#لو_انك_لم_تعد
العاشر
بقلمي نوره
واني بالسياره اتصلت بي دك ورد عليه كال ها ببرود
غمضت عيوني وصكيت على اسناني
كتله اريد اشوفك كرم وهسه ..
ههه اوك تعاي
رايحه البيتكم اني هسه بالطريق
ماشي اني رايح للبيت روحي هناك انتظريني
سديته طول الطريق واني متحمسه اشوفه احسس اكرها كلش واريد اموته قلبي مليان منه غيظ وكره يعني موهيج ينتقم مني
موبهالطريقه الدنيئه
على طول المسافه واني احضر بالكلام الي راح اكوله اله وقلبي نار ودموعي شرار وتنزل من عيني.. هيج اني صفيت بلا شرف بسبب منو ابن خالي ياريت واحد غريب يمكن اعذره
لا السبب مني اني تصرفت بغباء ونطيت ثقه لروان راحت حجت اله ..المفروض مو كل شي ينحجي
ليش هي محجتلي انه هي تحبه وعدهم علاقه سابقه لان اكو اشياء المفروض تبقى سر
اما اني حجيت الاول والتالي وصفيت بالرجلين كلشي خسرت واهم شي شرفي
بعد طول صراع وحرب بداخلي مره الومه مره الوم نفسي وصلت لبيت خالي دكيت الباب انتظرت شويه طلعت الي شهد شافتني انصدمت بيه شافت حالتي عيوني حمر ومدمعه اكيد تنصدم كالت بتلعثم غرور هله والله تفضلي
مارديت عليها فتت للحديقه سدت الباب واجتني
هاا غرور شونج شبيج عيونج حمره مبين باجيه
هي كلمه وحده شهد .. بيوم الي نمت عدكم قبل سنتين شنو صار الي هاا
هي رجفت ومعرفت تجاوب كالت يااا سنتين شتذكر دكوليلي شتريكتي مااتذكر
جذابه كل شي تتذكرين انت صورتيني عن بعد موو
هاا انطقي احجي شسوالي كرم ها شنو اخذ مني
ماادري هو اخذج الفوك وطب نص ساعه وطلع گلي تعالي صورينه الحجي هذا الي صار واني ماعندي صلاحيه احجي بمكانه هو خلي يفهمج
سحبتها من ايدها .. ليش ولج موعندج خوات مو انت هم عندج شرف وعرض متفكرين بيوم تخسرين شرفج مثل مااني خسرته ظلم مفكرتي بيوم يصيرلج مثلي ولج فضحني كدام خطيبي كدام الغريب وهو ابن خالي احجي واهز بايدها
لشويه واجه كرم يسوق برعونه وفات بسيارته للكراج طلع منها واجه يمشي سريع باتجاهنا شافته شهد طبت جوه
اجه يمي واني
ايديه على خصره وكال نعممم
ليش هيج كرم ليش هذا و انت ابن خالي وهيج سويت بيه .. تفضحني كدام الغريب
ليش غريب مو هو زوجج وعلى سنة الله ورسوله
يعني عادي يشوفج بهيج وضع تره كلش عادي
يعني هي رجوله منك تسوي بيه هيج ها تخدرني وتنومني وتصورني
لا رجوله وي الساقطات امثالج خووش
اني مو ساقطه انت عديم الغيره والشرف والضمير
كلهن هذن يصيرن جوه النعال من اجي اتعامل وي وحده ساقطه مثلج باعتلي نفسها باسم الحب حتى تنتقم حالج من حال بنت خالتج روان انتن وجهان لعمله وحده اثنينجن ساقطات ذيج خانتني وي صديقي وانفضحت وانت تستاهلين الصارلج
وتجي تسوي بيه هيجي زين ليش ماحذرتني بصوره واضحه ليش حاجيتني بالغاز وخليتني ماافهم عليك حتى اخذ احتياطاتي .. واسوي التريده قبل لاتخلي الغريب يرخصني وحتى يحاول يغتصبني لان شافني رخيصه وياك
طول ميحجي ويايه ميباوع بعيوني كانه ندمان مااعرف بالضبط بس من كتله اياد راد يعتدي عليه صار وجهه دم من الغضب وحتى عروق رقبته بينت وصم ايده قوي
گلي انت تستاهلين الصارلج ردتج تعوفي باي شكل بس ماعفتي ردتج تثبتيلي حبج مو بالورق لا بالواقع
بس انت اثبتيلي العكس . وانتقمتي مني وحبيت ارجع انتقامج الج لان مو بس انت تنتقمين
وهم حافظت على وعدي من كتلج اندمج وهسه متحسين بالندم
كولي كرم كولي شسويتلي اخذت عذريتي لو بس صور زين طمني شسويت بيه انت
ليش الصور ماوضحتلج شي ها ؟؟هيج وضع شنو من الممكن يصير هاا
يعني افهم من كلامك اخذتني هاا وظليت اضرب على وجهي وبعدين على صدره لزمني من ايديه باوع لعيوني ودار نضره ودفعني
كلي يلا مااعندي بعد وقت اضيعه وياج
شهكت بجي گتله بعد شحجي خليهه وياك للزمن كما تدين تدان يجي يوم وتتزوج وهم تصير بزوجتك او بنتك انت ظلمتني وغدرت بيه وحوبتي تلاحكك طول عمرك عفته ومشيت وصلت للباب انداريت اباوعله اشوفه يضرب بايده على الشجره الي بالحديقه
فتحت الباب وطلعت .. تايهه واحس بغربه
غربة روحي .. امشي بالشارع واجر بنفسي جر مثل الزومبي
احس اني الوحدي بهالدنيا ضايعه وكانه الارض خاليه الا مني
احساس واحد يدري بموته باجر ومحتار شيسوي
وين اروح هسه
خايفه اروح لاهلي خاف اياد گللهم تعبت امشي
كعدت على جانب الطريق ومية فكره ابالي شسوي انهزم انتحر لو وين اروح زين اني شنو مصيري
ارجع اتوسل باياد يتزوجني ويستر عليه لو ارجع الكرم
ثواني ودك التليفون .. توقعته كرم لان شفته مثل المتندم
فتحت الجنطه طلعت الفون شفته اياد
جاوبت بلهفه الووو اياد
غرور باعي اذا عليه اني مراح اكول لاهلج على شي
كل الي اكدر اسوي الج هو اسكت ومااحجي
اما ابن خالج بعد مااعرف اذا راح يسترج بس مااكدر اتزوجج
اياد كرم خدرني وسوه بيه هيج والله والله
مااعرف غرور بس بعد ماارغبلج اني شوفتي الج بهالوضع صعبه عليه
مااتحملها ابد مراح اكدر اتقبلج كزوجه وحتى اذا تزوجتج استر عليج مااكدر اسعدج راح تنظلمين
اني متنازل عن كل شي الج الذهب والمهر وكل شي
گتله متقصر اياد الله يجازيك كل خير
وگفتك هي ماانساهه حقك تعوفني بس
والله مظلومه وبجيت
سدا هو .. كعدت ابجي وهي خسرته لاياد
من الطبيعي ان اخسره محد يتحمل
يشوف زوجته بهاللحال ويتقبلها ابد
كمت على رجليه امشي واجر باذيال الخيبه
والخسران خسرت كل شي واولهم شرفي
وبعدها اياد ويمكن مراح الگه احد مثله
صرت امشي بدرب المجهول ومااعرف
شحيصير الي اكثر .. وصلت للبيت
فتحت الباب دخلت منهاره احس الدنيا تفتر
بيه لزمت الحايط اريد اتنفس ماكو الحراره
صعدت براسي .. تلگتني ريم
عبالها عادي داافوت هيج ولازمه الحايط
گالت ها ولج جايه وكت
باوعتلها وشمرت نفسي عليها
شكو شبيج رورو حياتي
ولج اريد اريد اموت مليت من حياتي
ولج مليت ..
من ضعفي وهواني وكعت بالكاع وهي
حاضنتني وكعنا سوه ..
نمت بحضنها وابجي ابجي ابجي
احس ترست حضنها دموع ومنا هي حساسه
وبدها بس تبجي
جتي ماما مصدومه خيرها شبيها ولج يمه
بنيتي ولجن شكو شصاير
وجتي رفل واللتمو عليه
وميدرون شبيه وشصاير الي وليش هيج اني
ماما جابت كلاص مي كالت شربي
حلكي يابس بس مااريد اشرب مااريد
درت وجهي بالاتجاه الثاني
غسلتلي وجهي واني منهاره وبين المغمي عليه
وبين الصاحيه بس احس
ريم ورفل اخذني ودخلني للغرفه ومددني على السرير
اني متمدده وراسي على المخده وريم نزعتني
حذائي وامي كعدت بصفي وتسالني شبيج يمه
بس احجي عفيه كولي شبيج
صرخت بوجهه مثل الملسوعه وج يمه اياد عافني
وج يمه ليش جبتيني الهاي الدنيه
اني ليش مامتت ويا ابويه ليش بالله ليش
يمه عين وماصلت على النبي يمه اسم الله عليج
ليش تكولين هيج الي خلق اياد ماخلق غيره
رفل كالت ياا حرامات
ريم كلتلها شنو حرامات شناقصها هي يروح اياد
يجون عشره بداله
اي بس تره هو خوش ولد
وهي هم خوش بنيه الف من يتمناهه
اني اسمع الهن والنار زادت تسعر بروحي
صرت احاجي ريم بدون كلام فقط بقلبي
لا ريم لا اني حاجه مستعمله هسه اني تدمرت
استمريت بهالحاله ومااعرف شوكت غفيت ونمت
بس حسيت رضا طب للغرفه وباسني على راسي
وطلع .. كعدت انقهرت عليه سوده عليه خويه
اني عار عليك هسه
مرت الايام على هالشاكله قلة اكل قلة نوم والراحه
معدومه .. وكل شي انتهى بيني وبين اياد وانفصلنا
تركت الدوام بالكليه .. وماعدت اداوم ..بالليل سهر
بالنهار كاعده على جربايتي .. ومكرفصه روحي وصافنه
امي تمرضت عليه وهاجت عليها الامراض المزمنه
من ضغط وسكر .. يحجون ويايه مااحجي كل ساكته
وبس الله اليعلم .. بداخلي شنو افكر باللحظه الجايه
سحيصير يمكن كرم ينشر .. الصور واخزي اهلي قبل
نفسي صرت عايشه بوهم .. احس الدنيا القبر
واني الميت كثير .. الذنوب ودااتعذب
ريم شكد تحاول تضحكني تسليني ماكو غابت الابتسامه والضحكه انمحت وصارت الدموع والوجه الكئيب اسياد الموقف
رضا فديته يجي من الشغل تعبان بملابس الشغل يطب عليه يبوسني على راسي وينطيني ككاو الي احبه .. وبعد نمنمات حالي حال ابنه احمد
هم كل ظنهم انه اني مستائه وحزينه على اياد
وميعرفون شنو البداخلي ابد
بس اني هالشي متعبني هم يهتمون بيه ويشفقون عليه وميدرون اني شنو وشصاير الي
جنت كاعده كالعاده على السرير وحدي ومكرفصه روحي وكارهه كل شي حتى التليفون ماعدت الزمه
ريم يم امي بالمطبخ
طب عليه رضا .. جايبلي حاجات كالعاده وكعد يحجي ويايه
شونها اختي العنونه الي ربيتها على ايدي
ابتسمت اله قهرني جاي تعبان وبوجهه يجي يمي
فديته رضا مثل ابويه امي ولدته بالاول وبعدها
مصار عدها بقت سنوات على هالحال الا ان صارت
ريم بعد 7سنوات
گال .. شوكت ترجعين للدوام
هزيت راسي بمعنى لا ..
ليش خيتي .. يعني عادي تصير باي وحده
الي خلق اياد ماخلق غيره
خليت راسي على ركبي ومجاوبته
رفع راسي بايده وكال شنو رايج نروح الكربلاء
ترتاحين هناك مو ابتسمت ونزلن دموعي
هزيت راسي اي واني امسح الدموع
بعدها بيومين عدينه العده وطلعنا الكربلا
اني وامي ورضا وريم ورفل وحمودي
طول الطريق يسولفون وياكلون واني
بس ساكته واباوع من الجامه ..
اباوع وصلنا الكربلا ودخلنا لمقام الامام
الحسين واخوه العباس ع اه ياكربلاء ياجنة الراحه احس
ضيعت همومي بيها ونسيت كلشي
تنفست عبير الاطمئنان بهي الارض المقدسه
الازدحام قاتل جان وناس جايه من كل مكان
بالعالم .. يادوب كدرنه نزور الشباك وكعدنا ابين الحرمين وجان وقت الصبح اشترينا كيمر وعسل
وجاي وصمون وكعدنا ناكل شكد حلو طعمه هناك احس يختلف واخيرا حسيت رجعتلي روحي شويه وارتاحيت ولو قليل
رجعنا بعدها
والي عرفته عن كرم انه سافر لروسيا يكمل دراسه
من صارت علاقتي بكرم هو جان مرحله اخيره
بكلية الهندسه .. وروان تكول سافر للسويد
ومتزوج وحده سويديه علمود الاقامه
ومااعرف بعد الصدك وين الجذب وين
كدرت ارجع الحياتي شويه شويه
وبفد يوم امي طالعه للكوت هي ورفل
وبقينه اني وريم بالبيت اني ماتحملت اضم كل شي بروحي .. فتحت قلبي لريم وكعدنا نحجي
مكافي رورو كافي ياعمري حزن ارجعي داومي
وذبي كل شي وراج ميصير هيج تسوين بنفسج
الله يرزقج بشخص احسن من اياد
تتوقعين اني كاتله نفسي على اياد
هيج تظنين طزز بي لو يحبني من صدك
مايعوفني واني مظلومه جان صدگني
ريم كامت على حيلها وكالت
شبيج مظلومه هاا ليش شصار
حجيت الها على كرم والي سواه بيه انصدمت
موكتلج عوفي ليش استمريتي ويا
باعي ريم اني حجيتلج مو لحتى تلوميني
اسمعي وانت ساكته لاتخليني اندم لان حجيت الج
على كيفج حبيبتي. زين انت ماحسيتي بشي
من كعدتي ماشفتي ملابسج بيها شي عندج الم
اعراض ممعقوله بهالسهوله ياخذها وانت متحسين
اني هم بحثت عن الموضوع موشرط يصيرلي اي
شي اذا هو مخدرني والله يعلم شحطلي حتى مااحس
ماادري حبي شكد حقير هالكرم
اخو منو .. اني من كلت هيج هي ضاجت
لسه متقبل الحجي على زيد
زين غرور امشي اوديج للدكتوره تفحصج
وتجيكج شكلتي
ليش اروح ؟قابل افكر اتزوج حتى يجي
استاذ كرم ويفضحني مره ثانيه لا عيني لا مااريد
زين ليش عفتي غرور هاا ليش مااستمريتي ويا
ماردت اكوللها الخاطرج كتلها لان خانيي
بعدها مرت شهرين بالضبط .. كدرت اتغلب على الموضوع وكعدت بالبييت ومارجعت للكليه
بفد مره طلعنا اني وريم للسوك دنتمشى صدفه
شفنا زيد كدامنه .. ..
هاا شونكم زينين وانت ردت ريم بارتباك
هي شدتسوون هنا
اني رديت عليه دندور شغل لريم تعرف صار سنه
متخرجه ولسه ممتعينه
ريم تكرصني من ايدي
زيد .. اهاا وتدورون بالسوك شنو ممكن تشتغل
بالسوك
غرور .. اي شي المهم تشتغل
زيد ...اوك. زين انطيني رقمج اني اشوفلج
شغله يمي تعرفين اني محمامي ومكتبي
عباره عن عدة محامين فيمكن نحتاجج
ريم .. اهاا ماشي عندج قلم غرور
زيد .. هاج تليفوني سجلي
غرور .. همستلها بينما هي دتسجل الرقم
فشلتينه وين اكو يسجلون الرقم بورقه
كبل سجلي بالتليفون
باوعتلي وخزرتني
اثنينهم مرتبكين من يحجون ويه بعض
وكانهم معجبين ببعض او يحبون بعض
ع الجديد رغم هم حب سنين بينهم وافترقوا
بسبب تافه ميستاهل يكون سبب فراق
بين اثنين ربطهم حب جبير
رجعنا للبيت.
سألتني ريم ليش جذبتي عليه وكلتيله ندور شغل
هيج ميصير اكذب
اووف منج
وخلص اليوم عادي
بعدها بيومين اجتي ريم فرحانه
هاا شكو ؟!اشوفج فرحانه ومنوره
ولج رورو زيد تواصل ويايه
اي ؟؟
شافلي شغله ويا
عليج الله جذذذذب ههههه اي ياعيني
طكيتي بعد شتردين على الخير حياتي تستاهلين
ياروحي انت ممصدكه
زين شنو كلج
كلي انطي خبر لاهلج حتى اني هم اجي عليج واوديج ..
صدك حياتي ريوم اتمنالج كل التوفيق
بس اني بين الخايفه والفرحانه
ليش بالله ؟
لان خايفه لااضعف اذا اقتربت منه ومااعرف اتصرف
وفرحانه لان راح اشتغل
ويا زيد بالذات مو ؟
اي ؟
اهاا المهم خلي ثقتج بنفسج قويه ولتضعيفين
وتعاملي ويا عادي كزميل او كذا والباقي كلها يم الله خليها اهم شي تشتغلين وتثبتين نفسج
حرامات سنين الدراسه الي درستيها
والنعم بالله ... حبيبتي رورو دوم تشجعيني
شعندي غير اختي عشقي وروحي
ومن صدك مرت كم يوم وداومت ريم وي زيد
جانت تروح فرحانه وتجي فرحانه واني افرح الفرحها ومرت الايام
وهي تداوم ويا واسئلها اني هاا ريوم شونه الشغل
زين .. ماشي حاله
زيد شلونه ؟باوعتلي
زين .. زيد مابي شي زين
اشوفج فرحانه موو
ههه الي تردين توصلين اله شنو
راح اكولها الج طك بطك شونها المشاعر
والاحساسيس وي زيد بالشغل
هههه. اخخ منج رويرو زينه اليوم كعد يحجيلي
عن شهد
شبيها
يكول صارلها شهر يم اهلها
وهسه رافعه عليه دعوه طلاق يكول انصدمت بيها
اي مدام هيج هي فرصتج تتقربين منه
غرور شبيج اني ماريد اهدم بيته كتله
رجعها خطيه متستاهل تنفصلون
امداج يالغمه ولج تولي شهد اصلا
هم ملايكين البعض
وبعدين شكد اكرها شهد اممم دممم سنوني
ليش ؟؟
مو هي الي صورتني وي كرم تستاهل
يصير بيها هيج عفيه ريم ريحي قلبي
واتقربي من زيد واخذي ثار اخيتج
اصلا بدون مدداتقرب منه هو ديتقرب
صدك شوون بالله ....
من اقدمله فنجان القهوه يتعمد يتلمس
اصابعي
اييي وبعدد
ومن يشوفني مينزل عينه مني
والبارحه جنت دااحجي وي غير محامي
حسيته غار واجه وكف بصفي وبعدين
ظل ينبهني صوتج ليعلى لتضحكين هواي
يعني ديضايقني بصراحه
غرور ...هههه مضايقات رومانسيه
ريم ...عابتلج متصير الج جاره
مرت الايام .. واني كله بالبيت مرات اصفن اكول ليش هيج سوه كرم مو كال يحبني والي يحب مايأذي حبيبه بس هو سوه العكس حييل اذاني ومرت الايام ماكو اي اتصال بينا ابد
اما ريم تداوم
ويا زيد .. ورجعت اتصالاتهم هي مرات تنكر
متريد تعترف بالامر الواقع بس هي مو بكيفها
بكيف قلبها الي لسه يحبه
فد يوم جتي وجهه مخربط فرحانه على ضايجه وترجف ماادري شبيها
كتلها خيرج شكو
كالت زيد يريد يجي يخطبني .. والليله ويكول مستعجل ..
يتبع ..