مدافن الألم

الجزء 06

اها يافتحي انا طبعا" .. لمن مشيت وشاورت امي وابوي في الموضوع وقلت ليهم الزول اسمو الامين ووضعو كيت كيت .. ابوي قال لي الراجل محلالات ليهو اربعة .. ونحن ماعندنا اعتراض انو راجل عندو دين واخلاق وقدرة .. يتزوج للمرة التانية اذا كان ضامن العدل ..

امي قالت لي دي حياتك وانتي البتقرري .. فيها لانو نحن ماماشين نعيش معاك ..

بدرية اختي كانت ماموافقة.. يعني بتقول لي مشاكل الضرات والمكايدة مابتخليك ترتاحي في حياتك .. لكن انا الحالة الكنت شايفاها على وضع البيت.. بتخليني اضحي .. بس المهم القى لي زول اتلم عليهو ..واريحهم من مسؤوليتي ..

خصوصا كان خالك صلاح عديم مسؤولية .. ويمشي الغرب يعدي ليهو تلاتة شهور.. زي الهو ماعارف الحاصل على البيت ..ويجي كل مرة .. ايد ورا وايد قدام .(ماشايل قروش )

وبدرية كانت بتقرا .. وانا في اخر لي سنة في الجامعة . المهم اتوكلت على الله .. واستخرت الله سبحانه وتعالى ..

وعرفت انو ربنا مابختار لي الا الخير .. وهسي بعد كل الحصل لي.. عرفت انو ربنا اختار لي الخير .. انا لو ماطلعت من الموضوع ده كلو الا بيك انت.. ده خير مابعدو خير ..

اها المهم يافتحي انا وافقت بي ابوك .. وبعد التخرج بي كم شهر كدا .. تمينا العرس

واهل الامين ماجو العرس.. الامين قال كان عندهم وفاة في الجزيرة ..

اها في الفترة الاولى بعد شهر العسل.. انا كنت قاعدة مع اهلي .. وهو بمشي وبجيني في الاسبوع مرة واحدة .. بقول لي بهز في البيت ومرات يقول لي عندي ظروف عندي ظروف ..

وانا ماحاولت أساله من الظروف دي شنو؟ لانو لو عايز يحكي لي كان حكا لي ..

بعد فترة انا ظهر لي حمل .. الكلام ده بعد خمسة شهور من الزواج .. والفترة دي كلها مافي زول جانا في البيت هنا من اهل الامين .. لا امو ولا اخواته وولا اخوانه .. المهم لمن هو عرف انو انا حملت .. ساقني وداني لي البيت الفي شمبات ده.. وكان مجهز في الطابق الفوق ..

لمن انا داخلة عايدة واولادها طبعا ساكنين في الطابق الارضي .. وانا طبعا ماكنت متوقعة انا بلاقي شنو؟

ونحن داخلين قلت لهو ممكن ادخل اسلم على اولادك وامهم .. طبعا على اساس انها هي موافقة على زواجي من الاول .. قال لي ايوة ممكن مافي اي مشكلة ..

لمن دخلت لقيت المراة معاها اخواتها .. واولادها واولاد اخواتها وامها .. واخوات الامين يعني عماتك التلاتة .. المهم الاسرة كلها ملمومة في البيت ..

وانا دخلت عليهم بكل طيبة خاطر .. ومبتسمة ومبسوطة من اللمة .. دخلت عشان اسلم عليهن ..واشوف اولاد الامين اللي ح يكونوا زي اولادي .. اي زول بمد ليهو يدي بقبل مني كدا .. لمن حومت على الناس القاعدين كلهم.. زول قبل سلامي مافي ..

عاينت للامين كدا وعيوني اتملن بالدموع ..

ومافضل لي الا تتشق الواطة وتبلعني من الاحراج والكسفة .. انا لو كنت عارفة ما ح يسلمو علي .. ما كان ختيت نفسي في الموقف ده ..

بس طوالي قلت للامين يلا نمشي يا الامين .. والناس ديل ساكتين .. بس امو اللهي حبوبتك .. قالت ليهو ان شاء الله يا الامين ربنا يحرق قلبك ..زي ماحرقت قلب عايدة ..

وامها هي قبلت علي انا .. قالت لي كمان بلاخجلة جاية تسلمي علينا يسلموك للبوليس ان شاء الله .. يا الهاملة يا المقطوعة .. بس قامن هاجن كلهن مع بعض ..

وبقن يتحجزن دايرات يهجمن علي .. والامين مسكني من يدي .. ووقفني بي وراهو .. وقال لهن كدي واحدة التجي جاي .. وطلع بي فوق .. فتح باب الشقة ودخلني .. جوة وانا بس انقديت بالبكاء ..وكنت متفاجئة مفاجأة غريبة.. لاني كنت مفتكرة انو الناس ديل على الاقل يتعاملو معاي بي اصول ..

ماشرط يحبوني ..بس يكفو شرهم .. بس انا الحمد لله مارديت بي كلمة وكنت متبكمة بس ومتفاجئة وخايفة ..

لمن دخلت بيتي .. قلت لي الامين .. انت يا الامين ليه ماوريتني انو الموضوع عامل كدا؟؟..

انت موش قلت لي الناس ديل رضيانين بي زواجك ..

قال لي اقول ليك الحقيقة .. الناس ديل اساسا" ماعارفني اني اتزوجت الاقبل يومين .. دي الحقيقة ..

قلت لكن يا الامين الحقيقة بتنفع شنو بعد كدا؟ .. هسي كيف انا اقدر اعيش مع الناس ديل كدا؟؟ والله كدا صعب ..

انا بخاف والله.. والله انا كدا مابكون مطمئنة.. يعني انت لو ما معاي الليلة كانو دقوني ..

المهم يافتحي انا من خلال كلام الامين ..عرفت انو غشاني وغشا مراتو واهلو .. وماكان صريح.. انا لو الامين كان صريح معاي من البداية .. كان ممكن يكون في كلام تاني.. لكن في النهاية نقول الحكاية كلها لي قسمتك انت ..

المهم انا قعدت في الطابق الفوق زي المسجونة ..ومابقدر امرق لانو لو نزلت بنزل في حوشهم هم .. وبقيت خايفة..

الامين من يطلع انا بقفل بابي علي .. وتاني مابطلع الا لمن يجي .. حتي حاجاتي بتاعة الاكل والشراب بجيبهم لي الامين لمن يجي بالليل ..

ويومو المايكون معاي .. انا بكون قاعدة براي ومتوترة .. ولو احتجت لاي حاجة مابقلقاها ..

وبدت معاي رحلة الاحقاد والقوائل والمطاعنة .. وبقيت عايشة في جو .. ان شاء الله ربنا مايقسمو لي مسلمة ..

وقصص ومأسي لو حكيت ليك من هسي لمتين مابتخلص .. بس احكي ليك اخر واحدة ..

يوم الولد الصغير الاسمو ياسر ده .. دق لي الباب ..

فتحت ليهو الباب.. ودخل جوة بقيت اتونس معاهو .. كان عمره زي عشرة سنة او اكتر شوية .. دخل لقيتو ليك ولد ظريف.. ومن اول يوم حبيتو .. عملت ليهو عصير .. وحاولت اولفو علي عشان يجيني طوالي .. لاني كنت خايفة من الوحدة دي تسبب لي مرض نفسي ..

بس هو قاعد يشرب في العصير.. امو وخالتو جن داخلات .. ومسكن منو الكباية كشحنها وكسرنها .. والام شاتت العدة القدامها بي كراعها ..

وانا مشيت اتكرفست في الكورنا خايفة منهم .. ونبذوني وشتموني .. وقالو لي سقتي الولد عايزة تسمميهو .. قلت ليهم والله جاني براهو .. والله انا دايرة اديهو عصير بس .. اسممو كيفن يعني؟ انا مابخاف من الله اسمم لي طفل.

خالتو قالت لي ابدا انتي سقتيهو بالدس .. اظنك عايزة تتخلصي منه .. دي جريمة اختطاف ..

الولد قال ليها لالا انا جيت براي .. عايز اسلم علي خالتو .. امو قالت ليهو يلا امشي قدامي.. انت مابتفهم اي حاجة ..

وساقنو ومرقن .. وانا برجف اليوم داك كلو لغاية المساء ..

ابوك جاء .. هايج وكورك فيني .. وقال لي ده شنو العملتيهو ده ؟

انتي شكلك كدا موية تحت التبن .. قلت ليهو في شنو يا الامين؟

قال لي كمان بتسألي؟؟ زي الكأنك ماعارفة ؟؟..

قلت ليهو وريني مالي.

قال لي انتي سوقتي ياسر بالدس ..وقفلتي الباب عليك وسقيتيهو عصير صح؟

قلت ليهو ابدا .. ياسر جاني براهو.. وقعد اتونس معاي .. وصح اديتو عصير.. والباب فاتح .. المهم حكيت ليهو بالحصل

قال لي دقيقة دقيقة . العصير كبيتي ليهو فيهو شنو؟

قلت ليهو ولا اي شي.. من علبة التانج الانت جبتها .. عملت ليهو عصير عادي بالسكر .. اهو الولد ناديهو وأسأله..

قال لي بس كلام الولد بختلف من كلامك ده .. الولد قال انتي سوقتيهو من جنب الباب .. وقفلتي الباب عليهو .. وقال ليك انا ماشي.. قلت ليهو لو كوركت بخنقك ..

وكبيت ليهو عصير .. وكبيتي حاجة سوداء غريبة في العصير .. هو ماعرفها شنو؟

طيعا يافتحي انا حسيت بانو روحي بتتسلا من جسمي . من شدة الكذب والافتراء ..

وقلت ليهو لاااااااااااا اله الا الله .. اللهم لا اعتراض في حكمك يارب .. الولد قال ليك كدا يا الامين؟؟

قال لي ايوة قال كدا .. كمان طفل زي ده بعرف يكذب قدر ده ؟؟ ومشكلتو معاك شنو؟؟ عشان يقول فيك تهمة قدر دي ..

قلت ليهو اسمع يا الامين ..

انا قلت ليك الكلام ده ماحصل.. ووريتك الحصل .. انت حر.. تصدقني ولا تصدق الولد .. اساسا" اذا كان مافي ثقة بين الزوجين ..يبقى الحياة ماعندها طعم .. قام ضربني كف في وشي .. انا تاني بقيت ملفاهمة حاجه ..

قال لي بتتلاءمي علي .؟؟

بس انا بحذرك..اووعك تاني واحد من الاولاد ديل ..تطلعيهو فوق هنا ..

قلت ليهو انا ماطلعتو .. لكن تاني لو واحد فيهم دقه لي الباب.. والله مابفتح ليهو ..

ده اليوم الاول يبدا فيهو يتكلم معاي كلام فيهو عدم احترام.. ويمد يدو علي .. انا والله اليوم داك بكيت بكا .. وحسيت بي ظلم وقهر عجيب .. لكن صبرت وسكت .. وابيت احكي لامي ولا ابوي ..

قلت اسامحو وربنا غفور رحيم ..

ومرت الايام .. يوم كنت بكنس قدام الباب في السلم .. الولد ياسر تاني جاني طالع .. طوالي انا قفلت الباب من برة .. عشان مايدخل جوة .. وانا برة طبعا" ..

قام قال لي ياخالتو .. انا عايز اقول ليك كلام سري.. بس ماتكلمي ابوي ولا امي.. لانهم بدقوني لو عرفو ..

قلت ليهو حاضر ياياسر قول .. قال لي انا امي قالت لي كذب على ابوك ..وقول ليهو خالتو اختطفتني.. وقفلتني في الحمام .. وقالت لي لو بكيت بخنقك .. وادتني عصير وكبت فيهو حاجة سوداء..

امي قالت لي لو قلت كدا لابوك.. انا بديك هدية .. بلي استيشن ..

وقالت لي عشان ابوك يطلع المراة من البيت لانها شريرة ..

لكن بالجد ياخالتو.. انتي ماشريرة الشريرة امي .. تقول لي ماتكذب .. وتاني تجي تقول لي كذب ..

انا اسف ياخالتو لاني كذبت فيك ..وقلت كل الكلام القالتو لي قولو .. بس هي برضو ماجابت لي البلي ستيشن ..

ياسر بتكلم وشكلو زعلان من امو ..

انا قلت ليهو ولايهمك ياياسر.. انا ماشريرة.. انا بحبك .. وماتقول على امك الكلام ده . امك ذاتها بتحبك ..

انا بكلم بابا يجيب ليك البلي ستيشن ..

وفعلا لمن جا الامين ..قلت ليهو انا طالبة منك حاجة.. انا كان وعدت ياسر اجيب ليهو بلي ستشين ..وهسي انت منعتو مني .. ومابقدر اشتريهو ليهو.. عليك الله عشان خاطري .. اشتري ليهو واحد .. وقول ليهو ده من خالتو ..

واصلا ماحكيت لابوك الكلام القالو لي الولد .. لانو الولد وثق فيني.. وقال لي ده كلام سري ..

بس وكلت امري لله .. وقلت انا اتعامل بالطيبة وبي اصلي ..

ابوك قال لي جدا بشتريهو ليهو ..

وفعلا اشترى ليهو الجهاز.. وقدام امو.. قال ليهو ده من خالتو سامية ..هي وعدتك بيهو صح؟

قال ليهو صح وعدتني ؟؟ والام ساكتة ماقالت اي شي .. بس من اليوم دا الولد بقى يصرح قدام الناس انو بحب خالتو سامية .. وبتمنى انها تكون هي امو ..

اها يوم ياسر قدام امو وابوهو .. كان بلعب بالبلي ستيشن .. قام قال لابوهو.. بابا انا ماشي لخالتو سامية اسلم عليها ..

امو بدون ماتشعر ضربتو كف .. الولد قعد يبكي .. وقال ليها انا مابحبك انا بحب خالتو سامية .. انتي شريرة وهي طيبة ..

انا هسي بكلم ابوي بالحقيقة يا كذابه ..

قالت ليهو لو فتحت خشمك ده بكتلك .. ابوهو ساقو قال ليهو تعال ياياسر .. وجابو لي فوق .. قال ليهو اها ياياسر انا جبتك .. احكي لي ماتخاف .. الحقيقة شنوالعايز تقولا لي؟؟ ..

قال ليهو شفت يابابا ..امي قالت لي كذب على ابوك.. عشان يطرد المراة من البيت .. لانها شريرة .. حكا ليهو كل الكلام. وكان الكلام قدامي .. ابوك يسمع في الكلام .. وشكلو خجلان من روحو .. لانو استعجل وظلمني ..اول حاجة عاين لي كدا .. وقال لي انا بالجد اسف ياسامية ..

وقام طوالي نزل ليها تحت.. ماعارفة عمل ليها شنو.. المهم كانت شكلة لي رب السماء .. وطبعا كلها اتطربقت في راسي انا ..

والناس كلهم اعتبروني انا السبب ..

والمراة ساقت اولادها ومشت اهلها.. وقالت ليهو تاني مابتشوفني لو ماطلقت المراة دي ..

وشكت لي اهلها .. وامو قاطعته .. واخواتو قاطعوهو .. والمراة ماخلت زول ماشكت ليهو .. شي كضب وشي صاح .. وقالت فيني مالم يقله مالك في الخمر ..

واخوانها واعمامها جو للامين في بيتو .. وكانو عايزين يدقوهو لكن في النهاية اتفقو معاهو على انو.. اما يطلقني

او يطلق ليهم اختهم ..

يتبع...