🌞أصبحنا وأصبح الملك لله🌞 ..
سمعت سميتي بجهد ونضت قافزة وشعري شاد الريزو، لقيت وجهو فوجهي مخنزر ..
مراد : واخا تكوني ميتة غاتسمعيني 😠 من الصباح كانبرح حدا وذنيك
أنا : شنو بغيتي ؟
مراد : صاوبي ليا الفطور، راه غانتعطل
أنا : واسير صاوبو راسك ولا قولها لخواتاتك، وخليني نعس
مراد : وااا تكعدي لانعس مك بمرة 😠 مزوج بمي ولا خواتاتي
أنا : والله حتى حشومة علييك 😭
مراد : وا نوضي باراكا من العكز
أنا : شنو فيها يلا خليتيني نعس شوية، أصلا ماعندي والو هنا
مراد : عندك وعندك بزاااف، يالاه سبقيني للكوزينة، غاتلقاي مي تما توريك كل حاجة فين كاينة، سربي غانلبس حوايجي نلقاك وجدتي ليا ماناكل
أنا : اهئ اهئ 😭
مراد : غاندير ليك علاش تبكي بصح 😡
نضت كانسب فخاطري ونبكي ونتغدد، حتى حلات ليا النعسة وجا وقف عليا بحال شي جن يعطيه موصيبة، رميت عليا كسيوة من الفوق حد الفخاذ وخرجت خليتو كايقلب على مايلبس، خرجت من البيت وجاني البرد 😨 اااو ياك الصيف هادا، كانت الدنيا مغممة واحد الجو فشكل، مشيت عندهم للكوزينة لقيت مو وفوزية فيها، كانو كايهضرو شافوني وضربو الطم ..
أنا : صباح الخير
فوزية : على سلامتك ا لالة فاش فقتي، راه 6 هادي 😡 ساعة وحنا نتسناو فالفطور
أنا : وعلاش كاتسناوه؟ فطرو شكون حبسكم
الأم : غاتصاوبيه نتي ابنيتي
أنا : هه حلمو
مراد (جا من ورايا) : فرررحة 😠
فوزية : واهانتا اخويا كاتشوف رضان الهضرة حادكة فيه
أنا : فين كاين الحمام ؟
فوزية : اشبغيتي شي حمام فهاد الوقت ؟ حتى وكان تسالي شغلك وخرجي حطبي ليه
أنا : شنو شنو ؟ مافهمتش
مراد : اجي نوريك فين كاين وهزي معاك الما، راهي سطيلة عمريها من داك البرميل
أنا : علاش غانعمرها؟ ياك الما كاين تما
مراد : لا الدار مازال مادخلنا ليها الما
أنا : العجب 😕
الأم : واش غاتغسل دابا ؟
مراد : لا ا مي هي كاتسول على الكابينة
فوزية : ااااه اوا تقولها ديريكت
الأم : ها الما سخون فهاد المقراج
أنا : لا مابغيتوش 😑
هزيت ديك السطيلة وهزيت طاسة عطاتها ليا مو عمرت بيها وتبعت الغول، ضرنا ورا الكوزينة ولقينا تما واحد الدخلة ..
مراد : هاهي وشعلي الضو راه فيها
أنا : اوا الحمد لله فاش كاين فيها 😑 يالاه سير فحالك
مراد : 😡
هو مشا وأنا شعلت الضو من برا ودخلت لديك الطواليت وسديت الباب، كانت كلها بالقصب ومنظرها حتى هي كايخوف 😭 قديت حاجتي وتوضيت وخويت داك الما اللي بقا فالسطيلة وخرجت وأنا كانضحك على راسي ههه شوف غير المرحاضات اللي وليت كاندخل ليهم كيف دايرين، رجعت عندهم خديت الصابونة والما عاوتاني ومشيت غسلت يديا ووجهي ولقيت فوطة صغيرة معلقة فالحبل مسحت بيها ودخلت عاوتاني عندهم ..
الأم : ها القصرية فين كاينة وها الدقيق، صاوبي شي مسيمنات للفطور راه عزاز على ولدي مراد
أنا : المسمن 😨
فوزية : اه مالك صمكة ؟
أنا : لا سمعتها 😤 ولكن ماكانعرفش ليه
فوزية : اويلي 😮 وشنو كاتعرفي ؟
أنا : لوالو، ماكانعرف لحتى حاجة
فوزية : شفتي ولادك ا مي وباش مزوجين جايبين عيالات فنيانات مايعرفو لا يحنيو لا يدنيو 😡
الأم : صافي سكتي نتي، اجي جلسي هنا يدي بيدك حتى نشوفو واش غاتعلمي شي حاجة
حركت ليها راسي وجلست حداها فوق واحد الخنيشة ماعرفت باش معمرينها كايقولو ليها قعادة، وهي جلسات على ركابيها وهزات الما وبدات تخويه وتخلط وأنا مراقباها شنو كادير، جمعات داك الدقيق كامل وبدات كاتدلك فيه كيف قالت، كاتخدم وتقوليا كل حاجة شنو هي وأنا منتابهة معاها، وراتني زيت وجبتو ليها هو وزلافة، دارت العجينة فالزيت وبدات تقطعها ووراتني كيفاش وتعاونت معاها، كاندير وحدة وكاتشدها هي تعاودها، بدات تسرح فيه وتطويه وأنا حالة فمي، شعلت ليها البوطة بزز وهي مفقسة، دارت فوقها مقلة ودارت فيها زيت والي كرساتها كاتحطها فيها طيب وتقلبها وأنا هازة معيلقة كانقلبهم بيها حيت حرقوني، الكوزينة سخنات وأنا وليت حالتي بالعرق، بغيتها غير ايمتا تسالي، وقفاتني فوزية وراتني كيفاش نقاد أتاي وحطينا العسل والزبدة والزيت وسيفطوني ديت الطبلة للبيت فين جالس مراد، لقيتو شاد تيليفونو كايلعب بيه ..
مراد : نص نهار باش يوجد الفطور 😠
أنا : واراه عاد ساليناه، نتا عارف باللي ماكانعرف ندير والو وماماك وراتني كيفاش
مراد : اوا على الله تعقلي
أنا : 😤
بديت نحول معاهم، هزيت صينية فيها أتاي والكيسان ورجعت للمسمن والبلاطو اللي فيها الطبيسلات وهوما جلسو حداه مربعين يديهم ..
جلست حتى أنا.. والأم شدات الصينية قدامها كبات أتاي وعطات لكل واحد كاسو، هز مراد المسمن وبدا كاياكل ويتبنن ..
مراد : الله شحال توحشت مسمنك ا ميمتي
الأم : بصحتك اوليدي، اليوم قاديتو أنا ومن غدا غاتولي تصاوبو ليك مراتك
فوزية : كانت قاتلاك ا خويا بجوع وكانقول مالك ضعافيتي
أنا : 😡
مراد : فين خدوج ورابحة ؟
الأم : فطرو قبيلة بالخبز طيباتو رابحة ومشاو للزريبة، غير نساليو وندي مراتك تشوفها ونوريها شنو دير
أنا : فين؟
مراد : فين كاينين الكباش والبقر
أنا : ااااه 😄
فوزية (بصوت خافت) : كاضحكي هه دابا نشوفو شنو غاديري فاش تمشي ليها
الأم : سكتي، اوا ا وليدي بعد غدا معروضين لعرس سي احمد
مراد : اااه هي صافي كمال نوا
الأم : اييه حتى شحف باه
فوزية : مراتك غاتمشي معانا؟
مراد : راهي سولوها
الأم : عندك بعدا شي تكشيطة باش تبرزي؟
أنا : ماعنديش مع البلدي، ولكن نحضر بحوايجي عاديين
مراد : شناهوااا، والله حتى نكردهم ليك 😡
أنا : علاش مالهم؟
فوزية : عيب عندنا المرا تلبس الرومي وتزير، صافي غانعطيك واحد تشاميرة على شكل قفيطين، عمري لبستها وعلى الله تجي قدك
أنا : ففف
خنزر فيا مراد وقلبت وجهي، سالاو ونوضوني نجمع الطبلة، رجعت الماعن للكوزينة ووقفات عليا فوزية باش نغسلهم، عمرات ليا بانيو فلأرض بالما وحطات ليا طاسة فيها تيد وشبكة وجافيل ..
فوزية : غسليهم مزيااان، وهاني واقفة كانشوف
نزلت جلست فوق القعادة وبديت نغسل فيهم ومع كثرات ليا جافيل زلق ليا الطبسيل الكبير وتهرس ..
فوزية : ويلي ويلي على بنت الحراااام غاتهرس كاع الميعنااات 😠 كنتي تجيبي فيهم من دار باك
أنا : واراه زلق ليا مع الرغوة، وأصلا غير طبيسيل مادا ماجاب
فوزية : اييه طبيسيل، ساليهم ونوليو ناكلو بصباطك 😡
أنا : اييه علاش لا، نسلفكم صباتي كولو فيه عادي وراه الكلاب وكاياكلو فيه باش حسن منهم نتوما؟
فوزية : دابا حنا ولينا كلااب يا بنت الميسخة 😠
أنا : ايييييه بزااااااف عليك ماما توصليها حتى للتراب اللي كاتمشى عليه، عروبية خانزة، يحساب ليكم البارح درتو الحمية وزيرتوني صافي غانحدر ليكم الراس والله حتى نوريكم فرحة بنت لالاك نجاة علاش قادة 😠 وفوتي ساحتي لانوض نقود معاك السوايع
فوزية : هاي هاي تحل ليك الدلقوش، والله ماتبقى فيك غير بلاتي، حتى يرجع خويا فالغدا
أنا : أغلى مافخيلك ركبيه، غاتخلعيني بخوك 😠
فوزية : وهاهي عقلي فيها (دارت صبعها ففمها ومسحاتو فالثلاجة بنت المعفونة زعما كاتحلف عليا)
أنا : معيفينة تفوو
كملت دوك الماعن ودرتهم فشبكة حتى تسقطرو ..
فوزية : هزي هاد البانيو ورشي بيه الدار وشطبيها
أنا : نرش بيه؟
فوزية : اه رشي، حتى هادي ماعرفتيهاش؟
شداتو من عندي وخرجنا من الكوزينة ورشات شوية ورجعاتو ليا نكمل، رشت وخويتو وشداتو من عندي وعطاتني شطابة ديال العواد الرقاق ولا مانعرف شداكشي باش مصاوبينها، ووراتني كيفاش، بديت نشطب وظهري صرني بغا يتقسم عليا، نشطب شوية ونوقف نتجبد ونستاراح ونكمل وهي كاتنكر ورايا، ماكرهتش نشطب بيها هي نيت باش نفش غليلي 😠، ساليت وعطاتني سطل فيه الما والجفاف خوات فيه معطر، جفيت بيه وجبهتي دايزة بالما، خليت الجفاف قدامها وخويت السطل بعيد وشللتو وحطيتو فواحد الركنة فين جامعينهم ..
فوزية : ودابا تبعيني لهاد البيوتا، تحركي
أنا : اللهم طولك يا روووووح
تبعتها، بدينا بالبيت اللي كنا جالسين فيه، هي واقفة وكاتآمر فيا شنو ندير، وأنا تابعاها حتى نشوف هادشي فين غايخرج، حيدت المانطات اللي مفرشين ونشرتهم فالحبل يتشمشو، مسحت الفيترينا والحيوطا من العنكبوت والشرجم والباب وسيقت البيت وجففتو، صافي كانحس براسي دكدكت بالمعقول، درت نفس الشي مع كاع البيوتا وبديت نرجع لكل واحد نشوفو واش نشف ونفرشو من اللول ونرش المعطر ونطلق الريدويات حتى ساليت ولا نقولو أنااا تساااليييت ..
فوزية : ودابا تبعيني للزريبة عند مي وخواتاتي، وسربي دغيا راه مازال تابعنا الغدا قبل مايرجع خويا
تبعتها وأنا ساكتة، خرجنا من الدار والحال بدا يسخن ولحمي كاياكلني بديك الغبرة وشعري صهدني، ضرنا ورا الدار ولقينا واحد البلاصة كبيرة بزااف ضاير بيها القصب داك الغليض، حلات الباب ودخلنا وهي تعطيني واااحد مولاتي الريحة ..
درت يدي على نيفي وخسرت ملاميحي دليل على قرفي ..
فوزية : شدي لبسي هاد البوط باش تعرفي تمشي
شديتو من عندها ولبستو فرجليا وحطيت صندالتي فالباب ورجعت يدي لنيفي ودخلت معاها، بانو ليا الكباش فجهة والبقر فجهة، خدوج شادة بقرة كاتحلبها حيت بان ليا الحليب نازل للسطل تحت، ورابحة كاتعطي للكباش الماكلة ديالهم، والأم كاتشطب واحد الجهة، كان الزبل بزاف والفضلات ديال الحيوانات وداكشي مغيس، داكشي حالتو تخيلوه نتوما 😑
رابحة : على سلامة عروستنا، سيري شدي الشطابة من عند مي وكملي داكشي اللي بدات
أنا : لا لا اختي أنا غانخرج فحالي، شنو هاد الحالة هادي شنوو 😡 والله مانحط فيها يدي بالله واخا تقتلوني، حتى لهنا وباااراااكا الشقا اللي تافقنا عليه راه درتو وباش تزيدوني لهاد الويل والله لاااا كااانت ليكم يااالاااه .. تفوو خراااا كيف داير 😠
خليتهم حالات فامهم وأنا خرجت من تما كانغوت ونسب، طلع ليا الخرا لراسي بزاف هادشي، داروني جفاف فيديهم، الله ينعل ديلمو زواج كااااع، اللهم الزنقة ولا هاد الحبس، حيدت داك البوط رميتو هاكاك عامر، لبست صندالتي ورجعت للدار، وشديتها ديريكت لبيتي، دخلت وأنا معصبة خاصني غير معامن، قهراتني ريحتي وهزيت فوطتي والصابون والشامبوان، المهم تخوس فيها كاع اللي نحتاج فالدوش، خرجت ومشيت ديريكت للكوزينة هزيت الما هاكاك بارد، بالفقسة ماعقلتش على راسي، دخلت للطواليت وبديت نفرك حالتي بكيس الصابون حتى ولا لحمي حمرر تجننت، نزلت شعري مزيان وعاودت الصابون وتطرفت وتشللت، الما كلو خويتو ليهم، لويت عليا فوطتي وجمعت تخوستي وخرجت لبيتي عاوتاني، نشفت شعري ولحمي ولبست دوبياس زرقين وكسيوة بيضة خفيفة وقصيرة وجمعت حوايجي اللي مرميين حطيتهم فشبكة لقيتها تما فيها حوايج داك القواد 😡، شعلت التلفازة وطلقت الأغاني وجلست نتنفس، ماعرفتش شحال داز ديال الوقت وأنا كانتصنت ونقلب فقنوات الأغاني حتر دخل سي السيد ..
مراد : شنو كاديري هنا ؟
أنا : كاتشوفني شنو كاندير
مراد : ومالكي معاهم عاوتاني
رميت التيليكوموند ووقفت قدامو بعصبية حيت صافي وصلات للحد ..
أنا : شوف ا ولد الناس نقوليك جوج كلمات وضورهم مزيااان فراسك، يلا جبتيني هنا باش نخدم عليك نتا وعائلتك وتكرفسو عليا وتحرثو عليا وتزيدوني لشي حوايج عمرني شفتهم ولا حتى سمعت بيهم فرجعني لعند بابا اللهم الذل ديالو هو ولا ديالكم نتوما؟ ولا رجعني غير للمدينة وأنا نعوم بحري حيت بصراحة هادشي طلع ليا فراسي وبزااااااااف اااااوووو بزاف هادشي عليا، (بديت نحسب ليه بصباعي) غسلت الماعن وختك بلعاني كثرات ليا جافيل حتى ولا كايحرقني وزلق ليا طبسيل دارت ليا عليه حالة وسبات ليا ماما وكاتهددني من الفوق وسكت، عاود زيداتني نشطب الدار كلها وأنا ظهري كان غايتقسم عليا وصبرت حيت تفكرت كلامك، وعطاتني سيقت وجفيت وسكت، وداتني للبيوت كااااااااملين اللي عندكم خملتهم وعاود فرشتهم ولحمي تغبر وعراق وولات فيا الحكة وصبرت على الوسخ، ولكن باش تديني لديك القذارة وتقوليا شطبي الفضلات ديال الحيوانات لا ثم لاااا، رطبت راسي ودرت بكلامك وقلت علاش اللي حتى أنا مانتعلمش شغل ياك وليت مرات الراااجل وعندي مسؤولية نتحملها ولكن تعطيوني كثر من جهدي والله لاااا كاااانت ليكم ودابا دير اللي عجبك ولا بغيتي ضرب عاوتاني هاني قداااامك لحمي ولف العصا .. صبرت ليك لهيه وزيد حتى هنا ماشي فطاقتي ..
بقا هو ساكت وكايشوف فيا وكايسمع ليا بلا حتى رد فعل، أنا بالزربة اللي زربت فالهضرة وليت كانهج، ومشيت جلست فطرف السرير وبديت نبكي حيت بصح تخنقت وتذليت وتحكرت، سمعت الباب تسد عرفتو هو اللي خرج مشية بلا رجعة انشاء الله، أنا بقيت فبلاصتي بكيت حتى خويت قلبي وحسيت براسي ارتاحيت شوية فاش خرجت ليه ديك الهضرة، وصل الليل وهو مارانش ليه الأثر وأنا جاني الجوع وكرشي ولات كاتغوت، ومابغيتش نمشي عندهم نطلب ليهم الماكلة ماحاملة حتى نشوف وجاههم، صبرت راسي حتى يجي هو نيت ويمشي يجيبو ليا مانقدرش نغضب والنعاس مايجينيش 😭 نضت كانمشي ونجي فالبيت حتى الجلسة مارتاحيتش فيها، داز بزاف ووليت نحس بعيا النهار وعينيا غايتسدو، تكيت فوق الناموسية وبقيت مقاتلة مع النعاس باش نبقى فايقة، سمعت الحس عرفتو هو اللي جا ونضت وقفت، دايرة يدي على جنبي، حل البيت وحيد الريدو ودخل، شفتو وحليت فمي، ماكان قاد حتى يوقف على رجليه، دخل بسبرديلتو كايتمايل، حتى وصل عندي وضرباتني ريحتو، ريحة الشراااب 😨 ..
شاف فيا وعينيه حمرين وناعسين، مد يديه ودوزها على حنكي كايلمسو وأنا غير كانشوف فيه، عينيه مدمعين لوى يديه عليا وعنقني وخشاني فضلوعو، أنا مافهمت والو حاولت نبعد عليه وماخلانيش ..
مراد : خليك عافاك
نزلت يديا للأرض وخليتو فوضعيتو، خاشي وجهو فعنقي وريحة الشراب خنقاتني وحتى الجسد ديالو، كانبان بحال بنتو، بقا شحااال هاكاك ونكذب عليكم يلا قلت ماعجبنيش الحال بالعكس، كنت محتاجة شي حد يعنقني ويزير عليا، ضورت يديا على خصرو ومرغت وجهي فكرشو وطلقت العنان لدموعي، تمنيت لو بابا هو اللي معنقني أو خويا، يحسسوني بالحنان اللي افتاقدتو هاد المدة، عييت بزاف وبغيت حضن نرتاح فيه، حضن يحتويني، يدين يطبطبو عليا، قلب يحن فيا، لسان يقوليا كانبغيك ويلا خلاك كلشي أنا مستحيل نتخلا عليك، زدت تعلقت فيه وماهمني والو، ماهمنيش باللي هو نفسو الغول اللي تكرفس عليا، هو اللي تعدا عليا وهانني وذلني وحطم كبريائي وغروري، ماهمنيش، بغيت فقط نعيش هاد اللحظة صافي، ماعرفتش شحال داز علينا ديال الوقت وحنا معنقين بعضنا، بعد عليا بشوية وأنا مغمضة عينيا، مابغيتوش يبعد، وجهو مع وجهي ويديه فحناكي ونفسو مخلطة مع أنفاسي بالرغم من ريحة الشراب اللي غالبة ماعطيتش للأمر أهمية، همس بصوت خافت ومزعزع ..
مراد : سمحيليا بزاف، عارف راسي غالط معاك وحتى حاجة ماتغفر ليا، وضميري كايأنبني
أنا : علاش درتي فيا هادشي 😢 شنو عملت ليك أنا شنو 😢
مراد : شششش دموعك كايحرقوني ا فرحة، كلشي غايولي مزيان كانواعدك
أنا : ولكن علاش تزوجتي بيا 😢 وأنا وياك ماكاتجمعنا حتى حاجة، بيناتنا بزاف ديال الفوارق
مراد : باك اللي خطط لهاد الزواج
أنا : بابا ؟ كيفاش خطط ليه؟ علاه ماشي نتا اللي بغيتيني
مراد : هو اللي عطاك ليا، أنا ماكنتش عارفك أصلا بنتو حتى عرض عليا نتزوج بيك ونهار العقد عاد شفتك وعقلت عليك وحتى أنا تصدمت بحالك ولكن تداركت الموقف وحولت الكرة ناحيتي وتفكرت نهار المطعم ووافقت على كلام باك أنك خاصك التربية من جديد
أنا : 😢😢 بابا اللي رماني اهئ هو اللي باعني ليك وبالرخيص اهئ اهئ لهاد الدرجة كان حاقد عليا وبغا يعذبني 😢
ماصدقتش شنو سمعت منو، دخلت فهيستيرية ديال البكا وهو كايحاول يهدني وعينيه غايتسدو، بكيت حتى ضروني عينيا وولا غير صوت شهقاتي اللي كايتسمع فالبيت، جرني من يديا وتكاني فالسرير وتكا حدايا وحاوطني بيديه ودار راسو فوق صدري ونعس، وأنا بقيت حالة عينيا وكانفكر فالكلام اللي قاليا، الكلام اللي اختارق قلبي بحال السهم، كيفاش بغيت هاد ولد الناس يدير ليا اعتبار وقيمة وبابا بنفسو ماعطانيش قيمة ونقص مني قدامو 😢 كون رماني فالزنقة ولا يعرضني على شي واحد بحال شي سلعة 😢 حتى وحدة ماتقبلها على راسها 😢 ، بقيت هاكاك عينيا فالسقف وعقلي كايرجع لذكريات جمعاتني بالأب ديالي ولا نقولو عدو حيت مستحيل أب يدير هاد الفعلة 😢 ماعقلتش شي مرة تعامل معايا فيها مزيان نو ديما قامعني وديما كايغوت عليا ويجرحني وماكرهش يحبسني ومانشوفش الضو غير ماما اللي كانت كاتحامي عليا ولكن دابا حتى هي تخلات عليا 😢 يمكن باقا واخذة مني موقف حيت عارضت كلامها ووافقت على الزواج وأنا كانت عندي نية ندير الخاطر لبابا لعل وعسى قلبو يرطاب وينسى فعلتي ولكن هو الفعلة اللي دار أخبث 😢 حسيت بالغول كايتحرك وكايردد "سمحيليا سمحيليا" ابتاسمت باستهزاء هه علاش غانسمح ليه مثلا؟ ولكت عادي عادي ربي كبير، بقيت على ديك الحالة الليل كامل ماغمضاتش عيني حتى دخل ضو الصباح وسمعت صوت الطويرات والدجاج، حيدت راسو بزز من فوق صدري وبعدت يديه وهو حال فمو، نضت من حداه ومشيت للماريو جبدت بيجامة شورط حد الركبة وفوقاني نص كم فالشيبي لبستها وجمعت شعري كعكة وخرجت من البيت، ضربني داك النسيم ديال الصباح نعشني، مشيت للكوزينة ولقيت ماماها فيها كاتعجن، شافتني وتعجبات ..
الأم : فايقة بكري!
أنا : وي
الأم : البارح مالك ماجيتي تعشاي
أنا : نعست
الأم : حتى حنا داكشي اللي قلنا وماجيناش عندك، كان طاير ليك
أنا : اممم
الأم : جيبي ديك القعادة واجي جلسي حدايا حتى نعجين وندير شي بطيبيطات
أنا : نعاونك؟
الأم : ياك ماكاتعرفيش ؟
أنا : اه 😔 ولكن غانغسل هاد الماعن بينما ساليتي ونقاد أتاي
الأم : عقلتي كيفاش؟
أنا : اه اه عقلت
الأم : صافي واخا، مراد باقي ناعس؟
أنا : اممم
الأم : ماموالفاش ليه والبارح دخل معطل للدار، ياكما مخاصمين؟
أنا : لا لا
الأم : اليوم غاتجي ديك المجحومة حيت معروضة معانا للعرس
أنا : علاش ماكاتحملوهاش ؟ واش دارت ليكم شي حاجة خايبة
الأم : احيااانااا على ديك اللفعة
أنا : عاودي ليا ..
الأم : اااش غانعاود ليك، كانت كاتبان دريويشة ومربية ومخلقة وغير جات لهاد الدار عروسة بينات على نيابها، هي كاتجي للمرحوم من العائلة، مها بنت عمو، كانو كايجيو عندنا هنا وتاحنا كنا نمشيو عندهم، اوا شفتها وعجباتني وكنت بغيت ناخذها لمراد ومابغاش ديك الساعة قاليك ا مي ماكانفكرش فالزواج ونهار نفكر غانختارها أنا براسي، خليتو على خاطرو وقلتها لزهير ومع هو كان باغي غير يتزوج وافق، اوا مشيت عندهم وخطبتها ليه وكانت عاجباني بزاف وبغيتها غير ايمتا تدخل لهاد الدار، درنا ليهم عرس هضر عليه كلشي اشمنك يا جوق ويا شيخات ويا نكافات جبتهم ليها من المدينة وماكلة حتى شاطت، فرحانة بيها، اوا جات وبقات معانا ماكاملة شهر حتى مضات سنانها، وبدات تنوض الصداع معايا ومع البنات وحتى من مراد ماوقراتوش وباش يبقى زوين مع خوه هز راسو ومشا كرا فالمدينة وكايزورنا مرا مرا فاش تكون هي غايبة عند مها، ماكانتش تحط يديها فالما وكلشي يجيها حتى لرجليها، ومع كانت قارية جوج حروف ويحساب ليها راسها مانعرف شكون، كان يمشي زهير يخدم وفاش يرجع تبدا تبكي وتبوحط عليه وتشكا وتقول مك وخواتاتك دارو وفعلو ليا وحنا يابنيتي وحق هاد النعمة تخرج فيا يلا عمرنا ناهسرناها ولا خسرنا ليها، كانت نادية هي نادية، اللي بغاتو نادية يكون وحتى فاش حملات ماقداتنا فرحة أول حفيد غايتزاد، ولكن تزادو معاه المشاكل، لقات باش تكتفنا وزهير ولا غير تابعها وفينما تشكا ليه يبدا يغوت ويسب ويهددنا غايخلي لينا الدار ويمشي وحتى خواتاتو كان يضربهم بسبابها وهي تجلس ضحك وتشفا وأنا كانت تسخرني وتأمرني كانت دايراني جفاف، حتى لواحد النهار اللي غايفيض الكاس، جا مراد على قبل شي مشاكل فأراضي باه وهي لقاتها فرصة فاش كيغيب راجلها فالخدمة، ومع جا معطل دخل لبيتو ونعس وحنا مشينا للكوري نحلبو البقر ونقيوه ونعطيو للبهايم تعلف، حتى كانسمعو غواتها، رمينا كلشي من يدينا وجينا كانجريو نشوفو شنو كاين، لقينا مراد معاها فالبيت وشادها وهي دايرا صبعها فوذنيها وكاسرة الدنيا ومشعككة وحوايجها حالتهم وولدها صغير كايبكي حداهم، مافهمنا والو، دخلت بيناتهم وهي دير موتة حمار حتى جا راجلها وقالت ليه خوك دخل عليا للبيت وبغا يتعدا عليا 😢 كون تشوفي شنو وقع داك النهار 😢 ناضت المقاتلة بين الخوت ومراد مصدوم ماعرف باش تبلا خلا خوه دار فيه مابغا وركع ليا عند رجليا وكايحلف ليا مادار شي حاجة ولا يقدر يديرها، أنا قلبي كان حاسسني باللي كلشي كذوب وطيحات عليه الباطل ولكن ماكان عندي جهد 😢 وجريت عليه من الدار 😢 وهي فرحات ولقات مابغات ودارتنا بحال الخدامات عندها اهئ يا بنيتي كانت تهز عليا يديها وتعصيني وأنا ماكنت نحل فمي
أنا : 😨 هادي راه شيطانة، وكيفاش خرجو من الدار ومراد رجع ؟
الأم : كانو زايرينها دارهم، وفاش كانت كاتهضر مع ختها وتعاود ليها سمعها راجلها وكحلها عليها وجرا عليها معاهم، وجا طلب مني السماحة، وسافر عند خوه ورجعو بزز حتى طحت مريضة وبداو يقطرو ليا عاد مراد رطاب من جيهتنا ولكن باقي هادشي هازو فقلبو واخا كايخبي، وهي كانت حاملة بالثاني فاش مشات، وأنا وليت نطلب فيه يرجعها ونزاوك ووالديها ديما عندنا ورجعها وماتابتش ولكن ماعرفناش شنو دارت ليه حتى تقلب عاوتاني وهزها وخوا الدار، مشاو ل ***** كراو تما وفاش كاتجي تزورنا ودير المشاكل ماكان لايدوي معاها لايتكلم ولا بحال خاتم فصبعها اللي قالتها ليه يديرها شا شا را را بالمسخوط لاخور مابقيت نحملو ولا نشمو
أنا (تنهدت باسى) : بزاف هاد السيدة والله
الأم : شوفي ابنيتي، نبغيك تعذري رابحة وفوزية على اللي دارو ليك وتانا يا بنيتي سمحي ليا راه اللي عضو الحنش كايخاف من الحبل وفاش تزايدتي معاهم فالهضرة خافو تولي بحال ديك العقرب راه دوزاتها عليهم حتى من ولاد عمامهم حرشاتهم عليهم وخلاوهم فنص الطريق ومشاو تزوجو بنياتي واكلينها 😢 ولكن مراد هضر معانا وفهمنا اش كاين، ديريني ميمتك ابنيتي والبنات خواتاتك وتقربي منهم وتصاحبي معاهم وخلينا نعيشو هانيين وحتى وليدي مسيكين يعيش هاني راه الله اللي عالم بيه وبحالتو، المشاكل فوق راسو وحتى هو ماكرهش كون كان بيخير 😢
أنا : شمن مشاكل؟
الأم : المرحوم فاش مات، ناضو الورثة بغاو الأراضي اللي ضايرين بالدار وحنا مانكسابو والو من غيرهم، قلنا ليهم يخليو لينا غير واحد البقعة وكبرو كرشهم، ومراد صبر تاعيا وناض للمخزن ولقا شي محامي الله يعمر ليه الدار ويرحم ليه الوالدين غايوقف معاه حتى يرجع حقنا، وليدي مكرفس وخير باه غير ضايع 😢 كان كايحلم يكمل قرايتو ويولي طبيب ولكن فاش مات باه خرج من المدرسة وشدو واحد خالو دخلو للبني وهو باش عيشنا ودوك البقيرات كنا نبيعو حليبهم والكباش حتى هوما ولكن داك المسيخيط كان يشفرنا ويعطينا غير اللي بغا ديال الفلوس حيت هو اللي كان مكلف بالبيع ..
الأم : يالاه ابنيتي غانمشي للفرينة حتى تقادي أتاي وجي حدايا ..
هزات داك الخبز اللي عجنات ومشات وخلاتني كانفكر فهضرتها، بصح هاد السيدة عانات مع ولادها وتقادا جهدها معاهم، وديك مرات ولدها عصبوني فعايلها، ناري واش كاين نيت بحالها؟ عمرني تخيلت نتعامل ولا نسمع على هاد النوع بفف بنادم خبيث 😑 صاوبت أتاي وطفيت عليه البوطة بعدما تبخ شوية ومشيت حداها فواحد الدخيلة كانت مقردة وكاترمي الخبز فوق واحد الحاجة دايرا بحال المقلة كبيرة فوق واحد البني بالتراب وفيه القصب وشي جذوع الشجر شاعلة فيهم العافية، عطاتني قعادة جلست فوقها وبقيت كانشوفيها والعرق نازل ليها مع جبهتها بقات فيا مسكينة، سالات البطبوط وهزيتو عليها للكوزينة كلكماتو باش يبقى سخون، وأنا كانحط الكيسان فالصينية وقفات علينا رابحة 😑
رابحة : مي صباح الخير، واش فايقة ولا تانحلم 😮 لالة العروسة فايقة بكري وكاتعاون فالكوزينة من الفوق 😂
أنا : علاش جاتك عجب ولا يا النعاسة 😉
رابحة : تعجبت الصراحة
الأم : فين خواتاتك؟ بغينا نفطرو ومرات خوك جاها الجوع راه ماداقت النعمة من فطور البارح
رابحة : وأنا قلت ليها تغضب عليه؟ جابتها فكرشها، المهم هاهوما تابعيني
الأم : باز واش كاتسكتي 😡 فرحة بنتي سيري فيقي راجلك
رابحة : خويا مازال مافاق ؟
مراد (وقف علينا) : هاهو فايق
هزيت فيه راسي، كان لابس سروال كيطمة كحل وفيه كتبة بيضة وتيشورط بيض مخطط بالكحل، كايشوف فيا وكايبتاسم، مابقاش نزل عينيه وأنا تزنكت وماماه وختو حاضيينا حشمو بلاصتو وخرجو من الكوزينة كايضحكو وأنا ضرت نكمل شغلي، هزيت البطبوط وحطيتو فطبسيل كبير وحطيت فوقو الزبدة كانذوبها، شوية كانحس فنفس سخونة كاضرب فعنقي ..
مراد : فقتي بكري اممم
أنا : مراد بعد عافاك
مراد : اححح على مراد كيف كاتخرج من فمك حسن من ديك كلمة الغول
أنا : مراااد غايشوفنا شي حد
مراد : ههه دابا عاد حشمانة يشوفونا وداك النهار فاش درتي راسك ملوية ليك رجليك ماحشمتيش هاا 😙 دوي
باسني فعنقي وطلعات معايا التبوريشة، وهو مخشي فيا من اللور ماخلا ليا فين نضور، حتى كانسمعو تحنحين ورانا عاد بعد عليا ..
خدوج : خويا نتا هنا ا ح احم جيت نعاون فرحة
مراد : لقيتيني خارج 😉
غمزني ولد الحرام ومشا وهي جات وقفات حدايا كاضحك، هزات الصينية ديال أتاي وأنا ديت طبسيل البطبوط، حطيناهم فوق الطبلة وضرنا عليها، وكيف العادة خالتي هي اللي كاتكب أتاي، تعجبتو فاش قلت خالتي ياك؟ أصلا واخا اللي يوقع كاتبقا مرا كبيرة عليا وواجب نحتارمها وهي اعتاذرات وهادشي كافي باش نسى شنو داز ونبقا معاهم مزيان حتى نسل شوكتي منهم بلا دم كايقوليك الحيلة حسن من العار، بداو كاياكلو ويشربو أتاي، كانت بغات تهضر فوزية وهي تنغزها خالتي وسكتات، أنا حطيت يدي فوق الخبز ويالاه غانقسم منو ومع كان سخون حرقني وخطفت يدي بسرعة، شافني مراد وبدا كايقطع ليا فيه ويحط قدامي وأنا كاناكل بشوية عليا باش مانتحرقش ففمي، شربت جغمة من كاسي وجاني بااااسل 😝 وحطيت الكاس، هزيت فيهم راسهم لقيتهم كايشربوه عادي وفوزية رجعات الكاس للصينية وأنا نفهمها علاش كانت غاتهضر ..
أنا : مانجحتش فاختبار أتاي 😔
الأم : اليوم تخسريه وغدا تقاديه بلا ماتقلقي
فوزية : مادرتيش السكر ؟
أنا : (ضربت جبهتي) نسيتو، غانمشي نجيبو
مشيت كانجري جبتو وعطيتو ليها دارتو وعاود قلبات أتاي، وذقتو وكان مذاقو شوية بعدا على كيف كان ولكن خاصني مازال نتعلم ليه، كملنا الفطور ونضنا جمعنا الماعن ومراد خرج، تكلفت أنا بشقا الدار أنا ورابحة وهاد المرة كاتعاوني ويمكن هي دارت كثر مني.. والبقية مشاو للكوري ..
رابحة : اليوم غايجيو ولاد خويا، وغايرونو عاوتاني هنااا 😠 خاصنا نجمعو كاع داكشي الجديد والمزيان نخبيوه حتى يمشيو
أنا : واخا، نسالي هاد الماعن ونعاونك فيهم
رابحة : لا غير خليك أنا نساليهم دغيا، ونتعانو على قاع الدار نشطبوها
أنا : واخا
كل وحدة تكلفات بحاجة وأنا عجبني الحال، لقيت فاش نتلها وماتعبتش بحال البارح غير هو جاني النعاس، مع مانعستش بالليل وليت واقفة وكانكمع ..
رابحة : جاك النعاس ولا؟
أنا : شوية، (كانتفوه) مع مانعستش بالليل
رابحة : ومالكي على حالتك؟ اش سهرك
أنا : والو غير ماجانيش
رابحة : صافي نوضي دابا نعسي ليك شوية بينما رجعات مي وخواتاتي باش نطيبو الغدا وعنداك تهربي عاوتاني
أنا : ههههه لا لا، المهم يلا جاو فيقيني
رابحة : واخا غير سيري
مشيت نيشان لبيتي وتلاحيت فالناموسية وغفيت، بقيت ناعسة حتى جات فيقاتني ونضت مقلوبة، غسلت وجهي ودخلت معاهم للكوزينة قادو كسكس وبداو عاوتاني كايوريوني وعطاوني الخضرة نقيها وخسرتها ليهم 😂 وداز ليا الموس لصبعي 😢 حتى ناضت فوزية غسلاتو ليا ودارت ليا زعفران طرت ونزلت بالحريق وعكداتو ليا بزيف صغيور ..يتبع