أكابر و اقول فراقه عادي و انا في داخلي اصرخ تكفون جيبوه

٧

الــمــسـتــشــفــى
بـــعــد 3 ســاعــات

بدت قمر تفتح عيونها ع خفيف بلعت ريقها وبهمس: ماء(حست بيد رفعت رقبتها وشربتها ماء ورجعت راسها ع السرير) كانت لسى مغمضه عيونها تحس بارهاق وتعب
كان يتاملها وهو ماسك يدها بقوة "" اسف مااهتميت فيك وانتي كنتي محتاجه لي تركتك وانا ادري انك كنتي متضايقه من عبدالعزيز ااه قمر سامحيني مفروض سالتك واهتميت فيك اكثر""
تمنى انه يقدر يقول هذا الكلام بوجهها بس لما حس انها بدت تفتح عيونها ثاني مره ترك يدها بسرعه
قمر وهي تناظر فهد وبهمس: فهد
ناظرها ببرود عكس النار اللي بداخله: الحمدلله ع سلامتك
قمر وهي تتعدل: الله يسلمك (صارت تناظر الغرفه اللي هي فيها) شلون جيت هنا ؟
فهد وكانه كان حابس كلام بنفسه انطلق بقوه:انتي ليش كذا غبيه هاه إذا انتي مريضه قولي لي  اوديك اعطيك ابره مو احسن من انك تـ (كان بيقول تخوفيني بس سحبها وقال) تشغليني عن اشغالي هاه شوفي سجلوني غياب اليوم بسبتك
ناظرته بصدمه ولفت وجهها للنافذه الواسعه:ماانت مضطر تقعد تقدر تروح لشغلك
ناظرها بقهر فتح فمه بيتكلم بس دخل مشاري وهو ماسك بيده باقه ورد حطها وهو مبتسم:الحمدلله ع سلامتك
ناظرت قمر الورد وابتسمت ناظرت فهد بقهر وكانها تقول له تعلم : الله يسلمك
انصدم فهد من حركتها وانقهر ولف وجهه
تقدم مشاري وكان يبي يبوس راس فارس
نقز فهد بسرعه وصار بينهم : هههه
ناظره مشاري باستغراب:وشفيك بعد خلني اسلم عليه
فهد بارتباك: ههه ههه (ولف لقمر) قلت تبي ماء صح (سحب علبه الماء ومسك وجه قمر بقوه وصار يشربها بقوه)
قمر اللي توسعت عيونها وصارت تكح وهي تدف فهد عنها وتمسح فمها وهي تناظر له باستغراب
قعد مشاري وهو مبتسم:خوفتنا عليك يا شيخ قسم قلبي وقف
ابتسمت قمر وناظرت فهد بنظره ولفت لمشاري : اعذرني والله بس تعبت شوي
مشاري: ايه يقول رامي انه تعب وارهاق .
قمر وهي تلف لفهد :فهد ماتقول عندك شغل تقدر تروح مشاري موجود
ناظرها فهد بقهر ووقف:ايه بروح (طلع وهو معصب)

بـــيـــت اهــل ابــو وســن
جـــنـاح وســن والجـوري ..

وسن وهي لامه رجولها لصدرها ع السرير وساكته
الجوري وهي تقعد جنب وسن وحاطه يدينها ع بطنها:وسن
ناظرتها وسن دون ماتقول أي شي
الجوري: بموت من الجوع من امس ماكلت شي
تنهدت وسن ورجعت ظهرها ع السرير ""ياليتني احس بالجوع ياالجوري اااه نفسي منسده عن كل شي"" :  طيب انزلي جيبي لك اكل
الجوري بسرعه وخوف:لا ما ابي اروح للمطبخ
ناظرت وسن اختها وبلعت ريقها هي عاذره خوف اختها من المطبخ حتى هي صارت تكره تشوف أي مطبخ (رفعت راسها وصارت تناظر الغرفه حتى هذي الغرفه تكرها وتكره هذا البيت وكل اللي فيه لانهم سبب باللي صار لها ولاختها) : طيب دقي من الغرفه ع الخدامه تجيب لك
هزت راسها الجوري وراحت دقايق و رجعت وقعدت وهي ساكته
ناظرت وسن ملامح اختها باستغراب: وشفيك؟
رفعت راسها الجوري وبهمس: ابي امي
وسن:ليش وش صار؟
الجوري وهي تتداري دمعه تنزل ع خدها: ردت علي جدتي وهاوشتني قالت اذا تبين اكل انتي والا اختك انزلوا وكلوا مع النااس
انقهرت وسن حست بشعور غريب وكانها ودها تفجر كل البيت واللي فيه وقفت ومسكت وجه اختها بيدينها وهي تتنقل بعيونها ع ملامح اختها وبنبره امر:لاتصيحين فاهمة خلاص تعبنا من الدموع تعبنا من الحزن وهم مبسوطين لاتخلين دموعك تنزل عشانها لاتخلينهم يحبطونك زي مااحبطوني (مسكت معصم اختها بقوه و وقفتها وبقوة غريبه على وسن) امشي وبنشوف كلامي والا كلام هالعجوز بيمشي
هزت راسها الجوري ومشت مع اختها ..

الــصــالـــه
((بيت اهل ابوسن مايختلف كثير عن قصر صقر الراسي لانهم بنفس المكانه الاجتماعيه))

الجده (ام ابو وسن) باستهزاء: نزلتن يابنات الدلع
لفت وسن وابتسمت بقوه وهي تناظر لهم بقوه:طبعا بنات دلع
العمه موضي (اخت ابو وسن) بصراخ:على وين ان شاء الله ع بالك بيت امك؟
وسن باستهزاء: لا بيت ابوي
موضي: تستهبلين حضرتك
مشت وسن عنها ودخلت المطبخ وهي تبلع ريقها غمضت عيونها بخوف بس رجعت فتحتها وهي تكلم الخدامه: سوي ساندوش بيض وكوب عصير (نزلت لمستوى الجوري وحطت يدينها ع كتوفها وبحب وحنان) لاتخافين دامني هنا لاتخافين
ابتسمت الجوري بقوه لاختها وضمتها بقوه:وسن احبك
وسن:ههه وانا اكثر (وقفت وسحبت صينيه اللي حاطها فيها الخدامه الاكل ومشت بس لما وصلت الصاله وقفها صوت لفت وهي تشوف عمها حست ودها تمسك الصينيه وتضربها فيه لين يموت وترتاح )
ابواحمد (اخو ابو وسن):ع وين؟
وسن وهي تناظر له من فوق لتحت:امشي الجوري
ابواحمد وهو ياقف بعصبيه: هيه انا اتكلم اوقفي والا مو مالي عينك
لفت وسن وبكل قوه اصدمت كل اللي الجالسين : لا مو مالي عيني ولا راح تملاها ..

(لفت وطلعت المصعد وهي تسكره اول ماسكر تنهدت وتراكت ع المرايه اللي موجودها بالمصعد وهي تحس قلبها من قوه نبضاتها بيطلع والصينيه اللي ترجف بين يدينها لان القوه اللي قدرت تتكلم فيها كانت مجرد مظهر لا اكثر ولا اقل بس هي بحقيقتها اضعف من كذا بكثير )

بـــيــت ابــوســديــم

ادخلت اميره وهي مستغربه هدوء البيت ناظرت ساعتها شافتها 2:30(الظهر) اتجهت لجناح ساره فتحته بس مالقت احد ودارت كل الاجنحه ونفس الشي كتفت يدينها باستغراب ""وينهم ذولاء حتى خالتي مو فيه""
نزلت بسرعه وهي تشوف الخدامه بوجهها: ريتا وين ساره والبنات؟
ريتا:كلوه راح
هزت راسها اميره وهي تتطلع جوالها:شكرا خلاص روحي
ريتا:مايبغى شي؟
اميره وهي تحط السماعه ع اذنها:لا شكرا
هزت راسها ريتا ورجعت للمطبخ
اميره:الو سارونه يادبا وينكم؟
ساره وهي معصبه:عند الباب يلا باي
اميره:بـ ـ(بعدت الجوال باستغراب وهي تناظر له"" وشفيها حتى ماانتظرت اقول باي""
رجعت جوالها بشنطتها وقعدت تنتظرهم يدخلون)

فب المـسـتـشـفـى
غـــرفـــه قـــمـــر

قمر وهي تضحك:ههههههه (سكتت وهي تسمع طق الباب) تفضل
دخلت الجده مزنه و وراءها ام فهد و وراءهم فهد
مشاري بحماس ومزح:الله اكل
قمر:هههه
فهد وهو يخزهم بقهر قعد ع اقرب كرسي وهو يحوس بفمه
الجده:لا لا ماعليك شر
ام فهد بمزح : دام مشاري فيه اكيد بيطيب
قمر بخجل منهم:ليش متعبين نفسكم؟
الجده وهي تقعد:لاتعب ولا شي انت صرت واحد منا ..
قمر ابتسمت بقوه:الله يخليكم لي
ام فهد وهي تحط بالصحن
مشاري وهو يسحب الصحن:عطيني
ضربت يده ام فهد بقوه:بعد اقول قطع وجهه
الكل ماعدا فهد ومشاري:ههههههههه
مشاري وهو مكتف يدينه بمزح:ايه ايه اضحك اصلا انت اليوم شكلي عاجبك مخليني نكته عندك
اما فهد مقهور وقف وعطا قمر نظره:بروح لرامي (وطلع)
ناظرت قمر وهي تلف وجهها بضيق ومستغربه زعله ..
ام فهد وهي تمد الصحن بحب: يلا ياحبيبي كل وتغذى
الجده:ايه كل اول مره شوف ولد نحيف زيك
مشاري:هههههه
قمر : ايه تمصخر زانت لك السالفه
مشاري:هههه اووه هههه
ام فهد وهي تبتسم لهم وبدوا يسولفون وطلعت قمر من ضيقتها ونست فهد ..

بـــيـــت ابــوســديــم ..

دخلوا البنات وقفت اميره وهي تناظر لهم:وينكم؟
ساره وهي معصبه صعدت فوق ع طول
اميره وهي تعقد حواجبها باستغراب:ايش فيها؟
ريناد وهي تقعد وبدلع ماصخ: ياي نو نو مستحيل ماي سستر فشلتنا خربتي برستيجي
ريوف: ههههههههه
اميره بصراخ: هيه تراني مو فاهمه شي
رغد:اسمعي اقولك
اميره:قولي

قــبــل ســاعــتــيــن
بــــنـــده ..

دخلت ساره و وراءها ريوف بعدين ريناد وجنبها رغد ((طبعا سديم بالشركه))
بدوا يفرون بين الاسايب ويشترون هذا وهذا
ساره:انا بروح اجيب لي ريد بول من يبي ؟
ريناد وهي تضبط لثمتها:يااي متى تتركين هيدي الخرابيط؟
رغد بحماس: رنوده هذي كلمه جديده؟
ابتسمت ريناد:يس
هزت راسها ساره باستسخاف ومشت وصلت لمكان الثلاجه سحبت عبله ريد بول ..
......: تراها مضره للبنات
لفت ساره للي يكلمها كان شاب مملوح حيل وجسمه حلو وطويل ناظرته باستحقار:نعم؟
ابتسم:انا دكتور واقولك هذي الاشياء مو زينه للبنات (وناظرها من فوق لتحت وسكت)
ساره بقهر:ومن انت عشان تكلمني؟
هو:اا
قبل مايتكلم قاطعته ساره وكملت مشي بس وقفها كلامه
هو:اشك اصلا انك بنت
لفت ساره:ايش ايش؟
لف هو بصدمه ماتوقع انها سمعت: احمم
ساره بصوت عالي شوي:انت وشلون تكلمني كذا هاه ؟
ريناد وهي تركض وتسحب ساره وتناظر الساعه:نو كومنت ساره فشلتينا
ساره:اقول بعدي خليني ارويه وشلون يقول عني اني مو بننت هاه؟
ريناد بهمس:ما الومه
ساره بصراخ: وش تقولين؟
ريناد:ياماماي ماقول شي يلا امشي
ريوف:ساره هذي حركات غير حضاريه مو لايقه
ساره وهي تحرك يدها بعدم اهتمام: اقول روحي انتي وحضارتك (لما لفت تبي تكمل هواشها انصدمت لما مالقته موجود)

ريووف: اوبس
ريناد:اختي مو طبيعيه يااي عصبت بس عشانه راح وهي ماكملت هواشها
رغد بحماس:ساره شجاعه
اميره بضحك :  يالبى سارونه بس قسم انها فله ..

في المــســتــشــفــى

صارت قمر تتاملهم وهي تشوف الجده تضرب مشاري وام فهد مهتمه فيها وكل شوي تسالها اذا تبي شي ولا تغصبها ع الاكل دمعت عيونها تمنت انها انولدت بينهم تمنت انها تكون بنتهم صدق تخيلت موقفهم لما يدرون انها كانت تكذب عليهم ابتسمت بالالم ""لاتبكين يا قمر انتي الحين بينهم استمتعي ما تدرين يمكن ماتتكرر غير هذي المره""" ابتسمت وصارت تسولف معهم وتضحك ..

بـــيــــت ابــو وســن
جـــنــاح وســـن

طق الباب رفعت راسها باستغراب:من؟
الجوري:اقوم افتح؟
وسن بعدم اهتمام:ايه قومي
قامت الجوري وفتحت شوي وجاءت ومعها كيس وعطته وسن:خوذي
سحبته وسن باستغراب:ايش هذا؟
هزت كتوفها الجوري باستغراب:مدري جابته الشغاله تقول من ابوي
فتحته وسن وكان ملابس تنهدت وناظرت نفسها لها يومين هي والجوري ع نفس الملابس ابتسمت باستهزاء ""زين بعد يومين تذكرنا"" تنهدت ووقفت وهي تمد بنطلون جينز وبلوزه للجوري:خوذي البسيهم
اخذتهم الجوري وراحت وقفت هي ولبست بنطلون  وبلوزه ربطت شعرها باهمال وبصوت عالي :الجوري بروح اجيب ماء تبين؟
الجوري:ايه
طلعت وسن ودخلت المصعد تنهدت ""اشتقت لامي وفوز اف ابي اكلمهم بس وشلون ""
انفتح المصعد ونزلت منه وهي متجهه للمطبخ وقفت وهي تسمع كلام بنات عمااها
نهى بقهر:الحين هالوسخه وش تبي تجي عندنا ماصدقنا نفتك منها
هديل بنفس القهر:صادقه الحين تتلصق بتركي وتقول
دخلت وسن بقوه وتراكت ع الباب: سوزي عطيني كاس ماء
ناظروا لها بطرف عيونهم وسكتوا
انفتح الباب الخلفي اللي يطلع ع الحدايق ودخل منه شاب جميل بكل ماتعنيه الكلمه ..
هديل ونهى تعدلوا بسرعه بلبسهم عشان ينتبه لهم
رفع راسه بس انصدم من اللي واقفه قدامه من زمان ماشافها يمكن له سنه او اكثر بلع ريقه وهو يتذكر اللي صار نزل راسه عشانه يعرف انها تتغطى بس انصدم وهو يسمعها تقول بكل برود
وسن: سوزي وابي كوب عصير برتقال عشان اروق بعد اللي شفته الحين لان نفسي انسدت
رفع راسه وناظرها بصدمه وفهاوه دون أي رد
هديل بقهر : من قصدك ياالشيخه وسن؟
نهى باستهزاء: هديل لاتتكلمين مع حثاله اللي كانوا يتصنعون الدين والحياء وفجاه طلعوا ع حقيقتهم
بالنسبه لوسن وقعت عليها الكلمات اشد الالم والقهر كانت من اول مادخل وهي تتصنع القوه والشجاعه مع انها قبل ما تسمع اسمه ترجف كيف اجل وهي واقفه قدامه وبنفس المكان اللي صار فيه بس اللي صدمها هو
قرب بقوه من نهى وضربها كف محترم وبصراخ:لاتتكلمين مره ثانيه عنها كذا فاهمه؟
رفعت نظرها نهى بصدمه وبهمس: تركي؟
هديل وهي تمسك نهى:انتي بخير؟
ماردت نهى لانها لسى تحت تاثير الصدمه
ناظرته وسن ببرود يعني ايش قصده ع باله بكذا بتنسى كل شي
ناظرها ونظراته غريبه نظره ظالم تاب نظره مجرم كره جرمه
صارت تناظر له وسن بنظرات ماحد بيفهمها غير اللي عاش اللي عاشته وسن ..

اخبرني كيف استطعت ان تنظر مباشره في عيني
هل تعتقد ان مافعلته يغتفر ام تعتقد ان الايام محته
هل اردت ان اسمعك مره اخرى صوت انيني
ام ان ضميرك لم يعد يهتم وفعلتك جمدت قلبك وقسته ..

هزت راسها وسن باستسخفاف واخذت اللي طلبته من سوزي ومشت وهي تحاول تتمالك نفسها ع الاقل لين تاصل غرفتها ..

بـــيـــت ابــوســديـــم
الــســ12:30 بعد منتصف الليل ـاعــــه

اميره اللي كانت نايمه عندهم دخلت غرفه سديم ورمت نفسها ع السرير بتعب: اه الله يقطعكم مت من الركض ههههه شكل ريوف كان خطير
سديم وهي تتطيح ع الكرسي وصدرها يرتفع وينزل وتتنفس بصعوبه :هههه ااه ااه ههههه اما ساره شي متحمسه
ساره وهي قاعده بالارض ومتربعه:ههههه متحمسه انتي وش عرفك بالحماس؟
ريناد وهي تناظر لهم بطرف عينها وبقرف:ياي كيف انتوا تسون اشياء زي كذا تركضون كانكم بقر
سديم وساره واميره وريوف:هههههه
ريوف:بقر مره وحده؟
ريناد اللي انقهرت انهم يضحكون عليها: ايه بقر وحمير بعد
اميره:طيب ياانسه ريناد حنا لعبنا وانتي عيتي تلعبين معنا وش تبين نلعب انتي اختاري
ريناد:جد؟
اميره:ايه
ريناد وهي تحط اصبعها عند طرف فمها: اممم ايه ابي نلعب بالمكياج ونلبس وهيك
ريوف بسرعه: لالا انا مابي
ابتسمت ساره وناظرت اميره اللي بادلتها الابتسامه وهزت راسها
ساره:الا نبي نلعب
سديم بصدمه : وش صاير بالدنيا ساره ومكياج ماتتجمع ابدا؟
اميره باصرار:الا نبي نلعب
سديم: لالالا واميره بعد وشفيه اكيد وراكن شي
اميره وساره:ههههه
ساره:ريوف انتي اللي بنسوي لها ميك اب
ريوف بصدمه وبسرعه وهي تحرك يدينها: لالالا ما ابي
ابتسمت سديم ع فكره ساره واميره: الا غصبا عنك
اميره: ايه غصب
ريوف:لا مابي
وقفوا كلهم واتجهوا لها
ريوف وهي تاقف:لالالا بعدوا عني مابي
نطوا كل البنات عليها وهم يسحبونها بقوة ويضحكون ..

** الــبــقــالـــه

كانت قمر قاعده بنفس مكانها وراء الكاشير دخل عبدالعزيز صارت تراقبه وهو يشتري لين وصل عندها وحط الاغراض ع الكاشير
قمر وهي منزله راسها وبهدوء:شكل بقالتنا اعجبتك عشان كل يوم او وراء يوم تجي عندنا ؟
عبدالعزيز:هههه بصراحه ايه ماشاء الله مرا حلوه وفيها كل اللي ابي وبعد قريبه من دوامي
رفعت راسها وناظرته بصدمه: دوامك؟
دخل فهد وبهدوء: السلام عليكم
نزلت قمر بسرعه راسها عشان عبدالعزيز ماينتبه لها ويمكن يعرفها: وعليكم السلام

عبدالعزيز وهو يبلع ريقه لما انتبه لملامح قمر حس انه يعرفه : لو سمحت
قمر:هلا
عبدالعزيز: وش اسمك احس اني اعرفك
قعد فهد وهو يراقب الموقف بهدوء
قمر بابتسامه خفيفه : اسمي فارس
عبدالعزيز:اها عاشت الاسامي
قمر:عاشت ايامك
عبدالعزيز:كم حسابك؟
قمر:15
طلع بوكه وفتحه
رفعت راسها بسرعه تبي تتاكد من شي
رفع راسه عبدالعزيز مد الفلوس لها وسحب الكيس:مشكور
قمر وهي تحس بقهر:العفو ""شالها ماهي موجوده""
(كان اول ببوك عبدالعزيز صوره لها هي وعبدالعزيز وهم صغار وضامين بعض ماعمره نزلها من بوكه بس الحين ماهي موجوده)
فهد وهو يقرب: قمر انتي بخير ؟
قمر وهي تبتسم بقوه رفعت راسها له وهزته: ايه بخير يعني ليش اتضايق؟
فهد وهو يبتسم بالالم:قمر اا هه مدري وش اقولك بس تكفين خلاص انسيه
قمر:مستحييل لا(وبنظره انتقام) ماراح انسى لين انتقم منه ومن ابوي لازم يعيشون العذاب اللي انا عشته
قرب فهد لها اكثر ومسكها من كتوفها:قمر لاتخلين الحقد يعميك انتي اطهر من كذا
ناظرته قمر وابتسمت بالالم: ايه انا اطهر  وهذي المشكله لاني كذا ابوي تركني لاني كذا عبدالعزيز مسحني من ذاكرته ومسح كل شي يذكرني فيه وﻷني كذا عايشه بهيئة رجل ..
فهد بقهر عليها: خلاص انسيه وانا اوعدك اني اخليك تنسينه
ناظرت قمر وابتسمت بقوه:عرض مغري هههه بس لا اسفه لازم اذكرهم فيني لازم يعرفون اني موجوده
ابتسم فهد:خلاص دام هذا اللي تبينه انا بكون معك وجنبك باي خطوه تسوينها وبساعدك بعد
ابتسمت قمر : مشكور فهدد مدري وشلون ارد لك جميلك
فهد : ماله داعي تشكريني ..

بــيـــت ابــوســديـــم

دخل ناصر بيت عمه:تفضل تفضل حياك الله
دخل وراء ناصر وهو يتامل المجلس:الله يحييك اقول نويصر
ناصر:ااف ياكثر ماتقول يامعاذ قل وخلصني
معاذ بصوته المبحةح:ههههه طيب الحين حنا ببيت عمك يعني عادي كذا تدخل دون ماتقول لهم أي شي ليش مارحنا لبيتكم ياخي
ناصر:والله مالي خلق اسوق عاد من شفت بيت عمي صفطت عنده بعدين اكيد عادي بنات عمي ما اتغطى عنهم يعني مافيه أي احراج (سحب السماعه المعلقه ع الجدار): جيب ترمس قهوه وشاهي ومكسرات خلاص طيب باي

((مــعــاذ:::بطل جديد من ابطالنا عمره 22 سنه تخصص برمجه حاسب انسان فاشل بدراسته ولولا فلوس ابوه مانجح انسان كشخه لابعد حد يهمه الشكل والكشخه ومايحب اللي يهمل نفسه ابدا ويموت بالبنت الدلوعه والناعمه يكره الكتب والدراسه والهدوء يحب الرجه والكول قلبه طيب حيل وحنون مملوح  واللي يجذب فيه كشخته واهتمامه بنفسه))

غــــرفـــه ســـديـــم
ريوف وهي شوي وتصيح:اتركوني قلت لكم ما ابي احط مكياج ولا البس اتركوني
سديم:يلا بس انطمي رنود تعالي حطي الميك اب وانا بطلع لها لبس حلو
اميره بحماس:انا وساره بندور لها تسريحه حلوه
ريوف بصوتها الضعيف:سدوم ما ابي ماراح يطلع شكلي حلو م ابغى اسوي شي
سديم: مافيه مسويه يعني مسويه بعدين حنا بس نلعب يعني ليش زعلانه؟
ريوف بتافف وبنظره ضعيفه طغاها هدوء ساكن: اف

بـــيــت نـــور ..

تمشي نور بالحوش وتكلم بالجوال وبضيق:اشتقتلك قمور
قمر بنفس الضيق:وانا اكثر نوري
نور:قمر خلاص ارجعي انسي كل شي انتي مو قدهم صدقيني خلاص عيشي معنا وانسيهم
قمر وهي تهز راسها بعلامه لا: ما اقدر ماقدر يانور انا خلاص بديت فيه ولازم انهيه تصدقين مو مهتمه باابوي صح اني خايفه من مقابلته بس بنفس الوقت مو مهتمه بس عبدالعزيز ااه يانور مو مصدقه انه يسوي فيني كذا مو قادره استوعب ليش يسوي كذا انا اخته حبيبته وين راح كلامه اول لما كان يضمني ويقول انتي اختي وبنتي وحبيبتي ومستحيل اتركك ليش كان دايم يوعدني انه مايتركني مهما صار لش يخون وعده ليش يتركني وحيده بدون أي سؤال عني؟ ابي افهم يانور ابي ارتاح
نور وهي تهز راسها بالالم وبصوت باكي:قمر انا خايفه عليك خايفه هالدوامه تبتلعك وهم يطلعون منها خايفه نارهم تحرقك خايفه عليك منهم
قمر بهدوء:لاتخافين نور انا بخير وان شاء الله بستمر كذا انتي بس لاتخافين
سكتت نور شوي وهي تحس باتنيب الضمير ""ودي اقولك ياقمر بس خايفه ""
قمر اللي من اول المكالمه وهي حاسه ان فيه كلام بفم نور بس ماهي قادره تقوله:نور قولي لي وشفيك فيه شي تبين تقولينه ؟
نور بارتباك: لالا ما عندي شي
قمر بتشكيك:نور؟
نور بضعف:قمر لاتجبرين اقول ماابي اقول
قمر بخوف:نور انتي فيك شي تعرفين شي؟؟
نور وهي تقعد ع عتبه الباب وبدأت تبكي:خايفه اجرحك قمر خايفه عليك
قمر بخوف من كلام نور:نور لاتخافين وقولي
هزت راسها نور:طيب اصلا انا ماكنت مرتاحه اني مخبيه عنك شي
قمر:قولي لاتخافين
نور: طيب ذاك اليوم بالمستشفى كنت امشي وصدمت بنت وتلخبطت اوراقي باوراقها وشلت اوراقي وهي شالت اوراقها اول ماشفت عيونها ذكرتني بعيونك حسيت اني اشوفك وانتي لابسه النقاب قمت ورحت ولما فتحت اوراقي لقيت ورقه من ملف البنت ..

لقيت ورقة من ملف البنت وكان مكتوب فيه اسمها
قمر اللي مافهمت شي:نور كملي ترا مو فاهمه شي
نور بسرعه وخوف:اسمها اميره خالد الراسي
توسعت عيونها بصدمه حست بكف حار انطبع ع خدها قعدت بسرعه ع الفراش وهي مصدومه: انتي متاكده؟
نور وهي تبكي: قمر خلاص انسيهم قمر انتي مو قد هذي العيله انا سالت عن البنت قمر هي غنيه مو زينا ويقولون ابوها واهلها مو سهلين قمر تكفين انسيهم وانسي عبدالعزيز عيشي حياتك دونهم
قمر باصرار وقوه مفااجاه:لا
نور بصدمه:ايش؟
قمر: لا لا مستحيل اخليهم يتهنون وانا هنا تعيسه مستحيل تعرفي اني بسببهم تنكرت بولد شلت نقابي وانا مو مسامحة لهم اذا هم مو ساهلين انا بعد مو سهله اذا هم عندهم شي يخسرونه انا ماعندي شي اخسره ابدا
نور بخوف:وش بتسوين؟
قمر:بروح له
نور بصدمه:من عبدالعزيز؟
قمر:لا ابوي
نور:لا ياقمر لاتروحين روحي لعبدالعزيز اول وش تبين باابوك؟
قمر وهي تاقف وبصوت ماليه الحقد ورغبه الانتقام: بطالبه بحقي
نور بصدمه:أي حق؟
قمر:حقي من فلوسه ابي افضحه بين كل الناس ابي سيرته تكون ع كل لسان ابي اوريه اني مو زباله رماني ونساني ابي ادفعه كل دمعه شفتها نزلت من عيون امي لما كانت تصلي واسمعها تدعي له ابي ادفعه قهر امي (اشهقت من البكي) ابي ادفعه ثمن يتمي ابي ادفعه ثمن انانيته ابي ادفعه ثمن فقرنا وهو عايش ..
نور وهي تشهق من البكي قمر هي اغلى انسانه عليها مستحيل تقدر تشوفها تسوي كذا وتسكت بس ايش بيدها تسوي: قمر لاتقولين كذا تراك تخوفيني
قمر:مو انتي اللي لازم تخافين يانور هم اللي لازم يخافون
نور: قمر تكفين عشاني انسيهم خلاص وش تبين بالفلوس؟
قمر:انا مابي فلوس ابي بس اعذبه ابي ادفعه ثمن عذابي سنين بكم يوم والا مايحق لي انا تعذبت سنين وهو مايصير يتعذب كم يوم لا يانور انا وصلت لهنا ومستحيل ارجع مهما صار
هزت راسها نور لانها تعرف قمر زين:خلاص طيب بس انتبهي لنفسك واذا احتجتي أي شي دقي علي وانا ع طول اجيك خلاص؟
قمر وهي تهز راسها:خلاص بس نور ابي منك خدمه
نور بسرعه:عيوني لك امري
قمر: مايامر عليك عدو اسمعي انا لما رحت لبيتنا لقيت كل الاوراق الرسميه بس اهم ورقه مالقيتها
نور باستغراب: ايش هي؟
قمر:ورقه عقد زواج امي وابوي
نور باستغراب:مافهمت قمور وشتبين مني؟
قمر وهي تتنهد:قبل ماتموت امي الله يرحمها بكم يوم سمعتها تقول ان الاشياء الغاليه عندها تحطها عند امك دوري الورقه واذا لقيتها جيبها لي خلاص؟
نور:خلاص ابشري ادورها واجيبها لك انتبهي لنفسك
قمر بابتسامه خفيفه:ان شاء الله وانتي بعد يلا سلمي ع الكل ومنيره باي
نور بهدوء:يوصل باي

سديم واميره وريناد وساره واقفين وهم متنحين بغباء وفهاوه
ريوف بخوف:قلت لكم ادري شكلي ماراح يطلع حلو
ساره وهي مفهيه:تعرفونها ؟
هزوا كلهم روسهم بعلامه لا
ريوف بصدمه وخوف:لهدرجه شكلي شين (وقفت بسرعه ولفت للمرايه المعلقه ع الجدار وفتحت افمها بصدمه من شكلها كانت بقمه الانوثه والروعه ) اشرت ع نفسها بصدمه:هذي انا ؟
صرخوا البنات واللي تصفر واللي تصفق
سديم:واو ريوفه طلعتي تهبلين
ريناد:لالا ريوفتي غطيتي علينا كلنا
اميره:واو شكلك خطير
ساره:قسم بالله شكيت انك مو اختي
اما ريوف كانت عيونها لسى ع المرايه مو مصدقه ان اللي بالمرايه هي نفسها
ضحكت سديم وهي تلف يدينها حول كتوف ريوف:هههه مو مصدقه يعني تتذكرين اني كنت دايم اقولك انتي جميله بس كنتي تقولين انا شينه وانا مدري ايش شفتي بس بشويه تغيير كيف صرتي
ابتسمت ريوف بقوه وفرحه وصارت تضحك:ههههه""يعني انا مو شينه زي مايقولون عني الناس يعني الحين اقدر امشي دون ماتكون عيوني بالارض يعني الحين اقدر اناظر المرايه دون مااحس اني بصيح ""
اميره بابتسامه لانها تعرف ان ريوف ماعندها أي ثقه بنفسها عشانها دوم تحس انها شينه وانها اقل من خواتها :امشوا ننزل نلعب
ريناد بسرعه: ركض لا مااحب
ساره وهي تبتسم للفكره الجهنميه اللي طرت ببالها:وش رايكم نولع الرشاشات ونلعب بالحديقه؟
سديم:واو فكره
اميره بحماس:ايه
ريناد وهي تقعد:لا مابي شعري بيخرب
ساره:طسي اقعدي ريوفه تجين معنا؟
ريوف ببتسامه:اوك يلا

مــجـــلـــس الـرجــال
وقف معاذ: ناصر وين الحمام؟
ناصر وهو مشغول : ع اليمين
طلع معاذ وهو يمشي:وينه مافيه شي (فجاه صار يسمع صوت صراخ وضحك قرب للصوت بس ووقف بصدمه وهو يشوف ملاك هو متاكد انها ملاك بفستانها الابيض وهي تنقز والماء يتناثر عليها  وصوت ضحكها الناعم كانت ملاك) فتح فمه بفهاوه ""هذي اكيد ملاك مستحيل تكون بشر مستحيل"" صار يشوفها وهي تاقف ع الارض بثبات وهي رافعه راسها وتضحك بغنج ونعومه فجأه صحى ع صوت ناصر من بعيد لف ومشى له بجسمه بس عقله وقلبه ظل بمكانه مع الملاك اللي شافه ..

يـــوم جــديـــد
الــبــقــالـــه
مسكت قمر جوالها اللي يدق وردت بصوت بنوته:الو
منى:مراحب كيفك قمور؟
قمر بابتسامه:بخير الله يسلمك انتي وشلونك وشلون البنات؟
منى بروقان:انا لوني احمر اما البنات اعتقد اصفر
قمر:هههه
منى:دوم االضحكه
قمر :تسلمين ياروحي كيف خالتي (تقصد ام فهد)؟؟
منى:هههه يعني مو قايله وشلونها خساره كنت ابي اقول اسود لانها معصبه
قمر:هههههه افا ليش؟
منى:عادي يعني تعرفين تهاوش البنات
قمر:الله يخليها لكم يارب
منى:امين اسمعي قمور
قمر:هلا
منى:اليوم بنتجمع كلنا عاد ابيك تجين طبعا اذا تقدرين؟
قمر: والله مدري
قبل ماتتكلم منى سحبت خوله الجوال:قمور
ابتسمت قمر:هلا خوله
خوله:اسمعي يادبا تجين يعني تجين
قمر:ههههههه
سحبت منى الجوال:اقول هاتي الو
قمر:ههه الو
منى:تراها تقول كذا يعني من باب الميانه
قمر:اكيد
منى:هاه وش قلتي؟
قمر: خلاص
منى:اوك اجل ننتظرك باي
قمر:باي
دخل فهد البقاله وشافها مبتسمه حس براحه:عساها دوم
ارفعت راسها باستغراب:ايش؟
اشر فهد ع فمه وهو مبتسم بعدين اشر عليها
ابتسمت قمر:هه ايه
فهد:وش مناسبه الابتسامه
اقعدت قمر ع الكرسي:ابد بس هذي منى داقه تعزمني اليوم عندكم
فهد اللي تذكر شكلها ذاك اليوم:ايه حياك الله
قمر:هههه
دخل مشاري:لالا هذي خيانه ما ارضى فيها وشلون تضحكون دوني؟
فهد:اقول انثبر بلا خيانه بلا بطيخ
قمر:هههههه
مشاري:اها يعني قد الكلام اللي قلته يافهيد؟
فهد وهو يتعدل بكرسيه وكانه ملك وغلظ صوته:طبعا قده
مشاري وهو يبتسم سحب الكرسي بقوه:هههههههه
قمر اللي ماقدرت تمسك نفسها ع شكل فهد وهو طايح بالارض ويرمش بصدمه:ههههه
مشاري وهو يمد يده لقمر:كفك كفك
طقت قمر كفه وهي مو قادره توقف ضحك
استوعب فهد الموقف ووقف بسرعه دون مايحس مشاري: والله ماخليك
لف مشاري وصرخ وصاروا يتلاحقون بالبقاله
قمر: ههههههههههه (طلعت جوالها وطقت كم صوره لهم) ""الله لايحرمني منكم يارب""
مشاري وهو ياقف وراء ثلاجه:ايه اضحك تعال ساعدني انت و وجهك
فهد:مااحد بيساعدك مني (وركض وراءه)
مشاري وهو يقلد صراخ البنات: اااااه ماماي
قمر اللي تحس بطنها تقطع من الضحك من زمان ماضحكت زي كذا : ههههه
بــــيـــت مـــنــيـــرة ..

دخلت نور و وراءها امها سلموا ع ام منيره ومنيره
منيره وهي ماسكه يد نور:يلا عن اذنكم بنروح غرفتي
ام منيره وام نور:اذنكم معكم

غـــرفـــه مــنــيــرة
سكرت منيره الباب وهي تقفله:هاه لقيتي الورقه اللي تبيها قمر؟
نور وهي تجلس ع كرسي التسريحه وتفتح شنطتها:ايه قسم بغى قلبي يطيح ببطني
منيره باستغراب:ليش؟
نور:تخيلي دخلت غرفه امي وفتحت شنطتها الذهب وصرت احوس بالاوراق الا يدخل ماجد
منيره وهي تشهق: لايكون انتبه للورقه اللي معك
نور:لالا اشوا كنت مسكرتها وقالي وش تسوين قلت له ابي صورتي يوم انا صغيره
منيره:ومشت عليه السالفه؟
نور:ايه مشت
منيره: وشلون بتودينها لقمر؟؟
نور:مدري انتي وش رايك؟
منيره وهي تتطلع جوالها:برسل لها مسج بقولها تجينا للمستشفى بكره
نور:صح فكرة ..

بـــيـــت ابــوحــلا ..

بـيـت جديد ستدخل بطلته معنا بروايتنا
ابوحلا:انسان طيب يشتغل مدير مدرسه حنون ويموت ببنته الوحيده حلا
ام حلا:ام حنونه ع نياتها بس اذا شافت خطأ مستحيل تسكت لما ولدت بنتها حلا صار عليها نزيف حاد فاضطروا الاطباء يشيلون رحمها فعشان كذا ماعندها الا حلا
حلا:بنت عسل بمعنى الكلمه عمرها 19 سنه تخصص علم نفس رجه وجرئيه تتحمل وتكتم بصدرها اللي يشوفها ع باله قويه وهي بالاساس ضعيفه من داخل وحساسه من اقل كلمه تنقال لها وتصدق أي شي ومرا بريئه عايشه حياتها تفتقد الاخوات والاخوان دوم تحس بالوحده بحياتها كل شي عندها عادي ومرحه مرا

غــرفــه حــلا
قعدت وهي تكلم بنت خالتها:اف شهد خلاص انا اعرف اني مستحيل احبه بعدين انا ماخذه الموضوع استهبال(وبضيق) شهد انتي ماتعرفين كيف اطفش لاكنت لحالي صح مبسوطه بحياتي بس ولو اطفش اه وبعدين سلمان مؤدب ماقد قالي أي كلمه حب ولا خرابيط
شهد بقهر من بنت خالتها:حلا وشفيك كلهم كذابين ويسوون كذا بالبدايه عشان البنات يتعلقون فيهم بعدين يهددونهم بعدين صح خالتي طيبه وحنونه بس قسم لو عرفت انك تكلمين والله لاتذبحك
حلا: ااف شهد انتي تعرفين انا مو من طبعي اكلم اولاد بس سلمان هو اول واحد واكيد انه اخر واحد
شهد وهي تتنهد:طيب خلاص براحتك بس لاتنسين اني قلت لك
حلا بابتسامه:لا ماراح انسى اقول ليش ماتجين عندي؟
شهد:اووك اجل بقول لامي ونجيكم
حلا بوناسه:اجل ننتظركم يلا باي
شهد:باااي

((شهد:بنت خالة حلا عمرها 19 تخصص علم نفس مع حلا طيبه حيل وخوافه دورها بيكون ثانوي
عندها امها تقريبا شخصيتها نفس شخصيه ام حلا
وعندها ابوها رجال طيب يشتغل موظف حكومي بوزاره التربيه والتعليم
وعندها اخوها الصغير ياسر))

بــيــت سـلـمـان

((صديق فهد ومشاري))
دخل غرفته بسرعه وسكر الباب ومسك جواله ودق عليها:الو
حلا:مراحب
سلمان:كيفك؟
حلا:تمام انت كيفك؟
سلمان: تمام
حلا:ههه دوم
سلمان باستغراب:وشفيه صوتك يعني مو عادتك تردين كذا بالعاده ازعاج وصراخ
حلا بهدوء وارتسمت ع شفايفها ابتسامه:مافيه شي
سلمان:علي يلا قوليلي
حلا وهي تتنهد:مافيه شي والله بس هذي شهد بنت خالتي
سلمان باستغراب:وشفيها عسى ماشر؟
حلا اللي اندمت انها قالت شي:لالا مافيها شي خلاص انسى السالفه
سلمان باصرار:لا مو ناسيها قولي يلا
حلا باستسلام:طيب هذي شهد تهاوشني لاني ..
سلمان:لانك ايش حلا تكلمي
حلا بسرعه:لاني اكلمك وتقول كل الشباب زي بعض كذابين
سكت سلمان شوي بعدين قال:هي صادقه
انصدمت حلا:ايش؟
سلمان وهو يتعدل:هي صادقه كل الشباب كذابين تبين الصراحه حلا؟
سكتت حلا وماردت:- - -
سلمان اللي حس ان شهد سهلت له طريق طويل كان مو عارف كيف بيمشي ببدايته ويقول لحلا:انا لما دقيت عليك ماكنت غلطان كنت ابي اكلم بنت وانتي سبقتيني وقلتي انا طفشانه سولف معي حسيتك بهذاك الوقت ماعمرك كلمتي بس بعدين قلت لا مو معقوله فيه بنت تتكلم كذا عادي وهي ماقد كلمت شاب ما ابي اغبي عليك بالبدايه كنت ابي استهبل عليك واوهمك اني احبك بس بعدين حسيتك غير البنات اللي اكلمهم حسيتك بريئه من سوالفك عن نفسك وعن اهلك بعفويه من اسلوبك وطريقتك بالكلام تكلميني كانك تكلمين وحده من صديقاتك حلا انا بصراحه عديتك (سكت شوي لان نبضات قلبه زادت بس بلع غصته وقال) مثل اختي اسولف معها وارتاح لها واشكي لها اللي يضايقني بس تدرين حلا لاني اعدك زي اختي انا كلمتك اليوم عشان اقولك ابي ننهي اللي بيننا لاني اعزك ياحلا مابيك تكلميني لاني لو عندي اخت مستحيل خليتها تكلم شاب مهما كان مؤدب
سكتت حلا بصدمه حست بشعور غريب لما قال سلمان انه خلاص اللي بينهم بيتنهي وبعفويه:يعني ماراح اسمع صوتك ثاني مره يعني مافيه احد بقوله اللي بنفسي دون ما اشك انه بيقول لاحد يعني برجع لوحدتي ثاني مره؟
سكت سلمان شوي بعدين قال بضيق:حلا افهميني انا ابي مصلحتك صدقيني حتى انا علي صعب اني اتركك وما اسمع صوتك
حلا بصراخ خفيف خالطه دموع نزلت ع خدودها:خلاص مايحتاج تفهمني اكثر انا مو غبيه والا تدري انا جد غبيه لاني كلمتك من الاساس وعديتك اخ لي (وسكرت السماعه)
سلمان:حلا الو (صار يناظر الجوال بلع ريقه بقهر ورجع دق بس ماردت صار يدق ويدق)

غـــرفــه حــلا
دخلت شهد بس انصدمت وهي تشوف حلا تصيح وهي منسدحه ع سريرها ركضت لها:حلا
حلا وهي شاده ع جوالها بيدها بقوه وتبكي
شهد بصدمه وهي ترفعها:حلا وشفيك؟
حلا وهي تشاهق:سلمان
شهد بصدمه:وشفيه؟
حلا: قال بينهي كل شي بيننا يقول انك صادقه ان كل الشباب كذابين قال انه اصلا كان يبي يلعب علي بس عدني اخت له و انه خلاص مايبي يكلمني
سكتت شهد ماعرفت ايش تقول لحلا بس ماتوقعت ابدا سلمان شخص مهم جدا عند حلا لدرجه انها تبكي عشانه ضمتها وسكتت بهدوء
شهد:حلا ردي عليه طيب
حلا:ماابغى ارد
شهد:ردي يمكن يبي يقول شي مهم
بعدت حلا عن شهد وصارت تناظر لها وببراءه:تتوقعين؟
ابتسمت شهد بقوه وهزت راسها:ايه
هزت راسها حلا بايه وردت وبهمس:نعم
تنهد سلمان براحه:ليش تقفلين السماعه كذا؟
حلا بقهر:كيفي
ابتسم بهدوء:طيب ااه اسمعي صديقني هذا لمصلحتك ماتتدرين يمكن بيوم نلتقي يمكن بيوم نشوف بعض ليش نفقد الامل كذا طيب واذا مالتقينا كيف انا نتذكر بعض (وبحنيه) صح؟
سكتت حلا شوي بعدين قالت بصوت عالي:لا مو صح مو صح انقلع اصلا انا ما احبك انا اكرهك (سكرت الجوال بعد مارمته بقوه ع الارض)
ناظرتها شهد بصدمه ""لايكون حلا لالا مستحيل تكون حبته""
مسكتها من كتوفها:حلا
بس قبل ماتقول أي شي طاحت حلا بحضن شهد وهي تبكي
سكتت شهد شوي وضمت حلا وبهمس:حلا

يــوم جــديـــد

الــســ8:30 ص ـاعـــه
في المــســتـشـفـى
دخلت قمر وهي تدخل يدينها بجيب بنطلونها وتمشي بهدوء وقفت عند الاستقبال: وين القى الممرضه نور او منيره؟
الموظفه وهي تاشر بيدها:هناك
وقف وهو يحط الملفات ع الطاوله انتبه لها من بعيد ""هذي مو اللي اسمها قمر الا هي وش جايبها هنا؟ ""

مشت قمر لين وصلت للغرفه وطقت الباب فتحت لها بنت وباستغراب:نعم اخوي؟
قمر بهدوء:ابي نور والا منيره
البنت وهي تلف:منيره فيه واحد يبيك
منيره باستغراب:من؟
البنت وهي تهز كتوفها:مدري
وقفت منيره وهي تتغطى: نـعـ ـ(ابتسمت بقوه مسكت معصم قمر وسحبتها معها)
قمر بابتسامه:وشلونك؟
منيره:بخير دامني شفتك
ابتسمت قمر وطلعوا للحديقه الخارجيه:هاه جبتي الورقه ؟
منيره وهي تتطلعها من شنطتها وتنهدت:خوذي
قمر:وشفيك؟
منيره:انا خايفه عليك قمر
قمر بابتسامه وهي تفتح الورقه:لاتخافين
وتحركت وهي تأشر لمنيرة بباي

كان يراقبها باستغراب""من وين تعرف هذي الممرضه "" طلع جواله وكلم فهد:الو
فهد:هلا وغلا بالدكتور رامي وشلونك؟
رامي:بخير الله يسلمك انت وشلونك؟ وشلون مشاري وعمي؟
فهد:كلهم بخير يسلمون عليك
رامي:الله يسلمهم اقول فهد
فهد باستغراب:هلا
رامي:هذيك البنت اللي اسمها قمر
فهد بخوف:ايه وشفيها؟
رامي:لا مافيها شي بس توا جت واشوفها تكلمت مع ممرضه واخذت منها ورقه بس حبيت اعلمك
فهد باستغراب ""أي ورقه يمكن الممرضه نور "":طيب مشكور رامي عاد خلنا نشوفك
رامي:اكيد يلا مع السلامه وسلم ع مشاري
فهد:يوصل مع السلامه

الــبــقــالـــه
نزلت قمر وهي تتدفع لراعي التاكسي : تفضل مشكور
لفت بسرعه بس بلعت ريقها وهي تشوف فهد حطت الورقه بجيبها وقربت له:مارحت للدوام؟
فهد وهو مكتف يدينه:ايش الورقه اللي خبتيها؟
قمر بارتباك:ورقه أي ورقه؟
تقدم لها وسحب الورقه من جيبها:هذي
قمر وهي تنزل راسها بعدين رفعته: فهد عطنيها
فهد وهو يرفعها فوق:لا
قمر بقهر:فهد عطنيها
فهد:اذا تبينها خوذيها
صارت قمر تنقز عشان تاخذها بس مستحيل تاصل ليد فهد:اف فهد
فهد نزل يده وفتح الورقه وقف وهو يشوف الورقه باستغراب : قمر انتي ماراح تنسين هذي السالفه؟
قمر بقوه:لا ماراح انساها وهات الورقه (سحبتها بقوه ودخلت داخل البقاله)
تنهد فهد ودخل وراءها:قـمـ ـ ـ
قاطعته قمر بقهر وهي تلف له:ليش كلكم تقولون انسي السالفه مستحيل انساها مستحيل تدري ليش لاني كل مااغمض عيوني اشوفهم بااحلامي مااقدر ماقدر انساهم واليوم بروح لابوي
انصدم فهد:اليوم؟
قمر:أيه اليوم
فهد:بتروحين لحالك ؟
قمر:ايه لحالي يعني خايفه من من؟
فهد وهو يقرب لها وبعصبيه:مافيه روحه لحالك لو تموتين
انقهرت قمر وبقوه: من انت عشان تمنعني؟
فهد بقهر : قلت ماراح تروحين فاهمه ؟
قمر بصراخ: لا مو فاهمه
دخل مشاري وباستغراب وهو ينتقل بعيونه بينهم:وش فيكم؟
قمر وهي تناظر فهد بحده:مافينا شي بس قول لصديقك لايتدخل بما لايعنيه (و راحت لغرفتها)
مشاري اللي زاد استغرابه واشر بيده ع قمر: وشفيه هذا وش يقصد؟
مارد فهد وضرب برجله بقوه الرف اللي جنبه وطلع
مشاري: فهد
وبصراخ) احد يكلمني؟

ســتــار بــكــــس ..

دخل مشاري وناظر سلمان الجالس جلس قدامه:السلام عليكم
رفع راسه سلمان وبضيق:وعليكم السلام
مشاري باستغراب:انتوا وشفيكم اليوم كل مااقابل احد القاه زعلان؟
تنهد سلمان وهو معقد حواجبه:ليش؟
مشاري وهو يهز راسه:ماعليك انت وشفيك داق علي وتقول تعال فيك شي؟
تنهد سلمان :مدري وش اقولك
مشاري بخوف:فيه شي سلمان ؟
سكت سلمان شوي بعدين قال:تتذكر البنت اللي كنت اكلمها اللي اسمها حلا؟
مشاري باستغراب:ايه
سلمان: تركتها اليوم
مشاري:طيب يعني ماهي اول بنت وماعتقد بتكون الاخيره اللي تتركها؟
هز راسه بايه بقهر:عارف عشان كذا قاعد اسال نفسي ليش متضايق نهيت كل اللي بيننا  عشان خايف عليها قلي يامشاري ليش سويت كذا؟
ابتسم مشاري ع خفيف:تحبها؟
انصدم سلمان من كلمه مشاري حسها وكانها كف انطبع ع خده: لا مستحيل احب بنت تكلمني مستحيل اثق ببنت تكلم دامها كلمتني اكيد بتكون مكلمه غيري بس
مشاري بابتسامه خفيفه:بس ايش؟
سلمان وهو يبتسم ورمش بعيونه وكانه تذكر شي:هي غير يامشاري غير
مشاري باستغراب: وشلون غير ؟
سلمان وهو يهز كتوفه:مدري مدري بس هي غير بريئه احسها ما تعرف هذي الدنيا .. قلي يامشاري اللي سويته صح والا غلط؟
مشاري وهو يحط يده فوق يد سلمان:صح صدقني صح
تنهد سلمان وهو يناظر مشاري وماهو قادر يفهم اللي يصير فيه ""معقوله كلام مشاري صح معقوله انا احبها؟"" ..

يــوم جــديـــد

وقفت قمر وهي تناظر نفسها بالمرايه بعبايتها السودا تنهدت بخوف وهي تلم الاوراق اللي تبغاها وماسكه بيدها الثانيه ورقه صغيره فيها عنوان بيت ابوها جابته لها نور ((من بيانات اميره)) ""ااه يارب صبرني""
شدت ع سلسالها بخوف وطلعت بس وقفت بصدمه وهي تشوف فهد متراكي ع سيارته ويتلفت قربت له: فهد؟
تعدل بسرعه وبحده:امشي انا بوديك
قمر وهي تتلفت للشارع:مايحتاج اخذ لي تاكسي
فهد وهو يمسك نفسه وبحده: قمر
ناظرته بخوف وصدمه بلعت ريقها وهي ساكته
تنهد وهو يعض ع شفته السفليه وبهمس:استغفر الله قمر اا
قاطعته وهي تمشي وتركب السياره بهدوء
ناظرها وهو يهز راسه بقهر وركب السياره وعم الهدوء السيارة ..

بــيــت ابــوفــهـــد ..

خوله: ياحليل قمر قسم استانسنا معها ذاك اليوم
مها بحب:اكيد مو هي اخت فارس
منى:اقول طيري بس وش دخل هذا بهذا؟
نواره:هههه انتي وش دراك هذا حبيب القلب تتدخله بكل شي
قطع كلامها وهو واقف وراء الباب:احمم
نواره:مشاري تعال
تغطت مها ومنى بسرعه
دخل وهو يبتسم:كيفكم؟
الكل:بخير
قعد مشاري وهو يصب لنفسه فنجان قهوه:اجل وين فهد؟
منى:ماجاء البيت
عقد حواجبه باستغراب:غريبه اجل وينه هو وفارس مختفين طيب عمي ؟
مها بسرعه:لا فارس كلم ابوي وقاله قبل شوي انه عنده مشوار ضروري وابوي راح للبقاله
ناظرها مشاري وهو يهز راسه ببرود ولف وجهه عنها:اها
مها باستغراب ""وشفيه مشاري غريبه يرد علي بدون نفس ""
نواره بخوف:مشاري ليش وجهك اصفر فيك شي؟
ابتسم لاخته وشد ع يدها:مافيني شي ياالغاليه
ابتسمت نواره:اكيد؟
هز راسه:اكيديلا عن اذنكم
البنات:اذنك معك
نواره وهي تراقب مشاري وهو يطلع حست بضيقه فضيعه
منى باستغراب:نواره فيك شي؟
نواره بهمس:خايفه ع مشاري
خوله:نواره لاتقولين كذا مافيه شي انتي شفتيه بعيونك
نواره:اعرفه لما يكون متضايق
مها:لا مااظن انه متضيق انتي بس يتخيل لك
منى:ايه صح
نواره بعدم تصديق:يمكن

بــيــت خــالــد الـراســـي

كانت كل العيله متجمعه بما ان اليوم الاربعاء والدور ع بيت خالد
ام اميره وهي تناظر ابتسام بحنيه:ابتسام لاتخافين عمي قال بيرجعهن لك يعني بيرجعهن لك
ابتسام وهي تبتسم ابتسامه ذابله: بس ابي اسمع صوتهن حسبي الله ع من كان السبب
ام اميره بسرعه:لاتتحسبين عليه استغفري ربك
ابتسام:استغفر الله

اميره وهي تضحك: الله يقطعك ياريناد
ريناد بابتسامه: ايه قسم هي جاءتني البنت وقالت لي اختك ريوف وينها اشرت ع ريوف قالت لالالا اختك ههههه
ريوف : ايه تتطنزوا مالت عليكم
سديم وهي تضم اختها:يالبى اختي بس
ابتسمت ريوف وضمت سديم
ساره: يعني مسويات فيها خوات مثلا؟

.

قــدام الــبــيــت
داخــل سـيـاره فــهــد

فهد:قمر انتي تسرعتي
قمر وهي تناظر البيت وبحقد:لا يافهد انا ماتسرعت
فهد:طيب قمر اسمعيني
لفت له قمر وناظرته دون ماتقول أي شي
فهد:واذا كذبك؟
قمر:مو بكيفه انا غصبا عنه بنته
تنهد فهد:طيب انتي مصره؟
قمر:ايه
فهد:اجل بنزل معك
ناظرته بصدمه:فهد؟
فهد وهو يفتح الباب:انزلي
فتحت بابها وناظرته:فهد وشلون بتدخل معي بصفه ايش؟
فهد: مايهمني بصفه ايشش بس اللي اعرفه ويهمني اني مستحيل اخليك تدخلين لهذا البيت لحالك
ناظرته وابتسمت حست مافيه أي كلمه بتقولها الحين توفي بحق فهد:شكرا
ناظرها فهد:لاتقولين شكرا (ولف لها وهو يبلع ريقه) مو حنا اصدقاء
ناظرته قمر بتامل:اصدقاء ايه اكيد
شد ع يدها و وقف عند الحارس:نبي خالد الراسي
الحارس:من اقول له؟
ناظر فهد قمر وقالت:قله بنتك تبيك
ناظرها الحارس باستغراب:ايش؟
فهد:قله اللي سمعته
هز راسه الحارس ودق ع السماعه اللي باصااله

رد ناصر:نعم؟
الحارس: سي ناصر فيه واحد معه بنت بيقولوا بدهم الباشا
ناصر باستغراب:من؟
الحارس:عم تقول بنته
سكت ناصر بصدمه:بنته؟
(لف وشاف اميره جالسه""وش هذا وش السالفه؟"")
طيب طيب دخلهم
ابوناصر:ههه من ياناصر؟
ناصر وهو مصدوم:هاه؟
الجد:وشفيك انصميت يقولك من؟
ناصر:هذا مصطفى يقول فيه واحد ومعه وحده يبونك
ابوناصر وهو ياشر ع نفسه:انا ماقالوا من؟
ناصر:الا بس
ابوسديم باستغراب:بس ايش؟
ناصر: يقول مصطفى انها بنتك
كلهم توجهت اناظرهم بصدمه لابوناصر اللي ماكان اقل صدمه منهم
ام ناصر: وشفيه ياخالد؟
خالد وهو ياقف:وش قلت لهم ياناصر؟
ناصر: قلت لمصطفى دخلهم اكيد دخلهم المجالس برا
طلع خالد ووطلع وراءه الجد وابوسديم وناصر
سديم بصدمه:تتوقعون وش السالفه ؟
اميره:هذا كذب وش بنته انا بنت خالد الوحيده
ساره وهي تناظر الحريم اللي يتكلمون بهمس والجده ساكته حست انهم يعرفون شي وبهمس:بنات خلونا نطلع ونشوف ايش فيه
هزوا كل البنات روسهم ووقفوا اما اميره تمشي بصدمه وعدم تصديق ..

#يـــتـــــبـــع...

#الـــتــــوقـــعــــات...

🍃 كيف راح يكون اللقاء بين قمر وابوها ؟؟

🍃 ماهي اﻷسباب التي قد تجعل اب يتخلى عن اولاده ؟

🍃 كيف راح تكون ردة فعل اميرة ؟