب ومنوو الياخذه اخوي مااعرف شلون وصلت وسلمت وطلعت طلعت اركض اركض ماحسيت لا بالناس ولابعيني احد ردت اوصل المكان بعيد اطلع قهري ارد اصيح ليش سمعت واحد صاحني انداريت شفته كاظم
كاظم ..
من اجه جعفر وسلم على هاني اجه مزعوج وسلم وطلع مو عوايده هاني سأل گال جعفر شبي اكو شي زاعجه اليوم موطبيعي مو جعفر الأعرفه
ضحكت وگتله جعفر عاشگ الله اليعلم شعنده وي محبوبته
گال اي والله لو تصير بنت القعقاع اجيبها اله بس خل يأشر ..عمي موجود گال والله اوزنها بذهب واشريها منهم شرايه اله لايضل باله بس خل يخطي ويدلل
شويه واجانه ابو حمود وجعفر دخل وراه
ردته يگعد يمي واضحك عليه ارد أگله نسيبك گاعد حبه من راسه ردت انصب عليه
من حجه السالفه ابو حمود اني انسخطت الله يساعد گلب جعفر بذيج الساع وهوه يحجي اني عيني صارت على جعفر بس اني ادري بقصته شفته فتح ياخة دشداشته عرفته اختنگ ضليت اراقبه وشلون گام يبارك الهاني گلت بس لايصير شي ضليت ادعي سترك يارب شفته تبارك وطلع طلعت وراه وشفته يركض ولحگته أول ماطاحت عيني بعينه بجه
.. افا عليك تبجي جعفر دموعك مااشوفهن خويه گول يالله
..كاظم شسوي گلي شسوي
..جعفر سولف الهاني كلشي
..صدگ تحجي اگله انه رايد مرتك وجنت على علاقه وياها صار اربع سنين أكله عاشگ مرتك الي سنين أكله كل يوم احلم هيه بحضني ولك شلون شلون
..ولك بعدهي ماصايره مرته بعدهي
..ولك قبلها بالديوان گدام زلم السلف كلهم گدام ابوي وعمامي تريدني اخلي يكسر كلمته ولك البنت تنعاب لو عافها وحته من يعوفها أكدر اخذها انه بعد ولك ريم راحت من ايدي راحت
..أدري شنهو الحل برايك شتريد هسه بس اهدأ وفكر
..ماادري الي اعرفه هاني عندي اغلى من كلشي اعتبرها ماتت بس كون أگدر كون گلبي الچلب يگدر ولك گالت انساني بس وعدتها أكتله واخذها منه عبالي مو هاني ولك اكتل روحي وهاني ماأگربله
كاظم مااگدر لو ميت احسلي ولك لو مو خوفي من ألله اكتل روحي وارتاح
..گول يالله بعد اخوك ماأعرف شلون اواسيك الموقف صعب بس انت سبع تعرف شلون تتخطاه
بس هاني تعرف غلاتك عنده لو تگله والله ماياخذها
..خايب هوه جي هاني ماأكدر اگله اعتبرها ماتت بس گلي شلون اتحمل شلون اتحمل أشوفها ويانه بنفس البيت ولك گلبي يوجعني محد حاس بيه
ليش ترضه هيه شلون ترضه تاخذ اخوي شلون
كاظم انت حاس بيه لو لا گالها وخنكته العبره
دنگت عليه ولزمته من متنه جان گاعد بالگاع وموگف رجلينه گتله حاس بيك ولو بيدي هسه اهد على اهلها وناخذها اذا مو برضاهم گوه ولك جعفر انت اخوي تعرف شنو اخوي بس مابيدي شي اگلك نگل الهاني ماترضه
.. دير بالك تگل الهاني الموضوع مات وانتهى اعتبرها ماتت وجني حزين عليها شكد تبقه ابالي يوم يومين اشهر سنه ميخالف اخسرها بس هاني مااخسره
جعفر ..
كل هذا وتفكيري وبالي والوجع الي بصدري واحساسي كله وفكرت وقارنت منو اصعب فراگها لو خوتنه انه وهاني شفت فراگها اسهل مو سهل بس اسهل اگول انساها ومامقتنع بالأكوله بقيت هذا اليوم بره النص الليل ردتها كلها تنام يله ارجع وكاظم بقه يمي هواي. اخر شي گتله روح لاتبقه ارد ابقه وحدي
وصاني وگلي دير بالك على روحك باجر امرك وراح
بقيت وانه متحطم جذب واحد يحس ويعرف شبيه شنوو الوجع البيه گلبي راسي كلشي يوجعني
مرت علي مرة حلم
بيضه وخصرها يوازي
گالتلي مرحب وأختفت
وأشتعل جد اعزازي
ضليت اعيد ابالي كل هالسنين جنهن حلم
معقوله هاي هيه شلون انسه كلشي بذاك اليوم
صدگ بجيت والبجي تكسر بصدري مو لأن بس
حبيبتي خسرتها بچيت وانه افكر شلون بيه وعلاقتي وي هاني شلون ارتب حياتي بعد حسيت نفسي انتهيت گلت هاي هيه تخلص اهم شي يم هاني
ماابين شي وأذا سألني على الأحبها أگله ماتت
رجعت نص الليل وگلت كلها نايمه رحت الغرفتي صعدت لگيت هاني منتضرني ابابها حرت شجاوبه شگله
..جعفر وينك ليش اتصل عليك ماتجاوب شبيك
عيونك شبيهن جعفر جاوبني منو الي مضوجك
اليوم مو عوايدك انه متانيك تفرحلي
..الله يهنيك خويه اذا الك ماافرح جاالمن افرح احجيهن وگوه يطلعن حجايلتي صوتي تعبان وعيوني صايرات دم
..جاوينها فرحتك انت احد مضوجك گلي والله احطها ابين عيونه اليغثك
..بعد اخوك لاتفكر ماكو شي مشاكل
..ولك خاف التحبها اهلها منطيها احجي جاوب والله اطلعها الك من حلگ السبع
من گال هيج بدون مااحس دمعت عيوني
ماسيطرت على دموعي نزلن
نور الشمس:
بره تكسرت بصدري تخبل هاني ولك.جعفر دموعك مااريد اشوفهن ولك گلي والله لو تصير المن اجيبها الك بس اشر
انه من شفته هيج وابالي أگول يامره التستاهل نتخارب من وراها انه بالحالتين مااستفاد حته من يتركها بعد مستحيل تصير الي اذا ع التحمل اتحمل اني افكر وهوه يهدي بيه ويگلي والله لو بتمن ناخذها الك شرايه نشتريها بس گول گتله هاني مايفيد بعد حبيبتي ماتت گلتها وطلعت عبرتي بجيت وهوه حضني
.. الله يعوضك خويه مابيدي شي والله بس الموت ماأگدرله شوكت ماتت گتله اليوم
ضل يواسيني گتله اريد ابقه وحدي باسني براسي وطلع
واني ضليت افكر گلت هاهيه انساها كلشي الا هاني
واذا على جيتها احاول مااشوفها
صراع بداخلي قوي گلبي نفسه يگلي اخوك اغله ونوبات يحنلها حسيت راسي راح ينفجر شربت حبايتين راس وضليت گاعد للصبح ماغمضتلي عين
الطريق ذاك النلتقي بي كرهته
صار الصبح وامي وابوي فرحانين ومن شافوني سألوني شبيك غمزلهم هاني واني طلعت گتلهم مااريد لاريوگ ولاجاي انه طالع
هاني گال الأبوي وابوي حيل انقهر هوه وأمي
كاظم لگيته متانيني بالباب وگلي للصبح مانمت بالي يمك گتله مابيه شي مااموت لاتخاف
بيت ابو مالك
..ولك نويصر شوف بيت عمك اليوم شنهي اخبارهم
..اي يمه رايح
راح ناصر وشاف كلشي طبيعي ولگه هاني وجعفر گاعدين سوه ووياهم كاظم
وجن ماكو شي بس مبين على جعفر متغيير وجها ذبلان
رجع خبر امه وامه تخبلت ولك شنهي ذوله كلشي مايفيد وياهم
..يمه گاعدين سوه جن كلشي ماكو معقوله مايدري جعفر
..ولك غير ابوك گال كلنه موجودين واخو اتباركله واحنه شلون مايدري
ريم ..
بهاي الأيام.انه انتهيت وفكري كله شلون اشوفه شلون اتزوج اخوو شلون اعاشره كل تفكيري هنا
زين اكيد هسه عراف بيه صرت الأخوو شصار بي
حته لو عافني اخوو هم مايخذني بعد
اسوي الگالوه اهلي احسن والله اليصبرني
ربي فدوه طلعه من گلبي ومن عقلي
واستر عليه بجاه محمد وأل بيته
ام هاني وابو هاني گالو فشله من ابو حمود بتهم قبلناها ومحد راح الهم يراد نروح نعقد ونشوف شنو طلباتهم صح الهديه أهلها يجيبوها بس هسه غير گبل ..
الناس عرفت الحلال والحرام واهم شي حقوق البنيه اتفقوو يرحون وهاني گلهم العرس يتأجل شهر الخاطر جعفر اني اروح التحق وعلى اجازتي التجي يله اتزوج وبلكي شويه حزنه يفك
بهاي الفتره جعفر اتغيير حيل وكمل امتحاناته گوه
واتخرج بس بدون واهس ويوم عن يوم يحزن اكثر گام ابوو يگله يابه امر الله وهذا قدر ربك ولاانت اول واحد ولااخر واحد فكر بنفسك
.. بويه مو بيدي لو بيدي گلبي هذا اذبه للجلاب بس مو بيدي گلبي موجوع ماتروح لامن بالي ولامن گلبي
گلهم بس يجي هاني خل يتزوج بعد
ناصر ضل يراقب من بعيد وشاف ماكو تغيير بعلاقت الأخوه بس جعفر مبيين بدون روح راح جعفر الي يجامل الي يضحك انسلبت روحه جسد بدون روح
ام علي وابو علي بالهم يم ابنهم جعفر وحيل ضاجوو عليه كل اخوانه عرفوو بحبيبته ميته بس كاظم يعرف الحقيقه
نور الشمس:
وللعلم لمن عشگتك
جان ماعندي علم
ريم ..
لو ادري هاي تاليتي ماحبيتك ولاعشگتك لاطلعت وياك ولاسرحت بعيونك لاتخيلت صدرك وساده الي
ولاعجبني طولك ولك لو ادري ماعشگتك أسولف وي روحي وأبجي شلون بيه شنو المنتضرني
هسه شلونه هوه اكيد مقهوور گلت هاي هيه بعد ماافكر ليش وشلون اتحمل كلشي وادوس على گلبي البنيه من تسمه بأسم رجال بعد مو من حقها تفكر بغيره انسه الماضي گوه وافكر برجلي بس شلونه هوه شكله شخصيته كلشي مااعرف عنه
ميت سؤال ابالي بالساعه كلساع اقرر ساعه أگول نسيته وساعه أگول مااكدر بس الصحيح اسوي وگلبي ادوس عليه وأهم شي الشرف عدنه انوب كلشي ولا الأخ انسه جعفر وانسه كل ذيج ايامه وأفكر برجلي وبس ..
جعفر ..
بهاي الفتره قنعت روحي صدگ ماتت صرت مثل اليجذبله جذبه ويصدگها گلبي مكسور وجسمي نحلان ومالي واهس الكلشي بس الشي الحلوو
اكتشفت صدگ ماكو عندي اغلى من هاني بأصعب مواقفي واني اقارن بينها وبينه اشوف ماكو نسبه
هاني اخوي واغلى من روحي جبت سنيني كلها
أگله لو خيروني بينك وبين روحي أنطي رگبتي
وأني مغمض .
حسيت صدگ تحقق الگلته وانطيت الهاني روحي ومرتاح من ناحيته نفس اللهفه من جنت ملهوف عليه ماتغيرت نفسيتي من جانبه
امي وابوي ماتركوني مرات اكوو مواقف تحسسك بقيمتك اكثر تحس اليحبونك مابيدهم شي بس گلوبهم تتوجع وياك .
شويه شويه گمت اتقبل الصار او احاول ماأهتم بس متخوف من نفسي ابقه هيج محافض على اعصابي
لو من تجي تتغير كل تفكيري هنا
بهاي الفتره ابوي معتمد عليه هاني بالدوام ولازم اني احضر للعرس حته اول يومين من جيته يتزوج
اني گلبي موته رجعت اسوي نفسي مامهتم وكل هذا احساسي وكل الأني بي من افكر بهاني وعرسه افرح افرح من اجهز غرفته بس من اذكرها گلبي يغييم مو بيدي بالعكس گمت اتفاجأ بنفسي اشوف نفسي صبور وماجان ابالي هيج انه
يمكن هاي الأشهر كبرتني سنين حسيت صدگ المواقف الي تأذيك تنطيك قوه وصبر وتغيير من نفسيتك للأحسن هذا كله واني متخوف من ليلة العرس .
جهزت الغرفه وچنت اتواصل وي هاني ع التليفون وأدز الصور الهاني وهوه يختار جهزت كلشي
وحضرنه كلشي
أجيت وجايب الغرفه واني بالسياره وعيني صارت على بابهم من شفت بابهم راد ينفتح رأسا درت وجهي بذيج اللحضه عرفت انه اتصرف صح همزين ماخليت نفسي اشوفها يمكن هيه ويمكن غيرها بس
ماطول گمت اتحكم بنفسي كلش زين
وصلت اهلي واتلگونه بالباب والهلاهل والفرحه وامي وابوي يگلولي يوم الألك وفرحانين
واني مبين مكسور مو بيدي ماأكدر امحي كلشي بس المهم علاقتي اني وهاني كل تفكيري صار هنا
راحوو اهلي وأتفقوو على كلشي
وقررو العقد بيوم الحنه يصير والعرس ثاني يوم
من جابو الموضوع وحجو بي رجعت النقطة الصفر صراع بداخلي مو طبيعي كل هاي الفتره الگضيتها اقنع بروحي بلحضة السمعت العقد وامي تگل الأبوي العروس گمر وجها سمح تخبل ومبينه فرحانه وجنها تسعده جن اسهام وصارن بگلبي مو سوالف
رجعت احن الكلشي يمكن جنت اوهم نفسي
حنيت الشوفتها كرهت روحي جي مانسيتها
رحت الغرفتي وخليت راسي بين رجليني واديني
على راسي ..
وگمت اردد
كضيتك بنص ألدرب
گتلك يغيروك الغرب
وشچم نصيحه انطيتلك
حنيتلك
گطعوو الماي اعله الورد
من جابوو اعلوم العقد
هدت المفرد من اهد
وحدي انه من هديتلك
حنيتلك
وياك ماعندي دغش
ماتدري فوگ من اثنعش
بچي اليتامه بچيتلك
حنيتلك
شسوي الگلبي اريد انساها اكرها شلون شسوي
بقيت الحد اذان الفجر سمعت الأذان أذن
گمت توضيت وصليت گتله يارب متوجهلك بنيه صافيه تنسيني وتشغلني بغيرها اريد انشغل بأي شي
ربي مالي غيرك مااريد اكره نفسي مااريد اطيح بالحرام ربي أغنيني بحلالك عن حرامك
صليت ودعيت حسيت نفسي ارتاحيت شويه
ونمت ..
ريم ..
بهاي الفتره ماراح عن بالي بس ابد ماانطي نفسي مجال اعتبرته صفحه وانطوت صح احن اله بس
مو مثل گبل گمت افكر بالجاي شفت اهلي فرحانين وشويه مكانتهم صارت احسن وامي طول عمري ماشايفتها هيج فرحانه ابوي مكييف جي ناسب الشيخ گلت هاي هيه مااصير انانيه اليردونه اسوي
اخوي اجه من البصره ومتخرج وهم حيل فرحان الي ومكييف جي راح اخذ اخوو صديقه وانه بگلبي گلت لو تدري جنت عبالي اصير مرته
بديت اتقبل الصار بس هم اكوو بداخلي مشاعر اله
واجه وكت الصدگ ولازم باجر الحنه والعقد
اني صح مقتنعه بس مو فرحانه
اليوم الي صار بي الحنه والعقد گلبي حيل معصور وصدگ حسيت نفسي مجبوره
هاني .
أجيت وحيل فرحان سمعت من امي العروس حلوه
اني لمحتها مره صدگ عجبتني بس مااعرف ملامحها شنوو شفتها بدون تركيز
وحيل اتشوقت اشوفها لگيت جعفر مجهز كلشي
كل التفاصيل مجهزها صح احنه بقريه بس بيتنه قصر
:
كلشي بي وشبابنه اكثرهم خريجين يعني بالخدمات متساوين وي اهل المدينه مو كلشي عدنه بس حياتنه ماشيه عيشتنه احلى بيوتنه گيعانه مرتاحين كلشي عدنه انترنت ماي كهرباء مولدات واحنه الله مفضل علينه وعدنه خير من الله جعفر ذواق جايبلي كلشي جديد الغرفه تركيه لون ابيض منسق وياها الأثاث تفاجأت بالتحضيرات بس بالي يمه بعده ضايج ويوم بعد يوم جاي يذبل تشكرت منه وگتله الله يقدرني وأجازيك گلي فرحتك بالنسبه الي كلش كافيه نمت واني حيل فرحان ومنتضر اشوف مرتي
جعفر ..
افكر هاي الأيام شيخلصها شلون تخلص كلشي بيه يوجعني.
صار وكت الحنه المعروف عدنه ايام الأعراس بالجنوب والريف هاي ايام خاصه الناس والگرايب تلتم گبل يوم والفرح والهلاهل الزلم تهوس وترمي
والنسوان هم يجتمعن ابيت ويرحن يحنن العروس
المهم هاي التفاصيل كلها عشتها وكلها الم بگلبي بس ابد مابينت باعتباري اخوو العريس الوحيد لازم انه ابدي الفرح لازم اني أول من يرمي وراي الشباب يله يبدون بهاي اني دست على گلبي دوس ذبحنه الذبايح وصار وكت الغده عزبنه للضيوف وخلصنه وانه كل ماافوت يم امي وعماتي والنسوان الموجودات يهلهلن ويهوسن يوم الك واهلهلك حبيت راس امي وعماتي وطلعت مابينت اي شي ولا ابالي شي حته من التفكير تعبت
رحت غسلت دعيت ربي ينطيني القوه وطلعت
بدلت وطلعت

أخذت سلاحي وصار وكت الحفل وكلها التمت طبيت بنص الميدان بديت ارمي

يمكن ضيمي البگلبي كله طلعته بالرمي رميت لمن انترست الگاع بوش .
الحد مااجاني كاظم گلي ماقصرت ارتاح جعفر كافي
كتله عوفني مرتاح هيج ليضل بالك شويه وراحوو يعقدون انه ردت الهي روحي بالشغل صاحني هاني گلي تعال وياي بعد ماگدرت اگله مااگدر رحت
سمعت الشيخ يعقد واني بالي مشوش وگوه مغطي على نفسي من سمعت صوتها وانطت القبول اختنگت باركت الهاني وگتله اتصلو عليه انه طالع
رحت ادخن .
شويه وطلعوو ورجعنه للبيت اريد الهوسه تخلص حته ارتاح ومرات اريدهم يبقون حته محد ينتبهلي
اني ضايج
گاعد بره ادخن اجتني امي ام علاوي
..جعفوري يمه شبيك
..هلا يمه مابيه
..شلون مابيك جاليش هيج مالك خلگ يايمه
..يمه تعبان فدوه العمرج انه لاتهتمين
..الله يريحك بعد أمك ماقصرت وي اخوك هل خلص العرس يستاهل التعب هاني
..سويت الواجب يمه
دنگت عليه باستني كمتلها وشبكتها حسيت محتاج حضنها وحسيتها حست بيه صدگ حنان الأم بالفطره هيه گلبها حسها وحست بيه مو طبيعي مااعرف بوكتها اول مره احس بحضنها واحسها أمي صدگ
گتلها ليضل بالج ارتاحي انه زين
رجعت گعدت يم ابوي وهاني وعمامي والولد وكاظم ابد ماتركني نعم الأخ والصديق
گلي تريد نطلع ترتاح بغير مكان
.. لا مرتاح هيج
صار وكت النوم واني افكر باجر شلون گلت هاي هيه
أصبر واشوف فكرت وره العرس اسافر ماابقه اسافر فتره لو التركيا لو ايران بس ماابقه ماأكدر اتحمل اكثر من هيج
يتبع