يا محلا ذيج ايامنا الماترد
همس القوارير
البارت ١٠
ضلينا اسبوع تقريبا كل واحد منا بجهه بس ما بطل بس يتوسل بيه واني اصده وما اخليه يتقربلي لحد ما فد يوم اني نايمه بليل واجه هو على كيف وفتح الباب واجه فوگي عالجربايه
جوري : هيثم اطلع بره والله الم عليك العالم بهليل
بده يبوس بيه واني ادفر بيه
هيثم : ولج كافي انتي ما تملين شنو گلبج حجاره موتيني
جوري : والله راح اصرخ عوفني احسلك
هيثم : والله غلطان والله ما حسيت بالنعمه الي عندي ولج احبج
وخله ايدي على حلگي حتى لا اصرخ واني همين استسلمت اله گولت كافي ليش اكذب على نفسي اني همين احبه وما اعيش من غيره وما اكدر اسلمه لوحده على طبق من ذهب بعدها رجعت حياتنا طبيعيه كأي زوجين وتراضينا بس الشك والغيره ضلت بيه ومره بعيد الحب دخل سبح وزين لحيته وبدل وراد يطلع وصل للباب ناسي موبايله ورجع واني الفار بده يلعب عندي رحت للسياره واشوف علبتين هديه خالهم بالسياره مالته واني تخبلت رحت وتعاركت وياه
جوري : هيثم انت وين رايح
هيثم : طالع ويه صديقي
جوري : وصديقك هذا جايبله هديه عيد الحب لك انت ما تبطل انه مرتك وام جهالك ما ذكرتني بشي ولا جبتلي هديه وماخذ هديه للعبده مالتك
هيثم : منو گالج هذه هديه الي هو صديقي وصاني اجيب هديه لزوجته وجبتله كفرت خو ما كفرت خلاص حتى طلعه بعد ما اطلع
جوري: ومثل ما اشتريت هديه لزوجت صديقك ما تعرف تجيبلي وياك ولك انت افلامك عليه
عافني ودخل للغرفه غير ملابسه وكعد شويه ودك موبايله اسمعه يحجي
هيثم : اي وهسه وين انتم خلاص جايكم
جوري : وين ان شاءالله
هيثم : منجمعين الشباب بعيد الحب وراح اروح يمهم
غير ملابسه وطلع
واني ضليت اكل بروحي ومليت وبجيت واندعيت من كل قلبي يرجعه لبيته ولجهاله لان ما اكدر اعيش من غيره ورى ساعتين تقريبا رجع واشوفه وجهه اصفر وما اعرف شبيه يباوعلي وين ما امشي استغربت منه ياا هذا شبيه اليوم ما حجيت وياه تعبت من العرك ومالي خلك
هيثم : جوري تدرين بيه احبج
جوري : ما اتصور الي يحب انسان يأذيه او يخليه يبجي
هيثم : جوري والله احبج بس ما اعرف شنو الي يصير بيه من اشوفج ما اشتهيج ومن اطلع من البيت اشتاقلج وارجع للبيت علمودج وما اشتهي اباع لوجهج وارجع اطلع
جوري : يااا عزه شنو هذا اخاف انت مسحور لو بيك ضر او شي
هيثم : والله ما اعرف والبارحه اجيت يمج تمنيت احضنج وابوسج واحس مو انتي ولا شكلج اشوفج محلوه وابتعدت منج
جوري : يمه هيثم خوفتتي كولشي ولا السحر خلينا نشوف واحد يكشفلنا او يسويلنا جاره
وبنفس اللحضه خابر على اخوه لان يعرف سيد يعرف هالشغلات وقررنا ناخذ عنده خيره
تصدكون بنات من اخذله خيره طلع زوجي مسحور ونفسها صاحبته الله لا يوفقها مسويتله سحر لان الي يكشف انطانا مواصفاتها وانطانا حتى اسمها وقررنا نسوي جلسه بيتنا لفك السحر لان السحر بالبيت من جابها الله لا يوفقها وفعلا اتفقنا يوم الخميس يجينا السيد بس گال تكلف تقريبا مليون بصراحه كان كولش غالي بس ما اهتميت عندي زوجي اغلى من كنوز الدنيا اهم شي يرجعلي مثل ما كان خلاص اتفقنا على موعد الجلسه