وفاتت حياة بالبسكوت للمطبخ الي جان بي باب يودي للبستان
طلعت من الباب وضلت تركض وتباوع وراهة خاف احد يشوفهة الى ان وصلت للباب الجان يحرسونة ثنين
لكن لطف الله همة جانو نايمين مشت على كيف منهم حتة ميسمعوهة
وبعدين ركضت شالت الشال حياة وتلثمت بي حتة لحد يشوفهة ويعرفهة الفصلية حياة
وضلت تركض الليل كلة الى ان بعدت عن السلف وصار الصبح وهية تلهث من التعب وبطنهة صارت مثل تعصر بيهة من الوجع فشافتهة مرة گلتلهة
يا يا بنيتي بيج شي شمالج ولزمتهة
حياة وهية يتعرق وجهة وتبجي : اخ خالة راح اموت بطني موتتني من الوجع
المرة : تعاي بنيتي تعاي تشوفين ذاك البويت هذة مالي دتعاي وياي استريحي يمي من ترتاحين روحي مامنعج
حياة وهية تلزم بطنهة گلتلهة اي خالة الله يطيج العافية بس انة ماگدر امشي من الوجع وضلت تبجي
لزمتهة المرة وضلت اتمشي بيهة علكيف الى ان وصلت للبيت
والمرة جابتلهة گلاص مي وشربت جابتلهة فراش گلتلهة اتمددي هنا وانة اجيبلج لگمة تاكليهة امبينة انتي ماماكلة شي على لحم بطنج
حياة گلتلهة خالة خاف سويت زحمة
جاوبتهة لابنيتي لازحمة ولاشي بعد گلبي ارتاحي اعتبري البيت بيتج
راحت المرة وجابت الحياة اكل وحياة گعدت تاكل عبالك صارلهة سنة ما ماكلة والمرة تباوع عليهة
گلتلهة ابنيتي انتي شنهي قصتج لان حالتج هاي موزينة وانتي موش على راحتج
عاد حياة. ضلت تكح وتركت الاكل وگالتلهة خالة انة اريدن اروح
جاوبتهة گلتلهة بعدج مامكملة لگمتج كملي وارتاحي ورحي
وانة اسفة خاف ضوجتج
حياة : لاخالة بس انة وضلت تبجي
المرة : ها حبيبة لاتبجين كملي لگمتج واذا تردين احجيلي
حياة حركت راسهة بمعنى اي
كملت اكلهة بس نعست وگالت للمرة خالة انة تعبانة اريدن انام عادي لوخاف عندج احد بالبيت ومايصير ابات
جاوبتهة گلتلهة لايخالة لاتخافين انة ماعندي احد بس انة. باتي يمي يوم يومين حتة لو العمر كلة انة غابلة
تيلة نامي انتي تعبانة
حياة : الله يخليج خالة مادري شلون اجازيج
جاوبتهة لا بعد رويحتي انة من شفتج حسبتج بنيتي
حياة يعني عندج بنية
اي عندي بس اطتج عمرهة ماعلينة هسة يلة نامي
اي خالة
نامت حياة وهية تعبانة
من جهة ثانية الشيخ محسن
كعدت رسلية الصبح ومالگت حياة ضلت ادور عليهة هية وبناتهة مالگن حياة
اتسودنن راحن للشيخ وگللة شيخنة الفصلية منهزمة
والشيخ ضل ايصيح ويلم الزلم وراحو يدورون عليهة لكن مالگولهة اثر
الشيخ گال ياگاع انشگي وطميني انة الشيخ محسن ماگدر لمرة فصلية اطم روحي هسة صاح الزلم
وگاللهم الفصلية حياة ترحون تخبرون السلف گلة دمهة مهدور بين العشاير واليشوفهة يذبحهة
بعدين راحو لبيت عم حياة ابوضياء وگللولة على حياة
وهددة الشيخ لزمة بثنين اديه من دشداشتة گالة اذا ضامين الفصلية يمكم حياتكم انهيهة
ابو ضياء : الله وكيلك احنة ما ضامينهة عليكم حتة اذا اجتنة احنة نذبحهة هاي العار واذا ماتصدگون انة اروحن وياكم اگلب عليهة السلف گلاب
الشيخ گالة بصياح اسمع ابو ضياء خاف انتة لبالك انة
مادري حياة موش بتك وانتم اطيتونياهة اسمعني زين
اذا حياة ماردت احسبوو انة وياكم اگوام. واخليهة تصير كاتل ومكتول
ابو ضياء ضل ايمتمت گالة هاا على بختك شيخنة
جا احنة شدرانة بحياة راح تنهزم
كل هذة وحياة ماتدري الى ان گعدت الصبح والمرة
گالتلهة مادريتي ايگولون اكو فصلية اسمهة حياة
منهزمة من الشيخ محسن بالسلف وهدرو دمهة بين العشاير واليلگاهة يكتلهة
هنا حياة وجهة صار يطي الوان وضلت ترجف ودموعهة تجري
المرة شكت بحياة فگلتلهة خالة انتي سالفتج موش خالية تحجيلي خلي افهم
حياة وهية تبجي لزمت ايدة المرة الي اسمة.ام فاطمة گلتلهة خالة احلفج بالعباس ابو فاضل لاتحجين لحد الااحجي الج ولا توديني للشيخ من راح تعرفين سالفتي
ام فاطمة : سرج ابير ابنيتي احجي لاتخافين انتي بأمان
وبعدين حياة حجتلهة كل شي صار بيهة
ام فاطمة ضلت تبجي على حال حياة والي صار بيهة
وگلتلهة هنا ما ائمن خافن احد يشك بيج عندي نوب انة انذبح وانتي هم وابنج
مشينة انروح لبيت بتي الماتت هوة فارغ ابغداد هناك محد يعرفج ويشك بيج
حياة : خالة انة ماريد اورطج ابمشاكلي انتي كفيتي اووفيتي بس انة ماريدن يجرالج شي من وراي
ام فاطمة لزمته من وجهة وگلتلهة شوفي انتي دامج اجيتيني وتحاميتي عندي انة ماهدج لو هسة اموت
ولاتخافين انتي منا وهيج ابنيتي وبامانتي يلا هسة مشنية لبغداد
راحن لبغداد وهناك ياهو اليسأل ام فاطمة على حياة دگلهم هاي بنيتي حياة رجلهة مات هناك بالديرة وهناك مالهة احد وانة جبتهة وياي
ورة مرور سبوع وحياة گالت لام فاطمة اتريد اتروح
لوادي السلام لمگبرت النجف.اتزور الامام علي عليه السلام وتشوف اهلهة هم وام فاطمة قلبت
گلتلهة وانة هم اريد ازور ابو الحسنين وهم اشوف گبر ابنيتي
اتفقن يرحن نامن وگعدن ثاني يوم وتوجهن لنجف الاشرف
دخلن للحضرة مال الامام وحياة ماگدرت تمشي خنگتهة العبرة وگلت لام فاطمة انة شوية وارجعلج اوگفلج بهذة المكان
راحت لزمت الشباك مال امام وضلت بس دموعهة تحجي وجعهة بعدين گعدت اگبال الشباك تبجي وتشكي للامام على الي صار بيهة
بعدين صلت وقرت الزيارة وراحت لگت ام فاطمة منتضرتهة
حياة : ها خالة زاريتي
ام فاطمة اي حبوبة بس ماگدر الزم الشباج لان حصرني النسوان المهم صليت وقريت الزيارة هية اهم شي النية
حياة: صح كلامج تيلة هسة نروح للگبور انشوف اهلنة
گالتلهة اي بنيتي
راحن للمگبرة ام فاطمة راحت على گبر بتهة رشت عليه مي ورد وبخور وضلت تبجي
وحياة وصلت لگبر امهة او ابوهة مدفونين صفة
لزمت گبر ابوهة وتبجي تعاتب بي وتگلة ها بوية شفت اشسوو بيه من بعدك
جا انتة ليش ماخذيتني وياك ليش تركتني بهاي الدنيا الناسهة كلهة ذيابة شفت بالمدللة ماتك شسوولهة شفت اشلون اطوني فصلية بعدين شبگت الگبر وضلت بجي بعدين
لزمت گبر امهة. وضلت تقرة شعر بس سوتة مثل النعي گالت الامهة
يمة تدرين بغيابج انة شگد بجيت
دموعي خلصن والحزن مليتة.
تمنيت گبري وية گبرج يوم دفنوج
حتة ابقة بحضانج جوة التراب
يايمة العزيزة شلون ترحين
عفتيني ويعالم حيل ضلام
يذبحوني وصحت يايمة وينج
انة مشتاگة الحنانج هسة حيل
بگد حنان الوطن من يحضن شهيد
( بقلمي toma toma. )
وشبگت الگبر وضلت تبجي بحرگة بعدين اجتهة ام فاطمة گلتلهه بس يابعد گلبي بسج بجي مو وجر گلبي من اشوفج هيج امشنة كافي راح تموتين روحج
جاوبتهة حياة وهية تمسح دموعهة وصوتهة الرايح من تلبجي گلتلهة الله يخليج الية انتي صرتي امي وابوي لاتركيني
ام فاطمة : اي ييمة وانتي روحي شلون اترك رويحتي يلة بنيتي رشي ماي ورد على اهلج وخلي البخور لان الدنيا ضلمت خلي نروح
رشت مي ورد وبعدين رجعن لبغداد وحياة فرحت لان زارت اهلهة وحست جن مثل الحمل من گلبة
لان هية شكت اهمومهة لامامهة واهلهة
مر الزمن وحياة اشتغلت خياطة يجنهة النسوان وتخيطلهن وام فاطمة بقت وياهة وماتركتهة ابد
وحياة بطنهة تكبر يوم عن يوم وقربت ولادتهة
اما السلف دور ودورو على حياة مالگوهة
العشيرتين خسرو ارواح هواي ماتت الى ان فقدو الامل برجوع حياة وحل المشاكل گالو
سالفة حياة لزوم.تفض لان خسرنة شباب بعمر الورود
قررو يدفعون للشيخ افلوس فصل بدال حياة
والشيخ بالبداية ماقتنع بعدين الشيوخ قنعو گالولة
شبابنة كلهة راحت بسبة حياة لزوم نسد هل طلابة
قبل الشيخ محسن مر الوقت والناس هدت
لكن الشيخ محسن تمرض وحالتة صارت موزينة وضل گاعد بالبيت ميطلع لان هوة يستحي
يباوع بوجه الناس من بعد مانهزمت حياة
ضل هوة يعتبر هذة الشي عيب علي لان ماگدر لابنية
واخر ايامة حس بالذنب والندم على الي سوا بحياة
لان هية مضلومة
الى ان اجة يوم گعدو الصبح ولگو الشيخ ميت لكن لگو كاتب وصيه قبل ليموت كاتب بيهة انو هوة ندمان على
اذية حياة انو هية ضحية العادات والتقاليد الضالمة الي خلتهة تفكر تنهزم لأي مكان فقط علمود تهرب من هاي التقاليد الي مو منصفة بحقهة
وكاتب بيهة انو حياة اخر ايامهة تمرضت اذا جانت عايشة او ميتة فنص املاكي بأسمهة وتمنى ادگوللهة تسامحني
حزن السلف لموت الشيخ مالهم الشيخ محسن وبناتة ضلن يدگن ويلطمن على ابوهن الي عافهن
مرت سنة على وفاة الشيخ محسن ورسلية مرتة
بقلمي #toma toma
___________________________________
خلص البارت وهذة البارت سويتة طويل
لتنسون تصوتون وتفاعل اريد اكثر
يلا حبايب باااااي